Komana Yuma yamuBayibolu Yimwatachikililihu Kudiza Yinateli Kuyikwasha niChayinu Mpinji?

1. Yuma yatañishaña Bayibolu yimwadizili yayikwashili ñahi hampinji yimwadizili chalala katachi?

YUMA yalema yitwadizili hitwatachikili kudiza Bayibolu yahimpili chihandilu chetu. Chakutalilahu, chitwelukili netu ijina daNzambi diyi Yehova, chuma chatachi chitwafuukwilihu kwila hikwikala ibwambu dindi. (Isa. 42:8) Chitwelukili chalala hadi antu afwa, twalekeli kutoñojoka netu antaña niamabwambu jetu itwakeña afwa dehi akabakanaña. (Mukwa. 9:10) Nawa chitwelukili chikaninu chakanayi Nzambi chaParadisa yakekala hamaseki, twalekeli kwakama hayuma yakatumwekena kumbidi. Twakuhweleleli chikupu netu twakashakamaña wanyi hadi kapinji kantesha hohu, chidi neyi yaaka 70 hela 80, ilaña haya nyaaka.—Mas. 37:29; 90:10.

2. Nsona ya 2 Petulu 1:12, 13 yinamwekeshi ñahi nawu yuma yamuNsona yitwatachikilañahu kudiza yinateli kukwasha niakaKristu apama?

² Bayi tudiwula kulema kwayuma yitwatachikililihu kudiza muBayiboluku. Mumukanda windi wamuchiyedi, kapostolu Petulu wasonekeleli akaKristu adiña “[ashimata] dehi chikupu muchalala.” (Tañenu 2 Petulu 1:12, 13.) Hela chochu, hayina mpinji muchipompelu mwadiña antañishi akutwamba niantu abulileña kumwakama Nzambi akeñeleña kufumisha amanakwetu muchalala. (2 Pet. 2:1-3) Petulu wakeñeleña kuyikolesha amanakwetu niahela kulonda yayikwashi abuli kuyiluwañesha naniyi ntañishilu yakutwamba. Hakwila yeli mwenimu, wayanukishili hayuma yimu yadiziliwu dehi kunyima. Iyi yuma yadiziliwu yadi kuyikwasha kutwalekahu kuhemba kashinshi kawu kushika nikunsa.

3. Shimunenu chakutalilahu hachichalemena akaKristu ejima kutwalekahu nakutoñojokahu chikupu hayuma yamuBayibolu yitwatachikilañahu kudiza.

³ Hela chakwila tunashimbuli muchalala, yuma yamuBayibolu yitwatachikilañahu kudiza yinateli kutukwasha ninetu. Chakutalilahu: Muntu wadiza chakuteleka chiwahi nimuntu wunakudiza, anateli kuzatisha yuma yoyimu hakuloñesha yakuda yinakukeñeka. Ilaña muloña wakuzata iwu mudimu hadi mpinji yayilehi, iwu wakulukila mukuteleka nadizi chakuzatisha iyi yuma munjila yaambukaku hakwila yaloñeshi yakuda yayiwahi nawa yikudiluñishawu antu. Munjila yoyimu, etu anamukalakeli Yehova hadi mpinji yayilehi tunateli kudizilaku yuma yayivulu kuchalala chamuBayibolu chitwatachikililihu kudiza kubadika atudizi aBayibolu anatachiki hohu kudiza. Yuma yitunahitimu hela nyidimu yitunakalakali mumudimu waYehova, chakadi nikujina yinahimpiki kufuma hitwapapatisheweli. Neyi tuzatishaña yuma yitwadizili dehi kunyima mukukala kutunakumona chayinu mpinji, tukwilukilahu yuma yayiha ninjila jinateli kutukwasha. Tutalenu yuma yinateli kudizilawu akaKristu apama kuyuma yisatu yamuBayibolu yitwatachikilañahu kudiza.

YEHOVA DIYI NLEÑI

4. Kwiluka netu Yehova diyi Nleñi kunatukwashi ñahi?

⁴ “Watuñili yuma yejima hiNzambi.” (Heb. 3:4) Tweluka netu iseki hitwashakamaña niyuma yejima yikweti wumi yekalahu, ayituñili kudi Nleñi wasweja maana niñovu. Diyi watuleñeli, dichi watwiluka chiwahi chikupu. Chuma chasweja kubadika, watwakamenaña. Weluka yuma yinateli kutuletela muzañalu. Kwiluka hohu chalala chahosha nawu Yehova diyi Nleñi, kunahimpi chihandilu chetu munjila jajivulu, nakutukwasha kwikala namuzañalu walala nikwiluka chuma chitwatela kwila muchihandilu.

