Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
NOVEMBER 1-7
YUMA YALEMA YAMWIZU DANZAMBI | YOSHUWA 18-19
“Yehova Wayanzañeneni Chiwahi Mpata”
it-1 359 ¶1
Ñinza
Chinamwekani neyi kudi yuma yiyedi yalondeleleñawu hakwanzañena nyichidi yawantu mpata: wunsahu wachinjikijilu chakusakula nachu nikutoha kwamuchidi. Ichi chinjikijilu chayilejeleña iluña dampata yawuswana yikutambula muchidi himuchidi, chayilejeleña kushakama iluña dodimu hela mpata yikwawu chidi neyi kukabeta kakuchimunswa hela kakuchidiilu, kumusela hela kumujika, muyana nikumapidi. Yehova diyi wayilejeleña nanichi chinjikijilu nawa chumichi chakwashileña nyichidi kubula kuditiyila ichima hela kubobola. (Yis 16:33) Kuzatisha ichi chinjikijilu, Nzambi walejeleña muchidi himuchidi chuma chikayimwekena kwesekeja nawuprofwetu wonenewa wankakulula Yakoba wasonekawu haKutachika 49:1-33.
it-1 1200 ¶1
Wuswana
Mpata yawuswana. Wuswana wawanyana kaIsarela ayinkeliwu kudi Yehova, wamulejeli Mosi ñinza yampata. (Kuc 34:1-12; Yos 1:4) Anyana kaGadi, anyana kaRubeni nichibalu chamutaña waManase, ayinkeli wuswana wawu kudi Mosi. (Kuc 32:33; Yos 14:3) Nyichidi yikwawu yinashali ayinkeleña wuswana wawu kudi Yoshuwa naEleyazari kuzatisha chinjikijilu chakusakula nachu. (Yos 14:1, 2) Kwesekeja nawuprofwetu washimwiniyi Yakoba wekala haKutachika 49:5, 7, aSimeyona naLevi hiyayinkeli maluña ambuka neyi hiwuswana wawuku. Mpata yaSimeyona (ninyisumba yadiña mukachi) yadiña mukachi kampata yaYuda (Yos 19:1-9), hakwila Alevi ayinkeli nyisumba 48 mumpata yejima yawaIsarela. Chineli aLevi adiña namudimu walema wakuzatila mumalala, Yehova wahosheli nindi didu iseka dawu. Atambwileña yamwikumi kwikala iseka dawu hela wuswana wawu kwesekeja nanyidimu yazatileñawu. (Kuc 18:20, 21; 35:6, 7) Yisaka ayinkeleña nyidimu mwomwiluña damuchidi wawu. Yisaka chiyatoheleleñaku nianyana chatabwileñawu wuswana, mpata atwalekelihu kuyanzañana muyikunku yanyanya.
it-1 359 ¶2
Ñinza
Neyi chinjikijilu chakusakula nachu chinashimuni dehi iluña kwatela kushakama muchidi, atalileña hakutoha kweluña kushindamena hachikuma chamuchiyedi: kutoha kweluña. ‘Mwakadanzañeni ituña kuzatisha chinjikijilu chakusakula nachu mwahita yisaka yenu. Amavulu mwakayinki wuswana wawuvulu, antesha mwakayinki wuswana wantesha. Kwakamuholokela muntu chinjikijilu, dikwindi.’ (Kuc 33:54) Neyi chinjikijilu chinatondi iluña ahimpileña wanyi, ilaña atandumwineñaku hohu ñinza kwesekeja nakutoha kwawuswana wanowu muchidi. Dichi, chamweniwu nawu mpata yaYuda yinatohi, aketwiliku nakuyinka amuchidi waSimeyona.—Yos 19:9.
Yuma Yalema yakuSpiritu
it-1 359 ¶5
Ñinza
Nsañu yakwanzañana mpata yakumujika waYodana yamwekeshaña nawu chinjikijilu chatachi chadiña chawaYuda (Yos 15:1-63), Yosefu (Efweremi) (Yos 16:1-10), nichibalu chamuchidi waManase chashakamineña kumujika waYodana (Yos 17:1-13) alejeliwu muñinza yawu ninyisumba. Hanyima yachumichi, chinamwekani neyi nsañu yakwanzañana maluña ayimikili, chineli chipompelu chawaIsarela chafumini kuGiligali nakuya kuShilo. (Yos 14:6; 18:1) Kuleha kwampinji akushimuna wanyi, ilaña Yoshuwa wazuwilili nyichidi 7 yashalilihu muloña ashintajalileña kuya nakutambula mpata. (Yos 18:2, 3) Antu ashimunaña wunsahu wamboka-mboka kutalisha hachuma chaletesheli iyi nyichidi 7 yibuli kutambula mpata, amakwawu atoñojokaña nawu yuma yatambwiliwu hampinji yashindileñawu nihamuloña wakwila ayilukukileña wanyi kudi aKenani dichuma chaletesheli abuli kutambula swayi maseka ampata ashaliliku. Chineli ashintajalileña kuya nakulukuka ayilumbu jawu añovu kulonda ashindi hadaha dichuma chaletesheleña kwikala nawuudi wakuya nakutambula swayi. (Yos 13:1-7) Cheñi, chuma chelukiliwu kutalisha hanidi iluña Detuña daChikaninu hadaha nichena chayiletesheli kumona neyi maluña ayinkeliwu anashikili kubadika awa ashaliliku.
