EZEKIEL

1 E odiechieng’ mar abich, dwe mar ang’wen, higa mar 30, ka ne an e bath aora Kebar+ gi jo ma noter tuech,+ polo ne oyawore mi achako neno fweny mag Nyasaye. 2 E odiechieng’ mar abich mar dweno, tiende ni, e higa mar abich nyaka ne ter Ruoth Jehoyakin e tuech,+ 3 wach Jehova nobiro ne Ezekiel* wuod Buzi jadolo, ka ne en e bath aora Kebar e piny Jo-Kaldea.+ Lwet Jehova nobiro kuome kuno.+

4 Kendo ka ne ating’o wang’a, naneno yamo makutho matek+ koa yo nyandwat. Ne nitie bor polo maduong’ kod mach ma mil*+ kendo ler ne olwore koni gi koni. To e dier majno, ne nitie gimoro ma ne chal gi chuma* ma rieny.+ 5 Bende, ne aneno gik mangima ang’wen e iye,+ kendo moro ka moro ne chalo gi dhano. 6 Moro ka moro kuomgi ne nigi lela wenge ang’wen kod buombe ang’wen.+ 7 Tiendegi ne oriere tir, i tiendgi ne chalo gi tiend nyaroya, kendo ne girieny ka mula morudhi.+ 8 E bwo buom ka buom mar gik mangimago ne nitie lwedo machal gi lwet dhano. Gik mangima ang’wen-go ne nigi lela wengegi kod buombegi. 9 Buombegi ne mulore. Ne gidhi adhiya ma ok gibaro tenge; giduto ne gidhi nyime tir.+

10 Kama e kaka lela wengegi ne chalo: Moro ka moro ne nigi lela wang’ dhano, gi lela wang’ sibuor+ korachwich, kod lela wang’ ruath+ koracham, kendo giduto ne gin gi lela wang’+ otenga.+ 11 Kamano e kaka lela wengegi ne chalo. Giduto buombegi noyarore. Moro ka moro ne nigi buombe ariyo ma ne mulore, kendo ariyo mamoko ne oumo dendgi.+

12 Moro ka moro ne dhi nyime tir kamoro amora ma roho ne dwaro ni odhiye.+ Ne gidhi adhiya ma ok gibaro tenge. 13 Kit gik mangimago ne chalo gi maka ma liel, kendo gik moko ma chalo gi mach ne ringo koni gi koni e kindgi. Kendo mil polo ne wuok e i majno.+ 14 Ka ne gik mangimago ringo koni gi koni, ne gichalo mana ka mil polo.

15 Ka ne pod arango gik mangima ma ne nigi lela wenge ang’wen-go, ne aneno tielo ma chalo gi tielo mag geche lweny e piny, e bath moro ka moro kuomgi.+ 16 Tielogo ne rieny mana ka kidi miluongo ni krisolait, kendo giduto kargi ang’wen ne gichalre. Ne chalo ka gima oso tielo achiel e i nyawadgi.* 17 Ka ne giringo, ne ginyalo ringo koni gi koni ma ok gilokre. 18 Tielogo* ne dongo kendo lich, kendo wenge ne olworo tielogo duto.+ 19 Sa asaya ma gik mangimago ne wuotho, tielogo bende ne wuotho kodgi. Kendo sa asaya ma ne giidho malo ka gia e piny, tielogo bende ne idho kodgi.+ 20 Ne gidhi kamoro amora ma roho ne chikogie, ee, kamoro amora ma roho ne dhiye. Ka ne giidho malo, tielogo bende ne idho malo kodgi, nimar roho ma ne nie gik mangimago e ma ne nie tielogo. 21 Ka ne gik mangimago wuotho, kata gichung’, kata giidho malo ka gia e piny, tielogo bende ne timo mana kamano, nimar roho ma ne nie gik mangimago e ma ne nie tielogo.

22 Ne nitie gimoro malich machal gi kor lwasi ma ne opedhore e wi gik mangimago, kendo gino ne mil mana ka pe.+ 23 Buombe gik mangimago noyarore* e bwo gino, kendo buom achiel ne mulo machielo. Giduto ne gin gi buombe ariyo ma ne giumogo dendgi konchiel, kod ariyo mamoko ma ne giumogo dendgi komachielo. 24 Ka ne gifuyo, buombegi ne fwadhore matek mana ka nam ma wuo, kendo ka dwond Ng’at Manyalo Duto.+ Ka ne giringo, koko margi ne chalo gi mar jolweny mang’eny. To ka ne gichung’, ne giloro buombegi piny.

25 Ne awinjo dwol moro e wi kor lwasi ma ne nie wigi. (To ka ne gichung’, ne giloro buombegi piny.) 26 E wi kor lwasi ma ne nie wigino, ne nitie gima chalo kidi mar safir,+ kendo gino ne chalo gi kom-loch.+ Bende, kido moro machal gi dhano nobet e kom-lojno.+ 27 Ne aneno gimoro marieny ka chuma+ molut e mach. Gino ne nie nungone nyaka e wiye. Kendo chakre e nungone nyaka e tiende, ne nitie gimoro machal gi mach.+ Ler marieny ne olwore koni gi koni 28 mana ka lihudu*+ manie kor polo sa ma koth chue. Mano e kaka ler ma nolwore ne chalo. Lerno ne chalo gi duong’ mar Jehova.+ Ka ne anene, ne apodho piny auma, mi achako winjo ka ng’ato wuoyo.

2 Eka ne owachona niya: “Wuod dhano,* chung’ malo awuo kodi.”+ 2 Ka ne owuoyo koda, roho nobiro kuoma mi ne achung’+ mondo awinj Ng’at ma loso kodano.

3 Eka nodhi nyime nyisa niya: “Wuod dhano, aori ir Jo-Israel,+ oganda ma wigi tek kendo ma oseng’anyona.+ Gin kaachiel gi kweregi gisebedo ka gikethona nyaka chil kawuono.+ 4 Aori ir jo ma wigi tek kendo ma tokgi tek+ mondo iwachnegi ni, ‘Ma e gima Jehova Wuon Loch Duto owacho.’ 5 To ka giwinji kata gitamore winji nikech gin oganda ma wigi tek,+ to gibiro ng’eyo ni kare janabi ne nie kindgi adier.+

6 “To in wuod dhano, kik iluorgi+ kendo kik iluor weche ma gibiro wachoni, kata obedo ni olwori gi kuthe*+ kendo idak e kind thomoni. Kik iluor wechegi+ kata wengegi,+ nimar gin oganda ma wigi tek. 7 Kata obedo ni wigi tek kamano, nyaka inyisgi weche duto ma asechiki, bed ni giyie winjo kata gidagi.+

8 “To in wuod dhano winj gima anyisi. Kik ibed kaka oganda ma wigi tekgi. Yaw dhogi mondo icham gima amiyi.”+

9 Ka ne ating’o wang’a, ne aneno ka oriena lwedo moro,+ kendo e lwedono ne nitie buk modol mondikie weche moko.+ 10 Ka ne oyaro bugno e nyima, ne aneno ka ondik weche e bugno koni gi koni.+ Ne ondik weche mag ywagruok, gi nduru, kod kuyo.+

3 Eka ne owachona niya: “Wuod dhano cham gima nie nyimini. Cham buk modolni, kendo idhi iwuo gi Jo-Israel.”+

2 Omiyo, ne ang’amo dhoga, mi omiya bugno mondo acham. 3 Ne omedo wachona niya: “Wuod dhano cham buk ma amiyini mi iyieng’.” Omiyo, ne achako chame, kendo ne omit ka mor kich e dhoga.+

4 Ne owachona niya: “Wuod dhano, dhi ir Jo-Israel kendo inyisgi weche ma asechiki. 5 Nimar ok aori ir oganda ma wacho dhok matek ma ok ing’eyo, to aori mana ir Jo-Israel. 6 Ok aori ir ogendni ma wacho dhok matek ma ok ing’eyo, kendo ma ok iwinj tiend wechegi. Dabed ni gin e ma aori irgi, to dine giwinjo wachni.+ 7 To Jo-Israel ok nowinji nikech ok gidwar winja.+ Giduto gin jo ma wigi tek kendo ma tokgi tek.+ 8 Asemiyo wang’i obedo matek ka maggi, kendo pat wiyi bende obedo matek ka maggi.+ 9 Asemiyo pat wiyi obed matek ka almasi kendo ka kidi matek.+ Kik iluorgi kendo kik iluor wengegi+ nimar gin jo ma wigi tek.”

10 Nomedo wachona niya: “Wuod dhano, winj weche duto ma anyisigi kendo irwakgi e chunyi. 11 Dhi ir jou manie tuech mondo iwuo kodgi,+ bed ni giyie winji kata gitamore. Nyisgi ni, ‘Ma e gima Jehova Wuon Loch Duto owacho.’”+

12 Eka roho ne oting’a malo+ kendo ne awinjo dwol moro mamor matek e ng’eya ka wacho niya: “Opak duong’ mar Jehova e kar dak mare.” 13 Ne awinjo buombe gik mangimaka ka mulore.+ Bende, ne awinjo koko mar tielo ma ne nie butgi,+ kaachiel gi dwond gimoro mamor matek. 14 Roho nobiro moting’a malo, kendo iya ne owang’ mi adhi ka an gi mirima mager, to lwet Jehova ne ni kuoma. 15 Omiyo, ne adhi Tel-abib ka ma ne oterie jowa e tuech e badh aora Kebar,+ kendo ne adak kodgi kuno kuom ndalo abiriyo ka adhier nono+ kuom gik ma ne aseneno.

16 Bang’ ndalo abiriyo wach Jehova ne obirona kama:

17 “Wuod dhano, aseketi jarit mar od Israel,+ kendo nyaka imigi siem moro amoro moa e dhoga.+ 18 Ka awacho ne ng’at marach ni, ‘Ibiro tho,’ to ok imiye siem, kendo ok ikwere mondo owe yorene maricho mondo obed mangima,+ obiro tho nikech richone,+ to anakwan rembe e wiyi.+ 19 To ka isiemo ng’at ma timbene richo to ok oweyo yorene marichogo, obiro tho nikech richone, to in ibiro reso ngimani.+ 20 Ka ng’at makare oweyo yorene makare mi ochako timo gik maricho, abiro ketone gima ochwanyoree mi enotho.+ Ka po ni ne ok imiye siem, obiro tho nikech richone kendo ok nopar timbene makare, to rembe nodong’ e wiyi.+ 21 To ka isiemo ng’at makare mondo kik otim richo mi ok otimo gik maricho, obiro bedo mangima nikech ne omiye siem,+ to in ibiro reso ngimani.”

22 Lwet Jehova ne obiro kuoma ka an kanyo, mi owachona niya: “A malo idhi e hoho, abiro wuoyo kodi kuno.” 23 Kuom mano, ne achung’ mi adhi e hoho, to ne! duong’ mar Jehova ne ni kanyo,+ omiyo, ne apodho auma. Ne en duong’ ma chal gi ma ne aneno e bath aora Kebar.+ 24 To roho ne obiro kuoma mi achung’,+ kendo ne owachona niya:

“Dhi ilorri e odi. 25 To in wuod dhano, gibiro tueyi gi tonde mondo kik iwuog idhi irgi. 26 Abiro miyo lewi omok e dandi, kendo ibiro bedo momo mi ok ibi miyogi siem, nikech gin oganda ma wigi tek. 27 To ka awuoyo kodi, abiro yawo dhogi, kendo iniwachnegi+ ni, ‘Ma e gima Jehova Wuon Loch Duto owacho.’ We mondo ng’at ma winjo owinji,+ to ng’at modagi winjo owe, nimar gin oganda ma tokgi tek.+

4 “To in wuod dhano, dhi ikaw matafari mondo iket e nyimi, kae to igorie dala mar Jerusalem. 2 Bang’e, iger ohinga molwore,+ ilosne pidhe mag lowo,+ iIwore gi kambi mag jolweny ma dwaro monje, kendo iketne gik mimukogo ohinga koni gi koni.+ 3 Bende, inikaw tawo mar nyinyo, kendo inikete obed kaka ohinga e kindi kod dalano. Eka inichom wang’i e matafarino tir, mondo ochal gi dala mimonjo; in e ma ibiro monje. Mano nobed ranyisi ne od Israel.+

4 “Eka ibiro nindo gi bathi koracham mondo iket richo mag Jo-Israel kuomi.*+ Ibiro ting’o richo mag Jo-Israel kuom ndalo duto ma ibiro nindo kanyo. 5 Abiro miyo itim kamano kuom odiechienge 390, ma romre gi higni ma gisetimogo richo,+ kendo ibiro ting’o ketho mar Jo-Israel. 6 Nyaka itiek ndalogo duto.

“Ininind kendo gi bathi korachwich mondo iting’ richo mag Jo-Juda+ kuom odiechienge 40. Inikwan higa achiel kar odiechieng’ achiel, ee, higa achiel kar odiechieng’ achiel, nikech mano e gima aseketoni. 7 lninind king’iyo wasigu molworo Jerusalem,+ ka in gi badi nono, kendo inikor masira ma biro yudo dalano.

8 “Ne! Abiro tueyi gi tonde mondo kik ilokri koni gi koni nyaka odiechienge mibiro geng’o ne dalano orum.

9 “Inikaw ngano, shairi, oganda, dengu, bel, gi kusemeth,* kae to iniolgi giduto e agulu achiel mondo itedgo makate. Inicham makateno kuom odiechienge 390 ma ibiro nindogo gi bathi.+ 10 Ibiro chamo chiemo ma romo shekel* 20 odiechieng’ kodiechieng’. Nyaka ichame mana e sa moketi.

11 “Ibiro modho pi mopim ma romo hin* achiel kuom auchiel. Nyaka imodhe mana e sa moketi.

12 “Ibiro chame mana kaka dicham makate molworore molos gi shairi. Ibiro tede gi mach michwako gi chieth motwo mar dhano ka ma ji duto nyalo nenie.” 13 Jehova ne odhi nyime wacho niya: “Kamano e kaka Jo-Israel biro chamo chiemo ma ok ler e kind ogendni ma abiro keyogie.”+

14 Eka ne adwoke niya: “Ok kamano, Jehova Wuon Loch Duto! Pok nachamoga ring le moyud kotho kata moneg gi le wadgi,+ kendo ring’o ma ok ler pok odonjoga e dhoga chakre tinna.”+

15 Omiyo, ne owachona niya: “Onge wach, abiro yieni mondo ited makateni gi mach mar owuoch dhiang’ kar chieth dhano.” 16 Eka nowachona niya: “Wuod dhano, abiro miyo chiemo obed ma onge e Jerusalem,+ ji biro pimo chiemo ma gichamo ka giparore,+ kendo gibiro modho pi ka gidhier nono.+ 17 Mano biro timore mondo kik gibed gi chiemo kod pi, kendo ng’ato ka ng’ato biro bwok kong’iyo nyawadgi, mi ginidher nikech kethogi.

5 “To in wuod dhano, dhi ikaw ligangla ma bith, mondo ilielgo wiyi kod tiki mana kaka jaliedo ma tiyo gi wembe timoga. Bang’e, ikaw rapim mondo ipim yiergo, kae to ipoggi. 2 Ibiro wang’o achiel kuom adek mar yiergo e mach manie dalano ka ndalo mogeng’ne orumo.+ To achiel kuom adek machielo, ibiro ng’ado gi ligangla e alwora duto mar dalano,+ kae to inike achiel kuom adek modong’go mondo yamo odhigo, nimar abiro wuodho ligangla mondo alawgigo.+

3 “Ibiro kawo yier moko kuomgi mondo ituegi e riak lawi. 4 Bang’e, ikaw moko kuom mago mondo iwit e mach mondo giwang’. Majno biro landore e Israel duto.+

5 “Ma e gima Jehova Wuon Loch Duto owacho: ‘Mani en Jerusalem. Asekete e dier piny, kendo ogendni mamoko olwore koni gi koni. 6 To oseweyo buchena gi chikena, kendo wiye tek moloyo ogendni kod pinje duto molwore.+ Nimar gisedagi buchena, kendo gisetamore luwo chikena.’

7 “Kuom mano, ma e gima Jehova Wuon Loch Duto owacho: ‘Nikech toku ne tek moloyo ogendni duto molworou, kendo ne ok uluwo chikena kata rito buchena, to ne uluwo mana buche mag ogendni molworou,+ 8 ma e gima Jehova Wuon Loch Duto owacho: “Yaye in dala, asesin kodi.+ Abiro kumi e wang’ ogendni duto.+ 9 Abiro timoni gima pok natimoga nyaka nene, to ok nachak anatim kendo, anatimni kamano nikech timbeni modwanyore.+

10 “‘“Omiyo, wuone biro chamo nyithindgi,+ kendo nyithindo bende biro chamo wuonegi. Abiro kumou kendo keyo jou modong’ kuonde duto e piny.”’+

11 “‘Kuom mano, mana kaka angima,’ Jehova Wuon Loch Duto owacho, ‘nikech ne udwanyo kara maler gi sanambeu makwero kod timbeu mochido,+ an bende abiro dagiu, kendo ok abi kechou kata nyisou ng’wono.+ 12 Achiel kuom adek mar jou biro tho gi tuo kata kech. Achiel kuom adek machielo biro tho gi ligangla.+ To achiel kuom adek modong’ anake koni gi koni, kendo analawgi gi ligangla.+ 13 To ka asekumogi gi mirima kod ichwang’ mager kamano, eka mirimba biro rumo kendo abiro kuwe mos.+ Bang’e, ka asetieko olonegi mirimba gibiro ng’eyo ni an Jehova, an e ma asewuoyo kodgi ka anyisogi ni an kenda e ma onego gilama.+

14 “‘Anami idong’ gunda, kendo ogendni duto molwori koni gi koni kod ng’ato ang’ata ma biro kadho buti biro jari.+ 15 Adier, ka asekumou malit gi mirima mager kendo gi ich-wang’ kamano, unubed oganda ma ichayo kendo iyanyo,+ bende, unubed ranyisi ma chiwo siem ne ogendni molworou koni gi koni. An Jehova, an e ma asewacho mano.

16 “‘Abiro tieko chiembu mondo kech onegu mana ka gima achielou gi aserni motimo sum. Asernigo biro tiekou.+ Abiro miyo kejno obed mager nimar chiemo nobed ma onge.+ 17 Abiro oronu kech kod le mag bungu+ mondo otiek nyithindu. Tuoche kod chuero remo biro pong’o kuondeu duto, kendo anaor ligangla mondo onegu.+ An Jehova e ma asewacho mano.”’

6 Wach Jehova nobirona kendo niya: 2 “Wuod dhano, lokri ing’i gode mag Israel mondo ikornegi gima biro timorenegi. 3 Onego iwachnegi ni, ‘Yaye un gode mag Israel, winjuru gima Jehova Wuon Loch Duto owacho: Ma e gima Jehova Wuon Loch Duto owacho ne gode madongo, gode matindo, aoche, kod hohni: “Neuru! Abiro kelo ligangla kuomu, kendo abiro ketho kuondeu moting’ore malo. 4 Ibiro keth kendo magu mag misengni, ibiro tur gik muwang’oe ubani,+ kendo abiro wito ringre jou e nyim sanambeu makwero.*+ 5 Abiro wito ringre Jo-Israel e nyim sanambegi makwero, kendo abiro keyo chokeu e kendo magu mag misengni.+ 6 Mier madongo duto mag Jo-Israel ibiro kethi,+ kendo kuonde moting’ore malo ibiro kethi.+ Ibiro keth kendo magu mag misengni, gi sanambeu makwero, gi gik ma uwang’oe ubani, kaachiel gi gik moko duto ma nuloso. 7 Jo monegi biro podho e kindu,+ mi unung’e ni an e Jehova.+

8 “‘“Kata kamano, abiro weyo jomoko manok, nikech jomoko kuomu biro tony e dho ligangla e kinde mibiro keu e pinje duto.+ 9 Jo ma otonygo biro para ka gin kuonde ma otergie tuech.+ Gining’e ni ne awinjo malit ahinya nikech chunygi nobalo mi giweya,+ kendo wengegi ne gombo mana sanambegi makwero.+ Gibiro yudo wich-kuot, kendo gibiro chare giwegi nikech timbegi maricho.+ 10 Kamano, gining’e ni an e Jehova, kendo masira ma ne awacho ni adhi kelonegi ne ok en kayiem nono.”’+

11 “Ma e gima Jehova Wuon Loch Duto owacho: ‘Pamuru lweteu, gouru tiendeu piny, kendo uywag malit nikech timbe duto maricho ma Jo-Israel osetimo, nimar ligangla, kech, kod tuoche biro negogi.+ 12 Tuo biro nego ng’at man ka mabor, ng’at man machiegni biro tho gi ligangla, to jo modong’ biro tho gi kech. Kamano abiro olo mirimba mager kuomgi.+ 13 Unung’e ni an e Jehova,+ sa ma ringre jo motho okere e kind sanambegi makwero, e kendo maggi mag misango,+ e wi gode duto madongo, e wi gode matindo, e bwo yiende madongo, e bwo bede yiende madongo ka ma giwang’oe ubani mang’we mamit mondo gimor sanambe duto.+ 14 Abiro rieyo lweta kuomgi mondo agogi kendo anami pinygi odong’ gunda. Kuonde ma gidakie ibiro jwang’ moloyo thim man machiegni gi Dibla. Mi gining’e ni an e Jehova.’”

7 Wach Jehova nobirona kendo niya: 2 “To in, wuod dhano, ma e gima Jehova Wuon Loch Duto owacho ne piny Israel: ‘Giko osechopo! Adier, giko osechopo e tunge ang’wen mag piny. 3 Koro, giko osechoponu, kendo anabed gi ich-wang’ mager kodu. Abiro ng’adonu bura kaluwore gi yoreu, kendo abiro kumou nikech timbeu modwanyore. 4 Ok abi kechou, kata nyisou ng’wono.+ To anakumu nikech yoreu maricho, kendo ubiro sandoru nikech timbeu modwanyore.+ Mi unung’e ni an Jehova.’+

5 “Ma e gima Jehova Wuon Loch Duto owacho: ‘Neuru! Masira biro, masira malich biro.+ 6 Giko biro; giko nobi; giko biro poyou.* Neuru! Adier, obiro. 7 In ng’at modak e piny, ndaloni* osechopo.+ Kinde biro kendo odiechieng’no chiegni. Koko mag chochni e ma winjore e gode to ok koko mag mor.

8 “‘Machiegni, abiro olo mirimba kuomu,+ anabed gi ich-wang’ mager kodu.+ Abiro ng’adonu bura kaluwore gi yoreu, kendo abiro kumou nikech timbeu modwanyore. 9 Ok abi kechou kata nyisou ng’wono.+ To anakumu nikech yoreu maricho, kendo ubiro sandoru nikech timbeu modwanyore. Mi unung’e ni an Jehova, an e ma agoyou.+

10 “‘Ne, odiechieng’no biro!+ Ne, odiechieng’no okayo machiegni! Ndaloni* osechopo; maua oseloth e luth kendo sunga* osethiewo. 11 Timbe gero oseloth e ludh richo.+ Onge gimoro amora kuomgi ma biro dong’. Mwandugi, ogandagi, kod huma ma gin-go biro rumo. 12 Kindeno biro chopo, adier, odiechieng’no nobi. Jang’iepo kik mor, kendo jauso kik ywagi, nikech mirimano nobi kuomgi giduto.*+ 13 Jauso ok nodog kuom gima noseusono, kata ka po ni otony, nikech fwenyni omulo oganda duto. Onge ng’ato ang’ata ma biro dok kata ma biro reso ngimane nikech richone.

14 “‘Gisegoyo turmbeta,+ ng’ato ka ng’ato oseikore, to onge ng’at ma dhi e lweny, nikech aseolo mirimba kuom oganda duto.+ 15 Ligangla nego ji oko,+ to tuoche kod kech neko e i dala. Ng’ato ang’ata ma ni oko biro tho gi ligangla, to kech gi tuo biro nego jo ma nie dala.+ 16 Joggi motony biro ringo e gode, kendo ng’ato ka ng’ato biro ywagore nikech kethone mana ka akuche mag hoho.+ 17 Lwetegi duto biro nyosore, kendo chongegi duto biro timo pi.*+ 18 Girwakore gi lep gunia,+ kendo luoro omakogi. Wiye ji duto ibiro liel,* mi giniyud wich-kuot.+

19 “‘Gibiro wito fedha maggi e nderni, kendo dhahabu maggi biro sinogi. Dhahabu kod fedha maggi ok bi resogi e odiechieng mirimb Jehova.+ Adier, mwandugo ok notieknegi kech kata yieng’ogi, nikech gigo e ma nomiyo gichwanyore mi gitimo richo. 20 Ne gisungore nikech gik bidhruok mabeyo ma ne gin-go, kendo ne gitiyo kodgi* e loso sanambegi makwero, ee, nyiseche manono.+ Mano e momiyo abiro miyo mwandugo obednegi gima ogak. 21 Abiro chiwo mwandugo* mondo ogendni mamoko oyakgi. Anami jo maricho modak e piny oyak mwandugo mi ginidwanygi.

22 “‘Abiro lokonegi wang’a mondo kik ang’igi,+ mi ginidwany kara mopondo,* kendo jomecho nodonj e iye mi ginidwanye.+

23 “‘Thedhuru nyororo,*+ jopiny tho nikech bura ma ok kare,+ kendo dala opong’ gi timbe gero lilo.+ 24 Abiro kelonegi ogendni maricho moloyo+ mondo okaw utegi,+ kendo anatiek sunga mar joroteke, mi kuondegi maler ibiro dwany.+ 25 Ka chandruok oyudogi gibiro manyo ka ma digiyudie kuwe, to ok giniyudi.+ 26 Masiche biro luwore, kendo weche maricho e ma unuwinji. Ji biro dhi ir janabi mondo onyisgi fweny,+ kata kamano, chik biro lal ne jadolo kendo rieko biro lal ne jodongo.+ 27 Ruoth biro ywagore,+ kendo chuny jaduong’ biro nyosore. Lwet jo modak e piny biro tetni nikech luoro. Abiro kumogi kaluwore gi yoregi, kendo anang’adnegi bura mana kaka giseng’ado ne jomamoko. Mi gining’e ni an e Jehova.’”+

8 E odiechieng’ mar abich dwe mar auchiel, e higa mar auchiel, noyudo abet e oda, kendo jodongo mag Juda noyudo obet e nyima, lwet Jehova Wuon Loch Duto nobiro kuoma. 2 Ne ating’o wang’a, mi aneno kit gimoro machal gi mach. Kendo chakre e nungone+ nyaka e tiendene, ne nitie gimoro machal gi mach. To kochakore e nungone nyaka e wiye, ne orieny ka chuma.*+ 3 Ne orieyo gimoro ma ne chalo gi lwedo mi omaka gi yie wiya, eka roho mar Nyasaye noting’a malo e yor fweny e kind polo gi piny motera nyaka Jerusalem. Ne oketa e dho rangach ma iye+ mochomo yo nyandwat, ka ma ne ochungie sanamu ma kelo nyiego.+ 4 Kendo ne! duong’ mar Nyasach Israel ma chalo gi ma ne aneno e hohocha ne ni kanyo.+

5 Eka nowachona niya: “Wuod dhano, ting’ wang’i malo mondo irang yo nyandwat.” Omiyo, ne ating’o wang’a mi arango yo nyandwat, kendo kuno ne aneno sanamu ma kelo nyiego ka nie yo nyandwat mar kendo mar misango ma ne nie dho rangach. 6 Kendo ne onyisa niya: “Wuod dhano, be ineno gik malich kendo modwanyore ma Jo-Israel timo kae,+ kendo mosemiyo adhi mabor gi kara maler?+ To pod ibiro neno gik mamoko malich kendo modwanyore moloyo mago.”

7 Eka ne okela nyaka e dho ranga laru, to ka narango, ne aneno otuchi moro e kor ot. 8 Ne onyisa niya: “Wuod dhano, tuch kor ot.” Omiyo, ne atucho kor ot mi aneno dhoot moro. 9 Ne owachona niya: “Donj idhi ine gik maricho kendo modwanyore ma gitimo e iye kanyo.” 10 Kuom mano, ne adonjo iye mi aneno ka kor ot duto ne ogorie le mamol, ondiegi ma ok ler,+ kaachiel gi sanambe duto makwero* mag Jo-Israel.+ 11 Jodongo 70 mag Jo-Israel ne ochung’ e nyimgi, Jaazania wuod Shafan+ bende ne nie diergi. Kendo ng’ato ka ng’ato kuomgi ne wang’o ubani ma ne golo yiro mang’we mamit e gire mar wang’o ubani.+ 12 Ne openja niya: “Wuod dhano, be ineno gima jodongo mag Israel timo e mudho, kendo ng’ato ka ng’ato ni e ode ma iye ka ma sanamu mare nitieree? Giwacho ni, ‘Jehova ok nyal nenowa. Jehova osejwang’o pinyni.’”+

13 Ne odhi nyime nyisa niya: “Pod ibiro neno gik malich kendo modwanyore ma gitimo moloyo kata mago.” 14 Eka notera nyaka e dho rangach mar od Jehova mochomo yo nyandwat. To kanyo ne aneno mon moko mobet piny ka ywagore ne nyasaye miluongo ni Tamuz.

