Chimunateli Kwikala naKuwunda Mukaayi Mudi Majita
Gary wazatilihu wushidika wahosheli nindi, “henohu kanda nitachiki kudiza Bayibolu, nelukili wanyi chuma chaletesheleña mukaayi musweji makabi, kuhelañana, niyikonkojola. Ilaña ichi nekali nakuwunda kwamuyitoñojoka. Neluki chikupu nami Yehova Nzambi wakaleta kuwunda mukaayi kejima.”
Bayi neyi Bayibolu yinamukwashi hohu Gary nkawindiku. Talenu Bayibolu chiyinakwashi antu amakwawu.
BAYIBOLU YAHOSHA NAWU: “Muloña eyi, eyi Yehova, wudi muwahi nawa wanakenaña swayi.”—Isamu 86:5.
IYI VASI CHIYINAKWASHI ANTU: “Iyi vasi yinankwashi kwiluka chikupu nami Yehova wukweti luwi. Neluki nami wukuñanakena hayuma yejima yinakoñeli kunyima hampinji yinadiña nakuzuña njita.”—Wilmar, Colombia.
BAYIBOLU YAHOSHA NAWU: “Inakuleña mawulu amaha niiseki dadiha; nawa yuma yakunyima hiyakayanukahu cheñiku, nawa hiyakenzahu cheñi kumuchimaku.”—Isaya 65:17.
IYI VASI CHIYINAKWASHI ANTU: “Nakabakanaña nalumbaji-mbaji nichineñi muloña wayuma yinamweni hampinji yinazatileña wushidika. Ilaña iyi nsona yañanukishaña nawu katataka Yehova yafumishihu yuma yaleteshaña nanukeña yuma yatama yinamweni. Hiyakenzahu cheñi muyitoñojoka hela mumuchima wamiku. Okuwaha!”—Zafirah, United States.
BAYIBOLU YAHOSHA NAWU: “Mumafuku indi waloña wakashakama chiwahi, nawa kuwunda kwakawanina kwejima sampu kakweji kanajiyi.”—Isamu 72:7.
IYI VASI CHIYINAKWASHI ANTU: “Natoñojokañahu kakavulu hanawa mazu. Katataka yuma yejima yatama yakojejañawu kudi njita yimani, nawa hitwakakamenaña netu antaña jetu akuyijahaku.”—Oleksandra, Ukraine.
BAYIBOLU YAHOSHA NAWU: “Antu jeyi afwa akahanda. . . . Tonenu nawa bidikenu namuzañalu chikupu, enu antu adi mulunkuñu!”—Isaya 26:19.
IYI VASI CHIYINAKWASHI ANTU: “Antaña jami amavulu ayijahili hampinji yayijahileñawu aTutsi kudi antu akumuchidi wukwawu. Ilaña iyi vasi yankwashaña kwiluka nami nakayimona cheñi. Inakutalila mpinji yinakatiyaña cheñi mazu awu neyi anayisañuli!”—Marie, Rwanda.
BAYIBOLU YAHOSHA NAWU: “Hakushimbula hohu chanti, antu atama hiyakekalaku nawa cheñiku . . . Ilaña amwovu akaswana iseki nawa akazañalala chikupu nakushakama mukuwunda kwakweni.”—Isamu 37:10, 11.
IYI VASI CHIYINAKWASHI ANTU: “Hela chakwila njita yinamani, ilaña antu achidi kuyikabisha kudi antu atama. Awa mavasi anankwashi chikupu. Yehova wamonaña yuma yejima nawa weluka kukala kwinnakuhitamu. Washiika nindi makabi ejima yikamana nawa twakayijimbala.”—Daler, Tajikistan.
Antu anashimuniwu muyinu magazini adi hakachi kamamiliyoni awaYinsahu jaYehova anakwashiwu kudi Bayibolu kwikala nakuwunda. Anadizi kubula kwikala nachaambu chekowa, ituña, muchidi, nikuhelañana. (AEfwesesa 4:31, 32) AYinsahu jaYehova hiyadiñijaña munsañu jamapolitikiku nawa akaanaña kuzuña madombu hela majita.—Yowanu 18:36.
Cheñi, aYinsahu jaYehova adikwashaña wumu namukwawu mukaayi kejima. (Yowanu 13:35) Chakutalilahu, Oleksandra, atenawu hakusambila, yena nimuhelindi atemukilili kwituña dacheñi muloña wanjita. Wahosheli nindi: “Chitweñilili hohu mwituña dacheñi, twawanini aYinsahu amunodu ituña anakututalila kulonda atutambwili. Atulejeli chakushakama mwituña dawenyi mutwayili.”
Tunayitambiki mwani mwakenzi kukupompa kwetu kutwadizaña nsañu yamuBayibolu yakuwunda nichakuyizatisha muchihandilu. Yenu ha jw.org neyi munakukeña kwiluka chipompelu chidi mukamwihi nanenu hela neyi munakukeña kulomba kudiza Bayibolu naChinsahu chaYehova kuzatisha mukanda waMunateli Kwikala naMuzañalu Haya Nyaaka!