Nyakalenu Kukwasha Antu Adi naMpwila Yakutambwila Nsañu Yayiwahi

1. Antu amakwawu atambwilaña ñahi nsañu yayiwahi? (Yilwilu 13:​47, 48; 16:​14, 15)

ANTU amavulu mumafuku awakaKristu akusambila atambwilili chalala chatiyiliwu hohu nsañu yawakaKristu. (Tañenu Yilwilu 13:​47, 48; 16:​14, 15.) Nimakonu, antu amakwawu azañalalaña chatiyawu nsañu yayiwahi katachi. Nawa amakwawu abulaña kwikala nampwila yakutiyilila kunsañu yaWanta neyi tuyishimwina katachi, mukuhita kwampinji enzununaña nyichima yawu nakutambwila nsañu yayiwahi. Chumanyi chitwatela kwila neyi tuwana antu adi “nanyichima yashinshika” mumudimu wetu wakushimwina?

2. Mudimu wetu wakwilisha atumbanji wadifwana ñahi namudimu wazataña ndimi?

² Talenu ichi chakutalilahu. Mudimu wetu wakwilisha atumbanji tunateli kuwesekeja namudimu wandimi mwitempa. Neyi iwu ndimi yamona kumutondu wumu kudi mukaabu wunahi, wukuwukumunaku ilaña wukutwalekahu kutukumwina nikwakamena nyitondu yikwawu yanyikaabu yidi mwitempa dindi. Munjila yoyimu, neyi tuwana muntu wudi nampwila yakutambwila nsañu yayiwahi, tukukeña kumukwasha kulonda ekali kambanji kaKristu chakadi kushintajala. Hela chochu, tukutwalekahu kusañumuna mpwila yawantu amakwawu anakukeñeka mpinji hakwila amoni kulema kwansañu yinakutiyawu. (Yow. 4:​35, 36) Kashinshi kakutukwasha kumona njila yayiwahi yitunateli kukwashilamu antiyili jetu. Ichi tuhanjekenu hayuma yitwatela kwila hampinji yitunakuhanjeka katachi nawantu anamwekeshi mpwila yakutambwila nsañu yayiwahi hakwila tuyikwashi. Tukuhanjeka cheñi chitunateli kukwasha awa antu kulonda atwalekeñahu kupama.

CHAKUKWASHA ANTU ADI NAMPWILA YAKUTAMBWILA NSAÑU YAYIWAHI

3. Yumanyi yitwatela kwila neyi tuwana antu akweti mpwila yakudiza mumudimu wakushimwina? (1 AKorinda 9:26)

³ Neyi tuwana antu akweti mpwila yakukeña kudiza mumudimu wakushimwina, tukukeña kuyikwasha kulonda atachiki kwenda munjila yakuwumi. Chitwawana antu amuchidawa, twatela kutachika kudiza nawu Bayibolu hohenohu nikuyitambika kukupompa hayoyenoyu mpinji yitunakuhanjeka nawu katachi.—Tañenu 1 AKorinda 9:26.

4. Lumbululenu chuma cheliliyi muntu wadiña nampwila yakudiza Bayibolu chakadi kushintajala.

⁴ Kutachika kudizisha antu Bayibolu. Antu amakwawu itwawanaña mumudimu wakushimwina, ashikenaña kwiteja kudiza Bayibolu. Chakutalilahu, ifuku dimu Hachiwana, kansi wamumbanda wakuCanada wayili kungolofwana nawa wanonelihu broshuwa yaMunateli Kwikala naMuzañalu Haya Nyaaka! Muhela wadiña hangolofwana wamulumbulwilili nindi nateli kudiza Bayibolu chawaana kuzatisha iyi broshuwa. Iwu kansi wadiña nampwila yakukeña kudiza, dichi adinkeli manaambala amafoni. Chimwahitili mpinji hadodina ifuku, iwu kansi wamutemesheleli muhela meseji nakumwihula ifuku datela kutachikawu kudiza. Chelili muhela yamuleji nindi wakenza kunsa yamulungu, yena wamwihwili nindi: “Indi neyi mwinza kumadiki? Kwosi jinakelaña.” Adizili hefuku dalondelelihu, Hachitanu. Iwu kansi wayili nakupompa katachi kunsa yaniwu mulungu nawa watwalekelihu kupaminaku.

