CHIBAABA CHAKUDIZA 23
“Ijina Deyi Diikali Dajila”
“Ijina deyi, eyi Yehova, dahaya nyaka.”—MAS. 135:13.
KAMINA 10 Mulemeshenu Yehova Nzambi Yetu!
NSAÑU YIDI MUCHIBAABAa
1-2. Nsañwinyi yalemeshawu nankashi aYinsahu jaYehova?
KUDI nsañu yalema yinatukundami makonu, kuhakwilaku chiyuulu chaNzambi nikujilika ijina dindi. Etu aYinsahu jaYehova twahanjekaña nankashi haniyi nyitu. Hela chochu, chumichi chinayi wanyi mukwila nawu kuhakwilaku chiyuulu chaNzambi nikujilika ijina dindi hinsañu yambuka.
2 Wejima wetu tweluka netu ijina daNzambi datela kujilikewa. Tuneluki cheñi netu chiyuulu chaYehova chachiwahi nankashi. Dichi iyi nsañu yejima yalema kudi etu.
3. Yumanyi yabombela mwijina daYehova?
3 Dichi, ijina dakwila nawu Yehova mwabombela yuma yejima yelañayi Nzambi, kushilahu nichayuulañayi. Dichi neyi tuhosha netu kuhakwilaku ijina daYehova kukasawuntu kamwinkañawu dichuma chalema, tunakuhosha cheñi netu twatela kumwekesha netu chiyuulu chaYehova dichachiwahi. Ijina daYehova dinakwendela hamu nachayuulañayi chineli diyi Nyuuli wabadika.—Talenu chikasha chinakwila nawu “Yuma Yinadibombeli muNsañu Yalema.”
4. Masamu 135:13 yahosha nawudi hejina daNzambi, nawa malwihwinyi itukwakula muchinu chibaaba?
4 Ijina daYehova dadimena. (Tañenu Masamu 135:13.) Chumanyi chaletesha ijina daNzambi kwikala dalema? Aditamishili ñahi katachi? Nzambi wajilikaña ñahi ijina dindi? Nawa tunateli kudihakwilaku ñahi? Twakulenu awa malwihu.
KULEMA KWEJINA
5. Antu amakwawu anateli kwihula nawudi neyi atiya nawu ijina daNzambi dikali dajila?
5 “Ijina deyi diikali dajila.” (Mat. 6:9) Ichi dichuma chatachi chahosheliyi Yesu nindi tulombeña. Hanu dinu Yesu watalishili mudihi? Kujilika chuma kwatalisha mukwila nawu chikali chajila chikupu, chakadi majilu hela chitooka. Hela chochu antu amakwawu anateli kwihula nawu, ‘Komana ijina daYehova hidekala dehi dajila, dakadi majilu nawa ditookaku?’ Hakwila twakuli, twatela kutoñojoka ntahi yuma yabombela hejina.
6. Chumanyi chakojejaña ijina kwikala dalema?
6 Ijina dabombelamu yuma yayivulu kubadika hohu kudisoneka hela kudihosha. Talenu chahosha Bayibolu: “Chachiwahi kusha muchima hakutiyakana ijina dadiwahi, bayi hamaheta amavuluku.” (Yish. 22:1; Mukwa. 7:1) Muloñadi ijina chidalemena? Muloña mwabombela chekalayi muntu, chamumonañawu kudi antu amakwawu. Dichi bayi neyi chadisonekañawu ijina hela chaditenañawu dichuma chalemaku, ilaña chuma chasweja kulema hiyuma yatoñojokañawu antu neyi adimona hela atiya odu ijina.
7. Antu atamishaña ñahi ijina daNzambi?
7 Neyi antu anakuhosha makudi hadi Yehova, dikwila nawu anakukeña antu atoñojokeña nawu watama. Neyi ahosha yuma yatama hadi yena, dikwila nawu anakutamisha ijina dindi. Mpinji yatachi yatamishiliwu ijina daNzambi nikuhosha yuma yatama hadi yena yadiña mwitempa daEdeni. Talenu yuma yitwatela kwiluka kutalisha haniyi yuma yatama yahosheliwu.
CHATAMISHILIWU IJINA HAKUSAMBILA
8. Yumanyi yelukiliwu aAdama naEva, nawa malwihwinyi itunateli kwihula?
8 Adama naEva elukili ijina daYehova nawa elukili yuma yayivulu hadi mwini idi ijina. Elukili nawu diyi Nleñi, Wayinkeli wumi, Paradisa yayiwahi nawa wayinkeli ibwambu wawanina. (Kutach. 1:26-28; 2:18) Komana atwalekelihu kutoñojoka hayuma yejima yayinkeliwu kudi Yehova? Komana atwalekelihu kumukeña nikumwekesha kusakilila kudi Yehova? Ñakwilu yamwekeni chelili chilumbu chaNzambi yayeseki.
