Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
SEPTEMBER 3-9
YUMA YALEMA YAMWIZU DANZAMBI | YOWANU 1-2
“Yesu Nakoñi Chihayamisha Chatachi”
(Yowanu 2:1-3) Nawa hefuku damuchisatu, muKana yamuÑaliliya mwadiña chawija chawulu, mama yaYesu wadiña kwoku. 2 Yesu niatumbanji twindi niwena ayitambikili kunochu chawija chawulu. 3 Chelili vinyu yinashali dehi yantesha, mama yaYesu wamulejeli nindi: “Hiyakweti vinyuku.”
Kristu—Ñovu yaNzambi
Yesu wakoñeli chihayamisha chindi chatachi, hachawija chadiña kuKana wamuÑaliliya. Hadaha kwayili enyi amavulu kubadika akuhweleleluwu. Hela chochu, vinyu yamanini. Hakachi kawenyi ayili, hadiña niMariya mama yaYesu. Chakadi nikujina, hayaaka yayivulu watoñojokeleña chikupu hayikaninu yejima yawuprofwetu wahosha hadi mwanindi, welukiliyi nindi akamutena nawu “Mwana kaMukwakubadika Mwiwulu.” (Luka 1:30-32; 2:52) Komana wakuhweleli nindi Yesu wukweti ñovu yabuliliyi kumwekeshayi? Chamwekana hatooka to-o nawu Mariya naYesu atiyilili wushona antu adisumbwileña muKana nawa akeñeleña nawu awa antu abuli kutiya nsonyi. Yesu welukili nindi wateleleli kumwekesha chisambu. Dichi wabalumwini muchihayamisha kwakwihi namalita 380 amenji nakwikala “vinyu yayiwahi.” (Tañenu Yowanu 2:3, 6-11.) Komana Yesu wateleleli kwila ichi chihayamisha? Inehi. Wadiña hohu nakwakamena antu nawa wamwimbujoleli Tata yindi wekala mwiwulu hakwikala nachililu chakuhana.
(Yowanu 2:4-11) Ilaña Yesu wamulejeli mama yindi nindi: “Indi eyi nanami ichi chuma chinatukundami ñahi? Mpinji yami kanda yishiki.” 5 Mama yindi walejeli owu azatileña nindi: “Mwili chuma chejima chikuyilejayi.” 6 Dichi kwadiña nsaba jamalola 6 jamenji jatentekeliwu kwenoku kwesekeja nanshimbi jawaYudeya jakuditookesha nachu, nsaba hinsaba yenzeleña nayesekelu yamenji yiyedi hela yisatu. 7 Yesu wayilejeli nindi: “Inzeshenu oju nsaba namenji.” Dichi ajinzesheli kushika nihanyivumbu. 8 Kuhiñahu, yena wayilili nindi: “Tehunenumu, twalenu kudi mukulumpi wamawija.” Dichi atwalili. 9 Mukulumpi wamawija chatompeliyi menji abalumwiniwu kwikala vinyu, chakadi kwiluka kuyafumini (hela chakwila owu akwakuzata atehwini menji elukili), mukulumpi wamawija watambikili kalemba 10 nakumuleja nindi: “Muntu wejima wasambilaña kwidisha vinyu yayiwahi, nawa neyi antu anatambikiyi anasheti dehi, wayinkaña vinyu yatama. Ilaña eyi wunahembi vinyu yayiwahi kushika niyinu mpinji.” 11 Ichi chihayamisha chakoñeliyi Yesu muKana yamuÑaliliya, dichadiña chakutachikilahu hayihayamisha yindi, wamwekesheli kulema kwindi nawa atumbanji twindi amukuhweleleli.
jy 41 ¶6
Nakoñi Chihayamisha Chatachi
Ichi dichihayamisha chatachi chakoñeliyi Yesu. Atumbanji twindi amaha chamweniwu ichi chihayamisha, amukuhweleli chikupu. Kufumahu, Yesu, mama yindi, niamanakwindi akuwanamu ayili kumusumba waKaperinamu kukabeta kasumbwañesha mujika naluwunda kachikumu chaKaluñalwiji kaÑaliliya.
Kukeña Yuma Yalema yakuSpiritu
(Yowanu 1:1) Hakutachika kwadiña Izu, odu Izu dadiña naNzambi, nawa odu Izu dadiña nzambi.
Chakutalilahu, talaku chinatwalekihu Yowanu kusoneka mukapetulu 1, vasi 18: “Hikwekala muntu wamonahu dehi [Watwesha yejima] Nzambuku.” Hela chochu, antu amumona dehi Yesu, Mwana, muloña Yowanu wahosheli nindi: “Izu [Yesu] dabalumukili kwikala muntu; washakamini mukachi ketu, hitukubanjila lubanji lwakulema kwindi.” (Ywn:14, KJ) Indi dinu, Mwana natweshi kwikala ñahi nambadi yaNzambi Watwesha yejima? Yowanu wahosheli cheñi nindi Izu dadiñi ‘naNzambi.’ Indi muntu natweshi kwikala ñahi hamu namuntu mukwawu nawa hampinji yoyimu yekali yowenowu muntu? Kubombelahu, neyi chasonekawu haYowanu 17:3, Yesu wamwekesha hatoka to-o chambu chidi hadi yena naTata yindi wamwiwulu. Wamutena Tata yindi nindi “Nzambi walala wumu hohu.” Kwakwihi nakumanisha Nsañu yindi yayiwahi, Yowanu hakunkulula nakuhosha nindi “Yeniyi anayisoneki kulonda mwitiyi nenu Yesu diyi Kristu, Mwana kaNzambi.” (Yowanu 20:31) Ilukenu nenu Yesu anamuteni nawu Mwana kaNzambi, bayi neyi Nzambiku. Iyi nsañu yikwawu yinashimuniwu muNsañu yayiwahi yaYowanu yamwekeshaña chatelela kutiyisha Yowanu 1:1. Yesu, Izu, “hinzambi” munjila yakwila wukweti chifulu cheneni ilaña hesekana hamu naNzambi Watwesha yejimaku.
