Sakililenuña HACHISAMBU CHAYEHOVA
YEHOVA hiNzambi wachisambu. (Yakoba 1:17) Twamonaña chisambu chindi kuhitila muyuma yejima yaleñayi. Mwiwulu wenzeshamu natutumbwa nawa iseki dejima wadinzesha nanyitondu yayiwahi.—Masamu 65:12, 13; 147:7, 8; 148:3, 4.
Nsoneki yaMasamu 104 wahamekeli chikupu yuma yejima yaleñayi Yehova, dichi wasonekeli kamina kakumuhameka nachu. Neyi munakutaña idi isamu, mwasakililaña neyi cheliliyi ñimbi yamasamu? Wahosheli nindi: “Nukumwimbila Yehova tumina nyaka yejima nichidi kuhanda; nukuseña Nzambi yami nyaka yejima nichidi hohu.” (Masamu 104:33) Komana ninenu munakukeña kwila neyi cheliliyi ñimbi yamasamu?
CHAKUTALILAHU CHABADIKA CHAKUKEÑA
Yehova nakukeña nindi twimbujoli chisambu chindi. Ninetu watwinka yuma yayivulu mutwatela kumwekeshela chisambu. Wamoneneni kapostolu Pawulu kusoneka nindi: “Yileji akwakuheta amakonu neyi, bayi muditoñojoka nenu mwalemaku, bayi mukuhwelela maheta abulaña kushakamaku; chiña kusha muchima kudi Nzambi wasweja kutwinka yuma yejima nindi tuluñi nachu. Yileji neyi, ilenuña chachiwahi, swejenu kwila nyidimu yayiwahi kulonda mumonaña yakukwasha nachu akwenu, ikalenu nanyichima yakuhana; nakudilumbikila yakutuña nachu kunyaka yakenza, kulonda mwakakwati kuwumi, wowu wumi walala chikupu.”—1 Timotewu 6:17-19.
Mumukanda windi wamuchiyedi wasonekeleliyi Akorinda, Pawulu walumbulwili chitwatela kutoñojoka hampinji yitunakwinka akwetu. Wahosheli nindi: “Antu ejima atoñojoki chachiwahi munyichima yawu hamuntu hamuntu, ahani chakadi kuneña hela kumukanjikija; muloña Nzambi wakeña muntu wahanaña nakuseha.” (2 Akorinda 9:7) Anyi itwakashaña neyi tudi nachisambu? Pawulu wahosheli nindi twakwashaña antu kuhitila mukuyinka yuma yinakukeñawu, ilaña twadikwashaña cheñi etu aweni muloña Yehova wakatukiswila.—2 Akorinda 9:11-14.
Pawulu wahosheli kutalisha kukwiluka chisambu chaNzambi chahosheliyi nindi: “Tumusakililenu Nzambi nansañu yachamukunkulu chindi chakañanya kushimunewa.” (2 Akorinda 9:15) “Chamukunkulu” chaYehova chabombelamu yuma yejima yatwinkayi kuhitila mudi Yesu. Hitukweti mazu akumusakilila nachu hanichi chawana chachiwahuku.
Tunateli kumwekesha ñahi kusakilila hayuma yejima yinakutwililayi niyikatwililayi Yehova naYesu? Njila yimu hikuzatisha mpinji yetu, ñovu niyuma yitukweti hakudifukula kudi Yehova nikukwasha antu kumwiluka. Tunateli kwila mwenimu chili twaheta hela tudi atuzweñi.—1 Kushindulula 22:14; 29:3-5; Luka 21:1-4.