CHIBAABA CHAKUDIZA 29
KAMINA 87 Twayenu Munooki
Chitwatela Kufumba muNjila Yayiwahi
“Nakakuleja maana iku disu dami didi hadi eyi.”—MAS. 32:8.
TUKUDIZA
Yuma yitwatela kwila hakwila tufumbi amakwawu munjila yayiwahi.
1. Anyi atela kufumbana? Lumbululenu.
MUNATELI ñahi kufumba amakwawu? Amu chayipelelaña kwila mwenimu. Amakwawu ashintajalaña kufumbana hela kukwashana, nawa akasunukaña wanyi neyi anakwila mwenimu. Hela chochu, wejima wetu tukweti mudimu wakukwasha akwetu mumpinji-mumpinji. Muloñadi? Muloña Yesu wahosheli nindi akakumulondela alala ayilukilaña kukukeña kwadimwekeshelañawu wumu namukwawu. (Yow. 13:35) Nawa njila yimu mutwamwekeshelaña kukeña hikuyifumba amanakwetu niahela neyi chinakukeñeka. Izu daNzambi dahosha nawu “wubwambu watowala” wafumaña hela wakolaña muloña, “[wakufumba] kwalala.”—Yish. 27:9.
2. Akulumpi atela kwila chumanyi, nawa muloñadi? (Talenu cheñi chikasha chinakwila nawu “Kufumbana haKupompa kwaMukachi kaMulungu.”)
2 Sweje-e akulumpi muchipompelu, atela kwiluka chakufumba munjila yayiwahi. Kuhitila mudi Yesu, Yehova wayinka awa amayala mudimu wakubiña chipompelu. (1 Pet. 5:2, 3) Njila yimu mwelilañawu mwenimu, hikuhana kufumba kwashindamena haBayibolu mumpanji jahanañawu muchipompelu. Afumbaña cheñi mukoku wunakukeñeka wukwashu, ninana anafumi hamukanka wanyikoku. Akulumpi, kushilahu ninetu ejima, tunateli kufumbana ñahi chachiwahi?
3. (a) Tunateli kwikala ñahi mukakufumba wamuwahi? (Isaya 9:6; talenu cheñi chikasha chinakwila nawu “Mwimbujolenuña Yesu haMpinji Yimunakufumbana.”) (b) Yumanyi yitukuhanjekahu muchinu chibaaba?
3 Tunateli kwiluka yuma yayivulu kutalisha hakwikala mukakufumba wamuwahi neyi tudizaña hadi antu ashimunawu muBayibolu afumbañeneña munjila yayiwahi, sweje-e Yesu. Nkumbu yimu hankumbu jamwinkawu yidi yakwila nawu “Mukakufumba Wamuwahi.” (Tañenu Isaya 9:6.) Muchinu chibaaba, tukuhanjeka hayuma yitwatela kwila neyi muntu natulombi nindi tumukwashi chatela kwilayi nichitwatela kwila neyi tunakukeña kufumba muntu hela chakwila natuleji wanyi. Tukuhanjeka cheñi chichalemena kufumbana hampinji yatelela nimunjila yatelela.
NEYI MUNTU NATULOMBI NINDI TUMUKWASHI CHATELA KWILAYI
4-5. Neyi muntu natulombi nindi tumukwashi chatela kwilayi, lwihwinyi lutwatela kudihula? Shimunenu chakutalilahu.
4 Neyi muntu natulombi nindi tumukwashi chatela kwilayi, chumanyi chitukukeña kusambila kwila? Hadaha tukwikala mukweseka kwakukeña kumukwasha hohenohu. Ilaña twatela ntahi kudihula etu aweni netu, ‘Komana yami natela kumukwasha naniku kukala kukwetiyi?’ Mpinji jikwawu, tukwila chiwahi neyi tubula kumukwasha iwu muntu ilaña tumuleja netu ayi nakudimona namuntu wunateli kumukwasha chiwahi nakukala kukwetiyi.