5. Tunateli kumwekesha ñahi kashinshi neyi tunakutachika kadizi waBayibolu? (Talenu cheñi nyevulu.)

⁵ Hela chochu, twatela kukuhwelela wanyi netu antu ejima atiyililaña kunsañu yitwashimwinaña akushikena kwila neyi cheliliyi iwu kansi wamumbanda. Antu amakwawu akeñekaña mpinji yeneni. Hadaha tunateli kutachikilahu kuhanjeka hansañu yikumusañumuna muntu. Hela chochu, neyi tutwalekahu kumukuhwelela nawa tuhanjekaña nindi munjila yayiwahi, hakushimbula wanyi tunateli kutachika kudiza nindi Bayibolu. Tunateli kuhosha ñahi neyi tunakuleja muntu chakutachika kudiza nindi? Ilu lwihu ayihwili amanakwetu niahela amavulu akulukila mukutachika atudizi aBayibolu.

6. Tunateli kuhosha netudi hakwila tutwalekihu kuhanjeka namuntu wunamwekeshi mpwila?

⁶ Akakushimwina niapayiniya ehwiliwu hachakutachika kudizisha antu Bayibolu alumbulwili nawu mumatuña amakwawu chalema nankashi kubula kuzatisha awa mazu akwila nawu “kudiza,” “kudiza Bayibolu,” hela “nukuyidizishaña” hampinji yitunakulumbulula chitwadizaña nawantu. Ahosheli nawu njila yazatikaña chiwahi nankashi hikuzatisha mazu adi neyi “tukuhanjekaña” nawa “tukukeña kwiluka chahosha Bayibolu.” Hakwila mukwashi muntu ekali nampwila yakukeña kuhanjeka nanenu cheñi, munateli kuhosha nenu, “Munateli kuhayama chimweluka nenu Bayibolu yaakula malwihu alema ehulañawu antu,” hela nenu “Bayibolu himukanda wahosha hohu hakudifukulaku, ilaña watukwashaña nikumujimba.” Munateli kubombelahu nenu: “Mukapinji kantesha hohu, mumaminetisi 10 kushika ku 15 munateli kudiza yuma yalema yikuyikwasha muchihandilu chenu.” Munateli kuhosha muniyi njila chakadi kuzatisha mazu adi neyi “nakafuntilaku” hela nenu “nukwinzaña mulungu-himulungu,” muloña chumichi chikuletesha antu kutoñojoka nawu mukuyendelaña hohu mpinji yejima.

7. Mpinjinyi antu amakwawu yashikenañawu kwiluka chalala chamuBayibolu? (1 AKorinda 14:​23-25)

⁷ Yitambikenu akenzi nakupompa. Chinamwekani neyi mumafuku akapostolu Pawulu, antu amakwawu elukili chalala chamuBayibolu chayiliwu hohu kukupompa kwawakaKristu. (Tañenu 1 AKorinda 14:​23-25.) Dichuma chamwekanaña nimakonu. Antu amaha amavulu apamaña swayi neyi atachika kupompa nanetu. Mpinjinyi yimwatela kuyitambika nenu enzi nakupompa? Mumukanda waMunateli Kwikala naMuzañalu Haya Nyaaka!, mukudiza 10 dimudi iwu mutambi, ilaña himwatela kuhembelela sampu munashiki muniku kudizaku. Hampinji yimunakuhanjeka hohu nindi katachi, munateli kumutambika owu muntu yakenzi kukupompa kwakunsa yamulungu, hadaha mukumuleja nimutu wampanji yawantu amavulu hela chikuma chitwakadiza muKaposhi Kakutalila munowu mulungu.

