Chitunateli Kushinda Kufwila Kwatama

1. Kukalanyi kwalwishaña nawantu ejima abula kuwanina?

KUDIHU mpinji yimwafwilileña chikupu kukoña chuma chahelayi Yehova? Neyi chayimwekenahu dehi, bayi mukunkulula nenu kwosi antu amakwawu amonahu dehi kweseka kumwahitilimuku. Bayibolu yahosha nawu: “Kwosi kweseka kunayimwekeni kwabulaña kumonawu antu ejimaku.” (1 Kor. 10:13) Dichi kufwila kwatama kwejima kumunakulwisha naku, antu amakwawu niwena anakulwisha nakufwila kwokumu. Hiyenu hohu munakumona kukalaku, nawa nawukwashu waYehova munateli kwimika mushindu iku kukala.

2. AkaKristu amakwawu niatudizi aBayibolu alwishaña nakweseka kwamuchidinyi? (Talenu cheñi nyevulu.)

² Bayibolu yahosha cheñi nawu: “Muntu wejima amwesekaña kuhitila mukumukokola nikumudimbeka nakufwila kwindi yomweni.” (Yak. 1:14) Iyi vasi yinakutukwasha kwiluka netu antu enda kwamboka nawa ayesekaña kudi yuma yashiyashana. Chakutalilahu, akaKristu amakwawu anateli kwikala mukweseka kwakukeña kwila wuvumbi nawantu abula kudisumbulawu nawu, amakwawu anateli kwikala mukweseka kwakukeña kwila wuvumbi nawakwawu awamayala hela nawakwawu awambanda. Antu aleka kutala nyevulu yanzekesi anateli kwikala mukweseka kweneni kwakukeña kufuntila kunichi chaaku. Antu amavulu alekaña kuzatisha chatama yitumbu yashetana hela walwa niwena amonaña kukala kwokumu. Iku dikufwila kwantesha akaKristu amakwawu niatudizi aBayibolu kwalwishañawu naku. Mpinji yimu, hadaha wejima wetu twatiyahu dehi neyi chatiyiliyi kapostolu Pawulu, wasonekeli nindi: “Neyi nifwila nami nikoñi chuma chaloña, chuma chatama dichenzaña mudi ami.”—Rom. 7:21.

3. Yitoñojokanyi yinateli kwikalayi nayu muntu wunatwalekihu kulwisha nakufwila kwatama?

³ Neyi munatwalekihu kulwisha nakufwila kwatama, hadaha mukutiya neyi himukweti ñovu yakushinda oku kwesekaku. Indi kwiji munateli cheñi kutoñojoka nenu Yehova wakayiteja wanyi kushakama haya nyaaka muloña wakufwila kwatama kumunakulwisha naku. Ilaña kuhwelelenu nenu yitoñojoka yamuchidiwu yaheña! Hakwila twiluki chinaleteshi tuhoshi muniyi njila, achinu chibaaba chikwakula malwihu ayedi: (1) Hinyi wakeñaña nindi mutoñojokeña muniyi njila? (2) Munateli kushinda ñahi kufwila kwatama?

YITOÑOJOKA YAKEÑAÑAYI “WATAMA” NINDI TWIIKALI NAYU

4. (a) Muloñadi Satana chakeñelañayi nindi tutoñojokeña netu tudana ñovu yakushinda kufwila kwatama? (b) Muloñadi chitwatela kukuhwelela netu tukutwesha kushinda kufwila kwatama?

⁴ Satana wakeñaña nindi tutoñojokeña netu tudana ñovu yakushinda kufwila kwatama. Yesu wamwekesheli chumichi hatooka nindi Satana wukutwesekaña hampinji yayilejeleñayi akakumulondela nindi alombeña nawu: “Bayi wututwala mukwesekaku, ilaña twamwini kudi watama.” (Mat. 6:13) Satana wahoshaña nindi muntu nateli kukañanya kumwovwahila Yehova neyi wudi mukweseka. (Yoba 2:​4, 5) Muloñadi chatoñojokelañayi muniyi njila? Satana diwadiña watachi kufwa mumuhetu wakufwila kwila yuma yatama, nawa wakañenyi kwikala washinshika kudi Yehova. Chakadi nikujina, watoñojokaña nindi twekala neyi yena nawa nindi neyi twikala mukweseka kwakwila yuma yatama, tukushikena hohu kumushiya Yehova. Satana watoñojokeli cheñi nindi wukumweseka Mwana kaNzambi kulonda yakoñi yuma yatama. (Mat. 4:​8, 9) Ilaña toñojokenu hachumichi: Komana mwamweni tudana ñovu yakushinda kufwila kwatama? Tukweti! Tuneteji chasonekeliyi kapostolu Pawulu nindi: “Nikweti ñovu yakuhita muyuma yejima muloña wanowu wanyinkaña ñovu.”—Fwili. 4:13.

