Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
© 2023 Watch Tower Bible and Tract Society of Pennsylvania
MARCH 4-10
YUMA YALEMA YAMWIZU DANZAMBI | MASAMU 16-17
“Yehova, Nsulu Yami yaKuwaha”
Enu Atwansi, Munateli Kwikala Nachihandilu Chachiwahi
TONDENU AMABWAMBU AMAWAHI
11 Tañenu Masamu 16:3. Davidi welukili chakuwana amabwambu amawahi. Watiyileña ‘kuwaha’ kwikala nawamabwambu amukeñeli Yehova. Wayiteneni nindi “akwakujila,” muloña alondeleleña nshimbi jaNzambi jaloña. Ñimbi yamasamu mukwawu niyena dichatiyiliyi hakutonda amabwambu. Wasonekeli nindi: “Nadikunda nanawa akwakameyi, ninanawa ahembaña muwafumbaña.” (Mas. 119:63) Neyi chitwamona muchibaaba chinafumihu, ninenu munateli kuwana amabwambu amawahi hakachi kawantu amutiyaña Yehova woma nikumwovwahila. Awa amabwambu munadibombeli antu akweti yaaka yashiyashana.
‘Banjilenu Yehova Chawahayi’
Davidi wembili nindi: “Yehova diyi iseka dami danañambwiluwu, diyi iseka damulupasa lwami; yeyi wankwatilaña chinjikijilu chami chakusakula nachu. Ñinza jami anampimini kwakuwahi cheñi.” (Mas. 16:5, 6) Davidi wazañaleli chikupu ‘neseka,’ dindi dikwila nawu, wubwambu wawuwahi naYehova nikukooleka kwadiñayinaku kwakumuzatila. Kufwana Davidi, tunateli kumona kukala kwakuvulu, ilaña twatela kwiluka netu tukweti nkisu yayivulu yakuspiritu. Dichi tutwalekenuhu kuzañalala nakudifukula kwalala ‘nikuhameka’ tembeli yaYehova yakuspiritu.
w08 2/15 3 ¶2-3
Mushenu Yehova Hambidi Yenu Mafuku Ejima
2 Wejima wetu tunateli kudiza yuma yayivulu kuyuma yazatiluwu antu ayampuhu asonekawu muBayibolu adi neyi Abarahama, Sara, Mosi, Luti, Davidi, Esita, kapostolu Pawulu niamakwawu. Hela chochu, nsañu yawantu abula kutiyakana nankashi niyena yinateli kutuhetesha. Kutoñojoka chikupu hampanji jamuBayibolu chinateli kutukwasha kuzata neyi cheliliyi ñimbi yamasamu hakuhosha nindi: “Namushi Yehova kumesu ami mafuku ejima. Chadiyi yena kuchikasa chami chachidiilu hijikunkumaku.” (Masamu 16:8) Indi mazu wenawa anakulumbululadi?
3 Kakavulu ishidika wazatishileña mpoku yakabali nachikasa chindi chachidiilu, nakubula kukiña mbadi yachidiilu nankebu yakwatileñayi nachikasa chachimunswa. Hela chochu, adiña nakumukiña kudi mukwawu wadiña nakulwa kwakwihi nambadi yindi yachidiilu. Neyi chakwila tumusha Yehova muyitoñojoka nikwila nkeñelu yindi, wukutukiña. Dichi tushinshikenu nsañu yamuBayibolu chiyinateli kukolesha chikuhwelelu chetu kulonda ‘kumusha Yehova hambidi yetu mafuku ejima.’
Yuma Yalema yakuSpiritu
it-2 714
Kantu Kadisu
Izu dachiHeberu da ʼi·shohnʹ (Kuh 32:10; Pr 7:2), neyi adizatishila hamu na ʽaʹyin (disu), anateli kudibalumuna nawu “kantu kanyanya kadisu”; munjila yoyimu, bath (mwana wamumbanda) adizatisha haMukeña 2:18 datalisha mukwila nawu “mwana kadisu wamumbanda,” nhoshelu yejima yatalishaña kukantu kadisu. Hakukonkomwena chikuma awa amazu ayibomba haMasamu 17:8 (ʼi·shohnʹ bath-ʽaʹyin), ayibalumuna nawu, “kantu kanyanya, mwana kadisu wamumbanda” (“kantu kadisu,” NW). Atela atenaña kamwevulu keyi kanyanya kamwekanaña hadisu damuntu wacheñi neyi wumutala.
Disu dekala dadovu nawa dakola wanyi; nikalusuki hela kalunkuñu kadi hakachi kandabu nadisu dadeni dinateli kwiluka. Ikowa dadeni dabuta hakantu kadisu (cornea) atela kudikiña nikudakamena mpinji yejima, muloña neyi hahita muleñwija hela ela ivu, muntu nateli kuleka kumona hela kuputa mesu. Nañovu nimunjila yakuwunda Bayibolu yazatisha nhoshelu yakwila nawu “kantu kadisu” hakutena chuma chitwatela kukiña nikwakamena. Nshimbi jaNzambi twatela kujakamena nijena. (Yis 7:2) Hakutena Nzambi Nzambi chakameneneñayi aIsarela neyi tata yawantu, Kuhituluka 32:10. 32:10 yahosha nawu Wahembeli muza neyi “kantu kadisu dindi.” Davidi walombeli nindi amukiñi nikumwakamena kudi Nzambi “neyi kantu kadisu.” (Ms 17:8) Wakeñeleña Yehova akoñihu chuma mukunyakashana neyi amulukuka kudi ayilumbu. (Esekejenu Zek 2:8; muchiHeberu ba·vathʹ ʽaʹyin, “disu,” adizatishamu.)—Talenu DISU.
