Bug Muma Namba 51​—Jo Kolosai

Jandiko: Paulo

Ne Ondike: Rumi

Ne Otiek Ndike: Chiegni 60–61 E.N.

KA GIA Efeso, chwo ariyo ne odhi wuoth yor wuok chieng’ ka gikalo e gweng’ mar Asia Matin e bath Aora Menderes. Kane gisechopo e bad aorano miluongo ni Lycus, e piny Frugia, ne gilokore mi gichomo yor wuok chieng’ ka giluwo aorano malo e kind gode. Ne nitie piny maber ahinya e nyimgi: kuonde kwath mopong’ gi lum mang’eny kod kweth mag rombe. (Gik molos gi yie rombe ne kelo yuto mang’eny ne pinyno.a) Ka giidho malo e kind godego, jowuothgo ne okalo dala momewo mar Laodikia e bat korachwich ma ne en dala maduong’ mar sirkand Rumi e gweng’no. E badgi korachwich, loka mar aora, ne ginyalo neno dala mar Hierapoli, ma ne ong’ere nikech hekalu mage koda sokni mage mag pi maliet. Kanyakla mag Jokristo ne yudore kuonde ariyogo, to bende kanyakla ne nitie e taon matin mar Kolosai, chiegni mail apar malo kama ne gichomo.

² Kolosai e kama jowuothgo ne dhie. Jowuoth ariyogi ne gin Jokristo. Achiel kuomgi ne ong’eyo gweng’ mar Kolosai maber nikech ne en Ja-Kolosai. Ne en Onesimo, kendo ne en misumba ma ne dok ir ruodhe ma ne jakanyo mar kanyakla ma ne ni Kolosai. Jal ma ne tiyo gi Onesimo ne en Tukiko, ma ne ni thuolo, kendo giduto ne gin jowuoth ma ne oor gi jaote Paulo, ka giting’o barua mowuok kuom Paulo ma nondiko ne “jo maler man Kolosai, owete maradier e Kristo.” Gima wang’eyo en ni, Paulo ne ok olimo Kolosai kata matin. Kanyakla, ma ne oting’o ng’eny Jokristono ma ok ne gin Jo-Yahudi, nyalo bedo ni ne ochak gi Epafra, ma ne otiyo matek e kindgi kendo koro ne en gi Paulo e Rumi.​—Kolo. 1:2, 7; 4:12.

³ Jaote Paulo ema ne ondiko baruani, mana kaka en owuon onyiso e weche mochakogo kod motiekogo. (1:1; 4:18) Weche motiekogo bende nyiso ni ne ondiko baruani ka en e twech. Mano nyalo bedo kane en e twechne mokwongo e dala mar Rumi, e higa mar 59-61 E Ndalowa, mano ne en kinde ma ne ondike barupe mang’eny mag jiwo owete, barupe ne Jo-Kolosai ne oor kanyaachiel gi barua ne Filemon. (Kolo. 4:7-9; File. 10, 23) Nenore ni ne ondik barup Jo-Kolosai e kinde mabende ne indiko barua ne Jo-Efeso nikech paro kod weche mang’eny motigo e barupego chalre.

⁴ Onge wach manyalo miyo kiawa moro obedie ni barup Jo-Kolosai ok en adier. Bedo ni baruani yudore kanyachiel gi barupe mamoko ma Paulo ne ondiko e oboke mar Chester Beatty Na. 2 (P⁴⁶) ma osebedoe chakre chiegni higa mar 200 E Ndalowa, nyiso ni Jokristo mokwongo ne oyie ni baruano ne en achiel kuom barupe Paulo. Josomo machon masiro wach adiera mag barupe mamoko mag Paulo bende siro adiera mar barua ne Jo-Kolosai.

⁵ Ang’o mane omiyo Paulo ondiko barua ne Jo-Kolosai? Wach achiel en ni Onesimo ne dok Kolosai. Kinde matin ne osekalo bang’ Epafra dhi ir Paulo, kendo onge kiawa ni weche ma ne onyiso Paulo kuom chal Jo-Kolosai bende ne omiyo Paulo ondiko baruano. (Kolo. 1:7, 8; 4:12) Wach moro ne dwaro chendo e kanyaklano. Dinde ma kindego ne dhi ka rumo, kae to pile ne ichako dinde manyien kiriwogi gi puonj dinde moko machon. Ne nitie puonj moko mag joma ok nie din malamo Nyasaye kendo majiwo dak e ngima ma ok luw mor chuth, timbe juogi, kod makruok gi timbe kweche, timbegi duto, koriw gi tim Jo-Yahudi mar werruok gi kit chiemo mamoko kod rito odiechienge, nyalo bedo ni ne ywayo jomoko e kanyakla. Kata obedo ni ne en chandruok machalo nade, nenore ni ne en wach moromo miyo Epafra dhi wuoth mabor ahinya nyaka Rumi mondo one Paulo. Kata kamano, gima nyiso ni chandruok ne ok dhi mako kanyaklano mangima, gin weche ma Epafra ne ochiwo kuom hera kod chung’ motegno ma kanyaklano ne nyiso. Bang’ winjo wechego, Paulo ne osiro wach bedo gi ng’eyo makare kod lamo maler kane ondiko baruani ne kanyakla mar Kolosai. Baruano ne ojiwo duong’ ma Nyasaye ne omiyo Kristo ka okwedogo puonj mag dinde ma ok lam Nyasaye, tim mar lamo malaike, koda chik gi timbe Jo-Yahudi.