5. Chalalanyi chitwatela kwiluka chikutukwasha kwikala adizoza? (Isaya 45:9-12)

⁵ Kwiluka chalala chahosha nawu Yehova diyi Nleñi, kunateli kutudizisha chichalemena kwikala adizoza. Chelili Yoba yadishi nankashi maana yomweni niantu amakwawu, Yehova wamwanukishili nindi Diyi Nleñi wañovu jejima. (Yoba 38:1-4) Chumichi chamukwashili Yoba kumona nindi njila jaNzambi jabadika jawantu. Kwesekeja nachumichi, kaprofwetu Isaya mukuhita kwampinji wasonekeli nindi: “Komana ndambu yinateli kuleja Kañemi nawu: ‘Wunakuwumba chumanyi?’”—Tañenu Isaya 45:9-12.

6. Mpinjinyi sweje-e yitwatela kutoñojoka nankashi hamaana niñovu yikwetiyi Nleñi yetu? (Talenu cheñi nyevulu.)

⁶ Neyi mukaKristu namukalakeli Yehova hadi yaaka yayivulu, hadaha nateli kutachika kushindamena nankashi hayitoñojoka yindi chatela amushindameneña Yehova nihawunlomboli Wezu Dindi. (Yoba 37:23, 24) Hanu dinu chumanyi chinateli kumwekana neyi muntu atoñojokahu chikupu hamaana niñovu yabadika yaNleñi yindi? (Isa. 40:22; 55:8, 9) Ichi chalala chalema chikumukwasha kutwalekahu kwikala wadizoza nikumona nindi yitoñojoka yaYehova yabadika yindi.

7. Chumanyi cheliliyi Rahela hakwila eteji kuhimpika kudi mukuloñesha?

⁷ Rahela, muhela washakamaña kuSlovenia, nawani nindi kutoñojoka hadi Nleñi yindi kunamukwashi kwiteja kuhimpika kudi mukuloñesha. Wahosheli nindi: “Mpinji jikwawu, chankalilaña kwiteja munafuukuliwu amanakwetu anakulombola. Chakutalilahu, nihanyima yakutala Lipoti Yamunaamba 8 Yinafumi Kudi Izanvu Dalombolaña Yamu 2023, nahayamini nankashi chinamweni katachi manakwetu wunahembi wevu nakuhana mpanji. Dichi nalombeli kudi Yehova nami yankwashi kwiteja iku kuhimpika.” Nkumininaku, Rahela welukili nindi Nleñi yamawulu niiseki, Yehova, washikilamu chikupu kulombola kuloñesha kwindi munjila yayiwahi. Neyi chinakuyikalila kwiteja kuhimpika kudi mukuloñesha hela kwovwahila wunlomboli wunahaniwu, kwila mudizoza nakutoñojokahu chikupu hamaana niñovu yabadika yaNleñi yetu nehi?—Rom. 11:33-36.

CHUMA CHACHENI YEHOVA CHETEJELAYI MAKABI

8. Kwiluka chaletesha Nzambi eteji makabi kunatukwashi ñahi?

⁸ Muloñadi Nzambi chetejelayi makabi? Antu amakwawu akañanya kuwana ñakwilu yanilu lwihu, amuhilila Nzambi hela akunkulula nawu wekalaku wanyi! (Yish. 19:3) Ilaña, enu mwadiza nenu antu akabakanaña nikufwa muloña wanshidi nikubula kuwanina, bayi neyi Yehova wakoñahu chuma chatamaku. Mwadiza cheñi nenu kudiwunjika kwaYehova nawantu kunakwashi antu amavulu nankashi kumwiluka nawa akadimwena aweni Yehova chakafumishahu makabi ejima. (2 Pet. 3:9, 15) Kwiluka ichi chalala kunayikundeji nawa kunayiswiji kwakwihi nayena.

9. Mpinjinyi sweje-e yitwatela kutoñojoka hayuma yayeni yaletesha Yehova eteji makabi?

⁹ Tuneluki chichalemena kwikala adiwunjika hampinji yitunakutalila Yehova kufumishahu makabi. Ilaña neyi tufwisha ntaña yetu hela ibwambu detu itwakeña, hela neyi etu indi kwiji ntaña yetu nakumona kukala hela anamwili chuma chatama, hadaha tukutachika kujinoka muloña waweni Yehova chinakubulilayi kufumishahu makabi swayi-swayi. (Hab. 1:2, 3) Hampinji jamuchidiwu, tukwila chiwahi neyi tutoñojoka hayuma yayeni yaletesha Yehova eteji antu aloña kukabakana.a (Mas. 34:19) Tunateli cheñi kutoñojoka hachuma chinakufwilayi kwila, kufumishahu makabi haya nyaaka.