MARCH 11-17
YUMA YALEMA YAMWIZU DANZAMBI | MASAMU 18
“Yehova Diyi . . . Wampulwishaña”
“Muzañalu waYehova Diyi Mpwembu Yetu”
Bayibolu yamwesekeja cheñi Yehova nayuma yabulaña kwona. Amutena nawu “Ilola daIsarela,” nawu “ilola,” nawa “mpwembu.” (2 Samweli 23:3; Masamu 18:2; Kuhituluka 32:4) Anadifwani ñahi? Chochina chekala ilola deneni heluña dimu, chakadi kuswijewa, Yehova niyena wakola chakwila nateli kuyikiña mpinji yejima.
5 Mumukanda waMasamu mwekala yakutalilahu yayivulu yalumbululaña yilwilu yekala naYehova. Chakutalilahu, Isamu 84:11 damutena Yehova nawu “hiitena nawa hinkebu” muloña diyi Watwinka chejeji, wumi, ñovu, nawa diyi watukiñaña. Cheñi Masamu 121:5 yahosha nawu “Yehova hiwulelu kuchikasa cheyi chachidiilu.” Neyi chochatukiñaña wulelu kunkanza, Yehova niyena nateli kutukiña kumakabi, kutwinka wulelu “wakuchikasa” chindi hela “mpuula” jindi kulonda atukiñi.—Isaiah 51:16; Psalm 17:8; 36:7.
it-2 1161 ¶7
Izu
Nzambi watiyaña Izu dawambuñindi. Antu amukalakelaña Nzambi muspiritu nimuwalala anateli kumulomba Nzambi nakukuhwelela chikupu nawu wukutiya izu dawu, hichikweti muloña nedimi dikuzatishawuku. Kubombelahu, hela chakwila hitunazatishi mazuku, tunateli kumulembelela Nzambi mumuchima, Nzambi, weluka nyichima yawantu, “watiyaña” hela wukushaku muchima hichikweti muloña nachituneliku. (Ms 66:19; 86:6; 116:1; 1Sa 1:13; Ne 2:4) Nzambi watiyaña kudila kwantu anakukabishawu, watiyaña cheñi izu nikwiluka yitoñojoka yawantu adikañaña nayena nikukasila ambuñindi yuma yatama.—Kut 21:17; Ms 55:18, 19; 69:33; 94:9-11; Yer 23:25.
Chimunateli Kuumika Neyi Munakwakama
2. Anukenuña Yehova chayikwashiliyi kunyima. Chimukwanukaña yuma yayimwekeneni kunyima, kwila mutoñojoka hakukala kumwamweni nawa kumwomikili nawukwashu waYehova nehi? Neyi twanuka Yehova chinatukwashiyi kushilahu nichakwashiliyi ambuñindi akunyima, tukwikala nakuwunda kwamuyitoñojoka nawa tukumukuhwelela chikupu. (Mas. 18:17-19) Mukulumpi wejina daJoshua wahosheli nindi: “Nasoneka yuma yayivulu yañakwiliyi Yehova mukulomba, chumichi chankwashaña kwanuka mpinji yinamulombeli Yehova chuma nawa anyikachu.” Neyi twanukaña mapampa anatukwashiyi Yehova kunyima, tukwikala nañovu yakuleka kwakama.
Yuma Yalema yakuSpiritu
it-1 432 ¶2
Akerubi
Awa bayi neyi adiña ankishi akulumbisha abazileñawu nampuula nawa kwadifukwileñawu nyuza yabula kwitiya, neyi chahoshañawu antu amakwawuku. Kwesekeja nansañu yetejewu antu amavulu yawaYudeya akushankulu (Bayibolu yahoshahu jidi jejimaku), awa akerubi amwekeneña neyi antu. Ayibazileña chiwahi chikupu, amwekeneña neyi yileñaleña yawañelu nawukeleñi chikupu, nawa ayibazileña nakulondela “chikupu njila yakuyituñilamu” yamulejeliwu Mosi kudi Yehova. (Kwi 25:9) Kapostolu Pawulu walumbulwili nindi “akerubi akulema abutili hachifwiku hakujimina nshidi nanyevulu yawu.” (Heb 9:5) Awa akerubi ayishimuna nawu ekalaña kumesu aYehova: “Nakadimwekesha ami aweni kudi eyi hewulu dachijiku nawa dihinakahoshelaña naneyi. Hakachi kawakerubi ayedi adi hachimbañu chaWunsahu.” (Kwi 25:22; Kuc 7:89) Kafwampi, Yehova amutena nawu “washakama [hela, hakachi kawa] hadi akerubi.” (1Sa 4:4; 2Sa 6:2; 2Ki 19:15; 1Ku 13:6; Ms 80:1; 99:1; Isa 37:16) Muchifwikija, akerubi akalakeleña neyi “hiyuma yemenañaku ikalu” daYehova dendeshañayi (1Ku 28:18), nawa mpuula jawakerubi jamwekeshaña chakiñañayi nichidendaña swayi ikalu. Dichi Davidi, mukamina kindi kankumbu, walumbulwili Yehova chanyakeliyi kwinza swayi-swayi nakumukwasha, chidi neyi muntu “wakandamini hakerubi nakwinza iku nakutuuka.” Hela chakwila “amumweni iku wudi hampuula jaspiritu.”—2Sa 22:11; Ms 18:10.
MARCH 18-24
YUMA YALEMA YAMWIZU DANZAMBI | MASAMU 19-21
“Mawulu Anakushimuna Kulema kwaNzambi”
w04 1/1 8 ¶1-2
Ejima Abidiki Kulema kwaNzambi
DAVIDI, mwana kaYesi, hachidiñayi kansi wadiña kabiña mumukala waBelemi. Kakavulu watela wafumbwileña mesu indi mwiwulu nakutala tutumbwa nawufuku iku wudi nkawindi mumasaña nakutala nyikoku yatata yindi! Chakadi nikujina, yumiyi yateneamini kumyitoñojoka yindi, chamoneneniwu naspiritu yajila yaNzambi, wasonekeli nikwimba mazu amawahi ekala muMasamu 93: ““Mawulu anakushimuna kulema kwaNzambi; luzwizu lunakushimuna nyidimu yamakasa indi. Ilaña lushindu lwawu lunatiyakani mwahita iseki dejima, nawa mazu awu anatiyakani kwakumina iseki dejima mwashakamawu antu. Mwiwulu nalemimu itenti mwakushakama itena.”—Isamu 19:1, 4.
