Kampen ma Nochan Maber Nokelo Nyak

María Isabel en jalendo marawera kendo ma jakinda. Owuok e dala mar San Bernardo e piny Amerka ma Milambo mayudore e Chile. En kaachiel gi joodgi giwuok e oganda mar Mapuche. Joodno osebedo ka timo kinda e riwo lwedo mondo ochak kanyakla manyien e dho-Mapuche ma bende iluongo ni Mapudungun.

Kane oland ni Rapar mar tho Kristo bende ibiro tim Mapudungun, kendo ni kalatese 2,000 mag gwelo ji e Rapar ne yudore e dho-Mapuche, mano nomiyo María Isabel ochako paro matut. Ang’o ma ne onyalo timo mondo oriw tijno lwedo? Noparo kaka Joneno moko ma rowere noyudo nyak maber kane gilendo ne nyithi klas wetegi kod jopuonj. Nowuoyo gi jonyuolne e wi wachno, kendo giduto ne ging’ado ni María Isabel opar ane yo moro ma ne onyalo tiyogo e pogo kalatese mag gwelo ji e Rapar ka en e skul. Notimo chenro mane?

Mokwongo, María Isabel nokwayo rusa kuom jopuonj motelo e skundgi, mondo oyiene ogur kalatas gwelo ji e siro moro manie rangach ma ji donjogo e skul. Jopuonjgo noyiene kendo ne gipwoye kuom okang’ ma ne okawono. Chieng’ moro gokinyi kane ikwano ji e skul, japuonj maduong’ nolando wach mar gwelo ji e Rapar kotiyo gi gige kowo dwol!

Bang’e, María Isabel nokwayo kabe nonyalo dhi e klase mamoko. Bang’ kane jopuonj oseyiene, nodhi e klase duto kopenjo kabe nitie nyathi ma wacho dho-Mapuche. Owacho kama: “Ne aparo ni ne nitie nyithindo madirom 10 kata 15 e skul mangima mawuok e oganda mar Mapuche, kata kamano nafwenyo ni ne githoth. Ne achiwo kalatese 150 mag gwelo ji!”

“NOPARO NI NE IDHI LUONGNE NG’AT MORO MADUONG’”

Miyo moro ma ne oneno kalatas gwelo ji kogur e siro manie dho ranga skul nopenjo ni ng’ano ma ne nyalo lerone weche momedore e wi nyasino. Par ane kaka miyono nobwok kane onyise ni odhi openj nyathi ma nyako ma jahigini apar! María Isabel wacho kama kobwonjo: “Noparo ni ne idhi luongne ng’at moro maduong’.” Bang’ miye kalatas gwelo ji kendo lerone weche moko matin, María Isabel nopenjo miyono kama odakie mondo en kaachiel gi jonyuolne gidhi gilime mondo gipuonje weche momedore e wi Pinyruodh Nyasaye. To mano kaka jolendo 20 manie kanyakla man Mapudungun ne mor kane gineno miyono kaachiel gi Jo-Mapuche mamoko 26 ma norwako wach ka obiro e Rapar. Sani kanyaklano timo dongruok maber ahinya!

Kata bed ni in jahigini adi, donge inyalo kawo okang’ ma kamano mondo igwel nyithi skul weteni kata jotich weteni e Rapar, e twak, kata e chokruog-distrikt? Donge inyalo timo nonro e bugewa mondo iyud paro manyalo konyi e timo kamano e yo mabiro miyo iyud nyak? E wi mano, kwa Jehova roho mare maler mondo okonyi ibed gi chir mar wuoyo gi jomoko e wi Jehova. (Luka 11:13) Ka itimo kamano, to in bende inyalo wuoro mor kod jip mibiro yudo nikech timo chenro e yo maber.