Twalekenuhu Kumulondela Yesu Neyi Munapapatishewi Dehi

1-2. Yumanyi yayiwahi yafumañamu neyi muntu apapatishewa?

TWAZAÑALALAÑA neyi tupapatishewa nakwikala muchisaka chaYehova. Apapatishewa dehi akwiteja mazu añimbi yaMasamu, Davidi, wahosheli nindi: “Wudi namuzañalu yowu muntu iwunatondi [eyi Yehova] nikumuleta kulonda ashakami mumalubanza eyi.”​—Mas. 65:4.

² Yehova haletaña muntu wudi wejima mumalubanza indiku. Neyi chitwahanjekeli muchibaaba chinafumihu, waswinaña kwakwihi nawantu amwekeshaña hatooka nawu anakukeña kwikala nawubwambu wakola nayena. (Yak. 4:8) Neyi mudihana enu aweni kudi Yehova nikupapatishewa mukuswina kwakwihi naYehova munjila yadimena. Ilukenu nenu neyi munapapatishewi dehi “[wakayihuñunwina] nkisu yakwila himwakabulahu chuma hela chimuku.”​—Mal. 3:​10; Yere. 17:​7, 8.

3. AkaKristu adihana nikupapatishewa atela kwila chumanyi chalema? (Mukwakutañisha 5:​4, 5)

³ Hela chochu, chipapatishu hintachikilu hohu. Neyi munapapatishewi dehi, mukukeñekaña kuzata nañovu kuhemba chikaninu chenu chakudihana, nihampinji yimunakumona kweseka hela kukala kunakweseka chikuhwelelu chenu. (Tañenu Mukwakutañisha 5:​4, 5.) Hakwikala kambanji kaYesu, mukulondelaña chikupu yuma yelileñayi Yesu ninshimbi jindi. (Mat. 28:​19, 20; 1 Pet. 2:​21) Achinu chibaaba chikuyikwasha chimwatela kwila mwenimu.

TWALEKENUHU KUMULONDELA YESU HELA CHAKWILA MUNAKUMONA KUKALA NIKWESEKA

4. Munjilanyi atumbanji twaYesu mwasendelañawu “mutondu . . . wakuyandishila”? (Luka 9:23)

⁴ Bayi mutoñojoka nenu neyi munapapatishewi dehi mwakamonaña wanyi kukala muchihandilu chenuku. Kafwampi, Yesu wahosheli hatooka nindi atumbanji twindi akasendaña “mutondu . . . wakuyandishila.” Nawa akelaña mwenimu “hefuku-hefuku.” (Tañenu Luka 9:23.) Komana Yesu watalishili mukwila nindi akakumulondela akakabakanaña mpinji yejima? Inehi. Wakonkomweneneña hohu nindi kubombela hayuma yayiwahi yakadiluñishañawu, akamonaña kukala. Kukala kukwawu kunateli kwikala kwayeña.​—2 Tim. 3:​12.

5. Yumanyi yayiwahi yayikanayi Yesu antu adihanaña?

⁵ Hadaha mwamonahu dehi ikañesha dafuminini kudi antaña jenu, indi kwiji munadihani nakuleka kufwilahu yuma yimu yakumujimba kulonda mutwamijiku Wanta waNzambi. (Mat. 6:​33) Neyi dichichidi, ilukenu nenu Yehova wamonaña nyidimu yejima yimwamukalakelaña nakashinshi. (Heb. 6:​10) Hadaha munadimweni enu aweni nenu mazu ahosheliyi Yesu alala, akwila nawu: “Kwosi muntu wunashiyi itala hela amanakwindi hela ahelindi hela mama yindi hela tata yindi hela anyanindi hela maha kukoola ami ninsañu yayiwahi wakabula kutambwila mapampa 100 ayumiyi makonu, matala, amanakwindi, ahelindi, amama jindi, anyana nimaha namakabisha, nawa munshakaminu yinakwinza, wumi wahaya nyaakaku.” (Maku 10:​29, 30) Yuma yayiwahi yimunatambwili yabadika chikupu yuma yidi yejima yimwashiya.​—Mas. 37:4.

