Zatishenuña maVidiyo haKudizisha Atudizi aBayibolu

Nyevulu (mavidiyo, mafoto, madayagilamu, mamapu nimachati) yakwashaña muntu wunakumona kutiyishisha nikwanuka yuma yinadiziyi. Yehova, Ntañishi Wabadika, niyena wayizatishili hakushimuna yuma yalema. (Kut 15:5; Yer 18:1-6) NiNtañishi Muneni, Yesu wayizatishileña. (Mat 18:2-6; 22:19-21) Mutapu wumu wanyevulu wunakuzatika nankashi makonu himavidiyo. Komana munakuzatisha chiwahi mavidiyo hakudizisha atudizi aBayibolu?

Analoñeshi mavidiyo 10 akutukwashaña kudizisha chiwahi atudizi nyitu yekala mubuloshuwa yaNsañu Yayiwahi Yinafumi Kudi Nzambi! Kakavulu, mutu wavidiyo wukwesekanaña nalwihu ludi mumazu atamuka adi mubuloshuwa. Buloshuwa yahayozelu akuyisokankesha nanawa mavidiyo kulonda twilukeña hakuyimwekeshela. Kubombelahu, nyikanda yikwawu yidi muChikasha Chetu Chayozelu niyena akuyisokankesha namavidiyo amakwawu.

Komana munakudizisha nsañu yamuBayibolu yinateli kumukalila kadizi kutiyishisha? Indi kwiji kudihu kukala kunakumonayi kadizi wenu? Keñakeñenu vidiyo yinateli kumukwasha ha jw.org/lun niha JW Broadcasting. Hadaha munateli kutala hamu vidiyo nakadizi wenu nikuhanjekahu.

Mavidiyo amaha anakwidikaña kakweji nikakweji. Neyi munakuyitala, toñojokenu chimunateli kuyizatisha hakudizisha.