Munafumi Nsañu Yakuzatisha muChihandiluniMudimu Wanetu AkwaKristu Mukanda waKupompa
NOVEMBER 2-8
YUMA YALEMA YAMWIZU DANZAMBI | KWIDIKA 39-40
“Mosi Wovwahilili Nshimbi Jejima”
(Kwidika 39:32) Dichi mudimu wejima watabanaka yetenti dakubulakena wamanini; anyana kaIsarela elili mwejima mwamulejeluwu Mosi kudi Yehova, dimu mweliluwu.
Komana Yehova Wayiluka?
Kwambukaku, Mosi “wadiñi mwovu nankashi kubadika amayala ejima ekala heseki dejima.” (Kuch. 12:3) Wamwekesheli kwovwaha kwindi nikudizoza kuhitila mukufwila chikupu kulondela wunlomboli waYehova. (Kwid. 7:6; 40:16) Kwosi wunsahu wamwekeshaña nawu Mosi wadiña nakujinooka njila yaYehova yakoñeleleñamu yuma hela nawu wahilili hakulondela njila jamulejeluwu kudi Yehova. Chakutalilahu, Yehova wahanini nshimbi jejima jakulondela hakutuña tabanaka, chidi neyi wulombu wawanda ninaambala yañanda yazatishiluwu hakutuña mahina. (Kwid. 26:1-6) Neyi nkoñi wayilombolaña mukuloñesha kwaNzambi yayileja nshimbi jinakumwekana kukala chikupu, mpinji yikwawu munateli kuhila. Hela chochu, Yehova diyi nkoñi wawanina, wenkaña chikupu ambuñindi nyidimu nawa wayikuhwelela. Kudi yuma yayiwahi yaleñelaña yahaneña nshimbi jajivulu. Ilukenu nenu, Mosi chamwinkeluwu nshimbi jajivulu jakulondela kudi Yehova hahililuku, hamweni nindi Yehova wadiña nakumusawula hela kumukañeshaku. Ilaña, Mosi walejeli antu ‘kwila mwayilejeluwu’ hakulondela nshimbi jaNzambi. (Kwid. 39:32) Mwalala Mosi wadiña wadizoza! Mosi welukili nindi mudimu wadiña wambala waYehova nawa yena amuzatishili hohu hakwila mudimu awuzati.
(Kwidika 39:43) Mosi wamweni mudimu wejima, komana anawili dehi; mwomwalejeliyi Yehova, mwomwenomu hohu dimu mwanawiluwu. Mosi wayikiswilili nkisu.
(Kwidika 40:1, 2) Yehova wahosheli naMosi, 2 nindi, Hefuku datachi dakakweji kakusambila wakatuñi tabanaka yetenti dakubulakena.
(Kwidika 40:16) Dichi cheliliyi Mosi; mwejima mwamulejeluwu kudi Yehova dimu mweliliyi.
w05 7/15 27 ¶3
Komana Mwekala Ashinshika Muyuma Yejima?
Aheberu 3:5 yahosha nawu, “Mosi wadiña nhembi washinshika.” Chumanyi chaletesheli kaprofwetu Mosi kwikala washinshika? Hakutuña nichakuyituña tabanaka Mosi welili “mwejima mwamulejeluwu kudi Yehova dimu mweliliyi.” (Kwidika 40:16) Chineli tudi akwakudifuukula aYehova twamwekeshaña netu twashinshika kuhitila mukumwovwahila neyi tunakumukalakela. Chumichi munabombeli kutwalekahu kwikala ashinshika hela chakwila tukumona kukala indi kwiji kweseka kwakuvulu. Hela chochu, kushinda kweseka kweneni hidichuma hohu chamwekeshaña nawu twashinshikaku. Yesu washimwini nindi: “Muntu wukushinshika muyuma yantesha, wukushinshika nimuyuma yayivulu, nawa muntu wukubula kwikala waloña muyuma yantesha, hakwikala waloña nimuyuma yayivuluku.” (Luka 16:10) Twatela kutwalekahu kwikala ashinshika nimutuyuma twanyanya.
Kukeña Yuma Yalema yakuSpiritu
(Kwidika 39:34) nichifwiku chayitembi yayizamba yanyikoku yakuloomba wulombu wuchinana, nichifwiku chayitembi yamayobu, niihina dakujika hakachi;
it-2 884 ¶3
Yitembi yaMayobu
Chayiwanineñawu kudi aIsarela. Neyi Bayibolu yashimuna mutapu wumu wachitembi atenawu muchiHeberu nawu taʹchash, lwihu ludi lwakwila nawu kudihi kwafumishileñawu aIsarela iyi yitembi yamayobu? Kakavulu mayobu awanikaña kumaluña asweja kututa atenañawu nawu Arctic naAntarctic, mayobu amakwawu akeña kumaluña kutata. Makonu mayobu antesha ashakamaña kukaluñalwiji katenañawu nawu Mediterranean Sea nikumaluña amakwawu kudi menji atata. Hadi yaaka yayivulu yinahitihu antu anajiyishi mayobu amavulu, mumpinji yakunyima awa atunyama adiña amavulu kuMediterranean nimuKaluñalwiji Kachinana. Dikishonali yaEnglish yasonekeliwu mu 1832, yaCalmet Dictionary of the Holy Bible (hefu. 139) yashimwini nawu: “Hatuyitutu twatuvulu twekala kuKaluñalwiji Kachinana, kukamwihi naSinai peninsula kwekala mayobu.” Talenu cheñi mukanda waThe Tabernacle’s Typical Teaching, wasonekeliwu kudi A. J. Pollock, London, ifu. 47.
(Kwidika 40:34) Ivu dabutili itenti dakubulakena wi-i, nikulema kwaYehova kwenzesheli tabanaka.
Komana Mwafwilaña Kwiluka Muntu Wamonaña Mudimu Wenu?
Chamanishiluwu kutuña tabanaka, ivu “dabutili itenti dakubulakena wi-i, nikulema kwaYehova kwenzesheli tabanaka.” (Kwid. 40:34) Chumichi chamwekesheli chikupu nawu Yehova wetejeli tabanaka. Munakutoñojoka nenu Bezaleli niOholiyabi atiyili ñahi hayina mpinji? Hela chakwila majina awu ayibazilili wanyi hayuma yatuñiluwu, atela atiyili kuwaha hakwiluka nawu Nzambi wakiswilili nyidimu yawu. (Yish. 10:22) Muyaaka yalondeleluhu, azañaleli hakumona nawu yuma yatuñiluwu atwalekeluhu kuyizatisha mumudimu waYehova. Chakayisañulawu mwituña dadiha, chakadi nikujina Bezaleli niOholiyabi akatiya kuwaha hakwiluka nawu tabanaka ayizatishili mukudifukula kwalala kwakwihi nayaaka 500.