8. Yumanyi yitwatela kumulumbulwila muntu neyi tunakumutambika netu yakenzi nakupompa hamu nanetu? (Isaya 54:13)

⁸ Neyi munakutambika muntu wukweti mpwila yakudiza kwinza kukupompa kwetu, mulumbulwilenu chaambu chekala hachitwapompaña nachapompañawu kuchechi kwayañayi. Hanyima yakuwanika katachi kukudiza Kaposhi Kakutalila, kadizi waBayibolu wumu wamwihwili ntañishi yindi nindi, “Mukakulombola weluka majina awantu ejima?” Muhela wamulumbulwilili nindi wejima wetu twazataña hakumina ñovu jetu kwiluka majina awantu adi muchipompelu chetu, neyi chitwelukaña majina awantu amuchisaka chetu. Kadizi wahosheli nindi muchechi yawu antu amavulu adiluka wanyi majina. Munjila yoyimu, ninetu tunateli kumulumbulwila muntu yuma yikwawu yaletesha kupompa kwetu kwiikali kwaambuka. (Tañenu Isaya 54:13.) Twapompaña hamu nakudifukula kudi Yehova, kudiza hadi yena nikudikolesha wumu namukwawu. (Heb. 2:12; 10:​24, 25) Muloña wachumichi, kupompa kwetu akuloñeshaña chiwahi hakwila atukwasheña kudiza chachiwahi, nawa himwabombela tushidikiluku. (1 Kor. 14:40) Matala etu aWanta niwena ayituña chachiwahi chakwila atukwashaña kudiluñisha kudiza. Nawa hitwahakwilañaku pati yimu yamapolitiki netu yabadika yikwawuku, muloña twadiñijaña wanyi munsañu jamatuña nachiyuulu, nawa hitwadibombaña mumazanvu awantu aletaña mapumbaku. Tukwila chiwahi neyi tumutalishila chadimu kadizi vidiyo yaYumanyi Yamwekanaña Hetala daWanta? Chitwela mwenimu, tukumukwasha kwiluka yuma yakamonayi neyi yenza nakupompa.

9-10. Neyi tunatambiki muntu kwinza nakupompa, yumanyi yitwatela kwila kulonda yabuli kumona nindi tukumukanjikija kudibomba nanetu hela kwakulahu hakupompa? (Talenu cheñi mwevulu.)

⁹ Amakwawu ashintajalaña kuya nakupompa muloña achiinaña nawu akuyikanjikija kuya “muchechi yacheñi.” Mulejenu muntu wamuchidowu nenu twatiyaña kuwaha kutambwila enyi nawa twayikanjikijaña wanyi netu adibombi nanetu hela kwakulahu hakupompa. Yisaka yakasunuka kwinza, kushilahu ninana akweti anyana anyanya. Hakupompa kwetu, anyana hiyayidizishaña nkawawuku. Ilaña, anvwali ashakamaña hamu nawanyanawu nikudizila hamu. Chumichi chayikwashaña anvwali kwiluka antu adi hamu nawanyanawu niyuma yinakuyidizishawu. (Kuhit. 31:12) Twatambulaña wanyi nyilambu hela kuhitishamu cheña. Ilaña, twovwahilaña lushimbi lwaYesu lwahosha nawu: “Mwatambwilili chamukunkulu, hanenu chamukunkulu.” (Mat. 10:8) Mwatela cheñi kumulumbulwila owu muntu nenu hakukeñeka kuvwala yakuvwala yawuseya hakwila dinu enzi nakupompaku. Nzambi wamonaña mumuchima, bayi chinakumwekanayi muntuku.—1 Sam. 16:7.

¹⁰ Neyi muntu yenza nakupompa, zatenu hanakumini ñovu jenu kumukwasha kulonda yekali wakasunuka. Yilejenu akulumpi niakakushimwina amakwawu ijina dindi kulonda amwiluki. Neyi amona kukeña kukwetiwu antu muchipompelu, chumichi chikumuletesha yakenzi cheñi nakupompa. Hampinji yakupompa, neyi wukweti Bayibolu wanyi, zatishenu hamu Bayibolu yenu nawa mukwashenu yeluki chitwalondelaña neyi nhoshi nakuhana mpanji hela neyi tunakudizila hamu.

