CHIBAABA CHAKUDIZA 28
KAMINA 88 Nleji Njila Jeyi
Muloñadi Chitwalombelaña Wukwashu?
“Maana ambala anana akeñaña wukwashu.”—YISH. 13:10.
TUKUDIZA
Yuma yitwatela kwila hakwila wukwashu wutwatambwilaña wutukwashi.
1. Hakwila tufuukuli chachiwahi nawa mutunafuukuli muzatiki chiwahi, twatela kwiladi? (Yishimu 13:10; 15:22)
WEJIMA wetu twakeñaña kufuukula chachiwahi. Nawa wejima wetu twakeñaña yuma yitunafuukuli yizatikeña chiwahi. Izu daNzambi datulejaña nawu hakwila tufuukuli chiwahi nawa mutunafuukuli muzatiki chiwahi, twatela kulomba wukwashu.—Tañenu Yishimu 13:10; 15:22.
2. Yehova watushiika kutwililadi?
2 Hela chochu, wunateli kutwinka maana niwukwashu wabadika hiTata yetu Yehova. Watushiika nindi wukutukwashaña, watuleja nindi: “Nakakuleja maana iku disu dami didi hadi eyi.” (Mas. 32:8) Awa mazu anakumwekesha nawu Yehova hatwinkaña hohu wukwashuku, ilaña watwakamenaña nikutukwasha kulonda tuzatisheña kufumba kwindi.a
3. Yumanyi yitukuhanjekahu muchinu chibaaba?
3 Muchinu chibaaba, tukuzatisha Izu daNzambi kulonda ditukwashi kwakula malwihu awana: (1) Yilwilwinyi yinatela kwikala nayu hakwila wukwashu wunatambwilaña wunkwashi? (2) Hinyi wunateli kunleja nsañu yikunkwasha? (3) Nateli kumwekesha ñahi nami mwamweni inakukeña wukwashu? (4) Muloñadi chinukubulila kuleja antu amakwawu nami afuukwili?
YILWILWINYI YINATELA KWIKALA NAYU?
4. Neyi tunakukeña netu kufumba kutunatambwili kutukwashi, yilwilwinyi yitwatela kwikala nayu?
4 Twatela kwikala adizoza nawa adikehesha hakwila wukwashu wutwatambwilaña wutukwashi. Twatela kwiluka netu chidi hohu chiwahi kulomba wukwashu kudi akwetu hakwila tufuukuli chiwahi neyi tudi mukukala kutwabulahu dehi kumona. Cheñi twatela kwiluka netu hitweluka yuma yejimaku. Neyi tubula kwikala adizoza nawa adikehesha, Yehova wukutukwasha wanyi. Chikufumamu, kufumba kwejima kutwawanaña neyi tunakutaña Izu dindi, kukututemukaña neyi chatemukaña menji helola. (Mika 6:8; 1 Pet. 5:5) Ilaña, neyi tukwikalaña adikehesha nawa adizoza, tukunyakalaña kwovwahila kufumba kwamuBayibolu kutunatiyi nawa tukukuzatishaña.
5. Yumanyi yayiwahi yeliliyi Mwanta Davidi yadi kumuletesha kwikala namuchima wakudivwimba?
5 Talenu yuma yitunateli kudizila kuyuma yayiwahi yeliliyi Mwanta Davidi. Iyi yuma yadi kumuletesha kwikala namuchima wakudivwimba. Kunyima henohu kanda yekali Mwanta, antu amwilukili nawu himukakwimba wakulukila. Mpinji yimu amulejeli nawu ayi nakumwimbila Mwanta. (1 Sam. 16:18, 19) Chelili anamuwayishi dehi Davidi kwikala Mwanta wamuchiyedi, Yehova wamwinkeli spiritu Yindi yajila yamwinkeleña ñovu. (1 Sam. 16:11-13) Wayili mpuhu hakachi kawaIsarela muloña wajahili ayilumbu jawu, kushilahu niGoliyati kaFilisitinu, iyala wataluka. (1 Sam. 17:37, 50; 18:7) Neyi Davidi wadiña wadivwimba, wadi kutoñojoka nindi chineli welileña yuma yejimiyi, hadi kulomba wukwashu kudi muntu wacheñiku. Ilaña dicheliliyi wanyi.