15 Ne omedo wachona niya: “Wuod dhano, be ineno gik ma timorego? Pod ibiro neno gik malich kendo modwanyore ahinya.”+ 16 Eka ne otera e i laru ma iye mar od Jehova.+ Ne aneno chwo 25 e dho hekalu mar Jehova kanyo, ne gin e kind agola kod kendo mar misango. Ne giloko ng’egi ne hekalu mar Jehova, to wengegi nochomo yo wuok chieng’. Ne gikulore ne wang’ chieng’ ma ne ni yo ugwe.+

17 Ne openja niya: “Wuod dhano, be ineno gik ma timorego? Ok en gima lich e wang’ Jo-Juda ni gitimo gik modwanyorego, kendo pong’o piny gi timbe gero+ mondo giwang’go iya, koso? Eri koro gisoyo bad yath* e uma. 18 E momiyo an bende abiro olonegi mirimba. Ok abi kechogi kata nyisogi ng’wono.+ Kata ka giywak matek manade e ita, ok anawinjgi.”+

9 Eka nokok gi dwol maduong’ e ita kowacho niya: “Luonguru jo ma biro kumo dalani, kendo ng’ato ka ng’ato kuomgi obi gi gir lweny e lwete!”

2 Ne aneno ji auchiel ka biro koa e dho rangach ma malo+ mochomo yo nyandwat. Ng’ato ka ng’ato kuomgi noting’o gir lweny e lwete. To ne nitie ng’ato e diergi ma norwako law kitani, kendo ne otueyo gir ting’o wino mar jagoro e nungone. Ne gidonjo mi gichung’ but kendo mar misango ma nolos gi mula.+

3 Eka duong’ mar Nyasach Israel+ noa e wi jokerubi mi odhi nyaka e dho odno,+ mi ochako luongo ng’at ma norwako law kitani ma ne otueyo gir ting’o wino mar jagoro e nungone. 4 Jehova ne owachone niya: “Dhiyo iwuoth e i dala mar Jerusalem duto, kendo iket alama e lela wang’ ng’ato ka ng’ato ma ywagore kendo ma chur+ nikech gik moko duto modwanyore ma ji timo e dalano.”+

5 Kendo ne awinjo konyiso jomamokogo niya: “Luwuru bang’ ng’atno kamoro amora modhiyoe e i dalano mondo uneg ji. Kik ung’won ne ng’ato ang’ata kata keche.+ 6 Neguru jo moti, gi yawuoyi, gi nyiri, gi nyithindo matindo, kod mon.+ To kik usud but ng’ato ang’ata ma nigi alama.+ Unuchak nego ji e oda maler.”+ Kuom mano, ne gichako gi jodongo ma ne nie nyim odcha.+ 7 Eka ne onyisogi niya: “Dwanyuru odno kendo upong’ laru mage gi ringre jo motho.+ Dhiuru!” Kuom mano, ne gidhi mi ginego ji e dalano.

8 Sa ma ne ginego ji kamano, an ne adong’, kendo ne apodho auma mi aywak niya: “Yaye, Jehova Wuon Loch Duto! Be ibiro olo mirimbi kuom Jerusalem kendo tieko Jo-Israel duto modong’?”+

9 Ne owachona niya: “Richo mar Jo-Israel kod Juda duong’ ahinya.+ Piny opong’ gi remo,+ kendo dalano opong’ gi mibadhi.+ Nimar giwacho ni, ‘Jehova ok nyal nenowa. Jehova osejwang’o pinyni.’+ 10 An to ok abi kechogi kata nyisogi ng’wono.+ Anami richogi duognegi.”

11 Eka ne aneno ng’at ma norwako law kitani ma ne otueyo gir ting’o wino e nungonecha ka dwoko wach niya: “Asetimo mana kaka ne ichika.”

10 To ka pod ne ang’icho, ne aneno gima chalo gi kidi mar safir, kendo gino ne chalo gi kom-loch. Gino ne ni e wi kor lwasi ma ne nie wi jokerubi.+ 2 Eka ne onyiso ng’at ma ne orwako law kitanicha+ niya: “Donj e kind tielo ma wirore,+ e bwo jokerubi, kendo ijow maka maliel+ man e kind jokerubigo gi lweteni, kae to ikegi e wi dalano.”+ Omiyo, ne aneno ng’atno ka donjo kanyo.

3 Ka ne ng’atno donjo, jokerubigo ne ochung’ e bath odno korachwich, kendo bor polo ne opong’o laru ma iye. 4 Eka duong’ mar Jehova+ noa e wi jokerubi mi odhi nyaka e dho odno, kendo mos mos boche polo nopong’o odno,+ kendo duong’ mar Jehova ne rieny e laruno duto. 5 Kendo dwond buomb jokerubi ne winjore nyaka e laru ma oko mana ka dwond Nyasaye Manyalo Duto ka wuoyo.+

6 Eka ne ochiko ng’at ma ne orwako law kitanicha niya: “Kaw mach man e kind tielo ma wirore, e kind jokerubi.” Ng’atno ne odonjo mi ochung’ e bath tielo moro. 7 Eka achiel kuom jokerubigo norieyo lwete e mach ma ne nie kindgi,+ mi okwanyo moko moketogi e lwet ng’at ma ne orwako law kitanicha.+ Ng’atno ne okawo majno mi oa. 8 Jokerubigo ne nigi gima chalo lwet dhano e bwo buombegi.+

9 Ka ne pod arango gik ma ne timore, ne aneno tiend geche ang’wen e bath jokerubi. Tielo ka tielo ne ni but kerubi achiel. Tielogo ne rieny ka kidi miluongo ni krisolait.+ 10 Tielo ang’wen-go duto ne chalre. Ne chalo ka gima oso tielo achiel e i nyawadgi. 11 Ka ne giringo, ne ginyalo ringo koni gi koni ma ok gilokre, nimar ne giringo ka gichomo ka ma wigi ne ng’iyo tir. 12 Dendgi duto, ng’egi, lwetegi, buombegi, kaachiel gi tielo ang’wen-go duto, ne opong’ gi wenge.+ 13 To ne awinjo ka dwol moro luongo tielogo ni, “Tielo ma wirore!”

14 Moro ka moro kuomgi* ne nigi lela wenge ang’wen. Mokwongo ne chalo gi lela wang’ kerubi, mar ariyo ne chalo gi lela wang’ dhano, mar adek ne chalo gi lela wang’ sibuor, to mar ang’wen ne chalo gi lela wang’ otenga.+

15 Jokerubigo ne nyalo idho malo. Gin e gik mangima ma ne aneno e bath aora Kebar.+ 16 Kendo ka ne jokerubigo wuotho, tielogo bende ne dhi kanyachiel kodgi. Kendo sa asaya ma ne giyaro buombegi mondo gifu e wi piny, tielogo bende ne dhi kanyachiel kodgi ma ok gibar.+ 17 To ka ne gichung’, tielogo bende ne chung’. Kendo ka ne giidho malo, tielogo bende ne idho malo, nimar roho ma ne nie gik mangimago e roho ma ne nie tielogo.

18 Eka duong’ mar Jehova+ noa e wi dhoot, modhi ochung’ e wi jokerubi.+ 19 Kendo ne aneno ka jokerubigo yaro buombegi mi gifuyo ka gia e piny. Tielogo bende ne odhi kodgi. Ne gidhi mi gichung’ e dho ranga od Jehova mochomo yo wuok chieng’, kendo duong’ mar Nyasach Israel ne ni e wigi.+

20 Mago e gik mangima ma ne aneno e bwo Nyasach Israel ka ne an e bath aora Kebar.+ Ne aduogo afwenyo bang’e ni ne gin jokerubi. 21 Moro ka moro kuomgi ne nigi lela wenge ang’wen, buombe ang’wen, kod gima chalo lwet dhano e bwo buombegi.+ 22 Lela wengegi ne chalo gi lela wenge ma ne aneno ka ne an e bath aora Kebar.+ Giduto ne gidhi nyime tir.+

11 Kendo roho ne oting’a motera e dho rangach man yo wuok chieng’ mar od Jehova.+ Ne aneno chwo 25 e dho rangano. Jaazania wuod Azur, kod Pelatia wuod Benaya ma ne gin jotelo mag oganda, ne nie kind chwogo.+ 2 Eka ne owachona niya: “Wuod dhano, magi e chwo ma chano gik maricho, kendo ma ng’ado riekni maricho ne jo dalani. 3 Giwacho ni, ‘Donge magi e kinde mag gero udi?+ Dalani en agulu,+ to wan e ring’o.’

4 “Kuom mano, wuod dhano kor wach ma biro timorenegi. Kornegi wach.”+

5 Eka roho mar Jehova nobirona,+ mi owachona niya: “Wach kama, ‘Ma e gima Jehova owacho: “Yaye Jo-Israel, gima uwacho ni kare, kendo ang’eyo gima uparo e chunyu. 6 Usemiyo ji mang’eny otho e dalani, kendo usepong’o nderni gi ringre jo motho.”’”+ 7 “Omiyo, ma e gima Jehova Wuon Loch Duto owacho: ‘Ringre jo motho mokere e dalani e ring’o, to dalani e agulu.+ To un ibiro golu oko.’”

8 “‘Uluoro ligangla,+ to ligangla ma uluorono e ma abiro kelo kuomu,’ Jehova Wuon Loch Duto owacho. 9 ‘Abiro golou oko e dalano, kendo anaketu e lwet ogendni mamoko kendo gin e ma gibiro kumou.+ 10 Ubiro tho gi ligangla.+ Abiro ng’adonu bura e tong’ piny Israel,+ mi unung’e ni an e Jehova.+ 11 Dalano ok nobednu agulu, kendo ok unubed ring’o e iye. Abiro ng’adonu bura e tong’ piny Israel, 12 mi unung’e ni an e Jehova. Nimar, ne ok uwuotho e chikena kendo rito buchena,+ to useluwo chike mag ogendni molworou.’”+

13 Ka ne pod akoro wach, ne apo ka Pelatia wuod Benaya opodho piny motho. Eka ne apodho auma mi aywak gi dwol maduong’ niya: “Yaye, Jehova Wuon Loch Duto! Ibiro tieko Jo-Israel duto modong’?”+

14 Wach Jehova nobirona kendo niya: 15 “Wuod dhano, jo ma odak Jerusalem osenyiso Jo-Israel duto, kaachiel gi oweteni, mana oweteni ma nigi ratiro mar waro piny kama, ‘Beduru mabor gi Jehova. Pinyni en marwa, osemiwago mondo obed mwanduwa.’ 16 Omiyo, wach kama, ‘Ma e gima Jehova Wuon Loch Duto owacho: “Kata obedo ni asekeyogi e pinje mamoko mondo gidag e kind ogendni man mabor,+ to pod kuom kinde matin, anabednegi kaka ka maler e pinje ma gidakiego.”’+

17 “Kuom mano, wach kama, ‘Ma e gima Jehova Wuon Loch Duto owacho: “Abiro chokou ka agolou e pinje ma okeue, kendo anamiu piny Israel.+ 18 Ginidog e pinyno mi ginigol gik moko duto mochido kaachiel gi timbe duto modwanyore.+ 19 Anamigi chuny achiel,+ kendo abiro miyogi chuny manyien.+ Abiro golo kuomgi chuny matek ka kidi,+ kendo anamigi chuny mayom,*+ 20 mondo giwuoth e chikena, gimak buchena, kendo giluwgi. Eka ginibed joga, kendo anabed Nyasachgi.”’

21 “‘“To abiro miyo richo mag jo ma oketo chunygi kuom gik mochido kod timbe modwanyore odong’ e wigi,” Jehova Wuon Loch Duto owacho.’”

22 Jokerubi ne oyaro buombegi, kendo tieloka ne ni butgi.+ To duong’ mar Nyasach Israel ne nie wigi.+ 23 Eka duong’ mar Jehova+ noa e dalano mi odhi mochung’ e wi got ma ne ni yo wuok chieng’ mar dalano.+ 24 Eka roho ne oting’a malo motera nyaka ir jo ma ne nie tuech e piny Kaldea. Notera kuno e yor fweny mar Nyasaye. Eka ne aweyo neno fwenyno. 25 Mi ne achako nyiso jo ma ne nie tuech gik moko duto ma Jehova ne osenyisa.

12 Wach Jehova nobirona kendo niya: 2 “Wuod dhano, idak gi jo ma wigi tek. Gin gi wengegi to ok ginen, gin gi itgi to ok giwinji,+ nimar gin oganda mong’anyo.+ 3 To in wuod dhano, ik osikeni mibiro dhigo e tuech. Kae to iwuog e odi idhi ka ma machielo mana ka ng’at mitero e tuech. Initim kamano godiechieng’ ka gineni. Samoro gibiro fwenyo tiend wachno, kata obedo ni gin oganda mong’anyo. 4 Kaw osigo miseiko igol oko, kendo itim kamano godiechieng’ ka gineni. Kae to godhiambo we gine kiwuok ka ng’at ma itero e tuech.+

5 “Tuch kor ot ka gineni, kae to iting’ giki iwuog gi burno.+ 6 We mondo gineni ka iketo osikeni e goki, kae to ichak wuoth ka piny olil, kendo ium wang’i mondo kik ine piny gi wang’i, nimar anami ibed ranyisi ne Jo-Israel.”+

7 Ne atimo mana kaka ne ochika. Godiechieng’, ne agolo osikena ka ng’at ma dhi e tuech, to godhiambo ne atucho kor ot gi lweta awuon. To ka ne piny olil, ne ating’o gigena e goka mi awuok ka ginena.

8 Ka nochopo gokinyi, wach Jehova ne obirona kendo niya: 9 “Wuod dhano, donge Jo-Israel ma wigi tekgi nopenji ni, ‘Itimo ang’o?’ 10 Nyisgi ni, ‘Ma e gima Jehova Wuon Loch Duto owacho: “Wechegi omako jaduong’+ man Jerusalem kod Jo-Israel duto manie dalani.”’

11 “Wach ni, ‘Asebedonu ranyisi.+ Gima asetimoni, e ma ibiro timnegi. Ibiro makgi mi tergi e tuech.+ 12 Jaduong’ motelonegi biro wuok ka piny olil koting’o gigene e goke. Obiro tucho kor ot mi okal e burno gi gike.+ Obiro umo wang’e mondo kik one piny gi wang’e.’ 13 Abiro chikone obadho, mi anamake.+ Eka abiro tere Babulon, e piny Jo-Kaldea, kata kamano, ok obi nene. Kuno e ma obiro thoe.+ 14 Abiro keyo jokonyne, jolwenje, kod jo ma olwore duto,+ kendo anawuodh ligangla mi alawgigo.+ 15 Ka asekeyogi e kind ogendni kendo e pinje mamoko, eka gining’e ni an e Jehova. 16 To anawe moko kuomgi otony e dho ligangla, kech, kod tuoche, mondo ginyis jo ma gibiro dak e kindgi gik modwanyore duto ma ne gitimo, mi gining’e ni an Jehova.”

17 Wach Jehova ne obirona kendo niya: 18 “Wuod dhano, onego ichiem kitetni, kendo imodh pi ka in gi parruok kod luoro.+ 19 Nyis jo ma odak e pinyno ni, ‘Ma e gima Jehova Wuon Loch Duto owacho ne ji duto modak Jerusalem e piny Israel: “Gibiro chiemo ka gin gi parruok kendo modho pi ka gin gi luoro, nimar pinygi biro dong’ gunda+ nikech timbe gero mag jo ma odak e iye.+ 20 Ibiro keth mier ma ji odakie, kendo pinyno biro dong’ gunda,+ mi unung’e ni an e Jehova.”’”+

21 Wach Jehova nobirona kendo niya: 22 “Wuod dhano, ang’o momiyo Jo-Israel goyoga ngero ni, ‘Ndalo kadho akadha to fweny ok chopi’?+ 23 Omiyo, wachnegi ni, ‘Ma e gima Jehova Wuon Loch Duto owacho: “Abiro tieko ngerono chuth, kendo ok bi goye kendo e Israel.”’ Kata kamano, nyisgi ni, ‘Ndalo chiegni,+ kendo fweny duto biro chopo.’ 24 Nimar fweny mag miriambo ok nochak obedie kendo e piny Israel, kendo onge ng’at ma biro koro wach ma lalo ji.+ 25 ‘“Nimar an Jehova, abiro wuoyo. Gimoro amora ma awacho biro timore ma ok odeko.+ Yaye un oganda mong’anyo, e ndalou,+ abiro koro wach mi achope,” Jehova Wuon Loch Duto owacho mano.’”

26 Wach Jehova nobirona kendo niya: 27 “Wuod dhano, ma e gima Jo-Israel wacho, ‘Fweny mineno kod weche mikoro ok bi chopo sani, to gibiro chopo bang’e ka ndalo mang’eny osekadho.’+ 28 E momiyo wachnegi kama, ‘Ma e gima Jehova Wuon Loch Duto owacho: “Onge wach moa e dhoga ma biro deko; gimoro amora ma awacho biro timore,’ Jehova Wuon Loch Duto owacho.”’”

13 Wach Jehova nobirona kendo niya: 2 “Wuod dhano, kor gima biro timore ne jonabi mag Israel,+ kendo inyis jo ma koro wechegi giwegi+ ni, ‘Winjuru wach Jehova. 3 Ma e gima Jehova Wuon Loch Duto owacho: “Nobed malit ne jonabi mofuwo ma luwo gima chunygi onyisogi, to onge fweny ma giseneno!+ 4 Yaye Israel, jonabiu chalo mana gi bwe modak e gunda. 5 Ok ubi dhi loso kuonde ma omukore e ohinga mag piny Israel,+ mondo Jo-Israel odhi nyime chung’ e lweny e odiechieng Jehova.”+ 6 “Giseneno fweny mag miriambo kendo gikoro miriambo. Giwacho ni, ‘Jehova owacho,’ to Jehova owuon pok oorogi, kendo girito mondo wechegi ochopi.+ 7 Donge useneno fweny mag miriambo kendo usekoro weche ma miriambo sa ma uwacho ni, ‘Jehova owacho,’ to an pok awacho gimoro amora?”’

8 “‘Kuom mano, Jehova Wuon Loch Duto owacho niya: “‘Amon kodu, nikech usewacho miriambo kendo fweny muneno ok gin adier,’ Jehova Wuon Loch Duto owacho.”+ 9 Lweta osin gi jonabi ma neno fweny mag miriambo, kendo ma koro weche ma ok adier.+ Ok ginibed e kind joga ma achiegnigo, kendo ok nondik nyinggi e bug Jo-Israel. Bende, ok ginichak gidog e piny Israel, mi unung’e ni an e Jehova Wuon Loch Duto.+ 10 Magi duto biro timore nikech gisemiyo joga orwenyo ka giwachonegi ni, “Kuwe nitie!” to kuwe onge.+ Gigero ohinga ma yom yom kae to gimwone gi choka.’*+

11 “Nyis jo ma mwonogo ni ohingano biro lwar. Koth maduong’ biro chue, kendo pe biro goye, mi yamo mager nogoye piny.+ 12 Ka ohingano opodho, ibiro penju ni, ‘Ere choka ma ne umwonogo?’+

13 “Omiyo, ma e gima Jehova Wuon Loch Duto owacho: ‘Mirima biro maka mi anakel yamo mager, koth maduong’ nochue nikech iya owang’, kendo pe nobi gi mirima mager. 14 Abiro muko ohinga ma ne umwono gi chokano, kendo anael misene. Chieng’ ma dalano nopodhi, ubiro tho e iye, mi unung’e ni an e Jehova.’

15 “‘Ka aseolo mirimba duto kuom ohingano kaachiel gi ji duto ma ne omwone gi choka, anawachnu niya: “Ohingacha onge, kendo jo ma ne omwone bende oselal nono.+ 16 Jonabi mag Israel ma ne koro e Jerusalem, kendo ma ne neno fweny ka nyise ni nitie kuwe to kuwe onge, koro oselal nono,”’+ Jehova Wuon Loch Duto owacho.

17 “To in wuod dhano, kwer matek nyi jou ma koro wechegi giwegi, kendo inyisgi gima biro timorenegi. 18 Nyisgi ni, ‘Ma e gima Jehova Wuon Loch Duto owacho: “Unune malit un mon ma twang’o ris mag lwedo, kendo loso kitembni mopogore opogore miumogo wich, mondo uhimgo ji! Utemo himo joga mondo ures ngimau, koso? 19 Ang’o momiyo uketho nyinga e kind joga mondo uyud mana sanja achiel mar shairi kod ng’injo mag makate,+ kunego jo ma ok onego otho kendo reso jo ma onego otho? Kamano e kaka uwuondo joga moyie gi wecheu mag miriambogo.”’+

20 “Kuom mano, ma e gima Jehova Wuon Loch Duto owacho: ‘Winjuru un mon, asin gi ris magu mutiyogo e himo ji mana kaka jadwar ma chiko winyo. Abiro chodogi oko e lweteu mondo agony jo ma utemo mako ka winy. 21 Abiro yiecho kitembni magu kendo reso joga e lwetu, mi ok unumakgi. Eka unung’e ni an e Jehova.+ 22 Nimar usenyoso chuny ng’at makare gi miriambou+ mi umiyo obedo gi chuny malit, gima an awuon ne ok atimo, kendo usetego lwet ng’at marach+ mondo kik owe yorene maricho mi obed mangima.+ 23 Omiyo, un mon, ok unuchak une fweny mag miriambo kendo koro weche.+ Abiro reso joga e lwetu mi unung’e ni an e Jehova.’”

14 Eka jodongo moko mag Israel nobiro mobet e nyima.+ 2 Kendo wach Jehova nobirona niya: 3 “Wuod dhano, jogi oseramo ni gibiro luwo sanambegi makwero,* kendo giseketo ne ji gik ma miyo gichwanyore kendo gipodho e richo. Koro ere kaka dayie ni gipenja wach?+ 4 E momiyo koro wachnegi niya, ‘Ma e gima Jehova Wuon Loch Duto owacho: “Ka po ni Ja-Israel moro amora oramo ni obiro luwo sanambe makwero, kendo oketo ne ji gik ma miyo gichwanyore mi gipodho e richo, kae to odhi ir janabi mondo openje wach, an Jehova abiro miye dwoko ma romre gi sanambenego. 5 Anami chuny Jo-Israel obed maluor nikech giseweya mi giluwo sanambegi makwero.”’+

6 “Kuom mano, nyis Jo-Israel ni, ‘Ma e gima Jehova Wuon Loch Duto owacho: “Duoguru ira. Wereuru gi sanambeu makwero, kendo ulok ng’eu ne timbeu duto mochido.+ 7 Nimar ka Ja-Israel moro kata jadak oweya, mi oramo ni obiro luwo sanambene makwero, kendo keto ne ji gik ma miyo gichwanyore mi gipodh e richo, kae to odhi ir janabina mondo openj wach,+ an Jehova, abiro miye dwoko. 8 Abiro loko ne ng’atno wang’a, kendo anami obed siem ne jomoko, kendo ngero ma ji goyo. Abiro gole e kind joga,+ mi unung’e ni an Jehova.”’

9 “‘Ka po ni owuond janabino mi ochiwo dwoko, ng’euru ni an Jehova, an e ma awuondo janabino.+ Abiro rieyo bada mi atieke oa kuom Jo-Israel joga. 10 Ng’ato ka ng’ato noting’ kethone owuon. Ketho mar ng’at mopenjo wach nochal gi ketho mar janabino, 11 mondo Jo-Israel owe bayo abaya kendo giwe chidore gi richogi. Eka ginibed joga, to anabed Nyasachgi,’+ Jehova Wuon Loch Duto owacho.”

12 Wach Jehova nobirona kendo niya: 13 “Wuod dhano, ka piny moro otimo richo moweya, abiro rieyo bada kuomgi mondo atiek chiembgi,+ kendo anaornegi kech+ mondo otiek dhano kod le.”+ 14 “‘Kata dabed ni ji adekgi, tiende ni Noa,+ Daniel,+ kod Ayub+ ne ni e pinyno, dine giresore nikech timbegi makare,’+ Jehova Wuon Loch Duto owacho.”

15 “‘Ka po ni akelo ondiegi e piny, ondiegigo nyalo nego ji* mi giketh pinyno, modong’ gunda, kendo onge ng’ato ang’ata ma dikal kanyo.+ 16 Mana kaka angima,’ Jehova Wuon Loch Duto owacho, ‘kata dabed ni ji adekgo ni e pinyno, dine ok gireso yawuotgi kata nyigi, to dine gireso ngimagi giwegi, kendo pinyno dine odong’ mana gunda.’”

17 “‘Kata ka po ni akelo ligangla e piny+ kendo wacho niya: “We mondo ligangla okadh e piny,” mi liganglano otieko dhano kod le,+ 18 ka datim kamano ka ji adekgo nie pinyno, mana kaka angima,’ Jehova Wuon Loch Duto owacho, ‘dine ok gireso yawuotgi kata nyigi, to dine gireso ngimagi giwegi.’”

19 “‘Kata ka po ni aoro tuoche e piny+ kendo olo mirimba mager mondo achuer remb dhano kod le, 20 to Noa,+ Daniel,+ kod Ayub+ nie pinyno, mana kaka angima,’ Jehova Wuon Loch Duto owacho, ‘dine ok gireso yawuotgi kata nyigi, to dine giresore giwegi nikech timbegi makare.’”+

21 “Ma e gima Jehova Wuon Loch Duto owacho: ‘Mano e gima biro timore chieng’ ma abiro oro masiche ang’wen-gi+ kuom Jerusalem, ma gin ligangla, kech, ondiegi, kod tuoche,+ mondo otiek dhano kod le.+ 22 Kata kamano, nitie yawuotu gi nyiu ma biro tony, mi noresgi.+ Ginibi iru, kendo ubiro neno yoregi kod timbegi. Eka unuyud hoch kuom masira ma ne akelo ne Jerusalem, kod gik moko duto ma ne atimone.’”

23 “‘Gibiro hoyo chunyu kuneno yoregi gi timbegi, mi unung’e ni nitie gimomiyo ne atimonegi kamano,’+ Jehova Wuon Loch Duto owacho.”

15 Wach Jehova nobirona kendo niya: 2 “Wuod dhano, yadh mzabibu opogore nade gi yiende mamoko, kata gi bede yiende mamoko mag bungu? 3 Be inyalo ti gi yadhe e loso gimoro? Be ji nyalo guro yadhe e kor ot mondo ging’awie gik moko? 4 Ne! Ibole e mach mondo ochwek kode, kendo mach wang’o bathe koni gi koni, kendo kore dong’ korewore. Be dilos kode gimoro malong’o? 5 Ka pok owang’e, onge gima ditim kode. Koro ka mach osewang’e mi kore odong’ korewore kamano, be ditim kode gimoro amora?”

6 “Omiyo, ma e gima Jehova Wuon Loch Duto owacho: ‘Abiro timo ne jo ma odak Jerusalem mana kaka itimo ne yadh mzabibu man e dier yiende mamoko ma asechiwo mondo ochwekgo.+ 7 Aselokonegi wang’a. Gisetony e mach, to mach pod biro wang’ogi, mi unung’e ni an Jehova sa ma alokonegi wang’a.’”+

8 “‘Anami pinygi odong’ gunda+ nikech giseweya,’+ Jehova Wuon Loch Duto owacho.”

16 Wach Jehova nobirona kendo niya: 2 Wuod dhano, nyis Jerusalem timbene modwanyore ma osetimo.+ 3 Ininyise kama, ‘Ma e gima Jehova Wuon Loch Duto owacho ne Jerusalem: “In ja piny Kanaan kendo kuno e ma ne onyuolie. Wuonu ne en Ja-Amor,+ to minu ne en Nya-Hiti.+ 4 Ka ne onyuoli, ne ok ong’ad pendi, ne ok olwoki gi pi mondo ibed maler, ne ok orudhi gi chumbi, kendo ne ok oboyi gi lewni. 5 Onge ng’at ma ne okechi motimoni kata achiel kuom gigo. Onge ng’at ma ne onenoni lit. Kar mano, ne owiti oko e pap nikech ka ne onyuoli, onge ng’at ma ne dwari.

6 “‘“Ka ne akadho kanyo, ne aneni ka iguecho e rembi iwuon, mi ne anyisi niya: ‘Imed bedo mangima!’ Ee, ne anyisi ka ma ne inindoeno niya: ‘Imed bedo mangima!’ 7 Ne amiyo inyuolori mibedo oganda maduong’, ne ilandori mana ka yien man e pap. Ne idongo maber mi ichako rwako gige dusruok mabeyo. Thundi ne ochikore, kendo yie wiyi nodongo. To ne pod in duk.”’