NOVEMBER 8-14
YUMA YALEMA YAMWIZU DANZAMBI | YOSHUWA 20-22
“Yuma Yitunateli Kudizila Kunsañu Yakubula Kwiluka Wunsahu Walala”
w06 4/15 5 ¶3
Chimwatela Kuhanjekela naMwinikwenu
Kuhanjeka chiwahi kwakañeshaña kubula kutiyashana nikukunkulula mwaluwa. Kunyima mumpinji yawaIsarela, muchidi waRubeni, Gadi, nichibalu chamuchidi waManase ashakamineña kumusela waKaloña Yodana, atuñili “kameña keneni kwaamu” kwakwihi naYodana. Nyichidi yikwawu yelukili wanyi mwatalishiliwu. Chatachikiliwu kutoñojoka nawu amanakwawu ashakamineña kwishinadi daYodana anadikañi, iyi nyichidi yadiloñesheli kuya nakuzuña ‘nawakwakudikaña.’ Henohu kanda ayi nakuyilukuka, atemesheli antemesha kulonda ayi nakuhanjeka nawamanakwawu ashakamineña kumusela. Elili chiwahi chikupu! Enjili nakwiluka nawu kameña katuñiliwu hikadiña kakulambwilahu nyilambu yakwocha hela nyilambu yikwawuku. Ilaña, iyi nyichidi yashakamineña kumusela yachinineña nawu kumbidi nyichidi yikwawu yakayila nawu: “Enu himukweti iseka kudi Yehovaku.” Aka kameña kadiña kakuyanukisha nawu niwena adifukwileña kudi Yehova. (Yoshuwa 22:10-29) Aka kameña akitumbili nawu Chinsahu, hadaha kayimeneneñaku wunsahu nawu niwena adiña nakumukalakela Yehova Nzambi walala.—Yoshuwa 22:34.
w08 11/15 18 ¶5
“Fwilenuña Yuma Yaletaña Kuwunda”
AIsarela hadaha atoñojokeli nawu adiña dehi nawunsahu wamwekesheleña nawu akwawu avulumwini nawa neyi ayilukuka akukeheshaku kukala. Chatela ashikeni kwilahu chuma, nyichidi yashakamineña kumujika waYodana atemesheli amanakwawu kulonda ayi nakuhanjeka nawamanakwawu haniku kukala. Ayihwili nawu: “Indi muloña munamukoñi Nzambi yaIsarela himuloñanyi mwaka mufuntumu lelu kubula kumulondela Yehova?” Kafwampi, nyichidi yatuñili kameña hiyadikañiliku. Hanu akwila ñahi nachuma chinayitwambiliwu? Komana akuyizuwila antu anakuyitwambila hela kukaana kuhosha nawu? Nyichidi yatwambililiwu yayakwili mukuwunda, nakuyileja nawu kukeña kwamukeñawu Yehova dikwaletesheli eli ichi chuma. Chakwiliwu chakiñili wubwambu wawu naYehova nikupulwisha mawumi. Kuhanjeka chiwahi kwamanishaña kukala nawa kwaletaña kuwunda.—Yos 22:13-34.
Yuma Yalema yakuSpiritu
it-1 402 ¶3
Kenani
Hela chakwila aKenani amavulu apulukili hampinji yayilukukiliwu nawa hayishindiliwu, tunateli kuhosha netu “Yehova wayinkeli aIsarela ituña dejima dasanyikililiyi ankakulula jawu nindi nakayinkadu,” wayinkelidu “kwejima kwi-ndo,” nawa “hikwakañenyi hoku chuma chachiwahi nichimu chahosheliyi Yehova namutaña waIsarelaku; amweni yejima.” (Yos 21:43-45) Kwosi chilumbu hela wumu wawaIsarela wayitiyishileña womaku. Nzambi washimwineñahu dehi nindi wakatemuna aKenani “chovu chovu” kulonda anyama amumpata akabuli kusemunwina mwituña munabuli antu. (Kwi 23:29, 30; Kuh 7:22) Hela chakwila aKenani adiña nayitwa yanjita yañovu, kushilahu nimakalu ayikuñu, neyi aIsarela akañenyi kutambula maluña amakwawu hitunateli kuhosha netu Yehova diyi wakañenyi kushikija chikaninu chindiku. (Yos 17:16-18; Ans 4:13) Ilaña, nsañu yakunyima yamwekeshaña nawu aIsarela ayishindileña mpinji yikwawu muloña wakwila alekeleña kwikala ashinshika kudi Nzambi.—Kuc 14:44, 45; Yos 7:1-12.