5. Tuneluki ñahi netu Yehova watukuhwelela chikupu nindi tukutwesha kushinda kufwila kwatama?

⁵ Kwaambukaku naSatana, Yehova watukuhwelela chikupu nindi tukutwesha kushinda kufwila kwatama. Tuneluki ñahi chumichi? Muloña Yehova washimwineñahu dehi nindi izaza deneni dawantu atwalekañahu kwikala ashinshika, dakapuluka lukadi lwasweja. Toñojokenu mwatalisha awa mazu. Yehova wabulaña kutwamba, wahosha nindi antu amavulu, bayi anteshaku, akeñila mukaayi kakaha iku atooka, chineli akakosa “nyinkukumba yawu nakuyitookesha mumashi aMwana kaMukoku.” (Chim. 7:​9, 13, 14) Chakadi nikujina, Yehova hatumonaña nindi tudana ñovu yakushinda kufwila kwatamaku.

6-7. Satana wakeñaña nindi tutoñojokeña netudi?

⁶ Satana wakeñaña cheñi nindi tutoñojokeña netu muloña wakulwisha nakufwila kwatama, Yehova wakatwiteja wanyi kushakama haya nyaaka. Muloñadi chakeñelañayi nindi tutoñojokeña muniyi njila? Satana diyi akabula kwitejawu kushakama haya nyaaka, akamujilumuna. (Kutach. 3:15; Chim. 20:10) Chakadi nikujina, Satana nakukeña nindi tutoñojokeña netu hitwakashakama haya nyaakaku, sweje-e chineli tunakutalila kudiluñisha yuma yayiwahi yakabula kudiluñishayi yena. Hela chochu, etu tunakuchiñeja kushakama haya nyaaka. Kafwampi, Bayibolu yatulejaña nawu Yehova wakeñaña kutukwasha bayi kutufwisha namuloñaku. Hakeñaña “muntu hela wumu akakisikiku, ilaña wakeñaña antu ejima abalumuki munyichima.”—2 Pet. 3:9.

⁷ Dichi, neyi tunakutoñojoka netu tudana ñovu hela hitukutwesha kushinda kufwila kwatamaku, dikwila nawu tunakutoñojoka neyi chinakukeñayi Satana nindi tutoñojokeña. Neyi twiluka chumichi, chikutukwasha kwiluka chitwatela kudikaña nindi.—1 Pet. 5:​8, 9.

CHITUNATELI KUTIYA MULOÑA WANSHIDI YITWASWANA

8. Kubombela hakufwila kwatama, nshidi yatuleteshaña kwiladi? (Isamu 51:5) (Talenu cheñi “Mwatalisha Idi Izu.”)

⁸ Kubombela hadi Satana, kudi chuma chikwawu chinateli kutuletesha kutoñojoka netu hitukutwesha kushinda kufwila kwatamaku. Hichumanyi? Hinshidi yitwaswanini kudi anvwali jetu atachi.a—Yoba 14:4; tañenu Isamu 51:5.

9-10. (a) Yumanyi yafuminimu chelili aAdama naEva akoñi nshidi? (Talenu cheñi mwevulu.) (b) Iyi nshidi yitwaswana yatuleteshaña kutiya ñahi?