8 “‘Ka ne akadho mi aneni, ne afwenyo ni isedongo mi iromo mako godo osiep. Omiyo, ne ayaro lawa mi aumo dugi,+ kendo ne akuong’ora mi atimo kodi singruok,’ Jehova Wuon Loch Duto owacho, ‘kendo ne ibedo mara. 9 Bende, ne alwoki gi pi kendo ne alwoko rembi mi awiri gi mo.+ 10 Kae to ne arwakoni law ma nigi maridadi, ne amiyi wuoche molos gi pien mayom, kendo ne aboyi gi law kitani maber. Ne arwakoni lewni ma nengogi tek. 11 Ne arwakoni gik dusruok, mi aketo bangli e lweti kod tigo e ng’uti. 12 Ne aketoni tere e umi kod stadi e iti, mi arwakoni osimbo ma jaber e wiyi. 13 Ne ihero bidhori mana gi dhahabu kod fedha, kendo nirwakoga mana lep kitani, lewni ma nengogi tek, kendo ma nigi maridadi. Ne ichamo chiemo molos gi mogo mayom, mor kich, kod mo. Ne idongo mibedo nyako ma jaber,+ mi ne iwinjori bedo ruoth ma dhako.’”

14 “‘Humbi* nochako landore e kind ogendni+ nikech berni miwuoro, an e ma namiyo ibedo gi duong’ ma jaber kamano,’+ Jehova Wuon Loch Duto owacho.”

15 “‘Kata kamano, ne ichako geno ber ma ne in-go,+ michako chodo nikech humbi.+ Ne iterori gi ng’ato ang’ata ma ne kadho buti,+ kendo ne imiyogi berni. 16 Ne ilicho kuonde moting’ore malo ma ne iterorie gi lepi moko mabeyo.+ Gik ma kamago ok onego otimre ngang’. 17 Bende, ne ikawo gik dusruok mabeyo molos gi fedha kod dhahabu ma ne amiyi, milosogo sanambe ma chwo, mi iterorigo.+ 18 Ne ikawo lepi ma ne nigi maridadi miumogigo.* Ne iwang’onegi ubanina kendo chiwonegi mo ma ne amiyi.+ 19 Ne ikawo makate ma ne amiyi ma ne olos gi mogo mayom, mo, kod mor kich, migolonegi kaka chiwo ma nigi suya mamit.+ Mano e gima ne itimo,’ Jehova Wuon Loch Duto owacho.”

20 “‘Ne ikawo yawuoti gi nyigi ma ne inyuolona+ michiwogi kaka misengni ne nyiseche manono mondo otiekgi.+ Donge timbeni mag terruok okalo tong’? 21 Ne inego yawuota, miwang’ogi e mach kaka misango.+ 22 E kinde duto ma ne idwanyori kendo iterori kamano, ne ok iparo ndalo ma ne in nyathi ka ne in duk, kendo ka ne iguecho e rembi iwuon. 23 Yaye, nobedni malit nikech timbeni marichogo duto,’+ Jehova Wuon Loch Duto owacho. 24 Ne igero pidhe milamoe nyiseche manono kod kuonde moting’ore malo e laru magi duto. 25 Ne igero kuonde moting’ore malo e nderni duto madongo, kendo ne imiyo ji ochayo berni ka ne iterori gi ng’ato ang’ata ma ne kadho buti,+ kendo timbeni mag terruok ne medore ameda.+ 26 Ne iterori gi yawuot Misri+ ma nokiewo kodi kendo ma ne nigi gombo mang’eny. Ne iwang’o iya gi timbeni modhuro mag terruok. 27 Omiyo, anarie bada mondo ang’ad chiemo miyudoga pile.+ Abiro keti e lwet mine mosin kodi,+ tiende ni nyi Jo-Filistia ma isejogo gi timbeni modwanyore.+

28 “‘Ne iterori bende gi yawuot Asuria nikech ne iowori gi gombo mang’eny,+ to e ma pod ne ok gitiekoni gombo ma ne in-go. 29 Omiyo, ne iterori nyaka e piny jolok ohala* kendo nyaka Kaldea,+ to pod ne ok itieko gombo ma ne in-go. 30 To mano kaka chunyi ne tuo,’* Jehova Wuon Loch Duto owacho, ‘ka ne itimo gigo duto mana ka jachode ma wang’e tek!+ 31 To ka ne igero pidhe milamoe nyiseche manono e nderni duto madongo kod kuonde moting’ore malo e laru magi duto, ne ipogori gi mon mamoko ma jochode nikech ne itamori ni kik chuli. 32 In dhako ma jachode ma weyo chwore to terore gi chwo mamoko nono.+ 33 Mon ma chodo imiyoga mich,+ kata kamano, in to imiyo jo ma gombi mich,+ kendo imiyo ji moa kuonde duto asoya mondo giterre kodi.+ 34 Ipogori gi mon mamoko ma chodo. Onge ng’at ma chodo kaka ichodoga! Kar mondo gichuli, in e ma ichulogi. Ipogori ahinya gi jochode mamoko.’

35 “Kuom mano, in dhako ma jaterruok,+ winj wach Jehova. 36 Ma e gima Jehova Wuon Loch Duto owacho: ‘Nikech gombo mari osekalo tong’ kendo iseelo dugi sa ma ne iterori gi osiepeni kaachiel gi sanambeni makwero*+ ma ne ichiwonegi remb yawuoti,+ 37 abiro choko osiepeni duto ma ne iterorigo, ji duto ma ne ihero kod ma ne isin-go. Abiro chokogi duto mondo gibi giked kodi, kendo abiro lonyi, mi ginine dugi.+

38 “‘Anakumi gi kum mikumogo mon ma jochode+ kendo ma chuero remo.+ Anachuer rembi ka an gi mirima kod nyiego.+ 39 Abiro keti e lwetgi, kendo gibiro muko pidhe ma ne ilamoe nyiseche manono kod kuonde moting’ore malo ma ne igero.+ Gibiro lonyo lepi,+ kendo ginikaw gigeni mag dusruok,+ mi giniweyi duk. 40 Ginikelni oganda maduong’+ mondo gichieli gi kite+ kendo negi gi ligangla.+ 41 Gibiro wang’o uteni gi mach+ kendo gibiro kumi e nyim mon mang’eny. Anatiek timbeni mag terruok,+ mi iniwe chulo jo ma iterorigo. 42 Abiro tieko mirimba kuomi,+ kendo anawe bedo gi ich-wang’ kodi.+ Chunya nokuwe, mi iya ok nowang’ kodi kendo.’

43 “‘Nikech ne ok iparo ndalo ma ne pod in nyathi+ kendo isewang’o iya kuom timo gigo duto, abiro miyo ine masira nikech timbeni maricho,’ Jehova Wuon Loch Duto owacho, ‘ok inichak itim timbeni modwanyore kendo mochido ngang’.

44 “‘Ne! Ng’ato ang’ata ma goyo ngero biro goyo ngeroni kuomi: “Kaka min obet, e kaka nyare bende chalo!”*+ 45 Ichal gi minu ma ne osin gi chwore kod nyithinde. Kendo ichalo gi nyimineni ma ne osin gi chwogi kod nyithindgi. Minu ne Nya-Hiti, to wuonu ne en Ja-Amor.’”+

46 “‘Nyaminu maduong’ en Samaria+ modak yo nyandwat kaachiel gi nyige,*+ to nyaminu matin en Sodom+ modak yo milambo kaachiel gi nyige.+ 47 Ne iluwo yoregi kendo timo timbe modwanyore ma ne gitimo, to mano ne ok oromi. Bang’ kinde matin, koro timbeni ne richo moloyogi.+ 48 Mana kaka angima,’ Jehova Wuon Loch Duto owacho, ‘Sodom nyaminu kaachiel gi nyige pok otimo gik ma in kod nyigi usetimo. 49 Ne! Ma e ketho mar Sodom nyaminu: En kaachiel gi nyige+ ne gisungore,+ ne gin gi chiemo mang’eny,+ kendo ne gidak gi kuwe.+ To ne ok gikony jo ma odhier kod jo ma sandore.+ 50 Ne gisiko ka gisungore+ kendo ne gitimo timbe modwanyore e nyima,+ omiyo ne aneno ni owinjore agolgi oko.+

51 “‘Richo mar Samaria+ ok rom kata nus mar richoni. Ne isiko kitimo timbe modwanyore moloyo maggi, mochopo ka ma koro nyimineni ne nenore jo makare.+ 52 Koro nyaka iting’ wich-kuotni nimar isemiyo nyimineni onenore ka jo mabeyo. Nikech isetimo timbe modwanyore moloyogi, isemiyo ginenore ka jo makare moloyi. Kuom mano, ting’ ating’a wich-kuotni kod achaye nikech isemiyo nyimineni onenore ka jo makare.’

53 “‘Abiro choko Sodom kod nyige moter e tuech, kaachiel gi Samaria kod nyige moter e tuech. Abiro choko jou moter e tuech kanyachiel kodgi,+ 54 mondo iting’ wich-kuotni, mi iniyud wich-kuot nikech gima otimoreni biro hoyogi. 55 Nyimineni, tiende ni Sodom kod nyige, biro dok kaka ne gin chon. Samaria kod nyige biro dok kaka ne gin chon, kendo in bende kaachiel gi nyigi ubiro dok kaka ne un chon.+ 56 Nyaminu ma Sodom ne ok chalni ka gimoro ndalo ma ne isungori, 57 ka ne pok oel richoni e lela.+ Sani koro nyi Siria kod jo ma okiewo kode jari, kendo nyi Filistia+ kod jogo duto molwori nyieri. 58 Ibiro kumi nikech timbeni mochido kendo modwanyore,’ Jehova owacho.”

59 “Nimar ma e gima Jehova Wuon Loch Duto owacho: ‘Abiro timoni mana kaka timbeni obet,+ nikech ne ichayo kuong’ruokni kendo ne ok irito singruokna.+ 60 To an awuon abiro paro singruok ma ne atimo kodi ka ne pod in nyathi, kendo anatim kodi singruok mosiko nyaka chieng’.+ 61 Inipar timbeni kendo wiyi nokuodi+ sa ma ibiro rwako nyimineni madongoni kod matindoni, mi anamiyigi mondo gibed nyigi, to ok abi timo kamano nikech singruok ma ne atimo kodi.’

62 “‘Kendo an awuon abiro timo singruok kodi, mi ining’e ni an e Jehova. 63 Eka inipar mi wiyi nokuodi ma ok inyal kata yawo dhogi,+ chieng’ ma abiro pwodhi kata obedo ni isetimo gik maricho kamano,’+ Jehova Wuon Loch Duto owacho.”

17 Wach Jehova nobirona kendo niya: 2 “Wuod dhano, go ngero moro e wi Jo-Israel.+ 3 Iniwach ni, ‘Ma e gima Jehova Wuon Loch Duto owacho: “Ne nitie otenga moro maduong’+ ma ne nigi buombe madongo kendo yier ma ne nie buombene ne dongo. Dende duto ne opong’ gi yier maboyo ma nigi rangi mabeyo. Otengano nodhi nyaka Lebanon+ mojako wi yadh sida.+ 4 Ne ojako chuny yath ma malo mogik motere nyaka e piny jolok ohala,* eka ne okete e dala mar jolok ohala.+ 5 Bang’e, ne okawo moko kuom kodhi mag pinyno+ mi opidhogi e lowo momewo. Ne opidhe kaka yath* ma ipidho ka ma pi ng’enyie. 6 Omiyo, yadhno ne odongo mi obedo yadh mzabibu moyarore gi piny,+ kendo obokene gi bedene ne dongo kochomo iye, to tiendene ne dongo e bwoye. Yadh mzabibuno ne oloth maber mochako golo bedene.+

7 “‘“Eka otenga machielo maduong’+ ma ne nigi buombe madongo kendo ma yier opong’o buombene nobiro.+ Yadh mzabibuno ne otero tiendene kod bedene kochomo ire, mabor gi puodho ma ne opidhee, mondo oyud pi.+ 8 Ne oyudo osepidhe e lowo maber man but pi mang’eny, mondo ogol bedene, onyag olemo, kendo obed yadh mzabibu maduong’.”’+

9 “Wach niya, ‘Ma e gima Jehova Wuon Loch Duto owacho: “Be yadh mzabibuno biro dongo maber? Donge ng’ato biro pudho tiende+ mi olembene tow kendo obokene oner?+ Obiro two ma ok bi dwarore ni ng’at ma nigi teko mang’eny kata ji mathoth opudhe. 10 Kata obedo ni ne opidhe, be obiro dongo maber? Donge obiro two chuth ka yamb ugwe ogoye? Obiro two e puodho ka ma ne opidhee.”’”

11 Wach Jehova nobirona kendo niya: 12 “Nyis oganda ma ong’anyoni ni, ‘Be ung’eyo tiend wechego?’ Wach kama, ‘Neuru! Ruodh Babulon nobiro Jerusalem mokawo ruodhe kod jotende modhi kodgi Babulon.+ 13 Bende, ne okawo achiel kuom joka ruoth+ motimogo singruok mi jalo okuong’ore.+ Eka ne okawo jo ma ne nigi huma e pinyno mi odhigo.+ 14 Notimo kamano mondo ogo pinyruodhno piny chuth, mondo obed gadier ni singruok ma ne otimono ok bi kethore.+ 15 To ruoth ne ong’anyone+ ka ne ooro joote e piny Misri mondo okelne farese+ kod oganda lweny maduong’.+ Be weche didhine maber? Be ng’at ma timo kamano ditony? Be doketh singruok ma kamano mi otony?’+

16 “‘“Mana kaka angima,” Jehova Wuon Loch Duto owacho, “obiro* tho e piny Babulon. Obiro tho e piny ma ruoth* ma nokete e kom-loch odakie. Mano e ng’at ma notimo kode singruok, mi ochayo singruogno.+ 17 Farao kod oganda lwenyne maduong’ ok bi konye+ kinde ma Jo-Babulon biro loso pidhe, kendo gero ohinga molworo dalano mondo gitiek ngima ji mang’eny. 18 Osechayo singruok ma ne otimo ka ne okuong’orene. Kata obedo ni ne okuong’ore kamano, ne otimo gigo duto, omiyo, ok obi tony.”’

19 “‘Kuom mano, ma e gima Jehova Wuon Loch Duto wacho: “Mana kaka angima, abiro miyo gika gima ne gichuoyo, nikech ne ochayo kuong’ruokna+ kod singruokna. 20 Abiro chikone obadho,* mi anamake.+ Anatere Babulon mi anayale kuno nikech richo ma ne otimona.+ 21 Jolwenyge moringo biro tho gi ligangla, to modong’ biro kere kuonde duto.+ Eka unung’e ni an Jehova, an e ma asewacho kamano.”’+

22 “‘Ma e gima Jehova Wuon Loch Duto owacho: “Abiro kawo chuny yath moro man e wi sida mabor,+ mi anapidhe. Abiro jako chuny yadhno e bedene man malo,+ mi anapidhe e got moro maduong’ kendo mabor.+ 23 Abiro pidhe e got maduong’ mar Israel, kendo bedene biro dongo, mi enonyag olemo, mobed yadh sida maduong’. Kendo kit winy duto biro gedo kuome, mi ginidag e tipone. 24 Eka yiende duto manie pap biro ng’eyo ni an Jehova. An e ma asetong’o yath maduong’ kendo asemiyo yath matin duong’.+ Asetwoyo yath mang’ich, kendo asemiyo yath motwo oloth.+ An Jehova, asewacho mano kendo asetime.”’”

18 Wach Jehova nobirona kendo niya: 2 “Ngero ma ji goyo e piny Israel ni, ‘Wuone ochamo mzabibu ma numu, to leke nyithindgi e ma odikore,’ tiende en ang’o?+

3 “‘Mana kaka angima,’ Jehova Wuon Loch Duto owacho, ‘ok ubi goyo ngeroni kendo e Israel. 4 Neuru! Ngima duto gin maga. Ngima wuoro kod ngima wuode, duto gin maga. Ng’at ma timo richo e ma biro tho.

5 “‘Wawach ni ng’ato en ng’at makare, kendo otimo gik makare kendo malong’o. 6 Ok ocham misengni mochiw ne nyiseche manono e gode;+ ok ogeno kuom sanambe makwero* mag Jo-Israel; ok oterre gi chi ng’ato,+ kata nindo gi dhako ma dhi e dwe;+ 7 ok otim gik maricho ne ng’ato ang’ata,+ to oduoko ne jagope gima ne osingne;+ ok oma ng’ato ang’ata gire,+ to omiyo ng’at ma nigi kech chiembe+ kendo omiyo ng’at ma wuotho duk law;+ 8 ok ohol ji pesa mondo oyudie ohala,+ kendo ok otim ne jomoko gik ma ok kare;+ oyalo ji e yo makare;+ 9 owuotho e yorena kendo orito buchena gadiera. Ng’at ma kamano en ng’at makare, kendo obiro bedo mangima,’+ Jehova Wuon Loch Duto owacho.

10 “‘To wawach ni wuode obedo jakuo+ kata janek,+ kata ng’at ma timo achiel kuom gik ma luwogi 11 (kata obedo ni wuon-gi ok tim gigi)—ochamo misengni mochiw ne nyiseche manono e gode, oterore gi chi ng’ato, 12 osando jodhier gi jochan,+ ok oduok gima osingne, ogeno sanambe makwero,+ otimo timbe mochido,+ 13 oholo ji pesane mondo oyud ohala e wiye+—wuodeno ok nobed mangima. Ibiro nege nikech osetimo timbe marichogo. Kendo rembe nodong’ e wiye owuon.

14 “‘Kata, wawach ni wuoyi moro neno richo duto ma wuon-gi timo, to kata obedo ni onenogi, en ok oluw timbe wuon-gigo. 15 Ok ocham misengni mochiw ne nyiseche manono e gode; ok ogeno kuom sanambe makwero mag Jo-Israel; ok oterre gi chi ng’ato; 16 ok otim gik maricho ne ng’ato ang’ata; oduoko ne jagope gima ne osingne; ok oma ng’ato ang’ata gire; omiyo ng’at ma nigi kech chiembe, kendo omiyo ng’at ma wuotho duk law; 17 ok osand jochan; ok ohol ji pesa mondo oyudie ohala; owuotho e yorena kendo orito buchena. Ng’at ma kamano ok bi tho nikech richo wuon-gi, to enobed mangima. 18 To nikech wuon-gi ne en ja mibadhi, ne omayo owadgi gike, kendo notimo gik maricho e kind ogandane, obiro tho nikech kethone.

19 “‘To ubiro penjo niya: “Ang’o momiyo ok kum wuoyi nikech richo wuon-gi?” Nikech wuode osetimo gik makare kendo malong’o, osemako chikena duto kendo luwogi, obiro bedo mangima.+ 20 Ng’at ma timo richo e ma biro tho.+ Ok bi kum wuoyi nikech richo mar wuon-gi, kendo wuoro ok nokum nikech richo mar wuode. Ng’at makare biro yudo pokne nikech timbene makare, to ng’at marach biro yudo pokne nikech timbene maricho.+

21 “‘Ka ng’at marach olokore moweyo richone duto, mi orito chikena kendo timo gik makare kendo malong’o, enobed mangima. Ok obi tho.+ 22 Wich biro wil gi richone duto ma notimo.+ Obiro bedo mangima nikech otimo gik makare.’+

23 “‘Be uparo ni amor gi tho mar jaricho?’+ Jehova Wuon Loch Duto owacho. ‘Donge daher neno ka ng’at ma kamano loko yorene mondo obed mangima?’+

24 “‘To ka ng’at makare oweyo yorene makare mi ochako timo gik maricho, kendo modwanyore ma joricho timo, be obiro bedo mangima adier? Ooyo. Onge kata gimoro achiel makare ma notimo mibiro par.+ To obiro tho nikech noweyo chikena, mochako timo richo.+

25 “‘To ubiro wacho niya: “Yore mag Jehova ok ni kare.”+ Yaye un Jo-Israel, winjauru! Donge yorena ni kare, koso?+ Donge un e ma yoreu ok ni kare, koso?+

26 “‘Ka ng’at makare oweyo yorene makare, mochako timo gik maricho, obiro tho nikech richone owuon.

27 “‘To ka ng’at marach olokore moweyo timbene maricho, mi ochako timo gik makare kendo malong’o, obiro reso ngimane.+ 28 Ka ofwenyo ni timbene richo, mi olokore moweyo timo gik maricho, obiro bedo mangima. Ok obi tho.

29 “‘To Jo-Israel biro wacho niya: “Yore mag Jehova ok ni kare.” Yaye un Jo-Israel, donge yorena ni kare, koso?+ Donge un e ma yoreu ok ni kare, koso?’

30 “‘Kuom mano, abiro ng’ado ne ng’ato ka ng’ato bura kaluwore gi yorene,+ yaye Jo-Israel,’ Jehova Wuon Loch Duto owacho. Lokreuru, ee, lokreuru chuth kendo weuru timo gik maricho, mondo kethou kik chwanyu mi uchak timo richo. 31 Goluru richou duto ma usebedo kutimo,+ mondo ubed gi chuny manyien kod paro manyien.+ Yaye Jo-Israel, ere gimomiyo udwaro tho?’+

32 “‘Ok amor ka ng’ato otho,’+ Jehova Wuon Loch Duto owacho. ‘Omiyo, lokreuru mondo ubed mangima.’”+

Ne onindo e kind sibuoche ma roteke, kendo ne opidho nyithinde.

 3 Ne opidho nyathine moro mi obedo sibuor ma ratego.+

 5 Min-gi ne paro ni odhi duogo, to ne ok oduogo.

Omiyo, ne otiego nyathine machielo mi obedo sibuor ma ratego.

 6 Ne owuotho e kind sibuoche mamoko mi obedo sibuor ma ratego.

Ne opuonjore kidho le, kendo en bende nochamo nyaka dhano.+

 8 Ogendni manie alworano ne obiro kedo kode mi ne gichikone obadho mondo gimakego,

Kendo ne gimake e bur ma ne gikunyo.

 9 Ne gimake gi ramaki mi gitueye e od tuech kendo ne gitere ir ruodh Babulon.

Ne gitueye kuno mondo kik winj dwonde kendo e gode mag Israel.

10 Minu ne chalo ka mzabibu+ e rembi,* ee, mzabibu mopidh e bath pige.

Ne onyago olemo kendo bedene ne ng’eny nikech pi ne ng’eny.

11 Ne odongo mi obedo gi bede motegno, bede moromo loso ludh-loch.

Bedene motegno notur mi otwo,+ kendo mach ne owang’ogi.+

“‘Mano e wend ywagruok, ee, enobed wend ywagruok.’”

20 Koro e odiechieng’ mar apar dwe mar abich e higa mar abiriyo, jodongo moko mag Israel ne obiro ira mi gibet piny e nyima mondo gipenj wach Jehova. 2 Eka wach Jehova ne obirona niya: 3 “Wuod dhano, nyis jodongo mag Israelgo kama, ‘Mae e gima Jehova Wuon Loch Duto owacho: “Un gadier ni ubiro penja wach, koso? ‘Mana kaka angima, ok abi chiwo dwoko mar gima udwaro penja,’+ Jehova Wuon Loch Duto owacho.”’

4 “Wuod dhano, be iikori ng’adonegi bura? Be iikori ng’adonegi bura adier? Nyisgi gik modwanyore ma kweregi notimo.+ 5 Nyisgi kama, ‘Ma e gima Jehova Wuon Loch Duto owacho: “Chieng’ ma ne ayiero Israel,+ ne akuong’ora ne koth Jakobo kendo ne amiyo ging’eya e piny Misri.+ Adier ne akuong’ora ni, ‘An e Jehova Nyasachu.’ 6 Chieng’no, ne akuong’ora ni abiro gologi e piny Misri mi atergi e piny ma ne asemanyonegi, piny mopong’ gi chak kod mor kich.+ Ne en piny maber moloyo pinje duto. 7 Eka ne awachonegi ni, ‘Ng’ato ka ng’ato kuomu nyaka wit gik moko duto mochido ma en-go; kik uchidru gi sanambe makwero* mag Misri.+ An Jehova Nyasachu.’+

8 “‘“To ne ging’anyona kendo ne gitamore winja. Ne ok giwito gik moko duto mochido ma ne gin-go, kendo ne gitamore weyo sanambe makwero mag Misri.+ Omiyo, ne asingora ni abiro olonegi mirimba duto e piny Misri. 9 To ne ok atimo kamano mondo nyinga kik kethre e kind ogendni ma ne gidakie.+ Ne amiyo Jo-Israel ong’eya e nyim ogendnigo ka ne agologi e piny Misri.+ 10 Kuom mano, ne agologi e piny Misri mi aterogi e thim.+

11 “‘“Ne amiyogi chikena kendo nanyisogi buchena+ mondo ng’at ma omakogi obed mangima.+ 12 Bende, ne amiyogi sabato maga+ kaka ranyisi e kinda kodgi,+ mondo ging’e ni an Jehova, an e ma apwodhogi.

13 “‘“Kata kamano, Jo-Israel ne ong’anyona e thim.+ Ne ok giwuotho e chikena kendo ne gitamore luwo buchena ma ne dhi miyo gibed mangima. Ne ginjawo sabato maga. Kuom mano, ne asingora ni abiro olonegi mirimba e thim mondo atiekgi.+ 14 To ne ok atimo kamano mondo nyinga kik kethre e kind ogendni ma ne oneno ka agolo Jo-Israel e piny Misri.+ 15 Bende, ne akuong’ora e thim ni ok abi terogi e piny ma ne asemiyogi,+ tiende ni piny mopong’ gi chak kod mor kich,+ kendo piny maber moloyo pinje duto. 16 Ne atimo kamano nikech ne gitamore luwo buchena, ne ok giwuotho e chikena kendo ne ginjawo sabato maga, nimar chunygi ne luwo mana sanambegi makwero.+

17 “‘“Kata kamano, ne ok akethogi nikech ne akechogi. Omiyo, ne ok atiekogi e thim. 18 Ne anyiso nyithindgi e thim+ ni, ‘Kik uluw chike mag kwereu+ kata rito buchegi, kendo kik uchidru gi sanambegi makwero. 19 An e Jehova Nyasachu. Omiyo, wuothuru e yorena, rituru buchena, kendo uluwgi.+ 20 Waluru sabato maga+ mondo gibed ranyisi e kinda kodu, kendo giparnu ni an e Jehova Nyasachu.’+

21 “‘“Kata kamano, nyithindu nochako ng’anyona.+ Ne ok giwuotho e chikena, kendo ne ok girito buchena ma ne dhi miyo gibed mangima. Ne ginjawo sabato maga. Kuom mano, ne asingora ni abiro olonegi mirimba duto e thim.+ 22 To ne ok atimo kamano+ mondo nyinga kik kethre+ e kind ogendni ma ne oneno ka areso Jo-Israel. 23 Bende, ne akuong’ora ni abiro keyogi e kind ogendni kendo e pinje mopogore opogore,+ 24 nikech ne ok girito buchena kendo ne ok giluwo chikena,+ ne ginjawo sabato maga kendo ne giluwo mana sanambe makwero mag kweregi.+ 25 Bende, ne ayienegi luwo chike ma ok kare kod buche ma ne ok nyalo miyo gibed mangima.+ 26 Ne aweyo gibedo ma ok ler nikech misengni ma ne gichiwo ka giwang’o nyithindgi makayo e mach.+ Ne atimo kamano mondo akethgi, kendo mondo ging’e ni an e Jehova.”’

27 “Omiyo, wuo gi Jo-Israel, yaye wuod dhano kendo inyisgi ni, ‘Ma e gima Jehova Wuon Loch Duto owacho: “Kamano e kaka kwereu noyanya nikech ne gidagi luwo chikena. 28 Ne aterogi nyaka e piny ma ne akuong’ora ni adhi miyogi.+ To ka ne gichopo mi gineno gode madongo kod yiende ma nigi oboke mang’eny,+ ne gichako chiwo misengni maggi kuno, kendo ne giwang’o iya gi chiwo maggi. Ne gichiwo misengni ma golo suya mamit, kendo ne gigolo chiwo miolo kuno. 29 Omiyo, ne apenjogi ni, ‘Ang’o momiyo udhiga ka ma oting’ore malo? (Kanyo iluongo ni Ka Moting’ore Malo nyaka chil kawuono.)’”’+

30 “E momiyo koro nyis Jo-Israel ni, ‘Ma e gima Jehova Wuon Loch Duto penjo: “Donge uchidoru mana kaka kwereu sa ma uluwo sanambe makwero kendo udwanyo lamo maler?+ 31 Donge pod umedo chidoru nyaka kawuono kuom chiwo misengni ne sanambeu makwero, kendo wang’o nyithindu kaka misango?+ Yaye od Israel, be onego adwok wach moro amora ma upenja ka pod utimo gik ma kamago?”’+

“‘Mana kaka angima,’ Jehova Wuon Loch Duto owacho, ‘Ok abi dwoko wach ma upenja.+ 32 Uwacho ni, “Wabeduru kaka ogendni mamoko kod dhoudi mamoko ma lamo yiende kod kite.”+ Gima uparono ok notimre ngang’.’”

