Chikasha Chalwihu

◼ Yishinanyi yamuBayibolu yakundama kukuzatisha maselufoni neyi tudi kukupompa kwawakwaKristu nimumudimu wakushimwina?

‘Yuma Yejima Yikweti Mpinji.’ (Mukwa. 3:1): Maselufoni akwashaña antu kutemesha nsañu hela kuhosha nawakwawu kala mpinji. Ilaña mpinji yikwawu, akwaKristu hiyakeñaña maselufoni awu ayiluwañeshuku. Chakutalilahu, kupompa kwetu himpinji yitwadifukulaña kudi Yehova, kutambwila nshimbi yakuspiritu nikudikolesha wumu namukwawu. (Kuhit. 31:12; Mas. 22:22; Rom. 1:11, 12) Komana kwila tujima jinshiña jetu neyi tunakupompa nikutala mameseji hanyima yakupompa neyi kudi watutemeshela nehi? Neyi kudi yuma yikuletesha tubuli kujima nshiña yetu, tunateli kuyichuna kulonda yibuleña kuvuma nakuluwañesha antu.

‘Ilenu Yuma Yejima Muloña waNsañu Yayiwahi.’ (1 Kor. 9:23): Mpinji yikwawu kwekala yuma yalema yikuletesha kuzatisha selufoni mumudimu wakushimwina. Chakutalilahu, mana kwetu wunakulombola nateli kuzatisha selufoni kulonda yeluki chinakuzatawu akwakushimwina adi mwiluña dikwawu dakushimwinamu. Akwakushimwina mpinji yikwawu azatishaña selufoni yawu kulonda amutemesheli muntu wukweti mpwila yakudiza hela kadizi waBayibolu henohu kanda ayi nakumutala, sweje-e neyi washakamaña kwakulehi. Neyi tukweti nshiña twatela kubabala kulonda yibuli kutuluwañesha hampinji yitunakuhosha namwiniitala. (2 Kor. 6:3) Hampinji yitunakuhembelela akwakushimwina amakwawu chatela tutemeshi nshiña hela kusonekela amabwambu meseji, kwila tusha maana hamudimu wakushimwina hela kudi antu itunakuzata nawu nehi?

Toñojokelenuku Akwenu. (1 Kor. 10:24; Fwi. 2:4): Bayi neyi twatela kwikala nachaaku chakulaba hakuya kukuhumañana kwakuya mumudimu wamwiha nakutoñojoka netu tunateli kutemesha nshiña hela kumutemeshela muntu meseji kulonda twiluki kunakuzatila izanvuku. Neyi tulabaña, kakavulu izanvu akudambula cheñi. Ilaña, mpinji yikwawu kwekalaña yuma yitunateli kubula kutondolwela yatulabeshaña. Hela chochu, neyi twikala nachaaku chakushikaña swayi, tukumwekesha netu twasha maana kuyuma yatanjikayi Yehova, amana kwetu alombolaña niakwetu akwakushimwina.