2 Chakadi kuhosha, chakadi mazu, chakadi izu, Yehova waleñeli mawulu ashimunaña kulema kwindi ifuku niifuku. Mpinji yejima yileñaleña yamushimekaña Nzambi, nawa neyi tutoñojokahu haniyi nsañu chinakuhana wunsahu “mwahita iseki dehima” kudi antu ejima ashakamahu kulonda amoni. Hela chochu, tukushindamena hohu hawundahu wayileñaleña yabulaña kuhoshaku. Antu ashinshika ayikonkomwenaña kumushimeka kuzatisha mazu awu. Ñimbi yaMasamu abula kutenawu ijina walejeli akakudifukula ashinshika nindi: “Mwinkenu Yehova kalemesha kamutelela muloña wakulema niñovu jindi. Mwinkenu Yehova kalemesha katelela ijina dindi.” (Isamu 96:7, 8) Antu adi nawubwambu wawuwahi naYehova elaña mwenimu. Yumanyi yadibombela mukumulesha Nzambi?
w04 6/1 11 ¶8-10
Yileñaleña Yashimunaña Kulema kwaNzambi!
8 Kuhiñahu Davidi nalumbululi chuma chakuhayamsha chaleñayi Yehova: “Mwiwulu nalemimu itenti mwakushakama itena; didi neyi kalemba wunakwidika mukapeka kindi; dazañalalaña neyi iyala mukañovu wunakutemuka lufuchi lwakudibecha. Daselaña kufuma kunsa yimu yewulu, Nawa danyeñumukaña nakushika kunsa yikwawu yewulu; kwosi chuma chabulaña kutiya iyena daduku.”—Isamu 19:4-6.
9 Neyi kudesekeja natutumbwa, itena dekala danyanya. Ilaña, itena damwekanaña kutoha muloña wamapulaneti adinyeñumukaña. Mukanda wumu washimuna nawu dalema “2 billiyoni namabiliyoni namabiliyoni amatani,” dikwila nawu dalema mapesenti 99.9 akulema kwamapulaneti ejima adinyeñumukaña! Ñovu yetena yakokaña yakwashaña iseki kunyemukaku hahalehi namakilomita 150 miliyoni chakadi kuswina kwakwihi hela kuditwala kwakulehi. Iyena dantesha hohu didashikaña hamaseki, ilaña didakwashaña yuma yejima yonaña hamaseki.
10 Ñimbi yaMasamu wahosheleña hetena muchifwikija, waditeneni nindi “mukañovu” watemukaña kufuma kunsa yewulu yimu nakushika kuyikwawu namwana nawa nawufuku deñilaña “mwitenti” nakunooka. Neyi idi itena dihuma, neyi tunakumwena hamaseki, chidi tuhu neyi dineñili “mwitenti” nakunooka. Nantetemena, damwekanaña neyi dinediki, dinakutoñeka chikupu “eyi kalemba wunakwidika mukapeka kindi.” Chineli Davidi wadiña kabiña, watiyili chikwatutaña nawufuku. (Kutachika 31:40) Wanukileña nyiteeta yetena chiwamukwshileña kutiya iyena kushilahu matahi ninyitondu. Mwamweni, dazeyeleña wanyi “halwendu” lwadu lwakufuma kumusela nakuya kumujika neyi iyala “mukañovu” wunadiloñeshi kuya halwendu lolumu.
g95 11/8 7 ¶3
Nleñi Adiwulañawu Makonu
Neyi tusakililaña chikupu muntu waleñeli yuma yejima yekalaku chikutukwasha kwiluka chikupu waleñeli yuma yejima yitunyeñumuka. Mpinji yimu Yesu wayilejeli atumbanji twindi kushinshika nkenu jamumasaña jameneneña muÑaliliya. “Dizilenu kunkenu yamwisaña chiyakulaña; hiyakabakanaña hela kuchima yakuvwalaku; Ilaña inakuyileja nami niSolomoni yomweni mukulema kwindi kwejima, havwalilihu yakuvwala yidi neyi iyi nkenu hela yimuku.” (Matewu 6:28, 29) Lubanji lwankenu lunateli kutwanukisha nawu Nzambi wakamenaña antu.
Yuma Yalema yakuSpiritu
it-1 1073
Heberu, II
Kuhiñahu kudi nkumbu yatenañayi nawu synthetic yakwila mukuku wamazu wunahiñihu, yitoñojoka yoyimu wanyi nayakusambila hela kwambula. Ilaña wukuleta yitoñojoka yayiha. Chakutalilahu Isamu 19:7-9:
Nshimbi jaYehova jalala,
jafuntishaña cheñi wumi.
Yanukishu yaYehova yalala,
yakwashaña muntu wabula maana kwikala namaana.
Kuleja kwafumaña kudi Yehova kwaloña,
kwaleteshaña muchima kuzañalala;
Nshimbi jaYehova hosi hijataminaku,
jaleñelaña mesu kutoñeka.
Kumutiya Yehova woma kwakuwahi,
kwatwalekañahu haya nyaaka.
Wunsompeshi waYehova walala;
wejima waloña.
