1925​—Yaaka 100 Yinahitihu

NEYI CHUMA CHINAKUCHIÑEJAYI MUNTU KUSHIKIJEWA SWAYI NEHI

Atudizi aBayibolu amavulu akuhweleleli nawu iseki dakabalumuka nakwikala Paradisa mu 1925. Muloñadi? Manakwetu Albert Schroeder wekalili membala Mwizanvu Dalombolaña, walumbulwili nindi: “Atoñojokeli nawu munichi chaaka akakumulondela Kristu awayishewa ashalahu akaya mwiwulu nakuyuula muWanta waNzambi nawa amayala ashinshika akunyima chidi neyi Abarahama, Davidi niamakwawu akayisañula nakwikala atulamba akayuulaña nfulumendi yahamaseki yawanta waNzambi.” Chaaka chichayileña nakumana nawa chamweniwu nawu chuma chakuhweleleliwu chinamwekani wanyi, amanakwetu niahela amakwawu aneñeli chikupu.—Yish. 13:12.

Hela chakwila chuma chakuhweleleliwu chamwekeni wanyi, Atudizi aBayibolu amavulu atwalekelihu kudikita mumudimu wakushimwina nawa elukili chikupu mudimu watela kuzatawu muloña wakwikala aYinsahu jaYehova. Chakutalilahu, talenu mudimu wazatiliwu hakutiyakesha chalala hachikunzulemba mukamwihi nikwakulehi.

KUTUÑA YIKUNZULEMBA YIKWAWU

Chineli chikunzulemba chaWBBR chazatikili chiwahi muchaaka chafuminihu, Atudizi aBayibolu atuñili chikunzulemba chikwawu cheneni chatiyakesheleña nsañu kwakulehi, haniyi mpinji kwakwihi naChicago, Illinois. Ichi chikunzulemba chachiha achiteneneña nawu WORD. Ralph Leffler, wadiña namudimu wakutuña ichi chikunzulemba wahosheli nindi, “Mumpinji yachishika namelela antu amavulu akumaluña akwakulehi atiyilileña kunichi chikunzulemba.” Chakutalilahu, chisaka chimu chashakamineña kwakulehi kubadika makilomita 5,000 mumusumba waPilot, kuAlaska, chatiyilili kunsañu yakutachikilahu yahosheliwu hanichi chikunzulemba. Hanyima yakutiyilila, ichi chisaka chasonekeleli mukanda azatilileña hanichi chikunzulemba nakuyisakilila hakutiyakesha progilamu yakuspiritu yakukolesha.

Kaposhi Kakutalila kaDecember 1, 1925, kalumbulwili chaletesheli antu amavulu atwesheña kutiyilila kuniyi progilamu, kahosheli nawu: “Chikunzulemba chaWORD chidi hakachi kayikunzulemba yamaneni nankashi yidi muUnited States yinakuzatisha mawati 5,000. Ichi chikunzulemba chinakuhanuka chiwahi kuchikumu chaAtlantic nikuchikumu chaPacific, kuCuba nikumaluña adi kwakulehi kukabeta kakuchimunswa chaAlaska. Antu amavulu abulahu dehi kutiya chalala anakukeña kwilukilahu nsañu yayivulu muloña wakutiyilila kunichi chikunzulemba.”

Muyoyeniyi mpinji, Atudizi aBayibolu niwena akeñeleña kuzatisha chikunzulemba hakushimwina nsañu yayiwahi muCanada. Mu 1924 atuñili chikunzulemba chaCHUC muSaskatoon, Saskatchewan. Ichi chikunzulemba chadiña hakachi kayikunzulemba yatachi yazatishileñawu kutaandisha nachu nsañu yakudifukula muCanada. Mu 1925 awanini iluña deneni hakutuñila chikunzulemba cheneni. Dichi ichi chikunzulemba chekalili mumakasa awaWatch Tower Society nawa achibukishilili kuRegent Building, itala mwahemeneneñawu yisela kunyima muSaskatoon, dalandiliwu nawa dawahishiliwu kulonda ashimu ichi chikunzulemba.

Ichi chikunzulemba chazatili mudimu weneni nankashi, antu amavulu ashakamineña mumatawuni anyanya nimunyikala yamuSaskatchewan atiyili nsañu yayiwahi katachi. Chakutalilahu, mutawuni yimu yekala kwakulehi nankashi, mumbanda wumu wasonekeli nakulomba nyikanda yashindamena haBayibolu hanyima yakutiyilila kuprogilamu yahachikunzulemba. Manakwetu George Naish wahosheli nindi: “Chuma chalombeliyi iwu mumbanda chakeñekeleña kuzatilahu swayi-swayi, dichi twamutemesheleli nyikanda yejima yadiña namutu nawu Studies in the Scriptures.” Hashimbwili wanyi, iwu mumbanda watachikili kushimwina nsañu yaWanta kushika nikumaluña akwakulehi.

