Munateli Kutwalekahu Kumukalakela Yehova Hela Kudi Yuma Yinakuyineñesha

1. Yumanyi yayiwahi yitwadiluñishaña muloña wakwikala mukuloñesha kwaYehova?

TUKWETI kukooleka chikupu kwakwikala mukuloñesha kwaYehova munanu mafuku akukuminina akala. Yuma chiyinakutaminaku mukaayi, Yehova watwinkaña chisaka chakuspiritu chawamanakwetu niahela anuñañana. (Mas. 133:1) Watukwashaña kwikala nachisaka chanuñañana chikupu. (Efwe. 5:33–​6:1) Nawa watwinkaña kashinshi nimaana atukwashaña kwikala nakuwunda kwakweni kwamumuchima.

2. Chumanyi chitwatela kwila, nawa muloñadi?

² Hela chochu, twatela kwikala adikita kulonda tumukalakeleña Yehova nakashinshi. Muloñadi? Muloña mpinji jikwawu tunateli kuneña muloña wayiluwa yawakwetu. Tunateli cheñi kuneña neyi etu aweni tuluwañesha, sweje-e neyi tufuntisha-funtishañahu chiluwa chochimu. Twatela kutwalekahu kumukalakela Yehova (1) neyi akwetu akakwitiya atuneñesha, (2) neyi mwinikwetu atuneñesha, nawa (3) neyi tuneña muloña wayiluwa yitunakoñi. Muchinu chibaaba, iyi yuma yitunashimuni tukuyihanjekahu chimu-chimu. Tukuhanjeka cheñi yuma yitukudizila kudi antu asatu ashinshika ashimunawu muBayibolu.

TWALEKENUHU KUMUKALAKELA YEHOVA NEYI AKWENU AKAKWITIYA ANAYINEÑESHI

3. Antu jaYehova amonaña kukalanyi?

³ Kukala kwekalañaku. Akwetu akakwitiya amakwawu anateli kwikala nayaaku yatutiyishaña kutama. Amakwawu anateli kwila chuma chinateli kutuneñesha hela kutukoña chuma chatama. Amanakwetu anakulombola anateli kuluwañesha. Yuma yamuchidiwu yinateli kuletesha antu amakwawu kutachika kujinoka neyi mwamweni iku hikuloñesha kwaNzambi. Chatela atwalekihu kumukalakela Nzambi “namuchima wumu” hamu nawamanakwawu niahela, hadaha anateli kuleka kudikunda nanowu anayineñeshi hela kuleka kuya nakupompa. (Zef. 3:9) Komana chidi hohu chiwahi kwila chuma chamuchidiwu? Talenu yuma yitunateli kudizila kudi muntu ashimunawu muBayibolu wamweni kukala kwokumu.

4. Kukalanyi kwamweniyi kapostolu Pawulu?

⁴ Muntu ashimunawu muBayibolu. Kapostolu Pawulu welukili nindi amanakwindi niahela akaKristu adiña antu abula kuwanina. Chakutalilahu, hatachikiliyi hohu kudikunda nachipompelu, amukuhweleleli wanyi. (Yilw. 9:​26) Chimwahitili mpinji, amakwawu ahosheleña chatama hadi yena kumbadi kulonda atamishi ijina dindi. (2 Kor. 10:10) Pawulu wamweni mukulumpi wumu nakwila chuma chatama chadi kuhukesha antu amakwawu. (Ñal. 2:​11, 12) Nawa Maku ibwambu daPawulu adikundiliyi nindi nankashi, wamuneñesheli chikupu. (Yilw. 15:​37, 38) Muloña waniyi yuma yamwekeni, Pawulu wadi kutondahu kuleka kudikunda nawantu amuneñesheleña. Ilaña, watwalekelihu kulemesha amanakwindi niahela nikutwalekahu kumukalakela Yehova. Chumanyi chamukwashili Pawulu kutwalekahu kumukalakela Yehova?