6. Muloñadi wumwakakeñekelaña kutwalekahu kulwisha “[nayuma] yafwilaña mujimba” nihanyima yakupapatishewa?

⁶ Nihanyima yakupapatishewa mukakeñekaña kutwalekahu nakulwisha “[nayuma] yafwilaña mujimba.” (1 Yow. 2:​16) Chuma chikuletesha himuloña wakwila muchidi abula kuwanina. Mpinji jikwawu, munateli kutiya neyi chatiyiliyi kapostolu Pawulu. Wasonekeli nindi: “Nazañalalaña chikupu nanshimbi jaNzambi mumuchima wami, ilaña namoni lushimbi lukwawu mumujimba wami lunakuzuña nalushimbi lwamuyitoñojoka yami nakuntwala muwunkoli walushimbi lwanshidi ludi mumujimba wami.” (Rom. 7:​22, 23) Hadaha munateli kuneña muloña munakulwisha nakufwila kwatama. Hela chochu, neyi mutoñojokaña hachikaninu chimwamukanini Yehova hampinji yimwadihanini enu aweni kudiyena, mukwikalaña nañovu yakulwisha nakweseka kumunakumona. Chalala chidi chakwila nawu neyi munamoni kweseka, chikaninu chenu chakudihana chakayikwasha. Munjilanyi?

7. Kudihana kudi Yehova kukuyikwasha ñahi kutwalekahu kwikala ashinshika kudi yena?

⁷ Neyi mudihana kudi Yehova mukudibonda enu aweni. Chumichi chinayi mukwila nawu munakaani yuma yimwafwilaña niyimwakeñaña kwila yinateli kumuneñesha Yehova. (Mat. 16:24) Dichi neyi mudi mukweseka, mukushintajala wanyi nakutachika kutoñojoka chuma chimwatela kwila. Muloña mwafuukwila dehi chadimu chuma chimwatela kwila, dikwila nawu kutwalekahu kwikala ashinshika kudi Yehova. Mwakafwilaña hohu kumutiyisha Yehova kuwaha. Chimwela mwenimu, mwakela neyi cheliliyi Yoba. Hela chakwila wamweni kukala kwakuvulu kweneni chikupu, wahosheli chakufuma hamuchima nindi: “Nukuhembaña kashinshi kami!”​—Yoba 27:5.

8. Kutoñojoka hakulomba kwenu kwakudihana kunateli kuyikwasha ñahi kukaana kweseka?

⁸ Neyi mutoñojokaña hakulomba kwenu kwakudihana kudi Yehova, mukwikalaña nañovu yakukaana kweseka kudi kwejima. Chakutalilahu, komana munateli kutachika kusenseka namwinikwambala? Inehi! Muloña mwadikana dehi kubula kwila chuma chamuchidiwu. Dichi mwakadikiña kuyitoñojoka yatama yasefukaña hanyima yakwila yinataandi muyitoñojoka yamuntu. Himwakaya “munjila yawantu atamaku.”​—Yish. 4:​14, 15.

9. Kutoñojoka hakulomba kwenu kwakudihana kunateli kuyikwasha ñahi cheñi kutwamijaku yuma yakuspiritu?

⁹ Indi neyi munawani mudimu wakumujimba wukuyileteshaña mujiñeña kukupompa kwawakaKristu mpinji jikwawu? Muneluki chuma chimwatela kwila. Henohu iwu mudimu kanda wumwekani, mwadikasili dehi mumuchima nenu kwila mwiñila mudimu wamuchidiwu nehi. Dichi, mukutachika wanyi kutoñojoka nenu mukufuukula mwaluwa. Neyi mwanuka Yesu chazatileñayi nañovu kulonda amutiyishi Tata yindi kuwaha, mukushikena kukaana chikupu chuma chidi chejima chimuneluki nenu chikumuneñesha Nzambi, kumwadihana.​—Mat. 4:​10; Yow. 8:​29.

10. Neyi munapapatishewi dehi, Yehova wakayikwasha ñahi kutwalekahu kumulondela Yesu?

¹⁰ Yuma yimwelaña neyi munakumona kukala hela mudi mukweseka kwakwila chuma chatama, yamwekeshaña hatooka nawu munakufwila kutwalekahu kumulondela Yesu. Neyi mwilaña mwenimu, kuhwelelenu nenu Yehova wukuyikwashaña. Bayibolu yahosha nawu: “Nzambi washinshika, nawa hakwiteja kuyeseka kubadika muñovu jenuku, ilaña neyi kweseka kunayiwani, wukuyiloñeshela ninjila kulonda mutweshi kuumika.”​—1 Kor. 10:13.