GIMOMIYO BUGNI KONYO

¹² Wanyalo paro kaka wach chopo mar owete ariyogo koa Rumi nolandore mapiyo e kind owete man Kolosai. Ne gihinyo chokore e od Filemon ka gin gi geno mar winjo ka isomo barua mar Paulo. (File. 2) Mano kaka baruano ne ochiwo adiera mabeyo kuom migawo mar Kristo kod gimomiyo bedo kod ng’eyo makare dwarore! Mano kaka baruano ne onyiso maler gima puonj mag dhano kod chike kod timbe Jo-Yahudi ne gin, kendo kuwe kod wach ma Kristo ne olando ne omi duong’! Mani ne en chiemb paro kod chuny ne ji duto e kanyakla​—jodong-kanyakla, chwo, mine, wuone, nyithindo, weg tich, kod jotich. Kuom adier, ne nitie puonj mabeyo ne Filemon kod Onesimo nikech ne koro gichako gidonjo kendo e tudruok mar ruoth kod misumba. Mano kaka ne omi jodong-kanyakla paro maber mar duoko kweth e puonj makare! Adiera, weche Paulo ne omiyo Jo-Kolosai omedo neno migawo margi mar tiyo ne Jehova gi chunygi duto kaka mich maduong’! Kendo puonj ne Jo-Kolosai mar bedo thuolo kuom paro kod timbe mag pinyni ma tweyo ji pod en puonj makonyo kanyakla masani.​—Kolo. 1:9-11, 17, 18; 2:8; 3:15, 16, 18-25; 4:1.

¹³ Paro maber ahinya ne jatich Nyasaye ma Jakristo yudore e Jo Kolosai 4:6: “Wachu mondo obed mang’won pile, kendo obed gi ndhadhu, mondo ung’e kaka owinjore udwok ng’ato ka ng’ato.” Weche mang’won moting’o adiera biro bedo mamit ne jogo ma nigi chuny makare kendo biro miyogi kony mosiko. Bende, lamo mar Jakristo ma obedo ka rito, mowuok kuom chuny mar erokamano, biro kelo gweth mang’eny mag Jehova: “Timuru kinda kuom lamo; rituru kulamo, kendo gouru erokamano.” Kendo mano kaka mor kod jiwruok yudore e bedo gi Jokristo! Paulo wacho ni, ‘Puonjreuru, kendo jiwreuru ng’ato gi ng’ato, weruru mamit e chunyu ne Ruoth.’ (4:2; 3:16) Ibiro yudo puonj kod paro makonyo kaka imedo somo barup Jo-Kolosai.

¹⁴ Kuom wach mar luwo Chik, baruano wacho kama: “Gigo gin mana tipo mar gik ma biro, to adiera wuon en Kristo.” (2:17) Adiera mar Kristo ema ijiwo e Jo Kolosai. Baruano wuoyo monwoyore kuom geno maber ahinya ma osekan ne jogo manie riwruok e Kristo. (1:5, 27; 3:4) Jogo nyalo bedo mamor ahinya ni Wuoro oseresogi a e pinyruodh mudho kendo oterogi “e pinyruodh Wuode mohero.” Omiyo gisebolore e bwo Jal ma en “e kido mineno mar Nyasaye ma ok ne. En gi duong’ mar wuowi makayo, kendo en gi loch kuom chuech duto, nikech kuome ema ne Nyasaye ochueyoe gik moko duto manie polo kendo manie piny, ok mana gik mineno kende, to koda ka gik ma ok ne bende, kaka loch, gi duong’, gi ruodhi, kod teko.” [Bible in Luo, 1976] Jalni owinjore maber ahinya mar locho e yo makare e Pinyruodh Nyasaye. Mano emomiyo Paulo jiwo Jokristo mowal kuom rohogo kowacho kama: “To ka osechieru kaachiel gi Kristo, dwaruru gik man malo, ka ma Kristo obet e bad Nyasaye korachwich.”​—1:12-16; 3:1.

[Weche moler piny]