10. Chumanyi chinamukwashi Anne kuumika chineñi chatiyañayi muloña wakufwisha amama yindi?

¹⁰ Kwiluka chuma chacheni chaletesha Nzambi eteji makabi, kunateli kutukwasha kuumika kukala. Anne, washakamaña hachituutu chaMayotte, kuKaluñalwiji katenañawu nawu Indian Ocean, wahosheli nindi: “Hampinji yinafwishili amama yaaka yantesha yinahitihu, naneñeli nankashi. Hela chochu, nadanukishileña mpinji yejima nami Yehova diyi wakojejaña makabi wanyi. Nakufwila chikupu kufumishahu makabi ejima nikusañula antaña niamabwambu jetu itwakeña. Kutoñojokahu chikupu hanichi chalala, kwankwashaña kwikala nakuwunda kwamuyitoñojoka hela chakwila nichidi kuyanuka amama.”

11. Kwiluka chuma chacheni Yehova chetejelayi makabi kunateli kutukwasha ñahi kutwalekahu kushimwina?

¹¹ Kwiluka chalala chahosha hachuma chacheni Yehova chetejelayi makabi, kunateli kutusañumuna kutwalekahu kushimwina. Hanyima yakulumbulula nindi kudiwunjika kwaYehova kwamwinaña antu abalumukaña munyichima, Petulu wasonekeli nindi: “Toñojokenu muchidi wawantu imwatela kwikala. Mwatela kwikala antu akweti yilwilu yakujila nawa kalakalenuña nyidimu yakumwakama Nzambi.” (2 Pet. 3:11) Hakachi kaniyi “nyidimu yakumwakama Nzambi,” hadi nimudimu wetu wakushimwina. Tata yetu wayikeña antu, ninetu twayikeña. Tunakukeña akashakameña mukaayi kaNzambi kakaha mwakekala antu aloña. Yehova nadiwunjiki kuhitila mukuyinka antu ashakamaña muchituñilu chenu kukooleka kwakudifukula kudi yena. Kwenoku kukooleka kumukweti kwakukalakela hamu naNzambi kulonda mukwashi antu amavulu nankashi kumwiluka henohu kukuma kanda kwinzi!—1 Kor. 3:9.

TUNAKUSHAKAMA “MUMAFUKU AKUKUMININA”

12. Kwiluka netu tunakushakama “mumafuku akukuminina” kunakutukwasha ñahi?

¹² Bayibolu yalumbulula choloka antu chakekalawu “mumafuku akukuminina.” (2 Tim. 3:1-5) Neyi tutala yilwilu yinakumwekeshawu antu, tukumona iwu wuprofwetu chiwunakushikijewa. Chitunakumona yilwilu yawantu yinakutaminaku, chumichi chinakutukwasha kukuhwelela chikupu netu mwahosha Izu daNzambi mwalala.—2 Tim. 3:13-15.

13. Kwesekeja nachakutalilahu chashimwiniyi Yesu chekala haLuka 12:15-21, malwihwinyi itwatela kudihula etu aweni?

¹³ Kwiluka netu tunakushakama mumafuku akukuminina kwatukwashaña kusha muchima kuyuma yalema nankashi. Talenu yuma yitunateli kudizila kuchichalemena kwila mwenimu kuchakutalilahu chashimwiniyi Yesu chekala haLuka 12:15-21. (Tañenu.) Muloñadi iyala samaheta chamuteneneniwu nawu “wabula maana”? Bayi neyi muloña iwu iyala wadiña waheta nankashiku, ilaña muloña wafwilileña yuma yabula kulema. Wadilumbikilili “maheta henohu hikazweñi kumesu aNzambi.” Tukuhosheladi netu wafuukwili mwaluwa? Nzambi wamulejeli iwu iyala nindi: “Lelu nawufuku akukutambula wumi weyi.” Makonu chitunakuswina kwakwihi nakukuma kwayinu nshakaminu, tunateli kudihula netu: ‘Yikonkwanyi yinafwilaña yinakumwekesha nawu inakuzatisha chiwahi mpinji yami? Yikonkwanyi yamuchidinyi yinalejaña anyanami nami adimikileña? Komana nazatisha ñovu jami, mpinji nimali inikweti kudilumbikila maheta ahanu hamaseki tahindi nadilumbikilaña maheta mwiwulu?’

14. Neyi chinamwekeshiwu muchuma chamumwekeneni Miki, chalemenadi kutoñojokahu chikupu hayuma yamuNsona yinakumwekesha nawu tunakushakama mumafuku akukuminina?