33 “‘Mana kaka angima,’ Jehova Wuon Loch Duto owacho, ‘Analoch e wiu gi bada man gi teko, gi bada moriere, kendo gi mirima mager.+ 34 Abiro golou e pinje ma untie, mi anachoku kanyachiel gi bada man gi teko, gi bada moriere, kendo gi mirima mager.+ 35 Abiro kelou e thim mar ogendni mi anayalu kuno wang’ gi wang’.+

36 “‘Mana kaka ne ayalo kwereu e thim man Misri, e kaka abiro yalou,’ Jehova Wuon Loch Duto owacho. 37 ‘Abiro miyo ukadh e bwo ludh jakwath,+ kendo anami urit singruok. 38 Anagol jo ma ng’anyona kod jo ma kethona e kindu.+ Nimar abiro gologi e piny ma ne gidakie, to ok ginidonj e piny Israel;+ mi unung’e ni an e Jehova.’

39 “To un, yaye Israel, ma e gima Jehova Wuon Loch Duto owacho: ‘Ng’ato ka ng’ato mondo odhi oti atiya ne sanambene makwero.+ To bang’e, ka pod udagi winja ok abi weyo mondo uketh nyinga maler gi misengniu kod sanambeu makwero.’+

40 “‘Nimar e goda maler, e got moting’ore malo mar Israel,’+ Jehova Wuon Loch Duto owacho, ‘e ka ma Jo-Israel duto biro tiyonae e pinyno.+ Abiro yie kodu kendo ubiro kelona chiwo magu kod misengniu mabeyoe moloyo,* ee, gigeu maler duto.+ 41 Ka asegolou e pinje ma akeyoue mi achokou kanyachiel, to anayie gi misengniu ma ng’we mamit,+ kendo unumi abed maler e nyim ogendni.’+

42 “‘Kendo unung’e ni an e Jehova+ sa ma akelou e piny Israel,+ piny ma ne akuong’ora ni abiro miyo kwereu. 43 Kendo ka un kuno, ubiro paro yoreu kod timbeu ma ne omiyo ubedo mochido,+ mi unucharu nikech gik maricho ma ne utimo.+ 44 Eka unung’e ni an Jehova nimar abiro timonu gigo nikech nyinga,+ to ok nikech timbeu maricho kendo morochore, yaye Jo-Israel,’ Jehova Wuon Loch Duto owacho.”

45 Wach Jehova nobirona kendo niya: 46 “Wuod dhano, chom wang’i yo milambo kendo iland wach ne milambo, ikor wach ne bungu man e pap yo milambo. 47 Wach ne bungu man milambo ni, ‘Winj wach Jehova. Ma e gima Jehova Wuon Loch Duto owacho: “Abiro moko mach kuomi+ kendo majno biro wang’o yiendeni duto mang’ich kod motwo. Onge gima noneg majno,+ kendo obiro landore kochakore milambo nyaka nyandwat ka orewo wenge ji duto. 48 Ji duto biro ng’eyo ni an Jehova, an e ma asemoko majno, kendo ok nonege.”’”+

49 Eka ne awacho niya: “Yaye, Jehova Wuon Loch Duto! Giwuoyo e wiya ni, ‘Donge jali goyo mana ngeche?’”

21 Wach Jehova nobirona kendo niya: 2 “Wuod dhano chom wang’i ing’i Jerusalem mondo iland kum e wi kuonde maler, kendo ikor wach e wi piny Israel. 3 Wach ne piny Israel ni, ‘Ma e gima Jehova owacho: “Abiro kedo kodu, kendo abiro wuodho liganglana e ode+ mi aneg jo makare kod joricho man e kindu. 4 Abiro wuodho liganglana e ode mondo aneg dhano duto, kochakore nyandwat nyaka milambo, kendo abiro nego jo makare kaachiel gi jo maricho man e kindu. 5 Ji duto biro ng’eyo ni an Jehova, an e ma asewuodho liganglana e ode. Ok bi duoke e ode kendo.”’+

6 “To in wuod dhano, chur ka itetni, ee, chur achura malit e nyimgi.+ 7 Kendo ka gipenji ni, ‘Ang’o momiyo ichur kamano?’ ibiro dwokogi ni, ‘En nikech wach ma wasewinjo.’ Nimar nyaka obi, kendo chuny ji duto biro a nikech luoro, lwet ji duto biro tho thudhno, chunygi biro nyosore, kendo chongegi duto biro timo pi.*+ ‘Neuru! Wachno nyaka bi, adier nyaka otimre,’ Jehova Wuon Loch Duto owacho.”

8 Wach Jehova nobirona kendo niya: 9 “Wuod dhano, kor wach kiwacho ni, ‘Ma e gima Jehova owacho: “Wach kama, ‘Osepiag ligangla! Ee osepiag ligangla,+ kendo oserudhe. 10 Osepiage mondo oneggo ji mang’eny; oserudhe mondo omil ka polo.’”’

“Donge owinjore wabed mamor, koso?”

“‘Be obiro* chayo ludh-loch mar wuoda+ kaka ochayo yien mamoko?

11 “‘Osechiwe mondo orudhe kendo mondo lwet dhano e ma oti kode. Osepiag liganglano mi orudhe maber mondo okete e lwet janek.+

12 “‘Wuod dhano, ywag matek kendo igo nduru,+ nimar osebiro nego joga; osebiro nego jodongo mag Israel.+ Liganglano biro nego jodongogo kaachiel gi joga. Omiyo, pam bamni nikech kuyo. 13 Nimar, osetim nonro,+ to nobed nade ka ligangla ochayo ludh-loch? Ludh-lochno biro lal nono,’+ Jehova Wuon Loch Duto owacho.

14 “To in wuod dhano, kor weche kendo ipam lweti kiwacho nyadidek ni ‘Ligangla!’ En ligangla ma biro nego ji, liganglano biro kelo nek maduong’, ligangla molworogi koni gi koni.+ 15 Chunygi biro a nikech luoro+ kendo ng’enygi biro podho e dho rangeye mag dala; abiro negogi gi ligangla. Ee, obiro mil ka polo, kendo oserudhe mondo oneki! 16 Tong’ kode yo korachwich! Tong’ kode yo koracham! Dhi kamoro amora ma dho liganglani ochomo! 17 Abiro pamo lwetena kendo abiro tieko mirimba kuomgi.+ An Jehova, asewacho mano.”

18 Wach Jehova ne obirona kendo niya: 19 “To in wuod dhano, gor yore ariyo e lowo ma ligangla mar ruodh Babulon biro luwo. Yore ariyogo biro chakore e piny achiel, kendo ichung bao mar ranyisi ka ma yorego okagoree ka gidhi e mier ariyogo. 20 Inigor yo achiel ma ligangla biro luwo ka dhi Raba+ e piny Jo-Amon, kod yo machielo ma ligangla biro luwo ka dhi Jerusalem+ e piny Juda, ma en dala mochiel motegno. 21 Nimar ruodh Babulon biro chung’ ka ma yore okagoree mondo okonyre gi juok. Obiro yiengo asernige. Obiro penjo sanambene* wach, kendo obiro nono chuny le. 22 Gige mag juok manie lwete korachwich ochomo Jerusalem, ka ma odhi chungoe gik mimukogo ohinga, odhi goloe chik mar nek, odhi goyoe mahu mar lweny, odhi chungoe gik mimukogo dho rangeye, odhi loso pidhe kod ohinga molworo dalano.+ 23 To jo ma* ne otimogo singruok, biro chayo gige juok ma obiro konyorego.+ Kata kamano, obiro paro richogi, mi enomakgi.+

24 “Kuom mano, ma e gima Jehova Wuon Loch Duto owacho: ‘Usemiyo opar richou nikech useelo kethou e lela, kendo richou nenore e gimoro amora mutimo. Koro nikech oseparu, wasigu biro makou.’

25 “To odiechiengi ma ikumie mogik osechopo, yaye in jaduong’ Israel ma jaketho,+ isehinyori marach. 26 Ma e gima Jehova Wuon Loch Duto owacho: ‘Gol kilemba, kendo igol osimbo.+ Ok obi dong’ kaka yande ochal.+ Ting’ ng’ama onge duong’ malo,+ kendo iduok ng’at ma nigi duong’ piny.+ 27 Abiro kethe, abiro kethe, abiro kethe. Ok nobed mar ng’ato ang’ata nyaka chop jal mowinjorego obi,+ kendo anamiyego.’+

28 “To in wuod dhano, kor wach niya: ‘Ma e gima Jehova Wuon Loch Duto owacho e wi Jo-Amon kod ayenjegi.’ Wach kama, ‘Osewuodh ligangla! Osewuodh ligangla mondo oneki; oserudhe mondo oneki, kendo omil ka polo. 29 Kata obedo ni gineno fweny mag miriambo kendo koro weche mag miriambo kuomi, in bende ibiro negi kaachiel gi joricho ma odiechienggi osechopo, odiechieng’ ma ibiro kumgie mogik. 30 Duok ligangla e ode. Abiro ng’adoni bura ka ma ne ochueyie, e piny ma ne onyuolie. 31 Abiro olo mirimba kuomi. Abiro kudhoni maj mirimba, kendo anachiwi e lwet jo mahundu molony e ketho gik moko.+ 32 Ibiro chwek kodi ka yien;+ ibiro chuer rembi e piny kendo wi ji nowil kodi chuth, nimar an Jehova asewacho mano.’”

22 Wach Jehova ne obirona kendo niya: 2 “To in wuod dhano, be iikori lando kum ne dala ma nigi buch remo+ kendo nyise timbene duto modwanyore?+ 3 Iniwachne ni, ‘Ma e gima Jehova Wuon Loch Duto owacho: “Yaye dala ma chuero remb jo ma odak e iye,+ ma odiechienge osechopo,+ dala ma loso sanambe makwero* mondo ochidrego,+ 4 isedoko jaketho nikech remo misechuero,+ kendo sanambeni makwero osemiyo ibedo ma ok ler.+ Isemiyo ong’ad ndaloni mobedo manok, kendo koro kindeni oserumo. Mano e momiyo anami ogendni ochayi kendo ibiro jari e pinje duto.+ 5 Pinje man maboyo kod man machiegni biro jari,+ ee, in ma iluongi ni ma ok ler, kendo ma opong’ gi tungni. 6 Neuru! Jodongo duto mag Israel tiyo gi teko ma gin-go e chuero remo.+ 7 E kindi nitie jo ma ochayo wuonegi gi minegi,+ gimayo jadak, kendo gisando nyathi kich gi chi liel.”’”+

8 “‘Uchayo kuondena maler, kendo uketho sabato maga.+ 9 Jomoko kuomu ketho nying jowetegi mana mondo oneggi.+ Moko to chamo misengni e wi gode kendo gitimo timbe modwanyore.+ 10 E kindi nitie jo ma ochayo otanda wuonegi,*+ kendo moko chuno mon ma dhi e dwe mondo onind kodgi.+ 11 E kindi nitie jo ma dwanyore gi mond jowetegi,+ moko to njawo mond yawuotgi,+ moko to nindo gi thuon gi nyiminegi ma wuonegi onyuolo.+ 12 E kindi nitie jo ma kawo asoya mondo gichwergo remo.+ Uholo ji pesa mondo uyud ohala maduong’,+ kendo umayo joweteu pesa.+ Adier, wiu osewil koda chuth,’ Jehova Wuon Loch Duto owacho.

13 “‘Neuru! apamo lwetena ka asin gi timbeu mag mibadhi, kod mag chuero remo. 14 Be chir ma un-go biro siko?* Be lwetu nobed motegno chieng’ ma abiro kawonu okang’?+ An Jehova e ma asewacho mano, kendo abiro time. 15 Abiro keyou e kind ogendni, kendo e pinje mamoko.+ Abiro tieko timbeu ma ok ler.+ 16 Kendo ogendni biro chayou, mi unung’e ni an Jehova.’”+

17 Wach Jehova nobirona kendo niya: 18 “Wuod dhano Jo-Israel osebedona ka yugi.* Giduto gichalo gi mula, gi bati, gi nyinyo, gi lisasi manie mach. Gichalo gi yugi modong’ bang’ lenyo fedha.+

19 “Kuom mano, ma e gima Jehova Wuon Loch Duto owacho: ‘Nikech usebedo ka yugi,*+ abiro chokou kanyachiel ei Jerusalem. 20 Mana kaka ichoko fedha, gi mula, gi lisasi, gi bati e mach mondo olenygi, e kaka abiro chokou kanyachiel gi mirima, kae to akudho mach kuomu mondo uleny.+ 21 Abiro chokou kanyachiel mi akudh kuomu mach gi mirima mager,+ kendo ubiro leny ei dalano.+ 22 Mana kaka ilenyo fedha e mach, e kaka ibiro lenyu ei dalano; mi unung’e ni an Jehova, an e ma aseolonu mirimba.’”

23 Wach Jehova nobirona kendo niya: 24 “Wuod dhano, nyis dalano ni, ‘In e piny ma ok bi pwodhi, kendo ma ok bi neno koth e odiechieng mirimba. 25 Jonabi mage chano weche maricho,+ mana ka sibuor ma ruto ka kidho le.+ Gimayo ji mwandugi kod gik ma nengogi tek. Gisemiyo mond liete obedo mang’eny e dalano. 26 Jonabi mage oseketho chikena,+ kendo gisiko gidwanyo kuondena maler.+ Ok gipog gik mowal kuom gik ma ok owal,+ kendo ok gimi ji ong’e gima ler gi gima ok ler.+ Gitamore rito sabato maga kendo gimiyo nyinga kethore. 27 Jotende chalo gi bwe ma chamo le; gichuero remo kendo ginego ji mondo giyud mwandu e yor mibadhi.+ 28 To jonabigi umo richogi mana ka jo ma muono ot gi choka ma rachar. Gineno fweny ma nono kendo gikoro miriambo+ ka giwacho niya: “Ma e gima Jehova Wuon Loch Duto owacho,” to Jehova owuon pok owuoyo. 29 Jo ma odak e pinyno wuondo ji kendo gimecho,+ gisando jodhier kod jochan. Gisemayo jodak kendo ng’ado buchgi e yo ma ok kare.’

30 “‘Ne amanyo ng’ato e kindgi ma ne nyalo loso kuonde mokethore e ohinga, kata ma ne nyalo chung’ e kuonde ma ohinga okethoree e lo pinyni mondo kik kethe,+ to ne ok ayudo kata achiel. 31 Kuom mano, abiro olonegi mirimba kendo tiekogi gi mirimba mager mana ka mach. Gibiro kayo gima gichuoyo,’ Jehova Wuon Loch Duto owacho.”

23 Wach Jehova nobirona kendo niya: 2 “Wuod dhano, ne nitie dhako moro ma ne onyuolo nyiri ariyo.+ 3 Nyirigo nochako chodo ka pod gitindo e piny Misri.+ Ji ne mulo thundegi kod korgi kata obedo ni ne gin nyiri ma silili. 4 Nyako maduong’ ne iluongo ni Ohola,* to nyamin-gi ne iluongo ni Oholiba.* Ne akendogi mi ginyuolona yawuoyi gi nyiri. Ohola en Samaria,+ to Oholiba en Jerusalem.

5 “Kata obedo ni Ohola ne en chiega kamano, nochako chodo.+ Ne osiko ogombo jo ma ne ochodogo,+ mana Jo-Asuria ma ne okiewo kode.+ 6 Jogo ne gin gavana ma rwako lewni ma rambulu kod jotelo makonyo. Giduto ne gin yawuoyi ma jochia ma ne idho farese. 7 Ne odhi nyime chodo gi yawuot Asuria mabeyo, kendo ne ochidore+ gi sanambe makwero* mag jo ma ne ogombogo. 8 Ne ok oweyo timbe mag chode ma ne ochako ka pod en Misri, nikech jogo ne ochako nindo kode ka pod otin, kendo ne gimulo kore kata obedo ni ne en silili mi gindhogore kode ahinya.+ 9 Kuom mano, ne achiwe e lwet osiepene ma Jo-Asuria+ ma ne ondhogorego. 10 Ne gielo duge+ mi gimako yawuote gi nyige,+ kendo ne ginege gi ligangla. Nobedo gi nying marach e kind mon, kendo ne ging’adone bura.

11 “Ka ne nyamin-gi ma Oholiba oneno mano, ne ochako chodo ka oowore gi gombo moloyo kata mana nyamin-gi.+ 12 Ne ondhogore gi jo ma ne okiewo kode, mana yawuot Asuria+ ma jochia. Ne gin gavana gi jotelo makonyo ma ne rwako lewni ma rambulu kendo ma ne idho farese. 13 Ka ne ochako ndhongore kamano, ne obedo mana ka nyamin-gi.+ 14 Ne omedo mana nyumore e chode. Ne oneno piche mag chwo mogor e kor ot, mana piche mag Jo-Kaldea mowir gi range makwar. 15 Jogo ne otueyo msip e nungogi, ne girwako kilemba madongo e wigi, kendo ne gichalo ka jolweny. Giduto ne gichalo Jo-Babulon ma nonyuol e piny Jo-Kaldea. 16 Ka nonenogi kamano, gombo ne ohewe mi ne ooro joote irgi e piny Kaldea.+ 17 Omiyo, Jo-Babulon ne siko ka biro ire mondo ginind kode e otandane, kendo ne gindhogore kode. Bang’ ka ne gisenjawe kamano, chunye ne ojok kodgi.

18 “Ka ne odhi nyime elo duge ka ochodo gi wang’-teko kamano,+ chunya ne ojok kode, mana kaka chunya ne osejok gi nyamin-gi.+ 19 To en, ne omedo mana nyumore e chode,+ koparo ndalo ma ne pod otin kaka noterore e piny Misri.+ 20 Ne ogombogi mana ka mon ma duong’ chwogi chalo gi duong’ punda, kendo gi duong’ faras. 21 Ne igombo ahinya timbe modwanyore ma ne itimo e piny Misri,+ ka ne gimulo thundeni kod kori e kinde ma ne pod itin.+

22 “Kuom mano, in Oholiba, ma e gima Jehova Wuon Loch Duto owacho: ‘Abiro miyo jo ma ne iterorigo,+ ma tinde chunyi ojokgo obi oked kodi, kendo gibiro monji koni gi koni.+ 23 Abiro keloni Jo-Babulon+ kod Jo-Kaldea duto,+ Jo-Pekod,+ gi Shoa, gi Koa kaachiel gi Jo-Asuria duto. Giduto gin yawuoyi ma jochia, gavana kod jotelo makonyo, jolweny kod jo ma oyier, kendo giduto giidho farese. 24 Gibiro monji gi geche lweny ma tiendegi yiengo piny, kod jolweny mang’eny moting’o okumbni madongo gi matindo kendo morwako ogut lweny. Ginilwori koni gi koni, kendo abiro chikogi mondo ging’adni bura, mi gining’adni bura kaka gidwaro.+ 25 Abiro olo mirimba kuomi, kendo gibiro sandi ka gikecho. Gibiro ng’ado umi kod iteni, kendo jogi modong’ biro tho gi ligangla. Gibiro mako yawuoti gi nyigi, to jogi modong’ gibiro wang’o gi mach.+ 26 Gibiro lonyo lepi+ kendo gibiro mayi gigeni mabeyo mag dusruok.+ 27 Abiro tieko timbeni mag anjawo kod terruok,+ ma ne ichako timo e piny Misri.+ Ibiro weyo rangogi, kendo ok ibi paro Misri ngang’.’

28 “Nimar ma e gima Jehova Wuon Loch Duto owacho: ‘Achiegni keti e lwet jo ma ne isin-go, kendo ma chunyi ne ojokgo.+ 29 Gibiro sandi kendo gibiro mayi mwanduni duto ma isetiyone matek,+ mi giniweyi ka in duk. Timbeni modwanyore mag terruok, gi ndhogruok kod chode biro elore.+ 30 Mago duto biro timoreni nikech ne iluwori gi ogendni mamoko ka jachode,+ mi injawori gi sanambegi makwero.+ 31 Iseluwo timbe nyaminu,+ kendo abiro keto okombene e lweti.’+

32 “Ma e gima Jehova Wuon Loch Duto owacho:

Okombe mar nyaminu Samaria.

34 Inimadhe mi ilung’e pep,+ kendo inimuod tago mage

Eka ining’ad thundeni.

“Nimar an e ma asewacho,” Jehova Wuon Loch Duto owacho.’

35 “Kuom mano, ma e gima Jehova Wuon Loch Duto owacho: ‘Nikech wiyi osewil koda kendo isechaya chuth,+ ibiro yudo masira nikech anjawo kod terruokni.’”

36 Eka Jehova nopenja niya: “Wuod dhano be ibiro chomo Ohola kod Oholiba+ kendo nyisogi bura ma ibiro ng’adnegi nikech timbegi modwanyore? 37 Giseterore,*+ kendo remo omienore e lwetegi. Giseterore gi sanambegi makwero kendo gisewang’o nyithindo ma ne ginyuolona mondo obed chiemo ne sanambegi.+ 38 Bende, ma e gima gisetimona: Ne gidwanyo kara maler odiechiengno kendo ne giketho sabato maga. 39 Bang’ ka ne gisechiwo nyithindgi ne sanambegi makwero,+ ne gibiro e kara maler e odiechiengno mondo gidwanye.+ Mano e gima ne gitimo e oda. 40 Bende, ne gioro jaote mondo oluongnegi chwo ma ne ni ka mabor.+ To ka ne gibiro ne ilwokori, miwiro wengeni, kendo ne ibidhori gi gige dusruokni.+ 41 Eka ne ibet e kom moro maber+ ma nigi mesa mopedh maber e nyime,+ kendo kanyo e ma ne iketo ubanina+ gi mo mara.+ 42 Dwond jo ma ok odewo gimoro nowinj kuome, kendo moko kuomgi ne gin jo ma nomer ma ne ogol e thim. Ne girwako ne mon bangli e lwetegi, kendo sidhonegi osimbo mabeyo.

43 “Eka ne awacho e wi dhako ma chode oolo niya: ‘Koro obiro dhi nyime gi timbene mag chode.’ 44 Omiyo, ne gidonjo ka ma ne entie, mana kaka ji donjoga ka ma dhako ma jachode nitie. Mano e kaka ne gidonjo ka ma Ohola gi Oholiba, mon ma ne ohero terruok ne nitie. 45 Kata kamano, jo makare biro ng’adone bura mowinjore gi timbene mag terruok+ kod nek;+ nimar gin jochode kendo gisemienore gi remo e lwetgi.+

46 “Nimar ma e gima Jehova Wuon Loch Duto owacho: ‘Oganda lweny moro biro kedo kodgi mi giniyak mwandugi kendo giniwe pinygi ka lich.+ 47 Jolwenygo biro chielogi gi kite+ kendo tong’ogi gi liganglagi. Gibiro nego yawuotgi gi nyigi+ mi giniwang’ utegi gi mach.+ 48 Abiro tieko timbe mag anjawo e pinyno, kendo mon duto nopuonjre kuom wachno mondo kik ginjawre mana kaka ne injawori.+ 49 Gibiro kumou nikech timbeu mag anjawo kod richo ma ne utimo gi sanambeu makwero; mi unung’e ni an e Jehova Wuon Loch Duto.’”+

24 E odiechieng’ mar apar, dwe mar apar, e higa mar ochiko, wach Jehova nobirona kendo niya: 2 “Wuod dhano, ndik odiechieng’ ma kawuononi piny, nikech en odiechieng’ ma ruodh Babulon ochako monjoe Jerusalem.+ 3 Kendo igo ngero ne oganda mong’anyo kiwacho e wigi niya:

“‘Ma e gima Jehova Wuon Loch Duto owacho:

“Keturu agulu e mach: keteuru e mach kae to uolie pi.+

 5 Kawuru jamni mabeyo mag kueth,+ kendo ubiw yien e bwo aguluno.

Chwakuru ring’ogo mondo gichieg maber kaachiel gi choke.”’

6 “Ma e gima Jehova Wuon Loch Duto owacho:

‘Yaye nobed malit ne dala ma chuero remb ji,+ agulu ma nyal ochamo, ma nyal man kuome pok ogol!

Goluru gik manie iye achiel-achiel;+ kik ugonegi ombulu.

 7 Nimar rembe nie iye;+ ne oolo remono e wi lwanda.

Ne ok oole e lowo, mondo oume gi buru.+

9 “Kuom mano ma e gima Jehova Wuon Loch Duto owacho:

‘Yaye nobed malit ne dala ma chuero remb ji+

Nikech an awuon e ma abiro biwo yiend chweko!

Chilo man kuome biro leny nono,+ kendo nyal biro wanyore.

Witeuru e mach gi nyal momakeno!’

13 “‘Timbeni modwanyore e ma ne olili.+ Ne atemo pwodhi to ne itamori bedo maler. Chilo man kuomi ok bi pwodhore nyaka atiek olo mirimba kuomi.+ 14 An Jehova an e ma asewacho mano, kendo nyaka otimre. Ok anadog chien, ok abi kechi kendo ok anaywag ang’e.+ Gibiro ng’adoni bura kaluwore gi yoreni kod timbeni,’ Jehova Wuon Loch Duto owacho.”

15 Wach Jehova nobirona kendo niya: 16 “Wuod dhano achiegni mayi apoya nono ng’at mihero ahinya.+ To kik iywage, kik igo nduru, kendo kik pi wang’i chuer. 17 Chunyi to om aoma mos, to kik itim timbe mag ywago ng’at motho.+ Initwe kilembani e wiyi,+ kendo inirwak wuocheni.+ Kik ium dhogi,+ kata kik icham chiemo mokelni.”+

18 Chieng’no gokinyi ne awuoyo gi ji, to ka ne ochopo godhiambo chiega ne otho. Omiyo, kinyne gokinyi ne atimo mana kaka ne osechika. 19 Eka ji ne openja niya: “Ok inyiswae kaka gik ma itimogi mulowa?” 20 Ne adwokogi niya: “Wach Jehova osebirona kama, 21 ‘Wach ne Jo-Israel niya: “Ma e gima Jehova Wuon Loch Duto owacho, ‘Achiegni ketho kara maler,+ ka ma usungorugo, ka ma chunyu ohero kendo mugeno ahinya. Yawuotu kod nyiu ma ne uweyo chien biro tho gi ligangla.+ 22 Eka unutim mana kaka asetimo. Ok ubi umo dhou kendo ok ubi chamo chiemo mikelonu.+ 23 Kilemba mau nobed e wiu kendo wuocheu nobed e tiendeu. Ok unuywagru kendo pi wang’u ok nochwer. Kar mano ubiro tow nikech richou+ kendo ubiro ng’ur ang’ura ne joweteu. 24 Ezekiel osebedonu ranyisi.+ Mana kaka osetimono e kaka un bende ubiro timo. Ndalono kochopo ubiro ng’eyo ni an Jehova Wuon Loch Duto.’”’”

25 “To in wuod dhano, chieng’ ma abiro golo yawuotgi gi nyigi, kendo muko ka ma ne gipondoe, tiende ni gima jaber ma ne miyo chunygi mor kendo ma ne gigeno ahinya,+ 26 ng’at ma otony e ma nokelnu wechego.+ 27 Chieng’no ok inibed momo kendo, to ibiro yawo dhogi mi iwuo gi ng’at motony.+ Ibiro bedonegi ranyisi, kendo gibiro ng’eyo ni an e Jehova.”

25 Wach Jehova nobirona kendo niya: 2 “Wuod dhano, chom wang’i ir Jo-Amon,+ kendo ikornegi gima biro timorenegi.+ 3 Iniwach e wi Jo-Amon kama, ‘Winjuru gima Jehova Wuon Loch Duto wacho. Ma e gima Jehova Wuon Loch Duto owacho: “Ka ne jowasigu odwanyo kara maler, ma giketho piny Jo-Israel, kendo tero Jo-Juda e tuech, ne uwacho e yor ajara ni, ‘Aha!’ 4 omiyo, abiro chiwo mwandu magu ne jo moa yo Ugwe. Ginigo kambi e kindu, kendo ginichung hembegi e dieru. Ginicham olembeni, mi ginimadh chagi. 5 Anami Raba+ obed ka ma ngamia kwayoe, kendo rombe biro nindo e piny Jo-Amon; mi unung’e ni an Jehova.”’”

6 “Nimar ma e gima Jehova Wuon Loch Duto owacho: ‘Nikech ne upamo lwetu,+ ka uchikoru* gi mor kujaro piny Israel,+ 7 abiro rieyonu bada mi anachiwu e lwet ogendni mondo giyaku. Anagol karu oko e piny, mi anami ulal nono.+ Abiro tiekou, mi unung’e ni an Jehova.’

8 “Ma e gima Jehova Wuon Loch Duto owacho: ‘Nikech Moab+ gi Seir+ osewacho ni, “Neuru! Jo-Juda chalo mana gi ogendni mamoko,” 9 abiro miyo wasigu omonj miech Moab mabeyo manie tong’ pinygi, ma gin Beth-jeshimoth, Baal-meon, moriwo nyaka Kiriathaim.+ 10 Abiro chiwe kaachiel gi piny Jo-Amon e lwet jo ma oa yo Ugwe,+ mondo ogendni kik par piny Moab kendo.+ 11 Abiro kumo Moab,+ kendo gining’e ni an e Jehova.’