5. Chumanyi chamukwashili Pawulu kwanakena amanakwindi niahela? (AKolosi 3:​13, 14) (Talenu cheñi mwevulu.)

⁵ Pawulu wayikeñeli amanakwindi niahela. Chineli Pawulu wayikeñeli amanakwindi, washileña muchima hayilwilu yawu yayiwahi bayi hayiluwa yawuku. Kukeña kwamukwashili cheñi Pawulu kwila yuma kwesekeja nachasonekeliyi, neyi chasonekawu haAKolosi 3:​13, 14. (Tañenu.) Talenu chamwanakeneniyi Maku. Hela chakwila Maku wamushiyili Pawulu halwendu lwindi lwawumishonali, Pawulu hatwalekelihu kumuhililaku. Chimwahitili mpinji, Pawulu chasonekeleliyi chipompelu chamuKolosi mukanda wakuyikolesha, wamuhamekeli Maku nindi himukakukalakala hamu nindi walemeshewa, ‘mukakukundeja chikupu.’ (Kol. 4:​10, 11) Hampinji yadiñayi mukaleya muRoma, Pawulu walombeli nindi Maku enzi nakumukwasha. (2 Tim. 4:​11) Chakadi nikujina, Pawulu wayanakeneni amanakwindi nawa wadikundileña nawu chikupu. Yumanyi yitunateli kudizila kuyuma yeliliyi Pawulu?

6-7. Yumanyi yinateli kutukwasha kwatwalekahu kuyimwekeshela amanakwetu niahela kukeña hela chakwila anatuneñeshi? (1 Yowanu 4:7)

⁶ Yuma yitunateli kudizilaku. Yehova wakeñaña nindi tutwalekeñahu kumwekeshela amanakwetu niahela kukeña. (Tañenu 1 Yowanu 4:7.) Neyi amanakwetu niahela atwila chuma chatama chinambukiku nachatela kwilayi mukaKristu, twatela kukuhwelela netu hiyelilamu hohuku, nawa netu anakufwila kwila chuma chahoshayi Yehova nindi chaloña. (Yish. 12:18) Nzambi wayikeña ambuña indi ashinshika hela chakwila aluwañeshaña. Neyi tunaluwañeshi hatushiyaña hela kutuhembela nkunyiku. (Mas. 103:9) Chalema nankashi ninetu kumwimbujola Tata yetu wanakenaña!​—Efwe. 4:32–​5:1.

⁷ Anukenuña cheñi nenu, chineli kukuma kunakuswina kwakwihi, twatela kutwalekahu kudikunda chikupu nawamanakwetu niahela. Twatela kukuhwelela netu ikabisha dikuswejelañaku. Hadaha anateli kutukasa nimukaleya muloña wayuma yitwakuhwelela. Neyi chuma chamuchidiwu chitumwekena, twakakeñekaña nankashi wukwashu wawamanakwetu niahela. (Yish. 17:17) Talenu chuma chamumwekeneni manakwetu Josep,a mukulumpi kuSpain. Yena niamanakwetu amakwawu ayikasilili hamu muloña wakubula kudiñija munsañu jamatuña nachiyuulu. Wahosheli nindi: “Mukaleya, wejima wetu twashakamineña hamu, dichi mpinji jikwawu twadineñesheleña. Twadiña nakudiwula yiluwa yawakwetu akakwitiya nikudanakena wumu namukwawu chakufuma hamuchima. Chumichi chatukwashili kwikala anuñañana nawa akiñewa. Twashakamineña nawakwetu atuyili abulileña kumukalakela Yehova. Mpinji yimu, nadikatishili kuchikasa nawa ankasiliku bandeji, hinatwesheleña kudilila yuma ami aweniku. Dichi manakwetu wumu wankoseleleña yakuvwala nikuñakamena munjila jikwawu jamboka-mboka. Namweni kukeña kwalala kwammwekesheleliwu hinadiña mukukala.” Iyi diyi njila yayiwahi yitwatela kumanishilamu kukala nawakwetu chayinu mpinji!