NOVEMBER 15-21
YUMA YALEMA YAMWIZU DANZAMBI | YOSHUWA 23-24
“Mazu Akukumishaku Alejeliyi Yoshuwa Muza”
it-1 75
Kudibomba
Kudi chuma chikwawu chashindili muza waIsarela hampinji yeñilileñawu muKenani, Ituña daChikaninu. Mwanta Nzambi wayinkeli aIsarela wuswa wejima hanidi ituña kulonda yashikiji chikaninu chakaniniyi ankakulula jawu. Hela chochu, hiyeñilileña neyi enimbu amunidi ituñaku, nawa Yehova wayikaanishili kudibomba nanyuza yamudina ituña, yapesheleña ankishi. (Kwi 23:31-33; 34:11-16) Ateleleli hohu kwovwahila nshimbi jaNzambi niyidika yindi, bayi yanyuza yatemwineñayiku. (Lev 18:3, 4; 20:22-24) Sweje-e dinu, ayikaanishili kusumbwañana nanyuza yamuchidiwu. Iku kusumbwañana kwadi kuyiletesha bayi neyi kudibomba nawambanda apesheleña ankishi hohuku, ilaña niantaña jawu apesheleña ankishi, elileña yidika yamunsakililu yawu yakutwamba nitushidikilu, nawa chumichi chadi kuletesha niwena kudibomba nawu, nakufwa mumuhetu wawu.—Kuh 7:2-4; Kwi 34:16; Yos 23:12, 13.
Izu daYehova Hidakañanyañaku
Chakubula nikujinoka, kwesekeja nayuma yitunamoni namesu kapu, tunateli kuhosha netu: “Hikunakañanyi chuma chachiwahi nichimu chayiteneniyi Yehova Nzambi yenuku, yejima munayimoni, kwosi nichuma chinakañanyuku.” (Yoshuwa 23:14) Yehova wapulwishaña, wakiñaña nawa wakamenaña ambuñindi. Munateli kutenahu kukana kwakaniniyi kwakañenyi kushikijewa hampinji yindi yashikila? Hitunateli kutenahu nichimuku. Twakuhwelela chikupu Mwizu daNzambi dalala.
Indochu hampinji yakumbidi? Yehova watwileja nindi etu amavulu twatela kukuhwelela kushakama heseki diyakabalumuna kwikala paradisa yayiwahi. Antesha hakachi ketu, akweti chikuhwelelu chakuyula naKristu mwiwulu. Hela chakwila twakuhwelela kushakama hamaseki hela mwiwulu, tukweti muloña wutwatelela kwikala ashinshika neyi chadiñayi Yoshuwa. Ifuku dinakwinza hakela yuma yitwakuhwelela yikashikijewa. Dichi twakatoñojoka hayikaninu yejima yakaniniyi Yehova, ninetu twakahosha netu: ‘Yejima yinashikijewi.’
Yuma Yalema yakuSpiritu
w04 12/1 12 ¶1
Yikuma Yamaneni Kufuma muMukanda waYoshuwa
24:2—Komana tata yaAbarahama Tera, wapesheleña ankishi? Hakusambila, Tera wadifukwileña kudi Yehova Nzambi wanyi. Hadaha wadifukwileña kudi nzambi wakakweji wejina daSin, mwanta wamumbanda wadiña waya mpuhu muUri. Kwesekeja nachisemwa chawaYudeya, hadaha Tera wadiña nakutuña ankishi. Hela chochu, chelili Abarahama amuleji kufuma muUri kudi Nzambi, Tera niyena wayili nindi kuHarana.—Kutachika 11:31.