12 “Ma e gima Jehova Wuon Loch Duto owacho: ‘Nikech Jo-Edom osechulo kuor malit ne Jo-Juda mi gikelo ketho maduong’ kuomgi giwegi;+ 13 ma e gima Jehova Wuon Loch Duto owacho: “An bende abiro rieyo bada kuom Jo-Edom mi anatiek dhano gi jamni, kendo weye nono.+ Chakre Teman nyaka Dedan gibiro tho gi ligangla.+ 14 ‘Anachul kuor kuom Edom ka atiyo gi joga ma Jo-Israel.+ Gibiro timo ne Jo-Edom kaka mirimba mager obet, mondo ging’e kaka kuor ma achulo lit,’+ Jehova Wuon Loch Duto owacho.”’

15 “Ma e gima Jehova Wuon Loch Duto owacho: ‘Sigu ma Jo-Filistia nigo, osemiyo gichulo kuor kendo kelo kethruok ne wasikgi.+ 16 Kuom mano, ma e gima Jehova Wuon Loch Duto owacho: “Neuru abiro rieyo bada kuom Jo-Filistia,+ mi anagol Jo-Kereth+ oko, kendo anatiek jo modong’ modak e dho nam.+ 17 Abiro chulo kuor ka agoyogi gi masiche malich kendo madongo, mi gining’e ni an e Jehova kinde ma achuloe kuor.”’”

26 E odiechieng’ mokwongo mar dwe, e higa mar 11, wach Jehova ne obirona niya: 2 “Wuod dhano, Turo osejaro Jerusalem+ ni, ‘Aha! Osetur dho ranga ogendni!+ Gik moko duto nobina, kendo anamew nikech oseloye.’ 3 Omiyo, ma e gima Jehova Wuon Loch Duto owacho: ‘In Turo, amon kodi, kendo abiro kelo ogendni mang’eny mana kaka apaka me nam mondo omonji. 4 Gibiro ketho ohinga magi kendo muko uteni madongo.+ Bang’ mano abiro ywero lowo duto man kuomi mi anaweyi lilo mana ka lwanda. 5 Inibed kar moyo gogni e chuny nam.’+

“‘An awuon asewacho mano,’ Jehova Wuon Loch Duto owacho, ‘kendo ogendni biro yako mwanduni. 6 Ibiro neg jogi modak e miechi man oko gi ligangla, mi ji biro ng’eyo ni an e Jehova.’

7 “Nimar, ma e gima Jehova Wuon Loch Duto owacho: ‘Abiro kelo Nebukadnezar* ruodh Babulon koa yo nyandwat mondo omonji, in Turo;+ en e ruodh ruodhi,+ kendo enobi gi farese,+ geche,+ joidh farese, kod oganda lweny maduong’. 8 Obiro ketho miecheni man oko gi ligangla, obiro gero ohinga molworo dalani, kod pidhe mag lowo. Obiro monji gi okumba maduong’. 9 Obiro muko ohinga magi gi gige muko ohinga, kendo obiro ketho uteni madongo kotiyo gi le.* 10 Faresene nobed mang’eny mi giniumi gi buru, kendo koko mar joidh faresene, tiend gechene, kaachiel gi faresege biro yiengo ohinga magi sa ma odonjo e dho rangeyeni, mana ka jo ma monjo dala moro ma ohinga mage osemukore. 11 Tiend faresene biro nyono nderni magi duto;+ obiro nego jogi gi ligangla, kendo sirni magi motegno biro mukore. 12 Gibiro yako mwanduni, ginimayi giki milokogo ohala,+ ginigo ohinga magi piny, kendo ginimuk uteni mabeyo; kae to giniwit kiteni, yiendeni, kod lopi e nam.’

13 “‘Abiro tieko dwond jower duto, kendo dwond nyatiti ok nowinjre kendo.+ 14 Abiro ywero lowo duto man kuomi mi anaweyi lilo mana ka lwanda ma imoyoe gogo.+ Ok nochak ogeri kendo, nimar an Jehova, an e ma asewacho mano,’ Jehova Wuon Loch Duto owacho.

15 “Ma e gima Jehova Wuon Loch Duto owacho ne Turo: ‘Chulni biro tetni ahinya ka giwinjo kaka ipodho, kendo kaka jogi chur sa ma inegogi.+ 16 Jotelo duto modak e nam biro wuok e kombegi mag loch, mi ginilony lepgi ma oko, kod lepgi ma nigi maridadi nikech luoro maduong’ biro makogi. Gibiro bet piny e lowo ka gitetni, kendo ka giwuoro gima osetimoreni.+ 17 Giniywagi gi wende mag ywagruok+ ka giwachoni kama:

19 “Nimar ma e gima Jehova Wuon Loch Duto owacho: ‘E kinde ma abiro lokie gunda mana kaka mier ma ji ok odakie, kendo kelo kuomi pige mang’eny mi aumi,+ 20 abiro lori in kaachiel gi jomamoko nyaka e liel, e piny jo ma notho chon; abiro miyo idag e bwo lowo, kuonde ma osewe nyaka nene, in kaachiel gi jogo moyik e liel,+ mondo kik ng’ato odag kuomi ngang’. Mi anami piny jo mangima duong’.

21 “‘Abiro kethi apoya, kendo ok inichak ibedie kendo.+ Gibiro manyi, to ok giniyudi,’ Jehova Wuon Loch Duto owacho.”

“Yaye Turo, in iwuon e ma isepakori ni, ‘Ajaber ahinya.’+

 8 Jo ma odak Sidon kod Arvad+ e ma ne kwang’i.

Yaye Turo, jogi molony e ma ne chiko yie.+

 9 Jo-Gebal motieg maber* kendo ma ne nigi lony+ e ma ne dino kuonde mokethore.+

Meli duto mag nam kod jotichne ne biro loko ohala kodi.

10 Jo-Persia, Lud, gi Put+ ne nie ogandani mar lweny.

Ne ging’awo okumbni maggi kod ogutegi kuomi, mi ne gimiyo iyudo duong’.

Ne ging’awo okumbni molworore e ohinga magi duto,

Kendo ne gimedo berni.

12 “‘“Tarshish+ ne oloko ohala kodi nikech ne in gi mwandu mang’eny.+ Ne gikeloni fedha, gi nyinyo, gi bati, kod lisasi mondo iusnegi mwanduni.+ 13 Javan, Tubal,+ kod Meshek+ ne oloko ohala kodi, ne gikeloni wasumbni+ kod gik molos gi mula. 14 Jo-Togarma+ ne okeloni farase, gi farese mag lweny, kod nyumbu* mondo iusnegi mwanduni. 15 Jo-Dedan+ ne oloko ohala kodi; ne indiko johala mang’eny e chulni mopogore opogore; ne gichuli lak liech+ kod bepe motegno ma rotenge. 16 Edom ne otimo ohala kodi nikech ne ing’eny gi mwandu. Ne gikeloni tarkois, usi ma rajamna, lewni ma nigi maridadi, lewni mayom, kite mag korol, kod rubi mondo iusnegi mwanduni.

17 “‘“Jo-Juda kod Jo-Israel ne oloko ohala kodi ka gimiyi ngano moa Minith,+ chiemo mabeyo, mor kich,+ mo, kod balsam+ mondo iusnegi mwanduni.+

18 “‘“Damaski+ notimo ohala kodi nikech mwandu ma ne in-go ne ng’eny ahinya, ne gikeloni divai moa Helbon kod yie rombe mag Sahar.* 19 Vedan kod Javan moa Uzal ne okeloni nyinyo mosethedhi, yiend kasia, kod odundu ma nigi suya mamit, mondo iusnegi mwanduni. 20 Jo-Dedan+ ne oloko ohala kodi ka ne gikeloni lewni mipedho e wi farese. 21 Ne indiko Jo-Arabia kod jodongo duto mag Kedar+ ma ne loko ohand nyirombe, yimbe, kod diek.+ 22 Jolok ohala mag Sheba kod Raama+ ne loko ohala kodi; ne gikeloni kit modhi duto ma nigi suya mamit, kite ma nengogi tek, kod dhahabu, mondo iusnegi mwanduni.+ 23 Haran,+ Kane, Eden,+ jolok ohala mag Sheba,+ Ashur,+ kod Kilmad ne loko ohala kodi. 24 Ne giuso lewni mabeyo, lep abola ma rambulu kendo ma nigi maridadi, kod kapede ma nigi rangi mopogore opogore e chiro mari. Giduto ne otwegi gi tol.

28 Ka jogi ma chiko yie ogo nduru, dho nam biro tetni.

32 Gibiro ywagore ka giwero wer ma giywagigo:

‘Ng’ano ma chalo gi Turo ma sani oling’ e chuny nam?+

33 Ji mang’eny ne oyieng’ gi mwanduni ma ne biro koa e nam.+

Mwanduni mang’eny kaachiel gi jolok ohandi ne omiyo ruodhi mag piny omewo.+

36 Jolok ohala moa e ogendni biro liyo ka gineno gima osetimoreni.

28 Wach Jehova nobirona kendo niya: 2 “Wuod dhano, wach ne ruodh Turo kama, ‘Ma e gima Jehova Wuon Loch Duto owacho:

“Chunyi opong’ gi sunga+ e momiyo isiko iwacho ni, ‘An nyasaye.

Abet e kom-loch nyasaye e chuny nam.’+

 3 Ne! Iriek moloyo Daniel.+

Onge wach ma ling’ling’ mosepandni.

6 “‘Kuom mano, ma e gima Jehova Wuon Loch Duto owacho:

Kendo ginidwany duong’ ma in-go.+

 9 Be pod ibiro nyiso ng’at ma negi ni, ‘An nyasaye’?

Inibed mana dhano, to ok nyasaye e lwet jo ma dwanyo duong’ ma in-go.”’

11 Wach Jehova nobirona kendo niya: 12 “Wuod dhano, wer ne ruodh Turo wend ywagruok, kendo inyise ni, ‘Ma e gima Jehova Wuon Loch Duto owacho:

13 Ne in e Eden, puodho mar Nyasaye.

Gigo ne olos chieng’ ma ne ochueyie.

14 Ne awali mondo ibed kerubi ma tiyo tij umo.

Ne in e got maler mar Nyasaye,+ kendo ne iwuotho e kind kite maliel.

17 Ne isungori e chunyi nikech ber mari.+

Duong’ ma ne in-go ne omiyo injawo riekoni.+

Abiro witi e piny.+

Abiro miyo ruodhi duto oneni.

18 Ne idwanyo kuondeni maler gi richoni madongo kod ohelni ma ne opong’ gi mibadhi.

Abiro moko mach kuomi, mi majno nowang’i pep.+

Abiro loki buru e nyim ji.

19 Ji duto ma ne ong’eyi biro bwok ka gineno gima otimoreni.+

20 Wach Jehova nobirona kendo niya: 21 “Wuod dhano chom wang’i ing’i Sidon,+ kendo ikorne gima biro timorene. 22 Ibiro wacho kama, ‘Ma e gima Jehova Wuon Loch Duto owacho:

23 Abiro orone tuoche kendo remo biro mol e yorene.

24 “‘“Eka jogo mokiewo gi Jo-Israel ok nobednegi kendo kaka oriang’ kod kuthe ma chuopo malit,+ kendo ok ginijargi; mi ji biro ng’eyo ni an e Jehova Wuon Loch Duto.”’

25 “‘Ma e gima Jehova Wuon Loch Duto owacho: “Ka asechoko Jo-Israel kuom ogendni ma gikeree,+ ogendnigo biro ng’eyo ni an e Nyasaye maler.+ Jo-Israel biro dak e piny ma ne amiyo jatichna ma Jakobo.+ 26 Ginidag kuno gi kuwe,+ giniger udi, kendo pidho puothe mzabibu.+ Ginidag gi kuwe chieng’ ma ang’ado bura ne ogendni mokiewo kodgi ma ne jarogi;+ mi gining’e ni an e Jehova Nyasachgi.”’”

29 Odiechieng’ mar 12, dwe mar apar, higa mar apar, wach Jehova nobirona niya: 2 “Wuod dhano, chom wang’i ing’i Farao ruodh Misri, kendo ikor gima biro timorene kaachiel gi piny Misri duto.+ 3 Iniwach kama: ‘Ma e gima Jehova Wuon Loch Duto owacho:

Ne alose mondo obed mara.’+

 4 Abiro keto ramaki e dhogi mi anami rech manie Nael omok e kalagakla magi.

Abiro goli e Nael kaachiel gi rech duto momoko kuomigo.

 5 Abiro witi e thim kaachiel gi rech duto manie Nael.

Ibiro podho e pap, kendo ok bi choki.+

Anachiwi ne ondiegi kod winy ma fuyo e kor polo mondo ochami.+

8 “‘Kuom mano, ma e gima Jehova Wuon Loch Duto owacho: “Akeloni ligangla,+ ma biro tieko dhano kod le. 9 Piny Misri biro dong’ gunda;+ mi gining’e ni an Jehova, nimar isewacho ni, ‘Aora Nael en mara; an e ma ne alose.’+ 10 Omiyo, amon kodi, kaachiel gi aorani mar Nael, anami piny Misri odong’ gunda kendo ka ma otuo.+ Enodong’ gunda chakre Migdol+ nyaka Saiyene+ manie tong’ Ethiopia. 11 Onge dhano kata jamni ma biro kalo kanyo,+ kendo onge ng’at ma nodag kuno nyaka higni 40 rum. 12 Anami piny Misri odong’ gunda moloyo piny moro amora man gunda, kendo miechene nodong’ gunda moloyo mier moro amora man gunda kuom higni 40;+ mi anake Jo-Misri e kind ogendni.”+

13 “‘Nimar ma e gima Jehova Wuon Loch Duto owacho: “Bang’ higni 40 abiro choko Jo-Misri e pinje ma ne akeyogie;+ 14 Abiro duoko Jo-Misri ma ne oter e tuechgo e piny Pathros,+ ka ma ne onyuolgie, kendo ginibed pinyruoth matin. 15 Misri nobed matin moloyo pinjeruodhi mamoko.+ Kendo anami gibed matin ma ok ginichak giloch e wi ogendni mamoko.+ 16 Jo-Israel ok nochak ogen kuomgi kendo,+ to masira moyudo Misrino biro paronegi kaka ne giketho ka ne gimanyo kony kuom Misri. Kendo gining’e ni an Jehova Wuon Loch Duto.”’”

17 Koro, e odiechieng’ mokwongo mar dwe mokwongo, e higa mar 27, wach Jehova ne obirona niya: 18 “Wuod dhano, Nebukadnezar*+ ruodh Babulon ne omiyo jolwenje otiyo matek mi wigi oluny kendo gokegi oridhore ka ne okedo gi Turo.+ To ne ok giyudo chudo moro amora bang’ kedo gi Turo.

19 “Kuom mano, ma e gima Jehova Wuon Loch Duto owacho, ‘Abiro chiwo piny Misri e lwet Nebukadnezar* ruodh Babulon,+ mi enoyak pinyno kendo obiro kawo mwandune duto mondo ochulgo jolwenje.’

20 “‘Abiro miye piny Misri kaka chudo nikech tich matek ma ne gitiyona ka ne omonjo Turo,’+ Jehova Wuon Loch Duto owacho.

21 “Chieng’no anami tung’ moro odong e od Israel,*+ to in anamiyi thuolo mar wuoyo e diergi; mi gining’e ni an Jehova.”

30 Wach Jehova nobirona kendo niya: 2 “Wuod dhano, kor wach kiwacho ni, ‘Ma e gima Jehova Wuon Loch Duto owacho:

“Gouru nduru, ‘Yaye, odiechiengno biro!’

 6 Ma e gima Jehova owacho:

“‘Ginitho gi ligangla chakre Migdol+ nyaka Saiyene,’+ Jehova Wuon Loch Duto owacho. 7 ‘Pinyno nodong’ gunda moloyo pinje duto, kendo miechene ibiro keth moloyo mier mamoko duto.+ 8 Mi gining’e ni an e Jehova chieng’ ma abiro wang’o Misri kaachiel gi ji duto ma riwe lwedo. 9 Chieng’no abiro oro joote gi meli mondo gidhi gibwog Jo-Ethiopia modak gi kuwe. Gibiro bedo gi parruok nikech odiechieng’ ma biro ne Misri, nimar odiechiengno nyaka bi.’

10 “Ma e gima Jehova Wuon Loch Duto owacho: ‘Abiro chiwo Misri kaachiel gi ogandane e lwet Nebukadnezar* ruodh Babulon mi ginitiekgi.+ 11 Enobi kaachiel gi jolwenje makwiny+ mondo giketh pinyno. Gibiro wuodho ligangla maggi e wi Misri mi ginipong’e gi ringre jo motho.+ 12 Abiro duono aoche matindo mag Nael,+ kendo anaus pinyno ne jo maricho. Jo pinje mamoko biro ketho pinyno kaachiel gi gik moko duto manie iye.+ An Jehova asewacho mano.’

13 “Ma e gima Jehova Wuon Loch Duto owacho: ‘Abiro ketho sanambe makwero,* kendo tieko nyiseche manono mag Nof.*+ Onge ng’at ma nochak obed jatelo e piny Misri kendo. Bende, anami Jo-Misri duto odag gi luoro.+ 14 Anami Pathros odong’ gunda,+ anawang’ Zoan gi mach, mi anang’ad ne No* bura.+ 15 Abiro olo mirimba ne Sin, dala mochiel motegno e Misri, kendo ketho jo ma odak No. 16 Abiro moko mach e piny Misri; kendo parruok biro mako Sin, No ibiro muki, kendo Nof* ibiro monj godiechieng’! 17 Yawuot On* kod Pibeseth biro tho gi ligangla, kendo ibiro ter miechego e tuech. 18 Mudho biro imo Tapanhes chieng’ ma aturo jok mag Jo-Misri kuno.+ Teko ma osungorego ibiro tieki,+ boche polo biro ume, kendo ibiro ter taondene e tuech.+ 19 Abiro kumo Misri, mi gining’e ni an Jehova.’”

20 E odiechieng’ mar abiriyo mar dwe mokwongo e higa mar 11, wach Jehova ne obirona niya: 21 “Wuod dhano, aseturo bad Farao ruodh Misri. Onge ng’at ma biro tueyone badeno kata chome mondo ochangi. Omiyo, ok obi yudo teko mar mako ligangla kendo.”

22 “Kuom mano, ma e gima Jehova Wuon Loch Duto owacho: ‘Amon gi Farao ruodh Misri,+ abiro turo bade motegno kaachiel gi bade mosetur,+ kendo anami ligangla olwar koa e lwete.+ 23 Eka abiro keyo Jo-Misri e pinje mi gidag e kind ogendni mamoko.+ 24 Abiro tego lwet ruodh Babulon,+ kendo keto liganglana e lwete.+ Abiro turo bad Farao kendo obiro chur matek e nyim ruodh Babulon mana kaka ng’at ma chiegni tho. 25 Abiro tego lwet ruodh Babulon, to lwet Farao biro tho thudhno. Gining’e ni an Jehova ka aketo liganglana e lwet ruodh Babulon, kendo enowire koni gi koni e wi piny Misri.+ 26 Eka abiro keyo Jo-Misri e pinje mi gidag e kind ogendni mamoko,+ kendo gining’e ni an e Jehova.’”

 4 Pi ne omiyo odongo, pige manie bwo lowo nomiyo odongo mobedo ma rabora.

 5 Mano e momiyo borne ne oyombo yiende duto manie bungu.

 8 Onge yadh sida moro amora e puoth Nyasaye+ ma ne inyalo pim kode.

Onge yath moro amora e puoth Nyasaye ma ne jaber kaka en.

10 “Omiyo, ma e gima Jehova Wuon Loch Duto owacho: ‘Nikech ne odongo ma rabora ahinya mi wiye ochopo e boche polo, kendo borne ne omiyo chunye ochako bedo gi sunga, 11 abiro chiwe e lwet jal ma locho e wi ogendni.+ Jalo biro kume, kendo anadagi yadhno nikech richone. 12 Kendo jo pinje mamoko ma kwiny biro tong’e, mi giniwite e gode. Obokene biro lwar e hohni duto kendo bedene motur biro lwar e aoche duto matindo.+ Bende, ogendni mosebedo kodak e bwo tipone biro dar. 13 Winy duto ma fuyo e kor polo biro dak e kor yath mosepodhono, to le mag bungu biro dak e bedene.+ 14 Mano biro timore mondo yath moro amora ma dongo e but pi kik dong mi wiye chop e boche polo, kendo yath moro amora ma dongo ka ma pi ok duonie kik chopnegi. Nimar giduto gibiro tho, mi gidhi e liel, mana kaka dhano bende lor nyaka e liel.’

15 “Ma e gima Jehova Wuon Loch Duto owacho: ‘Chieng’ ma obiro lor nyaka e Liel,* ji biro ywak ahinya. Omiyo, abiro umo nam matut kendo geng’o aoche matindo mondo kik mol. Enomi akel mudho e Lebanon, kendo yiend bungu duto biro two. 16 Anami ogendni otetni nikech koko mar podhone chieng’ ma abiro wite e Liel* gi jo ma lor nyaka e liel. Kendo yiende duto manie Eden,+ yiende duto mabeyo mag Lebanon, yiende duto ma dongo ka ma pi ok duonie, noyud hoch e piny ma mwalo. 17 Giselor kode e Liel* ka ma jo ma oneg gi ligangla nitie.+ Oselor kaachiel gi jo ma ne riwe lwedo ma ne odak e tipone.’+

18 “‘Be nitie yath moro amora e Eden ma nigi duong’ kendo mipako kaka in?+ Kata kamano, ibiro lori nyaka e piny ma mwalo kaachiel gi yiende mag Eden. Ibiro nindo e kind jo ma ok oter nyangu ma ne oneg gi ligangla. Mano e gima biro timore ne Farao gi ogandane duto,’ Jehova Wuon Loch Duto owacho.”

 3 Ma e gima Jehova Wuon Loch Duto owacho:

 7 ‘To ka osetieki, abiro imo polo mi sulwe ok norieny.

11 Ma e gima Jehova Wuon Loch Duto owacho:

‘Ligangla mar ruodh Babulon nobini.+

Gibiro tieko sunga mar Jo-Misri, kendo nego ogandane duto.+

Gibiro were ka giywago Misri kod ogandane duto,’ Jehova Wuon Loch Duto owacho.”

17 To e odiechieng’ mar 15 e higa mar 12, wach Jehova nobirona niya: 18 “Wuod dhano, ywag Jo-Misri kendo ilorgi e piny ma mwalo, en kaachiel gi nyi ogendni ma roteke, kod jo ma lor e liel.

19 “‘En ng’ano ma iloyo gi ber? Lor piny mondo inind kaachiel gi jo ma ok oter nyangu!’

20 “Gibiro podho e kind jo ma oneg gi ligangla.+ Osechiwe ne ligangla; ywayeuru ugole oko kaachiel gi joge.

21 “‘Thuondi ma roteke kaachiel gi jo ma ne konye biro wuoyo kode ka gin e Liel.* Ginilor piny kendo gininind mana ka jo ma ok oter nyangu, moneg gi ligangla. 22 Asuria ni kuno kaachiel gi ogandane duto. Lietegi olwore koni gi koni, giduto ne oneggi gi ligangla.+ 23 Lietene e ma ni kuonde ma mwalo mogik e bur, kendo ogandane olwore koni gi koni. Ka ne gingima ne gimiyo ji bedo maluor, to koro giduto gisetho gi ligangla.

24 “‘Elam+ ni kuno kaachiel gi ogandane duto kendo gilworo ka ma ne oyikee. Ka ne gingima ne gimiyo ji bedo maluor, to koro giselor e liel ka ok otergi nyangu. Gibiro yudo wich-kuot kaachiel gi jo ma oyik e liel. 25 Giselosone otanda e dier jo ma osenegi, en kaachiel gi ogandane duto. Liete mag joge olwore koni gi koni. Giduto ne oneggi gi ligangla ka ok otergi nyangu. Ka ne gingima ne gimiyo ji bedo maluor, to koro giseyudo wich-kuot kaachiel gi jo ma oyik e liel. Osepiele e kind jo ma onegi.

26 “‘Meshek gi Tubal+ ni kanyo kod ogandagi* duto. Lietegi olwore koni gi koni. Giduto gin jo ma ok oter nyangu ma ne ochwo gi ligangla, nikech ka ne gingima ne gimiyo ji bedo maluor. 27 Donge ibiro pielgi kaachiel gi thuondi ma ne ok oter nyangu ma ne otho, molor piny e Liel* gi gigegi mag lweny? Gibiro teno wigi gi liganglagi,* to richogi nobed e chokegi, nikech ka ne thuondigo ngima ne gimiyo ji bedo maluor. 28 In to ibiro toyi e kind jo ma ok oter nyangu, kendo ibiro nindo kaachiel gi jo ma ne oneg gi ligangla.

29 “‘Edom+ ni kuno kaachiel gi ruodhige kod jodongo mage duto. Kata obedo ni ne gin jo ma roteke kamano, ne opielgi e kind jo ma noneg gi ligangla. Gin bende gibiro nindo kaachiel gi jo ma ne ok oter nyangu+ kod jogo ma lor mwalo e liel.

30 “‘Kuno e ma jotelo duto mag nyandwat kaachiel gi Jo-Sidon nitie.+ Chon ne gin jo ma roteke kendo ma ne miyo ji bedo maluor to koro gisedhi e liel ka gin gi wich-kuot ka ok otergi nyangu. Ibiro pielgi kaachiel gi jo ma ne ok oter nyangu, kod jogo ma lor mwalo e liel gi wich-kuot.

31 “‘Farao biro neno mago duto kendo chunye noduog koparo gik moko duto mosetimore ne ogandane.+ Farao kod jolwenje duto biro tho gi ligangla,’ Jehova Wuon Loch Duto owacho.

32 “‘Ibiro yik Farao gi ogandane duto kaachiel gi jo ma ne ok oter nyangu, kendo ma ne oneg gi ligangla, nikech ka ne pod ongima ne omiyo ji obed maluor,’ Jehova Wuon Loch Duto owacho.”

33 Wach Jehova nobirona niya: 2 “Wuod dhano, wach ne jou+ kama,

“‘Ka akelo ligangla kuom piny moro,+ kendo jopinyno oyiero ng’atgi achiel mondo obednegi jarit, 3 mi jaritno oneno wasigu ka biro monjogi gi ligangla, kae to ogoyo tung’ mondo ji obed motang’,+ 4 to ng’ato owinjo kigoyo tung’ to ok odewo,+ mi wasigu obiro monege, rembe biro dong’ e wiye.+ 5 Ne owinjo kigoyo tung’ to ne ok odewo. Rembe biro dong’ e wiye. Ka di ne owinjo siemno, di ne oreso ngimane.

6 “‘Kata kamano, ka jaritno oneno wasigu ka biro monjogi gi ligangla, to ok ogoyo tung’+ mondo ji obed motang’ mi wasigu obiro monego ng’ato, ng’atno biro tho nikech richone, to anakwan rembe e wi jaritno.’+

7 “To in wuod dhano, aseketi jarit mar od Israel, kendo nyaka imigi siem moro amoro moa e dhoga.+ 8 Ka awacho ne ng’at marach ni, ‘Yaye in ng’at marach, ibiro tho!’+ to ok isieme mondo owe yorene maricho, adier, obiro tho nikech richone,+ to anakwan rembe e wiyi. 9 To ka isiemo ng’at ma timbene richo to ok oweyo yorene marichogo, obiro tho nikech richone,+ to in ibiro reso ngimani.+

10 “To in wuod dhano, wach ne Jo-Israel ni, ‘Usepenjo niya: “Ere kaka dwadhi nyime bedo mangima+ to kethowa kod richowa pek ahinya kendo gitiekowa?”’+ 11 Nyisgi kama, ‘“Mana kaka angima,” Jehova Wuon Loch Duto owacho, “Ok amor gi tho mar jaricho,+ to daher neno ka ng’at ma kamano loko yorene+ mondo obed mangima.+ Lokreuru, lokreuru uwe yoreu maricho.+ Yaye un Jo-Israel, ere gimomiyo udwaro tho?”’+

12 “To in wuod dhano, nyis jou kama, ‘Ka ng’at makare otimo richo, to timbene makare ok bi rese.+ To ka jaricho oweyo timbene maricho, richone moweyogo ok bi chwanye, nikech ne oseweyogi.+ Chieng’ ma ng’at makare otimo richo, timbene mabeyo ma osebedo kotimo ok nomi obed mangima.+ 13 Ka awacho ne ng’at makare niya: “Adier inibed mangima,” to otimo richo nikech ogeno gik makare ma osebedo kotimo,+ ok bi par kata gimoro achiel kuom gik makare ma ne otimogo, to enotho nikech richo mosetimo.+

14 “‘To ka awacho ne jaricho niya: “Adier, ibiro tho,” mi olokore moweyo richone, kendo otimo gik makare,+ 15 kae to oduoko ne jagope gik ma ne osingone,+ kendo oduoko gik ma ne omayo ji,+ mi ochako luwo chike ma kelo ngima kotimo gik makare, obiro bedo mangima.+ Ok obi tho. 16 Ok bi par richo kata achiel ma ne otimo.+ To enobed mangima nikech otimo gik makare kendo mabeyo.’+

17 “Kata kamano, jou wacho ni, ‘Yore mag Jehova ok ni kare,’ to kara gin e ma yoregi ok ni kare.