6. Tuneluki ñahi netu Davidi watambwilileña kufumba? (Talenu cheñi mwevulu.)
6 Chelili anamuswanyiki dehi, Davidi watwalekelihu kudikunda nawantu amulejeleña maana. (1 Kushi. 27:32-34) Ichi chuma chatela kutuhayamisha wanyi, muloña antu amwilukili Davidi nawu watiyilileña mwamulejeleñawu akwawu. Watiyilileña mwamulejeleñawu kudi antu awamayala nawa watiyilili nikudi mumbanda wejina daAbigayili. Iwu mumbanda wadiña ñoda Nabali, iyala wabula kavumbi, wabulileña kusakilila nawa wadivwimba. Davidi wadizozeli nakwovwahila mwamufumbiliwu kudi iwu mumbanda, nawa chafuminimu, hakoñeli chiluwa cheneniku.—1 Sam. 25:2, 3, 21-25, 32-34.
Mwanta Davidi wadizozeli nakwiteja nikuzatisha kufumba kwaAbigayili (Talenu paragilafu 6)
7. Yumanyi yitunakudizila kuyuma yayiwahi yeliliyi Davidi? (Mukwakutañisha 4:13) (Talenu cheñi nyevulu.)
7 Tunateli kudizilaku yuma yayivulu kudi Davidi. Chakutalihu, hadaha kudi mudimu wutweluka chiwahi indi kwiji tukweti wuswa kubadika akwetu. Hela chochu, bayi tutoñojoka netu tweluka yuma yayivulu nawa kwosi watela kutufumbaku. Kufwana Davidi, twatela kwikala namuchima wakwiteja munatufumbiwu hichikweti muloña namuntu wunatufumbiku. (Tañenu Mukwakutañisha 4:13.) Neyi twila mwenimu, chakadi nikujina hitukukoñaña yiluwa yamaneni yikutuneñesha etu aweni niakwetuku.
Twatela kwikala namuchima wakutiyilila kukufumba hichikweti muloña namuntu wunatufumbiku (Talenu paragilafu 7)d
HINYI WUNATELI KUNLEJA NSAÑU YIKUNKWASHA?
8. Muloñadi Yonatani chashikililimu kumufumba Davidi?
8 Talenu chuma chikwawu chitunateli kudizila kuyuma yayiwahi yeliliyi Davidi. Watiyilileña kukufumba kwamufumbileñawu kudi antu adiña nawubwambu wawuwahi naYehova nawa elukili chachiwahi kukala kwamweneñayi. Chakutalilahu, hakeñeleñayi kwiluka neyi chakwila nateli kutachika cheñi kutiyañana naMwanta Sawulu, Davidi watiyili mwamulejeliwu kudi Yonatani, mwana kaSawulu. Muloñadi Yonatani chamufumbiliyi muniyi njila? Muloña Yonatani wadiña nawubwambu wawuwahi naYehova nawa wamwilukili Sawulu chachiwahi. (1 Sam. 20:9-13) Yumanyi yitunakudizilaku?
9. Hinyi itwatela kulomba wukwashu neyi tunakukeña wukwashu? Lumbululenu. (Yishimu 13:20)
9 Neyi tunakukeña wukwashu, twatela kuhanjeka namuntu wukweti wubwambu wawuwahi naYehova nawa wamonahu dehi kukala kutukweti.b (Tañenu Yishimu 13:20.) Chakutalilahu, twili netu kudi manakwetu wakansi wunakukeña kwiluka chatela kuwanayi muntu watelela kwiñila nindi muwulu. Hinyi wunateli kumukwasha chachiwahi? Ibwambu dindi wabula kusumbula nateli kumukwasha neyi yazatisha yishina yamuBayibolu hakumukwasha. Ilaña iwu manakwetu nateli kutambwila wukwashu wawuwahi nankashi neyi alomba wukwashu kudi eyala namumbanda apama kuspiritu amwiluka chiwahi nawa anashimbuli muwulu.
