Yuma Yatama Yamwekanaña Mpinji yaNjita
Njita yaleteshaña antu kukabakana nankashi. Amashidika niantu ahitahu dehi munjita mukaayi kejima eluka chiwahi yuma yatama yamwekanaña.
MASHIDIKA
“Antu ayijahaña hela kuyikatisha iku wunakumonaku. Wukwendaña hohu nawoma.”—Gary, Britain.
“Yidaña yanshikeneni munyima nikumesu, namweni chayijahiliwu antu amavulu, kushilahu anyana niatushinakaji. Njita yaleteshaña antu kukola nyichima.”—Wilmar, Colombia.
“Neyi muntu amulozela mumesu eyi chafumaña muyitoñojoka swayi wanyi. Mpinji yejima wukwanukaña chabañayi nichakalokañayi. Hiwakamujimbala owu muntuku—kwakulehi chikupu.”—Zafirah, United States.
ANTU AHITAHU MUNJITA
“Namweneña neyi nakekalahu cheñi namuzañalu wanyi. Natiyileña woma nami akunjaha ilaña chuma chañakamishileña nankashi hikutoñojoka nami antaña nimabwambu jami akuyijaha.”—Oleksandra, Ukraine.
“Twatiyili woma nankashi kwimena yakuda kufuma nampinji ya 02:00 nakushika 23:00 , netu keña chidaña chitushikeni.”—Daler, Tajikistan.
“Anvwali jami ayijahili mpinji yanjita. Nashalili nginga chakadi muntu wakuñakamena nikunkundeja.”—Marie, Rwanda.
Hela chakwila awa antu ejima amweni ilamba muloña wanjita, wejima wawu anateniwu hewulu ichi akushakama mukuwunda. Nawa chabadika kulema, aneluki chikupu nawu njita jejima katataka jimani. Kanu Kaposhi Kakutalila kanalumbululi kuzatisha Bayibolu chikamwekana chumichi