Chibalu chamuchiyedi chamukuku wamazu chinakumanisha mukuku; Dichi, mukuku himukuku hinkumbu, dikwila nawu kubomba yitoñojoka yiyedi kwikala chuma chimu. Muchibalu chamuchiyedi chamukuku, chidi neyi “jafuntishaña cheñi wumi” niyakwashaña muntu wabula maana kwikala namaana,” dimukwilukayi ntañi chinahosheliwu nawu ‘nshimbi jaloña’ nawa nawu “yanukishu yaYehova yalala.” Nkumbu yamuchidiwu, yabulaña chibalu chatachi chamukuku nachamuchiyedi. Dichi, yitoñojoka yamukuku yinatwalekihu, nkumbu yinadifwani. Iyi nkumbu dichayitenenañawu nawu constructive.
MARCH 25-31
YUMA YALEMA YAMWIZU DANZAMBI | MASAMU 22
Kufwa kwaYesu Anakushimuni Dehi Chadimu
Amuwanini Mesiya!
16 Chikamwekana neyi Mesiya akamushiya kudi Nzambi. (Tañenu Masamu 22:1.) Maku watuleja nindi: “Haora yamuchitanu nachiwana [kwakwihi na ora yamuchisatu namwana] Yesu hakubilela nezu dañovu nindi, Eloyi, Eloyi, lama sabakatani, chaya mukwila nawu, Nzambi yami, Nzambi yami, wunanshiyilidi kanka wami?” (Maku 15:34) Yesu halekeli kumukuhwelela Tata yindi wamwiwuluku. Nzambi wamushiyili Yesu kankawindi nawayilumbu jindi chakadi kumukiña kulonda Kristu yamwekeshi kashinshi kindi kudi Yehova. Kuhitila mukubilela, Yesu washikijili mazu ekala haMasamu 22:1.
Amuwanini Mesiya!
13 Davidi waprofweteli nindi antu akamutuka Mesiya. (Tañenu Masamu 22:7, 8.) Antu amutukili Yesu hampinji yakabakeneñayi hamutondu wakuyandishila. Matewu watulejaña nindi: “Hiyakumutukola kudi antu ahitilañaku, hiyakumulembola nanyitu yawu, nawu, Eyi wasandaña tembeli, hiwukuyituña cheñi mumafuku asatu, damwini; neyi wuMwana kaNzambi, sulukaku [kumutondu wakuyandishila].” Akulumpi jawatupristu, ansoneki, niakulumpi hiyakumuhoshola nawu: “Waamwinini akwawu, yomweni hanatweshi kudamwinaku. Yena hiMwanta wawaIsarela asuluki [kumutondu wakuyandishila] katataka, tumwitiyi. Wakuhwelelaña Nzambi; neyi namukeñi amupulwishi katataka; muloña yena welaña nindi niMwana kaNzambi.” (Mat. 27:39-43) Yesu wakabakeni, ilaña wadiña wawunda nawa hahosheluhu chuma chatamaku. Dichi watwimikilili chakutalilahu chachiwahi.
Amuwanini Mesiya!
14 Akadipañila mahina aMesiya nachinjikijilu chakusakula nachu. Davidi wasonekeli nindi: “Yuma yami yakuvwala anadipañili mukachi kawu, Mupila wami hiyakusakula nachinjikijilu chakusakula nachu.” (Mas. 22:18) Ichi dichuma chamwekeni ‘amashidika awaRoma chanamupopeluwu hamutondu wakuyandishila, adipañila nimahinindi nachinjikijilu chakusakula nachu.’—Mat. 27:35; tañenu Yowanu 19:23, 24.
Yuma Yalema yakuSpiritu
w06 11/1 29 ¶7
Kumwekesha Kalemesha Chitwapompelaña Hamu
7 Kudi njila yayivulu yitunatlei kumwuekeshalamu kalemesha chitwapompelaña hamu. Njila yimu hikwikalahu hampinji yakwimba tumina twaWanta. Tumina twatuvulu atusoneka neyi kulomba nawa twatela kutwimba nakalemesha. Hazatishiliyi ,azu ekala haMasamu 22, kapsotolu Pawulu wasonekeli hadi Yesu nindi: “Nukushimuna ijina deyi kudi amanakwami; nukukushimeka mukachi kachipompelu natumina.” (AHeberu 2:12) Dichi, twatela kushakamañahu dehi muyitwamu henohu cheyamani kanda ateni kamina nawa twatela kusha muchima kumazu adi mutumina iku tunakwimba. Kwimba kwetu kumwekeshaña mazu añimbi yaMasamu wasonekli nindi: “Mushimekenu Ya! Nukumushimeka Yehova namuchima wami wejima, hakachi kezanvu dawantu oloka anapompi nimuchipompel.” (Isamu 111:1) Eña, kwimba hikumushimeka Yehova dichaleteshaña tushikeña swayi kukupompa nikuhembelela sampu kunamani.
w03 9/1 20 ¶1
Mushimekenu Yehova “Mukachi kaChipompelu”
Makonu, neyi chichadiña kunyima, ashaku ntanjikilu yakwasha natu ejima kumwekesha chikuhwelelu chawu “mukachi kachipompelu.” Ntanjikilu yimu hikwakulahu hakupompa hakwakula malwihu ehulañawu mwizaza hakupompa kwachipompelu. Bayi mudiwula iyi ntanjikiluku. Chakutalilahu, ñakwilu yamwekeshaña chitunateli kushinda hela kutondolwela kukala yinateli kukolesha amanakwtu kutwalekahu kulondela yishina yamuBayibolu. Ñakwili yalumbululaña nsona yinateniwu bayi yikweti mazu akusoneka dehi hela yikweti yikuma yimwasondujola yinateli kukolesha amakwawu kutachika kusandujola neyi anakudiza nkawawu.
