Papatishewenu, Bayi Mushintajalaku

1. Kupapatishewa kwawahiladi?

KOMANA mwamukeña Yehova Nzambi wayinkaña yawaana yayiwahi yejima kushilahu niwumi? Munakukeña kumwekesha nenu mwamukeña? Njila yayiwahi yimunateli kwilila mwenimu hikudihana enu aweni kudi yena, kuhiñahu dinu mumwekesha kudihana kwenu kuhitila mukupapatishewa mumenji. Iyi diyuma yinateli kuyikwasha kwikala muchisaka chaYehova. Chikafumamu, Tata yenu nawa Ibwambu denu wukuyilombolaña nikuyikiña muloña mukwikala kukabadi kindi. (Mas. 73:24; Isa. 43:​1, 2) Kudihana nikupapatishewa cheñi kukuyikwasha kwikala nakuchiñeja kwakudiluñisha wumi wahaya nyaaka.—1 Pet. 3:21.

2. Yumanyi yitukuhanjekahu muchinu chibaaba?

² Kudihu yuma yinakuyikañesha kupapatishewa? Neyi yidi kwoku himudi nkawenuku. Antu amavulu ahimpili yilwilu niyitoñojoka yawu hakwila ashikihu kupapatishewa. Ichi anakumukalakela Yehova namuzañalu nineyena. Yumanyi yimunateli kudizila kudi antu amakwawu apapatisheweli mumafuku akunyima? Tuhanjekenu hakukala kwamweniwu nichitunateli kudizila kudi wena.

ASAMARIYA APAPATISHEWELI

3. Yumanyi yikwawu yayikañesheleña aSamariya kupapatishewa?

³ ASamariya adiñaku mumafuku aYesu adiña mukudifukula kwadiña haneli Shekemi iku Samariya iku, kukabeta kakuchimunswa chaYudeya. Henohu aSamariya kanda apapatishewi, ateleleli kwiluka chikupu Izu daNzambi. ASamariya elukili nawu nyikanda yonenawu hohu muBayibolu hinyikanda yakutachikilahu yitanu, mukanda waKutachika kushika nikumukanda waKuhituluka, hadaha nimukanda waYoshuwa. Hela chochu, aSamariya elukili nawu Mesiya wakenza kushindamena hachikaninu chaNzambi chashimunawu haKuhituluka 18:​18, 19. (Yow. 4:25) Hakwila apapatishewi, ateleleli kwiteja nawu Yesu diyi Mesiya akaniniwu. “ASamariya amavulu” dicheliliwu. (Yow. 4:39) Amakwawu ateleleli kuleka chikupu chaambu chadiña hakachi kawaSamariya nawaYudeya.—Luka 9:​52-54.

4. Kwesekeja naYilwilu 8:​5, 6, 14, aSamariya amakwawu elili ñahi chayishimwininiwu kudi Fwilipu?

⁴ Yumanyi yayikwashili aSamariya kupapatishewa? Chelili Fwilipu mukakushimwina ayishimwini “nsañu yaKristu,” aSamariya amakwawu “[atambwilili] Izu daNzambi.” (Tañenu Yilwilu 8:​5, 6, 14.) Fwilipu wadiña kaYudeya, ilaña akaanini wanyi kumutiyilila. Hadaha anukili mavasi amuNyikanda yakutachikilahu yitanu yamwekeshaña nawu Nzambi hekala nachaambuku. (Kuhit. 10:​17-19) Muyuma yejima, atiyilileña namuchima wumu kunsañu yashimwinineñayi Fwilipu hadi Kristu, nawa amweneña wunsahu walala wamwekesheleña nawu Nzambi nakumukwasha Fwilipu. Wakoñeleña cheñi yihayamisha yayivulu, mwabombeleli kuuka akata nikufumisha andemoni.—Yilw. 8:7.