9. Kwesekeja naKutachika 2:16, 17 ni 3:1-5, Yehova wayilejeli nindidi aAdama naEva, nawa Satana wayiletesheli kutoñojokadi?
9 Tañenu Kutachika 2:16, 17 ni 3:1-5. Satana wazatishili kapela nakumwihula Eva nindi: “Chalala Nzambi nahoshi nindi, Nyitondu yejima yamwitempa bayi mwakayidyaku?” Munilu lwihu mudi makudi adi neyi wulembi wafwana wakusweka. Ilaña Nzambi kwindi wahosheli nindi atela kuda tuhu kwawu nyitondu yejima, kufumishaku hohu mutondu wumu. Adama naEva adiña nawuswa wakuda nyitondu yamboka-mboka yayivulu. (Kutach. 2:9) Chakadi nikujina, Yehova himukwakuhana. Hela chochu, Nzambi wayikaanishili aAdama naEva kuda nyikabu yakumutondu wumu hohu. Ilaña lwihu lwehwiliyi Satana lwahimpili chalala. Satana wayiletesheli kutoñojoka nawu Nzambi wahanaña wanyi. Hadaha Eva wadihwili nindi, ‘Komana kudihu yuma yayiwahi yinakutukanishayi Nzambi?’
10. Satana watamishili ñahi ijina daNzambi, nawa yumanyi yafuminimu?
10 Hayina mpinji, Eva wachidiña nakumwovwahila Yehova. Wamulejeli Satana chahosheliyi Nzambi. Wabombelelihu cheñi nindi hiyatela nikukwata kumutonduku. Welukili nindi neyi abula kumwovwahila Yehova akafwa. Ilaña Satana wahosheli nindi: “Himwakafwaku.” (Kutach. 3:2-4) Satana hahosheleña hohu nindi Yehova watwambiliku. Ilaña watamishileña ijina daNzambi, munjila yikwawu wamulejeleña Eva nindi Yehova hisakutwamba. Dihafumini Satana kwikala diyabolu hela sakutwamba. Eva amudimbili chikupu; nawa wamukuhweleleli Satana. (1 Tim. 2:14) Wamukuhweleleli nankashi kubadika Yehova. Dichuma chaletesheli Eva kufuukula mwaluwa. Wadikañili naYehova. Wadiili mukabu wamukaanishiliwu kudi Yehova nawu bayi yadaku. Kuhiñahu wamwinkelihu Adama.—Kutach. 3:6.
11. Yumanyi yateleleli kwilawu anvwali jetu, ilaña akañenyi kwiladi?
11 Toñojokenu Eva chateleleli kumwakulayi Satana. Fwikijenu neyi wahosheli nindi: “Nakwiluki wanyi, ilaña namwiluka Tata yami, Yehova, namukeña nawa namukuhwelela. Watwinka naAdama yuma yejima yitukweti. Yeyinyi hakwila wuhoshi yuma yatama hadi yena? Fumaku aha!” Yehova wadi kuzañalala hakutiya mwanindi wamumbanda nakuhosha muniyi njila. (Yish. 27:11) Ilaña Eva hamukeñeli Yehovaku; hela tuhu Adama. Chineli hiyamukeñeli Tata yawuku, Adama naEva akañenyi kuhakwilaku ijina dindi kunana makudi.
12. Satana washili ñahi kujinoka mudi Eva, nawa Adama naEva akañenyi kwiladi?
12 Neyi chitunamoni, Satana wasambilili kusha kujinoka mudi Eva. Wamukojejeli Eva kujinoka neyi chakwila Yehova wadiña Tata yetu wamuwahi. Chafuminimu Adama naEva akañenyi kuhakwilaku ijina daYehova kumakudi aSatana. Etejeli yitoñojoka yatama yaSatana yakudikaña naTata yawu. Nimakonu Satana wazatishaña tufuta totumu. Watamishaña ijina daYehova kuhitila mukumutwambila. Antu akuhwelelaña mumakudi aSatana ayiluwañeshaña kulonda akaani chiyuulu chaYehova chaloña.
