Kaka Wanyalo Konyo Joma Pod Ok Wanyal Nonogo Bug Muma Puonjo
1. Be ji duto ma walendonegi yiega kawo bug Muma Puonjo e limbe mokwongo? Ler ane.
1 Ji duto ma dwaro bedo jotich Jehova nyaka ng’e gima Muma puonjo. Kata kamano, nitie jomoko maok nie dinde maluongore ni Jokristo kendo ok giyie ni Muma en Wach Nyasaye. Moko to ok oyie kuom Nyasaye kata matin kendo ok gimiyo Muma luor. Gin gige tich mage ma wanyalo tiyogo e konyo joma pok oikore kawo bug Muma Puonjo? Jolendo moko mawuok e pinje madirom 20 oseyudo ni paro maluwogi tiyonegi maber ahinya.
2. Ka ng’ato owachonwa ni ok oyie kuom Nyasaye, en ang’o monego wanon, to nikech ang’o?
2 Joma Ok Oyie Kuom Nyasaye: Ka ng’ato owachonwa ni ok oyie kuom Nyasaye, ber mondo wanon gimomiyo en gi paro ma kamano. Dibed ni puonj mawacho ni gik moko nosieko asieka kendgi maok ochuegi e momiyo ok oyie kuom Nyasaye? Dibed ni gik maricho matimore e piny kod wuondruok mag jodin ema omiyo en gi parono? Koso en nikech nopon e piny ma ipuonjoe ji ni Nyasaye onge? Samoro nyalo bedo ni oyie ayiea ni Nyasaye nitie, mak mana ni ok one gimomiyo onego oket yie kuome. Jolendo mang’eny penjoga joma kamago ni, “Be mano e paro ma isebedogo kinde duto?” kendo mano miyo jogo chiwo pachgi. Sama giwuoyo, chik iti maber kendo kik ing’adgi. Ka wafwenyo gimomiyo ng’ato ok oyie kuom Nyasaye, wabiro ng’eyo kaka wanyalo dwoke kod buk ma wanyalo miye.—Nge. 18:13.
3. Ere kaka wanyalo nyiso ni wamiyo jomamoko luor kaachiel gi gik ma giyiego?
3 Sama ichiwo dwoko, tem kik iti gi weche manyalo miyo ng’atno opar ni ichayo paro ma en-go. Jalendo moro modak e piny Amerka nowacho kama: “Gima konyo en ng’eyo ni jomamoko bende nigi ratiro mar yiero gik ma giyiego. Kar temo mana loyogi gi wach, ber penjo penjo mamiyo giparo matut kendo makonyogi ng’ado paro e yo mowinjore.” Nitie jarit-distrikt moro ma kapok ochiwo dwoko, to openjoga ng’ama owuoyogo kama: “Be isegaparo wachni e yo ma kama?”
4. Ere kaka wanyalo konyo Jo-Budha?
4 Wach mar ni nitie Nyasaye en gima wendo ahinya ne Jo-Budha. Jolendo moko e piny Britain tiyoga gi brosua mar Lasting Peace and Happiness—How to Find Them sama giromo gi joma kamago. Bang’ nono weche michakogo gi jal ma giwuoyogo, gitere e kare mawacho ni “Is There Really a Most High Creator?” kae to giluwe gi kare mawacho ni “A Guidebook for the Blessing of All Mankind.” Bang’e, ginyalo chiwone bug Muma Puonjo kendo nyise kama: “Kata obedo ni ok iyie kuom Nyasaye, puonjruok Muma nyalo konyi nikech Muma oting’o puonj makonyo e ngima mapile.” Painia moro e piny Amerka ma lendoga ne Jo-China, nowacho kama: “Ng’eny joma walendonegi ohero somo. Omiyo, gitiekoga somo buge ma wamiyogi kata kapok wadok limogi. En mana ni wach puonjruok Muma ok donjnegi. Kuom mano, ajachiwonegi brosua mar Wach Maber e limbena mokwongo nikech ondike e yo mamiyo goyo mbaka bedo mayot.” Jarit-alwora moro ma limo kanyakla matiyo gi dho China e piny Amerka wacho ni tiyo gi bug Muma Puonjo e limbe mokwongo en gima nyalore. Kata kamano, ber chako puonjruok e sula mar 2 mawuoyo e wi Muma kar chako gi sula mokwongo ma wuoyo kuom Nyasaye.
5. Ang’o momiyo horuok en gima dwarore?
5 Konyo ng’ama ok oyie kuom Nyasaye en gima kawo kinde, omiyo nyaka wahore. Limbewa mokwongo samoro ok dikony ng’ato oyie ni nitie Jachuech. Samoro mosmos onyalo chako yie ni nitie Jachuech, kata onyalo ng’eyo gimomiyo jomoko oyie kuom Jachuech.
