“Kuhosha Kwenu Kwikali . . . Kwakutoweja naMuñwa Mafuku Ejima”
1. Indi ‘kutoweja nhoshelu yetu namuñwa’ chalumbulukadi?
1 “Kuhosha kwenu kwikali naluwi, kwakutoweja namuñwa mafuku ejima, kulonda mwiluki mwakwakwila antu ejima.” (Kol. 4:6) Kutoweja nhoshelu yetu namuñwa chinakulumbulula kusakula mazu amawahi nikuhosha munjila yinateli kuleñela yuma yitunakuhosha kuyiteja kudi muntu yitunakuhosha nindi. Chalema nankashi kukoña mwenimu hampinji yitunakushimwina.
2. Indi Yesu watwesheli ñahi kumushimwina mumbanda kaSamariya?
2 Chakutalilahu chaYesu: Hampinji yanookeleñayi Yesu kukamwihi neshima, watachikili kuhosha namumbanda kaSamariya wenjili nakutaha menji. Hampinji yahanjekeleñawu, kakavulu iwu kaSamariya wahosheleña hakuhelañana kwadiñaku hampinji yayilehi hakachi kawaYudeya nawaSamariya. Wahosheli cheñi hayuma yakuhwelelayi nindi aSamariya afumini kuchikota chaYakoba, ilaña aYudeya ahosheleña nawu aSamariya afumini kuchikota chawantu abulili kwikala aYudeya. Chatela yamutadikishi, Yesu wahosheli munjila yayiwahi. Chuma chafuminumu watwesheli kumuleja nsañu yamukwashili niamayala amumusumba.—Yow. 4:7-15, 39.
3. Tunateli kwimbujola ñahi chakutalilahu chaYesu hampinji yitudi mumudimu wakushimwina?
3 Hampinji yitunakushimwina twatela kusha muyitoñojoka chikonkwanyi chetu chakushimwina “nsañu yayiwahi yayuma yakuluñisha.” (Rom. 10:15) Tunakukeña kumuleja mwiniitala nsañu yayiwahi nawa yakukolesha kufuma muBayibolu, bayi kuhosha neyi kwiji tunakuhisha yuma yakuhwelelayuku. Neyi nahoshi mwaluwa, hitwatela kutena yiluwa yindi mukunyakashana nawa chakubula kalemeshaku. Komana haduhu yuma yinahoshiyi yitunateli kwiteja hela kuzatisha hamu neyi chuma chakumuhamekelahu chikupuku? Hadaha tunateli kutachika kuhosha hansona kuhitila mukwila netu, “Mwatoñojokahu dehi hanichi chuma nenu chalala?”
4. Chumanyi chitwatela kwila neyi mwiniitala nakuhosha mwakasawuntu?
4 Indi neyi mwiniitala nakuhosha mazu akasawuntu hela neyi nakukeña hohu kutadika? Twatela kutwalekahu kumwekesha kuwunda nikwovwaha muyililu nimunhoshelu yetu. (2 Tim. 2:24, 25) Neyi muntu nakaani nsañu yaWanta, chachiwahi kumushiya munjila yayiwahi.—Mat. 7:6; 10:11-14.
5. Yakufumamwinyi yayiwahi yamweniyi muhela wumu hamuloña wakwakula mukuwunda?
5 Yakufumamu Yayiwahi: Muhela wumu chesekeliyi kumushimwina ntuñi nindi, mumbanda yeniwu wahilili nakutachika kumuhoshola nikumushiña muhela. Muheletu wahosheli mukuwunda nindi: “Ñanakenuku hakukuhilisha. Mushaluhu chiwahi mwani.” Chimwahitili nyilungu yiyedi ona mumbanda wayili nakudondomwena kuchenzelu chamuhela nakudanakena, nawa wahosheli nindi wakeñeleña kutiyilila kunsañu yakeñeleña kumulejayi muhela. Kwakula munjila yayiwahi kakavulu mwafumaña yuma yayiwahi!—Yish. 15:1; 25:15.
6. Muloñadi chichalemena kuzatisha nhoshelu yakutoweja namuñwa mumudimu wakushimwina?
6 Fwilenuña kuzatisha nhoshelu yakutoweja namuñwa hampinji yimunakushimwina nsañu yayiwahi. Hela chakwila mwiniitala hanakukeña kutiyililaku, nateli kukeña kutiyilila hampinji yikwawu yakamwendelawu aYinsahu jaYehova hetala dindi.