¹⁴ Neyi tutoñojokañahu chikupu hayuma yinakumwekesha nawu mwamweni tunakushakama mumafuku akukuminina, chikutukwasha kwiluka yuma yalema yitwatela kwila muchihandilu. Dichuma chamumwekeneni muhela wejina daMiki. Wahosheli nindi: “Chinamanishili shikola, muchima wami wanlejeleña nawu niyi kushikola yakudiza jawanyama. Nekeñeleña cheñi kwikala payiniya wampinji yejima nikuya nakuzatila kudi kukaankila kweneni. Amabwambu jami apama ankwashili kutoñojokahu chiwahi nankashi neyi chakwila nukutwesha kuya kuniyi shikola yinakeñeleña nawa hampinji yoyimu nikushikija iyi yikonkwanyi yakuspiritu. Añanukishili nawu kukuma kwanshakaminu yamakonu keña kwinzi. Añanukishili cheñi nawu mukaayi kakaha, nakekala nakukooleka kwakudiza hadi anyama ejima haya nyaaka. Dichi nafuukwilihu kudiza mudimu wakumujimba wahakapinji kantesha nawa wukunkwashaña. Chumichi chankwashili kuwana mudimu wankwashileña kuwana mali akudikwashamu muwupayiniya nihampinji yinayili kuEcuador, kwadiña kukaankila kweneni.” Miki namfumwindi anakuzatila kudodenidi ituña mumudimu wakwenda.

15. Chumanyi chinakumwekesha nawu antu anateli kuhimpa nakwiteja nsañu yayiwahi? Shimunenu chakutalilahu. (Talenu cheñi nyevulu.)

¹⁵ Twatela kuneña wanyi neyi antu hakusambila akaana nsañu yayiwahi. Antu anateli kuhimpa. Toñojokenu hachuma chamumwekeneni Yakoba mwanyika Yesu. Wamumweneña Yesu chakulileñayi, chekaliliyi Mesiya nichatañishileñayi chachiwahi kubadika chatañishaña antu ejima. Hela chochu, hadi yaaka yayivulu, Yakoba hamulondeleleña Yesuku. Wekalili kambanji hanyima hohu yakwila Yesu anamusañuli dehi. Kafwampi, Yakoba wekalili kambanji wadikita chikupu!b (Yow. 7:5; Ñal. 2:9) Bayi mudiwula kulema kwakushimwina antaña jenu abulaña kumwekesha muchima wakukeña kudiza hela kushimwina cheñi antu akaanini kutambwila nsañu yaWantaku. Anukenuña nenu tunakushakama mumafuku akukuminina, dichi twatela kuzata mudimu wetu wakushimwina mukunyakashana. Yuma yimunateli kuyileja chayinu mpinji yinateli kuyikwasha kumbidi, hadaha nihanyima yakutachika kwalukadi lwasweja.c

TWALEKENUHU KUMWEKESHA KUSAKILILA HAYANUKISHU YAYEHOVA

16. Yanukishu yafumaña kudi Yehova yinayikwashi ñahi? (Talenu cheñi chikasha chinakwila nawu “Yizatishenuña Kukwasha Amakwawu.”)

¹⁶ Yakuda yikwawu yakuspiritu yitwatambwilaña, aloñeshelaña antu abulahu dehi kutiya chalala chamuBayibolu chitwatachikilañahu kudiza. Chakutalilahu, mpanji yawantu amavulu yekalañaku mulungu-himulungu, yibaaba nimavidiyo amakwawu jekala ha jw.org nimagazini etu itwazatishaña mumudimu wakushimwina, avula kuloñeshela antu abula kwikala aYinsahu. Hela chochu, iyi yanukishu yatukwashaña ninetu. Yatukwashaña kusweja kumukeña Yehova, kukuhwelela chikupu Mwizu dindi nikwiluka chakudizisha chiwahi antu chalala chitwatachikilañahu kudiza.—Mas. 19:7.

17. Mpinjinyi yitwatela kutoñojoka hayuma yalema yamuBayibolu yitwatachikilañahu kudiza?

¹⁷ Etu aYinsahu jaYehova, twazañalalaña nankashi neyi kudi kuhimpika kwantiyishishilu yachalala chamuNsona. Hela chochu, twasakililaña cheñi chikupu hayuma yamuBayibolu yitwatachikililihu kudiza yatukwashili kutachika kuswina kwakwihi naYehova. Neyi twikala mukweseka kwakukeña hohu kushindamena hayitoñojoka yetu chatela twovwahili wunlomboli wutunakutambwila mukuloñesha kwaYehova, twatela kudizoza nakwanuka wunakulombola iku kuloñesha, dikwila nawu Nleñi wañovu jejima nawa wekala namaana abadika. Neyi etu hela muntu itwakeña nakuumika kukala, twatela kudiwunjika nikutoñojoka hachuma chacheni Yehova chetejelayi makabi. Nawa neyi tunakufuukula chakuzatisha chiwahi mpinji niyuma yetu, twatela kwanukaña netu tunakushakama mumafuku akukuminina nawa mpinji yinashaliku hakwila kukuma kwinzi yinakehi. Dichi yanukishu yaYehova yitwalekihu kutukolesha, kutusañumuna nikutukwasha kwikala namaana.