KUHIMPA NTIYISHISHILU YAYUMA YITWAKUHWELELELI

MuKaposhi Kakutalila kaMarch 1, 1925, mwadiña chibaaba chalema chadiña namutu nawu “Birth of the Nation (Kuvwalika kwaMuza).” Ichi chibaaba chalemenenidi? Hadi mpinji yayilehi, Atudizi aBayibolu elukili nawu, Satana wadiña nakuloñesha mwadiña aspiritu atama abulaña kumwekana nawa mwadiña kudifukula kwakutwamba, jibizinisi nimapolitiki ejima ahanu hamaseki. Hela chochu kuhitila munichi chibaaba, “nduñu wamaana nikashinshi” wayikwashili amanakwetu mukaayi kejima kwiluka nawu Yehova niyena wekala nakuloñesha kwambukaku chikupu nakuloñesha kwaSatana nawa kwelaña yuma yaambuka. (Mat. 24:45) Kubombelahu, nduñu walumbulwili nindi Wanta waNzambi wavwalikili mu 1914 nawa nindi muchochenichi chaaka, muloña ‘wanjita yatachikili mwiwulu’ yadiñaku mu 1914, Satana niandemoni jindi ayinatili kufuma mwiwulu, nawa kufuma ayina mpinji ekala hamaseki.—Chim. 12:​7-9.

Amakwawu chayikalilili kwiteja iku kuhimpika kwantiyishishilu yayiha yachalala. Muloña wachumichi, munichi chibaaba mwadiña kusoñamisha kwakwila nawu: “Neyi kudi antañi aKaposhi Kakutalila anakaani iyi ntiyishishilu yayiha yinasonekiwu, dikwila nawu atela kudiwunjika nikumuhembelela chikupu Mwanta, nawa mpinji yejima ekaleña namuchima wutooka.”

Ilaña Tom Eyre, kolopota (anakutenawu chayinu mpinji nawu payiniya) wakuBritain, walumbulwili Atudizi aBayibolu amavulu chatiyiliwu kutalisha hanichi chibaaba nindi: “Amanakwetu azañaleli nankashi hakutiya chalumbulwiliwu Chimwekeshu 12. Chitwelukili netu Wanta waNzambi wunatachiki kuyuula mwiwulu, twekalili neyena nankashi dakuleja antu nsañu yayiwahi. Chumichi chatusañumwini chikupu kudikita mumudimu wakushimwina nawa chatukwashili kumona Yehova chalombweleñayi antu jindi kuyuma yayiwahi.”

KUSHIMWINA HADI YEHOVA

Makonu, aYinsahu jaYehova eluka mwatalisha mazu ekala haIsaya 43:​10, ahosha nawu: “Yehova nahoshi nindi, ‘Enu yenu ayinsahu jami, eña, kambuñami innatondi.’” Hela chochu, henohu chaaka cha 1925 kanda, iyi nsona hiyayizatishileña nankashi munyikanda yetuku. Ilaña yuma yahimpikili. Mu 1925, Kaposhi Kakutalila kahosheli hansona yaIsaya 43:10 ni 12 mumagazini 11.

Kukumana kwaAugust 1925, Atudizi aBayibolu apompeli kupompa kweneni muIndianapolis, kuIndiana. Manakwetu Joseph F. Rutherford wasonekeli mazu akutambwila nachu antu anenzi nakupompa. Awa mazu ayipulintili haprogilamu yakupompa kweneni nawa ahosheleña nawu: “Tunenzi hakunu kupompa hakwila tutambwili ñovu kudi Mwanta kulonda twakafunti kumudimu wakushimwina neyena dadeni muloña wakwikala ayinsahu jindi.” Mumafuku 8 ejima aniku kupompa, antu enjili kuniku kupompa ayikolesheli kushimwina hadi Yehova mpinji yejima.

