Chimwatela Kulombola Kudifukula kwaChisaka
1. Muloñadi nyikanda yetu yikwawu chayisonekelañawu?
1 Munyikanda yetu yayivulu mwekala nsañu yasonekawu kulonda yikwasheña anyana nianvwali jawu akundameña kudi wumu namukwawu nikudi Yehova. (Kuhit. 6:6, 7) Munateli kuzatisha ñahi yuma yimukweti hakudizisha anyanenu?
2. Munateli kutonda ñahi nsañu yatelela yimwatela kudiza nawanyanenu kwesekeja nayaaka yikwetuwu?
2 Himpenuña Njila Yakudizishilamu: Mwana wudi wejima wekala wambukaku. (1 Kor. 13:11) Hanu dinu, munateli kutonda ñahi nsañu yatela kwesekana nayaaka yikwetuwu anyanenu? Dihulenu nenu: ‘Nsañwinyi yikuyitiyisha anyanami kuwaha? Nsañu yishika hadihi yikutiyawu? Atela kushakama nakutiyilila kushika mpinjinyi?’ Neyi mudi nawanyana akweti yaaka yisatu hela kufuta mwishina, munateli kudiza nsañu yidi hamutu wakwila nawu “Yuma Yinadizaña muBayibolu” haWebu sayiti yetu. Yisaka yikwawu yatiyaña kuwaha kudiza mpanji jamuBayibolu muchibalu chakwila nawu “Dizishenu Anyanenu.” Talenu cheñi haniji njila jidi heshina.
3. Mpinji yakudifukula kwachisaka himpinji yakwila yumanyi?
3 Yisaka yikwawu yaloñeshelaña hamu nsañu yakudiza hakupompa kwachipompelu. Hela chakwila iyi njila yayiwahi, kudi yuma yikwawu cheñi yimwatela kwila hakudifukula kwachisaka. Kudifukula kwetu kwachisaka bayi kwikalaña neyi kupompa kwachipompeluku. Mpinji yakudifukula kwachisaka himpinji yakuhanjeka nakushimuna yuma yidi munyichima yetu. Diyi mpinji yitwatela kutoñojoka chikupu nikuhanjeka hayuma yatuzañaleshaña. Neyi chochekala kutota wuchi mumwoma, kwiluka chinakutoñojoka mwana hayuma yalema kwakeñekaña kushaku kashinshi nawa mwafumaña yuma yayiwahi. Mpinji yakudifukula kwachisaka yatela kwikala mpinji yatela kuzañalala muntu wejima muchisaka.
4. Anvwali anateli kuzatisha ñahi yitoñojoka yawu yakufwikija hampinji yinakuloñeshawu kudifukula kwachisaka?
4 Anvwali, Zatishenuña Wuswa Wenu Wakufwikija: Neyi mukweti anyana anyanya shinshikenu hanjila jidi heshina:
• Loñeshenu Chisela chinakuhosha hansañu yamuBayibolu. Komana mwanenu nateli kuvwala nikwimbujola muntu washimunawu muBayibolu? Komana anyana amakwawu anateli kumwiluka?
• Leñenu nyevulu yamunyikanda yetu. Anukenu nenu: Hanyevulu asonekañahu mazu wanyi, dichi munateli kuzatisha yipapilu yawulombu yidi muAwake! yaChizungu. Komana munateli kulamika iyi nyevulu mwitala denu?
• Ilenu yuma yinateli kuleñela anyana afwikijeña yuma chiyadiña. Yihulenu ashimuni chahandileñawu nichatiyileña antu adi neyi Nowa, Mosi, Yosefu, Mariya, Petulu niantu amakwawu.
• Tañilenu hamu yibaaba yimunatondi.
• Dizenuña kwimba Tumina twaWanta. Komana munateli kulanda hela kutuña kachisanji kumwatela kuzatishaña hakwimba?
5. Muloñadi anvwali chiyatela kumulomba Yehova kulonda yayikwashi adizishi anyanawu nsañu yalala?
5 Anvwali, Yehova nakukeña nindi mwikali amama jawantu niatata jawantu amawahi. Dichi mulombenuña kulonda yayikwashi mudizisheña anyanenu nsañu yalala. (Ansomp. 13:8) Yehova nateli kuyikwasha mudizishi anyanenu kulonda aheti ‘maana akumona nachu wamwinu, kuhitila mukukuhwelela Kristu Yesu.’—2 Tim. 3:15; Yish. 4:1-4.