NEYI TUNATACHIKI KUDIZISHA MUNTU BAYIBOLU

11. Munateli kumwekesha ñahi nenu mwalemesha mpinji nindandanda yamuntu imunakudiza nindi?

¹¹ Yumanyi yitwatela kwanukaña neyi tunakudizisha muntu Bayibolu? Lemeshenu mpinji nindandanda yamwini itala. Chakutalilahu, neyi mutiyañana mpinji yakudiza, mwatela kutachika kudiza yoyenoyu mpinji yimunatiyañani, hela chakwila antu ekala mwiluña denu hiyalemesha mpinjiku. Kubombelahu, mukwila chiwahi neyi kudiza kwakutachikilahu mukwihihisha. Akakushimwina amakwawu akulukila ahoshaña nawu chachiwahi kumanisha swayi kudiza, hela chakwila muntu yomweni nakukeña nindi mutwalekihu. Nawa chalema kutondolwela kusweja kuhosha. Mulekenu mwini itala ekali nampinji yeneni yakulumbulula chinakutiyayi nichinakutoñojokayi.—Yish. 10:19.

12. Chumanyi chitwatela kufwilaña kwila hampinji yitunatachiki hohu kumudizisha muntu Bayibolu?

¹² Kufuma hampinji yimunatachiki hohu kumudizisha muntu, chuma chimwatela kufwilaña kwila hikumukwasha yamwiluki Yehova niYesu nawa watela kuyikeña awa ayedi. Hakwila mwili mwenimu, mwatela kumulejaña chahosha Izu daNzambi chatela mumulejeña yitoñojoka yenu ninsañu yamuBayibolu yimweluka. (Yilw. 10:​25, 26) Kapostolu Pawulu kakavulu neyi nakutañisha wahosheleña nankashi hadi Yesu Kristu, atemesheliwu kudi Yehova kulonda yatukwashi kumwiluka Nzambi nikumukeña. (1 Kor. 2:​1, 2) Pawulu niyena washimwini hatooka chichalemena kukwasha atumbanji amaha kwikala nayilwilu yayiwahi, yinateli kwesekejawu nawuru, siliva nimalola alema wuseya. (1 Kor. 3:​11-15) Muniyi yilwilu mwabombela chikuhwelelu, maana, kashinshi nikumutiya Yehova woma. (Mas. 19:​9, 10; Yish. 3:​13-15; 1 Pet. 1:7) Imbujolenuña chatañishileñayi Pawulu kuhitila mukukwasha atudizi enu kwikala nachikuhwelelu chakola niwubwambu wawuwahi naTata yawu wamwiwulu wukweti kukeña.—2 Kor. 1:24.

13. Tunateli kwikala ñahi adiwunjika nimuchima wakutoñojokelaku hampinji yitunakukwasha antu adi nampwila yakudiza? (2 AKorinda 10:​4, 5) (Talenu cheñi mwevulu.)

¹³ Imbujolenuña chatañishileñayi Yesu kuhitila mukudiwunjika nikutoñojokelaku atudizi. Tondolwelenu kumwihula kadizi malwihu akumutiyisha nsonyi. Hampinji yimunakudiza, neyi chinatwesheki shiyenu yikuma yinakumukalila kutiyisha nawa funtenu kuniyi yikuma mpinji yikwawu. Chatela mumukanjikijeña kadizi kwiteja ntañishilu yinakubula kukeñayi hanoyu mpinji, mwinkenu mpinji hakwila chalala chishimati mumuchima windi. (Yow. 16:12; Kol. 2:​6, 7) Bayibolu yesekeja ntañishilu yakutwamba “kuyuma yashimata chikupu” yitwatela kubalumuna. MuchiGiriki, Bayibolu yazatisha chakutalilahu champwembu yinakukeñeka kuhumunewa. (Tañenu 2 AKorinda 10:​4, 5.) Chaswayi wanyi kadizi kuleka ntañishilu yinakuhweleliyi hadi mpinji yayilehi. Dichi twatela kumukwasha kutuña mpwembu yayiha, dikwila nawu kumukuhwelela Yehova. Kuhiñahu, chakamupelela kadizi kuleka yuma yakuhwelelayi, yashimata chikupu.—Mas. 91:9.