NOVEMBER 22-28
YUMA YALEMA YAMWIZU DANZAMBI | ANSOMPESHI 1-3
“Nsañu Yakuhamuka niKafuta”
w04 3/15 31 ¶3
Ehudi Wayipulwishili Kudi Antu Ayikabishileña
Kafuta kakwatiliyi Ehudi, kazatikili bayi nehi hamuloña wakubabala kwindi hela hamuloña wakwila ayilumbu jawu adiña asoñamaku. Chazatikaña nkeñelu yaNzambi hichashindamena hayuma yelañawu antuku. Chuma chamukwashili Ehudi kushinda himuloña wakwila Nzambi wamukwashili hampinji yazatileñayi kwesekeja nankeñelu yindi yakwamwina antu jindi. Nzambi diyi wayinkeli Ehudi, “chakuyinkayi Yehova [antu jindi] ansompeshi, Yehova hakwikala nansompeshi.”—Ansompeshi 2:18; 3:15.
w04 3/15 30 ¶1-3
Ehudi Wayipulwishili Kudi Antu Ayikabishileña
Ehudi wasambilili ntahi kuchila ‘mpoku yindi yakabali’ yikweti wumwemu kuyedi yayihi yinateli kuswekayi mumahinindi. Hadaha welukili nindi akumutalatala. Kakavulu mpoku jakabali ajisomekeleleña kuchimunswa, kwadiña kwaswayi antu azatishaña chikasa chachidilu kuyihola. Chineli yena wazatishileña chikasa chachipiku, Ehudi waswekeli chitwa chindi “mumahinindi hankuma yachidiilu,” habulileña kutalatala nankashi ahembi amwanta. Chakadi chuma chakumukañesha, “hakumulambula mwanta wakuMowabi Egeloni mulambu.”—Ansompeshi 3:16, 17.
Yuma yakusambila yamwekeni hampinji yadiñayi muchota chaEgeloni ayishimuna wanyi. Ilaña Bayibolu yahosha hohu nawu: “[Ehudi] chakumishiliyi kulambula, hakuyila antu asendeli mulambu, nindi yenu.” (Ansompeshi 3:18) Ehudi walambwili nyilambu, nawa wayitwalili antu asendeli mulambu kwiluña daswamanyika netala daEgeloni, nawa wafuntili chelili anayi dehi. Muloñadi? Komana wadiña nanawa amayala kulonda amukiñi tahindi muloña wanshimbi hela hamuloña wanyilambu yasendeliwu? Ntahindi wakeñeleña afumiku kulonda yekali wakiñewa henohu kanda yeli mwafukwiliyi? Hela chakwila tuneluki wanyi chadiña yitoñojoka yindi, Ehudi welili chuma chakeñeleñayi.
“[Ehudi] wafuntilili kunyingochi yadiñi kuna kuGiligali, welili nindi, Nidi nakalusañu kakukuleja kankaweyi, mwanta.” Chatwesheliyi kwiñila nakumuwana Egeloni achishimuna wanyi muNsona. Komana ahembi amujinookeli wanyi? Ntahindi atoñojokeli nawu iwu kaIsarela helilihu chuma chidi chejima chakumutiyisha mwanta wawu womaku? Komana Ehudi chayiliyi nkawindi chamwekesheli nawu wayifukejeleleña amayala amwituña dawu? Hichikweti muloña nachichadiñaku, ilaña Ehudi wayilejeli antu ejima emeni kudi mwanta kufumamu, nawa welili chuma chakeñeleñayi.—Ansompeshi 3:19.
Yuma Yalema yakuSpiritu
w05 1/15 24 ¶7
Yikuma Yamaneni Kufuma muMukanda waAnsompeshi
2:10-12. Twatela kutaña Bayibolu mafuku ejima kulonda tubuleña ‘kuvulamena mwejima mwatwilañayi Yehova chachiwahi.’ (Masamu 103:2) Anvwali atela kudizisha anyanawu chalala chaMwizu daNzambi.—Kuhituluka 6:6-9.
NOVEMBER 29–DECEMBER 5
YUMA YALEMA YAMWIZU DANZAMBI | ANSOMPESHI 4-5
“Yehova Nazatishi Ambanda Ayedi Kupulwisha Antu Jindi”
w15 8/1 13 ¶1
‘Nanyamukili naKwikala Mama Yawu muIsarela’
Sisera! Antu muIsarela afwileña mutentu niwoma hakutiya idi ijina. Kudifukula nichisemwa chawaKenani chadiña chatama muloña antu alambwileña anyana nikwila wuvumbi mutembeli. Antu ahandileña ñahi mwituña mwayuulileñayi mukulumpi wamashidika awaKenani niamashidika indi? Kamina kaDebora kamwekeshaña nawu ñendelu yakalili mwituña nawa kwosi antu ashakamineña munyikala. (Ansompeshi 5:6, 7) Fwikijenu antu chaswamujokeleñawu mumasaña, mujimpidi nichachinineñawu kudima hela kushakama munyikala yakadi mpwembu nichatiyileñawu woma kwenda munyikwakwa nawu akuyikwata, kuyisendela anyanawu nikukama nawañodi jawu chakuyikanjikija.
