‘Bed Motang’ Mondo Ng’ato Kik Keti e Tuech’!

1. Ka luwore gi Jo-Kolosai 2:4, 8, ere kaka Satan temo keto ji e tuech?

SATAN dwaro wuondowa mondo wawe tiyo ne Jehova. Otimo mano kuom temo loko pachwa ka dwache maduong’ en ketowa e tuech mondo watim gik modwaro. Otemo wuondowa mondo waluwe kotiyo gi gik mong’eyo ni nyalo lombowa mayot.​—Som Jo-Kolosai 2:4, 8.

2-3. (a) Ang’o momiyo ber luwo siem ma imiyowa e Jo-Kolosai 2:8? (b) En ang’o ma wadwaro nono e sulani?

² Be en adier ni Satan nyalo wuondowa mi wachak timo dwache? Ee, nyalore! Par ni weche ma Paulo nondiko e Jo-Kolosai 2:8 ne ok ondik ne joma ok lam Jehova. Nondiko wechego ne Jokristo mowal gi roho. (Kol. 1:2, 5) Ka koro Satan ne nyalo wuondo Jokristogo, mano nyiso ni wan be onyalo wuondowa e okang’ malach ahinya. (1 Kor. 10:12) Nikech ang’o? En nikech Satan ne oselwar e piny ka kendo koro tich maduong’ motimo en wuondo jotich Jehova. (Fwe. 12:9, 12, 17) E wi mano, wadak e kinde ma joma richo kod joma pando kitgi “medo bedo maricho moloyo.”​—2 Tim. 3:1, 13.

³ E sulani, wadwaro neno kaka Satan tiyo gi “wuond manono” mondo olokgo pachwa. Wadwaro wuoyo e wi riekni moko adek mopondo motiyogo. (Efe. 6:11) Kae to e sula ma luwo mae, wabiro neno kaka wanyalo golo paro moko maricho ma nyalo bedo ni Satan noserwako e pachwa. Mokwongo tik-tik, we wane ane gima wanyalo puonjore e yo ma Satan nowuondogo Jo-Israel bang’ donjo e Piny ma Nosingi.

SATAN NOKETO JO-ISRAEL E TEM MAR LAMO NYISECHE MANONO

4-6. Ka luwore gi Rapar mar Chik 11:10-15, en lokruok mane ma notimore e ngima Jo-Israel kodok korka weche mag pur bang’ donjo e Piny ma Nosingi?

⁴ Satan notiyo gi rieko e keto Jo-Israel e tem mar lamo nyiseche manono. Notimo mano nade? Nong’eyo maler ni Jo-Israel ne nyaka chiem, omiyo notiyo gi wach chiemo mondo gitim gima nodwaro. Ka ne Jo-Israel odonjo e Piny ma Nosingi, ne nyaka gilok yoregi mag pur. Ka ne gin Misri, ne gitiyo gi pi Aora Nile mondo giol ne cham. Kata kamano, ka ne gidonjo e Piny ma Nosingi, yore mag pur nopogore nikech ji ne ritoga koth ma ne chue mana kuom dweche moko kod tho ma moko e lum, to ok tiyo gi pi aora ma ne yudore mathoth e piny Misri. (Som Rapar mar Chik 11:10-15; Isa. 18:4, 5) Omiyo, Jo-Israel koro ne nyaka puonjre yore pur ma nitiyogo e Piny ma Nosingi. Mano ne ok dhi bedonegi mayot ahinya nikech thoth joma bet nong’eyo weche pur nosetho te e thim.

⁵ Jehova nonyiso joge ni kit ngimagi koro ne oselokore. Kae to nomiyogi siem moro ma ka ng’ato ong’iyo awiye wiye to nyalo nenore ni ok otudore gi weche pur. Nowachonegi niya: “Ritreuru mondo kik ulal, mi uti ni nyiseche mamoko kendo ulamgi.” (Rap. 11:16, 17, The Bible in Luo, 1976) Ang’o momiyo Jehova nomiyogi siem e wi lamo nyiseche manono to weche pur e ma ne owuoye kodgi?