10. Ichi dinu tukuhanjeka hayumanyi?
10 Tunadizi yilwilu yiyedi yitwatela kwikala nayu kushilahu ninowu anateli kutukwasha chiwahi. Ichi tuhanjekenu chitunateli kumwekesha netu tunakukeña wukwashu nawa neyi chidi hohu chiwahi kulejaku antu amakwawu netu atufuukwiliku hela nehi.
NATELI KUMWEKESHA ÑAHI NAMI MWAMWENI INAKUKEÑA WUKWASHU?
11-12. (a) Mpinji jikwawu, chumanyi chitunateli kwila? (b) Chumanyi cheliliyi Mwanta Rehobowami hampinji yakeñeleñayi kwila chuma chalema?
11 Mpinji jikwawu, muntu nateli kumwekana neyi nakukeña nindi amukwashi, komana nehi, nakukeña hohu yamoni neyi akwawu akwiteja munafuukuliyi hela nehi. Muntu wamuchidiwu hanakukeña wukwashu kudi akwawuku. Watela kudizila kuchuma chamumwekeneni Mwanta Rehobowami.
12 Rehobowami wamusinsili Mwanta Solomoni nawa wekalili Mwanta waIsarela. Rehobowami watachikili kuyuula muza wadiluñishileña yuma yayivulu yayiwahi, ilaña antu atoñojokeleña nawu Solomoni wayizatishileña nyidimu yakola chikupu. Dichi antu ayili kudi Rehobowami nawa alembeli kudi yena nawu ayipelesheliku nyidimu yazatileñawu. Rehobowami wayilejeli nindi amwinkiku mpinji kulonda atoñojoki mwatela kwililayi. Watachikili chachiwahi, walombeli maana kudi akulumpi amukwashileñaku Solomoni. (1 Anya. 12:2-7) Hela chochu, wadiwili maana amulejeliwu kudi awa akulumpi. Muloñadi cheliliyi mwenimu? Hadaha Rehobowami wadiña wafuukula dehi chuma chikwilayi nawa watoñojokeli nindi akulumpi akwiteja munafuukuliyi. Dichi chehwiliyi akwawu anyikwenzi kutalisha hachuma chafuukwiliyi nawa eteji mwakeñeleñayi kwila, watiyili kuwaha mwahosheli amabwambu jindi. (1 Anya. 12:8-14) Rehobowami wayakwili antu kwesekeja nachamulejeliwu kudi amabwambu jindi. Chafuminimu, iwu muza wadambwili nawa kufuma hayoyina mpinji, Rehobowami watwalekelihu kumona kukala.—1 Anya. 12:16-19.
13. Tunateli kwiluka ñahi neyi mwamweni tunakukeña akwetu atukwashi?
13 Yumanyi yitunateli kudizila kuchuma cheliliyi Rehobowami? Neyi tunakulomba wukwashu kudi akwetu, twatela kumwekesha netu mwamweni tunakukeña wukwashu. Tunateli kwiluka ñahi chumichi? Tunateli kudihula netu, ‘Komana nalombaña wukwashu nawa hohenohu nishikena kukaana munanlejiwu muloña yuma yinanlejiwu nayikeñi wanyi?’ Talenu ichi chakutalilahu.