18 “Ka ng’at makare oweyo yorene makare mochako timo gik maricho, enotho nikech richone.+ 19 To ka ng’at marach olokore moweyo timbene maricho, kendo ochako timo gik makare kendo malong’o, obiro bedo mangima.+

20 “Kata kamano, usewacho ni, ‘Yore mag Jehova ok ni kare.’+ Abiro ng’ado ne ng’ato ka ng’ato bura kaluwore gi yorene, yaye un Jo-Israel.”

21 E odiechieng’ mar abich mar dwe mar apar, e higa mar 12, ka pod ne wan e tuech, ng’at moro ma ne otony koa Jerusalem ne obiro ira+ monyisa niya: “Wasigu osemonjo dalawa!”+

22 E odhiambo ma kae to kinyne ng’atno biro, lwet Jehova ne obiro kuoma mi oyawo dhoga. Omiyo, kinyne gokinyi ka ne ng’atno obiro ne oyudo ka awuoyo.+

23 Eka wach Jehova nobirona niya: 24 “Wuod dhano jo ma odak kuonde mojwang’+ wacho kama e wi piny Israel, ‘Ibrahim ne en mana ng’at achiel kende, to ne omiye pinyni duto.+ Wan to wang’eny, onge kiawa ni koro pinyni en marwa.’

25 “Kuom mano, wachnegi ni, ‘Ma e gima Jehova Wuon Loch Duto owacho: “Uchamo chiemo ma nigi remo,+ ulamo* sanambeu makwero,* kendo usiko uchuero remb ji.+ Koro, ang’o momiyo uparo ni pinyni dibed maru? 26 Ugeno ligangla magu,+ utimo timbe modwanyore, kendo ng’ato ka ng’ato oseterore gi chi wadgi.+ Koro, ang’o momiyo uparo ni pinyni dibed maru?”’+

27 “Onego iwachnegi ni, ‘Ma e gima Jehova Wuon Loch Duto owacho: “Mana kaka angima, jo ma odak kuonde mojwang’ biro tho gi ligangla; ondiegi biro chamo jo ma odak e pap; to tuoche biro nego jo ma odak kuonde mochiel motegno kod e rogni.+ 28 Anami pinyno odong’ gunda,+ kendo teko ma osungorego biro rumo, kendo gode mag Israel ibiro jwang’+ mi onge ng’at ma biro kadho kuondego. 29 Gining’e ni an Jehova chieng’ ma abiro miyo pinyni odong’ gunda,+ nikech timbegi duto maricho.”’+

30 “To in wuod dhano, jou goyo mbaka kuomi e tok chiel kendo e dho utegi.+ Ng’ato ka ng’ato wacho ne nyawadgi ni, ‘Wadhi wawinj ane wach moa kuom Jehova.’ 31 Gibiro chokore e nyimi mana kaka joga; kendo gibiro winjo weche ma inyisogi to ok ginitimgi.+ Nimar gibiro wuondi gi dhogi to chunygi ohero ohala mag mibadhi. 32 Ne! Ichalonegi mana ka wend kisera miwero gi dwol mamit, kendo mitugo gi gir thum ma nigi tonde migwelo. Gibiro winjo wecheni to onge kata ng’at achiel ma biro timogi. 33 To ka wachni otimore, ee nikech nyaka otimre, gining’e ni adier janabi ne nie kindgi.”+

34 Wach Jehova nobirona kendo niya: 2 Wuod dhano, kor wach kuom gima biro timore ne jokwath mag Israel. Kor wach kiwachonegi kama, ‘Ma e gima Jehova Wuon Loch Duto owacho: “Yaye, unune malit, un jokwath mag Israel+ ma pidhore giwegi! Donge onego jokwath opidh rombe, koso?+ 3 Uchamo mana boche, urwakoru gi lewni molos gi yie rombe, kendo uyang’o chiaye machwe,+ to ok upidh rombe.+ 4 Pok utego rombe ma yom yom, kata thiedho ma tuo, kata tueyo ma otur, kata duoko ma orwenyo, kata manyo molal;+ kar mano uselocho e wigi gi gero kendo usandogi.+ 5 Omiyo ne gike nikech ne onge jakwath;+ giseke mi ondiegi ochamogi. 6 Rombena ne bayo abaya e wi gode madongo kod matindo duto; rombena ne oke kuonde duto e piny, ne onge ng’at ma manyogi kata temo chokogi.

7 “‘“Omiyo, un jokwath winjuru wach Jehova: 8 ‘“Mana kaka angima” Jehova Wuon Loch Duto owacho, “nikech ondiegi osemonjo rombena mi gichamogi nikech ne gionge jakwath, nimar jokwadha ne ok omanyo rombena, to ne gipidhore giwegi kar pidho rombena,”’ 9 kuom mano, un jokwath, winjuru gima Jehova owacho. 10 Ma e gima Jehova Wuon Loch Duto owacho: Asin gi jokwath. Abiro penjogi wach rombena,* bende abiro riembogi mondo kik gichak gipidh rombena.+ Gin giwegi ok ginipidhre, kendo abiro golo rombena e dhogi mi ok ginichak gichamgi kendo.’”

11 “‘Ma e gima Jehova Wuon Loch Duto owacho: “An awuon e ma abiro manyo rombena kendo anaritgi.+ 12 Mana kaka jakwath pidho rombene ma yande olal, e kaka abiro ritogi.+ Abiro gologi kuonde duto ma ne gikeree chieng’ ma polo nodudi kendo piny notim mudho.+ 13 Abiro gologi e ogendni mamoko mi anaduokgi e pinygi. Anakwagi e gode mag Israel,+ e bath aoche, kod kuonde duto ma ji odakie. 14 Anakwagi e pewe mabeyo, kendo e gode madongo mag Israel.+ Gininind ka ma nitie lum mang’ich,+ kendo ginikwa e lege moloth maber e gode mag Israel.”

15 “‘“An awuon anakwa rombena,+ an awuon anayudnegi ka ma giyueyoe,”+ Jehova Wuon Loch Duto owacho. 16 “Anamany rombo molal,+ anaduok ma orwenyo, anatue motur gi law, kendo anateg ma yom yom; to abiro tieko rombo machwe kod motegno. Anapidhe gi kum mana kaka dapidhe gi chiemo.”

17 “‘To un rombena, ma e gima Jehova Wuon Loch Duto owacho: “Achiegni ng’ado ne rombo ka rombo bura, kendo ne yimbe gi nyuogi.+ 18 Uparo ni en wach matin sa ma ukwayo e lege mabeyo? To be nyaka unyon lege modong’ gi tiendeu? Ang’o momiyo uduwo pi maliw gi tiendeu bang’ ka usemodho? 19 Ang’o momiyo umiyo rombena lum ma usenyono kod pi ma useduwo gi tiendeu?”

20 “‘Omiyo, ma e gima Jehova Wuon Loch Duto wachonegi: “An awuon abiro ng’ado bura e kind rombo machwe kod rombo modhero, 21 nikech udhirogi gi bathu kod goku, kendo udhiro chiaye matuo gi tungeu nyaka chop gikere e pinje man mabor. 22 Abiro reso rombena, kendo onge gima biro lawogi;+ abiro ng’ado ne rombo ka rombo bura. 23 Abiro chungonegi jakwath achiel,+ jatichna Daudi+ mondo e ma opidhgi. En e ma obiro ritogi kendo obiro kwayogi.+ 24 An Jehova anabed Nyasachgi,+ to jatichna Daudi nobednegi jaduong’ ma telonegi.+ An Jehova e ma asewacho.

25 “‘“Anatim kodgi singruok mar kuwe,+ anagol ondiegi duto e piny,+ mondo gidag gi kuwe e thim, kendo ginind aninda e bunge.+ 26 Abiro miyo gibed gueth, gin kaachiel gi ka ma okiewo gi goda,+ anakel koth kinde mowinjore. Gueth biro chuenegi mana ka koth.+ 27 Yien manie piny nonyag olemo, kendo piny nochieg maber,+ mi ginidag gi kuwe e piny. Gining’e ni an Jehova ka aturo jok ma notuenegi,+ kendo resogi e lwet jo ma nolokogi wasumbni. 28 Ogendni mamoko ok nochak omonjgi, kendo ondiegi ok nochak ochamgi, ginidag gi kuwe ma onge ng’at ma bwogogi.+

29 “‘“Analosnegi puodho moro ma biro miyo nyinggi olandre, kech ok noneggi kendo e piny,+ kendo ogendni ok nochak ochagi.+ 30 ‘Eka gining’e ni an Jehova, an e Nyasachgi, bende ni an kodgi, kendo ni gin e joga ma Jo-Israel,’+ Jehova Wuon Loch Duto owacho.”’

31 “‘To un rombena,+ rombe ma arito maber, un mana dhano, to an e Nyasachu,’ Jehova Wuon Loch Duto owacho.”

35 Wach Jehova nobirona kendo niya: 2 “Wuod dhano chom wang’i mondo ing’i piny Seir motimo gode,+ kendo ikor gima biro timorene.+ 3 Wachne kama, ‘Ma e gima Jehova Wuon Loch Duto owacho, “Yaye piny Seir motimo gode, asin kodi, abiro rieyo bada kuomi mi akethi, kendo loki gunda.+ 4 Abiro muko miecheni madongo kendo inidong’ gunda;+ mi ining’e ni an Jehova. 5 Ne isin ahinya gi Jo-Israel,+ mi ne ichiwogi mondo oneggi gi ligangla, ka ne masira oyudogi, e kinde ma ne giyudoe kum mogik.”’+

6 “‘Kuom mano, mana kaka angima,’ Jehova Wuon Loch Duto owacho, ‘Abiro iki ne remo, kendo remo biro lawi.+ Nikech remo e ma ne isin-go, remo e ma biro lawi.+ 7 Abiro miyo piny Seir motimo gode odong’ gunda,+ kendo abiro nego ng’ato ang’ata ma dhi kata ma biro. 8 Abiro umo gode gi ringre jo motho; jo ma oneg gi ligangla biro podho e godeni, e hohni magi, kod e aocheni. 9 Abiro miyo idong’ gunda nyaka chieng’, kendo ji ok nodag e miecheni madongo;+ mi ining’e ni an Jehova.’

10 “Ne iwacho ni, ‘Ogendni ariyogi kod pinje ariyogi nobed maga, kendo wan e ma wabiro kawogi,’+ kata obedo ni Jehova owuon ne ni kanyo, 11 ‘omiyo mana kaka angima,’ Jehova Wuon Loch Duto owacho, ‘abiro timoni kaluwore gi ich-wang’ kod nyiego ma ne inyisogi;+ kendo anami jogo ong’eya e kinde ma anang’adnie bura. 12 Eka ining’e ni an Jehova, an awuon ne awinjo gik maricho duto ma ne iyanyogo gode mag Israel ka ne iwacho ni, “Osejwang’gi kendo osemiwagi mondo wachamgi ka chiemo.” 13 Ne iwuoyo kuoma marach ka isungori, kendo isewacho kuoma weche mang’eny.+ Adier, ne awinjo wecheni duto.’

14 “Ma e gima Jehova Wuon Loch Duto owacho: ‘Piny ngima biro mor ka akethi mi idong’ gunda. 15 Mana kaka ne imor ka ne iketho piny Jo-Israel miweye gunda, e kaka in bende abiro timoni.+ Ibiro kethi mi loki gunda, yaye piny Seir motimo gode, ee, piny Edom duto;+ mi gining’e ni an e Jehova.’”

36 “To in wuod dhano, kor wach e wi gode mag Israel kiwacho ni, ‘Yaye un gode mag Israel, winjuru wach Jehova. 2 Ma e gima Jehova Wuon Loch Duto owacho: “Wasigu osewuoyo marach kuomi ka giwacho ni, ‘Aha! Kata mana kuonde moting’ore machon osebedo magwa, wasekawogi!’”’+

3 “Omiyo, kor wach kiwacho ni, ‘Ma e gima Jehova Wuon Loch Duto owacho: “Nikech gisemonjou koni gi koni mi giweyou kojwang’u mondo jo ma otony e ogendni okawu, kendo nikech ji siko ka wuoyo kuomu ka giketho nyingu,+ 4 yaye gode mag Israel, winjuru gima Jehova Wuon Loch Duto wacho! Ma e gima Jehova Wuon Loch Duto owacho ne gode madongo kod matindo, ne aoche kod hohni, ne kuonde mosemuk modong’ gunda,+ kendo ne mier madongo ma jo ma ne otony e ogendni mokiewo kodgi oseyako kendo jaro;+ 5 Jehova Wuon Loch Duto wachonegi kama: “Abiro wuoyo ka an gi mirima mager+ kuom ogendni mokiewo kodgi, kod Edom duto. Ne gikawo pinya ka giyenyo kendo ne gimor ka giloke margi,+ mondo gikwa e legene kendo yake.’”’+

6 “Omiyo, kor wach e wi piny Israel, kendo iwach ne gode madongo kod matindo, ne aoche kod hohni ni, ‘Ma e gima Jehova Wuon Loch Duto owacho: “Neuru! Abiro wuoyo gi ich-wang’ kod mirima mager nikech ogendni osekuodo wiu ahinya.”’+

7 “Kuom mano, ma e gima Jehova Wuon Loch Duto owacho: ‘Asekuong’ora ka ating’o bada ni ogendni mokiewo kodu biro yudo wich-kuot.+ 8 To un gode mag Israel, bede yien man kuomu biro dongo kendo gininyag ne joga ma Jo-Israel olembe,+ nimar gichiegni duogo. 9 Nimar an kodu, abiro doknu, kendo ji biro purou mi ginichuo kodhi kuomu. 10 Abiro miyo jou omedre, ee, Jo-Israel duto, kendo ji biro dak e miechu madongo,+ mi noger kuonde duto ma ne omuk modong’ gunda.+ 11 Ee, anami jou kaachiel gi jambu omedre;+ gibiro nyuolore mi gibed mang’eny. Anami ji odag kuomu mana kaka chon,+ kendo weche biro dhinu maber moloyo kaka chon;+ mi unung’e ni an e Jehova.+ 12 Abiro miyo joga ma Jo-Israel owuoth kuomi, mi ginikawi.+ Inibed mwandugi, kendo ok inimagi nyithindgi kendo.’”+

13 “Ma e gima Jehova Wuon Loch Duto owacho: ‘Giwachoni ni, “In e piny ma chamo ji, kendo ma nego nyithinde owuon,”’ 14 ‘omiyo, koro ok inichak icham jogi, kata nego nyithindi,’ Jehova Wuon Loch Duto owacho. 15 ‘Ok anachak ayie mondo ogendni oyanyi kendo ojari.+ Bende, ok inichak imi jogi ochwanyre kendo,’ Jehova Wuon Loch Duto owacho.”

16 Wach Jehova nobirona kendo niya: 17 “Wuod dhano, ka ne Jo-Israel odak e pinygi giwegi, ne gidwanye gi timbegi kod yoregi.+ Yoregigo ne ok ler mana ka dhako ma odhi e dwe.+ 18 Omiyo, ne aolo mirimba kuomgi nikech remo ma ne gichuero e pinyno,+ kendo nikech ne ginjawo pinyno gi sanambegi makwero.*+ 19 Ne akeyogi e pinje kendo e kind ogendni.+ Ne ang’adonegi bura kaluwore gi timbegi kod yoregi. 20 To ka ne gidhi e pinjego, ji ne yanyo nyinga maler+ ka giwacho ne joga ni, ‘Magi e jo Jehova to ne oriembogi e piny ma ne omiyogi.’ 21 Omiyo, abiro kawo okang’ nikech nyinga maler ma Jo-Israel oseketho e pinje ma ne gidhiye.”+

22 “Kuom mano, nyis Jo-Israel ni, ‘Ma e gima Jehova Wuon Loch Duto owacho: “Ok atim kamano nikech un, yaye Jo-Israel, to atimo kamano nikech nyinga maler ma useketho e pinje ma ne udhiye.”’+ 23 ‘Abiro miyo nyinga ma nigi duong’+ ma ne uketho e kind ogendni kendo ma ne ocha obed maler; mi ogendni nong’e ni an e Jehova, chieng’ ma ibiro mi nyinga obed maler e nyimgi,’+ Jehova Wuon Loch Duto owacho. 24 ‘Abiro golou e kind ogendni, kendo e pinje mopogore opogore mi anaduoku e pinyu.+ 25 Abiro kironu pi maler mi unubed maler;+ abiro pwodhou kuom timbeu ma ok ler+ kendo kuom sanambeu makwero.+ 26 Abiro miyou chuny manyien,+ kendo abiro ketonu paro manyien.+ Abiro golo kuomu chuny matek ka kidi,+ kendo anamiu chuny mayom.* 27 Abiro keto roho mara e chunyu mi unuwuoth e chikena,+ kendo unurit buchena. 28 Eka unudag e piny ma ne amiyo kwereu, mi unubed joga, kendo anabed Nyasachu.’+

29 “‘Abiro golou kuom timbeu duto ma ok ler. Bende, abiro miyou cham mogundho, mi ok unuchak ubed gi kech kendo.+ 30 Abiro miyo yien onyag olemo mang’eny kendo puotheu biro nyago cham mogundho, mondo kik uchak ubed gi kech ma dikuod wiu e nyim ogendni.+ 31 Eka ubiro paro yoreu maricho kod timbeu ma ne ok beyo, kendo ubiro charu kendu, nikech kethou kod timbeu modwanyore.+ 32 To ng’euru wachni: Ok atim kamano nikech un,’+ Jehova Wuon Loch Duto owacho. ‘Kar mano, wiu onego okuodi nikech timbeu, yaye un Jo-Israel.’

33 “Ma e gima Jehova Wuon Loch Duto owacho: ‘E odiechieng’ ma abiro pwodhi kuom kethoni, anami ji odag e miechi,+ kendo giniger kuonde ma ne okethore.+ 34 Piny ma yande ji neno kojwang’ ibiro pur kendo. 35 Ji biro wacho niya: “Piny ma yande ojwang’ sani koro chalo gi puoth Eden,+ kendo mier ma yande omuk mi ojwang’ sani koro ochiel motegno kendo ji odakie.”+ 36 Ogendni ma biro dong’ ka okiewo kodu biro ng’eyo ni an Jehova asegero ka ma ne omuki, kendo asepuro piny ma yande ojwang’. An Jehova asewacho mano, kendo asetime.’+

37 “Ma e gima Jehova Wuon Loch Duto owacho: ‘Abiro yie gi kwayo ma Jo-Israel kwayago, mi anami gibed mang’eny ka kueth. 38 Kaka kueth maler, kaka kueth man Jerusalem* kinde sawo,+ mier madongo ma ne okethore biro pong’ gi ji;+ mi gining’e ni an e Jehova.’”

37 Lwet Jehova nobiro kuoma, mi Jehova noting’a gi rohone motera nyaka e chuny hoho moro+ ma ne opong’ gi choke. 2 Ne ochika mondo akadh e dier chokego, mi naneno choke mang’eny kendo motwo ahinya e hohono.+ 3 Eka ne openja niya: “Wuod dhano, be chokegi dibed mangima kendo?” Ne adwoke kama: “A Jehova Wuon Loch Duto, in kendi e ma ding’e wachno.”+ 4 To nowachona niya: “Kor wach e wi chokegi, kendo inyisgi ni, ‘Un choke motwo, winjuru wach Jehova:

5 “‘Ma e gima Jehova Wuon Loch Duto wacho ne chokegi: “Abiro miyo muya odonj kuomu mi unubed mangima kendo.+ 6 Abiro keto leche kod ring’o kuomu, anaumu gi pien del, kendo anamiu muya mi unubed mangima; kendo unung’e ni an e Jehova.”’”

7 Eka ne akoro wach mana kaka ne osechika. To ka ne akoro, ne awinjo koko mar gik ma riadore, kae to chokego ne ochako makore. 8 Eka naneno ka leche gi ring’o kod pien ochako umogi. To pod ne gionge gi muya.

9 Ne owachona niya: “Kor wach ne yamo. Yaye wuod dhano kor wach ne yamo kiwacho ni, ‘Ma e gima Jehova Wuon Loch Duto owacho: “Yaye in yamo,* bi kiwuok e tunge ang’wen mag piny, kendo ikuthi e wi jo ma ne oneggi mondo gibed mangima.”’”

10 Omiyo, ne akoro wach mana kaka ne ochika, kendo muya* ne odonjo kuomgi mi gibedo mangima, kae to ne gichung’ gi tiendegi.+ Ne gin oganda maduong’ ahinya.

11 Eka ne owachona niya: “Wuod dhano, chokegi gin oganda Israel duto.+ Winjie gima giwacho, ‘Chokewa otwo, genowa oselal nono.+ Oseng’ad karwa oko chuth.’ 12 Kuom mano, kornegi wach ni, ‘Ma e gima Jehova Wuon Loch Duto owacho: “Yaye un joga, abiro elo lieteu+ mi agolu oko, kendo anakelu e piny Israel.+ 13 Kendo unung’e ni an e Jehova ka aseelo lieteu mi agolou oko, yaye un joga.”’+ 14 ‘Anaket rohona kuomu mi unubed mangima,+ anami udag e pinyu uwegi; eka unung’e ni an Jehova asewacho mano kendo asetime,’ Jehova owacho.”

15 Wach Jehova nobirona kendo niya: 16 “To in wuod dhano, kaw luth achiel mondo indikie ni, ‘Ma en mar Juda kod Jo-Israel man kode.’+ Kendo ikaw luth machielo mondo indikie ni, ‘Ma en mar Josef, ludh Efraim, kod Jo-Israel duto man kode.’+ 17 Kae to iriw ludhe ariyogo e lweti mondo gibed luth achiel e lweti.+ 18 To ka jou okwayi ni, ‘Nyiswae tiend wechego.’ 19 Ininyisgi kama, ‘Ma e gima Jehova Wuon Loch Duto owacho: “Abiro kawo ludh Josef manie lwet Efraim, kaachiel gi dhoudi mag Israel man kode kendo anariwgi gi ludh Juda;+ mi ginibed luth achiel e lweta.”’ 20 Onego iting’ ludhe ma ibiro ndikoego e lweti mondo gine.

21 “Eka iniwachnegi kama, ‘Ma e gima Jehova Wuon Loch Duto owacho: “Anagol Jo-Israel e pinje ma ne gidhiye, abiro chokogi kuonde duto ma gintie mi aduokgi e pinygi.+ 22 Anami gibed oganda achiel e piny,+ e gode mag Israel, kendo ruoth achiel biro locho e wigi.+ Ok ginichak gibed ogendni ariyo kendo. Bende, ok nopoggi kendo e pinjeruodhi ariyo.+ 23 Ok ginichak gichidre gi sanambegi makwero,* gi timbegi maricho, kod richogi.+ Abiro gologi e timbegi maricho ma ne gindhogago, mi anapwodhgi. Ginibed joga, kendo anabed Nyasachgi.+

24 “‘“Daudi jatichna e ma nobed ruodhgi,+ kendo ginibed gi jakwath achiel.+ Gibiro wuotho e buchena kendo mako chikena gadier.+ 25 Gibiro dak e piny ma ne amiyo jatichna Jakobo. En e piny ma kweregi ne odakie,+ kendo ginidag kuno gi nyithindgi kaachiel gi nyikwagi nyaka chieng’.+ To Daudi jatichna nobed jatendgi nyaka chieng’.+

26 “‘“Anatim kodgi singruok mar kuwe;+ enobed singruok mosiko. Abiro miyo gigurre motegno mi ginimedre,+ kendo anaket kara maler e diergi. 27 Hemba* nobed kodgi, kendo anabed Nyasachgi, mi ginibed joga.+ 28 Eka ogendni biro ng’eyo ni an Jehova, asepwodho Jo-Israel, e kinde ma kara maler nobed e diergi nyaka chieng’.”’”+

38 Wach Jehova nobirona kendo niya: 2 “Wuod dhano, chom wang’i mondo ing’i Gog mar piny Magog,+ ruodh* Meshek gi Tubal,+ kendo ikor gima biro timorene.+ 3 Wachne kama, ‘Ma e gima Jehova Wuon Loch Duto owacho: In Gog, ruodh* Meshek gi Tubal, asin kodi. 4 Abiro loki kendo keto ramaki e dhogi,+ mi aywayi oko kaachiel gi ogandani duto mar lweny,+ farese kod joidh farese morwakore gi lewni mabeyo, oganda maduong’ ma nigi okumbni madongo kod matindo,* kendo moro ka moro kuomgi nigi liganglane; 5 Persia, Ethiopia, kod Put+ ni kodgi, giduto gin gi okumbni matindo kod ogute lweny; 6 Gomer kod jolwenje duto, Jo-Togarma+ moa ka mabor yo nyandwat, kaachiel gi jolwenje duto. Ji mang’eny ni kodi.+

7 “‘“Ikreuru, ikreuru maber, in kaachiel gi ogandani mar lweny, kendo in e ma ibiro telonegi.*

8 “‘“Bang’ ndalo mathoth ibiro luongi. E giko hignigo, ibiro monjo piny ma yande ligangla oketho to koro oselose. Jo ma odak e pinyno ne ogol e kind pinje mang’eny, mokelgi e gode mag Israel ma yande ojwang’. Jo ma odak e pinyno ne ogol e kind ogendni kendo koro gidak gi kuwe.+ 9 In kod jolwenji kaachiel gi ogendni man kodi, ubiro monjo pinyno mana ka yamb ahiti, kendo ubiro ime mana ka boche polo.”’

10 “Ma e gima Jehova Wuon Loch Duto owacho: ‘Chieng’no, ibiro paro weche maricho kendo ibiro chano wach moro marach. 11 Ibiro wacho kama: “Abiro monjo piny ma ok ochiel gi ohinga+ kendo ma ji odakie gi kuwe. En piny ma ok ochiel gi ohinga, ma onge dho rangeye, kata sirni.” 12 Ibiro chano yako kendo peyo mwandugi. Ibiro monjo kuonde ma ne okethore chon to tinde ji odakie.+ Gin jo ma ne osechok ka igologi e ogendni mamoko,+ kendo sani gin gi mwandu mang’eny.+ Gidak e chuny piny.

13 “‘Jo-Sheba+ kod Jo-Dedan,+ jolok ohelni mag Tarshish+ kod jolwenjgi* duto biro penji niya: “Imonjo piny mondo iyak mwandu mathoth, koso? Isechoko ogandani mar lweny mondo iyak fedha gi dhahabu, kaachiel gi mwandugi kod gigegi mang’eny, koso?”’

14 “Omiyo, wuod dhano, kor wach kendo iwach ne Gog ni, ‘Ma e gima Jehova Wuon Loch Duto owacho: “Chieng’ ma joga ma Jo-Israel nodag gi kuwe, donge ibiro ng’eyo mano?+ 15 Inibi kia ka ma idakie, e piny mabor man yo nyandwat,+ in kaachiel gi ji mang’eny. Unubi kaka oganda maduong’ mar jolweny moidho farese.+ 16 Unumonj joga Israel mana ka boche moimo piny. Yaye in Gog, e giko mar ndalo, anakeli mondo imonj pinya,+ mondo ogendni ong’eya sa ma apwodhora kokalo kuomi e nyimgi.”’+

17 “Ma e gima Jehova Wuon Loch Duto owacho: ‘Donge in e jal ma ne akoro wachne ka atiyo gi jotichna ma jonabi mag Israel, ma ne okoro kuom higni mang’eny ni ibiro keli mondo imonjgi?’

18 “‘Chieng’no ka Gog obiro monjo piny Israel,’ Jehova Wuon Loch Duto owacho, ‘mirima mager nomaka.+ 19 Abiro wuoyo ka an gi mirima mager ka mach; kendo chieng’no piny biro yiengni matek e Israel. 20 Rech manie nam, winy ma fuyo e kor polo, le mag bungu, le mamol e lowo, kod dhano duto modak e piny biro tetni nikech an. Gode biro mukore,+ kuonde moting’ore malo biro ruombore, kendo ohinga duto biro podho piny.’

21 “‘Abiro luongone ligangla kowuok e godena duto,’ Jehova Wuon Loch Duto owacho. ‘Ng’ato ka ng’ato noked gi owadgi gi ligangla.+ 22 Abiro kume kaachiel gi jolwenje, kod ji duto ma en-go.+ Anakelnegi tuoche,+ nek, koth mang’ongo gi pe,+ gi mach,+ kod salfa.*+ 23 Abiro miyora duong’, abiro pwodhora, kendo anami ji ong’eya e nyim ogendni mang’eny; mi gining’e ni an e Jehova.’

39 “To in wuod dhano, kor gima biro timore ne Gog+ kendo iwachne ni, ‘Ma e gima Jehova Wuon Loch Duto owacho: “In Gog ruodh* Meshek gi Tubal,+ asin kodi. 2 Abiro loki mondo ibi kia piny mabor man yo nyandwat.+ Anakeli e gode mag Israel. 3 Abiro goyo atung’ man e lweti ma koracham, kendo abiro miyo aserni manie lweti ma korachwich olwar. 4 Ibiro lwar e gode mag Israel,+ in kod jolwenji, kaachiel gi ji duto man kodi. Anami kit winy duto kod ondiegi ocham ringreu.”’+

5 “‘Ibiro podho e pap,+ nimar an e ma asewacho mano,’ Jehova Wuon Loch Duto owacho.