(Yowanu 1:29) Ifuku dalondelelihu, wamweni Yesu nakwinza kwadiñayi, dichi yena wahosheli nindi: “Talenu, Mwana kaMukoku waNzambi owu wafumishaña nshidi yakaayi!
nwtsty nsañu yakudiza yidi ha Ywn 1:29
Mwana kaMukoku waNzambi: Chelili Yesu napapatishewi dehi nawa nafumi dehi kwamwesekeliwu kudi Diyabolu, Yowanu Mupapatishi wamuteneni Yesu nindi “Mwana kaMukoku waNzambi.” Awa mazu ekala hohu haniyi nsona niha Ywn 1:36. (Talenu sgd chibalu 4.) Chinateleli kumwesekeja Yesu namwana kamukoku. MuBayibolu yejima, mwekela nsañu yamwekeshaña nawu nyikoku ayilambwileña hakwanakeña nshindi nihakumusolomoka Nzambi. Chumichi chadiña nakwimenaku mulambu waYesu wahaniniyi hampinji yahaniniyi wumi windi wawanina kukola antu. Mazu akwila nawu “Mwana kaMukoku waNzambi” anateli kwimenaku nyikuku yamazu yayivulu muNsona jonenewa. Chineli Yowanu Mupapatishi welukili Nsona jachiHeberu, mazu asonekeliyi atela akundamini kuniyi nyikuku yamazu yinalondelihu: chizamba chamukoku chalambwiliyi Abarahama chatela yalambuli mwanindi weyala Isaka (Kut 22:13), mwana kamukoku wahaChipandakenu wajahiliwu muEjipitu kulonda aIsarela ayikuli muwunduñu (Kwi 12:1-13), hela mwana kamukoku wahachipandakenu walambwileñawu hakameña kaNzambi muYerusalema nabudidi nimelela (Kwi 29:38-42). Yowanu watela watoñojokeleña hawuprofwetu waIsaya, wahosha hadi owu atenayi Yehova nindi “kambuñami” nawa wahosha cheñi nawu “akutwalawu nakujaha neyi chamwenañayi mukoku.” (Isa 52:13; 53:5, 7, 11) Kapostolu Pawulu hasonekeleliyi akwaKorinda mukanda, wateneni Yesu nindi “mwana kamukoku wetu waChipandakenu.” (1Ko 5:7) Kapostolu Petulu wateneni Kristu nindi “mashi alema wuseya, adi neyi amwana kamukoku wakadi wufwayi.” (1Pe 1:19) Nawa kubadika mapampa 25 mumukanda waChimwekeshu, Yesu alemeshawu amutena muchifwikija nawu “Mwana kaMukoku.”—Chakutalilahu: Chi 5:8; 6:1; 7:9; 12:11; 13:8; 14:1; 15:3; 17:14; 19:7; 21:9; 22:1.
Kutaña Bayibolu
(Yowanu 1:1-18) Hakutachika kwadiña Izu, odu Izu dadiña naNzambi, nawa odu Izu dadiña nzambi. 2 Yeniwu wadiña naNzambi hakutachika. 3 Yuma yejima ayileñeli kuhitila mudi yena, nawa kwosi chuma nichimu chaleñeliwu chakadi kuhitila mudi yenaku. Chuma chaleñeliwu 4 kuhitila mudi yena hiwumi, nawa iwu wumi wadiña chejeji chawantu. 5 Chejeji chenichi chinakutoñeka mumwidima, ilaña mwidima wunakañanyi kujima chejeji chenichi. 6 Kwadiña muntu atemesheliwu kwikala mukwakumwimenaku Nzambi; ijina dindi wadiña Yowanu. 7 Iwu muntu wenjili nakwikala chinsahu hakwila nawu yashimuni nsañu yachejeji, kulonda antu ejima akuhweleli kuhitila mudi yena. 8 Yena hadiña ochu chejejiku, ilaña wenjili nakushimuna oyu nsañu yachejeji. 9 Chejeji chalala chatoñekelaña antu ejima chadiña kwakwihi nakwinza mukaayi. 10 Yena wadiña mukaayi, nawa kaayi akileñeli kuhitila mudi yena, ilaña kaayi hikamwilukiliku. 11 Wenjili mumukala wawu, ilaña antu jindi hiyamwitejeliku. 12 Hela chochu, antu ejima amutambwilili wayinkeli wuswa wakwikala anyana kaNzambi, muloña akuhweleleli mwijina dindi. 13 Nawa wenawa antu hiyavwalikili kumashi hela kumujimba hela kunkeñelu yatata yawantuku, ilaña avwalikili kudi Nzambi. 14 Dichi, Izu dekalili himuntu nawa washakamini mukachi ketu, twamweni kulema kwindi, kulema kwatambwilaña mwana wumu hohu kufuma kudi tata yindi; nawa wadiña naluwi lwasweja nichalala. 15 (Yowanu washimwini wunsahu kutalisha hadi yena, wabidikili nindi: “Iwu diyi ona inahoshelihu nami, ‘Owu wunakwinza hanyima yami wambadika ami, muloña yena wadiñaku dehi henohu ami kanda niikaliku.’”) 16 Hamuloña wakwila wadiña naluwi lwasweja, dichi ninetu nawa twatambwiliku luwi lwasweja. 17 Muloña wakwila Nshimbi ayihanini kuhitila mudi Mosi, ninilu luwi lwasweja nichalala jenjili kuhitila mudi Yesu Kristu. 18 Kwosi muntu wamumonahu dehi Nzambi; chiña mwana wumu hohu owu wekala nzambi wudi kukabadi kaTata yindi, diyi Wunamulumbululi.