14. Neyi tunakulomba wukwashu kudi akwetu, chumanyi chitwatela kwanuka? Shimunenu chakutalilahu. (Talenu cheñi mwevulu.)
14 Twili netu manakwetu anamwiteji kwiñila mudimu wakutambula wufwetu weneni. Henohu kanda yeteji, nehuli mukulumpi muchipompelu kulonda yamukwashiku chuma chatela kwilayi. Manakwetu nahoshi nindi neyi yeñila iwu mudimu wakashiyaña chisaka chindi nakuya nakuzatila kwakulehi hadi mpinji yayilehi. Iwu mukulumpi namwanukishi iwu manakwetu chishina chamuBayibolu chahosha nawu mudimu walema nankashi wukwetiyi hikukwasha chisaka chindi kuspiritu. (Efwe. 6:4; 1 Tim. 5:8) Fwikijenu iwu manakwetu hohenohu yatachika kumonamu yiluwa mumazu anamulejiwu kudi mukulumpi nawa aya nakulomba wukwashu kudi amanakwetu amakwawu kutalisha haniyi nsañu, sampu nawani muntu wunamuleji nindi chidi hohu chiwahi kwiteja owu mudimu. Komana mwamweni iwu manakwetu nakukeña wukwashu tahindi wafuukula dehi chuma chatela kwilayi nawa nakukeña hohu kuwana muntu wukwiteja munafuukuliyi? Twatela kwanuka netu muchima wetu wadimbanaña. (Yere. 17:9) Mpinji jikwawu, wukwashu wutunadiwuli diwunateli kutukwasha nankashi hakwila tufuukuli chiwahi.
Komana mwamweni tunakukeña wukwashu tahindi tunakukeña hohu kuwana muntu wukwiteja mutunafuukuli? (Talenu paragilafu 14)
MULOÑADI CHINUKUBULILA KULEJA ANTU AMAKWAWU NAMI ANFUUKWILI?
15. Chumanyi chitwatela kubula kwila, nawa muloñadi?
15 Muntu-himuntu wukweti wuswa wakudifuukwila yomweni yuma yinakeñiyi. (Ñal. 6:4, 5) Neyi chitunahanjekihu dehi, muntu wukweti maana wasandujolaña Mwizu daNzambi nikulomba wukwashu kudi akaKristu apama henohu kanda afuukulihu kwila chuma chinakukeñayi. Hela chochu, twatela kwikala asoñama kulonda tubuli kuleja amakwawu netu atufuukwili. Amakwawu anateli kwihula muntu alemeshawu chakadi kuhita mumbadi nawu, “Mwadi kwila ñahi neyi yenu mwadiña muniku kukala kunikweti?” Amakwawu niwena anateli kufuukula kwesekeja namunafuukuliwu akwawu chakadi kwikala nampinji yakutoñojokahu awenawu hanoyu nsañu.
16. Kukalanyi kwamwekeni muKorinda kutalisha hambiji yalambwileñawu kudi ankishi, nawa hinyi wateleleli kufuukula neyi chakwila atela kuda iyi mbiji hela nehi? (1 AKorinda 8:7; 10:25, 26)
16 Talenu kukala kwamwekeni muchipompelu chawakaKristu akusambila muKorinda kutalisha hakuda mbiji yalambwileñawu kudi ankishi. Pawulu wayisonekeleli ana akaKristu nindi: “Tweluka netu nkishi wamukunkulwayi mukaayi, nawa kwekala Nzambi wumu hohu.” (1 Kor. 8:4) Chumichi chakojejeli antu amakwawu muchipompelu kufuukulahu kuda mbiji yasambilileñawu kulambula kudi ankishi nawa nkumininaku hiyakuyilandisha hachisankanu chambiji. (1 Kor. 10:25, 26) Amakwawu afuukwilihu kubula kuda iyi mbiji muloña chinleji chawu chamuchima chadi kutachika kuyikabisha. (1 AKorinda 8:7, 9-11; 10:25, 26.) Muntu-himuntu wateleli kudifuukwilahu yomweni. Pawulu hayilejeli aKorinda nindi afuukwileña akwawu hela kwimbujola yuma yelileña akwawuku. Wejima wawu ateleleli ‘kudilumbulwila kudi Nzambi mwelileñawu hamuntu-hamuntu.’ —Rom. 14:10-12.