YEHOVA WAJILIKAÑA IJINA DINDI
13. Indi Ezekeli 36:23 yinamwekeshi nsañwinyi yalema yamuBayibolu?
13 Komana Yehova weteja awa makudi chakadi kudihakwilaku? Inehi, dichelayi wanyi. Nsañu yejima yamuBayibolu yahoshaña hadi Yehova chanahakwiliku ijina dindi kukasawuntu kamwililiwu mwitempa daEdeni. (Kutach. 3:15) Muwihi tunateli kuhosha haniyi nsañu yamuBayibolu muniyi njila: Yehova wajilikaña ijina dindi kuhitila muWanta wunakuyuulawu kudi Mwanindi nikuleta kuloña nikuwunda hamaseki. Bayibolu yikweti nsañu yatukwashaña kwiluka Yehova chajilikañayi ijina dindi.—Tañenu Ezekeli 36:23.
14. Chuma cheliliyi Yehova hadikañili yileñaleña muEdeni chinajiliki ñahi ijina dindi?
14 Satana wesekaña nañovu kulonda yamukañeshi Yehova kushikija nkeñelu Yindi. Ilaña nakañanyi. Yuma yasonekawu muBayibolu yamwekeshaña chelañayi Yehova nawa yamwekeshaña nawu kwosi muntu wunateli kwesekana naYehova Nzambiku. Mwamweni, kudikaña kwaSatana nikwawantu ejima amulondelaña kwamuneñeshaña chikupu Yehova. (Mas. 78:40) Hela chochu, namanishi iku kukala munjila yamaana, yakudiwunjika nawa yawuñanji. Namwekeshi cheñi munjila jajivulu nindi wukweti ñovu yabadika. Sweje-e dinu, yuma yejima yelañayi yamwekeshaña nawu wukweti kukeña. (1 Yow. 4:8) Yehova natwalekihu kudikita kulonda yajiliki ijina dindi.
Satana wamudimbili Eva kutalisha hadi Yehova nawa hadi yaaka yayivulu yinahitihu, Satana natwalekihu kumutwambila Yehova (Talenu maparagilafu 9-10, 15)c
15. Satana nakutamisha ñahi ijina daNzambi, nawa yumanyi yinakufumamu?
15 Nimakonu Satana natwalekihu kutamisha ijina daNzambi. Waleteshaña antu kujinooka nawu Nzambi hakweti ñovu, wuñanji, maana hela kukeñaku. Chakutalilahu, Satana wadimbaña antu kubula kukuhwelela nawu Nzambi diyi Nleñi. Nawa neyi antu akuhwelela nawu Nzambi wekala kwoku, Satana wayileteshaña kukuhwelela nawu nshimbi jaNzambi jakala nawa nindi jajiwahi wanyi. Cheñi wayitañishaña nindi Yehova hiNzambi wabula luwi nawa watama muchima wochaña antu mukesi kahelu. Neyi akuhwelela munawa makudi, chekalaña chaswayi kukaana chiyuulu chaYehova chaloña. Chineli Satana kanda amushindi, wukutwalekahu kuhosha makudi nawa wukukeñaña nindi ninenu mumukaani Yehova. Komana wukutwesha?
MUDIMU WUMUKWETI HANIYI NSAÑU YALEMA
16. Yumanyi yimwatela kwila yakañenyi kwilawu aAdama naEva?
16 Yehova weteja antu abula kuwanina kuzataku mudimu wakujilika ijina dindi. Dichi munateli kwila yuma yakañenyi kwilawu aAdama naEva. Hichikweti muloña nakaayi mumwashakama mudi antu asawulaña ijina daYehovaku, ilaña munateli kuhakwilaku ijina daYehova nikuleja antu nenu Yehova wajila, waloña, wamuwahi nawa wukweti kukeña. (Isa. 29:23) Munateli kuhakwilaku chiyuulu chindi. Munateli kukwasha antu kwiluka nawu chiyuulu chindi hohu dichaloña nawa dichakaleta kuwunda nimuzañalu kudi yileñaleña yejima.—Mas. 37:9, 37; 146:5, 6, 10.
17. Yesu welili ñahi hakwila nawu ijina daTata yindi adiluki?
17 Neyi tuhakwilaku ijina daYehova, tunakwimbujola chakutalilahu chaYesu Kristu. (Yow. 17:26) Yesu wayilejeli antu ijina daTata yindi kuhitila mukudizatisha nikuyileja kulonda eluki chekalayi Yehova. Chakutalilahu, wayikonkolweli Afwarisi amwekesheleña nawu Yehova wazuwa, wakeñaña yuma yitukubula kutwesha kwila, wudi hahalehi nawantu nawa wudana luwi. Yesu wakwashili antu kwiluka nawu Tata yindi watoñojokelañaku, wadiwunjika, wukweti kukeña nawa wanakenaña. Nawa wakwashili antu kumwiluka Yehova kuhitila mukwimbujola yilwilu yaTata muchihandilu chindi chejima.—Yow. 14:9.