SEPTEMBER 10-16
YUMA YALEMA YAMWIZU DANZAMBI | YOWANU 3-4
“Yesu Nashimwini Mumbanda kaSamariya”
(Yowanu 4:6, 7) Kafwampi, kwenoku dikwadiña niishima daYakoba. Yesu wazeyeli nankashi nalwendu, dichi washakamini heshima. Mpinji yadiña kwakwihi naora yamu 6. 7 Mumbanda kaSamariya wenjili nakutaha menji. Dichi Yesu wamwilili owu mumbanda nindi: “Nyinkihu menji akunwa.”
nwtsty nsañu yakudiza yidi ha Ywn 4:6
wazeyeli nankashi: Aha dihiyahosha hohu muNsona nawu Yesu “wazeyeli.” Yadiña 12:00 yamwaana, nawa nantetemena Yesu wendeli kufuma kuChinekineki chaYodani muYudeya nakuya kumusumba waSika muSamariya, hekala makilomita 900 (3,000 ft) hela kubadikahu.—Ywn 4:3-5; Talenu sgd chibalu 4.
(Yowanu 4:21-24) Yesu wamulejeli nindi: “Nkuhweleli eyi mumbanda, muloña mpinji yinakwinza yimwakabula kudifukula kudi Tata hayinu mpidi hela muYerusalema. 22 Enu mwadifukulaña kuchuma chimwabula kwiluka; ilaña etu twadifukulaña kuchuma chitweluka, muloña wamwinu wenjila kuhitila mudi aYudeya. 23 Hela chochu, mpinji yinakwinza, nawa yinashiki dehi, oyu akwakudifukula alala yakadifukulañawu kudi Tata muspiritu nimuwalala, muloña Tata nakukeña antu adi neyi awa kulonda adifukuleña kudi yena. 24 Nzambi hiSpiritu, dichi ejima adifukulaña kudi yena, atela kudifukula muspiritu nimuwalala.”
(Yowanu 4:39-41) ASamariya amavulu afumini mumusumba amukuhweleleli muloña wamazu ashimwiniyi owu mumbanda nindi: “Wanleja yuma yejima yinakoñeli.” 40 Dichi aSamariya chenjiliwu kudi yena, amulembeleleli nawu yashakami nawu, nawa washakamini nawu kwenoku mafuku ayedi. 41 Chafuminimu, antu amavulu akuhweleleli muloña wayuma yahosheliyi,
Kukeña Yuma Yalema yakuSpiritu
(Yowanu 3:29) Muntu wejima wukweti kankaña hikalemba. Ilaña ibwambu dakalemba neyi yemana nakutiya chinakuhoshayi, wazañalalaña nankashi hakutiya izu dakalemba. Dichi, muzañalu wami wunasweji chikupu.
nwtsty nsañu yakudiza yidi ha Ywn 3:29
ibwambu dakalemba: Mumpinji yamuBayibolu, ñimenu diyi wadiña nakumwimenaku kalemba nawa diyi watanjikileña yuma yejima yawulu. Diyi wayisumbwishileña. Hefuku dachawija, ejima anakutwalaku anakudisumbula ashikileña hetala dakalemba hela hetala dawatata yindi, hekalilileña chawija. Hampinji yachawiija, ibwambu dakalemba watiyileña kuwaha chatiyayi izu dakalemba chinakuhoshayi nakankaña, muloña ibwambu dindi welukileña nindi namanishi dehi mudimu windi. Yowanu Mupapatishi wadesekejeli yomweni kudi “ibwambu dakalemba.” Muniyi nsona, Yesu diyi wadiña kalemba nawa atumbanji twindi emeneneñaku kankaña wachifwikija. Hakumuloñeshela njila Mesiya, Yowanu Mupapatishi wayilejeli antu atachi mwizanvu ‘dakalemba’ nindi iwu diyi Yesu Kristu. (Yow 1:29, 35; 2Ko 11:2; Efw 5:22-27; Chi 21:2, 9) Chineli wadiña “ibwambu dakalemba,” Yowanu wamanishili mudimu windi. Kuhiñahu, mudimu windi walemeni wanyi kubadika mudimu wadi kuzatayi Yesu niatumbaji twindi. Dichi Yowanu wahosheli nindi “Yenowu watela kuyaña hambidi, ilaña ami natela kufuntaña mwishina.”—Ywn 3:30.
(Yowanu 4:10) Yesu wamwakwili nindi: “Neyi weluka chawaana chaNzambi ninowu wunakuleji nindi, ‘Nyinkihu menji akunwa,’ mutenowu wadi kumwihula nawa yena wadi kukwinka menji awumi.”
nwtsty nsañu yakudiza yidi ha Ywn 4:10
menji awumi: Awa mazu achiGiriki ayizatisha hakutena menji anakuhita, menji anakusefuka hakaseloki, hela menji atuta anakukeluka mwishima. Awa menji anambuki namenji amajilu ahembelañawu muchimpaya. Ha Lev 14:5, mazu achiHeberu abalumunawu nawu “menji adi nakuhita” chaya mukwila nawu “menji awumi.” Ha Yer 2:13 ni 17:13, Yehova amushimuna nawu diyi ‘[“nsulu”, hela] kaseloki kamenji awumi,’ chaya mukwila nawu wahanaña menji awumi achifwikija. Yesu hahosheleñayi namumbanda kaSamariya, wazatishili mazu akwila nawu “menji awumi” muchifwikija, ilaña chinakumwekana neyi hatachi ona mumbanda watiyili neyi Yesu wateneneña wowenawa menji.—Ywn 4:11; talenu nsañu yakudiza yidi ha Ywn 4:14.