6. Ang’o momiyo nitie joma ok odich gi Muma?
6 Joma Ok Odich gi Muma Kata Maok Oyie Kuome: Nitie jomoko ma oyie ayie ni Nyasaye nitie, to en mana ni ok gidich gi gik ma Muma puonjo nikech ok ginene kaka Wach Nyasaye. Samoro gidak e pinje maonge dinde maluongore ni Jokristo, kendo giparo ni Muma en mana bug dindego. Kata nyalo bedo ni gidak e pinje ma nitie dinde maluongore ni Jokristo, to kata kamano ji odich mana gi tije yuto, maok gipar ni Muma nyalo konyogi. Ere kaka wanyalo konyo joma kamago mondo oher Muma kendo giyie puonjore gi bug Muma Puonjo?
7. En yo mane maber mar konyo joma ok odich gi Muma mondo gibed gi siso mar nono Muma?
7 Ofiswa ma Greece nondiko kama: “Yo maber mar konyo joma ok odich gi Muma en mana elonegi Muma kendo nyisogi weche manie iye. Jolendo mang’eny osefwenyo ni Muma nigi teko mar loko chuny ng’ato moloyo wechegi giwegi. (Hib. 4:12) Neno anena nying Nyasaye kende ei Muma osemiyo jomoko oyie puonjore Muma.” Ofis ma India nondiko kama: “Ng’eyo adiera e wi tho kod gimomiyo wangima moro Jo-Hindu mang’eny. Ng’eyo ni Nyasaye osingo piny maonge buono ji bende morogi.” Jolendo mang’eny chakoga gi wuoyo kuom chandruoge manie alworagi, kendo nyiso ji kaka Muma lero ni Pinyruodh Nyasaye biro tieko chandruogego.
8. En ang’o ma wanyalo wacho ne joma ok ohero Muma mana nikech giparo ni en bug dinde maluongore ni Jokristo?
8 Ka ng’ato ok ohero Muma mana nikech oparo ni Muma en bug dinde maluongore ni Jokristo, inyalo lerone ni dindego ema osegwenyo puonj mag Muma kendo gitiyo kode marach. Ofis ma India nondiko kama: “Kinde moko chuno ni waler ne joma wawuoyogo ni dinde ok e weg Muma.” Giwacho bende ni sula mar 4 e brosua mar What Is the Purpose of Life? How Can You Find It? moro Jo-Hindu nikech olero kaka dinde mag miriambo osenjawo Wach Nyasaye kendo temo kethe. Painia moro e piny Brazil janyisoga joma olosogo niya: “Donge ditemie nono iwuon gima Muma puonjo? Nitie ji mathoth ma timo kamano, maok ochuno ni gibed jo din moro. Inyalo hum nono gi gik ma ibiro puonjori.”
9. Ang’o momiyo chunywa ok onego ojogi ka jomoko ok dwar puonjore Muma e kinde ma wakwongo limogie?
9 Jehova nono chuny ng’ato ka ng’ato. (1 Sam. 16:7; Nge. 21:2) En ema oywayo joma chunygi nikare e din madier. (Joh. 6:44) Oywayo kata mana joma pok nong’eyo gimoro amora e wi Nyasaye, kata ma pok notemo nono Muma. Tijwa mar lendo miyo joma kamago thuolo mar ‘kwo kendo ng’eyo adiera chuth.’ (1 Tim. 2:4) Omiyo, ka jomoko ok dwar puonjore Muma e kinde ma ikwongo limogie, kik chunyi jog kodgi! Ti gi gir tich moro amora mayudore mondo ikonygigo. Mosmos, inyalo terogi e bugwa ma watayogago puonjruok Muma gi ji, ma en Ang’o ma Muma Puonjo Kuom Adier?
[Sanduk e ite mar 4]
Ka wuon ot owacho ni ok oyie kuom Nyasaye, inyalo temo tiyo gi paro maluwogi:
• Inyalo penje ni, “Be mano e paro ma isebedogo kinde duto?”
• Ka en Ja-Budha, inyalo tiyo gi brosua mar Lasting Peace and Happiness—How to Find Them, e ite mag 9-12.
• Ka en ng’ama oyie ni gik moko nosieko asieka kendgi maok ochuegi, inyalo tiyo gi buge maluwogi:
Sula mag Amkeni! mawacho ni “Je, Ni Kazi ya Ubuni?”
Vidio mar Maajabu ya Uumbaji Yanafunua Utukufu wa Mungu
Brosua mag Jinsi ya Kupata Maisha Yenye Kuridhisha, kare mar 4; Maswali Matano Muhimu Kuhusu Chanzo cha Uhai; kod Uhai—Ulitokana na Muumba?
