Yuma Yikuyikwasha Kukuhwelela Nenu Yehova Wayitiyaña Kuwaha

1. Ambuña aYehova amakwawu ashinshika anateli kulwisha nayitoñojoka yamuchidinyi?

CHATUKOLESHAÑA kwiluka netu Yehova watiyaña kuwaha antu jindi ejima! Bayibolu yahosha nawu: “Yehova wayitiyaña kuwaha antu jindi.” (Mas. 149:4) Hela chochu, mpinji jikwawu amakwawu aneñaña nakudihula nawu, ‘Komana Yehova wantiyaña kuwaha halwami?’ Akakudifukula aYehova ashinshika amavulu kunyima, mpinji jikwawu alwishileña nayitoñojoka yamuchidiwu.—1 Sam. 1:​6-10; Yoba 29:​2, 4; Mas. 51:11.

2. Anyi atiyañawu kuwaha kudi Yehova?

² Bayibolu yamwekeshaña hatooka nawu antu abula kuwanina anateli kuyitiya kuwaha kudi Yehova. Munjilanyi? Twatela kumukuhwelela Yesu Kristu nikupapatishewa. (Yow. 3:16) Chitwela mwenimu, twamwekeshaña kudi antu netu tunabalumuki mumuchima nakuleka nshidi jetu nawa tunamukani Nzambi netu tukwilaña nkeñelu yindi. (Yilw. 2:38; 3:19) Yehova watiyaña kuwaha neyi twila yumiyi kulonda twiikali nawubwambu nayena. Chakala hohu tutwalekahu kuzata hakumina ñovu jetu kuhemba chikaninu chetu chakudihana, Yehova watutiyaña kuwaha nawa watumonaña nindi tudi amabwambu jindi chikupu.—Mas. 25:14.

3. Yumanyi yitukuhanjekahu?

³ Hanu dinu, muloñadi antu amakwawu mpinji jikwawu chatiyilañawu nawu Nzambi wayitiyaña kuwaha wanyi? Yehova wamwekeshaña ñahi nindi watutiyaña kuwaha? Nawa mukaKristu watela kukuhwelela ñahi chikupu nindi amutiyaña kuwaha kudi Nzambi?

YUMA YALETESHAÑA AMAKWAWU ATIYEÑA NAWU YEHOVA WAYITIYAÑA KUWAHA WANYI

4-5. Hela chakwila tunateli kutiya netu tudi amukunkulwayi, chumanyi chitwatela kukuhwelela?

⁴ Etu amavulu twalwishaña nayitoñojoka yakutiya netu tudi amukunkulwayi. (Mas. 88:15) Manakwetu wejina daAdrián wahosheli nindi: “Mpinji yejima natiyaña nami nidi wamukunkulwayi. Chuma chinanukaña chinalombeleña hinadiña kansi chadiña chakwila nawu chisaka chami chakatweshi kwikala muParadisa, hela chakwila ami nakuhweleleli chikupu nami hinashikililimu kwikalamuku.” Manakwetu Tony wabulili kukulila muchisaka chawakaKristu, wahosheli nindi: “Anvwali jami hiyanlejelihu nawu ankeña hela antiyaña kuwahaku. Chumichi chaletesheli nitiyeña nami kwosi chuma chinelileña chayitiyishileña kuwahaku.”

⁵ Neyi mpinji jikwawu twalwishaña nayitoñojoka yakutiya netu tudi amukunkulwayi, twatela kwanuka netu Yehova yomweni diyi watukokeleli kudi yena. (Yow. 6:44) Wamonaña yuma yayiwahi mudi etu yitunateli kukañanya kumona etu aweni, nawa weluka muchima wetu. (1 Sam. 16:7; 2 Kushi. 6:30) Dichi twatela kumukuhwelela neyi ahosha nindi twalema.—1 Yow. 3:​19, 20.