⁹ Talenu yuma yafuminimu chelili aAdama naEva akoñi nshidi. Chadikañiliwu naYehova, ayili nakuswama nawa avwalili muloña elukili nawu adi nzekesi. Kutalisha hanichi chuma chamwekeni, mukanda waInsight on the Scriptures wahosha nawu: “Dichi nshidi yayiletesheli kudinkamu nyiloña, kwakama, kubula kutiya kwikala akiñewa nikutiya nsonyi.” Chidi tuhu neyi aAdama naEva ayikiyilili mwitala mudi hohu itu tupeka tuwana. Adama naEva ahitañeneña mutotuna tupeka, ilaña hiyatwesheleña kwidika hanjiku. Atwesheli wanyi kutemuka nshidi yakoñeliwu.

¹⁰ Hela chochu, etu hitudi neyi chadiña aAdama naEvaku. Muloña ifutu danyiloña dayikundama wanyi awa eyala namumbanda atachi, ilaña etu datutookeshaña kunshidi nikutukwasha kwikala nachinleji chamuchima chitooka. (1 Kor. 6:11) Hela chochu, twaswanini nshidi. Dihafuma ninetu tudinkeñamu nyiloña, kwakama, kutiya neyi twakiñewa wanyi nikutiya nsonyi. Kafwampi, Bayibolu yahosha nawu nshidi yatwalekahu kuyikwata antu mupompa yayu. Nawa yinatwalekihu kukwata mupompa “niantu [abula] kuvulumuna neyi chavulumwiniyi Adama.” (Rom. 5:14) Ilaña twatela kutoñojoka wanyi netu muloña wakuswana iyi nshidi, tukutwesha wanyi kushinda kufwila kwatama hela kwikala nakuchiñeja kwakwikala nawumi wahaya nyaaka kumbidi. Tunateli kukañesha iyi yitoñojoka yatama. Munjilanyi?

11. Twatela kwila ñahi neyi tutiya netu hitukweti ñovu yakushinda kufwila kwatamaku, nawa muloñadi? (ARoma 6:12)

¹¹ Neyi tutiya netu hitukweti ñovu yakushinda kufwila kwatamaku, twatela kumona chumichi netu hinshidi yitwaswana “yinakuhosha,” nawa bayi tuyitiyililaku. Muloñadi? Muloña Bayibolu yatudizishaña nawu bayi twiteja nshidi yitwalekihu ‘kutuyuula neyi mwantaku.’ (Tañenu ARoma 6:12.) Chumichi chinatalishi mukwila nawu tukweti wuswa wakufuukulahu kubula kwila kwesekeja nakufwila kwatama. (Ñal. 5:16) Yehova watukuhwelela chikupu nindi tukutwesha kushinda kweseka, ilaña neyi welukili nindi tukutwesha wanyi hadi kutuleja kwila mwenimuku. (Kuhit. 30:​11-14; Rom. 6:6; 1 Tes. 4:3) Mwamweni, tukweti ñovu yakushinda kufwila kwatama.

12. Twatela kwila ñahi neyi tutachika kutoñojoka netu hiyakatwiteja kushakama haya nyaaka kumbidiku, nawa muloñadi?

¹² Munjila yoyimu, neyi tutachika kutoñojoka netu chineli tunatwalekihu kulwisha nakufwila kwatama Yehova wakatwiteja wanyi kushakama haya nyaaka kumbidi, twatela kumona chumichi netu hinshidi yitwaswana “yinakuhosha,” nawa bayi tuyitiyililaku. Muloñadi? Muloña Bayibolu yatudizishaña nawu Yehova weluka chikupu nindi twavulumunaña. (Mas. 103:​13, 14) “Weluka yuma yejima” hadi etu, kushilahu niyuma yatama yitwafwilaña muloña wanshidi yitwaswana. (1 Yow. 3:​19, 20) Chakala hohu tubula kwiteja nshidi yitwaswana yituleteshi kukoña yuma yatama yitunakufwila, tukutwalekahu kwikala nawubwambu wawuwahi naYehova. Muloñadi chitukukuhwelela mwenimu?

13-14. Komana neyi tunatwalekihu kulwisha nakufwila kwatama, kwila tumutiyisha Yehova kuwaha nehi? Lumbululenu.

