WACH MADUONG’ MA GASET WUOYOE | INYALO WINJO TIEND WECHE MANIE MUMA
Ang’o Momiyo Dwarore ni Wang’e Tiend Weche Manie Muma?
“Muma en bug din mong’ere ahinya. Kata kamano, Jo-China to kiaye.”—LIN, MA A PINY CHINA.
“Ok anyal winjo tiend weche manie buge maler mar dindwa mar Jo-Hindu. Omiyo, ere kaka dawinj tiend weche manie Muma Maler?”—AMIT, MA A PINY INDIA.
“Amiyo Muma luor nikech ang’eyo ni en buk machon kendo ji mang’eny nikode. Kata kamano, an to aonge gi mara.”—YUMIKO, MA A PINY JAPAN.
Ji mang’eny e piny omiyo Muma luor. Kata kamano, nyalo bedo ni ging’eyo weche matin ahinya e Muma. Mano en gima timore ne thoth joma odak Asia, to kata mana e pinje ma ng’eny ji nigi Muma.
Omiyo, inyalo penjri ni, ‘Ang’o momiyo onego ang’e tiend weche manie Muma?’ Ka ing’eyo tiend weche manie buk malerni to mano biro konyi ng’eyo kaka inyalo . . .
Bedo gi kuwe mar chuny kod mor madier
Nyagori gi chandruoge ma bedoe e ngima joot
Kedo gi parruok mag ngima
Gero winjruok manie kindi gi joweteni
Tiyo gi pesa e yo maber
Kuom ranyisi, Yoshiko ma a e piny Japan ne gombo ng’eyo ni Muma wuoyo kuom weche mage. Omiyo ne ochako somo Muma en owuon. Noyudo ber mane? Owacho niya: “Muma osekonya ng’eyo kaka anyalo tiyo gi ngimana e yo maber sani, kendo konya bedo gi geno madier. Tinde koro aneno ka ngimana ochomo kamoro.” Amit, ma nosewuoyo motelo nochako nono Muma owuon. Owacho niya: “Ne awuoro ahinya ni kare Muma oting’o puonj ma nyalo konyo ng’ato ang’ata.”
Muma osekonyo dhano tandawuoya. Omiyo, donge inyalo kawo thuoloni inone in iwuon mondo ine kaka onyalo konyi?