Fuukulenuña Yuma Yikumuzañalesha Yehova

1. Kukalanyi kutwamonaña wejima wetu?

IFUKU niifuku kudi yuma yitwafuukulaña. Yuma yikwawu yitwafuukulaña yaswayi, chidi neyi yakuda yitukudawula hela mpinji yakuya nakukaama. Yuma yikwawu yakala kufuukula. Yuma yitunateli kufuukula hadaha yinateli kutukatisha kumujimba, kutuletela muzañalu muchisaka chetu hela nehi, nawa yinateli kutukwasha kumukalakela Yehova chachiwahi hela nehi. Tunakukeña yuma yitunakufuukula yitukwashi etu aweni nichisaka chetu. Nawa chasweja kubadika, tunakuhweleli netu yuma yitukufuukula yikumutiyisha kuwaha Yehova.​—Rom. 12:1, 2.

2. Yumanyi yikuyikwasha kufuukula chachiwahi?

² Munateli kufuukula chachiwahi neyi (1) mwiluka wunsahu wejima, (2) mwiluka chatoñojokañayi Yehova hanoyu nsañu, nawa (3) mutoñojoka hachuma chimwatela kufuukula. Achinu chibaaba chikuhosha haniyi yuma, nawa chikutukwasha cheñi chitunateli kuzatisha chiwahi kashinshi ketu.​—Yish. 2:11.

ILUKENU WUNSAHU WEJIMA

3. Shimunenu chakutalilahu chinakumwekesha chichalemena kwiluka wunsahu wejima henohu kanda mufuukuli.

³ Chuma chatachi chinateli kuyikwasha kufuukula chachiwahi hikwiluka wunsahu wejima. Kwila mwenimu kwalemenadi? Twili netu muntu wakata nayi nakudimona nandotolu nakumwihula hachikatu cheneni chakatayi. Komana ndotolu wukushikena kufuukula njila yakumuukilamu henohu kanda eluki chikatu chakatayi hela henohu kanda amwihujoli? Dichikwilayi wanyi. Ninenu munateli kufuukula chachiwahi neyi musambila kwiluka wunsahu wejima hanochu chuma chimunakukeña kufuukulahu. Munateli kwila ñahi mwenimu?

4. Kwesekeja naYishimu 18:13, chumanyi chinateli kuyikwasha kwiluka chikupu nenu muneluki wunsahu wejima? (Talenu cheñi mwevulu.)

⁴ Munateli kwiluka wunsahu wejima neyi mwihula malwihu. Twili netu anayitambiki kuchidika. Komana mukuya? Neyi munamwiluki wanyi muntu wunaloñeshi chidika hela chinatanjikiwu yuma, munateli kumwihula malwihu adi neyi: “Chidika chikwikalila kudihi, nawa mpinjinyi? Kukwikala antu añahi? Hinyi wukutalaña yuma hakwila yendi chiwahi? Anyi amakwawu anatambikiwu? Yumanyi yikwikalaku? Kukwikala niwalwa tahindi?” Chimweluka ñakwilu yanawa malwihu chikuyikwasha kufuukula chachiwahi.​—Tañenu Yishimu 18:13.

5. Yumanyi yimwatela kwila hanyima yakwiluka wunsahu wejima?

⁵ Kuhiñahu, neyi muneluki dehi wunsahu wejima, ilukenu yuma yejima yinadibombelimu. Chakutalilahu, indi neyi mwiluka nenu kukwikala antu abula kulemesha ­yishina yamuBayibolu hela kukwikala walwa chakwila antu akunwaña hohu chakadi wakuyikañesha? Komana munakutoñojoka nenu ichi chidika chikubalumuka nakwikala chidika chatama? (1 Pet. 4:3) Indi neyi mpinji yikwikalaku ochu chidika diyi mpinji yimwayaña nakupompa hela nakushimwina? Neyi mwiluka yuma ­yejima ­yikudibombelamu, chumichi chikuyikwasha kufuukula chachiwahi. Ilaña kudi chuma chikwawu chimwatela kwila. Muneluki dehi chidi yuma yejima; ilaña Yehova wukutiya ñahi hanochu chuma?​—Yish. 2:6.

ILUKENU CHATOÑOJOKAÑAYI YEHOVA HANOYU NSAÑU

6. Kwesekeja naYakoba 1:5, muloñadi chitwatela kulombela wukwashu kudi Yehova?

⁶ Mulombenu Yehova kulonda ayikwashi mwiluki yitoñojoka yindi. Yehova watushiika kutwinka maana anateli kutukwasha kwiluka neyi chuma chitunakufuukula kwila chikumutiyisha kuwaha. Wahanaña awa maana “kudi antu ejima namuchima wumu chakadi kuhoshola.”​—Tañenu Yakoba 1:5.