Hamposu, August 29, Manakwetu Rutherford wahanini mpanji yahosheleña nawu “Tuyenu Tushimwini Hadi Yehova.” Mumpanji yindi wakonkomweneni hachalemena mudimu wakushimwina, nindi: “Yehova nayileji antu jindi nindi . . . : ‘Yenu ayinsahu jami, nawa yami Nzambi.’ Kuhiñahu wayileja ilu lushimbi mwekala mazu akweti ñovu nindi: ‘Yimikilenu antu chinjikijilu.’ Kwosi antu amakwawu hanu hamaseki anateli kuyimikila antu chinjikijilu chiña antu jindi hohu, akweti spiritu yaMwanta nawa aYinsahu jindi.”—Isa. 43:12; 62:10.

Manakwetu Rutherford chamanishiliyi kuhana mpanji, antu ejima mwizaza etejeli iyi nsañu yadiña namutu wahosheleña nawu “Message of Hope (Nsañu yakuchiñeja),” yahosheleña nawu Wanta waNzambi hohu diwakaleta “nkisu yakuwunda, chihandilu chachiwahi, kwikala akola kumujimba, wumi, kukulewa nimuzañalu wahaya nyaaka.” Mukuhita kwampinji, iyi nsañu ayibalumwini mumadimi amavulu nawa apulintili tilakiti mwadiña iyi nsañu. Matilakiti kwakwihi na 40 miliyoni ayihanini mumudimu wakushimwina.

Atudizi aBayibolu atachikili wanyi kuzatisha ijina dakwila nawu aYinsahu jaYehova hadi yaaka yayivulu yalondelelihu. Hela chochu, atachikili kwiluka chalemeneni mudimu wadiñawu nawu muloña wakwikala ayinsahu jindi.

KUFUNTILA KUDI ANTU ANAMWEKESHI MPWILA

Atudizi aBayibolu chatachikiliwu kuvulilaku mukaayi kejima, kuloñesha kwayikolesheli nawu bayi ahanaña hohu nyikandaku, ilaña atela cheñi kufuntila kudi antu atambwilili chiwahi nsañu yayiwahi. Hanyima yakampeni yakuhana tilakiti yaMessage of Hope, muBulletina mwadiña lushimbi lwakwila nawu: “Mwatela kufuntila kumatala kwabuliliwu akanyidimu kushiya nyikanda ilaña kwashiliwu tilakiti yaMessage of Hope.”

Mutilakiti yaBulletin yaJanuary 1925 mwadiña iyi lipoti yafumini kudi Atudizi aBayibolu adiña muPlano, kuTexas yahosheli nawu: “Tunakutiya kuwaha muloña neyi tufuntila-funtilaku kakavulu kumaluña kutwashimwinini, antu atambwilaña chiwahi nsañu yayiwahi kubadika chuma chamwekanaña neyi tuya nakushimwina mumaluña mutwabulahu dehi kushimwina. Tawuni yanyanya yekala mwiluña detu anashimwinimu mapampa atanu muyaaka 10 yinahitihu. . . . Katataka Muhela Hendrix nawamama ayili nakushimwina cheñi muniyi tawuni nawa ahanini nyikanda yayivulu nankashi.”

Nawa mwituna daPanama, kolopota wumu wasonekeli nindi: “Antu amavulu akaanaña kuntiyilila neyi nayi nakuyishimwina katachi, ahimpaña yilwilu yawu neyi nifuntilaku kamuchiyedi hela kamuchisatu. Chaaka chinamani, nazatishileña mpinji yeneni kufuntila kudi antu inashimwinini nawa amakwawu hakachi kawu elileña chiwahi nankashi.”

NYIDIMU YIDI HAMBIDI

Mumukanda windi wahachaaka wayisonekeleliyi akolopota ejima, Manakwetu Rutherford walumbulwili muwihi nyidimu yazatikili muchaaka chejima ninyidimu yikwawu yadiña hambidi yawu. Wahosheli nindi: “Chaaka chinamani mwadiña nakukooleka kwakukundeja antu amavulu adiña nachineñi. Iwu mudimu wazañalesha muchima wenu . . . Muchaaka chinakwinza mwakekala nanyidimu yayivulu kutalisha hakushimwina hadi Nzambi, haWanta windi nikumwekesha hatooka chekala akakudifukula indi alala. . . . Wejima wetu hamu tutwalekenuhu kunyamuna izu detu nakwimba tumina twakumushimeka Nzambi yetu nawa Mwanta wetu.”

Kukumana kwachaaka cha 1925, amanakwetu afuukwili nawu Beteli yamuBrooklyn ayitoheshi. Afuukwili nawu muchaaka cha 1926 kuloñesha kwetu kwakela namudimu weneni chikupu wakutuña.