“Ne Ok Odonjonigi”

KAWO siem kaka tugo en gimanyalo kelo masira.

Ei dala miluongo ni Darwin e piny Australia, ji ne timo ikruok mag chamo nyasi mag skuku e higa mar 1974 kane king’ora oywak machiwo siem ni yamb kalausi ne biro. Kindeno ne oyudo ka dalano ne pok okethi gi yamo machalo kaka mano kuom higini madirom 30 ma ne osekalo. Mar ang’o obed mopogore sani? Ng’eny ji ma ne odak Darwin ne ok ne ni masirano ne dhi bedo marach ahinya nyaka ochopo sama yamo mager ne owalo tat udi kendo muko sisi mag ute ma ne ji obworoe. Kane ochopo okinyi e odiechieng’ ma ne luwe, dalano ne odong’ gunda.

E piny Colombia, dwe mar Novemba 1985, wi got moro ne omuoch. Pe maleny ne oting’o chuodho ma oyiko ji mokalo 20,000 kuom jogo ma ne odak e dala mar Armero. Be ne onge siem ma ne ochiw motelo? Ne oyudo ka godno osebedo ka yiengni kuom dweche. Kata kamano, nikech ne giseng’iyo gi dak e tiend godno, ng’eny ji e dala mar Armero ne ok odewo. Jotend dalano ne oseyudo siem ni masira moro ne dhi bedoe kinde machiegni, to kata kamano, ne ok gitimo kinda mar miyo ji siem. Ne ichiwo lendo e redio mar miyo ji omed bedo gi geno kendo golo kuomgi luoro. Spike mag kanisa ne otigo e jiwo ji mondo okuwe mos. E seche mag odhiambo, ne nitie muoch ariyo madongo. Be in dine ijwang’o mwanduni mondo iringi? Ji manok kende ema ne otimo kinda mar tony, to jomoko ne oriwni ma nyaka odeko ahinya.

Ndalo mang’eny, josomo ma nono chal mar lowo kod kite manie bwo piny [geologists] jonyiso kama yiengni mar piny biro timore, to adier bedo kamano. Kata kamano, tek negi mondo giwach ni mano dhi timore karang’o wuon. E higa mar 1999, yiengni ma ne otimore kuonde mopogore opogore e piny mangima ne onego ji madirom 20,000. Ng’eny jogo ma ne otho ne paro ni mano ok ne nyal timore negi kata matin.

Ikawo Nade Siem Mawuok Kuom Nyasaye Owuon?

Muma ne oselero maber gik ma ne dhi timore manyiso ndalo mag giko chon ahinya ka pok gitimore. E lero wechego, Muma jiwowa mondo wapar “ndalo mag Nowa.” E “ndalogo ka ne ataro mar pi podi,” ji ne odich gi yore ma pile mag ngima, kata obedo ni chunygi ne chandore kuom wach timbe mag gero ma ne ng’eny ahinya e piny. To siem ma ne Nyasaye ochiwo kokalo kuom jatichne Noa, “ne ok odonjonigi nyaka ataro nobiro, kendo yuoyogi giduto.” (Mathayo 24:⁠37⁠-⁠39) Be in dine iwinjo siemno? Be itimo kamano sani?

Nade ka dine bed ni idak e piny Sodom, machiegni gi Nam Kado, e ndalo mag Lut, wuod owad gi Ibrahim? Chal mar pinyno ne ber maket gi paradis. Dalano ne omewo. Ji e pinyno ne ohero raha. E ndalo mag Lut, “ne gichiemo, ne gimetho, ne ging’iewo, ne gihono, ne gichuoyo, ne gigedo.” Oganda ma ne gidak e kindgi ne nigi timbe maricho ahinya mag anjawo. Be dine iwinjo siem ma ne Lut chiwo kane okwero timbe maricho? Be dine iwinjo ka onyisi ni Nyasaye ne oseng’ado mar ketho chuth dala mar Sodom? Koso dine ikawo wachno ka tugo mana kaka chwo ma ne onego okend nyi Lut ne otimo? Be dine ichako ringo kae to ilokri ng’iyo chien, mana kaka chi Lut ne otimo? Kata obedo ni jomoko ne ok okawo siemno ka gimoro, e odiechieng’ ma Lut ne owuok Sodom “mach gi kibirit nochue moa e polo, motiekogi duto.”​​—⁠Luka 17:​28, 29.

Siem ok donj ne ji mang’eny e ndalowagi. Kata kamano, ranyisigi oseket ei Wach Nyasaye mondo gibednwa kaka siem ma jiwowa mondo WABEDURU KA WARITO!

[Sanduk/Picha manie ite mar 22]

Be Ataro mar Pi Makwako Piny Duto ne Otimore Adier?

Ji mang’eny ma jo akwede wacho ni, Ooyo. Kata kamano Muma to wacho ni mano ne otimore.

Yesu Kristo owuon ne owuoyo kuom atarono, kendo ne ongima e polo kong’iyo atarono katimore.

[Sanduk/Picha manie ite mar 23]

Be En Adier Ni ne Oketh Sodom gi Gomora?

Somo mar kunyo lowo ka inono gik ma ne otimore chon nyiso ni ne okethgi.

Somo mar weche ma ne otimore chon bende wuoyo kuom wachno.

Yesu Kristo bende ne ochiwo neno ni wachno ne otimore, kendo buge mopogore opogore 14 mag Muma wuoyo kuom wachno.