Mosi naAroni ayili kudi Fwaru nakumuleja nsañu yafumini kudi Nzambi nawu: ‘Neyi wukubula kuyiteja antu jami kuya, nukutemesha mavutula mwituña.’ Nyikanka yamavutula yeñilili mumatala awaEjipitu, mudi aheta nimudi atuzweñi. Ituña dejima denzeli namavutula. Ilaña mwiluña daGosheni, mwashakamineña aIsarela, himwadiña mavutulaku. Kutachikila hachipupu chamuchiwana, yipupu yalondeleleñahu yashikeneneña hohu aEjipitu. Fwaru walembeli nindi: ‘Lembenu kudi Yehova kulonda afumishi awa mavutula. Antu jenu akuya.’ Yehova chafumishiliyi mavutula, Fwaru wahimpili cheñi yitoñojoka. Komana Fwaru wukudizilaku kuyumiyi?

Yehova wahosheli nindi: ‘Neyi Fwaru hakuyiteja antu jami kuyaku, yimuna yawaEjipitu yikukata nawa yikufwa.’ Ifuku dalondelelihu, yimuna yatachikili kufwa. Ilaña yimuna yawaIsarela yafwili wanyi. Hohamu Fwaru wachinchikishili muchima nawa hayitejeli kuyaku.

Kuhiñahu Yehova wamulejeli Mosi nindi afunti kudi Fwaru nawa afukumwinini mawuti mumpepela. Awa mawuti abalumukili lunkuñu lwenzeli mumpepela nawa lwaholokeleli hadi aEjipitu ejima. Ilu lunkuñu lwaletesheli aEjipitu ejima niyimuna yawu kwikala nayilonda yayeña. Hela chochu, Fwaru hayilekeli aIsarela nindi ayiku.

Yehova wamutemesheli cheñi Mosi kudi Fwaru nakumuleja nindi: ‘Wuchidi kukaana kuyuumbaku antu jami tahindi? Kumadiki nvula yamalola yakanokela hadinu ituña.’ Hefuku dalondelelihu, Yehova watemesheli nvula yamalola, kudidima nikesi. Nvula yamuchidiwu yadiña kanda yinokeñahu dehi muEjipitu. Nyitondu yejima nimbutu yakisikili, ilaña muGosheni yakisikili wanyi. Fwaru wahosheli nindi: ‘Lembenu kudi Yehova aketwishi nvula! Kufumahu nukuyiteja muyeña.’ Ilaña chaketukili iyi nvula yamalola, Fwaru wahimpili yitoñojoka yindi.

Kuhiñahu Mosi wahosheli nindi: ‘Ichi dinu tuboola tukuda yakuda yejima yashalilihu yabulili kukisika nanvula yamalola.’ Tuboola twatuvulu twadiili yuma yejima yashalili mumaha nikunyitondu. Fwaru walembeli nindi: ‘Lembenu kudi Yehova afumishi awa atuboola.’ Nihanyima yakwila Yehova nafumishihu dehi awa atuboola, Fwaru watwalekelihu kuchinchikisha muchima.

Yehova wamulejeli Mosi nindi: ‘Ololaku chikasa cheyi mwiwulu.’ Hohenohu, mwiwulu mwekalili mwidima wasweja. Hadi mafuku asatu, aEjipitu hiyatwesheleña kumona chuma chidi chejima hela muntuku. Mumatala awaIsarela hohu dimwadiña chejeji.

Fwaru wamwilili Mosi nindi: ‘Eyi niantu jeyi yenuña. Ilaña mukushiya hohu yimuna yenu.’ Mosi wahosheli nindi: ‘Twatela kusenda yimuna yetu kulonda twakayilambuli kudi Nzambi yetu.’ Fwaru wahilili nankashi. Wabidikili nindi: ‘Fumaku kumesu ami! Neyi nakakumoni cheñi nakakujaha.’

Mosi wamushiikili Fwaru nindi hakenzahu cheñi kumesu indiku. Ilaña henohu kanda ayi, wamulejeli Fwaru nindi: ‘Hakachi kawufuku, anyana awedi ejima muEjipitu, kutachikila kudi mwana kaFwaru weyala nakushika kudi anyana kawanduñu, akufwa.’

Yehova wayilejeli aIsarela nindi ekali nachawija chadimena. Wahosheli nindi: ‘Mujahi chizamba chamukoku hela champembi wudi nachaaka chimu, nawa mashi amakwawu muyishi hayipamba yakuyiisu. Mwochi mbiji, nawa muyiidi namankendi akadi iluñi. Diloñeshenu, vwalenu nkwabilu jenu kulonda muyeña. Wufuku walelu nukuyifumisha muwuduñu.’ AIsarela atela azañaleli nankashi!

Hakachi kawufuku, kañelu kaYehova wahitili kumatala ejima muEjipitu. Anyana awedi adiña mumatala mwadiña yipamba yakuyiisu habulili kushawu mashi, afwili. Ilaña kañelu wapandakeni matala ejima ashiliwu mashi kuyipamba. Chisaka chejima chawaEjipitu, chaheta nichabula kuheta, chafwishili mwana. Ilaña hikwadiñahu mwana hela wumu wawaIsarela wafwiliku.

Nimwana kaFwaru wafwili. Fwaru hatwalekelihu kuchinchikisha muchima windiku. Hohenohu wayilejeli aMosi naAroni nindi: ‘Nyamukenu. Fumenu kunu. Yenu mwakadifukuli kudi Nzambi yenu. Sendenu yimuna yenu muyeña!’

Iku kakweji kadi mwiwulu, aIsarela atachikili kwidika muEjipitu, muyisaka-muyisaka nimunyichidi-munyichidi. AIsarela adiña amayala 600,000, kushilahu niambanda amavulu nianyana. Antu amavulu abulili kwikala aIsarela niwena ayili nawu hamu kulonda niwena akadifukuleña kudi Yehova. Nkumininaku, Isarela ekalili akasunuka!

Hakwila anukeña Yehova chayipulwishiliyi, ekalileña nanichi chawija chadimena hachaaka-hachaaka. Achiteneneña nawu Chipandakenu.