Komana Munateli Kwaambula Chalala naNsañu Yakutwamba?

1. Mwatiyaña ñahi hakwiluka chalala?

ANTU jaYehova akeña chalala chekala Mwizu daNzambi. Dihashindamena chikuhwelelu chetu. (Rom. 10:17) Twakuhwelela netu Yehova washiliku chipompelu chawakaKristu kwikala “chishimi nawa hakolela chalala.” (1 Tim. 3:15) Twayitiyililaña chakufuma hamuchima “anakulombola mukachi [ketu]” hampinji yinakulumbululawu chalala chamuBayibolu nikutwinka wunlomboli watukwashaña kwila nkeñelu yaNzambi.—Heb. 13:17.

2. Kwesekeja naYakoba 5:19, chumanyi chinateli kutumwekena hanyima yakwiluka chalala?

² Hela chochu, hanyima yakwiteja chalala nimudimu wazataña kuloñesha kwaNzambi hakutwinka wunlomboli washindamenewa, anateli kutusenwisha. (Tañenu Yakoba 5:19.) Satana wukutiya kuwaha nankashi neyi atukojeja kuleka kukuhwelela Bayibolu hela wunlomboli wutwatambwilaña mukuloñesha kwaNzambi.—Efwe. 4:14.

3. Muloñadi wutwatela kwovwahilaña chalala? (AEfwesesa 6:13, 14)

³ Tañenu AEfwesesa 6:13, 14. Katataka Diyabolu akazatishi nsañu yakutwamba yekoku nakuluwañesha nyuza yejima kulonda yakadikañi naYehova. (Chim. 16:13, 14) Tunateli kukuhwelela cheñi netu Satana wakaswejelaku kuzata nañovu kukeña kuluwañesha antu jaYehova. (Chim. 12:⁠9) Dichi, chalema nankashi kudidizisha etu aweni kwiluka chaambu chekala hakachi kachalala nansañu yakutwamba kulonda twovwahileña chalala. (Rom. 6:17; 1 Pet. 1:22) Hakwila twakapuluki halukadi lwasweja, twatela kwovwahilaña chalala!

4. Yumanyi yitukuhanjekahu muchinu chibaaba?

⁴ Muchinu chibaaba, tukwiluka yilwilu yiyedi yitwatela kwikala nayu yikutukwasha kwiluka chalala chamuBayibolu nikwiteja wunlomboli wamukuloñesha kwaNzambi. Kuhiñahu tukuhanjeka yuma yisatu yitwatela kwila hakwila tutwalekihu kwovwahila chalala.

YILWILU YITWATELA KWIKALA NAYU YIKUTUKWASHA KWILUKA CHALALA

5. Kumutiya Yehova woma kwatukwashaña ñahi kwiluka chalala?

⁵ Kumutiya Yehova woma. Neyi tumutiyaña Yehova woma munjila yatelela, tukumukeña nankashi chakwila hitunateli kwila chuma hela chimu chikumuneñeshaku. Tunakufwila chikupu kwiluka chaambu chekala hakachi kayuma yaloña nayabula kuloña nihakachi kachalala nansañu yakutwamba kulonda Yehova atutiyeña kuwaha. (Yish. 2:3-6; Heb. 5:14) Hitwatela kusweja kutiya antu woma kubadika kukeña kutwamukeña Yehovaku, muloña yuma yayitiyishaña antu kuwaha kakavulu yamuneñeshaña Yehova.