Kutaña Bayibolu
(Kwidika 39:1-21) Nawuzeeli, nawusombu, nawanda wuchinana nge, atuñili nachu yuma yakuvwala yakutuña chachiwahi yakukalakala nachu mwajila, atuñili nachu niyuma yakuvwala Aroni yajila; mwomwamulejeluwu Mosi kudi Yehova. 2 Watuñili ifwodi nawuru, nawuzeeli, nawusombu, nawanda wuchinana nge, nawanda wawuwahi wakushinta. 3 Wuru awuchilili muwubasa wikali wapepela, awuleñeli hiwukwikala nsambu kulonda awusowi muwuzeeli, nimuwusombu, nimuwanda wuchinana nge, nimuwanda wawuwahi, mudimu wamuntu mukwawukalawenu. 4 Atuñili mahinadu akumafwiji, akunuñila hamu, kunsa jawu jiyedi kwokwadinuñililuwu. 5 Nimuya wakutuña nawukalawenu, wadiñi hewulu, Wakudikasa nachu, wadiñi wakwihina dodimu, Wakutuñila mwomumu, wawuru, nawuzeeli, nawusombu, nawanda wuchinana nge, nawanda wawuwahi, wakushinta; mwomwamulejeluwu Mosi kudi Yehova. 6 Wakalakeli malola atushohama, akupata muwupatilu wawuru, akubaza mwomwabazilañawu ilola dachinjikijilu, mwomwahita majina awanyana kaIsarela. 7 Wayishili hamahina akumafwiji akwifwodi, kulonda ekali malola akwanukila anyana kaIsarela; mwomwamulejeluwu Mosi kudi Yehova. 8 Welili chibwiku chakuvwala hantulu, chadiñi chakukalakala kudi mukwawukalawenu neyi chakalakeluwu ifwodi, chawuru, nawuzeeli, nawusombu, nawanda wuchinana nge, nawanda wawuwahi wakushinta. 9 Chadiñi nambañu jiwana; chibwiku chakuvwala hantulu elili chakuvuña, muwulehi wachu muchikasa chamuntu chakusamanesha, muwihi wachu muchikasa chakusamanesha nawa chakuvuña. 10 Akwatishilumu nyikana yiwana yatumalola; kumukana wumu kwadiñi nidasaridini, nidantopaza, nidakejikeji, diwu mukana wakusambila. 11 Kumukana wamuchiyedi kwadiñi nidaemeraladi, nidakasafira, nidakayahalu; 12 kumukana wamuchisatu kwadiñi nidailishemi, nidaishebu, nidakachelama; 13 kumukana wamuchiwana kwadiñi nidakatarishi, nidakashohama, nidanjasiperi; ayipatili muwuru mwomwakuyipatila mwomwakuyikwatishila. 14 Malola adiñi mwomwekalila majina awanyana kaIsarela, ikumi nayedi, mwomwekalila majinawu; mwomwabazilañawu ilola dachinjikijilu, adiñi anyichidi ikumi nayiyedi, mwomwekalila majinayu, iwu nejina dawu, iwu nejina dawu. 15 Hachibwiku chakuvwala hantulu eliluhu maleñi ayedi neyi nyonji, yakuyinda yakuyinda, yawuru wakoseka to-o. 16 Elili yuma yawuru yiyedi yakupatila, nituzeya twawuru tuyedi, ashili tuzeya otu tuyedi hansa jiyedi jachibwiku chakuvwala hantulu. 17 Maleñi akuyinda awuru ayedi ayishilili mutuzeya twawuru tuyedi kunsa jiyedi jachibwiku chakuvwala hantulu. 18 Insa jikwawu jiyedi jamaleñi ayedi akuyinda ajinuñilili kuyuma yiyedi yakupatila, ayishili hamahina akumafwiji akwifwodi kumbidi yayu. 19 Elili tuzeya twawuru tuyedi, atushili kunsa jiyedi jachibwiku chakuvwala hantulu kumbavu jachu, kumbadi yefwodi yamukachi. 20 Elili tuzeya twawuru tuyedi, atunuñilili kwishina damahina akumafwiji ayedi akwifwodi kumbidi yayu, kwakwihi nakwakudinuñila, hewulu damuya wakwifwodi wakutuña nawukalawenu. 21 Chibwiku chakuvwala hantulu achikasili nakukasila tuzeya twachu kutuzeya twakwifwodi namwonji wawuzeeli, kulonda chiikali hamuya wakwifwodi wakutuña nawukalawenu, kulonda chibwiku chakuvwala hantulu chakabuli kusubuka kwifwodi; mwomwamulejeluwu Mosi kudi Yehova.
NOVEMBER 9-15
YUMA YALEMA YAMWIZU DANZAMBI | ALEVI 1–3
“Nkeñelu yaNyilambu”
(Alevi 1:3) Neyi mulambu windi wakekala mulambu wakushita wakwitaña, akalambuli ñombi weyala wakadi hataminayi; akamulambwili kuchisu chetenti dakubulakena, kulonda akamwitiji kumesu aYehova.
(Alevi 2:1) Neyi muntu wakalambula Yehova mulambu wawuña, mulambu windi wakekali wawuña walembuluka, akahuñunwinuhu manji, akashuhu libona.
(Alevi 2:12) Mwakamulambulañayi Yehova neyi chimwalambulaña mbutu jakahila, ilaña kuyishikija hakameña yakeli yevumba dadiwahi, chinjila.
it-2 525
Nyilambu
Nyilambu yakushita. Nyilambu yakushita amulambwileña Nzambi yamukuma; kwosi chikunku chakanyama chamufuntishilileñawu muntu wunalambuliku. (Esekejenu Ans 11:30, 31, 39, 40.) Alombeleña kudi Yehova kulonda yeteji hela kumwekesha nawu neteji mulambu wakubuta hanshidi yadiñawu nayu. Yesu Kristu wadihanini yomweni hamu neyi “mulambu wakushita” wamukuma.
it-2 528 ¶4
Nyilambu
Nyilambu yawuña. Nyilambu yawuña ayihanineña hamu nanyilambu yakuwunda, nyilambu yakushita, nyilambu yakubuta nachu nshidi nawa cheñi neyi, mbutu jakahila; mpinji yikwawu ayihanineña kankawayu. (Kwi 29:40-42; Lev 23:10-13, 15-18; Kuc 15:8, 9, 22-24; 28:9, 10, 20, 26-28; kape 29) Yumiyi yamwekesheleña nawu Nzambi nayikiswili nawa nayivulishili chikupu. Kakavulu ashileñahu manji nilibona. Nyilambu yawuña yadiña wuña walembuluka, tidiku yakwocha, hela mankendi twawubasa hela wuña wahachikañu. Wuña wukwawu awushileña hakameña kakochela nyilambu yakushita, wukwawu awudileña kudi atupristu nawa hanyilambu yakuwunda wuña wukwawu awudileña kudi muntu wunahani. (Lev 6:14-23; 7:11-13; Kuc 18:8-11) Wuña wuyalambwileñawu hakameña ashileñaku wanyi iluñi hela “wuchi” (hadaha ateneneña vinyu yakuchikuyi hela vinyu yanyikabu) yaletesheleña kuvuvumuka.—Lev 2:1-16.