5. Yumanyi yimukudizila kudi aSamariya?

⁵ Ana aSamariya adi kukaana kudiza muloña wachaambu hela muloña wakubula kwiluka iyi nsañu. Hiyetejeli chumichi kuyikañeshaku. ASamariya ashintajalili wanyi kupapatishewa chelukiliwu nawu Fwilipu nayidizishi chalala. Nsañu yamuBayibolu yalumbulula nawu: “Chakuhweleleliwu mazu ahosheliyi Fwilipu, owu washimwinineña nsañu yayiwahi yaWanta waNzambi niyejina daYesu Kristu, amayala niambanda ejima atachikili kuyipapatisha.” (Yilw. 8:12)Komana mwakuhwelela nenu Izu daNzambi hichalala nawa nenu aYinsahu jaYehova hiyekala nachaambuku nawa azataña nañovu kudimwekeshela kukeña kwakweni wumu namukwawu—chilwilu chayilukilañaku akaKristu alala? (Yow. 13:35) Dichi, ilenuhu chuma nakukuhwelela nenu Yehova wukuyikiswila.

6. Yuma yamumwekeneni Ruben yinateli kuyikwasha ñahi?

⁶ Ruben, wakuGermany wakulilili muchisaka chawaYinsahu. Hela chochu, hachidiñayi kansi, wajinokeleña neyi chakwila Yehova wekala kwoku. Walekeli ñahi kujinoka? Chelukiliyi nindi kudi yuma yabula kwilukayi, welilihu chuma. Wahosheli nindi: “Hakudiza nkawami, nakeñeleña kwiluka nsañu yalala ninsañu yakutwamba. Nadizili mapampa amavulu hansañu yahosha nawu yuma yadisefukilili.” Watañili mukanda wakwila nawu Is There a Creator Who Cares About You? Ona mukanda wamukwashili nankashi Ruben. Wadihoshesheli nindi: ‘Komana Yehova wekala kwoku!’ Nawa chayiliyi nakuhempula kasanji keneni kamukaayi, Ruben wekalili namuchima wakusakilila chikupu chamweniyi kunuñañana kwekala hakachi kawamanakwetu mukaayi kejima. Chafuntiliyi kuGermany, Ruben wapapatisheweli nayaaka 17. Neyi munakujinoka nsañu yimunadizi, wanenu wunsahu walala kuhitila mukusandujola munyikanda yetu. Munateli kuleka kujinoka neyi ‘mwiluka kwiluka kwalala.’ (Efwe. 4:​13, 14) Nawa chimukutiyaña malipoti akukeña nikunuñañana kudi hakachi kawantu jaYehova mukaayi kejima nawa mumona yumiyi muchipompelu chenu, mukuswejelañaku kuyikeña amanakwenu mukaayi kejima.

SAWULU WAKUTARUSA WAPAPATISHEWELI

7. Yitoñojoka yamuchidinyi yateleli kuhimpayi Sawulu?

⁷ Talenu yuma yamumwekeneni Sawulu wakuTarusa. Wadiña nakwila chiwahi mukwitiya kwawaYudeya nawa watuumbakeni muchisemwa chawaYudeya. (Ñal. 1:​13, 14; Fwili. 3:5) Hampinji aYudeya amavulu yamweneñawu akaKristu nawu hiyakakusekesha, Sawulu wayikabishileña chikupu. Watoñojokeli mwaluwa nindi nakwila nkeñelu yaNzambi. (Yilw. 8:3; 9:​1, 2; 26:​9-11) Hakwila yamwiteji Yesu nawa apapatishewi nakwikala mukaKristu, Sawulu wateleleli kudihana yomweni kumukabisha.

8. (a) Yumanyi yamukwashili Sawulu kupapatishewa? (b) Kwesekeja naYilwilu 22:​12-16, Ananiya wamukwashili ñahi Sawulu? (Talenu cheñi mwevulu.)