6 “‘Abiro oro mach mondo owang’ Magog kaachiel gi ji duto modak gi kuwe e chulni,+ mi gining’e ni an e Jehova. 7 Anami joga ma Jo-Israel ong’e nyinga maler, ok anayie mondo oketh nyinga malerno kendo; mi ogendni biro ng’eyo ni an e Jehova,+ Ng’at Maler mar Israel.’+

8 “‘Adier, wachno biro, kendo nyaka otimre,’ Jehova Wuon Loch Duto owacho. ‘Ma e odiechieng’ ma ne awacho. 9 Jo ma odak e mier mag Israel nowuog oko, kendo ginimok mach gi gige lweny kaka okumbni matindo* kod madongo, atunge kod aserni, ludhe kod tonge. Ginimok mach gi gigo+ kuom higni abiriyo. 10 Ok ginimot e bungu kata e pap kendo, nikech gibiro tiyo gi gige lwenygo e moko mach.’

“‘Gibiro yako jo ma ne yakogi, kendo peyo jo ma ne peyogi,’ Jehova Wuon Loch Duto owacho.

11 “‘E ndalono abiro miyo Gog+ kar yiko e piny Israel, e hoho mar jowuoth man yo wuok chieng’ mar nam, kendo obiro dino yorno. Kanyo e ma gibiro yikoe Gog kod ogandane duto, mi ginichake ni Hoho mar Hamon-Gog.*+ 12 Jo-Israel biro yikogi kuom dweche abiriyo mondo gipwodh pinyno.+ 13 Ji duto manie pinyno biro yikogi, kendo mano biro kelonegi huma chieng’ ma abiro yudoe duong’,’+ Jehova Wuon Loch Duto owacho.

14 “‘Ji biro kalo e pinyno nyadinwoya ka gimanyo ringre ji, mondo giyikgi kendo gimi piny obed maler. Gibiro dhi nyime timo mano kuom dweche abiriyo. 15 Ka jo ma kalo e pinyno oneno chok dhano, gibiro keto ranyisi e bathe. Eka jo ma yiko biro yiko chogono e Hoho mar Hamon-Gog.+ 16 Bende, dala moro miluongo ni Hamona* nobed kanyo. Kamano, gibiro pwodho piny.’+

17 “To in wuod dhano, ma e gima Jehova Wuon Loch Duto owacho: ‘Nyis kit winy duto, kod le mag bungu duto ni, “Chokreuru kanyachiel mondo ubi. Chokreuru but misango ma aikonu, misango maduong’ e gode mag Israel.+ Ubiro chamo ring’o kendo ubiro madho remo.+ 18 Ubiro chamo ring jo ma thuondi, kendo madho remb jodongo mag piny—yimbe, rombe, diek, kod ruedhi—jamni duto machwe mag Bashan. 19 Ubiro chamo bor kendo madho remo mi umer nikech misango ma aseikonu.”’

20 “‘E mesana ubiro chamo farese, kod joidh farese, jo ma thuondi kod jolweny duto,’+ Jehova Wuon Loch Duto owacho.

21 “‘Ogendni biro neno duong’na, kendo giduto gibiro neno bura ma aseng’ado, kaachiel gi lweta ma aserieyo kuomgi.+ 22 Chakre chieng’no Jo-Israel biro ng’eyo ni an e Jehova Nyasachgi. 23 Ogendni biro ng’eyo ni Jo-Israel ne oter e tuech mana nikech richogi, kendo nikech ne gidagi winja.+ Omiyo, ne apandonegi wang’a+ mi achiwogi e lwet wasikgi,+ kendo giduto ne githo gi ligangla. 24 Ne atimonegi kamano nikech timbegi mochido kod richogi, kendo ne apandonegi wang’a.’

25 “Kuom mano, ma e gima Jehova Wuon Loch Duto owacho: ‘Abiro duoko jo Jakobo+ ma ne oter e tuech, kendo anakech Jo-Israel duto.+ Abiro kedo matek ne nyinga maler.+ 26 Bang’ ka giseyudo wich-kuot nikech gik maricho ma ne gitimona,+ gibiro dak gi kuwe e pinygi, kendo onge ng’at ma biro bwogogi.+ 27 Ka agologi e pinje wasikgi kendo duokogi e pinygi,+ abiro miyo ogendni mang’eny ong’e ni an Nyasaye maler.’+

28 “‘Gibiro ng’eyo ni an Jehova Nyasachgi ka aterogi e tuech e kind ogendni mamoko, kendo duokogi e pinygi ma ok aweyo kata ng’at achiel e pinjego.+ 29 Ok anapandnegi wang’a kendo,+ nimar abiro olo ne Jo-Israel rohona,’+ Jehova Wuon Loch Duto owacho.”

40 E chak higa mar 25 nyaka ne terwa e tuech,+ e odiechieng’ mar apar mar dwe, lwet Jehova nobiro kuoma motera e dala mar Jerusalem.+ Mano ne en higa mar 14 nyaka ne dalano opodhi.+ 2 Fweny mar Nyasaye notera nyaka e piny Israel moketa e wi got mabor ahinya.+ E wi godno ne nitie gima chalo gi dala moro yo milambo.

3 Ka nosetera kuno, ne aneno kit dhano moro ma ne chalo gi mula.+ Ne en gi tond tworo kod odundu mipimogo* e lwete,+ kendo ne ochung’ e dho rangach. 4 Ng’atno ne owachona niya: “Wuod dhano ne gi wang’i, ichik iti malong’o, kendo iket chunyi kuom weche duto ma abiro nyisi, nikech mano e momiyo ne okeli kae. Bang’e, ininyis Jo-Israel weche duto mibiro neno.”+

5 Ne aneno ohinga molworo hekalu.* Ng’atno ne oting’o odundu mipimogo ma borne ne en bede auchiel (ne omed lith lwedo ang’wen e bat ka bat).* Ne ochako pimo ohingano, kendo lachne ne en odundu achiel, to borne bende ne en odundu achiel.

6 Eka ng’atno ne odhi e dho rangach momanyo yo wuok chieng’+ mi oidho raidhi ma ne ni kanyo. Ne opimo dho rangach mi oyudo ni lachne ne en odundu achiel, kendo dho rangach komachielo lachne bende ne en mana kamano. 7 Kendo bor mar udi mag jorit ne en odundu achiel, to lachgi bende ne en kamano. Ne nitie bede abich e kind udigo.+ Dho rangach ma ne ni but agola kendo ma ne omanyore gi hekalu ne en odundu achiel.

8 Ne opimo agolano gi iye, mi oyudo ni en odundu achiel. 9 Eka ne opimo agola mar dho rangach moyudo ni en bede aboro; ne opimo sirnige mi oyudo ni gin bede ariyo; to agola mar dho rangano ne omanyore gi hekalu.

10 Ne nitie udi adek mag jorit koni gi koni e dho rangach man yo wuok chieng’. Giduto ne giromre, kendo sirni ma ne ni koni gi koni ne romre duto.

11 Eka ne opimo lach dho rangano mi ne oyudo ni ne en bede 10, to borne ne en bede 13.

12 E nyim od rito ka od rito ne nitie ohinga machiek ma borne ka dhi malo ne romo bat achiel. Ute joritgo ne gin bede auchiel koni gi koni.

13 Bang’e, ne opimo lach mar dho rangach chakre e tat od jarit* achiel nyaka e tat ot od jarit machielo, moyudo ni en bede 25. Dho udi mag od ritogo ne omanyore.+ 14 Eka ne opimo sirni ma ne ni bathe koni gi koni, kendo borgi ne en bede 60, ne opimo bende sirni ma ne olworo rangeye duto mag laru. 15 Chakre dho rangach nyaka e dho agola ne en bede 50.

16 Udi mag rit kod sirni ma ne ni koni gi koni, ne nigi dirise malach gi iye to diny gi oko.+ Agolni ma iye bende ne nigi dirise koni gi koni, kendo ne ogor yiend othidhe+ e sirni mane ni bathe koni gi koni.

17 Ng’atno ne okawa motera nyaka e laru ma oko, kuno ne aneno ute chiemo+ kod yo molos gi kite kolworo laruno. Ne nitie udi michiemee 30 e wang’ yorno. 18 Lach mar yorno ne romre gi lach mar dho rangeye. Mano ne en yo ma mwalo.

19 Eka ne opimo lach mar nyim dho rangach ma mwalo nyaka e dho rangach mar laru ma iye. Ne en bede 100 yo wuok chieng’ gi yo nyandwat.

20 Laru ma oko ne nigi rangach mochomo nyandwat, kendo ne opimo borne kod lachne. 21 Ne nitie ute adek mag jorit koni gi koni. Sirnige ma ne ni bathe koni gi koni kod agola, ne romre gi dho rangach mokwongo. Borgi ne en bede 50 to lachgi ne en bede 25. 22 Dirisene, agolane, kod gik mogor ka yiend othith+ ne romre gi ma ne ni e dho rangach ma yo wuok chieng’. Mondo ji ochop e dho rangano ne nyaka giidh raidhi ma nigi kuonde minyono abiriyo, kendo agolane ne nie nyimgi.

23 Ne nitie dho rangach e laru ma iye ma ne omanyore gi dho rangach ma ne ni yo nyandwat, kod ma ne ni yo wuok chieng’. Ne opimo bor koa dho rangach achiel nyaka e machielo moyudo ni en bede 100.

24 Bang’e, ne otera yo milambo, mi ne aneno dho rangach ma ne ni yo milambo.+ Ne opimo sirnige gi agolane mi oyudo ni girom gi mamokoka. 25 Ne en gi dirise koni gi koni kod ei agolane mana kaka dirise mamokoka. Borne ne en bede 50 to lachne ne en bede 25. 26 Ne nitie raidhi ma nigi kuonde minyono abiriyo,+ kendo agolane ne nie nyimgi. Ne ogor yiend othith e sirnige achiel koni, to achiel komachielo.

27 Laru ma iye ne nigi dho rangach momanyo yo milambo; ne opimo dho rangach achiel nyaka e machielo, moyudo ni en bede 100. 28 Kae to ng’atno ne okadho koda e dho rangach ma yo milambo motera e laru ma iye; ne opimo rangano mi oyudo ni en bende ne oromre gi mamokoka. 29 Utene mag rit, sirnige, kod agolane ne romre gi mamokoka. Ne en gi dirise koni gi koni kod ei agolane mana kaka dirise mamokoka. Borne ne en bede 50 to lachne ne en bede 25.+ 30 Ne nitie agolni e dho rangeyego duto. Borgi ne en bede 25 to lachgi ne en bede 5. 31 Agolane ne omanyore gi laru ma oko. Ne ogor yiend othith e sirnige,+ kendo ne en gi raidhi ma nigi kuonde minyono aboro.+

32 Ng’atno ne ogola yo wuok chieng’ mokela nyaka e laru ma iye. Ne opimo dho rangano mi oyudo ni en bende ne oromre gi mamokoka. 33 Utene mag rit, sirnige, kod agolane ne romre gi mamokoka. Ne en gi dirise koni gi koni kod ei agolane mana kaka dirise mamokoka. Borne ne en bede 50 to lachne ne en bede 25. 34 Agolane ne omanyore gi laru ma oko. Ne ogor yiend othith e sirnige koni gi koni, kendo ne en gi raidhi ma nigi kuonde minyono aboro.

35 Ng’atno ne otera e dho rangach man yo nyandwat+ mopime; en bende ne oromre gi mamokoka. 36 Utene mag rit, sirnige, kod agolane ne romre gi mamokoka. Ne en gi dirise koni gi koni kod ei agolane mana kaka dirise mamokoka. Borne ne en bede 50 to lachne ne en bede 25. 37 Sirnige ne omanyore gi laru ma oko. Ne ogor yiend othith e sirnige koni gi koni, kendo ne en gi raidhi ma nigi kuonde minyono aboro.

38 E but sirni mag dho rangeye ne nitie od chiemo moro ma ne nigi dhoode. Kanyo e ma ne ilwokoe misengni miwang’o pep.+

39 Ne nitie mesni ang’wen, ariyo konchiel to ariyo bathe komachielo e agola man but dho rangach, kendo kanyo e ma ne iyang’oe jamni mitimogo misengni miwang’o pep,+ kod misengni mag richo,+ kaachiel gi misengni mag ketho.+ 40 To e yo mochomo rangach ma yo nyandwat, ne nitie mesni ariyo ka ma idonjogo. Bende, ne nitie mesni ariyo e bathe komachielo mar agola ka ma idonjogo. 41 Kamano, ne nitie mesni ang’wen ang’wen e dho rangach koni gi koni ma ne iyang’oe jamni. Giduto ne gin mesni aboro. 42 Mesni ang’wen ma ne iyang’oe misengni miwang’o pep ne olos gi kite mopa. Borgi ma ariwa kod lachgi ne en bat achiel gi nus, to borgi ka dhi malo ne en bat achiel. Mesnigo e ma ne iketoe gik moko duto ma ne itiyogo e yang’o jamni mitimogo misango miwang’o, kod misengni mamoko. 43 Kabede matindo tindo ma lachgi ne en lith lwedo ang’wen ne ogur e kor udi ma iye. Ring’o ma ne itimogo misango ne iketo e mesnigo.

44 Gi oko mar rangach ma iye ne nitie ute chiemo mag jower;+ ne gin e laru ma iye but rangach ma yo nyandwat kendo ne gichomo yo milambo. Od chiemo machielo ne nitie but rangach man yo wuok chieng’, kendo ne ochomo yo nyandwat.

45 Ng’atno ne owachona niya: “Od chiemo momanyo yo milambono en mar jodolo ma tiyo e hekalu.+ 46 To od chiemo mochomo yo nyandwat en mar jodolo ma tiyo e kendo mar misango.+ Gin Jo-Lawi ma yawuot Zadok,+ kendo gin e ma oyienegi dhi e nyim Jehova mondo gitine.”+

47 Eka ne opimo laru ma iye, lachne kod borne ne en bede 100 koni gi koni. Kendo mar misango ne nie nyim hekalu.

48 Ng’atno ne otera nyaka e agola mar hekalu,+ mi opimo sirni mag agolano kendo ne gin bede abich konchiel to abich komachielo. Lach mar dho rangach ne en bede adek konchiel to adek komachielo.

49 Bor mar agola ne en bede 20, to lachne ne en bede 11.* Ji ne idho raidhi mondo gichop e agolano. Ne nitie sirni, achiel koni to achiel komachielo.+

41 Eka ng’atno ne okela e ka maler mar hekalu,* mi ne opimo sirnige; lachgi ne en bede* auchiel konchiel kod bede auchiel komachielo. 2 Lach ka ma idonjogo ne en bede apar, kendo bethe ka ma idonjogono ne en bede abich konchiel kod bede abich komachielo. Ne opimo borne moyudo ni en bede 40 to lachne bede 20.

3 Eka ne odonjo iye* mi ne opimo sirni mar ka ma idonjogo, mi oyudo ni kore ne en bede ariyo, kendo lach mar ka ma idonjogo ne en bede auchiel, to lach mar kor ot ma kanyo ne en bede abiriyo. 4 Kae to ne opimo ot mochomore gi ka maler, kendo borne gi lachne ne bede 20 koni gi koni.+ Eka ne owachona niya: “Ma e Ka Maler Moloyo.”+

5 Eka ne opimo ohinga mar hekalu, lachne ne en bede auchiel. Lach mar ot ka ot ma ne olworo hekalu ne en bede ang’wen.+ 6 Udigo ne gin gorofe adek, to gorofa ka gorofa ne nigi udi 30. Ne nitie gik ma nolos kolworo ohinga mar hekalu ma ne siro udigo, kendo gigo ne olos e yo ma ok gipow ohinga mar hekalu.+ 7 E bath hekalu koni gi koni ne nitie raidhi* moro ma ne dhi e ute ma malo.+ Ute ma ne nie gorofa mar ariyo ne lach moloyo mag gorofa mokwongo, kendo mag gorofa mar adek ne lach moloyo mag gorofa mar ariyo. Ng’ato ne nyalo kadho ute manie gorofa mar ariyo kodhi e gorofa mar adek.

8 Ne aneno ndiri moro molworo hekaluno duto, kendo bor mar mise mag udigo ne en odundu achiel mar bede auchiel. 9 Lach mar kor udigo gi oko ne en bede abich. Ne nitie kamoro ma ne owe thuolo* e bath udi ma ne nie hekalu.

10 E kind hekalu kod ute chiemo+ ne nitie thuolo ma romo bede 20 koni gi koni. 11 Ne nitie dhoot moro midonjogo e udi man yo nyandwat mar hekalu kod machielo midonjogo e udi man yo milambo. Lach mar ka ma ne owe thuolocha ne en bede abich.

12 Ne nitie ot moro yo podho chieng’ ma ne omanyore gi ka ma ne owe thuolono. Lachne ne en bede 70 kendo borne ne en bede 90; to lach mar kor odno ne en bede abich koni gi koni.

13 Ne opimo hekalu moyudo ni borne en bede 100. Ka ma ne owe thuolocha, kor odno,* gi odno duto bende ne gin bede 100. 14 Lach dho hekalu kochomo yo wuok chieng’ kod ka ma ne owe thuolo ne en bede 100.

15 Ne opimo bor mar ot ma nochomore gi ka ma nowe thuolono gi yo ka toke, kaachiel gi varanda ma ne ni bathe koni gi koni moyudo ni en bede 100.

Bende, ne opimo ka maler, ka maler moloyo,+ agolni mag laru, 16 dho udi, dirise malach gi iye to diny gi oko,+ kaachiel gi varanda ma ne ni kuonde adekgo. E but dhoot ne nitie frembe mag bao+ kochakore piny nyaka e dirise, kendo dirisego ne oum. 17 Ne opim wi ka ma idonjogo, i hekalu, oko mar hekalu, kaachiel gi kor ot duto. 18 Iye ne ogorie jokerubi+ kod yiend othidhe.+ Yiend othith ne nie kind kerubi gi kerubi kendo jokerubigo duto ne nigi lela wenge ariyo. 19 Lela wang’ dhano ne omanyore gi yiend othith konchiel, to lela wang’ sibuor ne omanyore gi yiend othith komachielo.+ Ne ogorgi kamano e kor ot mar hekalu duto. 20 Yiend othidhe kod jokerubigo ne ogor kochakre e dier ot, nyaka e wi ka ma idonjogo e ka maler.

21 Bor kod lach mar sirni mag dhood* ka maler ne romre koni gi koni.+ E nyim ka maler* ne nitie gimoro ma chalo gi 22 kendo mar misango molos gi bao,+ borne kodhi malo ne en bede adek, to borne ariwa ne en bede ariyo. Ne en gi sirni e kondene, to bwoye kod kore ne olos gi bao. Eka ng’atno ne owachona niya: “Ma e mesa manie nyim Jehova.”+

23 Hekalu kod ka maler ne nigi dhoudi ariyo ariyo.+ 24 Dhoudigo ne yawore gi e diergi, kendo ne gibanore diriyo. 25 Ne nitie yiend othidhe kod kido mag jokerubi ma ne ogor e dhoudi mag ka maler, mana kaka ne ogor kor udi.+ E nyim agola ne nitiere tado molos gi bao. 26 Ne nitie bende dirise malach gi iye to diny gi oko+ kod yiend othidhe mogor koni gi koni e agola, kod e i udi ma ne olworo hekalu, kaachiel gi tado.

42 Eka notera e laru ma oko yo nyandwat.+ Ne otera e ot moting’o udi michiemee ma ne ni but ka ma owe thuolo,+ yo nyandwat mar ot.+ 2 Borne kowuok e dho rangach ma yo nyandwat ne en bede* 100 to lachne ne en bede 50. 3 Ne en e kind laru ma iye ma lachne ne en bede 20,+ kod ndara mopa mar laru ma oko. Udi michiemeego ne ong’iyore kendo ne gin gorofe adek. 4 E nyim udi michiemeego ne nitie yo+ ma lachne en bede 10 to borne bede 100,* kendo dho udigi ne ochomo yo nyandwat. 5 Udi michiemee ma ne ni e gorofa malo ne tindo moloyo ma diere kod mapiny, nikech gorofa ka gorofa ne lach moloyo ma ne ni e wiye. 6 Ne gin gorofe adek, to ne gionge sirni kaka mag laru ma oko. Mano e momiyo udi man piny ne okawo thuolo malach moloyo ma diere, kod ma malo.

7 Bor mar ohinga ma ne ni but udi michiemee ma ne ochomo laru ma oko, kendo ma ne omanyore gi ute chiemo mamokoka ne en bede 50. 8 Bor mar udi michiemee ma ne ni but laru ma oko ne en bede 50, to bor mar udi michiemee ma ne ni but ka maler ne en bede 100. 9 Udi michiemeego ne nigi ka ma idonjogo ma ne ni yo wuok chieng’ kiwuok e laru ma oko.

10 Bende, ne nitie ute moko michiemee e ohinga manie laru mochomo yo wuok chieng’, but ka ma owe thuolo kod ot.+ 11 E nyim udigo ne nitie yo moro ma chalo gi man e nyim udi michiemee man yo nyandwat.+ Borgi kod lachgi ne romre, kendo ka ma ji ne wuokgo kod kaka nolosgi, ne chalre. Kuonde midonjogo 12 ne chal gi kuonde midonjogo e udi michiemee man yo milambo. Ne nitie rangach ka ma yo ma kalo e nyimgi chakoree but ohinga mochomo yo wuok chieng’ ma ng’ato ne nyalo donjogo.+

13 Eka nowachona niya: “Udi michiemee man yo nyandwat kod man yo milambo but ka ma ni thuolo+ gin ute maler, ka ma jodolo ma dhi e nyim Jehova chamoe misengni maler moloyo.+ Kanyo e ma giketoe misengni maler moloyo, gi chiwo mag cham, gi misengni mag richo, kod misengni mag ketho, nikech kanyo en ka maler.+ 14 Ka jodolo osedonjo kanyo, ok onego giwuog ka maler ka gidhi e laru ma oko ka pok gilonyo lepgi mag dolo,+ nimar lewnigo ler. Gibiro rwako lewni mopogore sa ma gidhi kuonde moyie ne jomamoko betie.”

15 Ka ne osetieko pimo i hekalu, ne ogola oko gi dho rangach mochomo yo wuok chieng’,+ kae to ne opimo alworano duto.

16 Ne opimo yo wuok chieng’ kotiyo gi odundu mar pimo,* mi oyudo ni en odundu 500 kiwuok konchiel nyaka komachielo.

17 Ne opimo yo nyandwat, mi oyudo ni borne ne en odundu 500.

18 Ne opimo yo milambo, mi oyudo ni borne ne en odundu 500.

19 Ne odhi yo podho chieng’, mi opimo bor mar odundu 500.

20 Ne opimo alworane duto koni gi koni. Ne en gi ohinga molwore+ ma borne ne en odundu 500,+ to lachne bende kamano. Ohingano ne pogo ka maler gi kuonde mamoko.+

43 Eka ne otera e dho rangach mochomo yo wuok chieng’.+ 2 Ka ne an kanyo ne aneno duong’ mar Nyasach Israel ka biro koa yo wuok chieng’.+ Dwonde ne chalo gi pi ma wuo,+ kendo duong’ne ne omiyo piny orieny.+ 3 Fweny ma ne aneno ne chalo gi ma ne aneno ka ne abiro mondo aketh* Jerusalem, kendo ne ochal bende gi fweny ma ne aneno e bath aora Kebar;+ mi ne apodho piny auma.

4 Eka duong’ mar Jehova nokadho e dho rangach mochomo yo wuok chieng’, modonjo e hekalu.+ 5 Roho noting’a motera e laru ma iye, kendo ne aneno ka duong’ mar Jehova opong’o hekalu.+ 6 Eka nawinjo ka ng’ato wuoyo koda e hekalu, kendo ng’atno nobiro mochung’ buta.+ 7 Ne owachona niya:

“Wuod dhano, kae e ka ma kom-lochna nitie,+ kendo e ka ma aketoe tiendena.+ Bende, abiro dak e kind Jo-Israel nyaka chieng’.+ Jo-Israel kod ruodhigi ok nochak oketh nyinga maler+ kuom dwanyo lamo maler, kata kuom lamo ringre ruodhigi mosetho. 8 Bende, ne giketo dhood hekalugi but dhood hekaluna, kendo siro mar dhoodgi but siro mar dhooda. Kor ot kende e ma nopogo kinda kodgi.+ Ne giketho nyinga maler kuom timbegi modwanyore. Omiyo, ne atiekogi ka an gi mirima mager.+ 9 Koro nyaka giwe dwanyo lamo maler kendo giket ringre mag ruodhigi mabor koda, eka anadag e diergi.+

10 “To in wuod dhano, nyis Jo-Israel wach hekaluni+ mondo giyud wich-kuot nikech richogi.+ Onego ging’e kaka ochalo. 11 Ka wigi okuot nikech gik moko duto ma gisetimo, ininyisgi kaka hekaluno chalo, kaka gik moko duto ochan e iye, kuonde ma iwuokgo, kod kuonde midonjogo.+ Bende, ininyisgi kit gedone kod chikene duto. Ndik gigo duto e nyimgi mondo giluw kaka onego ogere kendo rito chikene duto.+ 12 Ma e chik mar hekalu. Alwora duto manie wi got en ka maler moloyo.+ Ne! Ma e chik mar hekalu.

13 “Kama e kaka kendo mar misango ne rom kopim gi bat+ (ne imedo lith lwedo ang’wen e bat ka bat).* Bwoye ne en bat achiel, lachne bende ne en bat achiel. Rageng’ molworo bwoye ne romre gi lith lwedo.* Mano e kaka ne olos bwo kendono. 14 Kochakore e tiend kendono nyaka e ndiri ma piny ne en bede ariyo ka dhi malo, to lachne ne en bat achiel. Kendo kochakore ndiri matin nyaka e ndiri maduong’ ne en bede ang’wen ka dhi malo, to lachne ne en bat achiel. 15 Bor ka ma iketoe mach kodhi malo ne en bede ang’wen, bende, kendono ne nigi tunge ang’wen e kondene.+ 16 Bor kod lach mar ka ma iketoe mach ne en bede 12 koni gi koni.+ 17 Bor gi lach mar bethe kendono gie ndiri gin bede 14 koni gi koni. Gima ne olworo dhoge ne en nus bat, kendo bwoye ne en bat achiel koni gi koni.

“Raidhine nochomo yo wuok chieng’.”

18 Eka ng’atno nowachona ni, “Wuod dhano, ma e gima Jehova Wuon Loch Duto owacho: ‘Magi e chike monego oluw sa ma igero kendo mar misango, nikech kanyo e ma ibiro wang’ie misengni, kendo kiroe remo.’+

19 “‘Onego ichiw nyaruath kaka misango mar richo+ ne jodolo ma Jo-Lawi ma yawuot Zadok,+ gin e ma oyienegi biro e nyima mondo gitina,’ Jehova Wuon Loch Duto owacho. 20 ‘Inikaw remb nyaruadhno mondo iwirgo tunge ang’wen mag kendono, kaachiel gi ndiri mag kendono, kod gima olworo dhoge mondo ipwodhe.*+ 21 Bang’e, inikaw nyaruath motim-go misango mar richo mondo iwang’e pep ka ma onego owang’gie e hekalu, oko mar ka maler.+ 22 E odiechieng’ mar ariyo, inikaw nyuok ma ok ong’ol mondo itimgo misango mar richo; kendo gibiro pwodho kendo mar misango mana kaka ne gipwodhe ka gitiyo gi nyaruath.’

23 “‘Ka isetieko pwodhe, ibiro chiwo nyaruath gi nyayim ma ok ong’ol. 24 Inichiwe ne Jehova, kendo jodolo nyaka kir chumbi kuomgi,+ mi gichiwgi kaka misengni miwang’o pep ne Jehova. 25 Odiechieng’ kodiechieng’ kuom ndalo abiriyo, ibiro chiwo nyuok pile kaka misango mar richo,+ kaachiel gi nyaruath kod yim; ibiro chiwo le ma ok ong’ol. 26 Kuom odiechienge abiriyo, ginipwodh kendo mar misango mondo obed maler, kendo giniwale ne tich Nyasaye. 27 Ka odiechienge abiriyogo oserumo,+ jodolo biro chiwo misengniu miwang’o pep kod mag kuwe e kendo mar misango kochakore odiechieng’ mar aboro. Kendo anabed mamor kodu,’+ Jehova Wuon Loch Duto owacho.”

