Johana

15 “An e yadh mzabibu madier, to Wuora e japur. 2 Bede duto man kuoma ma ok nyag olemo ogolo oko, to bede duto ma nyago olemo, olwero maler mondo eka ginyag olemo momedore. 3 Un usebedo maler nikech wach ma asewachonu. 4 Sikuru e winjruok achiel koda, to an bende anasik e winjruok achiel kodu. Mana kaka bat ok nyal nyago olemo kende owuon mak mana ka osiko e yadh mzabibu, un bende ok unyal nyago olemo mak mana ka usiko e winjruok achiel koda. 5 An e yadh mzabibu; un e bedene. Ng’ato ang’ata ma siko e winjruok achiel koda kendo ma siko e winjruok achiel kode, jali nyago olemo mang’eny; nimar ka ok an, to ok unyal timo gimoro ngang’. 6 Ka ng’ato ok sik e winjruok achiel koda, iwite oko mana kaka bad yath, kae to otwo. Eka ji choko bedego kendo giwitogi e mach mi wang’gi. 7 Un kusiko e winjruok achiel koda, kendo ka wechena siko e iu, kwauru gimoro amora mudwaro, to biro timorenu kamano. 8 Wuora yudo duong’ nikech ma: ni udhi nyime nyago olemo mang’eny kendo unyiso ni un jopuonjrena. 9 Mana kaka Wuora osehera, e kaka aseherou; sikuru e herana. 10 Kurito chikena, ubiro siko e herana, mana kaka aserito chike Wuora kendo asiko e herane.

11 “Asewachonu gigi mondo morna obed kuomu kendo mor maru opong’. 12 Ma e chikna, ni mondo uherru ng’ato gi ng’ato mana kaka aseherou. 13 Onge ng’at ma nigi hera maduong’ ma loyo ma: ni ng’ato chiwo ngimane nikech osiepene. 14 Un osiepena kutimo gima achikou. 15 Koro ok aluongu kendo ni wasumbni, nimar misumba ok ong’eyo gima ruodhe timo. To aseluongou ni osiepena, nimar asemiyo ung’eyo gik moko duto ma asewinjo kuom Wuora. 16 Ok ne uyiera, to nayierou, kendo naketou mondo udhi unyag olemo, kendo mondo olemo ma unyago osik, eka gimoro amora mukwayo Wuora e nyinga, obiro miyou.

17 “Wechegi achikou mondo uherru e kindu. 18 Ka piny osin kodu, ng’euru ni nokwongo sin koda ka pok osin kodu. 19 Ka da un mag piny, piny dine ohero gige owuon. To koro nikech ok un mag piny, to aseyierou koa e piny, piny osin kodu nikech mano. 20 Paruru gima nawachonu niya: Misumba ok duong’ moloyo ruodhe. Ka gisesanda, un bende gibiro sandou; ka giserito wachna, gibiro rito wachu bende. 21 To gibiro timonu mago duto nikech nyinga, nimar ok ging’eyo Jal ma noora. 22 Dine bed ni ne ok abiro mi awuoyo kodgi, dikoro gionge gi richo. To koro ok ginyal kwer ni gionge richo. 23 Ng’ato ang’ata ma sin koda, osin gi Wuora bende. 24 Ka dine bed ni ok ne atimo e diergi tije ma onge ng’at machielo mosetimo, dikoro gionge gi richo; to sani gisenena kendo gisin koda kanyachiel gi Wuora. 25 To mano notimore mondo eka wach mondik e Chikgi ochop niya: ‘Ne gisin koda ma onge gimomiyo.’ 26 Ka jakony ma abiro oronu koa ir Wuora obiro, roho mar adiera ma wuok ir Wuora, en e ma obiro chiwo neno kuoma; 27 eka un bende, ubiro chiwo neno nikech usebedo koda nyaka ne achak tija.