Kutaña Bayibolu
(Yowanu 4:1-15) Mwanta chelukiliyi nindi aFwarisi anatiyi nawu Yesu nakwilisha nikupapatisha atumbanji amavulu kubadika Yowanu, 2 hela chakwila Yesu hidiyi wapapatishileña antuku, ilaña atumbanji twindi diwu apapatishileña, 3 wafumini muYudeya nakufunta cheñi kuÑaliliya. 4 Hela chochu, wateleleli kuhita muSamariya. 5 Dichi wenjili kumusumba wamuSamariya watenañawu nawu Sika, kwakwihi nampata yaheniyi Yakoba kudi mwanindi Yosefu. 6 Kafwampi, kwenoku dikwadiña niishima daYakoba. Yesu wazeyeli nankashi nalwendu, dichi washakamini heshima. Mpinji yadiña kwakwihi naora yamu 6. 7 Mumbanda kaSamariya wenjili nakutaha menji. Dichi Yesu wamwilili owu mumbanda nindi: “Nyinkihu menji akunwa.” 8 (Haniyi mpinji atumbanji twindi ayili mumusumba nakulanda yakuda.) 9 Owu mumbanda kaSamariya wamwihwili nindi: “Wunakunlombeladi menji akunwa henohu eyi wudi kaYudeya, ami nidi mumbanda kaSamariya?” (Muloña aYudeya hiyatiyañanaña nawaSamariyaku.) 10 Yesu wamwakwili nindi: “Neyi weluka chawaana chaNzambi ninowu wunakuleji nindi, ‘Nyinkihu menji akunwa,’ mutenowu wadi kumwihula nawa yena wadi kukwinka menji awumi.” 11 Owu mumbanda wamulejeli nindi: “Mwanta, hiwukweti chakutahilaku nachu menjiku nawa ishima dakunama. Hanu owu menji awumi wunayifumishi kudihi? 12 Eyi hiwamubadika nkakulula yetu Yakoba, watwinkeli idi ishima mwanwineñayi yena hamu nianyanindi kushilahu niyimuna yindiku, tahindi?” 13 Yesu wamwakwili owu mumbanda nindi: “Muntu wejima wukunwa munawa menji wukutiya cheñi mpwila. 14 Hakwila muntu wejima wukunwa menji inukumwinka, hamba katiya cheñi mpwilaku, muloña menji inukumwinka akwikala mudi yena neyi kaseloki kamenji anakusefuka nakumwinka wumi wahaya nyaaka.” 15 Owu mumbanda wamulejeli Yesu nindi: “Mwanta, nyinkihu owu menji kulonda nibuleña kutiya mpwila hela kwinza mpinji yejima kudinu iluña nakutaha menji.”
SEPTEMBER 17-23
YUMA YALEMA YAMWIZU DANZAMBI | YOWANU 5-6
“Mulodelenu Yesu naNkeñelu Yayiwahi?”
(Ywn 6:9-11) “Kudi iwu kansi weyala wudi namankendi atanu abali nituyishi twanyanya tuyedi. Komana iyi yakuda diyi yikuwanina antu amavulu ñaana?” 10 Yesu wahosheli nindi: “Lejenu antu ashakami hamaseki.” Chelili hadiña matahu amavulu hanodu iluña, amayala ashakamini hamaseki, adiña kwakwihi na 5,000. 11 Yesu wanoneli mankendi, hanyima yakulomba nakusakilila, wayinkeli antu ashakamini kwenoku; welili cheñi mwomumu natuyishi twanyanya nawa antu adiili nakwikuta.
nwtsty nsañu yakudiza yidi ha Ywn 6:10
amayala ashakamini hamaseki, adiña kwakwihi na 5,000: Nsañu yaMatewu hohu diyabombelahu nawu “kushilahu ambanda nianyana anyanya” hakushimuna ichi chihayamisha. (Mat 14:21) Chinakumwekana neyi antu adishiliyi muchihayamisha abadikili 15,000.
(Yowanu 6:14) Antu chamweniwu chihayamisha chakoñeliyi, atachikili kuhosha nawu: “Chalala iwu diyi Kaprofwetu washimwiniwu nawu wakenza mukaayi.”
(Yowanu 6:24) Dichi chamweniwu nawu Yesu hela atumbanji twindi adiña kunodu iluña wanyi, akandamini mumaatu awu nakuya kuKaperinamu nakumukeñakeña Yesu.
nwtsty nsañu yakudiza yidi ha Ywn 6:14
Kaprofwetu: A Yudeya amavulu adiñaku mumafuku aYesu, akuhweleleli nawu kaprofwetu wudi neyi Mosi, ashimunawu ha Kuh 18:15, 18, wukekala Mesiya. Muniyi nsona, mazu akwila nawu wakenza mukaayi atela atalishi kukwinza kwaMesiya. Yowanu hohu diyi wasonekeli yuma yamwekeni yatenawu muniya vasi.
(Yowanu 6:25-27) Chamuwaniniwu mwishinadi dakaluñalwiji, amwihwili nawu: “Rabi, wenza mpinjinyi kunu?” 26 Yesu wayakwili nindi: “Inakuyileja chalala chikupu nami, enu munakunkeñakeña, bayi neyi muloña wakwila mwamona yihayamishaku, ilaña muloña wakwila mwada mankendi nakwikuta. 27 Bayi muzatila yakuda yakisikañaku, ilaña zatilenu yakuda yashakamaña haya nyaaka, oyu yikuyinkayi Mwana kamuntu; muloña iwu diyi atiyañawu kuwaha kudi Tata Nzambi yomweni.”
(Yowanu 6:54) Muntu wejima wadaña mujimba wami nikunwa mashi ami wukweti wumi wahaya nyaaka, nawa nakamusañula hefuku dakukumishaku;
(Yowanu 6:60) Atumbanji twindi amavulu chatiyiliwu chumichi, ahosheli nawu: “Awa mazu akala; hinyi wukuyitiya?”
(Yowanu 6:66-69) Hamuloña wachumichi, atumbanji twindi amavulu afuntili kuyuma yashiliwu nawa alekeli kwendela hamu nindi. 67 Dichi Yesu walejeli apostolu 12 nindi: “Komana ninenu munakukeña kuya tahindi?” 68 Shimona Petulu wamwakwili nindi: “Mwanta, tukuya kudinyi? Eyi yeyi wukweti mazu awumi wahaya nyaaka. 69 Tunakuhweleli nawa tuneluki netu yeyi Wajila Wambala waNzambi.”
nwtsty nsañu yakudiza yidi ha Ywn 6:27, 54
yakuda yakisikañaku . . . yakuda yashakamaña haya nyaaka: Yesu welukili nindi antu amakwawu niatumbanji twindi enjileña kudi yena muloña akeñeleña yuma yakumujimba. Yakuda yakumujimba yakwashaña antu hefuku-hefuku, “yakuda” yekala Mwizu daNzambi yakwashaña antu kushakama haya nyaaka. Yesu walejeli izaza kuzatila . . . “yakuda yashakamaña haya nyaaka,” dikwila nawu, atela kuzata nañovu kulonda afwileña yuma yakuspiritu nikukuhwelela yuma yadizañawu.—Mat 4:4; 5:3; Ywn 6:28-39.
