Kuzatila Hamu Kwakwashaña Chisaka Kuyilaku Hambidi kuSpiritu
KUZATILA hamu kwalema kudi antu anakukeña kwikala nachisaka chamukeña Yehova nikudifukula kudi yena. Yehova chaleñeliyi iyala nimumbanda watachi, wakonkomweneni kulema kwakuzatila hamu. Evu wateleleli kuzata naAdama neyi “wamutelela.” (Kutachika 2:18) Eyala namumbanda atela kuzatila hamu neyi antu adikwashaña wumu namukwawu. (Mukwakutaŋisha 4:9-12) Avwali nianyana atela kuzatila hamu hakwila akalakali mudimu wayinkayi Yehova.
Kudifukula kwaChisaka
Barry niHeidi akweti anyana atanu. Awana kwila nawu kuzatila hamu kulonda kwikala nakudiza kwaBayibolu kwachisaka kwayikwashaña kuyilaku hambidi mukudifukula. Barry wahosheli nindi: “Hakudiza kwachisaka, nayinkaña anyana nyidimu yantesha mumpinji mumpinji. Mpinji jikwawu nayilejaña kutaña chibaba muAwake! nakuyileja kulonda aleji chisaka yuma yatañawu muchibaba. Twahitulukaña cheñi muyuma yitukuhosha mumudimu wakushimwina kulonda anyana ejima eluki chakuhosha.” Heidi wabombeleluhu nindi: “Wejima wetu tukweti ndandanda yayikonkwanyi yakuspiritu yitwakeñaña kushikija nawa twahitulukaña muyikonkwanyi yeniyi mumpinji mumpinji hakudiza kwachisaka kulonda tumoni neyi tunakuyilaku hambidi.” Awa eyala namumbanda eluka cheñi nawu kwikala namafuku akubula kutala TV mulungu nimulungu kwakwashaña muntu wejima muchisaka kwikala nampinji yakutaña.
Kupompa kwaChipompelu
Mike niDenise akweti anyana awana. Indi chisaka chawu chakoolekeli ñahi hamuloña wakuzatila hamu? Mike wahosheli nindi: “Hela chakwila mpinji jikwawu twatanjikileña yuma chachiwahi kulonda tushiki hachipompelu mumpinji, twakañenyeña, ilaña kuzatila hamu kwatukwashileña kushika hachipompelu mumpinji.” Denise walumbulwili nindi: “Chakulileñawu anyana, mwana himwana wadiña namudimu wakuzata. Mwanetu wamumbanda Kim, watelekeleña nikusha yakudya hamesa.” Mwanawu Michael wanukaña nindi: “HaChiyedi namelela twapompeleña kupompa kwachipompelu hetala detu. Dichi twawahishileña mukapeka, kukombamu, nikutanjika yitwamu chachiwahi.” Matthew mwana mukwawu, wabombeleluhu nindi: “Tata wafumineña kumudimu swayi hefuku dakupompa kulonda yatukwashuku kudiloñesha kuwanika kukupompa.” Chumanyi chafumamu?
Kuzata naÑovu Chikwawahila
Mike wahosheli nindi: “Mu 1987, twatachikili kuzata wupayiniya naDenise. Hayina mpinji anyanetu asatu achidiñi hetala. Anyana ayedi niwena atachikili kuzata wupayiniya, amakwawu azatiluku mudimu wakutuña matala haBeteli. Muzañalu wukwawu wutukweti muchisaka chetu wudi wakwila nawu tunakwashi antu 40 kudihana kudi Yehova nikupapatishewa. Chisaka chejima chadiña nakukooleka kukwawu kwakuzataku mumudimu wakutuña nimumatuña amakwawu.”
Chalala kuzatila hamu nachisaka hichuma chachiwahi nankashi. Komana kwila muwana njila jikwawu jimwatela kuzatila hamu nawantu ejima amuchisaka chenu nehi? Munateli kwiluka chikupu nenu kuzatila hamu kukukwasha chisaka chenu kuyilaku hambidi kuspiritu.
[Mwevulu wudi hefu 29]
Kuhituluka muyuma yimukuhosha kwaleñelaña kuyilaku hambidi mumudimu wakushimwina