TWALEKENUHU KUMUKALAKELA YEHOVA NEYI MWINIKWENU NAYINEÑESHI

8. Kukalanyi kwamonañawu antu adi muwulu?

⁸ Kukala kwekalañaku. Muwulu wejima mwekalaña kukala. Bayibolu yahosha hatooka nawu antu adi muwulu “akumonaña yihuñu.” (1 Kor. 7:​28) Muloñadi? Muloña wulu waletaña hamu antu ayedi abula kuwanina, iwu wukweti yilwilu, yuma yakeñayi niyuma yahelayi yaambuka nayamukwawu. Antu ayedi anadisumbuli anateli kufuma kuyisemwa hela yitachi yaambuka. Hadaha mukuhita kwampinji, anateli kutachika kumwekesha yaaku yabulileña kumwekeshawu henohu kanda adisumbuli. Yuma yamuchidiwu yinateli kuletesha kubula kutiyañana muwulu. Chatela wejima wawu ayedi eteji nawu diwu anakuletesha kukala muwulu nawa azatili hamu nakukumanisha, akutachika kudinkamu nyiloña wumu namukwawu. Hadaha akutachika kumona nawu hakwila amanishi iku kukala atela kudaambula hela kudiseña. Komana kumanisha wulu dichuma chinateli kuyikwasha?b Tutalenu muntu ashimunawu muBayibolu watwalekelihu kuumika hampinji yamweneñayi kukala muwulu.

9. Kukalanyi kwamweniyi Abigayili?

⁹ Muntu ashimunawu muBayibolu. Abigayili amusumbwili kudi Nabali atenawu muBayibolu nawu wadiña wazuwa nawa wadiña nayilwilu yatama. (1 Sam. 25:3) Chatela chamukalilili nankashi Abigayili kushakama neyala wamuchidiwu. Komana Abigayili wadiña nakukooleka kwakumanishilamu wulu windi? Eña. Wadiña nakukooleka hampinji Davidi, mwanta wakayuula Isarela kumbidi, henjiliyi nindi amujahi nfumwindi muloña wakumutuka Davidi niantu jindi awamayala. (1 Sam. 25:​9-​13) Abigayili wadi kutemuka nakumuleka Davidi kulonda eli chuma chakeñeleñayi kwila. Ilaña wamukañesheli nawa wamushinjilili Davidi kulonda abuli kumujaha Nabali. (1 Sam. 25:​23-​27) Chumanyi chamusañumwini kwila chumichi?

10. Chumanyi chatela chamukwashili Abigayili kuumika kukala kweneni kwadiña muwulu wawu?

¹⁰ Abigayili wamukeñeli Yehova nawa walemesheli nshimbi Jindi jahosha hawulu. Chakadi nikujina, welukili Nzambi chayilejeliyi aAdama naEva heliliyi wulu watachi. (Kutach. 2:​24) Abigayili welukili nindi Yehova wamweneña wulu nindi hintanjikilu yajila. Wakeñeleña kumuzañalesha Nzambi, nawa chumichi chatela dichamusañumwini kwila chuma chidi chejima kulonda amwini chisaka chindi, kushilahu ninfumwindi. Wanyakeli kumukañesha Davidi kulonda abuli kumujaha Nabali. Wafwilileña cheñi kulomba kwanakena hachiluwa chabulili kukoñayi. Mwamweni, Yehova wamukeñeli iwu mumbanda wahamuka nawa wabula kusweja kudikeña yomweni. Yumanyi yinateli kudizilawu ambanda niamayala kuchuma cheliliyi Abigayili?

11. (a) Yehova wakeñaña nindi antu adi muwulu eleñadi? (AEfwesesa 5:​33) (b) Yumanyi yimunadizili kudi muhela Carmen chazatiliyi nañovu kuhemba wulu windi? (Talenu cheñi mwevulu.)