17. Chumanyi chikumwekana neyi tukumina hohu dakusoneka munasonekiwu antu amakwawu? Shimunenu chakutalilahu. (Talenu cheñi nyevulu.)
17 Chuma chamuchidiwu chinateli kumwekana ñahi makonu? Toñojokenu hansañu yakundama kutuyuma twanyanya twamumashi. MukaKristu yomweni watela kudifuukwila neyi chakwila wukwiteja kuzatisha itu tuyuma twanyanya twamumashi hela nehi.c Chinateli kutukalila kutiyishisha iyi nsañu, ilaña twatela kwanuka netu kufuukula hayuma yamuchidiwu kudi hakachi kayisenda yatela kudisendelayi muntu yomwenindi. (Rom. 14:4) Neyi tusoneka munafuukuliyi mukwetu, tunateli kuzeyesha chinleji chetu chamuchima. Tunateli kudizisha nikukwasha chinleji chetu kuzata chiwahi neyi tukuchizatishaña. (Heb. 5:14) Hanu dinu, mpinjinyi yitwatela kwihula mukaKristu wapama netu atukwashiku? Neyi tunasandujoli dehi haniyi nsañu, ilaña tuchidi kukeña netu atukwashiku kutiyisha yishina yamuBayibolu yinakuhosha hakukala kutukweti.
Twatela hohu kulomba wukwashu hanyima yakwila etu aweni tunasandujolihu dehi hanoyu nsañu (Talenu paragilafu 17)
TWALEKENUHU KULOMBA WUKWASHU
18. Yumanyi yatwililayi Yehova?
18 Yehova wamwekesha nindi watukuhwelela chikupu nanochu chatwinkayi wuswa wakudifuukwila. Watwinka Izu dindi, Bayibolu. Nawa watwinka amabwambu amawahi, anateli kutukwasha kutiyisha yishina yamuBayibolu. Iyi yuma yelayi, yamwekeshaña nawu Yehova watwakamenaña chiwahi chineli diyi Tata yetu wukweti kukeña. (Yish. 3:21-23) Yumanyi yitwatela kwila hakwila tumwekeshi netu tukweti muchima wakusakilila?
19. Tunateli kutwalekahu ñahi kumuzañalesha Yehova?
19 Toñojokenu hachumichi: Anvwali azañalalaña nankashi neyi amona anyanawu anakukula nakwikala ambuña aYehova akweti maana, atoñojokelañaku nawa akwashaña akwawu. Munjila yoyimu, Yehova wazañalalaña neyi yamona tunatwalekihu kupama kuspiritu, kulomba wukwashu nikwila yuma yaletaña kalemesha kudi yena.
KAMINA 127 Nateli Kwikala Muntu Wamuchidinyi?
a MuNsona, izu dakwila nawu “wukwashu” nidakwila nawu “kufumba” anateli kutalisha kuchuma chochimu. Muchinu chibaaba nichinalondelihu, awa mazu ejima ayedi anayizatishi.
b Mpinji yikwawu, akaKristu anateli kwihula mukubabala antu abulaña kudifukula kudi Yehova kulonda ayikwashi hansañu jamali, chakuyuuka, hela yuma yikwawu.
c Neyi munakukeña kwilukilahu yuma yayivulu haniwu mutu, talenu mukanda waMunateli Kwikala naMuzañalu Haya Nyaaka!, kudiza 39 chikuma 5 muchibalu chinakwila nawu “Ilukilenuhu Nsañu Yikwawu.”
d KULUMBULULA MWEVULU: Mukulumpi nakufumba mukwawu mukulumpi kutalisha hanhoshelu yindi yahosheliyi hampinji yabulakeniwu akulumpi.