YUMA YIKUYIKWASHA KUTWALEKAHU KUMULONDELA YESU

11. Njilanyi yimu yalema yinateli kuyikwasha kutwalekahu kumulondela Yesu? (Talenu cheñi mwevulu.)

¹¹ Yesu wadiña wadikita, nawa walombeleña kudi Nzambi mpinji yejima. (Luka 6:​12) Njila yimu yalema yikuyikwasha kutwalekahu kumulondela Yesu neyi munapapatishewi dehi hikwikala namuchima wakwila yuma yikuyikwasha kuswina kwakwihi naYehova. Bayibolu yahosha nawu: “Kwesekeja nakupama kwejima kutunapaminiku, tutwalekenuhu kwenda chiwahi muniyi njila yoyimu.” (Fwili. 3:​16) Kakavulu, mwakatiyaña yuma yayimwekenaña amanakwetu niahela afuukulañahu kudikita chikupu mumudimu waYehova. Hadaha, ayili kuShikola Yawakakushimwina aWanta indi kwiji ayili kudi kukaankila kwawakakushimwina. Neyi mukutwesha kwila mwenimu, ilenumu chakadi kuumba mpinji. Antu jaYehova akeñaña njila jashiyashana jakumukalakelelamu chikupu. (Yilw. 16:9) Indi neyi chayinu mpinji mukutwesha wanyi kwila mwenimu? Bayi mutoñojoka nenu anayibadiki kudi owu akutweshaku. Chuma chalema chimwatela kwila hikutwalekahu kuumika. (Mat. 10:22) Bayi mudiwula kulema kwekala mukumukalakela Yehova kwesekeja nahanakumini ñovu jenu nichidi yuma muchihandilu chenuku. Ichi dichuma chimu chalema chinateli kuyikwasha kutwalekahu kumulondela Yesu neyi munapapatishewi dehi.​—Mas. 26:1.

12-13. Yumanyi yimwatela kwila neyi iyena denu dinatachiki kukeha? (1 AKorinda 9:​16, 17) (Talenu cheñi chikasha chinakwila nawu “Ilenuña Yuma Yikuyikwasha Kutwalekahu Kutemuka Lufuchi.”)

¹² Chumanyi chimwatela kwila neyi mumona nenu chayinu mpinji kulomba kwenu kunakufuma hamuchima wanyi, indi kwiji himunakudiluñisha mudimu wakushimwina neyi chimwelileña hakusambilaku? Indi neyi himunakudiluñisha kutaña Bayibolu neyi chimwelileña kunyimaku? Neyi kukala kwamuchidiwu kuyimwekena neyi munapapatishewi dehi, bayi mukunkulula nenu spiritu yaYehova hiyidi nanenuku. Mwawanina wanyi, nawa mpinji jikwawu yitoñojoka yetu yinateli kuhimpika. Neyi iyena denu ditachika kukeha, toñojokenu hachuma chamumwekeneni kapostolu Pawulu. Hela chakwila wesekeli kumwimbujola Yesu, welukili nindi mpinji jikwawu hakwikalaña namuchima wakufwila kwila yuma yakeñeleñayi kwilaku. (Tañenu 1 AKorinda 9:​16, 17.) Wahosheli nindi: “Neyi niwuzata chakudikanjikija, hohamu nichidi namudimu wawuñamba wankunjikawu.” Munjila yikwawu, Pawulu wafwilileña kumanisha mudimu windi hichikweti muloña nachatiyileñayi hanoyu mpinjiku.

¹³ Munjila yoyimu, bayi mufuukula kushindamena hohu hachimunakutiyaku. Dikasenu mumuchima wenu nenu mukufwilaña kwila yuma yaloña hichikweti muloña nachimunakutiyaku. Neyi mutwalekahu kwila yuma yaloña, mukuhita kwampinji munateli kuleka kutiya chimwatiyaña. Sampu chumichi chinamwekani, kukakela kuntanjikilu yenu yayiwahi yakudiza Bayibolu nkawenu, kulomba, kupompa nikushimwina, kwakayikwasha kutwalekahu kulondela Yesu neyi munapapatishewi dehi. Neyi amanakwenu niahela amona chimunatwalekihu kumukalakela Yehova, akakoleshewa.​—1 Tes. 5:​11.

“DESEKENUÑA . . . DISHINSHIKENUÑA”

14. Yumanyi yimwatela kushinshikañahu mpinji yejima, nawa muloñadi? (2 AKorinda 13:5)

¹⁴ Chuma chikwawu chakayikwashaña neyi munapapatishewi dehi hikudishinshika enu aweni mpinji yejima. (Tañenu 2 AKorinda 13:5.) Mumpinji-mumpinji, shinshikenuña chidi yuma muchihandilu chenu niyuma yimwelaña kulonda mumoni neyi munakulomba hefuku-hefuku, kutaña nikudiza Bayibolu, kuya kukupompa kwawakaKristu nikuya nakushimwina. Esekenu kuwana njila jikuyikwasha kudiluñisha nikwikala neyena dakwila iyi yuma. Chakutalilahu, dihulenu nenu: ‘Nateli kulumbulwila antu chiwahi chalala chamu Bayibolu? Kudihu yuma yinatela kwila kulonda nidiluñisheña mumudimu wakushimwina? Yumanyi yinatenaña mukulomba kwami? Komana yamwekeshaña nawu namushindamena chikupu Yehova? Nayaña kukupompa kwawakaKristu mpinji yejima? Yumanyi yinatela kwila hakwila nitiyilileña nakanañachima nikwakulahu hakupompa?’

