Komana Munadiloñeshi Kudihana Enu Aweni Kudi Yehova?

1-2. Chumanyi chatela kwilayi muntu henohu kanda apapatishewi?

HADI yaaka yitanu yinahitihu, antu amavulu nankashi anapapatishewi nakwikala aYinsahu jaYehova. Kufwana kambanji Timotewu, wadiñaku mumafuku awapostolu, amavulu hadi awa antu ayidizishili chalala “kufuma kuwukeki.” (2 Tim. 3:​14, 15) Amakwawu amwilukili Yehova henohu anakuli dehi, nawa amakwawu niwena henohu anashinakaji. Yaaka yantesha yinahitihu, mumbanda wumu wadizileña Bayibolu nawaYinsahu jaYehova wapapatisheweli nayaaka 97!

² Neyi munakudiza Bayibolu indi kwiji anvwali jenu ayihembaña hiyaYinsahu, komana munakutoñojoka kupapatishewa? Ichi hichuma chachiwahi nankashi chimwatela kwila! Hela chochu, henohu kanda mupapatishewi mwatela kusambila kudihana enu aweni kudi Yehova. Achinu chibaaba chikulumbulula mwatalisha kudihana kudi Nzambi. Chikuyikwasha cheñi kwiluka muloña waweni wumwatela kubulila kushintajala kudihana nikupapatishewa neyi munadiloñeshi dehi kwila mwenimu.

KUDIHANA KWATALISHA MUDIHI?

3. Shimunenu yakutalilahu yawantu ashimunawu muBayibolu adihanini kudi Yehova.

³ Kwesekeja nachashimuna Bayibolu, muntu wadihanineña kudi Yehova amutondeleña kulonda akalakali mudimu wadimena. AIsarela adiña muza wadihanini kudi Yehova. Ilaña antu amu muniwu muza adihanini kudi Yehova munjila yadimena. Chakutalilahu, Aroni wavwalileña “chinjikijilu chajila chakudihana,” dikwila nawu, ilata dawuru yakutookesha dakekema dashileñayi hambidi yachitambala chindi. Idi ilata dawuru damwekesheleña nawu amutondeli kuzata mudimu wadimena, dikwila nawu kwikala kapristu muneni wawaIsarela. (Lev. 8:9) ANaziri niwena adihanineña kudi Yehova munjila yadimena. Izu dakwila nawu “kaNaziri,” dafuma kwizu dachiHeberu dakwila nawu nazir, datalisha mukwila nawu “Muntu Wunadaambuli,” hela “Muntu Wunadihani.” ANaziri ayilejeli nawu atela kwovwahila nshimbi jadimena jasonekeliwu muNshimbi jaMosi.​—Kuch. 6:​2-8.

4. (a) Munjilanyi ana adihanaña kudi Yehova chayitondelañawu kuzata mudimu wadimena? (b) Kudibonda eyi aweni kwatalisha mudihi? (Talenu cheñi mwevulu.)

⁴ Neyi mudihana enu aweni kudi Yehova, munafuukulihu kwikala kambanji kaYesu Kristu nikutwamijaku kwila nkeñelu yaNzambi muchihandilu chenu. Chumanyi chimwatela kwila hakwila mwiikali mukaKristu wadihana? Yesu wahosheli nindi: “Neyi muntu nakukeña kunlondela, adibondi yomweni.” (Mat. 16:24) Mazu achiGiriki abalumunawu nawu “adibondi yomweni” anateli kuyibalumuna cheñi nawu “kubula kudihandila eyi aweni.” Chineli mudi kambuña aYehova wadihana, mwatela kukaana yuma yejima yamuneñeshaña Yehova. (2 Kor. 5:​14, 15) Kwila mwenimu munabombeli kukaana “nyidimu yakumujimba,” chidi neyi wuvumbi. (Ñal. 5:​19-​21; 1 Kor. 6:​18) Komana kwovwahila iji nshimbi kukusha chihandilu chenu mumpompa? Kukusha chihandilu chenu mumpompa wanyi neyi chakwila mwamukeña Yehova nawa munakuhweleli nenu mukwovwahila nshimbi jindi mukufuma yuma yayiwahi. (Mas. 119:97; Isa. 48:​17, 18) Manakwetu Nicholas wahosheli nindi, “Munateli kumona nshimbi jaYehova neyi yikuñu yakukaleya yinakuyikañesha kwila yuma yimunakukeña kwila hela neyi yikuñu yajikawu mwiluña mwahembelañawu mutupa yinakuyikiña kuwubanji.”