(Alevi 3:1) Neyi mulambu windi wakekala wachimuna chakuketula chanyilambu yakuwunda, neyi wukulambula wakwitaña, hela ñombi weyala, hela wamukaji, akalambuli kumesu aYehova wakadi hataminayi.
it-2 526 ¶1
Nyilambu
Nyilambu yakuwunda. Nyilambu yakuwunda yetejeleñayi Yehova yadiña yakuleta kuwunda nayena. Mukwakudifukula wahanineña iwu mulambu nachisaka chindi adileña (muchipañu chatabanaka kwesekeja nanshimbi jalondeleleñawu, yisolu ayituñileña mukachi kwanyeñumukili mahina anyeñumwishiliwu kuchipañu; mutembeli mwadiña tupeka twakudiila.) Kapristu walambwileña mulambu amwinkeleñahu chikunku chamulambu nawa atupristu azatileña hanidi ifuku niwena ayinkeleña chikunku. Yehova wadiña nakutambwila ivumba dadiwahi dafumineña kumanji ocheleñawu. Mashi emeneneñaku wumi amwinkeleñawu Nzambi. Dichi, atupristu, akwakudifukula niYehova chamwekeneña tuhu neyi anakudila hamu, chuma chamwekesheleña nawu adi mukuwunda. Muntu wadileña iku wudi namajilu (majilu ejima ashimunawu muNshimbi) hela wadileña mbiji yinabadiki mumafuku ateleli kuhanawu (mumpinji yeyena yikutachika kutoka) amujahileña. Wajiloleleña hela kutamisha yakuda, hamuloña wakwikala namajilu hela muloña wakuda chuma chakumwinka Yehova Nzambi, chumichi chamwekesheleña nawu nalemeshi yuma yajila wanyi.—Lev 7:16-21; 19:5-8.
Kukeña Yuma Yalema yakuSpiritu
(Alevi 2:13) Nyilambu yeyi yawuña yiwakalambulaña yejima chiña kushahu muñwa, bayi waketija kubula kusha muñwa wachitiyañenu chaNzambi yeyi hamulambu weyi wawuñaku; nyilambu yeyi yejima wakalambula namuñwa.
(Ezekeli 43:24) Wakayishikiji kwakwihi naYehova, atupristu akakuwuhu muñwa, akayishiti akeli mulambu wakumushitila Yehova.
w04 5/15 22 ¶1
Yikuma Yamaneni Kufuma muMukanda waALevi
2:13—Muloñadi chashilileñawu muñwa ‘kunyilambu yejima’? Bayi neyi ashileñaku kulonda mulambu wutowaliku. Mukaayi kejima muñwa awishaña kuyuma kulonda yibuli kutoka. Hadaha awushileña kunyilambu muloña wemeneneñaku kubula kwikala wakadi majilu hela watoka.
(Alevi 3:17) Chidika chakubulenu kudya manji hela mashi chakekala chidika chahaya nyaka mwamba kavwalikilañawu anyanenu, mwahita nyikala yenu yejima.
it-1 813
Manji
Muloña wuyashililiku ilu lushimbi. MuNshimbi yaChitiyañenu mashi nimanji adiña ambala aYehova. Mumashi dimwekala wumi, nawa Yehova diyi wahanaña wumi; dichi diyomweni wumi. (Lev 17:11, 14) Manji ayimweneña nawu dichuma chasweja kulema mukanyama. Neyi anakulambula manji akanyama chamwekesheleña nawu yiidi yasweja kuwaha yambala yaYehova, watwinkaña yuma yayivulu nawa chamwekesheleña nawu mukwakudifukula namwinki Nzambi chakufuma hamuchima. Chineli chadiña nakwimenaku nawu kaIsarela wahanini kudi Yehova chakufuma hamuchima, adiña nakuyochela hakameña neyi “hiyakuda” nawa ‘yevumba dadiwahi’ kudi Nzambi. (Lev 3:11, 16) Dichi, wadiña himuloña kuda manji akanyama anamulambuliwu Nzambi, chuma chambala chaYehova. Muntu neyi yada manji amujahileña. Kwambukaku namashi, hela chochu manji ayizatishileña kuyuma yikwawu, sweje-e akanyama wunadifwili hela anajahiwu kudi kanyama chisumi.—Lev 7:23-25.
w04 5/15 22 ¶2
Yikuma Yamaneni Kufuma muMukanda waALevi
3:17. Chineli manji ayimweneña nawu hichuma chasweja kulema hela kuwaha, chayikanishiliwu aIsarela kuyida chamwekesheleña nawu hichiidi chambala chaYehova. (Kutachika 45:18) Chumichi chatwanukishaña nawu twatela kumwinka Yehova yuma yejima kwesekeja nahanakumini ñovu jetu.—Yishimu 3:9, 10; Akolosi 3:23, 24.
Kutaña Bayibolu
(Alevi 1:1-17) Yehova watambikili Mosi, wahosheli nindi; izu dindi hidikufuma mwitenti dakubulakena, 2 hakwila nindi, Hoshaku nawanyana kaIsarela, wuyili neyi, Neyi hadi mukwenu wakamulambula Yehova, mwakalambulaña mulambu wachimuna, hela wakwitaña hela wakwiyinda. 3 Neyi mulambu windi wakekala mulambu wakushita wakwitaña, akalambuli ñombi weyala wakadi hataminayi; akamulambwili kuchisu chetenti dakubulakena, kulonda akamwitiji kumesu aYehova. 4 Akanañiki chikasa chindi hamutu wamulambu wakushita, akawitija hamujimba windi, wakubuta nachu. 5 Ñombi akamujahili kumesu aYehova. Atupristu anyana kaAroni akashikiji mashi, owu mashi akayisampuli hakameña kwi-ndo, kokameña kekala kuchisu chetenti dakubulakena. 6 Owu mulambu wakushita akawuwi, akawuhaboli. 7 Anyana kakapristu Aroni akashi kesi hakameña, akafwiki nchawa hakesi. 8 Atupristu anyana kaAroni akaali chachiwahi, nimutu, nimanji hanchawa jidi hakesi kadi hakameña. 9 Niyamwivumu, ninyendu, nimakasa, akayikosi nameji; kapristu akawushiti wejima muwukuma hakameña bwi-i, himulambu wakumwilila Yehova nakesi, wevumba dadiwahi. 10 Neyi mulambu windi wakekala wakwiyinda hela wamukoku hela wampembi, wamulambu wakushita, akalambuli chizamba wakadi hataminayi. 11 Akamujahili kumesu aYehova kumbadi yakameña yatala kukabeta kakuchidiilu, anyana kaAroni akasampuli mashindi hakameña kwi-ndo. 12 Akamuhaboli nimutu windi nimanji indi kumu kapristu akaali chachiwahi yejima hanchawa jidi hakesi kadi hakameña. 13 Niyamwivumu, ninyendu, nimakasa, akayikosi nameji; kapristu akalambuli wejima muwukuma, akawushiti hakameña bwi-i, himulambu wakushita, himulambu wakumwilila Yehova nakesi, wevumba dadiwahi. 14 Neyi mulambu windi wakalambulayi Yehova wakekala mulambu wakushita watujila, akalambuli mulambu windi wakushita hela tutela, hela nyana katupompa. 15 Kapristu akakaleti kukameña, akakanyotomoni mutu akawufumishuku, akakashiti hakameña bwi-i; mashi aku akayikamwini kumbadi yakameña; 16 akafumishuku isakwila dindi nimajilu adumu, akadinatili kumbadi yakameña yatala kumujika kwasukwilañawu mawuti; 17 akakabaluli lupuula iku, lupuula iku, bayi akaambula hachikupuku; kapristu akakashiti hakameña bwi-i, hanchawa jidi hakesi, himulambu wakushita, himulambu wakumwilila Yehova nakesi, wevumba dadiwahi.