6. Kapostolu Pawulu watiyili ñahi muloña wanshidi jakoñeliyi kunyima?

⁶ Henohu kanda tudizi chalala, etu amakwawu twelileña yuma hadaha yatuleteshaña tutwalekeñahu kudinkamu nyiloña. (1 Pet. 4:3) AkaKristu ashinshika niwena alwishaña nakuzeyazeya kwakufwila kwila yuma yatama. Komana muchima wenu wayifwishaña nanyiloña? Neyi dichichidi, kwiluka nenu ambuña aYehova ashinshika anakulwisha nakukala kwokumu, kukuyikundeja. Chakutalilahu, kapostolu Pawulu waditoñesheleña neyi anuka yiluwa yakoñeliyi kunyima. (Rom. 7:24) Hela chochu, Pawulu wabalumukili mumuchima nakuleka nshidi jindi nawa wapapatisheweli. Ilaña waditeneni nindi, diyi “[wakehelamu] hakachi kawapostolu” nawa nindi “mukanshidi chikupu.”—1 Kor. 15:9; 1 Tim. 1:15.

7. Twatela kwanuka netudi kutalisha hanshidi jitwakoñeli kunyima?

⁷ Tata yetu wamwiwulu watushiika nindi wukutwanakena neyi tubalumuka mumuchima. (Mas. 86:5) Dichi neyi tunabalumuki chikupu mumuchima nakuleka nshidi jitunakoñi, tunateli kukuhwelela netu mwahoshayi Yehova mwalala, nawa natwanakeni.—Kol. 2:13.

8-9. Tunateli kukañesha ñahi yitoñojoka yakutiya netu kwosi chuma chitunateli kwila hakwila tumutiyishi Yehova kuwaha?

⁸ Wejima wetu twakeñaña kumukalakela Yehova kwesekeja nahakumina ñovu jetu. Hela chochu, amakwawu atiyaña neyi kwosi chuma chinateli kwilawu chikuletesha ayitiyi kuwaha kudi Nzambi. Muhela wejina daAmanda wahosheli nindi: “Hakwila nimukalakeleña Yehova hakumina ñovu jami, chiña nizataña chikupu nakubadikishahu mpinji yejima. Dichi kakavulu nafwilaña kuzata nañovu kubadika chinatela kuzata. Neyi nikañanya ‘kushikijamu,’ natoñojokaña nami namuneñeshi Yehova neyi chinnadineñeshi ami aweni.”

⁹ Tunateli kukañesha ñahi yitoñojoka yakutiya netu kwosi chuma chitunateli kwila hakwila tumutiyishi Yehova kuwaha? Anukenu nenu Yehova watoñojokelañaku. Hakeñaña nindi twili yuma yitunateli kukañanya kwilaku. Wasakililaña chuma chejima chitwamwililaña, chakala hohu tunakuchiila kwesekeja nahakumina ñovu jetu. Cheñi, toñojokenu hadi antu ashimunawu muBayibolu amukalakeleleli Yehova namuchima wawu wejima. Chakutalilahu, toñojokenu hadi Pawulu. Wadikitili chikupu hadi yaaka yayivulu, wendeli maluña amalehi nawa watuñili yipompelu yayivulu. Hela chochu, chelili yuma yihimpiki muchihandilu chindi nakumukañesha kudikita mumudimu wakushimwina, komana Nzambi walekeli kumutiya kuwaha? Inehi. Watwalekelihu kuzata kwesekeja nahakumina ñovu jindi nawa Yehova wamukiswilileña. (Yilw. 28:​30, 31) Munjila yoyimu, nyidimu yitunateli kumukalakela Yehova mpinji jikwawu yinateli kwaambuka. Ilaña chuma chasweja kulema kudi yena hikwiluka muloña waweni wutwazatilaña owu mudimu. Ichi tuhanjekenu hanjila jimu mwamwekeshelañayi Yehova nindi watutiyaña kuwaha.

YEHOVA WAMWEKESHAÑA ÑAHI NINDI WATUTIYAÑA KUWAHA?