¹¹ Yuma yitunateli kudizilaku. Yehova wakeñaña nindi antu adisumbula alemesheña ntanjikilu yawulu hela chakwila mwinikwawu wakalisha. Nzambi watela watiyaña kuwaha nankashi neyi amona adisumbula anakuzata nañovu kumanisha kukala nikudimwekeshela kukeña kwakufuma hamuchima nikalemesha. (Tañenu AEfwesesa 5:​33.) Talenu chuma chamumwekeneni muhela Carmen. Chimwahitili yaaka 6 kufuma hasumbukiliyi, watachikili kudiza Bayibolu nawaYinsahu jaYehova, nawa nkumininaku wapapatisheweli. Wahosheli nindi: “Chuma chinafuukwilihu kwila chamuneñesheli nfumwami. Watiyili kutama chinatachikili kumukalakela Yehova. Wahosheleña kasawuntu nikunchiinisha nindi wukunseña.” Hela chochu, muhela Carmen watwalekelihu kuumika muwulu windi. Hadi yaaka 50, wazatili nañovu kumumwekeshela nfumwindi kukeña nikumulemesha. Wabombelelihu cheñi nindi: “Mukuhita kwayaaka, nelukili chiwahi chatiyileñayi nfumwami nawa nahosheleña nindi munjila yayiwahi. Chineli neluka nami wulu wajila kumesu aYehova, nazatili hakumina ñovu jami kuwuhemba. Hinamushiyili nfumwamiku, muloña namukeña Yehova.”c Neyi muwulu wenu mwikala kukala, mwatela kukuhwelela nenu Yehova wukuyikwasha kulonda mutwalekihu kuumika.

TWALEKENUHU KUMUKALAKELA YEHOVA NEYI MUNANEÑI MULOÑA WAYILUWA YIMUNAKOÑI

12. Kukalanyi kutunateli kumona neyi tukoña nshidi yahamesu bwi-i?

¹² Kukala kwekalañaku. Hadaha tunateli kuneña nankashi neyi tunakoñi nshidi yahamesu bwi-i. Bayibolu yahosha nawu nshidi jitunakoñi jinateli kutuletesha kutiya neyi ‘tunabaloki nawa tunachikeki.’ (Mas. 51:17) Manakwetu Robert wazatili nañovu hadi yaaka yayivulu kulonda ashikihu kwikala nkoñi wakuzatila. Hela chochu, wakoñeli nshidi yeneni yaletesheli amoni nindi nadikañi naYehova. Wahosheli nindi, “Chinleji chami chatachikili kunkabisha chikupu. Kufumahu natiyili kutama. Nadilili nezu dahewulu nawa nalombeli kudi Yehova. Inakwanuka natoñojokeli nami Nzambi hamba katiyililahu kukulomba kwami cheñiku. Muloña namuneñesheli.” Neyi tuvulumuna, hadaha tunateli kuneña nankashi muloña muchima wetu wunachikeki wukutachika kukuhwelela nawu Yehova natushiyi. (Mas. 38:4) Neyi munakutiya muniyi njila, toñojokenu hadi muntu washinshika ashimunawu muBayibolu watwalekelihu kumukalakela Yehova hela chakwila wakoñeli nshidi yahamesu bwi-i.

13. Nshidinyi yahamesu bwi-i yakoñeliyi kapostolu Petulu, nawa chumanyi chaletesheli ayikoñi?

¹³ Muntu ashimunawu muBayibolu. Wufuku wakutwala kwifuku damujahiliwu Yesu, kapostolu Petulu wakoñeli yiluwa yayivulu yaletesheli akoñi nshidi yeneni. Chatachi, Petulu wadikuhweleleli, nakudivwimba nindi wukutwalekahu kwikala washinshika hela chakwila akwawu apostolu akumushiya Yesu. (Maku 14:​27-​29) Chamuchiyedi, hampinji yadiñawu mwitempa daÑesemani, Petulu wakañenyi kutwalekahu kwikala watona kapampa kakavulu. (Maku 14:​32, 37-​41) Kuhiñahu, Petulu wamushiyili Yesu muloña wezanvu dawakamadombu. (Maku 14:50) Nkumininaku, Petulu wamukaanini Yesu kapampa kasatu nindi wamwiluka wanyi, chakwila wasanyikili nikusanyika kutalisha hanawa makudi. (Maku 14:​66-​71) Petulu welili ñahi chelukiliyi kutoha kwanshidi yakoñeliyi? Waneñeli nawa wadilili nankashi, hadaha wadimweni nindi washikilamu wanyi muloña wakudinkamu nyiloña. (Maku 14:72) Fwikijenu chichamukatili Petulu kumuchima helili ibwambu dindi Yesu amujahi chimwahitili maora antesha. Petulu watela wadimweni nindi wamukunkulwayi!