w15 8/1 13 ¶2
‘Nanyamukili naKwikala Mama Yawu muIsarela’
Iku kukala kwamwekeni hadi yaaka 20, sampu Yehova chamweniyi nindi antu jindi oma nyichima anakukeña kuhimpa hela kwesekeja nakamina konenawu kaDebora naBaraka kakwila nawu, ‘Nichinanyamukili ami Debora, nichinanyamukili nakwikala mama yawu muIsarela.’ Tweluka wanyi neyi Debora ñoda Lapidoti wadiña mama yawantu, ilaña iyi nhoshelu yekala yachifwikija. Hela chochu, Yehova wamwinkeli Debora mudimu wakukiña iwu munza neyi chelañayi mama yawantu. Yehova wamwilili Debora kulonda yamuleji Nsompeshi Baraka, iyala wachikuhwelelu kuya nakulwa naSisera.—Ansompeshi 4:3, 6, 7; 5:7.
w15 8/1 15 ¶2
‘Nanyamukili naKwikala Mama Yawu muIsarela’
Yahela watoñojokeli mwakwilila. Wamutwalili Sisera kukapeka kakunookela. Sisera wamulejeli Yahela nindi neyi kukwinza muntu wunakumukeña bayi yamulejaku. Chakaminiyi wamubutili nawa chalombeliyi menji, yena wamwinkeli mayeli. Mukapinji kantesha hohu, Sisera wakamini mutulu twatweni. Yahela wanoneli yozelu yazatishileñawu ambanda ashakamineña mumatenti, hela netu lubwambu nichuma chakupompa nachu itenti. Chabandaminiyi kwakwihi namutu waSisera, wakoñeli mudimu wakutiyisha woma wakwikala mukwakutenda waYehova. Neyi chakwila washintajalili chadi kumuletela kukala. Watoñojokeli hadi antu jaNzambi nichayiyandishiluwu kudi iwu iyala hadi yaaka yayivulu? Indi kwiji watoñojokeli hakukooleka kwadiñayi naku kwakumwimenaku Yehova? Nsona hijashimunaku. Tweluka hohu netu wamujahili Sisera. Sisera wafwili.—Ansompeshi 4:18-21; 5:24-27.
Yuma Yalema yakuSpiritu
w05 1/15 25 ¶5
Yikuma Yamaneni Kufuma muMukanda waAnsompeshi
5:20—Tutumbwa mwiwulu twamulwililiku ñahi Baraka? Bayibolu yashimuna wanyi neyi chakwila mwabombela niwukwashu wawañelu, nvula yamalola yashimwiniwu kudi amayala aSisera akwamaana, tahindi akwakuhoña natutumbwa aSisera ashimwini yuma yabulili kumwekana. Chakadi nikujina, ñovu yaNzambi diyi.
DECEMBER 6-12
YUMA YALEMA YAMWIZU DANZAMBI | ANSOMPESHI 6-7
“Yaña naÑovu Jiwukweti”
w02 2/15 6-7
Yishina yamuBayibolu Yinateli Kuyikwasha
Gideyona, nsompeshi wadiña hakachi kawaHeberu akunyima, wadiña iyala wakola nawa watoñojokeleña mwamaana. Afwilileña kwikala nlomboli yawaIsarelaku. Hela chochu, hamutondeliwu nawu yekali nlomboli Gideyona hakeñeleña kudilemeshaku. Walumbulwili nindi, “Chisaka chetu dichi chakuminamu hadi akwaManase, ninami aweni kumutaña watata yami ami yami kansi.”—Ansompeshi 6:12-16.
w05 7/15 16 ¶3
“Mpoku Yakabali yaYehova niyaGideyona”
AMidiyani anakumona kukala. Kukashimuka hohenohu, anafumpi jinsaba 300, anavumishi jimpuña 300, nawa antu 300 anabidiki nezu datiyakana. Iku anafwi mutentu namazu abidikiliwu “Mpoku yakabali yaYehova niyaGideyona, wo-o!,” aMidiyani niwena anatachiki kukaloka. Chineli analuwankani, amabwambu jawu niayilumbu jawu. Amayala 300 anemani kwesekeja nachinayilejiwu, nawa Nzambi naluwañeshi ayilumbu jawu kulonda aditapoli wumu namukwawu. Chilombu chejima anachikwati, nawa ejima anakutemuka anakuyijaha, nawa aMidiyani ejima anayijilumuni. Ambanji anayijilumuni chikupu.—Ansompeshi 7:19-25; 8:10-12, 28.
Yuma Yalema yakuSpiritu
w05 1/15 26 ¶6
Yikuma Yamaneni Kufuma muMukanda waAnsompeshi
6:25-27. Gidiyona wazatishili kashinshi kulonda yabuli kuhilisha akwakudikaña nindi. Dichi neyi tunakushimwina nsañu yayiwahi, twatela kwikala asoñama kulonda tubuleña kuneñesha antu nanhoshelu yetu.