¹³ Bayibolu yashimuna chaambu chekala hakachi kakwila yuma yatama (chuma chitunateli kukañesha) nakufwila kwila yuma yatama (chuma chitunateli kukañanya kukañesha). Chakutalilahu, antu amakwawu hakachi kawakaKristu akusambila muKorinda elileña wutumwa kunyima. Pawulu wasonekeli nindi: “Enu amakwawu dichimwadiña.” Komana ichi chinayi mukwila nawu hiyekalilihu cheñi nampwila yakufwila kwila wutumwaku? Atela alwishileña naniku kufwila kwatama, muloña kufwila kwamuchidiwu kwavula kushimata nankashi muyitoñojoka. Hela chochu, akaKristu adiyuulileña nawa atondolweleña kwila kwesekeja nakufwila kwanyichima yawu, Yehova wayitiyileña kuwaha. Wayimweni nindi ‘anayiweleshi nakwikala atooka.’ (1 Kor. 6:​9-11) Dichinateli kuyimwekena ninenu.

¹⁴ Hela chakwila munakulwisha nakufwila kwatama kwamuchidinyi, munateli kukushinda. Hela neyi mukutwesha wanyi kushikena kuleka iku kufwila kwatama, munateli kudiyuula nikutondolwela ‘kwila munakukeña mujimba niyitoñojoka yenu.’ (Efwe. 2:3) Munateli kwila ñahi mwenimu hakwila mushindi kufwila kwatama?

CHITUNATELI KUSHINDA KUFWILA KWATAMA

15. Neyi tunakukeña kushinda kufwila kwatama, muloñadi chichalemena kwiteja kuzeyazeya kutukweti?

¹⁵ Hakwila mutweshi kushinda kufwila kwatama, mwatela kwiteja nenu mudi nanoku kuzeyazeya. Bayi mudidimba enu aweni “nayitoñojoka yakutwambaku.” (Yak. 1:22) Chakutalilahu, neyi mutachika kutoñojoka mwaluwa nenu, ‘Antu amakwawu anwaña walwa nankashi kubadika ami,’ hela mutachika kwinkamu akwenu nyiloña nenu, ‘Nadi kwikala mukweseka kwakutalaña nyevulu yanzekesi wanyi neyi mwinikwami wammwekeshelaña kukeña.’ Neyi mutachika kutoñojoka muniyi njila, mukwikala mukweseka kwakwila yuma yatama. Dichi bayi mudiwula kuzeyazeya kumukweti kwakwila yuma yatamaku. Kutwikaña akwenu nyiloña hayuma yatama yimwelaña nehi.—Ñal. 6:7.

16. Yumanyi yimwatela kwila yikuyikwasha kwila chuma chaloña?

¹⁶ Kubombela hakwiteja nenu mukweti kuzeyazeya, mwatela cheñi kuzata nañovu kudikasa mumuchima kulonda mubuli kwila yuma yatama. (1 Kor. 9:​26, 27; 1 Tes. 4:4; 1 Pet. 1:​15, 16) Ilukenu yuma yayileteshaña muholokeleña swayi mukweseka nimpinji. Hadaha kudi chuma chimu chayishaña mukweseka, indi kwiji mpinji yimwavula kwikala mukweseka kwakwila yuma yatama. Chakutalilahu, komana chayikalilaña kutondolwela kweseka hampinji yimunazeyi, indi kwiji mukachi kawufuku? Ilukenu kweseka kunateli kuyiwana, nawa toñojokelenuhu chadimu chimwatela kutondolwela oku kweseka. Mwatela kwila mwenimu henohu kanda mwiñili mukweseka.—Yish. 22:3.

17. Yumanyi yitunateli kudizila kuchuma cheliliyi Yosefu? (Kutachika 39:​7-9) (Talenu cheñi nyevulu.)

¹⁷ Talenu Yosefu cheliliyi hamudimbekeleñawu kudi ñoda Potifwari nindi akaami nindi. Chelukiliyi kafuta kindi, washikeneni kukaana nawa wamulejeli chakubula kuhita mumbadi. (Tañenu Kutachika 39:​7-9.) Chumichi chinakumwekeshadi? Chinakumwekesha nawu henohu ñoda Potifwari kanda yamudimbeki nindi akaami nindi, Yosefu wadiña weluka dehi yuma yafumañamu neyi muntu akaama nañodambala. Munjila yoyimu, ninenu munateli kudikasa mumuchima wenu kukoña chuma chaloña henohu kweseka kanda kuyiwani. Chimwela mwenimu, neyi mwikala mukweseka chakayipelela kukakela kuchuma chimwafuukula dehi.

