Komana Munakuzatishaña maKaadi aKulombola Antu ha JW.ORG?

Chineli lukadi lweneni ludi mukamwihi, mudimu wetu wakushimwina wunakukeñeka kuwuzata mukunyakashana. (Yis 24:11, 12, 20) Hakwila tuyikwashi antu, twatela kuzatisha makaadi akuyilombola Kwizu daNzambi nihawebu sayiti yetu. Iyi kaadi yidi nakoodi yikuyitwala havidiyo yaMuloñadi Wutwatela Kudizila Bayibolu? nihachipapilu chakulombelahu neyi munakukeña kwilukilahu nsañu yayivulu hela kudiza Bayibolu. Antu amakwawu hiyakeñaña kutambula nyikanda yetuku, ilaña akeñaña kuya hawebu sayiti yetu. Bayi mushintajala kuyinka kaadi yakuyilombola nachuku. Bayi muyinka kaadi antu anabuli kumwekesha mpwilaku.

Hampinji yimunakuya kunyidimu yenu, munateli kusañumuna mpwila yamuntu kuhitila mukumuleja nenu: “Nikweti chuma chinnakukeña kuyinka. Iyi kaadi yikuyilombola hawebu sayiti himukuwana nsañu yakadi kufwetesha nimavidiyo akweti nyitu yamboka-mboka.” (Yow 4:7) Chineli itu tumakaadi twanyanya, munateli kusendahu twantesha tumwatela kwinka antu hampinji yejima yimukweti.