5 Toñojokenu hanichi chakutalilahu. Twili netu ibwambu denu chikupu nakati chikatu cheneni. Nayileji nindi, nasandujoli dehi hayitumbu yinateli kumuuka nawa kuhiñahu nayilombi nindi mumulejiku hakachi kaniyi yitumbu yimunakutoñojoka nenu yikumukwasha. Hela chakwila munakutoñojoka nenu hakachi kaniyi yitumbu hadi yimunamoni nenu yinateli kumukwasha, mwatela kwanuka nenu mudi ndotolu wanyi nawa hiyayidizisha chakuuka antuku. Mukukala kwamuchidiwu, chuma chachiwahi chimwatela kwila hakwila mumukwashi ibwambu denu hikumuleja nenu ayi nakuwana muntu wadiza haniyi nsañu wunateli kumukwasha chiwahi.
6. Chumanyi chachiwahi chitwatela kwila henohu kanda tukwashi muntu?
6 Hela chakwila tunakutoñojoka netu tunashikilimu kukwasha muntu nakukala kukwetiyi, tunateli kuhembelela kulonda hahituku kapinji henohu kanda tumwakuli muntu wunalombi nindi tumukwashi. Muloñadi? Yishimu 15:28 yahosha nawu “waloña wasambilaña kutoñojoka mumuchima windi henohu kanda aakuli.” Indi neyi tunakutoñojoka netu tuneluki ñakwilu? Hohamu twatela kwikala nampinji yakusandujola, kulombelahu, nikutoñojokahu chikupu. Chitwela mwenimu, tukukuhwelela chikupu netu ñakwilu yetu yinesakani nachinakutiyayi Yehova hanoyu nsañu. Talenu chuma cheliliyi kaprofwetu Natani.
7. Yumanyi yimunadizili kuchuma cheliliyi kaprofwetu Natani?
7 Hampinji yahosheleñayi nakaprofwetu Natani, Mwanta Davidi wahosheli nindi wakeñeleña kumutuñila Yehova tembeli. Hohenohu Natani wamulejeli Davidi nindi eli chuma chakeñeleñayi. Ilaña Natani wateleleli kusambila kumwihula Yehova. Muloñadi? Muloña Yehova hakeñeli nindi Davidi yatuñi tembeliku. (1 Kushi. 17:1-4) Neyi chinamwekeshiwu munichi chakutalilahu, neyi kudi muntu wunatulombi nindi tumukwashi chatela kwilayi, tukwila chiwahi neyi ‘tulaba kuhosha.’—Yak. 1:19.
8. Chumanyi chikwawu chikutuletesha twiikali asoñama neyi tunakukwasha muntu wunalombi wukwashu?
8 Talenu chuma chikwawu chikuletesha twiikali asoñama neyi tunakukwasha muntu wunalombi wukwashu kudi etu: Ninetu akututena kutama neyi chakwila wukwashu wutunamuleji wumuletesha kufuukula mwaluwa nawa mufuma yuma yatama. Mwamweni, chalema kutoñojokahu chikupu henohu kanda tukwashi muntu wunalombi nindi tumukwashi.
KUFUMBA MUNTU HELA CHAKWILA NATULEJI WANYI
9. Henohu kanda afumbi muntu, akulumpi atela kwiluka chumanyi? (AÑalija 6:1)
9 Mpinji jikwawu, akulumpi atela kutachikilañahu kufumba manakwetu hela muhela wunafuukulihu “kukoña chuma chatama.” (Tañenu AÑalija 6:1.) Hadaha kudi wunakukeña kwila yuma yatama yikumuletesha akoñi nshidi yahamesu bwi-i. Chuma chafwilañawu akulumpi hikumukwasha muntu kutwalekahu kwenda munjila yatwalaña kuwumi wahaya nyaaka. (Yak. 5:19, 20) Hela chochu, hakwila kufumba kwawu kumukwashi muntu wamuchidiwu, atela ntahi kumona nawu mwamweni nakoñi chuma chatama. Yehova watwiteja wejima wetu kufuukula kwesekeja nachinleji chetu chamuchima. (Rom. 14:1-4) Hanu dinu, neyi mwamweni akulumpi anamoni nawu manakwetu nakoñi chuma chatama nawa anafuukulihu nawu akumufumba, yumanyi yatela kwilawu?