APRIL 1-7
YUMA YALEMA YAMWIZU DANZAMBI | MASAMU 23-25
“Yehova Diyi Kabiña Kami”
“Yehova Diyi Kabiña Kami”
Yehova walombolaña nyikoku yindi. Nyikoku yakadi kabiña yajimbalaña. Munjila yoyimu, tunakukeñeka wukwashu hakwila tuwani njila yayiwahi. (Yeremiya 10:23) Davidi walumbulwili nindi Yehova walombolaña antu jindi “kumunyenvu” nikumaluña “akunookela akutukumwina chiwahi.” Wayilombolaña “mumajila akuloña.” (Mavasi 2, 3) Awa maluña achifwikija akudiishila anyama atukwashaña kumukuhwelela Nzambi. Neyi tulondelaña munakutulombolawu naspiritu neyi chahosha Bayibolu, tukushakamaña chihandilu chachiwahi, chakudiluñisha nawa chakiñewa.
“Yehova Diyi Kabiña Kami”
Yehova wakiñaña nyikoku yindi. Chakadi kabiñ wawu, nyikoku yatiyaña woma. Yehova walejaña antu jindi nindi hiyatela kutiya womaku, bayi tuhu nihampinji yinakwendawu “muchinekineki chamwidima wasweja”—mpinji yinateli kumwekena neyi himpinji yamwidima chikupu. (Vasi 4) Yehova wayikiñaña, nawa wadiloñesha kuyikwasha. Nateli kuyinka akakudifukula indi maana niñovu yinateli kuyikwasha kuumika kukala kunakumonawu.—AFwilipi 4:13; Yakoba 1:2-5.
“Yehova Diyi Kabiña Kami”
Yehova wadiishaña nyikoku yindi. Nyikoku yashindamenaña hadi kabiña kulonda ayi nakuyidiisha. Ninetu twakeñekaña kutudiisha kuspiritu nawa Nzambi hohu diyi wunateli kutudiisha. (Matewu 5:3) Okuwaha, Yehova wekala Mukakuhana wachisambu, waloñeshelaña ambuñindi mesa. (Vasi 5) Bayibolu ninyikanda yashindamena haBayibolu, chidi neyi onu mukanda wumunakutaña, hinjila yimu mwatwikutishilañayi kuspiritu chatukwashaña kwikala nachihandilu chachiwahi ninkeñelu yaNzambi.
Yuma Yalema yakuSpiritu
Keñenu Kuloña Namuchima Wenu Wejima
KUHITILA Mwizu dindi nimuspiritu yindi yajila, Yehova nakulombola antu jindi “munjila jakuloña.” (Mas. 23:3) Chineli hitwawaninaku, twekalaña nachaaku chakusenuka muniyi njila yakuloña. Chakeñekaña kuzata nañovu hakwila nawu tutachiki cheñi kwila yuma yaloña. Chumanyi chikutukwasha kwila yuma yaloña? Kufwana Yesu, twatela kukeña kwila yuma yaloña.—Tañenu Masamu 45:7.
2 Indi ‘njila jakuloña’ hichumanyi? Iji ‘hinjila’ jashindamena hanshimbi jaYehova jakuloña. Mwidimi dachiHeberu nichiGriki, “kuloña” kwatalisha kuchuma “choloka” dikwila nawu kukakela kunshimbi jaloña. Chineli Yehova diyi “wushakaminu wakuloña,” akwakudifukula indi atiyaña kuwaha kumulomba kulonda yayikwashi eluki njila yaloña yatela kulondelawu.—Yere. 50:7.
3 Tunateli kumuzañalesha Nzambi chikupu neyi tukakela kunshimbi jindi jaloña namuchima wetu wejima. (Kuhit. 32:4) Kumuzañalesha kwatachikilaña kukudiza chikupu hadi Yehova Nzambi kuhitila Mwizu dindi Bayibolu. Neyi tukudizaña chikupu hadi Yehova, ifuku niifuku tukukundama kwakwihi nayena, nawa tukukeña kuloña kwindi. (Yak. 4:8) Twatela cheñi kulondela wunlomboli waMwizu daNzambi donenewa neyi hitukufuukula hayuma yalema muchihandilu.
APRIL 8-14
YUMA YALEMA YAMWIZU DANZAMBI | MASAMU 26-28
Davidi Chakolesheliyi Kashinshi Kindi
w04 12/1 14 ¶8-9
Endunu Munjila Yakashinshika
8 Davidi walombeli nindi: “Nshinshiki, eyi Yehova, nawa ñeseki; tookeshaku yitoñojoka yami yayeni yamukachi nimuchima wami.” (Masamu 26:2) Nshiya yekala mukachi kamujimba. Muchifwikija, nshiya yemenañaku yitoñojoka yamuntu yakunama nichinakutiyayi. Nawa muchima wachifwikija wemenañaku wuntu wamukachi, chekalayi, chatiyañayi niyuma yelukayi. Davidi chamulobmeliyi Yeheva nindi amushinshiki, walombeleña nindi ashinshiki chiwahi yitoñojoka yindi yamukachi nichatiyañayi.
9 Davidi walembeleli nindi nshiya jindi nimuchima windi awuwahishi. Yehova watutookeshaña ñahi chitwekala mukachi? Davidi wembili nindi: “Nukumushimeka Yehova, wunanfumbi. Nimumpinji yawufuku, yitoñojoka yami yayeni yamukachi yañololaña.” (Masamu 16:7) Chumichi chinatalishi mudihi? Chinatalishi mukwila nawu kufumba kwaNzambi kwamushikili hamuchima Davidi, kwahimpili yitoñojoka niyuma yafwilileñayi. Dichinateli kumwekana nikudi etu neyi twiteja kufumba kutwatambwilaña Mwizu daNzambi, añimenu indi, nikuloñesha kwindi kushakama mudi etu. Mpinji yejima neyi tulombaña netu Yehova atutokeshi chikutukwasha kutwalekahu kwenda munjila yakushinshika.
w04 12/1 15 ¶12-13
Endunu Munjila Yakashinshika
12 Hakutena chuma chikwawu chamukwashili kutwalekahu kwikala washinshika, Davidi walobmeli nindi: “Hinadikundaña nawantu adimbanañaku, Nawa natondolwelaña antu adiswekaña chekalawu. Nahela kwendela hamu nawakanshidi, Nawa nahela kudikunda nawantu atama.” (Isamu 26:4, 5) Davidi washakamineña wanyi nawantu atama. Waheleli amabwambu atama.