⁸ Yumanyi yamukwashili Sawulu kupapatishewa? Chelili Mwanta Yesu alemeshawu amwekani kudi yena, Sawulu wapuutili. (Yilw. 9:​3-9) Washakamini chakadi kuda hadi mafuku asatu, nawa chakadi nikujina, watoñojokeleña chikupu hayuma yamumwekeneni. Mwamweni, Sawulu welukili nindi Yesu diyi Mesiya nawa antu amulondeleleña adiña mukudifukula kwalala. Sawulu watela waneñeli nankashi hakwikala hakachi kawantu amujahili Stefwanu. (Yilw. 22:20) Hanyima yanana mafuku asatu, kambanji wejina daAnaniya wayili kudi Sawulu, wamutonesheli mesu nawa wamukolesheli nindi apapatishewi chakadi kushintajala. (Tañenu Yilwilu 22:​12-16.) Sawulu wadizozeli nakwiteja iwu wukwashu nawa watachikili chihandilu chachiha.—Yilw. 9:​17, 18.

9. Yumanyi yimunateli kudizila kudi Sawulu?

⁹ Kudi yuma yitunateli kudizila kudi Sawulu. Wadi kwiteja kudivwimba hela kutiya antu woma kumukañesha kupapatishewa. Ilaña wetejeli wanyi chuma chamuchidiwu kumumwekena. Sawulu wadizozeli nakuhimpa yilwilu yindi chetejeliyi chalala chahosha hadi Kristu. (Yilw. 26:​14, 19) Sawulu wafwilileña kwikala mukaKristu hela chakwila welukili nindi akamukabishaña. (Yilw. 9:​15, 16; 20:​22, 23) Hanyima yakupapatishewa, watwalekelihu kumushindamena Yehova kulonda amukwasheña kuumika kukala kwashiyashana kwamweneñayi. (2 Kor. 4:​7-10) Chimwapapatishewa nakwikala Chinsahu chaYehova, hadaha mwakamonaña yuma yikesekaña chikuhwelelu chenu hela kukala kwakuvulu, ilaña mwakekala nanowu akayikwashaña. Mwatela kukuhwelela nenu Nzambi niKristu akayikwashaña chikupu.—Fwili. 4:13.

10. Yumanyi yimunateli kudizila kuchuma chamumwekeneni Anna?

¹⁰ Anna wakulilili muchisaka chawantu ahoshaña idimi daKurdish akuEastern Europe. Amama yindi chapapatisheweliwu, Anna watachikili kudiza Bayibolu nayaaka 9 hanyima yakumwiteja kudi atata yindi. Hela chochu, chumichi chaleteli kukala kweneni nankashi kudi antaña jaAnna ejima ashakamineña hamu nachisaka chawu. Ataña jindi achimweni nawu hichishimashima muntu kushiya kudifukula kwawankakulula. Anna chashikijiliyi yaaka 12, walombeli kudi atata yindi neyi anateli kumwiteja kulonda apapatishewi. Atata yindi akeñeleña kwiluka neyi chakwila wadifuukwilili yomweni indi kwiji kudi muntu wamukanjikijileña kwila mwenimu. Wayakwili nindi, “Namukeña Yehova.” Atata yindi amwitejeli kupapatishewa. Kuhiñahu, Anna atachikili kumuseha nikumukabisha nankashi. Ntaña yindi wumu wumulejeli nindi, “Chadi kuwaha eyi kwikala chivumbi hela kunwa makanya kubadika kwikala Chinsahu chaYehova.” Anna womikili ñahi naniku kukala? Wahosheli nindi, “Yehova wankwashili kwikala wakola, nawa amama niatata ankwashileña nankashi.” Anna wasonekaña mpinji yamukwashiliwu kudi Yehova muchihandilu chindi. Mumpinji-mumpinji wahitulukaña muniyi yuma yamwekeni kulonda abuli kuvulamena chamukwashiliwu kudi Yehova. Neyi munakuchiina makabisha, anukenu nenu Yehova wakayikwasha ninenu.—Heb. 13:6.

KONELISU WAPAPATISHEWELI

11. Yumanyi yadi kumuletesha Konelisu kushintajala kupapatishewa?

¹¹ Bayibolu yahosha cheñi hayuma yitunateli kudizila kudi Konelisu. Wadiña “kapitawu,” dikwila nawu mukulumpi wamashidika 100 munjita yawaRoma. (Yilw. 10:​1, tth.) Muloña wachumichi, watela wadiña walema muchituñilu nihadi amashidika. “Wahanineña niyawaana yaluwi kudi antu.” (Yilw. 10:2) Yehova watemesheli kapostolu Petulu kumushimwina nsañu yayiwahi. Komana chifulu chadiña naKonelisu chamuletesheli kushintajala kupapatishewa?