NOVEMBER 16-22
YUMA YALEMA YAMWIZU DANZAMBI | ALEVI 4–5
“Mwinkenu Yehova Kwesekeja naHanakumini Ñovu Jenu”
(Alevi 5:5, 6) chakelayi natanyi dehi hachuma chimu chayumiyi aketiji mwanavulumuniyi; 6 akaleti kudi Yehova mulambu windi wakutanya wanshidi yindi yanavulumuniyi, mukaji wakwiyinda, hela mukoku hela mpembi, wamulambu wahanshidi; kapristu akamwilili yakumubuta nachu hansañu yanshidi yindi.
it-2 527 ¶9
Nyilambu
Nyilambu yakutanya. Nyilambu yakutanya ayilambwileña niyena muloña wanshidi yejima yakoñeleñawu. Ayihanineña kubuta nachu nshidi yanakoñiyi muntu wunatanyi nawa yambukiliku chantesha nanyilambu yikwawu yahanshidi yahanineñawu, munjila yakwila yafuntishileña wuswa watamishiliwu. Hela neyi chakwila natamishi wuswa waYehova hela wamuza windi wajila. Mulambu wakutanya awuhanineña kudi Yehova kulonda kudanakena nachu nshidi yinakoñiyi muntu hela kufuntisha wuswa wachitiyañenu kudi muntu wunabalumuki mumuchima nawa yabuli muloña wakumujaha.—Esekejenu Isa 53:10.
(Alevi 5:7) Neyi haheta chakuhana mukokuku, akaleti kudi Yehova mulambu windi wakutanya nanochu chanavulumuniyi, tutela tuyedi, hela anyana katupompa ayedi, kamu kamulambu wahanshidi, kakwawu kamulambu wakushita.
Weluka Kuzeyazeya Kwetu
Neyi tutoñojoka chikupu Yehova chatutoñojokelañaku, Lushimbi lwahosha (muVasi 7) nawu: “Neyi haheta chakuhana mukokuku, Akaleti kudi Yehova mulambu windi wakutanya nanochu chanavulumuniyi, tutela tuyedi, hela anyana katupompa ayedi.” Mazu akwila nawu “neyi haheta” atalisha cheñi mukwila nawu “neyi hakutwesha.” Neyi kaIsarela hikazweñi chikupu chakwila wukutwesha wanyi kuhana mukoku, Nzambi wadiña nakwiteja chuma chidi chejima chikutweshayi muntu—tutela tuyedi, hela anyana katupompa ayedi.
(Alevi 5:11) Neyi haheta chakuhana hela tutela tuyedi, hela anyana katupompa ayeduku, akaleti mulambu windi nanochu chanavulumuniyi, webañu dawuña walembuluka wamulambu wahanshidi; bayi akasha hoku manjuku, hela kushahu libona nehi; muloña himulambu wahanshidi.
Weluka Kuzeyazeya Kwetu
Hanu dinu chumanyi chamwekeneña neyi chakwila muntu wudana hela tutela tuyedi? Nshimbi yahosheli (muVasi 11) nawu: “Akaleti mulambu windi nanochu chanavulumuniyi, webañu dawuña [makapu 8 hela 9] walembuluka wamulambu wahanshidi.” Hadi atuzweñi nankashi, Yehova wayitejeli mulambu wahanshidi wakadi mashi. MuIsarela, wuzweñi hiwakañesheleña muntu kuleta kuwunda naNzambiku.
Kukeña Yuma Yalema yakuSpiritu
(Alevi 5:1) Neyi muntu navulumuni chakutiya chakusanyikayi mukwawu, neli chinsahu chakumona hela chakwiluka, neyi yena kushimunamu nehi, wakakoola kuluwa kwindi;
Dizilenu Kudi Ambuña aYehova Ashinshika
Ninenu munateli kusambila kwikala ashinshika kudi Yehova dinu kudi antu kuhitila mukwikala naluwi. Chakutalilahu, hadaha muneluki nenu manakwenu nakoñi nshidi yahamesu bwi-i. Mukukeña kwikala washinshika kudi yena, sweje-e neyi hibwambu denu hela hintaña yenu. Ilaña mukwanuka cheñi nenu mwatela kwikala ashinshika kudi Yehova. Kufwana Natani, ovwahilenu Yehova ilaña ikalenu naluwi kudi manakwenu. Mulejenu yayi nakulejamu aeluda nawa watela kuya swayi. Neyi kuya nehi, mwatela kuya nakuyileja aeluda. Neyi mwila mwenimu, mukwikala ashinshika kudi Yehova. Nawa mukumumwekeshela manakwenu luwi muloña aeluda akumukwasha kwikala nawubwambu wawuwahi naYehova. Akumufumba mukuwunda nawa munjila yayiwahi.—Tañenu Alevi 5:1; Aŋalija 6:1.