6. Kutiya antu woma kwayiletesheli ñahi anlomboli 10 awaIsarela kushimuna nsañu yakutwamba?

⁶ Neyi tutiyaña antu woma kubadika chitwamutiyaña Nzambi woma, tunateli kusenuka muchalala. Talenu chuma chamwekeni kudi anlomboli 12 ayili nakwendesha ituña dakaniniyi Yehova kuyinka aIsarela. Hadawa akakwendesha ituña, adi 10 ayitiyili aKenani woma nankashi kubadika kukeña kwamukeñeliwu Yehova. Alejeli akwawu aIsarela nawu: “Hitukutwesha kuya nakuzuña nanowu antuku, muloña wena akola kutubadika etu.” (Kuch. 13:27-31) Kushindamena hohu hachinateli kumonawu antu, aKenani adiña nañovu nankashi kubadika aIsarela. Ilaña mazu ahosheliwu akakwendesha ituña nawu aIsarela hiyakutwesha kuumika mushindu ayilumbu jawuku, amwekesheli nawu hiyamushindameneni Yehovaku. Ana akakwendesha ituña 10 ateleleli kusha muchima hachuma chakeñeleñayi Yehova nindi aIsarela eli. Ateleleli cheñi kutoñojoka chikupu hayuma yayilililiyi muyaaka yantesha yahitilihu. Chumichi chadi kuyikwasha kwiluka nawu ñovu jawaKenani jadiña jantesha nankashi neyi ajesekeja nañovu jaYehova jabadika. Kwambukaku nanana akakwendesha ituña abula kushinshika, aYoshuwa naKalebu akeñeleña nawu ayitiyi kuwaha kudi Yehova. Alejeli antu nawu: “Neyi Yehova natutiyi kuwaha, chalala wukututwala munidi ituña nawa wukutwinkadu.”—Kuch. 14:6-9.

7. Chumanyi chinateli kutukwasha kusweja kumutiya Yehova woma? (Talenu cheñi mwevulu.)

⁷ Hakwila tuswejeña kumutiya Yehova woma, twatela kusha muchima hachuma chikumuzañalesha muyuma yejima yitunakufuukula. (Mas. 16:⁠8) Hampinji yimunakutaña nsañu yamuBayibolu, dihulenu nenu, ‘Neyi yami nadiña muniku kukala nadi kufuukula ñahi?’ Chakutalilahu, difwikijenu munakutiyilila hampinji ana anlomboli 10 awaIsarela hanakushimunawu nsañu yakutwamba. Komana mwadi kukuhwelela iyi nsañu nakuyikojeja mutiyi antu woma, tahindi kukeña kumwamukeña Yehova nimuchima wakufwila kumuzañalesha jadi kuyiletesha kubula kutiya woma? Ikiñu dejima dawaIsarela dakaanini kukuhwelela nsañu yalala yashimwiniwu aYoshuwa naKalebu. Chafuminimu, hiyayitejeli kwiñila Mwituña daChikaninuku.—Kuch. 14:10, 22, 23.

8. Chilwilwinyi chitwatela kuzata nañovu kulonda twiikali nachu, nawa muloñadi?

⁸ Kudizoza. Yehova wasololaña chalala kudi antu adizoza. (Mat. 11:25) Twadizozeli nakwiteja wukwashu hakwila tudizi chalala. (Yilw. 8:30, 31) Hela chochu, twatela kwikala asoñama nakutondolwela kudivwimba. Neyi twadivwimba, tunateli kutachika kumona netu yitoñojoka yetu yaloña neyi chaloña yishina yamuNsona niwunlomboli wamukuloñesha kwaYehova.

9. Tunateli kutwalekahu ñahi kwikala adizoza?

⁹ Hakwila tutwalekihu kwikala adizoza, twatela kwanukaña ochitwakeha neyi tudesekeja naYehova. (Mas. 8:3, 4) Twatela cheñi kumulomba Yehova kulonda atukwashi tusweji kwikala adizoza nikwikala namuchima wakudiza. Yehova wukutukwasha kutwamijaku yitoñojoka yindi yatwinkayi kuhitila Mwizu dindi nimukuloñesha kwindi kubadika yitoñojoka yetu. Hampinji yimunakutaña Bayibolu, talenu yikuma yalema yinakumwekesha Yehova chakeñayi chilwilu chakudizoza nichahelayi kudivwimba, kudisamba nikudinka wanta. Nawa mwatela kuzata nañovu kutwalekahu kwikala adizoza neyi anayinki kukooleka mukuloñesha kwaYehova kunaleteshi mwiikaliku nawuswa.