13 Indi etu? Komana twashakamaña nawantu abulaña kuhosha chalala kuhitila mumaprogilamu aha TV, mavidiyo, mafoto, haintaneti hela yuma yikwawu? Komana twatondolwelaña antu adiswekaña chekalawu? Antu amakwawu kushikola hela kumudimu anateli kukwata wubwambu nanetu hanyiloña yabula kutelela. Munakukeña kudikunda chikupu nawantu abulaña kwenda muchalala chaNzambi? Akakusekesha akutwamba neyi kwiji anakukeña kudiza henohu anakukeña kuyifumisha kudi Yehova. Indi neyi muchipompelu mudi antu akoñaña yuma yatama? Niwena adiswekaña chekalawu. Jayson, ichi hinkoñi wakuzatila, wadiña nawamabwambu adi neyi awa. Wahosheli hadi wena nindi: “Ifuku dimu wumu wanlejeli nindi: ‘Yuma yitunakwila makonu yakala wanyi mulokaayi kakaha chikenza, wejima wetu twakafwa. Tukeluka wanyi nijamwekeni.’ Iyi nhoshelu yamukwashi kwiluka chatela kwilayi. Inakukeña kufwa wanyi neyi kaayi kakaha kanashiki.” Jayson walekeli kudikunda nanana amabwambu. Pawulu wasonekeli nindi: “Bayi ayidimbaku. Kudikunda nawantu atama kwakisañanaña yilwilu yayiwahi.” (1 AKorinda 15:33) Chalema nankashi kubula kudikunda nawamabwambu atama!
w04 12/1 16 ¶17-18
Endunu Munjila Yakashinshika
17 Tabanaka, kushilahu nikameña kachu kamulambu, didadiña iluña dakudifuukwila kudi Yehova muYerusalema. Davidi chaswejeliyi kukeña idi iluña, walombeli nindi: “Yehova, nakeña itala deyi muwashakamaña, Mwiluña mwashakamaña kulema kweyi.”—Isamu 26:8.
18 Komana twakeña kuya kumaluña itwadifukwilaña kudi Yehova? Matala awanta ejima nimaprogilamu akuspiritu ekalañaku diwu ekala maluña akudifuukula kwalala mwiluña mutudi. Kubombelahu, twekalaña nakupompa kweluña, kwañinza nikupompa kwamaneni kwadimena. “Yanukishu” yaYehova ayihanjekañahu hakupompa kwamuchidiwu. Neyi twiluka ‘chakuyikeña chikupu, tukufwilaña kupompa mpinji yejima nikutiyilila nakanañachima.’ (Isamu 119:167) Kwenoku kuwaha kwikala nawakwetu akakwitiya akeña yuma yitwakeña nawa akutukwasha kutwalekahu kwikala ashinshika!—AHeberu 10:24, 25.
Yuma Yalema yakuSpiritu
w06 7/15 28 ¶15
Yehova Wamwinaña Antu Akabishañawu
15 Davidi ñimbi yaMasamu wembili nindi: “Hela chakwila tata nimama akunshiya, Yehova yomweni wukuñakamena.” (Isamu 27:10) Chatukundejaña hakwiluka netu Yehova watukeña chikupu kubadika anvwali awuntu! Ochichakataña neyi nvwali akukaana, akuhemba chatama hela akushiya chisayikila, ilaña Yehova watwakamenaña. (ARoma 8:38, 39) Anukenu nenu Nzambi waswinaña kwakwihi nawantu akeñayi. (Yowanu 3:16; 6:44) Hela chakwila ayikabishileña kudi anvwali jenu awuntu, ilekenu nenu ayikeña kudi Tata yenu wamwiwulu!
APRIL 15-21
YUMA YALEMA YAMWIZU DANZAMBI | MASAMU 29-31
Kubabesha—Kwamwekeshaña Nawu Nzambi Watukeña
it-1 802 ¶3
Kumesu
‘Kusweka kumesu’ kwatalisha mwamuvulu, kwesekeja nachuma chimunakuhoshahu. Neyi Yehova Nzambi nasweki chamesu indi kakavulu chatalisha mukwila nawu naleki kuhana wuselewa windi hela ñovu jindi. Chumichi chinateli kumwekana neyi muntu hela antu anovwahili wanyi, chidi neyi muza waIsarela. (Yob 34:29; Ms 30:5-8; Isa 54:8; 59:2) Mpinji yikwawu chinateli kutalisha mukwila nawu Yehova nadisweki yomweni kubula kukoñahu chuma sampu mpinji yatelela. (Ms 13:1-3) Davidi chalombeliyi nindi “Futalelaku chamesu eyi kunshidi jami,” wamulombeleña Nzambi kulonda amwanakeni nshidi jindi.—Ms 51:9; esekejenu Ms 10:11.
Zañalalenu Mukumuchiñilila Yehova
Kubabesha kwafumaña kudi Yehova chikwatukwashaña tunateli kukwesekeja nachakulaña nyikaabu. Kutalisha kukubabesha kwaNzambi, Bayibolu yahosha nawu: “Antu etejaña kuyibabesha asoñaña mukaabu wawunda wakuloña.” (AHeberu 12:11) Neyi chochihahitaña mpinji hakwila nyikaabu yihi, shahitaña mpinji hakwila tuhimpi yilwilu yetu kwesekeja nakufumba kwaNzambi. Chakutalilahu, neyi yilwilu yetu yinakojeji atutambuli kukooleka muchipompelu, kufwila kumuchiñilila Nzambi kukutukwasha kubula kuneña nikuzeya. Neyi chuma chamuchidiwu chimwekana, mazu aDavidi anateli kuyikolesha: “Muloña kushakama mukuzuwa [kwaNzambi] kwakapinji kantesha hohu, Ilaña kwikala mukuwaha kwindi kwahaya nyaaka. Kudila kunateli kwinza namelela, ilaña nantetemena, kudi kudila kwamuzañalu.” (Isamu 30:5) Neyi twikala nachilwilu chakuhembelela nikuzatisha kufumba kutunatabmwili Mwizu daNzambi nimkuloñesha kwindi, mpinji yetu “yamuzañalu” yakashika.