5. (a) Munateli kudihana ñahi kudi Yehova? (b) Chaambwinyi chekala hakachi kakudihana nakupapatishewa? (Talenu cheñi mwevulu.)

⁵ Munateli kudihana ñahi kudi Yehova? Mukumukana mukulomba nenu mukudifukulaña hohu kudi yena nawa nenu mukutwamijañaku kwila nkeñelu yindi muchihandilu chenu. Mwamweni, munakumukana Yehova nenu mukutwalekahu kumukeña ‘namuchima wenu wejima, nawumi wenu wejima, nayitoñojoka yenu yejima ninañovu jenu jejima.’ (Maku 12:30) Mwatela kudihanina kwakankawenu, kumudi hohu enu naYehova. Kwambukaku, chipapatishu chekalilaña hadi antu amavulu, muloña chamwekeshaña kudi antu nawu munadihani kudi Yehova. Kudihana kwenu hichikaninu chajila, nawa mwatela kuchihemba neyi chakeñañayi Yehova nindi muchihembeña.​—Mukwa. 5:​4, 5.

MULOÑADI CHIMWATELA KUDIHANINA ENU AWENI KUDI YEHOVA?

6. Chumanyi chacheni chamuleteshaña muntu kudihana yomweni kudi Yehova?

⁶ Chuma chacheni chaleteshaña mudihani kudi Yehova hikumukeña. Kukeña kwenu hikwashindamena hachimwatiyaña hohuku. Ilaña kwashindamena ‘hakwiluka kwalala’ “nikutiyishisha yuma yakuspiritu”, dikwila nawu yuma yimwadizili hadi Yehova yayiletesheli musweji kumukeña. (Kol. 1:9) Kudiza Nsona kunayikwashi kukuhwelela chikupu nenu (1) Yehova wekala kwoku, (2) Bayibolu hiIzu dindi donenewa, nawa (3) wazatishaña kuloñesha kwindi hakushikija nkeñelu yindi.

7. Yumanyi yitwatela kwila henohu kanda tudihani kudi Nzambi?

⁷ Antu adihanaña awenawu kudi Yehova atela kwiluka ntañishilu yalema yakutachikilahu yekala Mwizu daNzambi nikuhanda kwesekeja nanshimbi jaNzambi. Azataña hakumina ñovu jawu kuleja antu yuma yakuhwelelawu. (Mat. 28:​19, 20) Aswejelañaku kumukeña Yehova nawa chuma chafwilañawu chikupu hikudifukula hohu kudi yena. Komana ninenu dichuma chimunakufwila kwila? Neyi mwikala nakukeña kwamuchidiwu, mukumonaña wanyi nenu kudihana nikupapatishewa hiyuma yimwatela kwila kulonda mutiyishi kuwaha muntu wayidizishaña Bayibolu hela anvwali jenu. Nawa himukumonaña nenu diyuma yimwatela kwila muloña wakwila akwenu niwena dichinakwilawuku.

8. Kumwekesha kusakilila kukuyikwasha ñahi kufuukulahu kudihana enu aweni kudi Yehova? (Isamu 116:​12-​14)

⁸ Munateli kufuukulahu kudihana enu aweni kudi Yehova neyi mutoñojokaña hayuma yinayililiyi. (Tañenu Isamu 116:​12-​14.) Bayibolu yamutena Yehova nawu hiMukakuhana “chawaana chejima chachiwahi nichawaana chejima chabadika kuwaha.” (Yak. 1:​17) Chawaana chasweja kulema haniyi yawaana himulambu waMwanindi, Yesu. Toñojokenu hachumichi! Ifutu danyiloña didinaleteshi mwiikali nawubwambu wawuwahi naYehova. Nawa nayinki kukooleka kwakushakama haya nyaaka. (1 Yow. 4:​9, 10, 19) Kudihana enu aweni kudi Yehova hinjila yimukumwekeshelamu kusakilila hakukeña kwindi kwabadika kwayimwekeshelayi niyuma yikwawu yayiwahi yayililayi. (Kuhit. 16:17; 2 Kor. 5:​15) Njila jimwatela kumwekeshalamu iku kusakilila anajishimuni mukudiza 46 chikuma 4, mumukanda waMunateli Kwikala naMuzañalu Haya Nyaaka! mudi niVidiyo yamaminiti asatu yaKuhana Yawaana Yenu Kudi Nzambi.

MUNADILOÑESHI KUDIHANA NIKUPAPATISHEWA?