⁶ Jehova nong’eyo ni Jo-Israel ne nyalo donjo e tem mar dhi ir ogendni ma ne lamo nyiseche manono mondo opuonjgi yore mag pur ma ne gitiyogo. Adiera en ni ogendnigo ne ong’eyo ahinya weche pur moloyo Jo-Israel kendo Jo-Israel ne nyalo puonjore gik mathoth kokalo kuomgi. Kata kamano, mano ne nyalo ketogi e tem. Jo-Kanaan ne lamo Baal, kendo puonj motudore gi lamo Baal e ma ne tayogi nyaka e weche mag pur. Ne giyie ni Baal e wuon boche kendo ni en e ma nochiwoga koth. Jehova ne ok dwar ni joge ochak yie gi puonj mag miriambogo. Kata kamano, kinde ka kinde, Jo-Israel ne weyoga Jehova mi gichak lamo Baal. (Wuok 25:3, 5; Bura 2:13; 1 Ru. 18:18) Koro, ne ane kaka Satan norwako Jo-Israel e tuech.

YORE ADEK MA SATAN NOTIYOGO MONDO OKET JO-ISRAEL E TUECH

7. En tem mane ma Jo-Israel ne oromogo ka ne gidonjo e Piny ma Nosingi?

⁷ Yo mokwongo ma Satan notiyogo en tiyo gi gombo maber ma ji duto nyaloga bedogo mar neno ka koth chue mondo chambgi odhi maber. Koth ne tin-ga ahinya e Piny ma Nosingi kochakore April nyaka Septemba higa ka higa. Koth ma ne chuega kochakore Oktoba e ma ne konyoga ji ahinya. Satan norwako e pach Jo-Israel ni ne nyaka gidonj e timbe ogendni ma ne olworogi mondo e ka ngimagi odhi maber. Nitie timbe moko ma ogendnigo ne neno ni nyaka gitim mondo e ka nyisechegi okelnegi koth. Joma ne oseweyo bedo gi yie kuom Jehova ne neno ni mano e yo kende ma ne inyalo geng’go oro, omiyo, ne gitimo timbe mag ogendnigo ka gimiyogo Baal duong’.

8. En yo mane mar ariyo ma Satan notiyogo? Ler ane.

⁸ Yo mar ariyo ma Satan notiyogo e wuondo Jo-Israel en lombogi kotiyo gi gombo mag terruok. Lamo mag ogendni ma ne olworo Jo-Israel noriwo timo timbe mochido mag terruok. Kit lamo ma galagalano ne oriwo nyaka mon kod chwo ma ne terore kuonde ma ne gichokoree ne lamo. Chwo ma terore gi chwo kod mon ma terore gi mon kaachiel gi kit terruok mamoko, ne ji neno mana kaka gik mapile! (Rap. 23:17, 18; 1 Ru. 14:24) Ogendnigo ne neno ni timo timbego ne miyo nyisechegi guedhonegi lowo. Timbe mag terruok ma ogendnigo ne timo ka gilamo nyisechegi ne moro thoth Jo-Israel, omiyo, ne gichako lamo nyiseche manono. Gima ne gikia en ni kare Satan ne oseketogi e tuech!

9. Ka luwore gi Hosea 2:16, 17, ere kaka Satan nochocho Jo-Israel mondo kik gine pogruok e kind Jehova kod nyiseche manono?

⁹ Yo mar adek ma Satan notiyogo en chochogi mondo kik gine pogruok ma nitie e kind Jehova gi nyiseche manono. E kinde janabi Jeremia, Jehova nowacho maber ni jonabi mag miriambo ne miyo wi Jo-Israel wil gi nying Nyasachgi ma en Jehova “nikech hero Baal.” (Yer. 23:27) Nyalo bedo ni Jo-Israel noweyo tiyo gi nying Jehova ma giwile gi nying Baal, ma tiende en ni “Wuon gimoro” kata “Ruoth.” Mano ne dhi miyo ok gine pogruok malich ahinya e kind Jehova gi Baal, kendo koro ne dhi bedo ma yotnegi kiko lamo mar Baal gi mar Jehova.​—Som Hosea 2:16, 17.