wadaña mujimba wami nikunwa mashi ami: Yuma yahosheleñahu yinakumwekesha nawu antu adaña nikunwa muchifwikija kuhitila mukumukuhwelela Yesu Kristu. (Ywn 6:35, 40) Yesu wahosheli awa mazu mu 32 C.E., dichi wadiña wanyi nakuhosha haKuda kwaMwanta kwaMelela, kwadi kwikalaku henohu kunashali chaaka chimu. Wahosheli awa mazu henohu kanda anakani “Chipandakenu, dikwila nawu chawija chawaYudeya” (Ywn 6:4), dichi antiyilili indi anukili chawija chadiña hambidi nihakulema kwamashi amwana kamukoku azatishiliwu hakupulwisha anyana kaIsarela hawufuku wafumineñawu muEjipitu (Kwi 12:24-27). Yesu wakonkomweneneña nindi mashi indi niwena akakwasha atumbanji twindi kwikala nawumi wahaya nyaaka.
05 9/1 21 ¶13-14
Twakendaña Mwijina daYehova Nzambi Yetu
Hela chochu, izaza damulondeleleña Yesu nawa damuwanini “kwishinadi dakaluñalwiji,” neyi chahosheliyi Yowanu. Muloñadi chamulondeleliwu henohu wakaanini kumwilisha kwikala mwanta? Amavulu amwekesheleña yilwilu yakumujimba, ahosheleña hayakuda yayinkeleñayi Yehova aIsarela muchinkalampata mumafuku aMosi. Dichi atoñojokeleña nawu Yesu wukutwalekahu kuyinka yakuda. Yesu, chelukiliyi yuma yakeñeleñawu, watachikili kuyidizisha chalala chadi kuyikwasha kuhimpa yitoñojoka yawu. (Ywn 6:17, 24, 25, 30, 31, 35- 40) Chafuminimu, amakwawu atachikili kumutobela, sweje-e hampinji yahosheli ichi chishimu: “Inakuyileja chalala chikupu nami, neyi enu kuda mujimba waMwana kamuntu hela kunwa mashi indi nehi, himwakekala nawumiku. Muntu wejima wadaña mujimba wami nikunwa mashi ami wukweti wumi wahaya nyaaka, nawa nakamusañula hefuku dakukumishaku.”—Ywn 6:53, 54.
Kakavulu yishimu yaYesu yamukwashileña kwiluka neyi antu anakufwila chikupu kwenda naNzambi hela nehi. Ninichi chishimu chamukwashili kwiluka. Chaletesheli antu ahoshi yuma yadiña kunyichima yawu. Twatañaña netu: “Atumbanji twindi amavulu chatiyiliwu chumichi, ahosheli nawu: ‘Awa mazu akala; hinyi wukuyitiya?’” Yesu watwalekelihu kuyilumbulwila nindi atela kuya nakukeñakeña mwatalishili mazu ahosheliyi. Wahosheli nindi: “Spiritu diyi yahanaña wumi, ilaña mujimba hiwukweti mudimuku. Mazu innayileji aspiritu nawa diwu ahanaña wumi.” Hela chochu, amavulu hiyatiyiliku nawa iyi nsañu yamwekeshaña nawu: “Hamuloña wachumichi, atumbanji twindi amavulu afuntili kuyuma yashiliwu nawa alekeli kwendela hamu nindi.”—Ywn 6:60, 63, 66.
Kukeña Yuma Yalema yakuSpiritu
(Yowanu 6:44) Kwosi muntu wunateli kwinza kudi amiku, chiña amukoka kudi Tata wantemesheli, nawa nakamusañula hefuku dakukumishaku.
nwtsty nsañu yakudiza yidi ha Ywn 6:44
amukoka: Hela chakwila izu dachiGiriki dabalumwiniwu nawu ‘kukoka’ adizatishileña hakukoka inshi nakaleñi (Ywn 21:6, 11), ilaña datalisha wanyi mukwila nawu Nzambi wakokaña antu hela chakwila hiyanakeñiku. Idi izu dinesekani nadekala haYer 31:3, halejeliyi Yehova antu jindi akunyima nindi: “dichi nakukoki naluwi.” (Septuagint niyena yazatisha izu dodimu dachiGiriki.) Ywn 12:32 yamwekeshaña nawu munjila yoyimu, Yesu wakokeleña antu ejima kudi yena. Nsona jamwekeshaña nawu Yehova wenka antu wuswa wakudifuukwila. Muntu wejima wukweti wuswa wakufuukulahu kumukalakela Nzambi hela nehi. (Kuh 30:19, 20) Nzambi wakokaña chovu-chovu antu akweti nyichima yashinshika. (Ms 11:5; Yis 21:2; Yil 13:48) Yehova welaña mwenimu kuzatisha Bayibolu nispiritu yajila. Wuprofwetu wekala haIsa 54:13, kwafumushiliwu mazu ekala haYwn 6:45, watenaña antu akokañawu kudi Tata.—Esekejenu Ywn 6:65.