CHITUNATELI KUTWALEKAHU KWOVWAHILA CHALALA

10. Anyi azatishañayi Yehova hakuhana nshimbi nikulombola antu jindi?

¹⁰ Twalekenuhu kukuhwelela wunlomboli wamukuloñesha kwaYehova. Hampinji yawaIsarela akushankulu, Yehova wazatishili aMosi naYoshuwa hakwinka antu Jindi nshimbi. (Yosh. 1:16, 17) AIsarela ayikiswilileña hampinji yamweneñawu awa amayala nawu amwimeneneñaku Yehova Nzambi. Chimwahitili yaaka yayivulu chelili chipompelu chawakaKristu chatachi achituñi, apostolu 12 diwu ahanineña nshimbi. (Yilw. 8:14, 15) Kuhiñahu, idi izanvu datoheli chelili abombelihu akulumpi amakwawu muYerusalema. Kuhitila mukulondela wunlomboli watambwilileñawu kudi ana amayala ashinshika, “yipompelu yatwalekelihu kwikala nachikuhwelelu chakola nawa antu avulilileñaku hefuku-hefuku.” (Yilw. 16:4, 5) Nimakonu, atukiswilaña neyi tulondelaña wunlomboli wutwatambwilaña mukuloñesha kwaYehova. Hanu dinu Yehova wukutiya ñahi neyi tuleka kwovwahila antu atondayi nindi atulomboleña? Tunateli kwakula ilu lwihu neyi tushinshika hachuma chamwekeni hampinji yayilombweleñawu aIsarela hakuyitwala Mwituña daChikaninu.

11. Chumanyi chayimwekeneni aIsarela akushankulu adikañili naMosi muntu atondeliwu kudi Yehova nindi alomboleña antu Jindi? (Talenu cheñi mwevulu.)

¹¹ Hampinji yimu aIsarela hadiñawu halwendu lwakuya Mwituña daChikaninu, amayala amu aya mpuhu adikañili naMosi nimudimu wamwinkeliwu kudi Yehova. Ahosheli nawu: “Izaza dawantu dejima [bayi neyi Mosi hohuku] dajila nawa Yehova wudi hakachi kawu.” (Kuch. 16:1-3) Hela chakwila Nzambi wamweneña nindi “izaza dawantu dejima” dadiña dajila, Yehova wamutondeli Mosi nindi alomboleña antu Jindi. (Kuch. 16:28) Chadiña nakumusawulawu Mosi, adiña nakusawula Yehova. Hiyashili muchima hachuma chakeñeleñayi Yehovaku; ashili muchima hachuma chakeñeleñawu awenawu, dikwila nawu kwikala nañovu nankashi nikuya mpuhu. Nzambi wajahili ana anlomboli adikañili, kushilahu niantu amavulu adibombeli hamu nawu. (Kuch. 16:30-35, 41, 49) Makonu, twatela kwiluka chikupu netu Yehova wayitiyaña kuwaha wanyi antu abulaña kulemesha ntanjikilu yamukuloñesha kwindi.

12. Muloñadi wutwatela kutwalekelahu kukuhwelela kuloñesha kwaYehova?

¹² Tunateli kutwalekahu kukuhwelela kuloñesha kwaYehova. Neyi kudi wunsahu wunakumwekesha hatooka nawu kunakukeñeka kuhimpaku ntiyishishilu yimu yachalala chamuBayibolu hela njila yitwatela kuzatilamu mudimu waWanta, amanakwetu anakulombola hiyashintajalaña kuhimpaku. (Yish. 4:18) Elaña mwenimu muloña chuma chakeñañawu nankashi hikumuzañalesha Yehova. Azataña cheñi nañovu kufuukula kushindamena Hezu daNzambi, mwekala mazu alondelaña antu jaYehova ejima.

13. Mukuku wamazu akwila nawu “mwaya mazu amawahi” watalisha mudihi, nawa chumanyi chitwatela kwila nanawa mazu?

¹³ “Londelaña mwaya mazu amawahi.” (2 Tim. 1:13) Mukuku wamazu akwila nawu “mwaya mazu amawahi” watalisha kuntañishilu yawakaKristu yekala muBayibolu. (Yow. 17:17) Iyi ntañishilu dihashindamena yuma yejima yitwakuhwelela. Kuloñesha kwaYehova kwatudizishaña kukakela kunawa mazu. Neyi twilaña mwenimu, akatukiswila.