10. Chumanyi chitwatela kwila hakwila ‘tumutiyi’ Yehova nakutuleja nindi watutiyaña kuwaha? (Yowanu 16:27)

¹⁰ Kuhitila muBayibolu. Yehova wawanaña njila mwamwekeshelañayi kudi antu jindi nindi wayikeña nawa wayitiyaña kuwaha. Nsona jashimuna mpinji jiyedi jamboka Nzambi hamulejeliyi Yesu nindi hiMwanindi akeñayi, atiyañayi kuwaha. (Mat. 3:17; 17:5) Komana mukukeña kutiya Yehova chinakuyilejayi nindi wayitiyaña kuwaha? Yehova hahoshaña nanetu kanwa nakanwaku, ilaña wahoshaña nanetu kuhitila Mwizu dindi. Tunateli “kutiya” Izu daYehova nakutuleja nindi watutiyaña kuwaha neyi tutaña mazu aYesu ekala muNyikanda yaNsañu Yayiwahi. (Tañenu Yowanu 16:27.) Yesu wamwekesheli chikupu yilwilu yekala naTata yindi. Neyi tutaña nsañu yahosha nawu Yesu wayitiyileña kuwaha akakumulondela indi ashinshika hela chakwila adiña abula kuwanina, tunateli kufwikija Yehova nakuleja etu awa mazu.—Yow. 15:​9, 15.

11. Muloñadi wutukuhoshela netu neyi tunakumona makabi chinayi wanyi mukwila nawu Yehova naleki kututiya kuwaha? (Yakoba 1:12)

¹¹ Kuhitila muyuma yelañayi. Yehova wafwilaña chikupu kutukwasha, chidi neyi kutwinka yuma yakumujimba. Mpinji jikwawu, Yehova nateli kwiteja makabi kutumwekena, neyi cheliliyi naYoba muntu washinshika. (Yoba 1:​8-11) Neyi tunakumona makabi hichinayi mukwila nawu Nzambi naleki kututiya kuwahaku. Ilaña, atukwashaña kumwekesha chitwamukeña Nzambi chikupu nikumukuhwelela. (Tañenu Yakoba 1:12.) Hampinji yitunakuhita mukukala, tukumonaña chatukeñayi nichatukwashañayi kuumika.

12. Chumanyi chitunateli kudizila kuchuma chamumwekeneni manakwetu Dmitrii?

¹² Talenu chuma chamumwekeneni manakwetu Dmitrii wakuAsia. Mudimu wamanini nawa mwahitili tukweji twatuvulu hawaninihu mudimu wukwawuku. Dichi wafuukwilihu kutandumuna mudimu windi wakushimwina, nawa chumichi chamwekesheleña nawu wamukuhweleleli Yehova. Tukweji twakotokeli, ilaña hohamu wawanini mudimu wanyi. Kuhiñahu wakatili chakwila wadiña hohu mukadidi. Watachikili kujinoka neyi chakwila hiiyala hela tata yawantu wamuwahi, nawa wajinokeleña neyi chakwila Yehova wachidiña kumutiya kuwaha hela nehi. Ifuku dimu namelela, mwanindi wamumbanda wamusonekeleli hachipapilu mazu ekala haIsaya 30:​15, ahosha nawu: “Mwakekala nañovu neyi mudiwunjika nikunkuhwelela.” Wamuleteleli tata yindi ichi chipapilu nawa wahosheli nindi, “Tata, neyi munaneñi, mwanukeña awa mazu.” Manakwetu Dmitrii wamweni nindi Yehova diyi wakwashileña chisaka chindi kutwalekahu kwikala nayakuda, yakuvwala niiluña mwakushakama. Wahosheli nindi, “Chuma chinateleleli kwila hikudiwunjika nikutwalekahu kumukuhwelela Nzambi yami.” Neyi munakumona kukala kwokumu, mwatela kukuhwelela nenu Yehova wukuyakamenaña nawa wukuyikwashaña kuumika.