10-12. Yumanyi yatela kwilawu akulumpi neyi anakukeña kufumba muntu wunabuli kuyileja? Shimunenu chakutalilahu. (Talenu cheñi nyevulu.)
10 Chayipelelaña wanyi akulumpi kufumba muntu wunabuli kuyileja. Muloñadi? Kapostolu Pawulu wahosheli nindi muntu nateli kukoña chuma chatama chakadi yomwenindi kwiluka. Dichi akulumpi atela ntahi kwila yuma yikwovwahisha muchima waniwu muntu hakwila nawu yatambwili kufumba.
11 Kufumba muntu wunabuli kuyileja kudi hohu neyi kutumba mbutu heseki dakola. Henohu ndimi kanda yatachiki kutumba, wasambilaña kudima. Chumichi chovwahishaña iseki nawa chekalaña chaswayi kutumbahu mbutu. Kuhiñahu watumbaña mbutu. Nkumininaku, watukumwinaña mbutu kulonda yikuli chiwahi. Munjila yoyimu, henohu mukulumpi kanda yafumbi muntu wunabuli kumuleja, kudi yuma yatela kwilayi yikwovwahisha muchima waniwu muntu, hakwila yatambwili kufumba. Chakutalilahu, neyi mpinji yatelela kuhanjeka nindi yinashiki dehi, iwu mukulumpi wukumuleja manakwetu nindi wamwakamenaña nawa kudi nsañu yinakukeña kuhanjekayi nindi. Neyi mukakufumba amwiluka nawu wamwekeshaña kukeña niluwi, chekalaña chaswayi antu kwiteja kufumba kwindi.
12 Hampinji yinakuhanjekawu, mukulumpi nateli kutwalekahu kwovwahisha muchima waniwu muntu kuhitila mukumuleja nindi wejima wetu twaluwañeshaña nawa twakeñekaña kutufumba mpinji jikwawu. (Rom. 3:23) Nezu dawunda nawa nakalemesha chikupu, mukulumpi wukumulumbulwila chiwahi kuzatisha nsona kulonda amukwashi kwiluka chuma chatama chinakoñiyi. Neyi iwu manakwetu neluki dehi nindi nakoñi chiluwa, mukulumpi wukumulumbulwila munjila yapela yuma yatela kwilayi kulonda ahimpi yilwilu yindi, dikwila nawu ‘natumbi mbutu.’ Nkumininaku, iwu mukulumpi wukumuhameka chakufuma hamuchima nikulombela hamu nindi, dikwila nawu ‘natukumwini’ mbutu.—Yak. 5:15.
Kufumba muntu wunabuli kuyileja, chakeñekaña kumwekesha kukeña nikwiluka chakufumba chiwahi (Talenu maparagilafu 10-12)
13. Yumanyi yatela kwilawu akulumpi hakwila eluki neyi chakwila owu muntu natiyishishi chinaleteshi amufumbi?
13 Mpinji jikwawu, muntu anakufumbawu hanateli kutiyishisha yuma yinakuhosha muntu wunakumufumbaku. Chumanyi chinateli kwilawu akulumpi hakwila chumichi chibuli kumwekana? Anateli kumukwasha kutiyishisha yikuma yinakuhoshawu neyi amwihula malwihu nakalemesha nawa mukubabala. (Mukwa. 12:11) Ñakwilu jikuhanayi jikumukwasha mukakufumba kulonda eluki neyi owu muntu natiyishishi chinaleteshi amufumbi.