18. Tunateli kufuñununa ñahi makudi nikasawuntu kamwinkañawu Yehova?
18 Kufwana Yesu tunateli kuyileja antu yuma yitweluka hadi Yehova, kuyileja netu hiNzambi wukweti kukeña niluwi. Neyi twila mwenimu dikwila nawu tunakufumisha makudi nikasawuntu kamwinkañawu Yehova. Tunakujilika ijina daYehova kulonda dikali dajila muyitoñojoka nimunyichima yawantu. Tunateli cheñi kumwimbujola Yehova. Hela chakwila twawanina wanyi, tunateli kumwimbujola. (Efwe. 5:1, 2) Neyi tumwekesha chekalayi Yehova kudi antu mumazu niyilwilu yetu, dikwila nawu tunakujilika ijina dindi. Twalemeshaña idi ijina kuhitila mukukwasha antu kulonda eluki chekalayi Nzambi.b Twamwekeshaña cheñi netu antu abula kuwanina anateli kutwalekahu kwikala ashinshika kudi Nzambi.—Yoba 27:5.
Tunakufwila kukwasha atudizi etu aBayibolu kulonda eluki chekala yilwilu yaYehova (Talenu maparagilafu 18-19)d
19. Kwesekeja naIsaya 63:7, yumanyi yitwatela kuhoshahu nankashi muntañishilu yetu?
19 Talenu cheñi chuma chikwawu chitwatela kwila. Neyi tunakudizisha antu chalala chamuBayibolu, twakonkomwenaña hachiyuulu chaNzambi, netu Yehova hohu diyi wukweti wuswa wakuyuula kaayi, nawa imu dimu. Hela chakwila chalema kuyileja kulonda ashindameneña hanshimbi jaNzambi, chuma chitwafwilaña nankashi hikuyikwasha kumukeña Yehova, Tata yetu nikwikala ashinshika kudi yena. Twatela kuhoshaña hayilwilu yayiwahi yikwetiyi Yehova, nikukonkomwena hachekalayi muntu wukweti ijina daYehova. (Tañenu Isaya 63:7.) Neyi tuyidizishaña muniyi njila, tukukwasha antu kumukeña Yehova nikumwovwahila muloña anakukeña kwikala ashinshika kudi yena.
20. Yumanyi yitukahanjekahu muchibaaba chinalondelihu?
20 Hanu dinu tunateli kumwekesha ñahi netu yilwilu yetu nintañishilu yetu yinateli kukwasha antu kutoñojoka yuma yayiwahi hadi Yehova? Chibaaba chinalondelihu chikakula ilu lwihu.
KAMINA 2 Iyeyi Yehova
a Nsañwinyi yalema yinakundami antu niañelu? Chumanyi chinaleteshi iyi nsañu kwikala yalema, nawa yinatukundami ñahi? Kwiluka ñakwilu yanawa malwihu nimalwihu amakwawu anakundami kuniyi nsañu, kukutukwasha kukolesha wubwambu wetu naYehova.
b Mpinji yikwawu nyikanda yetu yahosheleña nawu hitwatela kuhosha netu ijina daYehova dilemeshewiku muloña kwosi muntu wahoshahu dehi nindi Nzambi wudana wuswa wakwikala nejina dakwila nawu Yehova. Hela chochu, hakubulakana kwahachaaka kwamu 2017 ahimpili ntiyishilu yetu. Cheyamani wahosheli nindi: “Chatama wanyi neyi tuhosha netu tunakulomba ijina daYehova dikali dalema muloña ñimenu yindi yinakukeñeka kulemeshewa.”—Talenu progilamu yaJanuary 2018 ha jw.org®. Talenu hanasonekiwu nawu LIBRARY > JW BROADCASTING®.
c KULUMBULULA NYEVULU: Diyabolu watamishili ijina daNzambi, wamulejeli Eva nindi Nzambi hisakutwamba. Hadi yaaka yayivulu yinahitihu, Satana natandishi makudi, adi neyi ntañishilu yakwila nawu Nzambi watama nawa nindi Hidiyi waleñeli antuku.
d KULUMBULULA NYEVULU: Hampinji yinakudizishayi kadizi waBayibolu, manakwetu nakukonkomwena hayilwilu yaNzambi.