DECEMBER 13-19
YUMA YALEMA YAMWIZU DANZAMBI | ANSOMPESHI 8-9
“Kudizoza Kwabadika Kudinka Wanta”
w00 8/15 25 ¶3
Mwamanishaña Ñahi Kukala?
Gidiyona hazuñileñayi njita nawaMidiyani, watambikili muchidi waEfweremi kulonda amukwashi. Hela chochu, chelili njita yinamani dehi, aEfweremi amuhilili Gideyona nawu wayitambikili wanyi hatachikili njita kulonda ayi nakuzuña nindi. Iyi nsañu yashimuna nawu “amuhoshola nikumuhoshola chacheni.” Gideyona wayakwili nindi: “Indi ami chumanyi chineli chakwesekana nanenu? Nyikabu yavinyu yinanonojoli Efweremi hiyinabadiki yanakuñuliyi Abiyezeruku? Nzambi nayinki tulambu awaMidiyani, wowu aOrebi naZeyebi; indi ami natwesheli kwila chumanyi chakweseka nanenu?” (Ansompeshi 8:1-3) Chineli watondeli mazu amawahi nawa wayihosheli mukuwunda, Gideyona watondolweleli yikonkojola. Chinamwekani neyi antu akumuchidi waEfweremi akeñeleña kuya mpuhu nawa adiña adivwimba. Hela chochu, chumichi hichamukañesheli Gideyona kuleta kuwundaku. Komana ninetu kwila twila chuma chochimu nehi?
Kudikehesha Chikwalemena
Gideyona wadiña wadikehesha chikupu. Kañelu kaYehova chamwekeniyi kudi yena, Gideyona wamwekesheli kudikehesha hakutoñojoka kwafumayi. (Ansomp. 6:15) Hanyima yakwiteja mudimu wamwinkeliwu kudi Yehova, Gideyona wakeñeleña kwiluka chakuzata mudimu nawa walombeli wukwashu kudi Yehova. (Ansomp. 6:36-40) Gideyona wadiña wahamuka. Ilaña wazatileña mukubabala nawa namaana. (Ansomp. 6:11, 27) Wazatishili wanyi chifulu chindi kulonda yayi mpuhu. Ilaña chakumishiliyi mudimu windi, wafuntili kumukala wawu namuzañalu.—Ansomp. 8:22, 23, 29.
w08 2/15 9 ¶9
Endenuña muNjila jaYehova
Hakwila nawu twikali amabwambu jaNzambi, twatela kwikala “nayitoñojoka yakudizoza.” (1 Pet. 3:8; Mas. 138:6) Mukapetulu 9 kamukanda waAnsompeshi anashimuni kudizoza chikwawahila. Yotama mwana kaGideyona weyala wahosheli nindi: “Hamwaka nyitondu yayili nakuwahisha mwanta wayu.” Wateneni mutondu wamuolive, mutondu wachikuyu nimutondu wamuvinyu. Nyitondu yeniyi yemeneneñaku antu ashinshika abulili kukeña kuyula akwawu aIsarela. Ilaña mutondu wanyiña—wazatishileñawu hohu neyi nchawa—wemeneneñaku mwanta Abimeleki wadinyamuna, wakeñeleña kuyandisha akwawu. Hela chakwila ‘wekalili mwanta wawaIsarela hadi yaaka yisatu,’ wafwili swayi. (Ansompeshi 9:8-15, 22, 50-54) Komana kwikala “nayitoñojoka yakudizoza” hichuma chachiwahi nankashi!
Yuma Yalema yakuSpiritu
it-1 753 ¶1
Ifwodi
Hela chakwila Gideyona wadiña nayitoñojoka yayiwahi yakwanakana Yehova chayikwashiliyi aIsarela kushinda nikumulemesha Nzambi, Ifwodi “[delili] muhetu wakufwa Gideyona niakwetala dindi” muloña aIsarela elili wuvumbi wakuspiritu nanochu chiyadifukwiliku. (Ans 8:27) Hela chochu, Bayibolu yahosha wanyi nawu Gideyona wadifukwili kwifwodi; kwambukaku, kapostolu Pawulu wamuteneni nindi wudi hakachi ‘kevu deneni’ dawayinsahu jaYehova ashinshika adiñaku henohu akwaKristu kanda.—Heb 11:32; 12:1.