KUFUMBA HAMPINJI YATELELA NAWA MUNJILA YAYIWAHI
14. Komana twatela kufumbana neyi tunahili? Lumbululenu.
14 Wejima wetu twawanina wanyi, tunateli kwila hela kuhosha yuma yikuneñesha amakwawu. (Kol. 3:13) Izu daNzambi datulejaña nawu mpinji jikwawu tunateli kwila yuma yinateli kuhilisha akwetu. (Efwe. 4:26) Ilaña twatela kutondolwela kufumba muntu neyi tunazuwi. Muloñadi? Muloña “kuzuwa kwamuntu, hikwaletaña kuloña kwaNzambiku.” (Yak. 1:20) Neyi tufumba muntu hampinji yitunazuwi, tukuletesha yuma kutaminaku. Ichi chinatalishi wanyi mukwila nawu hitunateli kumuleja muntu wunatuhilishi yitoñojoka yetu nichitunakutiyaku. Hela chochu, tunateli kuhanjeka chiwahi neyi tuhembelela sampu tunawundishi muchima. Talenu chuma chachiwahi chitunateli kwimbujola cheliliyi Elihu, muntu washinshika, wamufumbili Yoba.
15. Yumanyi yitunakudizila kuchuma cheliliyi Elihu? (Talenu cheñi mwevulu.)
15 Elihu washakamini hadi mafuku amavulu nakumutiyilila Yoba chadihakwilileñaku yomweni hanyiloña yamutwikileñawu kudi ankundeji akutwamba. Elihu wamutiyilili Yoba wushona. Ilaña niyena wahilili nankashi muloña Yoba wahosheli yuma yaheña hadi Yehova nawa washili hohu maana hakudihakwilaku yomwenindi. Hela chochu, Elihu wahembeleleli mpinji yindi yakuhosha nawa wahosheli mukuwunda ninakalemesha chikupu hampinji yamufumbileñayi Yoba. (Yoba 32:2; 33:1-7) Chuma cheliliyi Elihu chinakutudizisha chuma chalema: Tukwila chiwahi neyi tukufumba muntu hampinji yatelela nawa munjila yayiwahi, nakalemesha nikukeña.—Mukwa. 3:1, 7.
Hela chakwila hakusambila wahilili nankashi, Elihu wafumbañeni namuchima wawovu nawa nakalemesha chikupu (Talenu paragilafu 15)
TWALEKENUHU KUFUMBA NIKUTAMBWILA KUFUMBA
16. Yumanyi yimunakudizila kumukanda waIsamu 32:8?
16 Nsona hanashindameni achinu chibaaba yinakuhosha nawu ‘Yehova watulejaña maana iku disu dindi didi hadi etu.’ (Tañenu Isamu 32:8.) Chumichi chinakumwekesha nawu watwalekañahu kutukwasha. Hatulejaña hohu maanaku, ilaña watukwashaña nichakuyizatisha. Twatela kumwimbujola chikupu! Neyi tukweti kukooleka kwakufumba akwetu, tumwimbujoleña Yehova kuhitila mukusha mesu etu hadi wena nikuzata kwesekeja nahanakumini ñovu jetu kulonda tuyikwashi afuukuleña chachiwahi.
17. Neyi akulumpi ahana kufumba kwatelela nawa kwashindamena haBayibolu, amwekeshaña nawu akela ñahi? Lumbululenu. (Isaya 32:1, 2)
17 Ayinu diyi mpinji yitunakukeñeka chikupu kufumba akwetu munjila yayiwahi nikutambwila kufumba. (2 Tim. 3:1) Akulumpi ahanaña kufumba kwatelela nawa kwashindamena haBayibolu, adi “neyi tuloña twamenji mwituña dakadi menji.” (Tañenu Isaya 32:1, 2.) Twayisakililaña nankashi amabwambu abulaña kushintajala kutukwasha neyi amona nawu tunakukeñeka wukwashu. Awa amabwambu adi neyi “maapo akutuña nawuru adi muyeña yakubaza nasiliva.” (Yish. 25:11) Dichi wejima wetu tutwalekihu kwikala namaana akufumba akwetu munjila yayiwahi nikutambwila kufumba.
KAMINA 109 Keñenu Akwenu Chakufuma haMuchima