Ng’at ma Jachiwo Noyud Gueth

CHAKRE chon, jotich Nyasaye osebedo ka chiwone misengni. Kuom ranyisi Jo-Israel ne chiwo jamni kaka misengni. Jokristo to chiwoga ‘misengni mag pak.’ E wi mago, nitie misengni mamoko ma bende Nyasaye morgo. (Hib. 13:15, 16) Chiwo ne Jehova misengni kelo mor kod gueth mogundho mana kaka wadwaro neno e ranyisi ma luwogi.

Hanna ne gombo nyathi ahinya, en mana ni ne en lur. Ne olemo kosingo ne Jehova ni ka oyudo nyathi, to nodhi ‘chiwe ne Jehova ndalo duto mag ngimane.’ (1 Sa. 1:10, 11) Bang’e Hanna ne omako ich mi onyuolo nyathi ma wuoyi, kendo nochake ni Samuel. Ka Samuel noseweyo dhoth, Hanna ne ochiwe e tabenakel kaka nosesingo ne Jehova. Mano nomiyo Jehova oguedho Hanna ahinya. Bang’e ne onyuolo nyithindo mamoko abich, kendo Samuel nobedo janabi kendo jandik Muma.—1 Sa. 2:21.

Mana kaka Hanna gi Samuel, Jokristo ma ndalogi bende chiwo ne Jehova ngimagi mondo gitine. Yesu nosingo ni ne idhi guedh joma chiwore e yo ma kamano.—Mar. 10:28-30.

E kinde Jokristo mokwongo, ne nitie miyo moro miluongo ni Dorkas ma nong’ere ahinya nikech “ne ogundho gi timbe mabeyo kendo nochiwo mich mag konyo jochan.” Kata kamano, “nobedo ma tuo mi notho,” kendo thoneno nokelo kuyo maduong’ e kanyakla. Ka ne jopuonjre owinjo ni Petro ne ni machiegni, ne gikwaye mondo odhi irgi. Mano kaka ne gimor ka ne Petro odhi ma ochiero Dorkas. Mano e chier ma ne joote ohango timo. (Tich 9:36-41) Jehova ne pod paro yo ma Dorkas ne chiworego. (Hib. 6:10) Chiwruokneno ne ondik e Muma mondo opuonjwa.

Jaote Paulo bende ne oketo ranyisi maber kuom chiwo thuolone mang’eny e tij Nyasaye. Ka ne ondiko ne Jokristo ma ne ni Korintho, nowacho kama: “An abiro mor chiwora kendo tiyo nyaka arum chuth nikech un.” (2 Kor. 12:15) Gik ma ne otimore e ngima Paulo ne opuonje ni chiwruok e konyo jomamoko kelo mor kendo miyo Jehova guedhowa.—Tich 20:24, 35.

Kuom adier, Jehova mor ahinya sama watiyo gi thuolowa kod tekowa e siro weche Pinyruoth kaachiel gi konyo Jokristo wetewa. To be nitie yore mamoko ma wanyalo sirogo tij Pinyruoth? Ee, nitie! Achiel kuom yorego en chiwo pesa misirogo tijwa. Pesa ma wachiwo itiyogo e siro tijwa mar lendo. Mano oriwo rito jomisonari kod jomamoko ma tiyo ne Nyasaye kuom thuologi duto e yo makende. Chiwogo itiyogo bende e loko buge kendo goyogi, loso vidio, konyo joma oyudo masira, kendo gero Ute Romo. Wabeduru gadier ni chiwo ma wagolo miyo Jehova duong’ kendo obiro guedhowa.—Nge. 3:9; 22:9, NW.