7. Munateli kwiluka ñahi yitoñojoka yaYehova hanoyu nsañu? Shimunenu chakutalilahu.

⁷ Neyi munalombi dehi nenu Yehova ayilomboli, shenuku muchima kulonda mwiluki chikuyakulayi. Chakutalilahu: Neyi munajimbelimu, munateli kulomba wukwashu kudi muntu washakamaña munodu iluña. Komana mukunyamuka nakuya henohu kanda ayakuli? Inehi. Mukutiyilila nakanañachima chinakuyilejayi chimwatela kwenda. Munjila yoyimu, neyi munalombi dehi maana kudi Yehova, shenuku muchima kulonda mwiluki chinakuyakulayi kuhitila mukusandujola nshimbi niyishina yamuBayibolu yinesekani nanochu chuma chimunakufuukulahu. Chakutalihu, neyi munakufuukulahu kuya kuchidika chitwashimuna hakusambila, munateli kutoñojoka chahosha Bayibolu hayidika yatama, kudikunda nawantu atama nichichalemena kutwamijaku yuma yaWanta kubadika yuma yimunakufwila.​—Mat. 6:33; Rom. 13:13; 1 Kor. 15:33.

8. Mukwila ñahi neyi munakukeña nsañu yinateli kuyikwasha kufuukula chachiwahi? (Talenu cheñi mwevulu.)

⁸ Hela chochu, mpinji jikwawu chakeñekaña wukwashu hakwila mwiluki nsañu yimunakukeña. Munateli kulomba wukwashu kudi manakwetu hela muhela wahitamu dehi. Ilaña, munateli nikudisandujolela enu aweni. Tukweti nsañu yayivulu muyozelu yetu yitwazatishaña hakudiza, chidi neyi Chitwa Chakukwasha aYinsahu jaYehova haKusandujola Nsañu nimukanda waNsona Jatukwashaña Kumukalakela Yehova. Anukenu chuma chimunakufwila kwila: hikufuukula chuma chikumuzañalesha Yehova.

9. Tunateli kwiluka ñahi netu yuma yitunafuukuli yikumuzañalesha Yehova? (AEfwesesa 5:17)

⁹ Tunateli kwiluka ñahi netu yuma yitunafuukuli yikumuzañalesha Yehova? Chatachi, twatela kumwiluka chiwahi chekalayi. Bayibolu yahosha nawu, “Kumwiluka Wajila Chikupu dikashinshi.” (Yish. 9:10) Eña, twamwilukaña chiwahi Yehova neyi twiluka yilwilu yikwetiyi, nkeñelu yindi niyuma yakeñayi hela yahelayi. Dihulenu nenu, ‘Kwesekeja nachinamwiluka Yehova, nateli kufuukula ñahi chuma chikumuzañalesha?’​—Tañenu AEfwesesa 5:17.

10. Muloñadi yishina yamuBayibolu chiyalemena nankashi kubadika tushidikilu twamuchisaka hela yisemwa?

¹⁰ Hakwila tumuzañaleshi Yehova, mpinji jikwawu twatela kwila yuma yikutiyisha kutama antu itwadikunda nawu. Chakutalilahu, anvwali amakwawu anateli kumona nawu chidi hohu chiwahi kukanjikija mwanawu wamumbanda kulonda asumbuki kudi iyala wukweti mali amavulu, hela wunateli kuhana nsewu yeneni, hela chakwila nakuzata chiwahi wanyi kuspiritu. Dimu tuhu, anakukeña mwanawu akamwakameneña kumujimba, hanu dinu hinyi wakamukwashaña kupama kuspiritu? Indi Yehova wukuchimona ñahi? Ñakwilu yekala haMatewu 6:33. Haniyi nsona, akaKristu ayikonkomwena “[kusambila] kukeña Wanta.” Hela chakwila twalemesha anvwali jetu niantu muchituñilu, chuma chitwasweja kulemesha nankashi hikumuzañalesha Yehova.

TOÑOJOKENU HACHUMA CHIMWATELA KUFUUKULA

11. Chilwilwinyi chashimunawu haAFwilipi 1:9, 10 chikuyikwasha kufuukula chachiwahi?

¹¹ Neyi munatoñojoki dehi hayishina yamuBayibolu yinabombeli hayuma yimwatela kufuukula, mwatela kutoñojoka hachuma chimwatela kufuukula. (Tañenu AFwilipi 1:9, 10.) Kashinshi kakuyikwasha kwiluka yuma yinateli kufuma muchuma chimukukeña kufuukula. Mpinji jikwawu munateli kunyakala kufuukula. Ilaña yuma yikwawu yekala yakala kufuukula swayi. Kashinshi kakuyikwasha kufuukula chachiwahi nihayuma yakala nankashi.

