Dizishenu Anyanenu Ekali Akwakushimwina
1. Indi mukanda waMasamu 148:12, 13 wayikonkomwena anvwali akwaKristu kwila chumanyi?
1 Yehova wayilejaña atwansi kumuhameka. (Mas. 148:12, 13) Dichi, anvwali akwaKristu atela kuzata yuma yayivulu kubidika hakuyitañisha hohu anyanawu nsañu yalala yamuBayibolu ninshimbi jajiwahi jaNzambi. Ayidizishaña cheñi kwikala akwakushimwina nsañu yayiwahi. Anateli kuyidizisha ñahi chovu-chovu?
2. Indi chakutalilahu chachiwahi chawanvwali chinateli kuyikwasha ñahi anyana?
2 Kwimika Chakutalilahu Chachiwahi: Nsompeshi Gideyona wayilejeli antu jindi 300 nindi: ‘Dizenu kuhitila mukuntalami.’ (Ansomp. 7:17) Anyana ekala nachaaku chakutala anvwali jawu nikuyimbujola. Tata yawantu wumu wazataña nawufuku, chafuntayi kwitala haMposu nantentemena wakamaña wanyi, ilaña wayaña nakushimwina nawanyanindi hela chakwila nazeyi. Wayidizishaña anyanindi chakubula kuhosha nindi mudimu wakushimwina walema. (Mat. 6:33) Komana anyanenu ayimonaña chimwazataña namuzañalu nyidimu yashiyashana yakundama kukudifukula yidi neyi kulomba, kutaña Bayibolu, kuhoshahu hampinji yakupompa, nikushimwina? Kafwampi himukutwesha kwimika chakutalilahu chasweja kuwahaku. Neyi anyanenu amona chimwadikitaña hakumukalakela Yehova, akutiyililaña chikupu chimukuyidizishaña nenu adifukuleña kudi Yehova.—Kuhit. 6:6, 7; Rom. 2:21, 22.
3. Indi anvwali anateli kwimikila anyanawu yikonkwanyinyi yakuspiritu yatela kushikijawu chovu-chovu?
3 Yikonkwanyi Yakushikija Chovu-chovu: Anvwali azataña nañovu hakudizisha anyanawu kwenda, kuhosha, kuvwala nikwila yuma yikwawu. Neyi anyana eluka yuma yayivulu hampinji yinakukulawu, ayimikilaña cheñi yikonkwanyi yikwawu. Neyi anvwali hiyakwaKristu, akwashaña anyanawu kwimika nikushikija yikonkwanyi yakuspiritu kwesekeja nayaaka niwuswa wukwetuwu. (1 Kor. 9:26) Komana munakudizisha anyanenu kuhoshahu hakupompa chakubula kutaña chakutaña nikuloñesha jimpanji jamuShikola yaMudimu waTeokalatiki? (Mas. 35:18) Munakuyidizisha kuzata munjila jashiyashana jakushimwinamu? Komana munakuyimikila chikonkwanyi chakupapatishewa nikuzata mudimu wampinji yejima? Komana munakuyikwasha kulonda adikundeña nawakwakushimwina adikita nawa amuzañalu atela kuyikolesha?—Yish. 13:20.
4. Indi anyana ahetelañamu ñahi hakwikala nawanvwali atachikaña kuyidizisha kushimwina henohu achidi anyanya?
4 Ñimbi yamasamu wahosheli nindi: ‘Eyi Nzambi, yeyi wunantañishi kufumisha kuwansi wami; kushika nihanu nashimuni nyidimu yeyi yakuhayama.’ (Mas. 71:17) Tachikenu kudizisha anyanenu kwikala akwakushimwina henohu achidi anyanya. Chikuku chakuspiritu chimukuyikwasha kwala chikayikwasha chikupu neyi anakuli dehi.—Yish. 22:6.