Kubalumuka Chikupu Mumuchima Kwatalisha Mudihi?
18 Hakwila yamwekeshi nindi nabalumuki chikupu, muntu anahañiwu watela kuyaña nakupompa mpinji yejima nikulondelaña kufumba kwawakulumpi kwakulomba mpinji yejima nikudiza Bayibolu. Wukutondolwelaña yuma yamuletesheli kuvulumuna. Neyi yazata nañovu nakuwahisha wubwambu windi naYehova, watela kwiluka chikupu nindi Yehova wukumwanakena nawa akulumpi akumufuntisha muchipompelu. Neyi akulumpi anakushinshika kulonda amoni neyi muntu nabalumuki chikupu mumuchima, atela kwiluka nawu muloña himuloña wunambuki nawa atela kusompa muloña wejima nakashinshi.
Yuma Yalema yakuSpiritu
w06 5/15 19 ¶13
Yikuma Yamaneni Kufuma muMukanda waMasamu
31:23—Wafwetaña ñahi chikupu muntu wejima wadivwimbaña? Anakutena kubabesha. Muntu waloña watambwilaña wufwetu windi wayiluwa yakoñayi chakadi kwiluka kuhitila mukumubabesha kudi Yehova. Chineli mukakudivwimba walekaña wanyi yilwilu yindi, wufwetu wiindi waswejaña chikupu amubabeshaña severe punishment.—Yishimu 11:31; 1 Petulu 4:18.
APRIL 22-28
YUMA YALEMA YAMWIZU DANZAMBI | MASAMU 32-33
Muloñadi Chitwatelela Kushimuna Neyi Tuvulumuna?
w93 3/15 9 ¶7
Luwi lwaYehova Lwatukwashaña Kubula Kutiya Woma
7 Neyi tufumpa nshimbi jaYehova, chinateli nikutukalila kushimuna nshindi jetu, nikudi Yehova. Munateli kwila ñahi neyi chuma chamuchidiwu chimwekana? MuIsamu 32, Davidi wetejeli nindi: “Chinamweneni, mafwaha ami azeyeli muloña wakwaaba kunaabileña mwaana wejima. Muloña mwaana niwufuku chikasa cheyi [Yehova] chanlemeneni. Ñovu yami yoomini neyi chomaña menji munkanza.” (Mavasi 3, 4) Chaswekeleñayi nshidi yindi, chinleji chaDavidi chatachikili kumukabisha chikupu. Kukaba muyitoñojoka kwamumanishili ñovu chakwila woomini neyi mumutondu wunasiwu kudi nkaza nawa wakadi menji. Kafwampi, watela wakatili muyitoñojoka nikumujimba. Mpinji yejima wadiña wudana muzañalu. Neyi tudiwana mukukala kwamuchidiwu, chumanyi chitwatela kwila?
cl 262 ¶8
Nzambi “Wanakenaña Swayi”
8 Davidi wabalumukili mumuchima wahosheli nindi: “Nkumininaku nakulejelimu nshidi jami; hinaswekeli chiluwa chamiku. . . . Nawa wañanakeneni nshidi jami jinakoñeli.” (Isamu 32:5) Izu dakwila nawu “wañanakeneni” adibalumuna kufuma kwizu dachiHeberu daya mukwila nawu “kunyamuna” hela “kusenda.” Chadizatishawu ahanu datalisha mukufumishahu “nshidi, kuluwañesha, kuvulumuna.” Dichi Yehova, munjila yikwawu, wanyamwini nshidi yaDavidi nakutwala kwakulehi. Chakadi nikujina chumichi chapelesheli nshidi yasendeliyi Davidi. (Isamu 32:3) Ninetu tunateli kukuhwelela netu Nzambi wasendaña nshidi jawantu ejima alombaña kwanakena kushindamena hamulambu wefutu danyiloña daheniyi Yesu.—Matewu 20:28.
w01 6/1 30 ¶1
Kushimuna Nshidi Kwatukwashaña Kutwanakena
Hanyima yakwila Davidi nashimuni nshidi jindi, walekeli kuditiya kutama. Mazu asonekeli mwisamu kutalisha hachashimwiniyi nshidi jindi amwekeshaña chatiyiliyi nichafwilileñay kumukalakela Nzambi nakashinshi. Chakutalilahu, talenu Isamu 32. Muvasi 1, twatañaña netu: “Wudi namuzañalu yowu muntu ananakeniwu yiluwa yindi, anabutiliwu hanshidi jindi.” Hela chakwila nshidi yamaneni ñahi, munateli kufuma yuma yayiwahi neyi muntu nabalumuki chakufuma hamuchima. Njila yimu mwakumwekeshela chumichi hikwiteja yuma yafumaña muyiluwa yitunakoñi, neyi cheliliyi Davidi. (2 Samweli 12:13) Wadiyiñishili wanyi yomweni kudi Yehova hela kutwinka antu acheñi nyiloña. Vasi 5 yahosha nawu: “Nkumininaku nakulejelimu nshidi jami; Hinaswekeli chiluwa chamiku. Nahosheli nami: “Nukumulejamu Yehova yiluwa yami.” Nawa wañanakeneni nshidi jami jinakoñeli. Kushimuna nshidi chakufuma hamuchima kwakuwahi, chinleji chindi chikumukabishaña wanyi hanshidi yakoñeliyi kunyima.