12-13. Kashinshi kanateli kuyikwasha ñahi kufuukula chiwahi hakutonda mudimu wakumujimba?

¹² Talenu ichi chakutalilahu. Munakukeña mudimu wukuyikwasha kwakamena chisaka chenu. Kunamwekani nyidimu yiyedi. Mushinshika hawunsahu wejima, chidi neyi mutapu wanowu mudimu, mpinji yakuwuzata, kuleha kweluña niyuma yikwawu. Iyi nyidimu yejima yiyedi yayiwahi kwesekeja nayishina yamuBayibolu. Hadaha mukutondahu wumu muloña wamutapu wanowu mudimu hela muloña wakwila wufwetu weneni. Hela chochu, kudi yuma yikwawu yimwatela kutoñojokahu henohu kanda mufuukulihu.

¹³ Chakutalilahu, komana mudimu wumukutonda wukuyikañeshaña kuya nakupompa? Wukuyikañeshaña kwakamena chisaka chenu kwikala namuzañalu nikuchakamena kuspiritu? Kudihula malwihu amuchidiwu kukuyikwasha kutwamijaku “yuma yalema nankashi,” kudifukula kwenu niyuma yakeña chisaka chenu, kubadika yuma yakumujimba. Nkumininaku dinu, mukufuukula chuma chikukiswilayi Yehova.

14. uzatisha kashinshi nikuyimwekeshela antu kukeña kunateli kutukwasha ñahi kubula kuyihukesha?

¹⁴ Kashinshi kanateli kutukwasha cheñi kutoñojoka hayuma yitunakukeña kufuukula chinateli kuyimonawu akwetu kulonda tubuli ‘kuyihukesha akwetu.’ (Fwili. 1:10) Chumichi chalema nankashi sweje-e neyi tunakufuukulahu hanvwalilu nimmwekenu yetu. chakutalilahu, hadaha twakeña mutapu wayakuvwala wumu hela mmwekenu. Indi neyi yikuhukesha antu amakwawu muchipompelu hela abula kwikala muchipompelu? Kashinshi kakutukwasha kulemesha chinakutiyawu. Kukeña kukutukwasha kwila yuma yikutiyisha ‘antu amakwawu kuwaha’ nikwikala adikehesha. (1 Kor. 10:23, 24, 32; 1 Tim. 2:9, 10) Dichi, tukufuukula yuma yikumwekesha nawu twayikeña antu nawa twayilemesha.

15. Yumanyi yimwatela kwila henohu kanda mufuukulihu chuma chalema?

¹⁵ Neyi munakufuukula hachuma chalema, toñojokenu hayuma yimwatela kuzatilahu hakwila mwilimu. Yesu watudizishili nindi twatela ‘kuchinda yuma yikuzatika.’ (Luka 14:28) Toñojokenu hampinji, mali niñovu yimukuzatisha hakwila chuma chimunafuukuli chizatiki. Mpinji jikwawu, munateli kwihula chisaka chenu kulonda mumoni neyi akwiteja mumunakufuukula. Kwila yuma muniyi njila kwalemenadi? Chinateli kuyikwasha kumona himwatela kuhimpa hachuma chimunakufuukula hela kufuukula hachuma chacheñi. Neyi mulejamu chisaka chenu nawa muyitiyilila, akufwilaña kuzatila hamu nanenu kulonda mumunafuukuli muzatiki chachiwahi.​—Yish. 15:22.

FUUKULENU YUMA YIKUZATIKA

16. Yumanyi yikuyikwasha kufuukula chachiwahi kulonda mumunafuukuli muzatiki? (Talenu cheñi chikasha chinakwila nawu “Chakufuukula Chiwahi.”)

¹⁶ Neyi munalondeli yuma yinashimunihu dehi, munadiloñeshi kufuukula chachiwahi. Muneluki wunsahu wejima nawa munasandujoli yishina yikuyikwasha kufuukula munjila yikumuzañalesha Yehova. Ichi munateli kulomba kudi Yehova kulonda ayikwashi kufuukula munjila yayiwahi.

17. Chumanyi chacheni chinateli kuyikwasha kufuukula chiwahi?

¹⁷ Hela chakwila mwafuukulahu dehi chiwahi kunyima, anukenu nenu hakwila mufuukuli chiwahi mwatela kushindamena, bayi hamaana enu hela hayuma yimwahitamuku, ilaña hamaana aYehova. Yena hohu diyi wunateli kuyikwasha kwiluka yuma, maana nikwikala nakashinshi, yuma yinateli kuyikwasha kwikala namaana. (Yish. 2:1-5) Yehova nateli kuyikwasha kufuukula yuma yinateli kumuzañalesha.​—Mas. 23:2, 3.