(Yowanu 6:64) Ilaña mukachi kenu mudi amu abulaña kukuhwelela.” Muloña Yesu welukili kufuma kukutachika antu abulili kukuhwelela nimuntu wamba kamufukejela.
nwtsty nsañu yakudiza yidi ha Ywn 6:64
Yesu welukili . . . muntu wamba kamufukejela: Yesu wateneneña Yudasi Isakaroti. Yesu walombeli kudi Tata yindi wufuku wejima henohu kanda yatondi apostolu indi 12. (Luk 6:12-16) Dichi hakusambila, Yudasi wadina washinshika kudi Nzambi. Hela chochu, Yesu welukili wuprofwetu wamuNsona yachiHeberu wahosheli nawu akamufukejela kudi ibwambu dindi. (Ms 41:9; 109:8; Ywn 13:18, 19) Chelili Yudasi yatachiki kwila yuma yatama, Yesu, washinshikileña antu mumuchima nimuyitoñojoka, wamweni chumichi. (Mat 9:4) Chineli Nzambi wukweti wuswa wakwiluka yuma yakumbidi, welukili nindi ibwambu daYesu wakuhwelelayi wakamubalumukilamu. Ilaña chaluwa kutoñojoka netu Nzambi wafuukwileñahu dehi chadimu nindi Yudasi diyi wakamufukejela, neyi kwiji Nzambi diyi wamuletesheli yakoñi yuma yatama.
kufuma kukutachika: Awa mazu hiyatalisha kukuvwalika kwaYudasi hela hamutondeliwu kwikala kapostolu, hanyima yakwila Yesu nalombi wufuku wejimaku. (Luk 6:12-16) Ilaña, atalisha kumpinji yatachikili Yudasi kwikala nayilwilu yatama, yashikeneniyi Yesu kwiluka. (Ywn 2:24, 25;Chi 1:1; 2:23; nsañu yakudiza yidi ha Ywn 6:70; 13:11.) Chumichi chamwekeshaña cheñi nawu Yudasi wadiña wafuukula dehi chadimu, bayi neyi washikeneni kuhimpa muchima windiku. Izu dabalumunawu nawu “kutachika” (muchiGriki, ar·kheʹ) muNsona jawakwaKristu jachiGriki adizatishileña munjila yashiyashana kwesekeja nansañu yimunakuhanjekahu. Chakutalilahu, ha 2Pe 3:4, izu ‘dakutachika’ datalisha chekaliliku yileñaleña. Ilaña hahavulu, adizatisha hakutena yuma yashiyashana. Chakutalilahu, Petulu wahosheli nindi spiritu yajila yaholokeleli hadi aJentili “neyi chiyaholokeleli hadi etu hakusambila.” (Yil 11:15) Petulu watalishileña wanyi kumpinji yasemukiliyi hela mpinji yamutambikiliwu kwikala kapostolu. Ilaña, wateneneña ifuku daPentekosta 33 C.E., dikwila nawu, ‘hatachikili’ kuhuñunwinawu spiritu yajila hadi antu kulonda azateña nyidimu yalema. (Yil 2:1-4) Yakutalilahu yikwawu hazatishawu izu dakwila nawu ‘kutachika’ yekala ha Luk 1:2; Ywn 15:27; niha 1Yo 2:7.
Kutaña Bayibolu
(Yowanu 6:41-59) Kuhiñahu, aYudeya atachikili kumutoobela muloña wahosheli nindi: “Yami yakuda yafumini mwiwulu.” 42 Nawa atachikili kudihula nawu: “Komana iwu hidiyi Yesu mwana kaYosefu, wukweti tata yindi nimama yindi itwelukaku? Hanu dinu muloñadi chinahosheliyi nindi, ‘Ami nenzi kufuma mwiwulu’?” 43 Yesu wayakwili nindi: “Lekenu kutooba. 44 Kwosi muntu wunateli kwinza kudi amiku, chiña amukoka kudi Tata wantemesheli, nawa nakamusañula hefuku dakukumishaku. 45 Chasonekewa mumazu awaTuprofwetu nawu: ‘Ejima akayidizisha kudi Yehova.’ Muntu wejima wunatiyilili kudi Tata nikudizishewa kudi yena, wenzaña kudi ami. 46 Kwosi muntu wamumonahu dehi Tataku, chiña hohu wafuma kudi Nzambi; iwu diyi wamumona Tata. 47 Inakuyileja chalala chikupu nami, muntu wejima wukwitiya, wukweti wumi wahaya nyaaka. 48 “Ami yami yakuda yawumi. 49 Ankakulula jenu adiili manina mwisaña, ilaña afwili. 50 Iyi diyi yakuda yafuma mwiwulu, kulonda muntu wejima yadiku nawa yabuli kufwa. 51 Ami yami yakuda yayumi yafumini mwiwulu. Neyi muntu yada iyi ‵yakuda wakashakama haya nyaaka; nawa yakuda yinakahana, himujimba wami wunakahana kukoola mawumi awantu kulonda akahandi.” 52 Kuhiñahu, aYudeya atachikili kuditaadikisha mulwawu, nakuhosha nawu: “Indi iwu muntu nateli kutwinka ñahi mujimba windi nindi tudi?” 53 Dichi Yesu wayilejeli nindi: “Inakuyileja chalala chikupu nami, neyi enu kuda mujimba waMwana kamuntu hela kunwa mashi indi nehi, himwakekala nawumiku. 54 Muntu wejima wadaña mujimba wami nikunwa mashi ami wukweti wumi wahaya nyaaka, nawa nakamusañula hefuku dakukumishaku; 55 muloña mujimba wami hiyakuda yalala, nimashi ami niwena hiyakunwa yalala. 56 Muntu wejima wadaña mujimba wami nikunwa mashi ami, watwalekañahu kudikunda nanami, ninami nawa nadikunda nayena. 57 Neyi chochekalayi Tata wukweti wumi wantemesheli, ninami nawa nikweti wumi muloña waTata, chochimu nawa muntu wejima wadaña mujimba wami niyena wakekala nawumi muloña wanami. 58 Iyi diyi yakuda yafumini mwiwulu. Hiyidi neyi yakuda yadiiliwu ankakulula jenuku, muloña wena afwili. Muntu wejima wadaña iyi yakuda wakashakama haya nyaaka.” 59 Wahosheli yumiyi hampinji yatañishileñayi musinagogi muKaperinamu.
SEPTEMBER 24-30
YUMA YALEMA YAMWIZU DANZAMBI | YOWANU 7-8
“Yesu Wamulemesheleña Tata Yindi”
(Yowanu 7:15-18) Dichi aYudeya ahayamini nakuhosha nawu: “Indi iwu muntu weluka ñahi Nsona henohu yena kanda yayeñahu dehi kumashikola nakudiza?” 16 Yesu niyena wayakwili nindi: “Yuma yinatañishaña yami wanyi, ilaña yanowu wantemesheli. 17 Neyi muntu nakukeña kwila nkeñelu Yindi, wukwiluka neyi yuma yinatañishaña yafumaña kudi Nzambi indi kwiji nahoshaña yitoñojoka yami ami aweni. 18 Muntu wejima wahoshaña yitoñojoka yindi yomweni, wakeñaña kudilemesha; ilaña muntu wejima wakeñaña kulema kwanowu wantemesheli, yeniwu diyi walala nawa mudi yena mwosi yuma yabula kuloña.
