Funtilenu Kudi Ejima Anakumwekesha Mpwila
1 Makonu, etu amavulu tudi muchalala muloña kwadiñi muntu wamweni chitwetejeli nsañu yaWanta chiwahi nawa mukuwunda wafuntililuku—hekwawu mapampa kakavulu—kulonda kusañumuna yina mpwila. Anetu nawa twatela kushaku kashinshi kakeni kakufuntila kudi ana anakumwekesha mpwila. Chalala, kufuntila kunabombelewi mumudimu wetu ‘wakwilisha atumbanji.’—Mat. 28:19, 20.
2 Ilukenu Mpwila yaMuntu: Hela chakwila muntu nakaani kutambula mukanda, mmwekenu yehama dindi, ntiyakenu yezu dindi, hela mazu anakuzatishayi anateli kumwekesha nawu nsañu yaWanta wayikeña. Kushindamena hayumiyi tunateli kufuntilaku. Mana kwetu wumu wafuntilili kudi muntu wumu hadi nyilungu yitanu mukulondashana chakadi nikuhanahu mukanda. Hakufuntila kwamuchitanu nakamu, ona muntu watambwili mukanda, nkumininaku kudiza kwaBayibolu kwatachikili.
3 Neyi mumona muntu wunamwekeshi mpwila, funtilenuku swayi, hadaha mumafuku antesha hohu. Bayi mumushila “watama” iluña nakuhukula yinakuwiwu mumuchima wamuntuku. (Mat. 13:19) Hembenu chikupu chikaninu chenu neyi chakwila mwaditejili mpinji yakufuntilaku.—Mat. 5:37.
4 MuMudimu wamuMukwakwa: Komana mwafwilaña kufuntila kudi antu amwekeshaña mpwila hampinji yimwekalaña mumudimu wamumukwakwa hela muwunsahu wamumpanji? Kunsa yampanji yenu, munateli kuhosha nenu: “Mpanji yetu yinawahi nankashi. Kudihi kunatela kuyiwana kulonda twakahanjekuhu cheñi?” Neyi chinatwesheki, akwakushimwina amakwawu afuukulañahu kumwinka mukwakukeña kwakuwahi naambala yanshiña yawu hela kulomba kulonda ahimpashani jinaambala janshiña. Neyi antu akuyimonaña mumudimu wamumukwakwa heluña dimu mpinji yejima, chikwikala chaswayi kuyinka naambala yawu yanshiña hela keyala. Hela chakwila akaana kuyileja wunsahu hachimwatela kuyiwana, chochimu mwatela kuswejesha mpwila yawu mpinji yikwawu yimwakadihumañana nawu mumukwakwa.
5 Chitwamona mbutu yitunadimi nawa yitunatukumwini hiyikukula chiwahi, chatuzañaleshaña hama. Munjila yoyimu, tunateli kwikala namuzañalu weneni kuhitila mukufuntila nikukwashaku antu kukuula lwakuspiritu. (1 Kor. 3:6) Ilenu chikali hichikonkwanyi chenu chakufuntila kudi antu amwekeshaña mpwila.