Johana

14 “Kik chunyu chandre. Nyisuru yie kuom Nyasaye; nyisuru yie kuoma bende. 2 E od Wuora nitie kuonde dak mang’eny. Ka da bed ni ok en kamano, dine asewachonu nimar awuok adhi mondo aiknu kar dak. 3 Bende, ka adhi mi aikonu kar dak, abiro duogo kendo, mi anarwaku e dala kama antie, mondo kama antieree un bende ubedie. 4 To un ung’eyo yo ma dhi kama adhiyoe.”

5 Thoma nowachone kama: “Ruoth, ok wang’eyo kama idwaro dhiyoe. Ere kaka dwang’e yo?”

6 Yesu nodwoke niya: “An e yo, kendo an e adiera, kendo an e ngima. Onge ng’at ma biro ir Wuora mak mana kokalo kuoma. 7 Ka da ung’eya, dikoro ung’eyo Wuora bende; chakre sani ka dhi nyime, ung’eye kendo usenene.”

8 Filipo nokone niya: “Ruoth, nyiswae Wuoru, to mano biro romowa.”

9 Yesu nodwoke kama: “Kata bang’ bedo kodu kuom kinde malach kama pok ing’eya Filipo? Ng’ato ang’ata ma osenena, oseneno Wuora bende. Ere kaka ipenjo ni, ‘Nyiswae Wuoru’? 10 Ok uyie ni an e winjruok achiel gi Wuora kendo ni Wuora ni e winjruok achiel koda? Weche ma awachonu, ok awachgi koa kuoma awuon, to Wuora ma siko e winjruok achiel koda timo tijene. 11 Ng’euru ni an e winjruok achiel gi Wuora kendo ni Wuora ni e winjruok achiel koda; ka ok kamano, yieuru nikech tijego. 12 Adier, adier, awachonu ni, ng’ato ang’ata ma nyiso yie kuoma, ng’atno bende notim tije ma atimo; kendo obiro timo tije madongo moloyo magi, nimar an awuok adhi ir Wuora. 13 Bende, gimoro amora ma ukwayo e nyinga, abiro timonu mondo Wuora oyud duong’ kokalo kuom Wuode. 14 Ka ukwayo gimoro amora e nyinga, abiro timonugo.

15 “Ka uhera, ubiro rito chikena. 16 Kendo abiro kwayo Wuora mi nomiu jakony machielo mondo obed kodu nyaka chieng’. 17 Jakonyno en roho mar adiera, ma piny ok nyal yudo nikech piny ok nene, bende ok ong’eye. Un ung’eye, nimar osiko kodu kendo en kuomu. 18 Ok abi weyou kiye. Abiro duogo iru. 19 Pod odong’ kinde matin to piny ok bi nena kendo, to un ubiro nena, nimar angima kendo un bende unubed mangima. 20 E chieng’ono, unung’e ni an e winjruok achiel gi Wuora, kendo ni un e winjruok achiel koda, bende ni an e winjruok achiel kodu. 21 Ng’ato ang’ata ma nigi chikena kendo ma ritogi, mano e ng’at mohera. Kamano bende, ng’ato ang’ata mohera, Wuora biro here, kendo abiro here, mi ananyisrane ayanga.”

22 Judas, ma ok Iskariot, nopenje kama: “Ruoth, en ang’o mosetimore momiyo idwaro nyisorinwa ayanga to ok ne piny?”

23 Yesu nodwoke niya: “Ka ng’ato ohera, obiro rito wachna, kendo Wuora biro here, mi wanabi ire kendo loso kar dakwa kode. 24 Ng’ato ang’ata ma ok ohera, ok orit wechena. Wach ma uwinjono ok en mara, to en mar Wuora ma noora.

25 “Awachonu gigi sama pod an kodu. 26 To jakonyno, roho maler, ma Wuora biro oro e nyinga, en e ma obiro puonjou gik moko duto, kendo paronu weche duto ma nawachonu. 27 Aweyonu kuwe; amiyou kuwe mara. Ok amiugo e yo ma piny chiwego. Kik uwe chunyu chandre kata nyosore nikech luoro. 28 Ne uwinjo ka awachonu ni, ‘Awuok adhi kendo ni abiro duogo iru.’ Ka adier uhera, da ubedo mamor ni awuok adhi ir Wuora, nikech Wuora duong’ moloya. 29 Omiyo, koro asewachonu ka pok mano otimore, mondo ka otimore, to uyie. 30 Ok abi wacho weche mang’eny kodu kendo, nimar jaloch mar pinyni biro, to oonge gi teko kuoma. 31 To mondo piny ong’e ni ahero Wuora, atimo mana kaka Wuora osechika ni atim. Auru malo wawuog kae.