“Anasoneki Nawu”
Yesu wakeñeleña antu eluki kwafumineña nsañu yindi. Wahosheli nindi: ‘Ntañishilu yami hiyamami awenuku, yambala yayena wantemesheli.’ (Yowanu 7:16) Mpinji yikwawu wahosheli nindi: “Hinelaña chuma chakanka wamuku, ilaña nahoshaña mazu awa mwomwanlejeluwu kudi Tata.” (Yowanu 8:28) Wahosheli cheñi nindi: ‘Awa mazu nayilejaña, himazu akumuchima wamami awenuku, Tata wanuñañana nanami diyi wakalakalaña nyidimu yindi.’ (Yowanu 14:10) Yesu wamwekesheli walala wanawa mazu kuhitila mukusombolola kapampa kakavulu Izu daNzambi dasonekawu.
Neyi tushinshika nakanañachima mazu aYesu asonekawu amwekeshaña nawu wasombolweli hela kutena kubadika chikunku chanyikanda yaNsona yachiHeberu. Hadaha munateli kuhosha nenu hasombolweli munsona chikupuku. Munateli kujinoka nenu, hayaaka yisatu nachikuku yazatiliyi mudimu wakutañisha nikushimwina hasombolweli munyikanda yonenawu yejima yadiñuku hayina mpinjuku. Hela chochu, hadaha wasombolweli. Ilukenu nenu asoneka hohu nsañu yantesha hamazu ahosheliyi Yesu niyuma yeliliyi. (Yowanu 21:25) Kafwampi munateli kutaña mazu aYesu ejima asonekawu mumaora antesha hohu. Hanu dinu toñojokenu chumichi, Yesu wahosheli hadi Nzambi nihaWanta windi mumaora antesha nawa hampinji yoyimu wateneni nyikanda yaNsona yachiHeberu kubadika hachikunku. Kubombelahu, Yesu havulileña kwikala nanyivuñiluku. Hampinji yahosheliyi Mpanji yindi yahaMpidi yaya mpuhu, wasombolweli nikutena nsañu yayivulu yekala muNsona yachiHeberu yahembeleliyi kumutu.
(Yowanu 7:28, 29) Dichi Yesu chadiña nakutañishayi mutembeli, wabidikili nindi: “Mwañiluka nawa mweluka ninoku kunafuma. Hinadinjilili ami aweniku, ilaña Owu wantemesheli walala nawa himwamwilukaku. 29 Ami namwiluka, muloña nidi ñimeni yindi, nawa Yenowu diyi wantemesheli.”
(Yowanu 8:29) Nawa Owu wantemesheli wudi nanami; hanlekeli kankawamiku, muloña mpinji yejima nelaña yuma yamutiyishaña kuwaha.”
Tambulenu Spiritu yaNzambi, Bayi Yampata Yamunu Mwishinaku
Mwovwahilenu Yehova namuchima wejima. Mpinji yejima Yesu welileña yuma yamuzañalesheleña Tata yindi. Mpinji yimu, kukala kwamweniyi Yesu kwaleñeleli chimukalili kwila chuma chakeñeleñayi Tata yindi. Ilaña, Yesu wamulejeli chikupu Tata yindi nindi: “Bayi ela munakeñamuku, chiña muwunakeñeyi.” (Luka 22:42) Dihulenu nenu, ‘Komana namwovwahilaña Nzambi hela chakwila chakala kumwovwahila?’ Kumwovwahila Nzambi kwalema mukuhanda kwetu. Chineli diyi Nleñi, Nsulu yawumi wetu nawa diyi Wawuhembaña, twatela kumwovwahila chikupu. (Mas. 95:6, 7) Kwosi wacheñi wutwatela kwovwahila. Hitunateli kutambwila wuselewa waNzambi chakadi kumwovwahilaku.
Kukeña Yuma Yalema yakuSpiritu
(Yowanu 7:8-10) “Enu kandukenu muyi kuchawija; ami hinukutwesha kuya kunichi chawijaku, muloña mpinji yami kanda yishiki chikupu.” 9 Dichi chelili nayileji dehi yumiyi, yena washalili muÑaliliya. 10 Ilaña chelili amanakwindi anakanduki dehi nakuya kuchawija, niyena nawa wakandukili nakuya, bayi hatookaku, ilaña mukuswamujoka.
Muloñadi Chitwatelela Kuhosha Walala?
Chakutalilahwinyi chemikiliyi Yesu Kristu kutalisha hakutwamba? Hampinji yimu, Yesu wahosheleña nawantu abulili kwikala atumbanji twindi ilaña amwekesheli mpwila yakwiluka ñendelu yindi. Amulejeli nawu “Fumaku kunu yaña kweyi muYudeya.” Indi Yesu wayakwili nindidi? “Enu kwenu yenuña kuchawija [muYerusalema], ami kwami kukanduka kuchawija kanda, muloña mpinji yami kanda yishiki chikupu.” Hashimbwili hohu chantesha, Yesu wayili kuchawija kuYerusalema. Muloñadi chakwililiyi muyina njila? Muloña hiyateleleli kwiluka nsañu yejima yanshakaminu yinduku. Yesu hahosheli wunsahu wamakasuku, hayilejeli wunsahu wejimaku kulonda kukañeshaku wubanji wateleli kumukoñawu yena niatumbanji twindi. Iku hikwadiña kutwambaku, kapostolu Petulu wasonekeli kutalisha hadi Kristu nindi: “Yena havulumwinuku; mukanwa kindi himwadiñi makasuku.”—Yowanu 7:1-13; 1 Petulu 2:22.