“DESEKENUÑA”

18. Munateli kushinda ñahi kufwila kwatama? (2 AKorinda 13:5)

¹⁸ Hakwila mushindi kufwila kwatama, “desekenuña,” dikwila nawu, dishinshikenuña mpinji yejima kulonda mumoni chimunakuzata. (Tañenu 2 AKorinda 13:5.) Mumpinji-mumpinji, shinshikenuña hayuma yimunakutoñojokahu niyimunakwila nawa talenu hanakukeñeka kuhimpa. Chakutalilahu, hela neyi chakwila mwatwesha kukaana kweseka, munateli kudihula nenu: ‘Komana nashikena kukaana tahindi nashintajalaña?’ Neyi mwiluka nenu mwashintajalaña, kudinkamu nyiloña nehi. Ilaña, toñojokenu hayuma yimwatela kwila hakwila mpinji yikwawu mwakeli chiwahi. Dihulenu nenu: ‘Neyi nitachika kutoñojoka hayuma yatama, chumanyi chinatela kwila hakwila nishikeneña kuleka kutoñojokahu? Komana yisela yinakeña yinakuletesha chinkalileña kukaana kweseka? Neyi nimona nyevulu yatama, komana nashikenaña kutala kwacheñi? Komana neluka yuma yayiwahi yafumaña mukwovwahila nshimbi jaYehova mpinji yejima, hela chakwila hakujovwahila chakeñekaña kudiyuula?’—Mas. 101:3.

19. Kufuukula chatama mutuyuma tunakumwekana neyi twanyanya, kunateli kuletesha ñahi chitukalili kushinda kufwila kwatama?

¹⁹ Mwatela cheñi kutondolwela kudihakwilaku hayuma yatama yimwelaña. Bayibolu yahosha nawu: “Muchima wadimbanaña chikupu kubadika chuma chejima nawa watama nankashi.” (Yere. 17:9) Yesu wahosheli nindi mumuchima “dimwafumaña yitoñojoka yatama.” (Mat. 15:19) Chakutalilahu, muntu waleka dehi kutala nyevulu yanzekesi, mukuhita kwampinji, nateli kutoñojoka nindi chidi hohu “chiwahi” kutala nyevulu yikusañumuna mpwila yakwila wuvumbi, muloña hiyinakumwekesha yuma yanzekesiku. Indi kwiji nateli kutoñojoka nindi, ‘Chatama wanyi kutoñojoka hayuma yatama chakala hohu inakukoña iyi yuma yinnakutoñojokahu wanyi.’ Munjila yikwawu, muchima wadimbanaña waniwu muntu “[wunakutoñojokela] chadimu kwila yuma yafwilaña [mujimba].” (Rom. 13:14) Munateli kutondolwela ñahi kwila chuma chamuchidiwu? Ilukenuña kukala kumukweti nawa tondolwelenuña kufuukula chatama mutuyuma twanyanya, muloña chumichi chakayiletesha kufuukula chatama muyuma yamaneni, chidi neyi kuholokela mukweseka kwakwila yuma yatama.b Nawa kaanenu “yitoñojoka yatama” yidi yejima yinateli kuyiletesha kumona nenu yuma yatama yimunakwila yidi hohu chiwahi.

20. Yumanyi yayiwahi yitunakuchiñeja kumbidi, nawa hinyi wunakutukwasha kushinda chayinu mpinji?

²⁰ Neyi chitunadizi, Yehova watwinkaña ñovu yakushinda kweseka. Cheñi, muloña wefutu danyiloña, anateli kutwanakena nshidi jetu nawa tukwikala nakuchiñeja kwakwikala nawumi wahaya nyaaka mukaayi kakaha. Wenowu muzañalu wutwakekala nawu hampinji yitwakamukalakelaña Yehova namuchima wutooka niyitoñojoka! Twatela kukuhwelela netu tukweti ñovu nawa tukutwesha kushinda kufwila kwatama. Nawukwashu waYehova, tunateli kushinda!