Munakwanuka?

Komana mwatañili nakanañachima yibaaba yachinu chaaka yaKaposhi Kakutalila? Esekenu kwakula awa malwihu:

Tunateli kumwimbujola ñahi Yehova chayimonañayi ambanda?

Wayimwekeshelaña chaambu wanyi, kulemeshaku amayala kubadika ambanda. Nzambi wayitiyililaña ambanda, kusha muchima kuchinakutiyawu niyuma yinakuyakamisha. Nawa wayikuhwelela kuzata mudimu windi.—w24.01, mapara. 15-16.

Tunateli kuzatisha ñahi AEfwesesa 5:​7, yahosha nawu: “Bayi mudibomba nawuku”?

Kapostolu Pawulu watusoñamishileña kubula kudikunda nawantu anateli kuletesha chitukalileña kwovwahila nshimbi jaNzambi. Iku kudikunda kwabula kutelela munabombeli niantu itwadikundaña nawu mesu namesu kushilahu niantu itwahanjekaña nawu haintaneti.—w24.03, mapara. 22-23.

Mpanjinyi jakutwamba jitwatela kusoñama naju?

Twatela kwikala asoñama nansañu yinabuli wunsahu walala yinakutulejawu kudi amabwambu itwakuhwelela, maimelu itwabula kukuhwelela kutambwila anafumi kudi antu itunabuli kwiluka ninsañu yakutwamba yamwekanaña neyi yalala yafumaña kudi akakusekesha.—w24.04, para. 12.

Yumanyi yitweluka niyitwabula kwiluka hadi Yehova chakasompeshayi Mwanta Solomoni kushilahu niantu afwili muSodoma naGomora nihaDibaji?

Tweluka wanyi neyi Yehova wakunkulula dehi nindi ajilumuka chahaya nyaaka. Hela chochu, tweluka netu weluka yuma yejima nawa wukweti luwi chikupu.—w24.05, mapara. 3-4.

Chineli Nzambi “hiIlola” chatukwashaña kwiluka netudi? (Kuhit. 32:4)

Tunateli kuswama mudi Yehova. Washindamenewa, mpinji yejima washikijaña munakaniyi. Nawa wahimpaña wanyi, watwalekañahu nakumwekesha yilwilu yoyimu ninkeñelu.—w24.06, mapara. 26-28.

Chumanyi chinateli kuyikwasha kuhimpa neyi munayi kuchipompelu chikwawu?

Mushindamenenu Yehova, wunateli kuyikwasha neyi chakwashiliyi ambuñindi akunyima. Lekenu kwesekeja chipompelu mumunayi nachipompelu kumunafumi. Zatilenuña hamu nawantu imunawani muchipompelu nawa fwilenu kukwata amabwambu.—w24.07, mapara. 26-28.

Yumanyi yitwadizilaña muyishimu yisatu yekala muMatewu kapetulu 25?

Chishimu chanyikoku nawampembi chakonkomwenaña hakwikala ashinshika nawa ovwahila. Chishimu chawambanda ajiki akweti maana niayisupi chakonkomwenaña hakwikala adiloñesha nawa asoñama. Nawa chishimu chantalenta chamwekeshaña chichalemena kwikala adikita.—w24.09, mapara. 20-24.

Ikeeki datembeli yaSolomoni dadiña dadilehi kushika hadihi?

Ha 2 Kushindulula 3:​4, mamanyusikiliputi amakwawu akushankulu ashimuna nawu “makyubiti 120,” dikwila nawu ikeeki daleheli mamita 53 mukuleha kwiwulu. Ilaña nsona jikwawu jalala jahosha nawu “makyubiti 20,” dikwila nawu ikeeki daleheli mamita 9 mukuleha kwiwulu. Iyi nsañu yakukumishaku yinamwekani neyi yinesekani nakutoha kwambañu yatembeli.—w24.10, para. 31.

Mazu akwila nawu nkoñi wakuzatila watela kwikala ‘iyala wasumbula mumbanda wumu,’ atalisha mudihi? (1 Tim. 3:12)

Atalisha mukwila nawu wasumbula hohu mumbanda wumu nawa hatela kwila wuvumbiku. Kubombelahu, hatela kufwilaña ambanda acheñiku.—w24.11, para. 19.

Muloñadi chitwatela kuhoshela netu nsañu yekala haYowanu 6:53 bayi neyi diyi njila yatela kulondelawu haKuda kwaMwanta kwaMelelaku?

Yowanu 6:53 yahosha hakuda mujimba waYesu nikunwa mashi indi. Yesu wahosheli awa mazu mu 32 C.E., muÑaliliya, nakuleja aYudeya achidiña kanda amukuhweleli. Hela chochu, Kuda kwaMwanta kwaMelela akutachikishili chimwahitili chaaka chimu muYerusalema. Kwenakuna Yesu wahosheleña nawantu akayuulayi nawu mwiwulu.—w24.12, mapara. 10-11.