Tumina Twatuha Tutukwimbaña Hakudifukula!
1 Hakubulakana kwahachaaka kwadiñaku katataka haOctober 4, 2014, kwawaWatch Tower Bible and Tract Society of Pennsylvania, abidikili ntanjikilu yakusoneka chachiha mukanda wetu wakamina. Iyi nsañu yatuzañalesheli nankashi! Ejima apompeli ayanukishili nawu tumina twetu twaWanta twalema nankashi mukudifukula kwetu.—Mas. 96:2.
2 Hadaha mukudihula nenu, ‘Chumanyi chinaleteshi asoneki chachiha mukanda wakamina?’ Kudi yuma yayivulu yinaleteshi. Chatachi, ntiyishilu yetu yaNsona yinakutwalekahu kuhimpika, dikwila nawu nimazu adi mutumina twetu atela kuhimpika. (Yish. 4:18) Chuma chikwawu chinaleteshi, mazu amavulu ekala mumukanda wutunakuzatisha wakamina ayifumisha muBayibolu yayikulu yaNew World Translation. Awa mazu atela kuyihimpa kulonda esekani namazu aBayibolu yayiha. Chineli mudimu wakuhimpa mazu chachiha weneni, twafuukwili kubombelahu tumina tukwawu twantesha mumukanda wakamina.
3 Komana tukuhembelelaña hohu sampu mukanda watumina twatuha wunediki mwaka dinu twakatachikeña kwimba tumina twatuha? Inehi. Tudi amuzañalu hakuyileja netu mutukweji tunakwinza, tumina twatuha akatwisha haWebu sayiti yetu ya jw.org/lun. Neyi kamina kakaha kanediki, akakisonekaña kumakumishilu aKupompa kwaMudimu nawu “kamina kakaha.”
4 Chakudiza Tumina Twatuha: Kudiza kamina kakaha kwakala. Hela chochu, kufwana ñimbi yamasamu, tunakukeña twimbeña hakupompa ‘bayi kumwenaku.’ (Mas. 30:12) Neyi munakukeña kudiza kamina kakaha, londelenu iji njila.
Tiyililenu kakavulu kukamina kapiyano kakenkawu haWebu sayiti yetu. Chimwasweja kutiyilila kukamina chikuyikwasha kukanuka.
Dizenu mazu adimu nawa esekenu kuyihembela kumutu.
Chikatachika kuvuma ninenu nawa londelenumu namazu amukamina. Imbenuña hohu sampu munakiluki.
Ikalenu nakapinji kantesha hampinji yaKudifukula kwaChisaka kulonda mudizi tumina twatuha sampu chisaka chenu chinatwiluki.
5 Mutukweji twakumbidi neyi Kupompa kwaMudimu kukamanaña nakami kakaha, chipompelu chikatiyililaña kukamina kapiyano kanakwatuwu. Kuhiñahu izaza dikulondela piyano neyi chochitwelaña mpinji yejima.
6 Neyi chimuneluki, kwimba hakupompa kwatuletelaña muzañalu wakwimbila hamu nakumushimeka Yehova. Dichi bayi twikalaña nachaaku chakwideka neyi anatuleji nawu twimbenu kamina hakupompa kwawakwaKristuku.
7 Kudi njila yikwawu mutwatela kumwekeshela netu twalemesha tumina twetu twajila. Hakupompa kwanyanya nikwamaneni avumishaña tumina twatwihi henohu chibalu chakupompa kanda chitachiki. Amanakwetu niahela adihana amukaayi kejima ayaña kuPatterson, New York namali awu nakwimba tumina twatuwahi twakuzatisha hakudifukula. Dichi neyi cheyamani yatuleja nindi tushakami nakutiyilila kutumina tunaloñeshiwu añimbi, twatela kwila munatulejuwu. Neyi twila munatulejuwu, chikutukwasha kuloñesha nyichima yetu kulonda tutiyilili nsañu yikulondelahu.—Ezera 7:10.
8 Tukukunkulula kupompa kwefuku dalelu nakamina kakaha kanakuhosha nawu, “Wanta Wunakuyuula, Winzeña!” Aka kamina kembawu katataka hakubulakana kwahachaaka, akisonekeli kulonda twanakani nachu yaaka 100 yakuyuula kwaWanta.
9 Itu tumina twatuha “hiyuma yayiwahi” yinafumi kudi Yehova. (Mat. 12:35a) Dichi twikalenu namuchima wakudiza itu tumina twatuha nikutwimba chakufuma hamuchima, nakumushimeka chikupu nikumulemesha Nzambi yetu.—Mas. 147:1.