(Alevi 5:15, 16) nindi, Neyi muntu wakamotoka nshimbi, neyi wakavulumuna chakuluwukila chuma chaYehova chajila chimu, akaleti kudi Yehova mulambu windi wakutanya, chizamba chamukoku chamwiyinda wakadi hataminayi, ndandu yindi yakashiki mwomuwakamwesekela musiliva yajishekeli jakweseka mulushekeli lwakumalala, wamulambu wakutanya; 16 akafuti chuma chajila chanaputoliyi, akashuku nichibalu chamuchitanu, akamwinki kapristu, kapristu akamwilili yakumubuta nachu nachizamba chamulambu wakutanya, akamwanakena.
it-1 1130 ¶2
Kujila
Ayimuna niYisakola. Ayizamba añombi awedi, nyikoku niampembi ayimweneña nawu hiyuma yajila kudi Yehova nawa hiyayikuulileñaku. Ayilambwileña nawa chibalu chimu chayileña kudi atupristu. (Kuc 18:17-19) Nyikabu yatachi niyamwikumi yadiña yuma yajila, kushilahu nyilambu niyawaana yahanineñawu kumudimu wajila wamumalala. (Kwi 28:38) Yuma yejima yajila yamwinkeleñawu Yehova yadiña yajila nawa hiyayimweneña kupelaku hela kuyizatisha munjila yidi yejima hela yabula kutelelaku. Chakutalilahu hilushimbi kutalisha hayuma yamwikumi. Neyi muntu yatenteka hambadi chibalu chakuhana chidi neyi tidiku, dichi yena hela wamwitala dindi yanonahu nawa yayizatisha chakuluwukila, iwu muntu wadiña namuloña wakufumpa lushimbi lwakubula kulemesha yuma yajila. Nshimbi yashimwini nawu watela kufweta yacheñi yinesakani nayazatishiliyi nikushilahu yikwawu, kubombela hakulambula chizamba chamukoku chamwiyinda wakadi hataminayi. Dichi, alemesheleña chikupu yuma yajila yaYehova.—Lev 5:14-16.
Kutaña Bayibolu
(Alevi 4:27–5:4) Neyi muntu wamunyikala navulumuni chakuluwukila naluwukili chuma chimu chalekesheliyi Yehova nindi chinjila kuchila, natayi dehi; 28 neyi neluki dehi nshidi yindi yanavulumuniyi akamulejayu, akaleti mulambu windi wampembi, mukaji wakadi hataminayi, wanshidi yindi yanavulumuniyi. 29 Akanañiki chikasa chindi hamutu wamulambu wahanshidi, mulambu wahanshidi akawujahili kuwujahilu wamulambu wakushita. 30 Hamashi indi kapristu akanonuhu namunu windi, akaloombi kunseñu jakameña kamulambu wakushita, mashi indi ejima akayimwañili kwishina dakameña. 31 Akafumishuku manji indi ejima neyi chafumishañawu manji achimuna chakuketula chanyilambu yakuwunda; kapristu akayishitili Yehova hakameña bwi-i, yevumba dadiwahi; kapristu akamwilili yakubuta nachu, akamwanakena. 32 Neyi wakaleta mwana kamukoku wamulambu wahanshidi, akaleti mukaji wakadi hataminayi. 33 Akanañiki chikasa chindi hamutu wamulambu wahanshidi, akamujahili kwajahilañawu mulambu wakushita, wakekali mulambu wahanshidi. 34 Hamashi amulambu wahanshidi kapristu akanonuhu namunu windi, akaloombi kunseñu jakameña kamulambu wakushita, nimashi indi ejima akayimwañili kwishina dakameña; 35 manji indi ejima akayifumishuku neyi chafumishañawu manji amwana kamukoku aketulañawu wanyilambu yakuwunda; kapristu akayishiti hakameña bwi-i, hanyilambu yakumwilila Yehova nakesi; kapristu akamwilili yakubuta nachu hansañu yanshidi yindi yanavulumuniyi, akamwanakena.
5 Neyi muntu navulumuni chakutiya chakusanyikayi mukwawu, neli chinsahu chakumona hela chakwiluka, neyi yena kushimunamu nehi, wakakoola kuluwa kwindi; 2 hela neyi muntu nakwati chikasa hachuma chamajilu, hela hakanyama kamafumbu wamajilu wafwa dehi, hela hakanyama kanyikonu wamajilu wafwa dehi, hela kanyama kakayilaña wamajilu wafwa dehi, yena kuchiluka nehi, niyena hakwikala wamajilu, natanyi dehi; 3 hela neyi wakakwata hayuma yamuntu yamajilu, yamajilu yonsu yadijilolañayi nachu muntu, yena kuchiluka nehi, wakatanya hakachilukayi; 4 hela neyi muntu wakasanyika lufuchi nakanwa kindi, nindi eli hela chuma chatama hela chuma chachiwahi, chejima chakahoshayi muntu lufuchi nakusanyika, yena kuchiluka nehi, hakachilukayi wakatanya hachuma chimu chayumiyi;
NOVEMBER 23-29
YUMA YALEMA YAMWIZU DANZAMBI | ALEVI 6–7
“Chakusakilila Nachu”
(Alevi 7:11, 12) Tiya lushimbi lwachimuna chakaketulañawu chanyilambu yakuwunda yakamulambulañawu Yehova. 12 Neyi wakalambula chakusakilila nachu, chakalambulayi chimuna chakusakilila, akalambwili kumu namankendi akadi iluñi akubomba namanji, nitumankendi twawubasa twakadi iluñi twakukwita manji, nimankendi akubomba namanji awuña walembuluka wakwombeka dehi.
Yuma Yitunateli Kudizila kuMukanda waAlevi
Chamuchiyedi: Twamukalakelaña Yehova muloña twakeñaña kumutiyisha kuwaha. Hakwila tutiyishi chiwahi iyi nsañu, tuhanjekenu hanyilambu yakuwunda yahanineñawu aIsarela hakudifukula kwalala. Mumukanda waAlevi twadizañamu netu, kaIsarela walambwileña mulambu wakuwunda neyi chuma “chakusakilila nachu.” (Lev. 7:11-13, 16-18) Walambwileña iwu mulambu bayi neyi dichateleli kwilayiku, ilaña dichakeñeleñayi. Wafwilileña kwila mwenimu muloña wakumukeña Yehova Nzambi yindi. Muntu wahanineña mulambu nichisaka chindi kushilahu nikapristu adiileña mbiji yakanyama wunalambuluwu. Ilaña yiidi yimu yakanyama ayihanineña hohu kudi Yehova? Yiidi yamuchidinyi?
(Alevi 7:13-15) Chakalambulayi mulambu windi, akalambwili kumu namankendi akweti iluñi, hamu nachimuna chanyilambu yindi yakuwunda kulonda kusakililaña nachu. 14 Hanyilambu yejima akanonañahu dinkendi dimu dimu, akadilambulaña himulambu wakuleleka kudi Yehova, wakekalaña wambala wakapristu wasampulaña mashi anyilambu yakuwunda. 15 Mbiji yachimuna chanyilambu yindi yakuwunda yakasakililañayi nachu akayidyi hohefuku dakayilambulayi, kushiyahu yakashiki nikubudidi nehi.
w00 8/15 15 ¶15
Nyilambu Yamuzañalesheleña Nzambi
Mulambu wukwawu wahanineñawu chakudikeñela himulambu wakuwunda washimunawu haAlevi kapetulu 3. MuchiHeberu, izu dakwila nawu “kuwunda” datalisha kuyuma yayivulu kubadika kwikala hohu wasubuka kunjita hela kukukala kwejima. Mukanda waStudies in the Mosaic Institutions. Wahosha nawu: “MuBayibolu, idi izu datalisha cheñi hakuwunda kwekala hakachi kamuntu naNzambi, kuhanda chiwahi, muzañalu nikuluña.” Dichi nyilambu yakuwunda hiyayihanineña hakuleta hohu kuwunda naNzambi neyi kwiji, kumuwundishaku, ilaña yadiña yakumwekesha kusakilila hela kuzañalala hakuwunda kwadiluñishileñayi Nzambi nawantu etejayi. Atupristu niantu alambwileña adileña iwu mulambu hanyima yakumulambula Yehova mashi nimanji. (Alevi 3:17; 7:16-21; 19:5-8) Antu ahanineña mulambu, atupristu niYehova Nzambi adilileña hamu muchifwikija kulonda amwekeshi kuwunda kwadiñawu naku hakachi kawu.