12. Yumanyi yamukwashili Konelisu kupapatishewa?

¹² Yumanyi yamukwashili Konelisu kupapatishewa? Twatañaña netu “wamutiyileña Nzambi woma hamu nachisaka chindi chejima.” Nawa Konelisu walombeleña nakulemba kudi Nzambi mpinji yejima. (Yilw. 10:2) Petulu chamushimwininiyi Konelisu nsañu yayiwahi, yena nichisaka chindi amwitejeli Kristu nawa hohenohu apapatisheweli. (Yilw. 10:​47, 48) Chakadi nikujina, Konelisu wafwilileña kuhimpa mwejima mwakeñekeleña kulonda adifukuleña kudi Yehova hamu nachisaka chindi.—Yosh. 24:15; Yilw. 10:​24, 33.

13. Yumanyi yitwatela kudizila kudi Konelisu?

¹³ Neyi chichadiña naSawulu, Konelisu wadi kwiteja chifulu chadiñayi nachu kumukañesha kwikala mukaKristu. Ilaña hetejeli chuma chamuchidiwu kumukañeshaku. Kudihu yuma yimu yalema yimwatela kuhimpa muchihandilu chenu kulonda mupapatishewi? Neyi mwila mwenimu, Yehova wakekala Nkwashi yenu. Wakayikiswila chimwakazataña nañovu kumukalakela kwesekeja nayishina yamuBayibolu.

14. Yumanyi yimunateli kudizila kuyuma yeliliyi Tsuyoshi?

¹⁴ Tsuyoshi, wakuJapan, wahimpiliku yuma yimu kutalisha hamudimu wazatileñayi hakwila ashikihu kupapatishewa. Wadiña chindonda chamukulumpi washikola yaIkenobo hadizishileñawu antu chakusha hamu nkenu. Neyi mukulumpi washikola akañanya kuya kuchipenji, Tsuyoshi diyi wavulileña kuya nakumwimenaku mutushidikilu twawaBuddha. Hela chochu, Tsuyoshi chadiziliyi chalala kutalisha hadi afu, iyi yuma yelileñayi yamukañesheli kupapatishewa. Wafuukwilihu yomweni kubula kudibomba mutushidikilu twawaBuddha. (2 Kor. 6:​15, 16) Tsuyoshi wahanjekeli namukulumpi washikola haniyi nsañu. Yumanyi yafuminimu? Tsuyoshi watwalekelihu kuzata mudimu windi chakadi kudibomba mutuna tushidikilu. Wapapatisheweli chimwahitili chaaka chimu hanyima yakudiza Bayibolu.a Neyi munakukeña kuhimpaku yuma yimu kumudimu wenu kulonda mumutiyisheña Nzambi kuwaha, kuhwelelenu nenu wakayinkaña yuma yimwakakeñaña nichisaka chenu.—Mas. 127:2; Mat. 6:33.

AKORINDA APAPATISHEWELI

15. Yumanyi yadi kuyikañesha aKorinda kupapatishewa?

¹⁵ AKorinda akushankulu ayilukili nawu akeñeli nankashi maheta nawa adiña nayilwilu yakubula kudiyuula. Antu amavulu ashakamineña mwenimu, elileña yuma yabula kwitejayi Nzambi. Chakadi nikujina, mwiluña damuchidiwu chadiña chakala hakwila muntu eteji nsañu yayiwahi. Hela chochu, chelili kapostolu Pawulu enzi muniwu musumba nakushimwina nsañu yayiwahi hadi Kristu, “aKorinda amavulu atiyili chumichi niwena atachikili kwitiya nikupapatishewa.” (Yilw. 18:​7-11) Kuhiñahu, Mwanta Yesu Kristu wamwekeni kudi Pawulu muchimwenu nawa wahosheli nindi: “Nikweti antu amavulu muniwu musumba.” Dichi Pawulu watwalekelihu kushimwina munidi iluña hadi chaaka chimu nachikuku.