(Yowanu 8:58) Yesu wayilejeli nindi: “Inakuyileja chalala chikupu nami, henohu Abarahama kanda yavwaliki, ami nadiña kwoku.”
nwtsty nsañu yakudiza yidi ha Ywn 8:58
ami nadiña kwoku: A Yudeya akeñeleña kumwasa Yesu malola muloña nawu wahosheli nindi yena ‘wamumweni Abarahama,’ henohu Yesu wadiña kanda yashikiji “yaaka 50 yakuvwalika.” (Ywn 8:57) Ñakwilu yaYesu yamwekesheleña nawu wayilejeleña nindi yena wadiña kwoku henohu kanda yavwaliki neyi muntu, wadiña chileñaleña wakuspiritu wañovu mwiwulu henohu Abarahama kanda yavwaliki. Antu amakwawu ahoshaña nawu iyi vasi yamwekeshaña nawu Yesu hiNzambi. Ahoshaña nawu mazu achiGiriki azatishiliwu haniyi vasi akwila nawu, e·goʹ ei·miʹ (abalumunawu nawu “nidi” mumaBayibolu amakwawu), ayifumisha muSeptuagint ha Kwid 3:14 nawa mavasi ejima ayedi atela kuyibalumuna chochimu. (Talenu nsañu yakudiza yidi ha Ywn 4:26.) Hela chochu, muniyi vasi, izu dazatishiliwu dachiGiriki dakwila nawu ei·miʹ datachikili “henohu Abarahama kanda yavwaliki,” nawa datwalekelihu kuzatika. Dichi chashikililimu kubalumuna iyi vasi nawu “ami nadiña kwoku” kubadika “nidi kwoku,” nawa kubalumuna kwakunyima nikwamakonu kunakumwekesha nawu amavulu abalumuna awa mazu nawu “ami nadiña kwoku.” Ha Ywn 14:9, izu dodimu dachiGiriki dakwila nawu ei·miʹ adizatisha cheñi mumazu aYesu ahosheliyi nindi: “Nashakami nanenu hampinji yayilehi, ilaña eyi Fwilipu kuñiluka nehi?” Kubalumuna kwakuvulu kwazatisha izu dodimu, chinakumwekesha nawu izu dakwila nawu ei·miʹ chaya mukwila nawu “ami nadiña kwoku,” anateli kudibalumuna kwesekeja nansañu yimunakuhanjekahu. (Yakutalilahu yikwawu yakubalumuna idi izu dachiGiriki, chidinakuhosha hayuma yamwekeni kunyima hela hayuma yinakumwekana katataka yekala ha Luk 2:48; 13:7; 15:29; Ywn 1:9; 5:6; 15:27; Yil 15:21; 2Ko 12:19; 1Yo 3:8.) Cheñi, mazu aYesu asonekawu ha Ywn 8:54, 55 amwekeshaña nawu hadesekejeleña yomweni naTata yindiku.
Kutaña Bayibolu
(Yowanu 8:31-47) Kuhiñahu, Yesu walejeli aYudeya amukuhweleleli nindi: “Neyi mukutwalekahu kuhemba mazu ami, chalala mudi atumbanji twami, 32 nawa mukwiluka chalala, chalala nichena chikuyifumisha muwuduñu.” 33 Wena amwakwili nawu: “Etu tudi anyana kaAbarahama nawa kanda twikaleñahu dehi anduñu kudi muntuku. Hanu dinu wunahoshelidi neyi, ‘Mukufuma muwuduñu’?” 34 Yesu wayakwili nindi: “Inakuyileja chalala chikupu nami, muntu wejima wakoñaña nshidi, hinduñu yanshidi. 35 Kubombelahu, nduñu hashakamaña mwitala haya nyaakaku; ilaña mwana washakamaña haya nyaaka. 36 Dichi neyi Mwana yayifumisha muwuduñu, mwakafuma muwuduñu chikupu. 37 Neluki nami mudi anyana kaAbarahama. Ilaña munakukeña kunjaha, muloña himwetejaña yuma yinatañishañaku. 38 Ami nahoshaña yuma yinamweni hampinji yinadiña naTata yami, ilaña enu mwelaña yuma yimwatiyaña kudi tata yenu.” 39 Wena amwakwili nawu: “Etu tata yetu Abarahama.” Yesu wayilejeli nindi: “Neyi mwadiña anyana kaAbarahama, mutenowu mwadi kuzataña nyidimu yaAbarahama. 40 Ilaña ichi munakukeña kunjaha, muntu wunayileji chalala chinatiyili kudi Nzambi. Abarahama helili mwenimuku. 41 Enu munakuzata nyidimu yatata yenu.” Wena amwilili nawu: “Etu hitudi anyana amuwujilaku; tukweti Tata wumu, Nzambi.” 42 Yesu wayilejeli nindi: “Neyi Nzambi wadiña Tata yenu, mwadi kunkeña, muloña ami nafumini kudi Nzambi nawa nidi hanu. Hinadinjilili ami aweniku, ilaña Yena diyi wantemesheli. 43 Muloñadi chimunakubulila kutiya yuma yinnakuhosha? Muloña himunakwiteja mazu amiku. 44 Enu mwafuma kudi tata yenu Diyabolu, nawa mwakeñaña kwila yuma yafwilañayi tata yenu. Yeniwu wadiña mukwakujaha antu kufuma hatachikiliyi, nawa hatwalekelihu kwenda muchalalaku, muloña chalala hichekala mudi yenaku. Neyi yahosha mwakutwamba, wahoshaña kwesekeja nachekalayi yomweni, muloña hisakutwamba nawa diyi tata yakutwamba. 45 Ilaña ami nayilejaña enu chalala, hakwila enu himwankuhwelelañaku. 46 Hinyi hakachi kenu wukunkonkolola nindi ami neli nshidi? Neyi nahoshaña chalala, hanu dinu muloñadi chimwabulilaña kunkuhwelela? 47 Muntu wafuma kudi Nzambi watiyililaña mazu aNzambi. Ichi dichayiletishaña enu kubula kutiyilila, muloña himwafuma kudi Nzambiku.”