13. Anyi azatishañayi Yehova hakumwekesha nindi watutiyaña kuwaha, nawa welaña ñahi mwenimu?

¹³ Kuhitila mudi akwetu mutwadifukwilaña. Yehova wazatishaña amanakwetu niahela hakumwekesha nindi watutiyaña kuwaha. Chakutalilahu, nateli kusañumuna akwetu kuhosha mazu akukolesha hampinji yatelela. Dichuma chamumwekeneni muhela wumu wakuAsia hampinji yamweniyi kukala kweneni. Mudimu wamanini nawa wakatili chikupu. Kuhiñahu nfumwindi wakoñeli nshidi yeneni nawa amutambwili wukulumpi. Iwu muhela wahosheli nindi: “Nelukili wanyi chaletesheli iyi yuma yimwekaneña. Natoñojokeleña nami hadaha nakoñeli chuma chatama nawa Yehova walekeli kuntiya kuwaha.” Iwu muheletu wamulembeleli Yehova kulonda amukwashi akuhweleli nindi wamutiyileña kuwaha. Wamukwashili ñahi? Iwu muhela wahosheli nindi, “Akulumpi muchipompelu ahanjekeli nanami nawa ankwashili kukuhwelela nami Yehova wankeña.” Chimwahitili mpinji, walombeli cheñi kudi Yehova nindi amukwashi. Wahosheli nindi, “Hadodina ifuku natambwilili mukanda wasonekeliwu kudi izanvu dawamanakwetu niahela amuchipompelu. Chinatañileña mazu awu akukundeja, namweni nami Yehova wantiyili.” Mwamweni, kakavulu Yehova wamwekeshaña nindi watutiyaña kuwaha kuhitila mumazu akukolesha ahoshañawu akwetu.—Mas. 10:17.

14. Njilanyi yikwawu mwamwekeshelañayi Yehova nindi watutiyaña kuwaha?

¹⁴ Yehova wamwekeshaña cheñi nindi watutiyaña kuwaha kuhitila mukuzatisha akwetu akakwitiya kulonda atufumbi neyi tunaluwañeshi. Chakutalilahu, mumafuku awapostolu Yehova wazatishili kapostolu Pawulu kusonekela akwawu akakwitiya nyikanda yonenewa 14. Muniyi nyikanda, Pawulu wayifumbili amanakwindi niahela chakadi kuyihita mumbadi, ilaña munjila yakukeña. Muloñadi Yehova chamwoneneniyi Pawulu kusoneka iku kufumba? Yehova hiTata wamuwahi, nawa wafumbaña anyanindi “atiyañayi kuwaha.” (Yish. 3:​11, 12) Dichi neyi tutambwila kufumba kwashindamena haBayibolu, twatela kukumona netu hiwunsahu wunakumwekesha nawu Nzambi watutiyaña kuwaha, bayi neyi naleki kututiya kuwahaku. (Heb. 12:6) Yumanyi yikwawu yamwekeshaña nawu Yehova watutiyaña kuwaha?

WUNSAHU WUKWAWU WAMWEKESHAÑA NAWU YEHOVA WATUTIYAÑA KUWAHA

15. Anyi enkañayi Yehova spiritu yindi yajila, nawa muloñadi kwiluka chumichi chikunateli kutukoleshela?

¹⁵ Yehova wenkaña spiritu yindi yajila antu atiyañayi kuwaha. (Mat. 12:18) Tunateli kudihula netu, ‘Komana namwekeshaña yilwilu yanyikaabu yaspiritu yaNzambi muchihandilu chami?’ Komana munakumona nenu chayinu mpinji munakudiwunjika nankashi nawantu kubadika chimwadiña henohu kanda mumwiluki Yehova? Kafwampi, neyi mumwekeshaña chikupu nyikaabu yaspiritu yaNzambi, dihimukusweja kwiluka nenu Yehova nakuyitiya kuwaha!—Talenu chikasha chinakwila nawu ‘Iyi Diyi Nyikaabu yaSpiritu . . .’