• Ka en ng’ama ok oyie kuom Nyasaye nikech chandruoge kod timbe maricho mopong’o piny, inyalo tiyo gi buge maluwogi:
Buk mar Je, Kuna Muumba Anayekujali?, sula mar 10
Brosua mag Je! Kweli Mungu Anatujali?, kare mar 6, kod What Is the Purpose of Life?, kare mar 6
• Chak tiyo gi bug Muma Puonjo mapiyo kaka nyalore bang’ ka wuon ot osechako yie ni Nyasaye nitie. Nyalo bedo maber ka ichako gi sula mar 2 kata sula moro machielo manyalo more.
[Picha e ite mar 5]
Ka wuon ot ok oyie kuom Muma, inyalo temo tiyo gi paro maluwogi:
• Non kode sula mag 17 kod 18 e bug Life—How Did It Get Here? By Evolution or by Creation?
• Ka en Ja-Hindu, ti gi brosua mar Why Should We Worship God in Love and Truth?
• Ka en Ja-Yahudi, inyalo tiyo gi brosua mar Je! Ulimwengu Usio na Vita Utakuwako Wakati Wowote? e ite mag 3-11.
• Wuo kuom gimomiyo ber tiyo gi puonj mag Muma. Ti gi:
Sula mag Amkeni! mawacho ni “Msaada kwa Ajili ya Familia”
Vidio mar The Bible—Its Power in Your Life
Brosua mag Wach Maber Mowuok Kuom Nyasaye!, somo mag 9 kod 11; Jinsi ya Kupata Maisha Yenye Kuridhisha, kare mar 2; kod Kitabu kwa Ajili ya Watu Wote, ite mag 22-26
Ka en Ja-Budha, ti gi brosua mar The Pathway to Peace and Happiness, ite mag 3-7.
Ka en Ja-Islam, ti gi brosua mar Imani ya Kweli—Siri ya Kuwa na Maisha Yenye Furaha, kare mar 3.
Kapo ni ilendo e alwora ma ji ochayoe Muma, nyalo bedo maber ka ok iwacho ni weche ma inyisogi owuok e Muma, to inyalo mana timo mano bang’ limbe mogwaro.
• Ler kaka weche ma Muma nokoro osechopo kare. Inyalo tiyo gi:
Vidio mar The Bible—Accurate History, Reliable Prophecy
Brosua mar Kitabu kwa Ajili ya Watu Wote, ite mag 27-29
• Chak tiyo gi bug Muma Puonjo mapiyo kaka nyalore ka wuon ot openjo gima Muma puonjo e wi wach moro.
[Sanduk e ite mar 6]
Ka wuon ot owacho ni: “An ok ayie kuom Nyasaye,” inyalo wacho kama:
• “Donge anyalo leroni e yo machuok gimomiyo an ayie ni nitie Jachuech?” Kae to inyalo tiyo gi paro mayudore e bug Kutoa Sababu e ite mag 390-392, kata inyalo chano mondo iterne buk moro ma isesomo e wi wachno ma nomori.
• “Ka dabed ni Nyasaye nitie, in diher ni obed ng’ama chalo nade?” Ji mang’eny wacho ni digiher lamo Nyasaye ma jahera, ma ng’ado bura kare, ma jang’wono, kendo ma ok buon ji. Inyalo tiyo gi Muma e nyise ni Nyasaye nigi kido kaka mago. (Inyalo kata mana tiyo gi bug Muma Puonjo e sula mokwongo kichako gi paragraf mar 6.)
Ka wuon ot owacho ni: “An ok ayie kuom Muma,” inyalo wacho kama:
• “Ji mang’eny wacho kamano. Jomoko paro ni Muma ok oting’o puonj moro amora mawuoyo kuom sayans kata ni puonj mag Muma ok kony. We apenjie, isesomo Muma e okang’ maromo nade? [Rit dwoko. Kae to somne weche motelo e ite mar 3 e brosua mar Kitabu kwa Ajili ya Watu Wote kendo imiye brosuano.] Nitie joma ok ohero Muma nikech jodin osetiyo kode e yo marach. Chieng’ ma aduogo, daher ni wanonie weche mayudore e ite mag 4 kod 5 e brosuani.”
• “Aseromo gi jomoko ma bende wacho kamano. Donge anyalo nyisie wach moro ma mora kuom Muma? [Som Ayub 26:7 kata Isaiah 40:22 manyiso ni Muma wacho adier e weche mag sayans.] Muma bende oting’o rieko manyalo konyo joot. Chieng’ ma aduogo, daher leroni wachno.”
• “Erokamano kuom nyisa wachno. To dabed ni Nyasaye ondiko ne dhano buk, iparo ni bugno nyalo ting’o weche kaka mage?” Kae to somne ndiko moro ei Muma mariwo lwedo paro mochiwono.