14. AkaKristu amu alekeli ñahi kulondela “mwaya mazu amawahi”?

¹⁴ Chumanyi chinateli kumwekana neyi tubula kulondela “mwaya mazu amawahi”? Talenu ichi chuma chamwekeni. Mumafuku awakaKristu akusambila, kwatiyakeni mbonji yataandili mukachi kawakaKristu nawu ifuku daYehova dinashiki. Kwatela kwadiña mukanda mwadiña awa mazu watoñojokeliwu antu nawu atela awusonekeli kudi kapostolu Pawulu. Chakadi kukeñakeña wunsahu walala, akaKristu amakwawu amuTesalonika akuhweleleli iyi mbonji nawa atachikili nikuyitaandisha. Hiyadi kuyiluwañeshaku neyi chakwila anukili yuma yayitañishiliyi Pawulu hachidiñayi nawu. (2 Tes. 2:1-5) Pawulu wayifumbili amanakwindi kubula kukuhwelela yuma yejima yikutiyawu. Nawa hakwila ayikwashi kulonda chuma chamuchidiwu chakabuli kuyimwekena kumbindi, Pawulu wakunkulwili mukanda windi wamuchiyedi wayisonekeleliyi aTesalonika nanawa mazu: “Ami Pawulu, yami inasoneki iku kwimusha nachikasa chami, ­dichinjikijilu chanyikanda yami yejima; ichi dichinasonekaña.”—2 Tes. 3:17.

15. Tunateli kudikiña ñahi etu aweni kunsañu yakutwamba yamwekanaña neyi yalala? Shimunenu chakutalilahu. (Talenu cheñi nyevulu.)

¹⁵ Chumanyi chitunateli kudizila kumazu ayisonekeleliyi Pawulu aTesalonika? Neyi tutiya chuma chinambukiku nayuma yitwadizaña muBayibolu indi kwiji tutiya nsañu yakutiyisha woma, twatela kuzatisha kashinshi. Mumpinji yaNfulumendi yaSoviet Union, ayilumbu jetu ataandishili mukanda wamwekeneña neyi wafumini kukasanji keneni kamukaayi. Iwu mukanda walejeli amanakwetu amu nawu ekali nakuloñesha kwambukaku nawa kwadimena. Iwu mukanda wamwekeni neyi walala. Ilaña amanakwetu ashinshika hiyayiluwañesheliku. Elukili nawu nsañu yadiña muniwu mukanda yesekeni nansañu yayidizishileñawu. Makonu, ayilumbu jachalala mpinji jikwawu azatishaña yuma yinakutuñatuñawu katataka kulonda atuluwañeshi nikutwambula. Chatela ‘tuluwankani swayi muyitoñojoka yetu,’ twatela kudikiña etu aweni kuhitila mukumona neyi nsañu yitunatiyi hela kutaña yinesekani nansañu yalala yitweluka dehi.—2 Tes. 2:2; 1 Yow. 4:1.

16. Kwesekeja naARoma 16:17, 18, chumanyi chitwatela kwila neyi kudi antu anakutaandisha nsañu yaambukaku nachalala?

¹⁶ Twalekenuhu kwikala anuñañana nawantu ashinshika kudi Yehova. Nzambi wakeñaña nindi tudifukuleña hamu mukunuñañana. Tukutwalekahu kwikala anuñañana neyi tukakela kuchalala. Muntu wejima wataandishaña nsañu yaambukaku nachalala waletaña chaambu muchipompelu, dichi Nzambi watusoñamishaña nindi ‘tuyitondolweleña.’ Mukunkulwayi, anateli kutufumisha muchalala.—Tañenu ARoma 16:17, 18.

17. Yumanyi yayiwahi yafumañamu neyi twiluka chalala nikuchikakela?

¹⁷ Neyi twiluka chalala nawa tuchikakela, tukutwalekahu kwikala ashinshika kudi Yehova nawa chikuhwelelu chetu chikwikala chakola. (Efwe. 4:15, 16) Hiyakutuluwañesha nantañishilu yaSatana yakutwamba ninansañu yakutwambaku, nawa Yehova wakatwalekahu kutwakamena nimumpinji yalukadi lwasweja. Twalekenuhu kukakela kuyuma yalala, “nawa Nzambi wakuwunda wukwikalaña nanenu.”—Fwili. 4:8, 9.