16. Anyi azatishañayi Yehova kushimwina nsañu yayiwahi, nawa chumichi chayileteshaña enu kutiya ñahi? (1 ATesalonika 2:4)

¹⁶ Yehova wahana mudimu wakushimwina nsañu yayiwahi kudi antu atiyañayi kuwaha. (Tañenu 1 ATesalonika 2:4.) Talenu yuma yayiwahi yafuminimu chelili muhela Jocelyn ayishimwini akwawu nsañu yayiwahi. Ifuku dimu, muhela Jocelyn wahindukili iku naneñi. Wahosheli nindi: “Ñovu jamanini nawa naditiyili neyi nidi wamukunkulwayi. Hela chochu, nadiña payiniya nawa idi didu ifuku dinatondeli dakushimwinamu. Dichi nalombeli nawa nayili nakushimwina.” Hadina ifuku nantetemena, muhela Jocelyn wawanini Mary, mumbanda wukweti luwi nawa wetejeli kudiza Bayibolu. Chimwahitili tukweji, Mary wahosheli nindi wadiña nakulomba Nzambi kulonda amukwashi hampinji yadondomweneniyi muhela Jocelyn kuchiisu. Chanukiliyi chuma chamwekeni, muhela Jocelyn wahosheli nindi, “Natiyili neyi Yehova nakunleja nindi, ‘Nakutiyaña kuwaha.’” Hela chochu, bayi neyi antu ejima akwiteja nsañu yitwashimwinañaku. Ilaña twatela kukuhwelela chikupu netu Yehova watiyaña kuwaha neyi tuzata hakumina ñovu jetu kulejaku antu nsañu yayiwahi.

17. Yumanyi yimunadizili kumazu ahosheli muhela Vicky kutalisha hefutu danyiloña? (Isamu 5:12)

¹⁷ Yehova wamonaña kulema kwakuzatisha ifutu danyiloña hakukwasha antu atiyañayi kuwaha. (1 Tim. 2:​5, 6) Indi neyi tuchidi kutiya netu Yehova watutiyaña kuwaha wanyi, hela chakwila twakuhwelela mwifutu danyiloña nawa twapapatishewa? Anukenuña nenu, hitwatela kukuhwelela mpinji yejima chitwatiyañaku, ilaña twatela kumukuhwelela Yehova. Antu akuhwelelaña mwifutu danyiloña, wayimonaña nindi aloña kumesu indi nawa wayikana nindi wukuyikiswilaña. (Tañenu Isamu 5:12; Rom. 3:26) Kutoñojoka chikupu hefutu danyiloña kwamukwashili muhela Vicky. Ifuku dimu, hanyima yakutoñojoka chikupu hefutu danyiloña, wahosheli nindi: “Yehova nadiwunjiki nanami hadi mpinji yayilehi. . . . Hela chochu, chidi neyi nahosheleña kudi Yena nami: ‘Kukeña kweyi kwila kunkwasha nehi. Mulambu waMwaneyi kwila wubuta nshidi yami nehi.’” Kuhitila mukutoñojoka chikupu hanichi chawaana chefutu danyiloña, watachikili kutiya nindi amukeña kudi Yehova. Ninetu tukutiya netu Yehova watukeña nawa watutiyaña kuwaha neyi tutoñojokaña hefutu danyiloña.

18. Chumanyi chitwatela kukuhwelela neyi tutwalekahu kumukeña Tata yetu wamwiwulu?

¹⁸ Hela chakwila tunateli kuzata nañovu kuzatisha yuma yitunadizi muchinu chibaaba, mpinji jikwawu tunateli kuneña nikujinoka neyi chakwila Yehova watutiyaña kuwaha hela nehi. Neyi chuma chamuchidiwu chimwekana, anukenuña nenu watiyaña kuwaha “antu atwalekañahu kumukeña.” (Yak. 1:12) Dichi twalekenuhu kuswina kwakwihi naYehova nikwiluka njila jejima mwamwekeshelañayi nindi wayitiyaña kuwaha. Anukenuña mpinji yejima nenu Yehova “hekala kwakulehi nanetu ejimaku.”—Yilw. 17:27.