KUDIZA 58
Twalekenuhu Kwikala Ashinshika Kudi Yehova
AkaKristu alala hiyetejaña chuma chidi chejima hela muntu wudi wejima kuyikañesha kudifukula kudi Yehovaku. Tunakuhweleli ninenu dichimwatiyaña. Yehova walemesha kashinshi kenu. (Tañenu 1 Kushindulula 28:9.) Kukalanyi kunateli kuyiletesha mubuli kwikala ashinshika kudi Nzambi, nawa chumanyi chinateli kuyikwasha kumanisha iku kukala?
1. Antu amakwawu anateli kweseka ñahi kashinshi ketu kudi Yehova?
Amakwawu anateli kutukañesha kumukalakela Yehova. Anyi wenawa? Hiyantu amakwawu afuma muchalala, ahoshaña nsañu yakutwamba hakuloñesha kwaNzambi kulonda azeyeshi chikuhwelelu chetu. Ayitenaña nawu akakusekesha. Cheñi, akulumpi jakwitiya amakwawu ahoshaña nsañu yakutwamba hadi etu kulonda aleteshi antu abula kusoñama kufuma muchalala. Dichi chatama nankashi kutadeka nawakakudimbulula, kutaña nyikanda yawu, kuya hawebu sayiti yawu hela kutala mavidiyo awu. Yesu wahosheli hadi antu akañeshaña akwawu kumukalakela Yehova nakashinshi nindi: “Yilekenu ahili. Hiyanlomboli aputa mesu. Muloña neyi mputamesu alombola mukwawu mputamesu, wejima wawu akuholokela mwibuku.”—Matewu 15:14.
2. Yuma yitwafuukulaña yatela kumwekesha ñahi nawu twashinshika kudi Yehova?
Kukeña kutwamukeña Yehova kukutusañumuna kutondolwela kudikunda nakudifukula kwakutwamba. Nyidimu yetu, kuloñesha kutwekalamu ninyidimu yikwawu yitwazataña himwabombela kudifukula kwakutwambaku. Yehova watusoñamishaña nindi: “Enu antu jami, fumenu mudi [Babiloni Muneni].”—Chimwekeshu 18:2, 4.
SANDUJOLENU CHIKUPU
Ilukenu chimunateli kubula kwiteja muntu azeyeshi kashinshi kenu kudi Yehova. Cheñi talenu chimunateli kumwekesha kashinshi kuhitila mukufuma muBabiloni Muneni.
3. Soñamenu nawantañishi akutwamba
Tukwila ñahi neyi tutiya anakuhosha yuma yatama hakuloñesha kwaYehova? Tañenu Yishimu 14:15, kuhiñahu hanjekenu hanilu lwihu:
Muloñadi chitwatela kwikalila asoñama nakubula kukuhwelela yuma yejima yitukutiya?
Tañenu 2 Yowanu 9-11, kuhiñahu hanjekenu hanawa malwihu:
Yumanyi yitwatela kwila nawakakusekesha?
Hela chakwila hitwadikundaña nawakakusekeshaku, tunateli kudiñija ñahi muntañishilu yawu?
Munakutoñojoka nenu Yehova wukutiya ñahi neyi tutiyililaña kuyuma yatama yinakuhoshawu hadi yena hela hakuloñesha kwindi?
4. Twalekenuhu kwikala ashinshika kudi Nzambi hela chakwila manakwetu nakoñi nshidi
Neyi twiluka netu muntu wamuchipompelu nakoñi nshidi yahamesu bwi-i, chumanyi chitwatela kwila? Talenu chishina chamuNshimbi jaNzambi jayinkeliwu aIsarela. Tañenu ALevi 5:1.
Neyi chinashimuniwu muniyi vasi, neyi twiluka netu muntu nakoñi nshidi yahamesu bwi-i, twatela kuyilejamu akulumpi yuma yituneluki. Henohu kanda tuyileji, chinateli kuwaha kumuleja muntu wunakoñi nshidi kuya nakuyileja akulumpi nshidi yinakoñiyi. Neyi nakañanyi kuyilejamu, kashinshi ketu kudi Yehova kakutuletesha kuleja akulumpi yuma yituneluki. Kwila mwenimu kukumwekesha ñahi nawu twakeña . . .
Yehova Nzambi?
muntu wunakoñi nshidi?
antu amuchipompelu?
Neyi mukwenu mukakwitiya wudi nakukala, mukwashenu!
5. Fumenu mudi Babiloni Muneni
Tañenu Luka 4:8 niChimwekeshu 18:4, 5, kuhiñahu akulenu awa malwihu:
Komana ijina dami dichidi kumwekesha nawu nichidi membala wamukudifukula kwakutwamba?
Komana nekala mwizanvu dazatilaña hamu nakudifukula kwakutwamba?
Komana mudimu wunazataña wakwashaña kudifukula kwakutwamba?
Kudihu yuma yinatela kuleka muchihandilu chami munadibombeli kudifukula kwakutwamba?
Neyi hanawa malwihu hadi lwinnakuli nami eña, yumanyi yinatela kwila?
Muyuma yejima, fuukulenuhu yuma yikuyikwasha mutwalekihu kwikala nachinleji chamuchima chitooka nawa yikumwekesha nawu mwashinshika kudi Yehova.
Munateli kwila ñahi neyi akakudifukula kwakutwamba ayileja nawu muhani yawaana yamali akukwasha atuzweñi?
AMAKWAWU AHOSHAÑA NAWU: “Inakukeña kwiluka chinakuhoshawu akakusekesha hadi aYinsahu jaYehova kulonda nihakwiliku chalala.”
Komana chachiwahi kwila mwenimu? Muloñadi?
YUMA YIMUNADIZI
Hakwila twikaleña ashinshika kudi Yehova, twatela kutondolwela kudikunda nawantu anateli kutuluwañesha. Twatela cheñi kuleka kwila yuma munabombeli kudifukula kwakutwamba.
Kuhitulukamu
Muloñadi chitwatela kubulila kutiyilila kunsañu yawakakusekesha?
Neyi twiluka netu manakwetu hela muhela nakoñi nshidi yeneni, chumanyi chitwatela kwila?
Tunateli kwovwahila ñahi kusoñamisha kwakufuma mukudifukula kwakutwamba?
ILUKILENUHU NSAÑU YIKWAWU
Ilukenu chimwatela kwila neyi kudi antu anakutaandisha nsañu yakutwamba hadi aYinsahu jaYehova.
“Komana Mukweti Wunsahu Walala?” (Kaposhi Kakutalila, August 2018)
Munateli kwiluka ñahi mazanvu hela nyidimu munabombeli Babiloni Muneni?
Yumanyi yineliwu akakusekesha amakwawu hakwila azeyeshi chikuhwelelu chetu?
Muchibaaba chinakwila nawu “Nadiña nakumukeñakeña Nzambi kufuma kuwansi wami,” talenu kapristu wawaShinto chafuminiyi mukudifukula kwakutwamba.
“Bayibolu Yahimpaña Yihandilu Yawantu” (Kaposhi Kakutalila, July 1, 2011)