(Alevi 7:20) Mbiji yachimuna chanyilambu yambala yaYehova yakuwunda, muntu wakadyaku, iku saña adiyi namajilu kumujimba windi, muntu owu hadi akwawu akamufumishuhu.
w00 8/15 19 ¶8
Nyilambu Yakushimeka Yamuzañaleshaña Yehova
Indi muntu wahanineña nyilambu? Nshimbi yahosheli nawu muntu wejima wunakwinza kumesu aYehova watela kwikala wutooka nawa wakadi majilu. Muntu wejima wadiña namajilu munjila yidi yejima chatachi wahanineña mulambu wahanshidi hela mulambu wakutanya kulonda yekali cheñi wakadi majilu hakwimana kumesu hakwila nawu mulambu windi wakushita hela wakuwunda awiteji. (Alevi 5:1-6, 15, 17) Komana twafwilaña mpinji yejima kwikala akadi majilu hakwimana kumesu aYehova? Neyi tunakukeña netu kudifukula kwetu akwiteji kudi Nzambi, twatela kutondolwelaña yuma yejima yakaanishawu munshimbi jaNzambi. Twatela kuyilejamu antu atondayi Nzambi nindi atukwashi, dikwila nawu “akulumpi achipompelu” ‘nimukwakufumishahu nshidi jetu,’ Yesu Kristu.—Yakoba 5:14; 1 Yowanu 2:1, 2.
Kukeña Yuma Yalema yakuSpiritu
(Alevi 6:13) Kesi chiña kukakundakeshaña hohu mafuku ejima hakameña, bayi kakajimaku.
it-1 833 ¶1
Kesi
Kutalisha hatabanaka nitembeli. Kesi kazatishileñawu hakudifukula akizatishileña hatabanaka nkumininaku nihatembeli. Ifuku dejima nantetemena nimelela kapristu muneni wadiña nakwocha insensi hakameña kainsensi. (Kwi 30:7, 8) Nshimbi jaNzambi jahosheli nawu kesi kahakameña kanyilambu yakushita bayi kakajimaku. (Lev 6:12, 13) A Yudeya amweneña nawu kesi kadiña hakameña akibutwileña muchihayamisha kudi Nzambi, hela chakwila antu amavulu eteja iyi yitoñojoka, hiyekala muNsonaku. Kwesekeja nachamulejeliwu Mosi kudi Yehova hakusambila, amulejeli nawu anyana kaAroni “akashi kesi hakameña, akafwiki nchawa hakesi” henohu kanda ashi mulambu hakameña. (Lev 1:7, 8) Yadiña hohu hanyima yakwila Aroni nianyanindi anayiswanyiki dehi kwikala atupristu nihanyima yakwila anahani dehi mulambu wakuswanyika nachu, kesi kafumini kudi Yehova hadaha kafumini mwivu nakwinza hatabanaka nakusukumisha mulambu wadiña hakameña. Neyi chinamwekeshi chumichi, kesi kachihayamisha kamwekeneña kakeni bayi nakukwatisha nchawa yadiña hakameñaku, ilaña “[nakunoñesha] nimulambu wakushita nimanji adiñi hakameña.” Dichi kesi katwalekelihu kubutuka hakameña hadaha himuloña wakudibomba kwakesi kafumini kudi Nzambi nakesi kadiña dehi hakameña. (Lev 8:14–9:24) Munjila yoyimu, kesi kachihayamisha kafumini kudi Yehova kanoñesheli nyilambu hanyima yakwila Solomoni nalombi dehi hampinji yahanineñayi tembeli.—2Ku 7:1; talenu cheñi Ans 6:21; 1An 18:21-39; 1Ku 21:26 kutalisha hayakutalilahu yikwawu yazatishiliyi Yehova kesi muchihayamisha hetejeleñayi nyilambu yahanineña ambuña indi.
(Alevi 6:25) nindi, Hoshaku naAroni nawanyanindi, neyi, Tiyenu lushimbi lwamulambu wahanshidi; kwoku kwajahilañawu mulambu wakushita diku kwamujahilañawu Yehova mulambu wahanshidi, wajila nankashi.
si 27 ¶15
Mukanda waMuchisatu muBayibolu—Alevi
(3) Mulambu wahanshidi awuhanineña neyi muntu nakoñi nshidi chakuluwukila hela chakadi kwiluka. Kanyama wahanineñawu washindameneni hamuntu anakukeña kujiminawu nshidi, chidi neyi yakapristu, antu ejima, nyuli hela muntu hohu. Kwambukaku nanyilambu yakudikeñela chidi neyi mulambu wakushita niwakuwunda wahanineñayi muntu, mulambu wahanshidi awuhanineña kudi muntu wejima.—4:1-35; 6:24-30.