16. Yumanyi yayikwashili aKorinda amakwawu kupapatishewa? (2 AKorinda 10:​4, 5)

¹⁶ Yumanyi yayikwashili aKorinda kupapatishewa? (Tañenu 2 AKorinda 10:​4, 5.) Izu daNzambi niñovu yaspiritu yajila yayikwashili kuhimpa chihandilu chawu neyi mukulabula kwadisu. (Heb. 4:12) Antu amuKorinda etejeli nsañu yayiwahi yahosha hadi Kristu, atwesheli kuleka yilwilu niyaaku yidi neyi kusheta, kwiya niwutumwa.—1 Kor. 6:​9-11.b

17. Yumanyi yimunadizili kudi aKorinda?

¹⁷ Ilukenu nenu hela chakwila antu amakwawu muKorinda adiña nayaaku yashimatili yateleli kulekawu, hiyakunkulwili nawu chikuyikalila kwikala akaKristuku. Azatili nañovu kwenda munjila yanyanya yatwalaña kuwumi wahaya nyaaka. (Mat. 7:​13, 14) Komana chinakuyikalila kuleka chaaku chimu hela chilwilu chimu chatama hakwila mupapatishewi? Bayi muleka kulwishaku! Lembenu kudi Yehova kulonda ayinki spiritu yindi yajila yiyikwashi kwikala namuchima wakufwila kubula kwila yuma yatama.

18. Chuma cheliliyi Monika chinateli kuyikwasha ñahi?

¹⁸ Monika, wakwituña daGeorgia, wazatili nañovu kuleka nhoshelu yawuzondu niyisela yatama kulonda ashikihu kupapatishewa. Wahosheli nindi: “Hinadiña kampululu, nalombeleña hakwila niikali nañovu. Yehova welukili nindi nakeñeleña kwila chuma chaloña, nawa mpinji yejima wankwashileña nikunlombola.” Monika wapapatisheweli nayaaka 16. Kudihu yaaku yimwatela kuleka hakwila mutachiki kumukalakela Yehova munjila yetejayi? Twalekenuhu kumulomba ñovu kulonda ayikwashi kuhimpa. Yehova wahanaña spiritu yindi yajila chakufuma hamuchima.—Yow. 3:34.

CHIKUHWELELU CHENU CHINATELI KUSWIJA JIMPIDI

19. Yumanyi yinateli kuyikwasha kushinda kukala kudi neyi mpidi? (Talenu cheñi mwevulu.)

¹⁹ Ilukenu nenu Yehova wayikeña nawa nakukeña mwiikali muchisaka chindi. Chumichi chinateli kumwekana hela chakwila kudi yuma yinakuyikañesha hakwila mupapatishewi. Yesu walejeli izanvu dawatumbanji amumafuku indi nindi: “Neyi mukweti chikuhwelelu chesekana naluchacha lwamositadi, mukuleja iyi mpidi nenu, ‘Fumaku aha wuyi hana,’ yikufumahu, dichi kwosi chuma nichimu chimukukañanyaku.” (Mat. 17:20) Antu atiyilileña kunawa mazu haniyi mpinji adiña naYesu hadi yaaka yantesha hohu, dichi chikuhwelelu chawu chachidiña nakukulilaku. Ilaña Yesu wayilejeli nindi neyi ekala nachikuhwelelu cheneni, Yehova wukuyikwasha kushinda kukala kudi neyi mpidi. Nawa Yehova wukuyikwasha ninenu kwila chuma chochimu!

20. Yuma yeliliwu akaKristu akunyima niamakonu yinashimuniwu muchinu chibaaba yinayikwashi ñahi?

²⁰ Neyi mumona nenu kudi yuma yinakuyikañesha kupapatishewa, zatenu nañovu kuyishinda chakadi kushintajala. Itejenu yuma yelili akaKristu akunyima niamakonu yiyikundeji. Yuma yeliliwu yiyikoleshi nawa yiyisañumuni kudihana enu aweni kudi Yehova nikupapatishewa. Iku hikufuukula kwakuwahi chikupu!