DECEMBER 20-26
YUMA YALEMA YAMWIZU DANZAMBI | ANSOMPESHI 10-12
“Yefwata Wadiña naWubwambu Wakola naYehova”
w16.04 7 ¶9
Kwikala Ashinshika Kwatukwashaña Kwikala naWubwambu Wawuwahi naNzambi
Hadaha yuma yamumwekeneni Yosefu yamukwashili Yefwata. Watela wadizilili kudi Yosefu chayitiyililiyi amanakwindi luwi hela chakwila amuheleli. (Kutachika 37:4; 45:4, 5) Kutoñojoka hachumichi kwamukwashili Yefwata kwila yuma yamutiyishili Yehova kuwaha. Yuma yeliliwu amanakwindi yamuneñesheli Yefwata. Ilaña kuhakwilaku ijina daYehova niantu jindi chadiña chuma chalema kubadika chaneñeliyi Yefwata. (Ansompeshi 11:9) Wafwilileña kwikala washinshika kudi Yehova. Yehova wamukiswilili nikukiswila aIsarela muloña wayuma yeliliyi.—Aheberu 11:32, 33.
it-2 27 ¶2
Yafweta
Yafweta, washikeneneña kwilahu chuma chineli wadiña nlomboli. Watemesheli mazu kudi mwanta wawaAmoni, nakumuleja nindi Amoni wenjili nakulukuka mpata yawaIsarela. Mwanta wakwili nindi iyi himpata yatambwiliwu aIsarela kudi Amoni. (Ans 11:12, 13) Aha Yafweta bayi neyi wamwekesheli nindi wadiña muntu wamukunkulwayi hela mushidika wabula kudiza chikupuku, ilaña wamwekesheli nindi wadiña weluka chikupu nsañu yakunyima sweje-e chelileñayi Nzambi nawantu jindi. Yena wakaanini mwahosheliwu aAmoni, nakumwekesha nindi (1) Isarela hatambwili ituña daAmoni, Mowabi hela Edomiku (Ans 11:14-18; Kuh 2:9, 19, 37; 2Ku 20:10, 11); (2) Amoni diwu adiña wanyi nampata yafwilileñawu hampinji yashindiliwu aIsarela, muloña yadiña mumakasa awaKenani Amori nawa Nzambi wamuhanini mwanta wawu Sihoni, nimpata yawu mumakasa awaIsarela; (3) aAmoni atobokelihu wanyi nawaIsarela hampinji yashakaminiwu nawu yaaka 300; hanu dinu chumichi chafumini hankahi?—Ans 11:19-27.
it-2 27 ¶3
Yafweta
Yefwata walumbulwili hashindameneni iyi nsañu chamwekesheliyi nindi muniyi nsañu mwabombeleli nsañu yakudifukula. Washimwini nindi Yehova Nzambi wayinkeli aIsarela idi ituña nawa muloña wachumichi wukwiteja wanyi kuhana kadiluña hela kantesha kudi antu adifukwileña kudi nzambi wakutwamba. Wamuteneni Kemoshi nindi hinzambi waAmoni. Amakwawu ahoshaña nawu waluwañesheli hohu. Hela chakwila, nzambi yawaAmoni wadiña Milikomi nawa Kemoshi wadiña nzambi yawaMowabi, awa matuña adikumashana ejima adifukwileña kudi anzambi akutwamba. Nawa Solomoni waleteli kudifukula kwaKemoshi muIsarela muloña wawambanda akwacheñi asumbwiliyi. (Ans 11:24; 1An 11:1, 7, 8, 33; 2An 23:13) Kubombelahu, antu amakwawu adiza ashimuna nawu izu dakwila nawu “Kemoshi” datalisha mukwila nawu “Mukwakufwomona, Mukwakushinda.” (Talenu mukanda waGesenius’s Hebrew and Chaldee Lexicon, wabalumunawu kudi S. Tregelles, 1901, ifu. 401.) Yafweta wateneni iwu nzambi nindi hinzambi alemesheliwu aAmori ‘wafwomweneña’ hela ‘kushinda’ antu amakwawu nakuyinka mpata.
Yuma Yalema yakuSpiritu
it-2 26
Yafweta
Yafweta Mwana Wamuchiputa. Mama yaYafweta wadiña “mwana kachivumbi” hela chochu, hichinayi mukwila nawu Yafweta wavwalikilili muwuvumbi hela muchiputaku. Hakusambila mama yindi wadiña chivumbi henohu kanda yasumbuki kudi Gileyadi, neyi chochadiñayi Rahaba chivumbi ilaña nkumininaku yenza yasumbuka kudi Salimoni. (Ans 11:1; Yos 2:1; Mat 1:5) Chuma chinakumwekesha nawu Yafweta hadiña mwana wamuchiputaku chamwekeni hampinji yelili amanakwindi akuwanamu amuhañi kuchina nawu wamba katambula nawu wuswana hamu. (Ans 11:2) Nkumininaku, Yafweta amwitejeli kwikala nlomboli yawamayala akuGileyadi (mwadiña amanakwaYafweta akuwanamu adimweneña nawu abadika). (Ans 11:11) Kubombelahu, walambwili mulambu kudi Nzambi hatabanaka. (1Ans 11:30, 31) Hadi kutwesha kwila yuma yejimiyi neyi chakwila wadiña mwana wamuchiputaku, muloña nshimbi yashimwini nawu: “Mwana wumuchiputa kwiñila muchipompelu chaYehova nehi; hela kwikiñu dekumi mwanindi kwiñila muchipompelu chaYehova nehi.”—Kuh 23:2.