14. Yumanyi yamukwashili Petulu kutwalekahu kumukalakela Yehova? (Talenu mwevulu.)

¹⁴ Kudi yuma yayivulu yaletesheli Petulu atwalekihu kumukalakela Yehova. Hadambwili nawakwawuku; wayili kudi amanakwindi akuspiritu nawa chakadi nikujina, amukundejeli. (Luka 24:33) Kubombelahu, Yesu asañwiliwu wamwekeni kudi Petulu, hadaha kulonda amukoleshi. (Luka 24:34; 1 Kor. 15:5) Nkumininaku, chatela amuzuwili Petulu muloña wayiluwa yakoñeleñayi, Yesu wamulejeli iwu ibwambu dindi nindi wakatambwila nyidimu yamaneni. (Yow. 21:​15-​17) Petulu welukili nindi wavulumwini chikupu, ilaña watwalekelihu kufwila kwila yuma yaloña. Muloñadi? Muloña wakuhweleleli nindi Nkaaka yindi, Yesu, hamushiyiliku. Nawa atwalekelihu kumukwasha kudi amanakwindi akuspiritu. Yumanyi yitunateli kudizila kuyuma yeliliyi Petulu?

15. Yehova wakeñaña nindi tukuhweleli netudi? (Isamu 86:5; ARoma 8:​38, 39) (Talenu cheñi mwevulu.)

¹⁵ Yuma yitunateli kudizilaku. Yehova wakeñaña nindi tukuhweleli chikupu netu watukeña nawa watwanakenaña. (Tañenu lsamu 86:5; ARoma 8:​38, 39.) Neyi tuvulumuna, twaditwikaña nyiloña. Chidi hohu chiwahi nawa chatelela kutiya muniyi njila. Hela chochu, bayi tutoñojoka netu Yehova naleki kutumwekeshela kukeña hela kutwanakenaku. Ilaña twatela kunyakala kulomba wukwashu. Manakwetu Robert ashimunawu hakusambila, wahosheli nindi: “Navulumwini muloña nadishindameneni ami aweni nami nateli kukaana kweseka.” Wanukili nindi wateleleli kulejamu akulumpi. Wahosheli nindi: “Chinayilejelimu akulumpi, nashikeneni kumona Yehova chammwekesheleliyi kukeña kuhitila mudi wena. Akulumpi niwena ammwekesheleli kukeña. Ankwashili kukuhwelela nami Yehova hanshiyiliku.” Ninetu twatela kukuhwelela netu Yehova watukeña chikupu nawa watwanakenaña neyi tubalumuka mumuchima nakuleka nshidi jitwakoñeli, tulomba wukwashu nawa tuzataña nañovu kulonda tubuli kufuntishahu yiluwa yitwakoñeli. (1 Yow. 1:​8, 9) Chumichi chatukwashaña kubula kuzeya neyi tuhukana hela tuvulumuna.

16. Muloñadi chimunakufwila kutwalekahu kumukalakela Yehova?

¹⁶ Yehova wasakililaña nankashi chitwamukalakelaña hakumina ñovu jetu munanu mafuku akala akukuminina. Nawukwashu waYehova, tunateli kutwalekahu kumukalakela nakashinshi hela chakwila tunaneñi muloña wayiluwa yetu indi kwiji yawakwetu. Twatela kutwalekahu kuyikeña amanakwetu niahela nikuyanakena hela chakwila anatuneñeshi. Tunateli kumwekesha chitwamukeña Nzambi yetu chikupu nichitwalemesha ntanjikilu yindi neyi tuzataña hakumona ñovu jetu kumanisha kukala kunateli kumwekana muwulu wetu. Neyi tunakoñi nshidi, twatela kulomba kudi Yehova kulonda atukwashi, kwiteja atumwekesheli kukeña kwindi nikutwanakena nikutwalekahu kumukalakela. Twatela kukuhwelela chikupu netu twakatambwila nkisu jajivulu neyi tubula ‘kuleka kwila yuma yayiwahi.’​—Ñal. 6:9.