Mokwongo ne Jo-Korintho

15 Owetena, koro aparonu kuom wach maber ma ne alandonu+ ma bende ne urwako kendo ma uchung’ie motegno. 2 Kokalo kuom wachno, sani iresou ka umakoru motegno gi wach maber ma ne alandonuno, mak mana ka po ni ne urwako yie kayiem nono.

3 Nimar achiel kuom gik ma ne akwongo puonjou gin gik ma an bende ne omiya, ni Kristo ne otho ne richowa kaka Ndiko nokoro;+ 4 kendo ni ne oyike,+ ee, mi ne ochiere+ e odiechieng’ mar adek+ kaka Ndiko nokoro;+ 5 kendo ni nofwenyore ne Kefa,*+ eka bang’e ne ji Apar Gariyoka.+ 6 Bang’ mano, nofwenyore ne owete mokalo 500 ma nochokore kamoro achiel,+ ma thothgi pod ni kodwa, kata obedo ni moko kuomgi osenindo e tho. 7 Bang’e, nofwenyore ne Jakobo+ eka ne joote duto.+ 8 To mogik chuth, nofwenyorena bende+ ka ng’at ma ne onyuol ka ndalone podi.

9 Nimar an e ma atinie mogik kuom joote, kendo ok awinjora mondo oluonga ni jaote nikech ne asando kanyakla mar Nyasaye.+ 10 Kata kamano, kuom ng’wono mogundho mar Nyasaye an gima sani an. Kendo ng’wonone mogundho ma nonyisa ok nobedo kayiem nono, to ne atiyo matek moloyogi giduto; natimo kamano kuom ng’wono mogundho mar Nyasaye to ok kuom tekrena awuon. 11 Omiyo, kata bed ni an e ma ayalonu, kata gin, ma e gima wayalo, kendo e gima ne uyiego.

12 Koro ka wayalo ni Kristo osechier oa kuom jo motho,+ obet nade ni jomoko kuomu wacho ni jo motho ok bi chier? 13 Ka kuom adier jo motho ok bi chier, to kare Kristo bende ne ok ochier. 14 To ka dibed ni Kristo ne ok ochier, kare wach ma wayalo en kayiem nono, kendo yieu bende en kayiem nono. 15 E wi mano, wabedo bende joneno mag miriambo kuom Nyasaye+ nikech wasechiwo neno mar miriambo e wi Nyasaye ka wawacho ni nochiero Kristo,+ to ne ok ochiere, ka en adier ni jo motho ok chier. 16 Nimar ka ok bi chier jo motho, Kristo bende ne ok ochier. 17 E wi mano, ka Kristo ne ok ochier, yieu en kayiem nono; usiko e richou.+ 18 Bende, jo ma nonindo e tho ka gin e winjruok achiel gi Kristo, kargi oselal nono.+ 19 Ka genowa kuom Kristo en mana mar ngimani kende, wan e jo monego onenwa lit moloyo ji duto.

20 To koro Kristo osechier oa kuom jo motho, en e nyak mokwongo kuom jo mosenindo e tho.+ 21 Nimar ka tho nobiro kokalo kuom ng’ato achiel,+ jo motho bende ibiro chier kokalo kuom ng’ato achiel.+ 22 Mana kaka kuom Adam dhano duto tho,+ e kaka bende kuom Kristo dhano duto biro bedo mangima.+ 23 To mana kaluwore gi kar ng’ato ka ng’ato: Kristo e nyak mokwongo,+ bang’ mano, jo ma gin mag Kristo e ndalo ma biro yudo ka entie.*+ 24 Kae to gikone, obiro duoko Pinyruoth ne Nyasache kendo Wuon mare bang’ kosegolo loje, gi telo, kod teko duto.+ 25 Nimar nyaka oloch ka en ruoth nyaka chop kama Nyasaye biro keto wasike duto e bwo tiende.+ 26 Kendo jasigu mogik ma ibiro tiek en tho.+ 27 Nimar Nyasaye “noketo gik moko duto e bwo tiend Kristo.”+ To sa mowacho ni ‘gik moko duto oseket e bwo Kristo,’+ nenore maler ni mano ok oriwo Jalno ma noketo gik moko duto e bwo Kristo.+ 28 To bang’ ka gik moko duto oseket e bwo Wuoyi, eka Wuoyi bende biro bolore e bwo Jal ma noketo gik moko duto e bwoye,+ mondo Nyasaye obed gik moko duto ne ji duto.+

