Dizilenuña Kudi Akwakushimwina Akuluka Yitembi

Twalemesha chikupu akwakushimwina akuluka yitembi ekala muchipompelu. Amakwawu anamukalakeli Yehova nakashinshi hadi yaaka yayivulu. Amakwawu dihu hanadiziwu njila jajiwahi jakushimwinamu. Awa akwakushimwina anamoni Yesu chinakulombolayi chipompelu chawakwaKristu munanu mafuku akukuminina kuhitila mukudikita chikupu mumudimu wakushimwina nikwilisha atumbanji. (Mat. 28:19, 20) Neyi anakumona kukala atambwilaña “ñovu jabadika nankashi” kuhitila mukuzata iwu mudimu. (2 Kor. 4:7) Tunateli kudiza yuma yayivulu kudi awa akwakushimwina akuluka yitembi. Neyi kudi antu atela kudizishawu, atiyaña kuwaha kuyidizisha yuma yelukawu. (Mas. 71:18) Dichi twatela kushaku muchima kulonda atudizishi yuma yelukawu. Tunateli kwila ñahi mwenimu?

Neyi Tunakushimwina. Hakwila nawu akwakushimwina amaha hela abula kukuluka yitembi ashimwineña chiwahi mwiha, atela kuyidizisha. Atela kudiza yuma yayivulu kuhitila mukutala chashimwinañawu akwakushimwina apama. (Talenu chibaaba chinakwila nawu, “Twalekenuhu Kwikala Neyena muMudimu waKushimwina” muKaposhi Kakutalila kaFebruary 15, 2015 muparagilafu yamuchisatu heshina damutu wanyanya wunakwila nawu, “Kwashenu Amaha.”) Mwahetelamu ñahi kuhitila mukuzata mwiha nawakwakushimwina akuluka yitembi?

Komana munateli kuleja mukwakushimwina wakuluka yitembi kulonda mwakazati nindi mwiha? Neyi mukwakushimwina wakata hela hikashinakaji, hadaha munateli kulombola kadizi wenu waBayibolu hetala dindi mumpinji mumpinji. Chimwamanisha kudiza, mwihulenu iwu mukwakushimwina kulonda yayileji himwatela kuwahisha.

Ikalenu naMpinji Yakuhanjeka Nawu: Ikalenu nampinji yakuhanjeka nawakwakushimwina akuluka yitembi kulonda muyiluki. Tambikenu wumu kukudifukula kwenu kwachisaka nawa mwihujolenu. Neyi mukwakushimwina wakata hela hikashinakaji, kwila muya nakudifukula kudifukula kwachisaka kwitala dindi nehi? Mwihulenu kulonda yayileji chadiziliyi chalala. Nkiswinyi yinadiluñishiyi? Wuya hambidinyi wamukuloñesha wunamoniyi mwiluña dawu? Muzañalwinyi watiyañayi hakumukalakela Yehova?

Bayi mukuhwelela nenu akuyikwasha muyuma yayivuluku. Neyi chochitwekala wejima wetu, akwakushimwina akuluka yitembi niwena eluka yuma yashiyashana mumudimu wakushimwina. (Rom. 12:6-8) Amakwawu ashinakaja dehi nawa chumichi chinateli kuyileñela kubula kuzata mpinji yeneni nanetu mwiha. Ilaña tunateli kudizila yuma yayivulu kudi wena muloña anamukalakeli Yehova nakashinshi.