Kaka Jomoko Yiero Golo Chiwo ne Tij Piny Mangima

Mana kaka e ndalo Paulo, kindegi bende ji mathoth ‘ketoga gimoro tenge’ mondo gichiw e sanduge mondik ni “Tij Piny Mangima” ma yudore e kanyaklagi. (1 Kor. 16:2) Dwe ka dwe, kanyaklago oro pesago ne ofis mar Joneno mag Jehova ma tayo tij lendo e pinygi. Bende, joma ohero nyalo oro chiwogi kigin ne riwruok mopwodhi ma Joneno mag Jehova tiyogo e pinygi. Mondo ing’e nying riwruok ma Joneno tiyogo e pinyu, tudri gi ofisgi. Adres mag ofise Joneno yudore e websait mar www.jw.org/luo. Yore ma ng’ato nyalo gologo chiwo gin ma luwogi:

CHIWO MIORO ACHIEL KACHIEL

Jomoko gologa chiwo kuom nyiso bengi ma ginie gi akaunt mondo obwas pesagi kae to oor ne ofis achiel kachiel, kata ginyalo tiyo gi kad mitiyogo e chudo (debit card kod credit card). E ofise mamoko ng’ato nyalo oro chiwo ma achiel kachielgo kotiyo gi websait mar jw.org kata websait mamoko moyiedhi.
Ng’ato nyalo hero golo chiwo mag pesa kata mwandu mamoko ma nengogi tek. Onego ondik barua bende ma nyiso ni pesa kata gik moorogo gin chiwo.

CHIWO MIBIRO DWOK BANG’E

Ng’ato nyalo chiwo pesa mondo otigo e tij piny mangima, to ibiro dwokne bang’e kodwarogi.
Onego ondik barua ma nyiso ni chiwono ibiro dwokne bang’e.

**CHIWO MOCHAN (CHARITABLE PLANNING)**

Mopogore gi golo pesa kaka mich kod mwandu mamoko ma nengogi tek, nitie yore mamoko bende minyalo gologo chiwo mondo okony tij Pinyruoth mitimo e piny mangima. Yorego ondik piny kae. Ka diher tiyo gi achiel kuom yoregi, tudri gi ofis ma tayo tij lendo e pinyu mondo ing’e yore mowinjore kodi. To nikech chike ma tayo wach golo osuru opogore opogore, ber ka iwuoyo gi joma olony e weche mag osuru ka pok iyiero yo maberni.

Insuarens kod Pes Ritaya: Inyalo keto achiel kuom nyinge riwruoge ma Joneno mag Jehova tiyogo e pinyu mondo riwruogno e ma obi oyud chudo mar insuarens kata penson mari kiseritaya.

Akaunt mag Bengi: Ng’ato nyalo yiero mondo pesa duto ma en-go e akaunt mag bengi obi omi riwruok ma Joneno mag Jehova tiyogo e pinygi ka po ni otho.

Stok kod Bond: Stok kod bond inyalo chiw kaka mich ne riwruok ma Joneno mag Jehova tiyogo, mondo riwruogno e ma oyud chudo ka po ni wuon stok kata bond otho.

Ute gi Puothe: Ute kod puothe inyalo chiw ne riwruok ma Joneno mag Jehova tiyogo, to kapo ni en ot kata puodho ma wuon-go pod odakie, onyalo dhi nyime dakie nyaka chieng’ otho.

Wil kod Trusts: Mwandu kata pesa inyalo mi achiel kuom riwruoge ma Joneno mag Jehova tiyogo kokalo kuom wil kata trusts mondiki ka luwore gi chik sirkal. Chenrono nyalo miyo sirkal ong’ad ne jal mogolo chiwono osuru.

Mana kaka wach motigo ni “chiwo mochan” nyiso, chiwo kaka mago dwaro ni jal ma gologi otim chenro motelo. Mondo okony joma diher golo chiwo mochan, osego brosua miluongo ni Charitable Planning to Benefit Kingdom Service Worldwide e dho Ingresa kod dho Spain. Ne ogo brosuano mondo oler yore mopogore opogore ma inyalo golgo chiwo kata mich gie sani kata bang’e ka ng’ato osetho. Moko kuom weche moket e brosuano samoro ok odonjre gi chike ma tayo weche mag osuru pinyu. Ji mang’eny osebedo gi nyalo mar konyo tijwa mitimo e piny mangima, kendo osegonygi kuom chulo osuru mang’eny nikech timo kamano. Ka brosuano yudore e piny midakie, inyalo kwayo jagoro mar kanyaklau omiyi kopi.

Mondo iyud weche momedore, di kama wacho ni “Gol Chiwo mar Siro Tijwa e Piny Ngima” ma yudore piny mogik ka iyawo jw.org/luo, kata inyalo tudori gi ofis mar Joneno mag Jehova ma ni e pinyu.