Yuma Yalema yakuSpiritu
w06 5/15 20 ¶1
Yikuma Yamaneni Kufuma muMukanda waMasamu
33:6; tumazu twaheshina —Indi “spiritu,” hela “muuya,” wamukanwa kaYehova hichumanyi? Iyi spiritu hiñovu yaNzambi yazatikaña, hela spiritu yajila, yazatishiliyi hakuleña mawulu. (Kutachika 1:1, 2) Anayiteni nawu spiritu yamukanwa kindi muloña, kufwana muuya, nateli kuyitemesha kulonda yikazati nyidimu kwiluña dadilehi.
APRIL 29–MAY 5
YUMA YALEMA YAMWIZU DANZAMBI | MASAMU 34-35
“Mushimekenu Yehova Mpinji Yonsu”
Twayenu Tutuumbakeshi Ijina daYehova Hamu
11 ‘Nukumukiswila Yehova nkisu mafuku ejima, kukanwa kami kukwikala yowu kumushimeka hohu.’ (Masamu 34:1) Hakushakama hamu neyi itunduka, Davidi wadiña nakutoñojoka hayuma yayivulu yakumujimba, neyi chinamwekeshi mazu wenawa, hetejeli yina yuma kukañesha mpwila yindi yakumuhameka Yehovaku. Ichi hichakutalilahu chachiwahi kudetu neyi chakwila tumona kukala. Hela chakwila tudi hashikola, hamudimu, nawakwetu eniKristu, hela mumudimu wakushimwina, nkeñelu yetu yatela kwikala yakumuhameka Yehova chikupu. Tukweti nyiloña yayivulu yitwatelela kwila mwenimu. Chakutalilahu, hikwekala nkumishilu kuyuma yitwakeñaña kwiluka nawa nikudiluñisha munyidimu yayiwahi yaleñeliyi Yehovaku. Shinshikenu hayuma yinakoñiyi kuhitila mumbadi yindi yakuloñesha kwaheseki. Yehova nayizatishi chikupu antu ashinshika makonu hela chakwila hiyamanininaku. Komana nyidimu yaNzambi yinateli kwesekana nanyidimu yalemeshawu antu nankashi mukaayi? Komana himuneteji mazu asonekeliyi Davidi akwila nawu: “Hadi amaneni hihekala wakwesekana naneyuku, eyi [Yehova]; hela nyidimu yakweseka nanyidimu yeyi hiyekala kwokuku”?—Masamu:8.
Twayenu Tutuumbakeshi Ijina daYehova Hamu
13 ‘Muchima wami wukudisamba naYehova; muntu wawunda wakachitiya wakazañalala.’ (Masamu 34:2) Davidi hadinyamwini nayuma yidi yejima yakoñeliyuku. Chakutalilahu, hadisambili hanochu chamudimbiliyi mwanta wakuGatuku. Welukili nindi Yehova diyi wamukiñili hampinji yadiñayi muGati nawa wapulukili muloña Yehova diyi wamukwashili. (Yishimu 21:1) Dichi Davidi hadisambili yomwenuku, ilaña wadisambili mudi Yehova. Hamuloña wakwila Davidi wamulemesheli Yehova, chaleñeleli akwakudizoza kudikwokwela kudi Yehova. Yesu niyena walemesheli ijina daYehova, nawa chaletesheli kukokola antu adizoza nawa akeñeleña kudiza kudi Yena. Makonu akwakudizoza amunyuza yejima anakudikwokwela kuchipompelu chaweniKristu awayishewa mukaayi kejima, omu Yesu mwekalayi hamu neyi Mutu. (Akolose 1:18) Nyichima yawakwakudizoza wenawa ayisañumunaña neyi atiya ijina daNzambi anakudilemesha kudi ambuñindi adizoza nawa spiritu yaNzambi yayikwashaña kutiyishisha nsañu yamuBayibolu.—Yowanu 6:44; Yilwilu 16:14..
Twayenu Tutuumbakeshi Ijina daYehova Hamu
15 ‘Ami namukeñakeñeli Yehova, wañitiyili, wampulwishili muwoma wami wejima. (Masamu 34:4) Chakuhumañana chenichi chadiña chalema kudi Davidi. Dichi watwalekeluhu nakuhosha nindi: ‘Kazweñi iwu wabileleli, Yehova wamutiyili, wamuhadishili muyihuñu yindi yejima.’ (Masamu 34:6) Hampinji yitunakuhanjeka nawakwetu akakwitiya, tukweti kukooleka kwakuvulu kwakuyileja hayakuhumañana yayiwahi hanochu Yehova chinatukwashiyi kuumika muyuma yakala. Ichi chakoleshaña chikuhwelelu chawakwetu akakwitiya, neyi nhoshelu yaDavidi chiyakolesheli chikuhwelelu chawankwashi jindi. Kutalisha kudi Davidi, amabwambu jindi ‘atalili mesu kudi [Yehova] mucha nikucha to-o, hiyamba katiya nsonyi mumesuku.’ (Masamu 34:5) Hela chakwila amutemukileña Mwanta Sawulu hiyatiyili nsonyiku. Akuhweleleli nawu Nzambi wamukwashileña Davidi, nawa amwekeni kuzañalala. Munjila yoyimu, amaha akweti mpwila yakudiza nieniKristu alala anashimbuli akeñaña wukwashi kudi Yehova. Chineli anamoni wukwashi windi, kuzañalala kwawu kwamwekeshaña nawu anakufwila kutwalekahu kwikala ashinshika.
Yuma Yalema yakuSpiritu
w06 5/15 20 ¶2
Yikuma Yamaneni Kufuma muMukanda waMasamu
35:19—Davidi watalishili mudihi chalombeliyi nindi antu amuhela abuli kumunyachila namesu awu? Kumunyachila namesu kwatalishili mukwila nawu ayilumbu jaDavidi atiyileña kuwaha neyi tufuta twawu twatama hadi yena tuzatika. Davidi walombeli nindi chumichi chibuli kumwekana.