9. Muloñadi muntu chatela kubulilayi kudihana muloña wakwila hohu nakumona akwawu anakudihana?

⁹ Munateli kutoñojoka nenu kanda mudiloñeshi kudihana nikupapatishewa. Hadaha kudi yuma yimunakukeña kuhimpa muchihandilu chenu kulonda mwovwahileña nshimbi jaYehova, indi kwiji munakukeñeka mpinji yeneni kulonda mukoleshelimu chikuhwelelu chenu. (Kol. 2:​6, 7) Bayi neyi atudizi ejima apamaña kuspiritu munjila yoyimuku, nawa bayi neyi atwansi ejima adihanaña nikupapatishewa nayaaka yoyimuku. Shinshikenuña chimunakupama kuspiritu kwesekeja nayuma yimukutwesha kwila, nawa bayi mudesekeja nawakwenuku.​—Ñal. 6:​4, 5.

10. Yumanyi yimwatela kwila neyi munakutoñojoka nenu kanda mudiloñeshi kudihana nikupapatishewa? (Talenu cheñi chikasha chinakwila nawu “Atwansi Anakukulishilawu muChalala.”)

¹⁰ Neyi munamoni nenu kanda mudiloñeshi kudihana enu aweni kudi Yehova, twalekenuhu kufwila kushikija ichi chikonkwanyi. Mulombenu Yehova ayikwashi kuhimpa yuma yejima yimwatela kuhimpa muchihandilu chenu. (Fwili. 2:​13; 3:​16) Kuhwelelenu chikupu nenu wukutiya kulomba kwenu nawa wukuyakula.​—1 Yow. 5:​14.

CHALETESHAÑA ANTU AMAKWAWU KUSHINTAJALA

11. Yehova wukutukwasha ñahi kutwalekahu kwikala ashinshika kudi yena?

¹¹ Antu amakwawu anashikihu kupapatishewa ashintajalaña kudihana nikupapatishewa. Anateli kudihula nawu, ‘Indi neyi hanyima yakupapatishewa nikoña nshidi yahamesu bwi-i nawa ahaña muchipompelu?’ Neyi dichimwatoñojokaña, kuhwelelenu nenu Yehova wakayinka yuma yejima yakayikwasha “[kwenda] kwesekeja nanochu chakeñañayi . . . nakumutiyisha kuwaha chikupu.” (Kol. 1:​10) Wakayinka cheñi ñovu yikayikwashaña kwila mwaloña. Wakwashahu dehi antu amavulu kwila mwaloña. (1 Kor. 10:13) Ichi dichuma chimu hayuma yaleteshaña antu antesha hohu ayihañeña muchipompelu chawakaKristu. Yehova wakwashaña antu jindi kutwalekahu kwikala ashinshika.

12. Yumanyi yitwatela kwila hakwila tubuli kukoña nshidi yahamesu bwi-i?

¹² Muntu wejima wabula kuwanina amwesekaña kulonda eli yuma yatama. (Yak. 1:​14) Hela chochu, mwatela kutondahu chuma chimwatela kwila neyi anayeseki. Chalala chidi chakwila nawu iyenu mukweti wuswa wejima wakufuukula yuma yimwatela kwila muchihandilu chenu. Hela chakwila antu amakwawu anateli kutoñojoka nawu kwila mutwesha kuyuula chimwatiyaña niyuma yimwelaña nehi, ilaña munateli kwiluka chakuyuula yitoñojoka yenu yakufwila kwila yuma yatama. Nawa cheñi neyi mudi mukweseka kwakwila chuma chatama, munateli kutondahu kubula kuchiila. Muloña wachumichi, lombenuña mpinji yejima. Twalekenuhu kulondela ntanjikilu yakudiza nkawenu Izu daNzambi. Yenuña kukupompa kwawakaKristu. Lejenuña antu yuma yimwakuhwelela. Neyi mutwalekahu kwila iyi yuma, chikuyikwasha kuhemba chikaninu chenu chakudihana. Nawa anukenuña nenu Yehova wukuyikwashaña kwila mwenimu.​—Ñal. 5:​16.

13. Chumanyi chachiwahi cheliliyi Yosefu chitwatela kwila?

¹³ Neyi mwilukila chadimu chuma chimwakela neyi mudi mukweseka, chakayipelela kuhemba chikaninu chenu chakudihana. Bayibolu yahosha hadi antu amavulu elili mwenimu hela chakwila niwena adiña antu abula kuwanina. Chakutalilahu, ñoda Potifwari wesekeli kakavulu kumudimbeka Yosefu nindi akaami nindi. Ilaña Yosefu hajinokeleña chuma chateleleli kwilayiku. Bayibolu yatuleja nawu “yena wakaanini” nawa wahosheli nindi: “Ami nukukoñeladi chumichi chasweja kutama nakumuvulumuna Nzambi?” (Kutach. 39:​8-​10) Chakadi nikujina, Yosefu welukilili chadimu chuma chadi kwilayi henohu kanda amweseki kudi ñoda Potifwari. Chumichi chamukwashili kwila chuma chaloña hampinji yamwesekeliwu.

