Lemeshenu Mudimu Wakushimwina
1. Indi antu amavulu mukaayi amonaña ñahi mudimu wetu wakushimwina?
1 Antu amavulu mukaayi kaSatana amonaña mudimu wetu wakushimwina nawu “hiwusupi.” (1 Kor. 1:18-21) Neyi tubula kushaku kashinshi, iyi yitoñojoka yaluwa yinateli kutuzeyesha nawa tukufunta hanyima. (Yish. 24:10; Isa. 5:20) Yumanyi yatuleñelaña kulemesha kukooleka kwetu kwakwikala aYinsahu jaYehova?—Isa. 43:10.
2. Muloñadi mudimu wakushimwina chawutenenañawu nawu “mudimu wajila”?
2 “Mudimu Wajila”: Kapostolu Pawulu wateneni mudimu wetu wakushimwina nindi ‘himudimu wajila.’ (Rom. 15:15, 16) Indi mudimu wakushimwina wekala “mudimu wajila” munjilanyi? Kuzata iwu mudimu kwatuleñelaña kwikala ‘akwakukalakala hamu’ ‘naWajila,’ Yehova nawa kwaleñelaña kujilika ijina dindi. (1 Kor. 3:9; 1 Pet. 1:15) Yehova wamonaña mudimu wetu wakushimwina nindi ‘himulambu wakumuhameka,’ dichi mudimu wakushimwina hichuma chalema hama mukudifukula kwetu.—Heb. 13:15.
3. Chumanyi chaletesha mudimu wakushimwina nsañu yayiwahi wikali walema chikupu?
3 Antu antesha hohu diwu ekala nakukooleka kwakweni kwakushimwina nsañu yayiwahi. Añelu atela kutiya kuwaha kuzata iwu mudimu nawa chakadi nikujina anateli kuwuzata chiwahi chikupu. (1 Pet. 1:12) Hela chochu Yehova watutonda etu antu abula kuwanina, “nsaba jamawumba” kulonda tuzati iwu mudimu walema.—2 Kor. 4:7.
4. Tunateli kumwekesha ñahi netu twalemesha mudimu wakushimwina?
4 Mudimu Wutwasweja Kulemesha: Muloña wakwila twalemesha kukooleka kutukweti, twamonaña mudimu wetu wakushimwina netu ‘hichuma chabadika kulema’ muchihandilu chetu. (Fwi. 1:10) Dichi twatanjika ndandanda yakuzata iwu mudimu mulungu nimulungu. Mukwakwimba tumina walemesha mudimu windi wembaña nezaza daya mpuhu mukaayi wadiloñeshaña mpinji yejima neyi anakuya nakwimba nawa wazataña nañovu kulonda yelukishi mudimu windi. Chochimu, twadiloñeshaña henohu kanda tuyi mumudimu wakushimwina kulonda ‘tulumbululi izu dansañu yalala chachiwahi,’ nawa twafwilaña ‘kwiluka kutañisha.’—2 Tim. 2:15; 4:2.
5. Hinyi walemesha mudimu wetu wakushimwina?
5 Bayi mwiteja yitoñojoka yawantu amavulu yiyizeyeshi. Anukenu nenu kuchidi antu amavulu mwiluña detu dakushimwina anakukeña kuyishimwina. Hela chochu hitwakeñaña kutuhameka kudi antuku. Ilaña twalemesha chikupu kwikala nawuselewa waYehova nawa walemesha nankashi chitwamuzatilaña nañovu.—Isa. 52:7.