44 Ng’atno nochako oduoka gi dho rangach ma oko mar ka maler ma nochomo yo wuok chieng’,+ to ne wayudo ka dho rangano olor.+ 2 Eka Jehova nowachona niya: “Dho rangani biro siko kolor. Ok onego oyawe, kendo ok oyie ne ng’ato ang’ata kadhoe; nimar an Jehova Nyasach Israel asekadhoe,+ kuom mano, obiro siko kolore. 3 Kata kamano, jaduong’ motelo ne ji nyalo bedo kanyo mi ocham chiemo e nyim Jehova,+ nikech en jatelo. Enodonj gi agola mar dho rangano, kendo kanyo e ma obiro luwo sa mowuok.”+

4 Eka nokadho koda e dho rangach man nyandwat mi wadhi nyaka e nyim hekalu. Ka nating’o wang’a, ne aneno duong’ mar Jehova kopong’o hekalu mar Jehova.+ Omiyo, ne apodho piny auma.+ 5 Eka Jehova nowachona niya: “Wuod dhano, ket chunyi, ing’i gi wang’i, kendo ichik iti maber ne weche duto ma abiro nyisi e wi chike kod buche mag hekalu mar Jehova. Non adimba kuonde midonjogo e hekalu kod kuonde duto miwuokgo ka maler.+ 6 Kendo iniwach ne oganda Jo-Israel moseng’anyona ni, ‘Ma e gima Jehova Wuon Loch Duto owacho: “Yaye un Jo-Israel, timbeu modwanyore koro oromo. 7 Sa ma ukelo jo pinje mamoko ma pok oter chunygi kod ringregi nyangu e hekaluna, gichido hekaluna. Uchiwona chiemo, boche kod remo, to konchiel uketho singruokna kutimo gik modwanyore. 8 Ok urit giga maler e yo maber.+ Kar mano, useketo jomoko nono mondo oti e kara maler.”’

9 “‘Ma e gima Jehova Wuon Loch Duto owacho: “Wendo moro amora manie piny Israel ma chunye kod ringrene pok oter nyangu, kik donj kara maler.”’

10 “‘To Jo-Lawi ma noringo moweya+ e kinde ma Jo-Israel noweya mondo gilam sanambegi makwero,* biro kayo gima ne gichuoyo. 11 Gibiro tiyona kara maler ka girito dho rangeye+ kendo timo tije mamoko mag hekalu. Gibiro yang’o misengni miwang’o pep kod misengni ma ji ochiwo, kendo gibiro chung’ e nyim ji ka gitiyonegi. 12 Ne gitiyonegi e nyim sanambegi makwero, mi gimiyo Jo-Israel ochwanyore mopodho e richo.+ E momiyo aseting’o lweta malo mi akuong’ora ni nyaka akum-gi, kendo gibiro kayo gima ne gichuoyo,’ Jehova Wuon Loch Duto owacho. 13 ‘Ok ginichak gitina kaka jodolo, kendo ok ginisud but giga maler, kata but giga maler moloyo, to giniyud wich-kuot nikech gik modwanyore ma ne gitimo. 14 Abiro miyogi tije mamoko mag hekalu, mondo girite kendo gitim tije mamoko monego otim kuno.’+

15 “‘To jodolo ma Jo-Lawi ma yawuot Zadok,+ ma norito kara maler ka ne Jo-Israel oringo moweya,+ biro tiyona, kendo gibiro chung’ e nyima mondo gichiwna boche+ kod remo mag misengni,’+ Jehova Wuon Loch Duto owacho. 16 ‘Gin e ma gibiro donjo e kara maler, kendo gibiro sudo but mesana mondo gitina.+ Gibiro timo tije ma onego gitimna.+

17 “‘Sa ma gidonjo e laru ma iye, onego girwak lewni mag kitani.+ Ok onego girwak lewni molos gi yie rombo sa ma gitiyona e dho rangeye mag laru ma iye kata e iye. 18 Onego girwak kilemba kod onyasa molos gi law kitani.+ Ok onego girwak gimoro amora ma kelo luya. 19 Ka pok gidhi e laru ma oko ka ma ji nitieree, onego gilony lepgi mag dolo+ kendo giketgi e ute maler mag chiemo.+ Gibiro rwako lewni mopogore mondo lepgi kik pwodh ji. 20 Ok onego giliel yie wigi,+ to bende ok onego giwegi maboyo ahinya. Nyaka giwar yie wigi. 21 Jodolo ok onego omadh divai sa ma gidonjo e laru ma iye.+ 22 Ok onego gikend chi liel kata dhako ma owere gi chwore;+ to ginyalo kendo Nya-Israel ma silili, kata chi liel ma chwore ne en jadolo.’+

23 “‘Onego gipuonj joga pogruok mantie e kind gik maler kod gik mamoko; kod pogruok mantie e kind gik mogak gi gik ma ok ogak.+ 24 Gin e ma gibiro bedo jong’ad bura sa ma ji yware e wach moro;+ nyaka giyal wachno kaluwore gi buchena.+ Onego girit sewni maga+ kendo pwodho sabato maga kaluwore gi chikena kod buchena. 25 Ok onego gisud but ringre ng’at motho, nikech gibiro bedo ma ok ler, mak mana ka ng’atno en wuon-gi, min-gi, wuode, nyar owadgi, kata nyamin-gi ma pok okendi.+ 26 To bang’ ka jadolo osepwodhore, ibiro kwan-ne ndalo abiriyo. 27 To chieng’ ma obiro dhi tiyo ka maler man e laru ma iye, nyaka ochiw misango mar richone,’+ Jehova Wuon Loch Duto owacho.

28 “‘To ma e ma nobed pok margi: An e pok margi.+ Kik umigi pok moro amora e piny Israel nikech an e pokgi. 29 Gin e ma gibiro chamo chiwo mag cham,+ misengni mag richo kod misengni mag ketho.+ Gimoro amora mowalna e piny Israel, nobed margi.+ 30 Olemo mokwongo nyak kod chiwo moro amora ma ubiro golo, nobed mag jodolo.+ Onego uchiw ne jodolo mogo* mar cham ma ukwongo kayo.+ Mano biro miyo gueth osik e uteu.+ 31 Jodolo kik cham gimoro amora moyud kotho, kata ma ondiek onego, bed ni en winyo kata le.’+

45 “‘Sa ma upogo ne ji lowo,+ onego uwal ne Jehova kamoro e pinyno mondo obed mare.+ Borne onego obed bede* 25,000 to lachne bede 10,000.+ Ka ma uwalono duto nobed pok maler. 2 E i ka ma uwalono ubiro pimo kamoro ma ibiro gerie ka maler. Borne kod lachne nobed bede 500 koni gi koni,+ kendo ubiro weyo paw kwath ma en bede 50 koni gi koni.+ 3 E i ka ma uwalono, ubiro pimo kamoro ma borne en 25,000 to lachne en 10,000, kendo kanyo biro bedo ka maler, ee, gima ler moloyo. 4 Mano nobed pok maler mar jodolo+ ma dhi e nyim Jehova mondo gitine e ka maler.+ Kanyo e ma nogerie utegi kod ka maler.

5 “‘Ibiro pog ne Jo-Lawi ma tiyo e hekalu kamoro ma borne en bede 25,000 to lachne en bede 10,000,+ kendo ginibed gi ute 20 michiemee+ kaka pokgi.

6 “‘Unupog gweng’ ma borne 25,000 (ma borne romre gi mar ka maler) kendo lachne 5,000 mondo e ma obed dala maduong’.+ Enobed dala maduong’ ne Jo-Israel duto.

7 “‘Ibiro pog ne jaduong’ ma rito piny lowo momakore gi ka malerno, kod ka ma opog ne dala maduong’. Lopeno nobed yo podho chieng’ kod yo wuok chieng’. Borne chakre kiewo man yo podho chieng’ nyaka e kiewo man yo wuok chieng’ biro bedo maromre gi lowo ma ne omi dhoot ka dhoot.+ 8 Lobno e ma nobed pokne e piny Israel. Jodongo motelo ne joga ok nochak osandgi kendo,+ to ginipog lowo ne Jo-Israel kaluwore gi dhoutgi.’+

9 “Ma e gima Jehova Wuon Loch Duto owacho: ‘Un jodongo mag Israel, richo ma usetimo koro oromo!’

“‘Weuru timbeu mag gero kod sando ji, ng’aduru bura makare kendo utim gik makare.+ Weuru mayo joga mwandugi,’+ Jehova Wuon Loch Duto owacho. 10 ‘Tiuru gi rapim mowinjore, pimuru gi efa* kod bath* mowinjore.+ 11 Rapim mar efa kod rapim mar bath onego obed maromre. Bath achiel onego obed maromre gi homer* apar, efa achiel bende onego obed maromre gi homer apar. Homer e ma nobed rapim ma iporogo rapim mamoko. 12 Shekel* achiel+ onego obed marom gi gera* 20. Mane* achiel onego obed shekel 20, komed gi shekel 25, kod shekel 15.’

13 “‘Ma e chiwo ma onego ugol: kuom homer achiel mar ngano, ubiro golo efa achiel kendo unupoge diuchiel, eka unuchiw achiel kuom auchielgo. Kamano bende e kaka ubiro timo gi shairi. 14 Mo ma uchiwo ibiro pim gi rapim mar bath. Bath apar nobed marom gi kor* achiel, bath apar bende romre gi homer achiel. 15 Kendo kuom rombe 200 manie kwedh Jo-Israel, unuchiw rombo achiel. Chiwogo e ma ibiro tigo e chiwo mag cham,+ misengni miwang’o pep,+ kod misengni mag kuwe+ mondo opwodhgo ketho mag ji,’+ Jehova Wuon Loch Duto owacho.

16 “‘Ji duto modak e piny, biro chiwo gigo+ ne jaduong’ ma rito Israel. 17 Jaduong’no e ma biro chiwo gik ma itiyogo e misengni miwang’o pep,+ chiwo mag cham,+ chiwo miolo e kinde mag sewni,+ dwe manyien, Sabato,+ kod e kinde ma Jo-Israel timo sewni duto ma ochikgi ni gitim.+ Bende, en e ma obiro iko misengni miwang’o, chiwo mag cham, misengni miwang’o pep, kod misengni mag kuwe e lo Jo-Israel mondo opwodhgigo.’

18 “Ma e gima Jehova, Wuon Loch Duto owacho: ‘E odiechieng’ mokwongo mar dwe mokwongo, onego ukaw nyaruath ma onge ng’ol moro amora mondo upwodhgo richo mar ka maler.+ 19 Jadolo biro kawo moko kuom remo mitiyogo e misango mar richo, kendo enomiene e sirni mag dhout hekalu,+ e kona ang’wen mag ndiri mag kendo mar misango, kod e sirni mag rangach midonjogo e laru ma iye. 20 Mano e gima onego itim e odiechieng’ mar abiriyo mar dwe ne ng’ato ang’ata motimo richo kobothne kata motimo richo ka ok ong’eyo;+ kendo onego ipwodh hekalu.+

21 “‘E odiechieng’ mar 14 mar dwe mokwongo, ubiro timo sawo mar Pasaka.+ Ubiro chamo makate ma ok oketie thowi kuom ndalo abiriyo.+ 22 Chieng’no, jaduong’ ma rito piny biro iko nyaruath mibiro timnego misango mar richo, kod richo mag ji duto modak e piny.+ 23 Kuom ndalo abiriyogo, obiro chiwo nyaruath kod yim ma onge ng’ol mondo otimgo misango miwang’o pep ne Jehova. Bende, odiechieng’ kodiechieng’,+ obiro chiwo nyuok mitimogo misango mar richo. 24 E wi mano, obiro iko mogo efa achiel ne nyaruath ka nyaruath, kod ne yim ka yim, kaachiel gi mo ma romo hin* achiel ne efa ka efa.

25 “‘E odiechieng’ mar 15 mar dwe mar abiriyo, kuom ndalo abiriyo mibiro timie sawo,+ obiro iko misango mar richo, misango miwang’o pep, chiwo mar cham, kod mo, mana kaka notimo.’”

46 “Ma e gima Jehova, Wuon Loch Duto owacho: ‘Dho rangach midonjogo e laru ma iye kendo mochomo yo wuok chieng’+ nyaka lor+ kuom ndalo auchiel ma ji tiyoe,+ kata kamano, ibiro yawe e odiechienge mag Sabato kod dwe manyien. 2 Jaduong’ ma rito piny biro donjo gi yo agola man but rangach,+ kendo obiro chung’ but siro mar dho rangach. Jodolo biro chiwo misangone miwang’o pep kod misengnige mag kuwe. Obiro kulore e dho rangano kae to owuok. Kata kamano, rangano ok onego olor nyaka godhiambo. 3 Ji duto modak e piny bende biro kulore ne Jehova e dho rangano e odiechienge mag Sabato kod dwe manyien.+

4 “‘E odiechieng Sabato, jaduong’ ma rito piny nyaka kel ne Jehova nyirombe auchiel kod yim achiel ma onge gi ng’ol mondo otimgo misango miwang’o pep.+ 5 Bende, obiro kelo chiwo mar cham ma romo efa* achiel ne yim, gi gimoro amora monyalo chiwo ne nyiyimbego, kod mo ma romo hin* achiel ne efa ka efa.+ 6 E odiechieng dwe manyien, obiro kelo nyaruath, nyiyimbe auchiel, kod yim achiel; jamnigo duto ok onego obed gi ng’ol.+ 7 Obiro kelo chiwo mar cham ma romo efa achiel ne nyaruadhno, kod efa machielo ne yimno, kaachiel gi gimoro amora monyalo chiwo ne nyiyimbego. Bende, onego okel mo ma romo hin achiel ne efa ka efa.

8 “‘Jaduong’ ma rito piny biro donjo gi yo agola man but rangach, kendo mano e yo ma obiro wuokgo.+ 9 E kinde ma ji obiro e nyim Jehova mondo gitim sawo moro amora,+ jo ma odonjo gi dho rangach ma yo nyandwat+ onego owuog gi dho rangach ma yo milambo,+ to jo ma odonjo gi dho rangach ma yo milambo onego owuog gi dho rangach ma yo nyandwat. Ng’ato ang’ata ok onego owuog gi dho rangach ma odonjogo, to onego owuog gi dho rangach momanyore gi modonjogono. 10 Jaduong’ moro amora ma rito piny manie kindgi, bende biro donjo kodgi kendo obiro wuok kodgi. 11 E kinde mag sewni kaachiel gi odiechienge mamoko mowal, obiro kelo chiwo mar cham ma romo efa achiel ne nyaruath, efa machielo ne yim, gi gimoro amora monyalo chiwo ne nyiyimbe, kod mo ma romo hin achiel ne efa ka efa.+

12 “‘Ka po ni jaduong’ ma rito piny okelo misango miwang’o pep+ kata misango mar kuwe kaka chiwo mogolo ne Jehova kohero, ibiro yawne rangach momanyo yo wuok chieng’ mondo okel misangone miwang’o pep kod misangone mar kuwe mana kaka ojatimo e odiechieng Sabato.+ To ka osewuok, ibiro lor dho rangano.+

13 “‘Pile ka pile gokinyi, unuchiw nyayim ma hike achiel kaka misango miwang’o pep ne Jehova.+ 14 Onego uchiwe kaachiel gi chiwo mar cham ma romo efa achiel kuom auchiel, kod mo ma romo hin achiel kuom adek. Ibiro kir morno e wi mogo mayom, kendo ibiro chiwe pile kaka chiwo mar cham ne Jehova. Mano nobednu chik mosiko nyaka chieng’. 15 Pile ka pile gokinyi, onego gichiw yim achiel, chiwo mar cham, kod mo mondo otimgo misango miwang’o pep.’

16 “Ma e gima Jehova, Wuon Loch Duto owacho: ‘Ka jaduong’ ma rito piny omiyo yawuote mwandu mondo obed pokgi, mwandugo nobed mar yawuotego. En pok ma giyudo kuom wuon-gi. 17 To ka ochiwo mwanduno ne jatichne moro, mwanduno nobed mar jatichne nyaka e higa ma iweyoe ji thuolo;+ eka mwanduno nodog e lwet jaduong’no. Mana mwandu ma omiyo yawuote, e ma nobed margi chuth. 18 Jaduong’no ok onego oma ji mwandugi e yo moro amora, to onego opog ne yawuote mana mwandune owuon. Ok onego oriemb ng’ato ang’ata e lope.’”

19 Eka ng’atno ne okadho koda e rangach+ ma ne ni but ka ma idonjogo e ute maler michiemee ma nochomo yo nyandwat.+ Mago ne gin ute maler mowal ne jodolo. E giko udigo, ne aneno kamoro man yo podho chieng’. 20 Nowachona niya: “Kae e ka ma jodolo biro chwakoe misango mar ketho kod misango mar richo, kendo kanyo e ma gibiro tedoe chiwo mar cham,+ mondo kik gidhi e laru ma oko gi gik maler, di po ka gipwodho ji.”+

21 Bang’e, ne otera e laru ma oko mi okadho koda e kona ka kona mar laruno, kendo ne aneno laru e kona ka kona mar laru ma okono. 22 Bor mar laru ka laru ma ne ni e konde mag laruno ne en bede 40* to lachne ne en bede 30. Laru ang’wen-go duto ne romre. 23 Ne nitie ndiri ma nolworo moro ka moro kuomgi. E tiend ndirigo ne olos kamoro ma inyalo chwakie misengni. 24 Eka ng’atno ne owachona niya: “Magi e ute tedo ma jotich hekalu tedoe misengni ne ji.”+

47 Ng’atno ne ochako oduoka e dho ranga hekalu,+ kendo kanyo ne aneno pi mamol koa e bwo dhood hekalu kochomo yo wuok chieng’,+ ka ma hekalu bende ne ochomoe. Pigno ne mol yo korachwich mar hekalu, to kendo mar misango ne ni yo milambo.

2 Eka ng’atno ne ogola oko gi dho rangach ma yo nyandwat+ mi olworo koda nyaka e rangach mochomo yo wuok chieng’,+ kendo ne aneno pi ka ton gi yo korachwich.

3 Ng’atno nodhi yo wuok chieng’ ka oting’o tol ma ipimogo e lwete,+ ne opimo bede* 1000 mi onyisa ni ayor pi. Pigno ne chopo e ombong’ tienda.

4 Ne ochako opimo bede 1000 kendo, mi onyisa ni ayor pigno, pigno ne chopo e chonga.

Ne ochako opimo bede 1000 kendo, mi onyisa ni ayor pigno, pigno ne chopo e nungona.

5 Ne ochako opimo bede 1000 kendo, to koro aorano ne tut ma ng’ato ne nyaka go abal eka okadhi. Ne ok anyal yore.

6 Ng’atno nopenja niya: “Wuod dhano, be iseneno ma?”

Eka ne owuotho koda mi wadok e bath aorano. 7 Ka ne wachopo kanyo, ne aneno yiende mang’eny e bath aora koni gi koni.+ 8 Eka ne owachona niya: “Pigni mol kochomo yo wuok chieng’ kendo odhi nyaka Araba+ modonj e nam. Kochopo e nam,+ to pi man kuno ibiro changi. 9 Gik mangima mang’eny biro dak kamoro amora ma pigno* molie. Rech biro medore nikech pigni biro mol kuno. Ibiro chang pi nam, kendo gik moko nobed mangima kamoro amora ma pigno molie.

10 “Jolupo biro chung’ bath aorano chakre En-gedi+ nyaka En-eglaim ka ma gibiro moyoe gogni maggi. Aorano nobed gi kit rech mang’eny mana ka Nam Maduong’.*+

11 “Enobed gi thidhia, kod kuonde motimo chuodho ma ok bi changi. Pi man kuondego nobed gi chumbi.+

12 “Yien duto ma nyago olemo michamo biro dongo e bath aorano koni gi koni. Obokegi ok notwo; kendo ok giniwe nyago olembe. Gibiro nyago olemo dwe ka dwe nikech pi ma giyudo wuok ka maler.+ Ibiro cham olemb yien-go, kendo obokegi biro chango ji.”+

13 Ma e gima Jehova Wuon Loch Duto owacho: “Ma e piny ma ubiro pogo ne dhoudi 12 mag Israel, kendo Josef noyud pok ariyo.+ 14 Ne akuong’ora ni abiro chiwo pinyni ne kwereu,+ to koro asemiyougo mondo obed maru. Omiyo, ng’ato ka ng’ato biro yudo pok ma romre gi owadgi.

15 “Ma e tong’ mar piny ma yo nyandwat: Ochakore e Nam Maduong’ kokadho Hethlon+ kendo kochomo Zedad,+ 16 Hamath,+ Berotha,+ kod Sibraim, man e kind piny Damaski kod piny Hamath. Koa kanyo odhi nyaka Hazer-hatikon man but tong’ mar Hauran.+ 17 Omiyo, tong’ ma yo nyandwat biro ringo koa e nam nyaka Hazar-enan,+ obiro goyo tong’ gi piny Damaski kod Hamath.+ Ma e tong’ ma yo nyandwat.

18 “Tong’ ma yo wuok chieng’ noring e kind Hauran kod Damaski, obiro dhi nyaka Jordan kokalo e kind Gilead+ kod piny Israel. Ibiro pime chakre e tong’ man yo nyandwat, nyaka e nam* man yo wuok chieng’. Ma e tong’ ma yo wuok chieng’.

19 “Tong’ ma yo milambo biro chakre Tamar nyaka e pige mag Meribath-kadesh,+ kae to obiro dhi e Aora* nyaka e Nam Maduong’.+ Ma e tong’ ma yo milambo.

20 “Tong’ ma yo podho chieng’ en Nam Maduong’, ochakore e tong’ ma yo milambo nyaka ka ma omanyore gi Lebo-hamath.*+ Ma e tong’ ma yo podho chieng’.”

21 “Ubiro pogo pinyni e kind dhoudi 12 mag Israel. 22 Ubiro poge e kindu mondo obed pok maru kaachiel gi mar jodak mosenyuolo nyithindo e kindu. Gin bende nyaka giyud lowo sa ma upogo piny, kendo ubiro kwanogi kaka Jo-Israel. Gibiro yudo pok mana kaka dhoudi mag Israel. 23 Jopinje mamoko modak e kindu biro yudo lowo koa kuom dhoot mosebedo kodakgo,” Jehova Wuon Loch Duto owacho.

48 “Magi e nyinge dhoudi mag Israel kochakore gi ma ne ni yo nyandwat: Lop Dan+ chakore e bath yo ma dhi Hethlon nyaka Lebo-hamath,*+ kendo nyaka Hazar-enon manie tong’ Damaski gi yo nyandwat, bath Hamath.+ Lobno oa yo wuok chieng’ nyaka tong’ man yo podho chieng’. 2 Lop Asher+ ogo tong’ gi mar Dan, kochakore gi tong’ ma yo wuok chieng’ nyaka tong’ ma yo podho chieng’. 3 Lop Naftali+ ogo tong’ gi mar Asher, kochakore gi tong’ ma yo wuok chieng’ nyaka tong’ ma yo podho chieng’. 4 Lop Manase+ ogo tong’ gi mar Naftali, kochakore gi tong’ ma yo wuok chieng’ nyaka tong’ ma yo podho chieng’. 5 Lop Efraim ogo tong’ gi mar Manase+ kochakore gi tong’ ma yo wuok chieng’ nyaka tong’ ma yo podho chieng’. 6 Lop Reuben ogo tong’ gi mar Efraim,+ kochakore gi tong’ ma yo wuok chieng’ nyaka tong’ ma yo podho chieng’. 7 Lop Juda ogo tong’ gi mar Reuben,+ kochakore gi tong’ ma yo wuok chieng’ nyaka tong’ ma yo podho chieng’. 8 Lowo mowal ne Nyasaye nogo tong’ gi lop Juda, kochakore gi tong’ ma yo wuok chieng’ nyaka tong’ ma yo podho chieng’. Lachne nobed bede* 25,000+ kendo enobed gi tong’ yo wuok chieng’ kod yo podho chieng’ mana kaka lope dhoudi mamoko. E dier lobno e ma nogerie ka maler.

9 “Bor mar lowo ma ubiro chiwo ne Jehova nobed bede 25,000, to lachne nobed bede 10,000. 10 Ma e lowo ma ibiro chiw ne jodolo.+ Borne ma yo nyandwat nobed bede 25,000, to ma yo milambo bende nobed kamano. Borne ma yo podho chieng’ nobed bede 10,000, to ma yo wuok chieng’ bende nobed kamano. Ka maler mar Jehova nobed e diere. 11 Enobed mar jodolo mowal ma yawuot Zadok.+ Gin e ma ne gitiyona, kendo ne ok giweya ka ne Jo-Israel kod Jo-Lawi oweya.+ 12 Gibiro bedo gi lopgi moket tenge e bath Jo-Lawi, kuom lowo ma nowal kaka gima ler moloyo.

13 “Lop Jo-Lawi nobed e bath lop jodolo. Bor lopgino nobed bede 25,000 kendo lachne nobed bede 10,000. (Bor lobno duto nobed bede 25,000 to lachne nobed bede 10,000.) 14 Lobno e lowo maberie moloyo. Ok onego giuse, kata wile gi gima chielo, kata chiwo kamoro amora e lobno ne ng’at machielo, nimar en lowo maler e nyim Jehova.

15 “To lowo modong’ ma lachne en bede 5,000 kendo borne en bede 25,000 nobed mar jo ma odak e dala maduong’.+ Gibiro gedo, kendo kwayo jambgi kanyo. Dala maduong’ nobed e diere.+ 16 Dalano nobed ma romo kama: Tong’ne ma yo nyandwat nobed bede 4,500, to ma yo milambo bende nobed kamano. Tong’ne ma yo podho chieng’ nobed bede 4,500, to ma yo wuok chieng’ bende nobed kamano. 17 Bor ma yo nyandwat mar ka ma ikwayoe jamni nobed bede 250, to ma yo milambo bende nobed kamano. Borne ma yo podho chieng’ nobed bede 250, to ma yo wuok chieng’ bende nobed kamano.

18 “To ka modong’ e dalano biro bedo marom gi ka ma nowal ne Nyasaye.+ Borne ma yo wuok chieng’ nobed bede 10,000, to ma yo podho chieng’ bende nobed kamano. Enobed marom gi ka ma nowal ne Nyasaye. Jo ma tiyo e dalano nocham gik monyak kanyo. 19 Jo-Israel duto ma tiyo e dalano nyalo pure.+

20 “Bor mar ka ma ochiw ne Nyasaye nobed bede 25,000 to lachne bende nobed kamano. Lobno kaachiel gi dalano nobed chiwo mowal ne Nyasaye.

21 “Jaduong’ ma rito dala e ma ibiro mi lowo modong’ e bath ka ma nochiw ne Nyasaye, kaachiel gi modong’ e bath dala maduong’.+ Bor mar lobno nobed bede 25,000 gi yo wuok chieng’ kendo gi yo podho chieng’. Enobed ma romre gi lope mokiewo kode kendo ibiro miye jaduong’ ma rito piny. Lowo mowal ne Nyasaye kaachiel gi hekalu nobed e diere.

22 “Lop Jo-Lawi kod lop dala maduong’ nobed e dier lop jaduong’ ma rito piny. Lopeno nobed e kind lop Juda+ kod lop Benjamin.

23 “Lop dhoudi modong’go nobed kama: Lop Benjamin chakore yo wuok chieng’ nyaka yo podho chieng’.+ 24 Lop Simeon ogo tong’ gi mar Benjamin,+ kochakore gi tong’ ma yo wuok chieng’ nyaka tong’ ma yo podho chieng’. 25 Lop Isakar+ ogo tong’ gi mar Simeon, kochakore gi tong’ ma yo wuok chieng’ nyaka tong’ ma yo podho chieng’. 26 Lop Zebulun ogo tong’ gi mar Isakar,+ kochakore gi tong’ ma yo wuok chieng’ nyaka tong’ ma yo podho chieng’.+ 27 Lop Gad ogo tong’ gi mar Zebulun,+ kochakore gi tong’ ma yo wuok chieng’ nyaka tong’ ma yo podho chieng’. 28 Tong’ ma yo milambo mokiewo gi lop Gad biro chakre Tamar+ nyaka e pige mag Meribath-kadesh,+ kae to obiro dhi e Aora*+ nyaka e Nam Maduong’.*

29 “Mano e kaka onego opog piny ne dhoudi mag Israel+ kendo mago e ma nobed lopegi,”+ Jehova Wuon Loch Duto owacho.

30 “Magi e ma nobed rangeye miwuokgo e dalano: Ibiro pim bede 4,500 yo nyandwat.+

31 “Ibiro chak rangeye mag dalano kaluwore gi dhoudi mag Israel. Dho rangeye adek man yo nyandwat, achiel nobed mar Reuben, machielo nobed mar Juda, to modong’ nobed mar Lawi.

32 “Ibiro pim bede 4,500 yo wuok chieng’, kendo kuno bende nobed gi rangeye adek. Achiel nobed mar Josef, machielo nobed mar Benjamin, to modong’ nobed mar Dan.

33 “Ibiro pim bede 4,500 yo milambo, kendo kuno bende nobed gi rangeye adek. Achiel nobed mar Simeon, machielo nobed mar Isakar, to modong’ nobed mar Zebulun.

34 “Ibiro pim bede 4,500 yo podho chieng’, kendo kuno bende nobed gi rangeye adek. Achiel nobed mar Gad, machielo nobed mar Asher, to modong’ nobed mar Naftali.

35 “Kamano, alwora duto mar dalano nobed bede 18,000. To kochakore chieng’no, nying dalano nobed Jehova ni Kanyo.”+