Kutaña Bayibolu
(Alevi 6:1-18) Yehova wahosheli naMosi, 2 nindi, Neyi muntu wakavulumuna, nakumumotoka Yehova, hakumudimba mukwawu nachuma chanamwinkiyi kuhemba, indi kwiji nakapopu, indi kwiji namubuwi dehi chuma, indi kwiji namudyi dehi mukwawu mbalakanyi, 3 indi kwiji nanoni dehi chuma chambala chajimbeli, hakudimbenamu, hakusanyika chakutwamba, neyi muntu nakoñi chuma chimu chayuma yejimiyi yakoñañawu antu nakuvulumwinamu, 4 chakela neyi navulumuni dehi, neyi natanyi dehi, akafuti ochu chuma chanabuwiyi, indi kwiji chanamudiiliyi mukwawu mbalakanyi, indi kwiji chamwinkeluwu kuhemba, indi kwiji chajimbeli hakuchinona, 5 indi kwiji chasanyikiliyi chakutwamba; akafuti mwejima muchashikila akashuhu nichibalu chamuchitanu; akamwinki mukwachuma chindi mwifuku dakamutanyishawu. 6 Akaleti kudi Yehova mulambu windi wakutanya, chizamba chamukoku chamwiyinda wakadi hataminayi, ndandu yindi yakashiki mwomuwakamwesekela wamulambu wakutanya, akashikiji kudi kapristu; 7 kapristu akamwilili kumesu aYehova yakubuta nachu, akamwanakena yuma yejima yakoñeliyi yatanyiniyi nachu. 8 Yehova wahosheli naMosi, 9 nindi, Kaleji Aroni nawanyanindi, neyi, Tiyenu lushimbi lwamulambu wakushita; mulambu wakushita wakekalaña hejiku dahakameña wufuku wejima nakushikija kubudidi, kesi kahakameña saña kakwatila. 10 Kapristu akavwali chikovwelu chindi chawanda wawuwahi hamujimba windi; akavwali nikaputula kindi kawanda wawuwahi; akanoni mawuti ananoñeli mulambu wakushita nakesi hakameña, akayishi kumbadi yakameña. 11 Akavuuli yuma yindi yakuvwala, akavwali yakuvwala yacheñi, akatwali mawuti kunsa yachilombu kutooka. 12 Kesi chiña kukakundakeshaña hakameña, saña kakwatila hohu bayi kakajimaku; kapristu akakundakeshañahu nchawa habudidi habudidi hefuku hefuku; akaaluhu chachiwahi mulambu wakushita akashitiluhu nimanji anyilambu yakuwunda. 13 Kesi chiña kukakundakeshaña hohu mafuku ejima hakameña, bayi kakajimaku. 14 Tiyenu lushimbi lwamulambu wawuña; anyana kaAroni akawulambulaña kumesu aYehova kumesu akameña. 15 Akazomonuhu chikasa chindi to-o chawuña walembuluka wahamulambu wawuña, nimanji awu, nilibona yejima yidi hamulambu wawuña, akamushitili Yehova hakameña bwi-i, kulonda ivumba dadiwahi dakwanukisha nachu; 16 wakashalahu akawidyi kudi aAroni nawanyanindi, akawudili kwajila chakadi iluñi, akawudiili muchipañu chetenti dakubulakena. 17 Bayi akawocha neluñuku. Nayinki dehi hiiseka dawu danyilambu yami yakwila nakesi, wajila nankashi neyi chiwudi mulambu wahanshidi, neyi chiwudi nimulambu wakutanya. 18 Amayala ejima ahadi anyana kaAroni diwu akawidyaña, hichuma chawu chakudyaña haya nyaka mwamba kavwalikilañawu anyanenu, chahanyilambu yakumwilila Yehova nakesi; yowu wakakwataku nekali dehi wajila.
NOVEMBER 30–DECEMBER 6
YUMA YALEMA YAMWIZU DANZAMBI | ALEVI 8–9
“Yuma Yamwekeshaña Nkisu jaYehova”
(Alevi 8:6-9) Mosi waleteli Aroni nawanyanindi amayala, wayiwelesheli nameji. 7 Wamuvwikili chikovwelu, wamukasili muya, wamuvwikili kanji, wamuvwikili niifwodi, wamukasili mukwatu wefwodi wakutuña nawukalawenu, wakasili nachu ifwodi kumujimba windi. 8 Wamushili chibwiku chakuvwala hantulu; muchibwiku washilumu niWurimi niTumini. 9 Wamushilili nkuku kumutu windi; washili kumesu chuma chawuru chawubasa, chochibaaba chajila; mwomwalejeluwu Mosi kudi Yehova.
(Alevi 8:12) Manji akuwayisha nachu wayihuñunwini hamutu waAroni wamuwayishili, kulonda kumujilika.
it-1 1207
Kukunjika (kuswanyika)
Mosi wamuwelesheli Aroni nianyanindi awamayala Nadabi, Abihu, niEleyazari niItamari (hela wayilejeli kuwela awenawu) mumbashila yawuneñu yadiña muchipañu nawa wamuvwikili Aroni yakuvwala yakapristu muneni. (Kuc 3:2, 3) chelili anayivwiki dehi yikovwelu yayiwahi, Aroni amuvwikili yakuvwala yemeneneñaku mudimu wazatileñayi neyi kapristu muneni. Nkumininaku Mosi wawayishili tabanaka niyuma yejima yadiñamu, yitwamu nijimesa niyipwepu jayu, kameña kanyilambu yakushita, kushilahu jimbashila niyipwepu yachu yejima. Chumichi chaletesheli yikali yajila, yazatikileña hohu kumudimu waNzambi. Nkumininaku Mosi wamuwayishili Aroni kuhitila mukumuhuñunwina manji hamutu.—Lev 8:6-12; Kwi 30:22-33; Ms 133:2.
(Alevi 9:1-5) Chelili ifuku damuchitanu nachisatu dinashiki dehi, Mosi hakutambika Aroni nawanyanindi amayala, niakulumpi awaIsarela; 2 hakumwila Aroni, nindi, Kwataku mwana kañombi weyala wamulambu wahanshidi, nichizamba chamukoku chamulambu wakushita; akadi ninaha hataminawu, wakayilambuli kumesu aYehova. 3 Wakayili anyana kaIsarela neyi, Kwatenu chizamba champembi chamulambu wahanshidi; nimwana kañombi nimwana kamukoku, mwayedi wawu amwaka wumu, akadi hataminawu, amulambu wakushita; 4 niñombi weyala nichizamba chamukoku, anyilambu yakuwunda, kulonda kuyiketwila kumesu aYehova; nimulambu wawuña wakubomba namanji; muloña lelu Yehova wukumwekana kudenu. 5 Yayilejeluwu kudi Mosi ayileteli kumesu etenti dakubulakena; chipompelu chejima chakundamini kwakwihi, chemeni kumesu aYehova.
it-1 1208 ¶8
Kukunjika (kuswanyika
Hefuku damu 8 iku anayikunjiki dehi mudimu wawupristu nawa anadiloñeshi kukalakala neyi atupristu, atachikili mudimu wawu katachi (chakadi wukwashu waMosi), kuhana nyilambu yakubuta nachu nshidi yamuza wawaIsarela, sweje dinu hakuyitookesha kunshidi yawu bayi hohu nshidi yakuvwalika nayuku ilaña nihanshidi yakoñeliwu kutalisha kumwana kañombi wawuru, chuma chamutiyishili Yehova kutama. (Lev 9:1-7; Kwi 32:1-10) Hanyima yakwila atupristu awayishiliwu anamanishi dehi kulambula, Yehova wamwekesheli nindi wayitejeli awa antu kwikala atupristu kuhitila mukutemesha kesi muchihayamisha kufuma muchishimi chevu chadiña hewulu databanaka nakunoñesha nyilambu yejima yadiña hakameña.—Lev 9:23, 24.
(Alevi 9:23, 24) AMosi naAroni eñilili mwitenti dakubulakena, edikilumu ayikiswilili antu, nikulema kwaYehova kwamwekeni kudi antu ejima. 24 Kudi Yehova kwafumini kesi, kanoñesheli nimulambu wakushita nimanji adiñi hakameña, chachimwenuwu antu ejima, akalokeli adimbokeli chamesu awu heseki.