15-16. Chumanyi chimunadizili kuchuma chamumwekeneni manakwetu wumu kutalisha hakukaana kweseka?

¹⁵ Mukwila cheñi chiwahi neyi mwiluka kuzeyazeya kwenu. Manakwetu wejina daRobert washimwini chuma chamwekeni chinakukolesha chikuma chinakumwekesha kulema kwakwiluka kuzeyazeya kwetu, wahosheli nindi: “Hinadiña kwakwihi nayaaka 20, nazatileña mudimu wakuzata mafuku antesha mumulungu. Ifuku dimu hanyima yakukomboka, mumbanda wumu itwazatileña nindi wanlejeli nindi nakayi kwitala dindi. Wanlejeli nindi twakekala hohu etu ayedi nawa ‘twakadiluñisha.’ Hakusambila, nadiña nakuleyaleya hohu, ilaña nkumininaku nakaanini nawa namulejeli muloña waweni wunakaanini.” Manakwetu Robert wakaanini kweseka, nawa welili chuma chachiwahi. Hela chochu, chimwahitili mpinji watoñojokeli hachuma chamwekeni nawa wamweni nindi wazatili chiwahi nankashi wanyi nakuna kweseka. Wahosheli nindi: “Hinahamukili hela kunyakala kukaana akuna kweseka neyi chakaaniniyi Yosefu hamwesekeliwu kudi ñoda Potifwariku. (Kutach. 39:​7-9) Kafwampi, nahayamini chichankalilili kushikena kukaana. Ichi chuma chamwekeni chankwashili kumona nami nakeñekeleña kukolesha wubwambu wami naYehova.”

¹⁶ Munateli kufuma yuma yayiwahi neyi mudishinshikaña neyi cheliliyi manakwetu Robert. Hela chakwila munemiki mushindu kweseka, dihulenu nenu, ‘Komana nashikena kukaana tahindi nashintajalaña?’ Neyi mumona nenu hadi himwatela kuzatila, bayi mudinkamu nyiloñaku. Tiyenu kuwaha muloña muneluki kuzeyazeya kumukweti. Lombelenuhu, nawa ilenuña yuma yikuyikwasha kwikala namuchima wakufwila kwovwahila nshimbi jaYehova muchihandilu chenu.​—Mas. 139:​23, 24.

17. Chumanyi chamwekeneni ijina daYehova muloña wakashinshi kamwekesheliyi manakwetu Robert?

¹⁷ Kudi yuma yayivulu yimunateli kudizila kuchuma chamumwekeneni manakwetu Robert. Watwalekelihu nindi: “Chinakaanini mutambi waniwu mumbanda itwazatileña nindi, wanlejeli nindi, ‘Eyi dinu wunapuluki!’ Namwihwili mwatalishiliyi. Walumbulwili nindi ibwambu dindi wumu, wadiñahu dehi Chinsahu kunyima, wamulejeli nindi atwansi ejima aYinsahu elaña yuma yatama mukuswamujoka neyi ekala mukweseka kwakwila oyu yuma. Dichi iwu mumbanda wamulejeli owu ibwambu dindi nindi wakañeseka ninami. Nkumininaku, natiyili kuwaha hakwiluka nami chuma chinelili chalemesheli ijina daYehova.”

18. Chumanyi chimukufwilaña kutwalekahu kwila neyi munapapatishewi dehi? (Talenu cheñi chikasha chinakwila nawu “Yibaaba Yikuyikwasha Kutwalekahu Kwikala Ashinshika.”)

¹⁸ Neyi mudihana enu aweni kudi Yehova nikupapatishewa, mukumwekesha nenu munakukeña kujilika ijina dindi hela chakwila kukumwekana kukala kwamuchidinyi. Nawa mwatela kwiluka chikupu nenu Yehova weluka kukala kumwamonaña nikweseka kumwemikaña mushindu. Wukuyikiswilaña chimunakuzata nañovu kutwalekahu kwikala ashinshika. Kuhwelelenu nenu kuhitila muspiritu yindi yajila wukuyinkaña ñovu yakwila mwenimu. (Luka 11:​11-​13) Nawukwashu waYehova, mwakatwalekahu kumulondela Yesu neyi munapapatishewi dehi.