14. Chumanyi chitwatela kwila hakwila tukaani kweseka?

¹⁴ Munateli kwila ñahi neyi cheliliyi Yosefu? Ayinu diyi mpinji yimwatela kwiluka chuma chimwakela neyi mwikala mukweseka. Shikenenuña kukaana yuma yahelayi Yehova nikutondolwela kuyitoñojokahu. (Mas. 97:10; 119:165) Chimwela mwenimu, himwakavulumuna neyi anayesekiku. Mwakelukila chadimu chakwila nanoku kweseka, muloña mwakekala adiloñesha.

15. Muntu nateli kumwekesha ñahi nindi ‘nakumukeñakeña chikupu’ Yehova? (AHeberu 11:6)

¹⁵ Hadaha muneluki nenu munawani dehi chalala nawa munakukeña kumukalakela Yehova namuchima wenu wejima, ilaña kudi chuma chinakuyikañesha kudihana nikupapatishewa. Munateli kwila chuma cheliliyi Mwanta Davidi. Munateli kulemba kudi Yehova nenu: “Nshinshiki chikupu mukachi, eyi Nzambi, kulonda wiluki muchima wami. Ntalatali chiwahi, kulonda wiluki yitoñojoka yami yakwakama. Talaku neyi mumuchima wami mudihu njila yatama, nawa nlomboli munjila yahaya nyaaka nanyaaka.” (Mas. 139:​23, 24) Yehova wakiswilaña “antu amukeñakeñaña chikupu.” Chimunakuzata nañovu kushikija chikonkwanyi chenu chakudihana nikupapatishewa, munakumwekesha kudi yena nenu munakumukeñakeña chikupu.​—Tañenu AHeberu 11:6.

TWALEKENUHU KUSWINA KWAKWIHI NAYEHOVA

16-17. Atwansi anakukulishilawu muchalala ayikokaña ñahi kudi Yehova? (Yowanu 6:​44)

¹⁶ Yesu wahosheli nindi atumbanji twindi ayikokaña kudi Yehova. (Tañenu Yowanu 6:​44.) Toñojokenu awa mazu chalemenawu nichinayikundamiwu enu. Yehova wamonañamu chuma chachiwahi mudi muntu-himuntu akokelañayi kwakwihi nayena. Wamumonaña iwu muntu nindi “iheta dindi dadimena,” hela “iheta dindi dalemeshewa.” (Kuhit. 7:6; tth.) Dichayimonañayi ninenu.

¹⁷ Hadaha mudi kansi anakukulishilawu muchalala. Munateli kutoñojoka nenu mwamukalakelaña Yehova hohu muloña anvwali jenu dichelañawu, bayi neyi muloña wakwila Yehova nayikokeli kwakwihi nayenaku. Hela chochu, Bayibolu yahoshaña nawu: “Swinenu kwakwihi naNzambi, niyena wukuswina kwakwihi nanenu.” (Yak. 4:8; 1 Kushi. 28:9) Neyi mutachikilahu kuswina kwakwihi naYehova, niyena wukuswina kwakwihi nanenu. Yehova hayimonaña hohu muloña wakwila mudi hakachi kawantu amakwawuku. Wakokaña muntu-himuntu, kushilahu nimuntu anakukulishilawu muchalala. Neyi iwu muntu atachikilahu kuswina kwakwihi naYehova, niyena waswinaña kwakwihi nayena neyi chitwamona haYakoba 4:8.​—Esekejenu 2 ATesalonika 2:​13.

18. Yumanyi yitwakahanjekahu muchibaaba chinalondelihu? (Isamu 40:8)

¹⁸ Neyi mudihana kudi Yehova nikupapatishewa, mukumwekesha chilwilu chamwekesheliyi Yesu. Wadihanini yomweni chakufuma hamuchima kudi Tata yindi kwila chuma chejima chamulejeliwu kwila. (Tañenu Isamu 40:8; Heb. 10:7) Muchibaaba chinalondelihu, twakahanjeka hayuma yinateli kuyikwasha kutwalekahu kumukalakela Yehova nakashinshi hanyima yakupapatishewa.