Chakamana Majita Ejima

NZAMBI WAKAFUMISHAHU NFULUMENDI JAWANTU

Nzambi wakafumishahu nfulumendi jawantu kuzatisha njita yatenañawu muBayibolu nawu Amagedoni.a (Chimwekeshu 16:16) Hanoyu mpinji, “anyanta ahanu hamaseki hejima akayipompeshela hamu kunjita yefuku deneni daNzambi Wañovu Jejima.” (Chimwekeshu 16:14) Amagedoni hinjita yaNzambi yakamanisha majita ejima.

Nzambi wakafumishahu nfulumendi jawantu nakusinsishahu Wanta windi, hela nfulumendi, yakayuulilaña mwiwulu nawa akayijilumuna wanyi. (Danyeli 2:44) Nzambi watonda mwanindi, Yesu Kristu, kwikala Mwanta. (Isaya 9:​6, 7; Matewu 28:18) Iyi nfulumendi diWantab wadizishiliyi Yesu atumbanji twindi nindi alombeña nawu winzi. (Matewu 6:​9, 10) Antu ejima akekala anuñañana muloña akayiyuulaña kudi nfulumendi yimu yakayuulawu kudi Yesu.

Kwambukaku nawanyuuli awantu, Yesu hakazatisha ñovu yindi kulonda yakaditiyisheña yomweni kuwahaku. Chineli hekala nachambuku, kwosi muntu wakakamenaña nindi akamukabisha muloña wekowa dindi, ituña kwafumayi, hela muloña wamuchidi windiku. (Isaya 11:​3, 4) Antu hiyakazuñaña kulonda aleki kuyikabishaku. Muloñadi? Muloña Yesu wakayuulaña chiwahi antu ejima. “Yena wakapulwisha kazweñi wunakulomba wukwashu, nimuntu wakehelamu niwejima wunabuli wakumukwasha. . . . Wakayipulwisha kumakabisha nikumadombu.”—Isamu 72:​12-14.

Wanta waNzambi wakafumishahu yitwa yanjita yejima heseki. (Mika 4:3) Wakafumishahu cheñi niantu ejima atama akaanaña kuleka kuzuña njita hela aleteshaña antu amakwawu kubula kushakama mukuwunda. (Isamu 37:​9, 10) Antu ejima, amayala, ambanda, hela anyana akatiyaña nawu akiñewa kwejima kwakayañawu hanu heseki.—Ezekeli 34:28.

Antu akashakamaña chiwahi muWanta waNzambi. Wakafumishahu kukala kwejima kwaleteshaña antu kuzuña, kudi neyi wuzweñi, nzala, nikubula matala. Antu ejima akekala nayakuda yayivulu nawa akatuña matala awu amawahi mwakashakamañawu.—Isamu 72:16; Isaya 65:​21-23.

Wanta waNzambi wakafumishawu yuma yejima yatama yaletawu kudi njita. Imu bayi neyi munabombeli hohu yilonda yakumujimbaku ilaña nikukala kwamuyitoñojoka kwenzaña muloña wayuma yatama yahitañamu antu mpinji yanjita. Niantu afwa dehi akayisañula nawa akekala cheñi nawumi hanu hamaseki. (Isaya 25:8; 26:19; 35:​5, 6) Antu muyisaka akadimona cheñi nawantaña jawu nawa yuma yatama yejima yamweniwu muloña wanjita yikekala hakachi “kayuma yakunyima yikahita.”—Chimwekeshu 21:4.

NZAMBI WAKAFUMISHAHU NSHIDI

Wanta waNzambi wakanuñañesha antu nawa akadifukulaña kudi Nzambi walala wumu, Yehovac, “Nzambi wakukeña nikuwunda.” (2 AKorinda 13:11) Antu akadiza chakushakama hamu mukuwunda. (Isaya 2:​3, 4; 11:9) Antu ejima azatishaña yuma yadizañawu akayisubula kuwuduñu wanshidi.—ARoma 8:​20, 21.

NZAMBI WAKAMUFUMISHAHU SATANA NIANDEMONI JINDI

Wanta waNzambi wakajilumuna ejima akojejaña antu kuzuña majita, dikwila nawu Satana niandemoni jindi. (Chimwekeshu 20:​1-3, 10) Chineli hiyakatweshaña cheñi kuluwañesha antuku, “kuwunda kwakawanina kwejima.”—Isamu 72:7.

Kuhwelelenu nenu chikaninu chaNzambi chakumanisha majita chakashikijewa. Nzambi wukweti wuswa wakufumishahu majita nimuchima wakufwila kwilamu.

• Nzambi wukweti maana niñovu yakumanisha majita. (Yoba 9:4) Kwosi chuma chinateli kukañanyayi kwilaku.—Yoba 42:2.

• Nzambi watiyaña kutama neyi antu anakukabakana. (Isaya 63:9) Cheñi “wahela muntu wakeña madombu.”—Isamu 11:5.

• Nzambi washikijaña mwejima munahoshiyi; hatwambañaku.—Isaya 55:​10, 11; Titusa 1:2.