DECEMBER 27–JANUARY 2
YUMA YALEMA YAMWIZU DANZAMBI | ANSOMPESHI 13-14
“Yuma Yatela Kudizilaku Anvwali Kudi Manowa niÑodindi”
Anvwali—Dizishenu Anyanenu Kufumisha Kuwansi Wawu
Shinshikenu hachakutalilahu chaManowa wakuchisaka chaDani, washakamineña mumusumba waZora wamuIsarela wakushankulu. Kañelu kaYehova kamulejeli ñoda Manowa wadiña nshinta nawu wukavwala mwana weyala. (Ansomp. 13:2, 3) Chakadi nikujina, Manowa niñodindi adiña ashinshika azañaleli chikupu hachuma chayikaninuwu. Hela chochu, chayileñeleli atachiki kwakama chikupu. Dichi Manowa walombeli nindi: “Eyi Mwanta mwani, ona muntu waNzambi watemesha, enzi cheñi kudetu atuleji mutwakamwila mwana wakavwalika.” (Ansomp. 13:8) Manowa niñodindi adiña nakwakama chakamukulishawu mwanawu. Chakadi nikujina amudizishili mwanawu weyala Samisoni, nshimbi jaNzambi, nawa hamuloña wakuzata nañovu mwanawu wakulili chiwahi. Bayibolu yahosha nawu: ‘Spiritu yaYehova yatachikili kumwendesha [Samisoni].’ Chafuminumu, Samisoni wakoñeli yihayamisha yayivulu yañovu chikupu hamu neyi nsompeshi wamuIsarela.—Ansomp. 13:25; 14:5, 6; 15:14, 15.
w05 3/15 25-26
Samisoni Washindileña Muloña Yehova Wamwinkeli Ñovu!
Samisoni chakulileñayi, “Yehova wamukiswilili nkisu.” (Ansompeshi 13:24) Ifuku dimu Samisoni wayili kudi tata yindi namama yindi nakuyileja nindi: “Namoni muTimina mumbanda wakudi anyana kwaFwilistinu; dichi dinu kansumbwiliyi.” (Ansompeshi 14:2) Ahayamini chikupu. Chatela mwanawu yamwini aIsarela kudi ayilumbu jawu, ilaña yena wakeñeleña kuya nakusumbwilaku. Nshimbi jaNzambi jakaanishili antu kusumbwila kudi antu adifukwileña kudi anzambi akutwamba. (Kwidika 34:11-16) Dihafumini anvwali jindi hiyakumukaanisha nawu: “Hadi ana kweyi hela hadi akwetu twasemuka nawu, kwosi mumbandaku tahindi, Mwaka wuyi wakasumbuli mumbanda wakudi aFwilistinu ayidima?” Hela chochu, Samisoni wamukanjikijili nindi: “Nsumbwiliyi; namumoni himuwahi.”—Ansompeshi 14:3.
Yuma Yalema yakuSpiritu
w05 3/15 26 ¶1
Samisoni Washindili Muloña Wawukwashu waYehova!
Munjilanyi Samisoni mwamumweneniyi mumbanda wakuFwilistinu nindi “himuwahi”? Bayi neyi muloña wakwila wadiña “walubanji, walamba, wamuwahi” neyi chahosha mukanda waMcClintock niwaStrong Cyclopediaku, “ilaña wadiña wamuwahi munjila yakwila kudi chuma chafwilileñayi hela katetekelu.” Wafwilileña kwiladi? Ansompeshi 14:4 yashimuna nawu Samisoni “wakeñeli hakuvulumwina nsañu nawaFwilistinu.” Dichuma chaletesheli Samisoni yamukeñi iwu mumbanda. Samisoni chakulileñayi, ‘spiritu yaYehova hiyikutachika kumwendesha,’ hela kumusañumuna kwilahu chuma. (Ansompeshi 13:25) Spiritu yaYehova diyi yamuletesheleña Solomoni kulomba nindi amusumbwili mumbanda nikumukwasha kuzata mudimu wakwikala nsompeshi hadi aIsarela. Komana Samisoni wawanini njila yakeñeleñayi? Tuhanjekenu ntahi Yehova chamulejeliyi nindi wukumukwashaña.