Yuma Yitunateli Kudizila kuMukanda waAlevi
Chamuchiwana: Yehova nakukiswila kuloñesha kwindi kwahamaseki. Talenu chuma chamwekeni mu 1512 B.C.E. chatuñiliwu tabanaka kumpidi yaSinayi. (Kwid. 40:17) Mosi walombweli ichi chidika hamutondeliwu Aroni nianyanindi kwikala atupristu. Muza wawaIsarela wapompeli kulonda wumoni atupristu chahanineñawu nyilambu yatachi yawanyama. (Lev. 9:1-5) Yehova wamwekesheli ñahi nindi wetejeli atupristu atondeliyi? Chakiswilileñawu aAroni naMosi antu, Yehova watemesheli kesi nawa kanoñesheli nyilambu yejima yashalilihu hakameña.—Tañenu Alevi 9:23, 24.
Kukeña Yuma Yalema yakuSpiritu
(Alevi 8:6) Mosi waleteli Aroni nawanyanindi amayala, wayiwelesheli nameji.
Muloña Wutwatelela Kwikala Ajila
Nshimbi yayilejeluwu atupristu amuIsarela nawu atela kwikala atooka kumujimba yayidizishaña chumanyi antu jaYehova makonu? Antu itwadizaña nawu Bayibolu kakavulu amonaña nawu maluña etu akudifukwilamu awunyoji nawa amonaña chitwavwalaña chiwahi. Ilaña, atupristu chiyadiñawu awunyoji chatukwashaña kwiluka netu muntu wejima wunakukeña kukandama kumpidi yaYehova yakudifukwila watela kwikala ‘namuchima wutooka.’ (Tañenu Masamu 24:3, 4; Isa. 2:2, 3.) Mudimu wetu wajila wutwamukalakelaña Nzambi twatela kuwuzata namuchima niyitoñojoka yitooka nikwikala atooka kumujimba. Chumichi chakeñekaña kudishinshika kapampa kakavulu, amakwawu atela tuhu kuhimpa chikupu hakwila nawu ekali ajila. (2 Kor. 13:5) Chakutalilahu, muntu wapapatishewa watalaña nyevulu yanzekesi mumushikila watela kudihula nindi, ‘Komana namwekeshaña nami najila?’ Kuhiñahu watela kulomba wukwashu kulonda yaleki yililu yatama.—Yak. 5:14.
(Alevi 8:14-17) Waleteli ñombi weyala wamulambu wahanshidi; Aroni nawanyanindi amayala anañikili makasawu hamutu wañombi wamulambu wahanshidi. 15 Wamujahili; Mosi wanoneni mashi, waloombeli kunseñu jakameña namunu windi kwi-ndo watookesheli kameña, wamwañilili mashi kwishina dakameña, wakajilikili kulonda kukabuta. 16 Wanoneni manji amwivumu ejima nichibutamuchima, ninshiya mujiyedi, nimanji awu, Mosi wayishitili hakameña bwi-i. 17 Ilaña ñombi, nichitembi chindi, nimbiji yindi, niwufwachi windi, wocheli mukesi kunsa yachilombu; mwomwalejeluwu Mosi kudi Yehova.
it-2 437 ¶3
Mosi
Nzambi wamutondeli Mosi kwikala ihaku wachitiyañenu chanshimbi chadiñi hakachi kayena nawaIsarela, chifulu chakwila kwosi muntu wekalahu dehi nachu chiña Yesu Kristu hohu, Ihaku wachitiyañenu chachiha. Namashi anyilambu yakanyama Mosi wasampwilili mashi hamukanda wachitiyañenu, nakwimenaku Yehova neyi “chibalu” chimu nawa antu (chakadi nikujina emenañaku akulumpi) neyi chibalu “chikwawu.” Wayitañilili antu mukanda wachitiyañenu nawa akwili nawu, “Yejima yanahoshiyi Yehova tukwila, tukwovwahila.” (Kwi 24:3-8; Heb 9:19) Chineli Mosi wadiña ihaku, wadiña namudimu wakutala chatuñileñawu tabanaka nikutuña yipwepu yahatabanaka kwesekeja nachamulejeliwu kudi Nzambi, nikukunjika atupristu, kuwayisha tabanaka niAroni kapristu muneni namanji. Watalili mudimu wazatili atupristu atondeliwu.—Kwi kape 25-29; Lev kape 8, 9.
Kutaña Bayibolu
(Alevi 8:31–9:7) Mosi wayilili aAroni nawanyanindi, nindi, Mbiji yitelekenu kuchisu chetenti dakubulakena; kwokwenoku diku kumwakayidiila namankendi adi mwibañu dakukunjika, mwomunayilejeli nami, Akayidyaña kudi aAroni nawanyanindi amayala. 32 Nimbiji namankendi akushalahu mwakayocha mukesi. 33 Mumafuku atanu nayedi kwidika muchisu chetenti dakubulakena nehi, sampu mafuku akuyikunjika kumudimu anawani dehi; muloña yena wakayikunjikaña kumudimu mafuku antu nayedi. 34 Mutuneli lelu dimu mwatulejeliyi Yehova kwila, kulonda kuyilila yakubuta nachu. 35 Mwakashakamaña kuchisu chetenti dakubulakena nimwaana niwufuku mafuku atanu nayedi; mwakahembaña izu danayishiikiyi Yehova kulonda mwakabuli kufwa; muloña dimu mwananlejuwu. 36 Aroni nawanyanindi elili yuma yejima yayilejeliyi Yehova kukanwa kaMosi.
9 Chelili ifuku damuchitanu nachisatu dinashiki dehi, Mosi hakutambika Aroni nawanyanindi amayala, niakulumpi awaIsarela; 2 hakumwila Aroni, nindi, Kwataku mwana kañombi weyala wamulambu wahanshidi, nichizamba chamukoku chamulambu wakushita; akadi ninaha hataminawu, wakayilambuli kumesu aYehova. 3 Wakayili anyana kaIsarela neyi, Kwatenu chizamba champembi chamulambu wahanshidi; nimwana kañombi nimwana kamukoku, mwayedi wawu amwaka wumu, akadi hataminawu, amulambu wakushita; 4 niñombi weyala nichizamba chamukoku, Anyilambu yakuwunda, kulonda kuyiketwila kumesu aYehova; nimulambu wawuña wakubomba namanji; muloña lelu Yehova wukumwekana kudenu. 5 Yayilejeluwu kudi Mosi ayileteli kumesu etenti dakubulakena; chipompelu chejima chakundamini kwakwihi, chemeni kumesu aYehova. 6 Mosi wayilili nindi, Tiyenu chuma chanayilejiyi Yehova nindi mwakachili kulonda kulema kwaYehova kumwekani kudenu. 7 Mosi wamwilili Aroni, nindi, Kundamaku kukameña, wulambuli nimulambu weyi wahanshidi, nimulambu weyi wakushita, wili niyakudibuta nachu eyi aweni, niyakubuta nachu antu; wulambuli mulambu wawantu, wuyilili antu yakuyibuta nachu; mwomwatulejeliyi Yehova.