Chikasha Chalwihu
◼ Yumanyi yatela kudizawu anyana hakwila apami nakumwiluka Nzambi?
Anvwali akwaKristu azataña nañovu hakwila aleleña anyanawu ‘nakuyibabesha nikuyileja nshimbi jaYehova.’ (Efwes. 6:4) Chakutalilahu, anvwali chayikwashaña neyi atañilaña hamu nsona yefuku nawanyanawu nantetemena. Hampinji yakudifukula kwachisaka nihampinji yikwawu yisaka yinateli kutala hamu vidiyo nikuhanjekahu, kuhanjeka nsañu yamuyibaaba yaYoung People Ask, kuhema chimwenu chinakumwekesha nsañu yamuBayibolu hela kuhitulukamu. Hela chochu, hakwila nawu anyana ‘akuli nakupama,’ mwatela kuyidizisha nsañu yalala yamuBayibolu yakunama.—Heb. 6:1.
Toñojokenu hansañu yitwatañishaña antu amumaluña etu akushimwinamu. Kakavulu twafwilaña kutachika kudizisha antu Bayibolu kuzatisha mukanda waChumanyi Chacheni Chatañishaña Bayibolu? halwendu lwatachi hela hakufuntilaku. Hanyima yakumanisha iwu mukanda, twazatishaña mukanda ‘waShakamenu Mukukeña kwaNzambi.’ Muloñadi? Mukanda waChatañishaña Bayibolu wakwashaña atudizi kwiluka nsañu yalema yamuBayibolu. Mukanda ‘waKukeña kwaNzambi’ wayidizishaña chakuzatisha nshimbi jamuBayibolu muchihandilu chawu. Kudiza nyikanda yejima yiyedi kwakwashaña antu amaha ‘kushimata’ mudi Kristu ‘nikukola muchikuhwelelu.’ (Kol. 2:6, 7) Komana iyi nyikanda kwila yikwasha cheñi nianyanetu nehi? Niwena twatela kuyidizisha hansañu yefutu danyiloña, haWanta nichekalawu afu. Anyana niwena atela kwiluka Nzambi chetejelayi makabi nikwiluka nawu tunakushakama mumafuku akukuminina akanu kaayi. Atela kwiluka chikupu nawu aYinsahu jaYehova diwu atañishaña nsañu yalala. Atwansi atela kwiluka nshimbi jamuBayibolu nikwiluka chakufumba “yitoñojoka yawu.” (Heb. 5:14) Kafwampi anvwali atela kwiluka yaaka nimaana akwetuwu anyanawu. Hela chochu, anyana amavulu akweti maana dichi anateli kutachika kudiza nsañu yamuBayibolu yakunama henohu achidi anyanya.—Luka 2:42, 46, 47.
Nsañu yakudiza yashindamena hamukanda waChatañishaña Bayibolu yatela kukwasha anvwali yikwikalaña hawebu sayiti ya jw.org. Yisaka yinateli kuwana iyi nsañu haWebu sayiti yetu neyi atala hamutu wunakwila nawu NTAÑISHILU YABAYIBOLU > ATWANSI. Kumbidi akaloñesha nsañu yikwawu yakudiza yashindamena hamukanda ‘waKukeña kwaNzambi.’ Kafwampi munateli kuzatisha iyi nyikanda yapulintawu dehi. Anvwali anateli kufuukulahu neyi chakwila akuzatisha iyi nsañu hampinji yaKudifukula kwaChisaka kwamelela, neyi anakudizisha mwanawu nkawindi, hela neyi anakumuleja mwanawu chakudiza nkawindi.