Chumanyi Chashimunaña Mbidi Yenu?
Antu amavulu akuhwelela nawu ñovu yabulaña kumwekana diyi yayilejaña yuma yikamwekana muchihandilu chawu. Yitoñojoka yamuchidiwu diyayileteshaña kwila yuma yashiyashana yatoñojokañawu nawu yikuyiletesha kwikala akooleka hela kuhimpa chihandilu chawu.
YUMA YAKUHWELELAWU ANTU AMAVULU
AKWAKUHOÑA NATUTUMBWA: Antu amavulu akuhwelela nawu kwesekeja neluña hadi tutumbwa hampinji yinakusemukayi muntu yamwekeshaña yuma yikamumwekena kumbidi. Ehulaña akwakuhoña natutumbwa hela kutaña mahoroscope, kulonda ayileji yuma yikayimwekena nawa yiyikwashi kufuukula chiwahi.
FENG SHUI: Amakwawu akuhwelela nawu neyi atuña matala awu munjila yambukaku chikuyiletesha kwikala namuzañalu. Lo Wing,a washakamaña kuHong Kong, wahosheli nindi, “Muntu welukisha jafeng shui wanlejeli nindi neyi nisha kadilola heluña hatelela musitolu yami chikunkwasha kwikala namali amavulu.”
KUDIFUKULA KUDI ANKAKULULA: Antu amakwawu akuhwelela nawu hakwila ekali akiñewa nawa ekali nankisu atela kuzañalesha afu hela anzambi ashiyashana. Van, washakamaña kuVietnam, wahosheli nindi, “Nakuhwelela nami kulemesha antaña jami afwa dehi kunateli kunkwasha kwikala nachihandilu chachiwahi chayinu mpinji nikwikala nachihandilu chachiwahi hamu nawanyanami.”
KUSAÑUKILA MUCHUMA CHACHEÑI: Antu amavulu akuhwelela nawu muntu neyi nafwi wasemukaña cheñi, nawa chumichi chatwalekañahu kumwekana. Akuhwelela nawu yuma yelileñawu kunyima diyayileteshaña amoneña yuma yayiwahi hela yatama chayinu mpinji.
Hela chochu, antu amavulu hiyakuhwelela muniyi yumaku. Ilaña atwalekañahu kuhoña namakasa, namahoroscope, Ouija® board, jiñombu, makaadi niyuma yikwawu. Atoñojokaña nawu hadaha iyi yuma yinateli kuyikwasha kwiluka yuma yikayimwekena kumbidi.
KOMANA IYI YUMA YAKUHWELELAWU YAYIKWASHAÑA?
Komana antu akuhwelelaña iyi yuma nawa ayilaña ekalaña nachihandilu chachiwahi nimbidi yakiñewa?
Talenu chuma chamumwekeneni Hào, washakamaña kuVietnam. Wayileña kudi akwakuhoña natutumbwa, feng shui, nawa wadifukwileña kudi antu afwa dehi kulonda amukwashi. Komana iyi yuma yamukwashili? Hào wahosheli nindi, “Mudimu wami wakulanda nakulandulula wafuntili hanyima, neñilili munyikudi, twalekeli kutiyashana muchisaka nawa naneñeleña nankashi.”
Qiuming, wakuTaiwan, niyena wakuhweleli mukuhoña natutumbwa, mukusemukila muchuma chikwawu, kukuhwelela nindi yuma ayifuukwili dehi, feng shui, nimukudifukula kudi antu afwa dehi. Chashinshikiliyi haniyi yuma yakuhweleleliyi, wahosheli nindi: “Nelukili nami ntañishilu yamuchidiwu nitushidikilu twamuchidiwu twaditadikishaña twatweni nawa twakala kutiyishisha. Nelukili nami yuma yahosheleñawu akwakuhoña natutumbwa yadiña yakutwamba. Ntañishilu yakwila nawu chuma chasemukilaña muchuma chikwawu, neyi wukwanuka wanyi chadiña chihandilu cheyi kunyima wunateli kuhimpa ñahi kulonda wuwahishi chihandilu cheyi chikwawu?”
“Nelukili nami ntañishilu yamuchidiwu nitushidikilu twamuchidiwu twaditadikishaña twatweni nawa twakala kutiyishisha.”—QIUMING, TAIWAN
Hào, Qiuming, niantu amakwawu aneluki nawu, tutumbwa, antu afwa dehi hela yitoñojoka yakwila nawu chuma chasemukilaña muchuma chikwawu niyitoñojoka yakwila nawu chuma achifuukwili dehi hiyatulejaña yuma yikatumwekena kumbidiku. Komana chumichi chinatalishi mukwila nawu hitunateli kuwahisha chihandilu chetuku?
Antu amavulu atoñojokaña nawu hakwila akekali nachihandilu chachiwahi atela kutaña mashikola nikwikala namali chuma chayimwekeneni antu amakwawu afuukwilihu muniyi njila?
a Majina amakwawu anayihimpi muchinu chibaaba nichibaaba chinalondelihu.
b Awa mazu ayisoneka muBayibolu AÑalija 6:7. Awa mazu ayihosha munjila yelukawu antu amavulu nawu. Chiwatumba ihapwa, mwakedika ihapwa; chiwatumba makundi, wakañula makundi.