NEYI AMAHA ANENZI NAKUPOMPA

14. Twatela kuyimonaña ñahi antu amaha enzaña nakupompa nanetu?

¹⁴ Yehova wakeñaña nindi tubuleña kumwekeshela chaambu antu ejima, hichikweti muloña nachisemwa chawu, hiyatuzweñi hela aheta, indi kwiji chidi nkulilu yawuku. (Yak. 2:​1-4, 9) Dichi tunateli kumwekeshela ñahi kukeña antu enzaña nakupompa nanetu?

15-16. Tunateli kukwasha ñahi antu anenzi nakupompa nanetu kwikala akasunuka?

¹⁵ Antu amakwawu anateli kwinza nakupompa nanetu muloña hohu anakukeña kumona chitwapompaña, indi kwiji ayilejeli kudi muntu washakamaña kwacheñi nindi akenzi nakupompa. Dichi bayi tushintajala kuhanjeka nanawa antu enzaña nakupompa nanetuku. Yitambwilenu chachiwahi nawa bayi mwila yuma yikuletesha abuli kwikala akasunukaku. Shakamenu nawu hakupompa. Zatishenu hamu Bayibolu ninyikanda yimukweti, hela yinkenu Bayibolu ninyikanda yimunakuzatisha neyi yidi kwoku. Kubombelahu, toñojokenu hachinakutiyawu. Iyala wumu wayili Kwitala daWanta, wamulejeli manakwetu wamutambwilili nindi watiyili kutama muloña havwalili yakuvwala yakupompelamuku. Manakwetu wamukwashili kubula kusweja kwakama nawa wamulumbulwilili nindi aYinsahu jaYehova ekala hohu neyi chekala antu ejima. Nkumininaku, iwu iyala wapapatisheweli, nawa wavulameneni wanyi mazu amulejeliwu kudi manakwetu. Hela chochu, awa diwu mazu akusoñamisha: Neyi munakuhanjeka nawenyi henohu kupompa kanda hela hanyima yakupompa, ikalenu akasunuka himunakuhanjeka nawu ilaña bayi mudiñija munsañu jawuku.—1 Pet. 4:15.

¹⁶ Tunateli cheñi kukwasha antu anenzi nakupompa nanetu kwikala akasunuka kuhitila muyuma yitunakuhanjeka, muñakwilu jetu nimumpanji jitwahanaña hakupompa neyi tunakuhosha hadi antu abula kwikala aYinsahu hela hayuma yakuhwelelawu. Tondolwelenu kuzatisha mazu akuyihukesha hela akuletesha amoni nawu munakuyisawula. (Tit. 2:8; 3:2) Chakutalilahu, tukutamisha neyi tuhosha chatama hayuma yakuhwelelawu yaambuka nayuma yitwakuhwelela. (2 Kor. 6:3) Muloña wachumichi, amanakwetu ahanaña mpanji jawantu amavulu atela kwikala asoñama nankashi. Amwekeshaña cheñi nawu alemesha antu abula kwikala aYinsahu adi mwizaza neyi alumbululaña mazu niyikuma yinateli kuyikalila antu kutiyishisha.

17. Yumanyi yitwatela kwila neyi tuwana antu adi “nanyichima yashinshika” mumudimu wetu wakushimwina?

¹⁷ Chayinu mpinji mudimu wetu wakwilisha atumbanji wunakukeñeka kuwuzata mukunyakashana, nawa tukutwalekahu kuwana antu adi “nanyichima yashinshika yakukeña kwikala nawumi wahaya nyaaka.” (Yilw. 13:48) Neyi tuyiwana, bayi tushintajala kutachika kuyidizisha Bayibolu hela kuyitambika kulonda enzi nakupompaku. Chitwela mwenimu, tukuyikwasha kutachika kwenda munjila “yatwalaña kuwumi.”—Mat. 7:14.