Bayibolu Yahosha Nawudi haWuvumbi?

Antu amavulu atiyaña nsonyi kuhosha hansañu yawuvumbi. Hela chochu, neyi Bayibolu yinakuhosha hawuvumbi, hiyahitaña mumbadiku, ilaña yahoshaña nakalemesha. Yuma yahosha Bayibolu yatukwashaña. Dichatela kwikala yuma, muloña Yehova hiNleñi yetu. Weluka yuma yinateli kutukwasha. Watulejaña yilwilu yetu chiyinateli kumuzañalesha niyuma yinateli kutukwasha kwikala namuzañalu haya nyaaka.

1. Yehova wahoshahu nindidi hansañu yakubulakana kweyala namumbanda?

Kubulakana kweyala namumbanda hichawaana chatwinkayi Yehova. Wakeñaña eyala namumbanda adisumbula adiluñisheña. Bayi neyi ichi chawaana chayikwashaña hohu adisumbula kwikala nanyanaku, ilaña nikudimwekeshela kukeña kwakweni nikudizañalesha munjila yayiwahi nawa yamuzañalu. Dihafuma Izu daNzambi dihoshi nawu: “Zañalalaña nañodeyi wamuwukwenzi weyi.” (Yishimu 5:18, 19) Yehova wakeñaña akaKristu adisumbula kwikala ashinshika kudi enikwawu, dichi hiyatela kwila wujilaku.—Tañenu AHeberu 13:4.

2. Wuvumbi hichumanyi?

Bayibolu yatulejaña nawu “antu elaña wuvumbi . . . hiyamba kaswana Wanta waNzambiku.” (1 AKorinda 6:9, 10) Ansoneki aBayibolu asonekeli muchiGiriki azatishili izu daponeya hakutena wuvumbi. Idi izu mwabombela (1) kubulakanaa kwawantu abula kudisumbula, (2) wutumwa, (3) nikukaama nakanyama. Twamutiyishaña Yehova kuwaha nawa mwafumaña yuma yayiwahi neyi “[tuleka] wuvumbi.”—1 ATesalonika 4:3.

SANDUJOLENU CHIKUPU

3. Temukenu wuvumbi

Yosefu muntu washinshika wazatili nañovu kulonda atwalekihu kwikala nayilwilu yayiwahi. Tañenu Kutachika 39:1-12, kuhiñahu hanjekenu hanawa malwihu:

• Chumanyi chamuletesheli Yosefu kutemuka?​—Talenu vasi 9.

• Munakutoñojoka nenu Yosefu wafuukwili mwamaana? Muloñadi?

VIDIYO: Temukenu Wuvumbi (5:06)

Yehova nakukeña nindi wejima wetu tukaaneña wuvumbi. Tañenu 1 AKorinda 6:18, kuhiñahu hanjekenu hanawa malwihu:

• Yumanyi yinateli kumukojeja muntu kwila wuvumbi?

• Munateli kutemuka ñahi wuvumbi?

4. Munateli kutondolwela kweseka

VIDIYO: Shindenu Kweseka Kuhitila muKutaña Bayibolu (3:02)

• Chelili manakwetu wudi muvidiyo eluki nindi yitoñojoka niyilwilu yindi yikumuletesha abuli kwikala washinshika kudi ñodindi, welili ñahi?

Mpinji jikwawu niakaKristu ashinshika azataña nañovu hakwila ekali nayitoñojoka yakadi majilu. Munateli kutondolwela ñahi kutoñojoka yuma yatama? Tañenu AFwilipi 4:8, kuhiñahu hanjekenu hanawa malwihu:

• Yumanyi yitwatela kutoñojokañahu?

• Kutaña Bayibolu nikwikala nanyidimu yayivulu yakwila mumudimu waYehova kunateli kutukwasha ñahi kutondolwela kweseka?

5. Nshimbi jaYehova jatukwashaña

VIDIYO: Kubula Maana (9:31)

• Kansi weyala weñilili ñahi mukweseka?—Talenu Yishimu 7:8, 9.

• Kwesekeja naYishimu 7:23, 26, mukwila wuvumbi mwafumaña yuma yatama. Yumanyi yatama yitunateli kutondolwela neyi twikala nayilwilu yayiwahi?

• Yilwilu yayiwahi yinateli kutukwasha ñahi kwikala namuzañalu haya nyaaka?

Antu amakwawu ahoshaña nawu Bayibolu yaluwañesha hakuhosha hansañu yawutumwa. Ilaña Yehova, Nzambi wakukeña, wakeñaña muntu wejima kwikala namuzañalu haya nyaaka. Hakwila twiikali naniwu muzañalu twatela kwovwahila nshimbi jindi. Tañenu 1 AKorinda 6:9-11, kuhiñahu hanjekenu hanilu lwihu:

• Kwesekeja nachamonañayi Yehova, komana mpwila yakukaama kweyala neyala diyatama hohu?

Hakwila tumutiyisheña Nzambi kuwaha, wejima wetu twatela kuhimpa yilwilu yetu. Komana twakaditoñesha? Tañenu Isamu 19:8, 11, kuhiñahu hanjekenu hanawa malwihu:

• Munakutoñojoka nenu nshimbi jaYehova jajiwahi? Muloñadi?

YUMA YIMUNADIZI

Kubulakana kwawantu adisumbula hichawaana chahanayi Yehova.

Kuhitulukamu

• Yumanyi yabombela muwuvumbi?

• Yumanyi yikutukwasha kutondolwela wuvumbi?

• Yumanyi yayiwahi yafumañamu neyi twovwahila nshimbi jaYehova?

ILUKILENUHU NSAÑU YIKWAWU

Talenu chakeñelañayi Nzambi nindi eyala namumbanda anakukeña kushakama hamu atela kudisumbula.

“Bayibolu Yahosha Nawudi Hakushakama Hamu Chakadi Kudisumbula?” (Chibaaba chahaIntaneti)

Talenu nshimbi jamuBayibolu jakaanisha wutumwa chijabulila kutalisha mukwila nawu twatela kuyihela awa antu.

“Komana Wutumwa Watama?” (Chibaaba chahaIntaneti)

Talenu nshimbi jaNzambi jahosha hawuvumbi chijatukiñaña.

“Komana Kwilila Wuvumbi Mukanwa Niwena hiWuvumbi?” (Chibaaba chahaIntaneti)

Muchibaaba chinakwila nawu “Anlemesheli,” talenu yuma yamusañumwini muntu wakaamineña namukwawu iyala kuhimpa chihandilu chindi nakumutiyisha Nzambi kuwaha.

“Bayibolu Yahimpaña Yihandilu Yawantu” (Kaposhi Kakutalila, April 1, 2011)