29 Kare jo ma ibatiso mondo gibed jo motho biro timo nang’o?+ Ka ok chier jo motho ngang’, kare ang’o momiyo ibatisogi mondo gibed kamano? 30 Ang’o momiyo wachomo masira seche duto?+ 31 Tho ochoma pile. Owetena, mano en gima an-go gadier mana kaka sunga ma an-go nikech un, ma bende an-go kuom Kristo Yesu Ruodhwa. 32 Ka asekedo gi ondiegi e Efeso+ mana kaka jomamoko,* mano konya nade? Ka kare ok chier jo motho, “wachiemuru kendo wameth nimar kiny wanatho.”+ 33 Kik wuondu. Osiepe maricho ketho timbe mabeyo.+ 34 Pachu mondo ochiew e yo makare kendo weuru timo richo, nimar jomoko onge gi ng’eyo mar Nyasaye. Awacho mae mondo akuod wiu.

35 Kata kamano, ng’ato nyalo penjore niya: “Ere kaka ibiro chier jo motho? Ee, en kit del mane ma ibiro chiergigo?”+ 36 In ng’at ma parone ok ni kare! Gima ichuoyo ok nyal bedo mangima mak mana ka osetho mondi. 37 Kendo kuom gima ichuoyo, ichuoye, ok ka en del mosedongo, to mana kodhi matin, bed ni en mar ngano kata mar kit cham moro amora; 38 to Nyasaye miyo kodhino del mana kaka en owuon ohero, kendo omiyo kodhi ka kodhi del mar kodhino owuon. 39 Ringruok duto ok chalre, to nitie mar dhano, nitie mar jamni, nitie mar winy, kendo nitie mar rech. 40 Bende, nitie del mag polo+ gi del mag piny;+ to duong’ ma del mag polo nigo opogore gi duong’ ma del mag piny nigo. 41 Nitie duong’ mar wang’-chieng’, duong’ mar dwe,+ to kod duong’ mar sulwe; to chutho sulwe achiel nigi duong’ moloyo sulwe machielo.

42 Kamano bende e kaka ichiero jo motho. Ichuoye e del ma tow; to ichiere gi del ma ok tow.+ 43 Ichuoye ka oonge gi duong’; to ichiere gi duong’.+ Ichuoye ka onyap; to ichiere ka en gi teko.+ 44 Ichuoye ka en del mar ringruok; to ichiere gi del mar polo. Ka nitie del mar ringruok, nitie bende del mar polo. 45 Ondik kamano niya: “Adam dhano mokwongo nobedo mangima.”*+ Adam mogik nobedo gi del mar polo ma chiwo ngima.+ 46 Kata kamano, del mar polo ok e ma kwong. To mar ringruok e ma kwongo, eka bang’e, mar polo. 47 Dhano mokwongo en moa e piny kendo mochue gi buru;+ to dhano mar ariyo en moa e polo.+ 48 Mana kaka jal ma ochue gi buruno chalo, e kaka jo mochue gi buru bende chalo; kendo mana kaka jal moa e polono chalo, e kaka jo ma gin mag polo bende chalo.+ 49 Mana kaka wasebedo e kit jal mochue gi buru,+ wanabed bende e kit jalo moa e polo.+

50 To awachonu owetena ni ringruok gi remo ok nyal yudo pok e Pinyruodh Nyasaye, kendo gima tow ok nyal yudo pok mar gima ok tow. 51 Neuru! anyisou wach moro maler moum, niya: Ok wabi nindo waduto e tho, to waduto ibiro lokwa+ 52 mapiyo ka diemo wang’, e kinde ywak mar turmbeta mogik. Nikech turmbeta noywagi,+ kendo jo motho ibiro chier gi del ma ok tow, mi nolokwa. 53 Nimar del ma towni nyaka rwak del ma ok tow,+ kendo del ma tho nyaka rwak del ma ok tho.+ 54 To ka del ma towni oserwako del ma ok tow kendo ka del ma tho oserwako del ma ok tho, eka wach biro timore ma ne ondik niya: “Osegolo* tho motieke chuth.”+ 55 “In tho, ere lochoni? In tho, ere masirani?”+ 56 Richo e lit ma kelo tho,+ to teko mar richo en Chik.+ 57 To agoyo ne Nyasaye erokamano nimar omiyo walocho kokalo kuom Ruoth Yesu Kristo!+

58 Kuom mano, owetena ma ahero, chung’uru motegno+ ma ok uyiengni, ka kinde duto ubedo modich+ e tij Ruoth, ka ung’eyo ni tich matek mutiyo ne Ruoth ok en kayiem nono.+