YORE MA SATAN TIYOGO E WUONDO JI E KINDEWAGI

10. Gin yore mage ma Satan tiyogo e kindegi mondo owuond ji?

¹⁰ Satan pod tiyo gi yore ma notiyogo e kinde machon. Owuondo ji kotiyo gi gombo mabeyo ma ji duto nyaloga bedogo, timbe mag terruok, kod chocho pach ji mondo kik ging’e Jehova e yo maber. We wachak ane gi mogikno.

11. Ere kaka Satan osechocho pach ji mondo kik ging’e Jehova e yo maber?

¹¹ Satan chocho pach ji mondo kik ging’e Jehova e yo maber. Ka ne joote Yesu duto osetho, jomoko ma ne ketore ni gin Jokristo nochako lando puonj mag miriambo. (Tich 20:29, 30; 2 The. 2:3) Jogo nochako chocho pach ji mondo kik ging’e Nyasaye madier. Kuom ranyisi, ne gigolo nying Nyasaye e Mumbni ma ne gitiyogo kendo wile gi weche kaka “Ruoth.” Ka ne gigolo nying Nyasaye e Muma mi giwile gi “Ruoth,” nobedo matek ne ng’at ma somo Muma mondo one pogruok ma nitie e kind Jehova kod “ruodhi” mamoko minyisowa e Muma. (1 Kor. 8:5) Ne giluongo Jehova ni Ruoth to Yesu bende ne giluongo kamano, to mano osemiyo ji mang’eny ok nyal fwenyo ni Jehova kod Wuode gin ji ariyo mopogore kendo ma nigi migepe mopogore. (Joh. 17:3) Keto ji e mudho ma kamano osemiyo puonj mar ni Nyasaye en Nyadidek olandore, ma en puonj ma ok yudre e Wach Nyasaye. Mano osemiyo ji mang’eny neno ni Nyasaye ok nyal ng’e kore. Mano kaka owuondgi!​—Tich 17:27.

12. Dinde mag miriambo osebedo ka chwalo ji mondo otim ang’o, to mano osekelo ang’o ka luwore gi Jo-Rumi 1:28-31?

¹² Satan lombo ji kotiyo gi gombo mag terruok. E kinde Jo-Israel, Satan notiyo gi lamo mag miriambo mondo ochwalgo ji otim timbe mag terruok. Pod otimo mana kamano e kindegi. Dinde mag miriambo oyie gi timbe mag terruok kendo gitimo gik ma miyo timbego nenore ka gik mabeyo. Mano miyo ji mang’eny ma wacho ni gilamo Nyasaye timo timbe modwanyore ma Wach Nyasaye okwero. Jaote Paulo nowacho gima timore sama dinde mag miriambo jiwo timbe mag terruok. (Som Jo-Rumi 1:28-31.) “Timbe ma ok owinjore” oriwo kit timbe duto mag terruok moriwo nyaka chwo ma terore gi chwo kod mon ma terore gi mon. (Rumi 1:24-27, 32; Fwe. 2:20) Adier, luwo puonj mag Muma ber kendo konyo!

13. En yo mane machielo ma Satan wuondogo ji?

¹³ Satan lombo ji kotiyo gi gombo mabeyo ma ji duto nyaloga bedogo. Waduto wagomboga ni wapuonjre tije moko mondo wayud kaka dwakonyre kendo wapidh joodwa. (1 Tim. 5:8) Kinde mang’eny, wanyalo puonjore tijego ka wadhi e skul ma wasomo matek. Kata kamano, nyaka watang’. E pinje mathoth, ipuonjoga ji kaka ginyalo ng’eyo tije moko ma nyalo konyogi e ngimagi, to e wi mano, ipuonjogi bende paro moko mobam mag dhano. Gik mipuonjo ji miyo gibedo gi kiawa ka be Nyasaye nitie kendo ijiwogi mondo kik giluw puonj mag Muma. Inyisogiga ni puonj mar ni gik moko nosieko kendgi ma ok ochuegi e ma lero e yo maber kaka ngima nochakore. (Rumi 1:21-23) Puonj ma kamago kwedo “rieko mar Nyasaye.”​—1 Kor. 1:19-21; 3:18-20.

14. Paro mobam mag dhano miyo ji bedo joma chal nade?

¹⁴ Paro mobam mag dhano kwedo chike makare mag Jehova. Parogo ok kony ji mondo obed gi olembe ma roho maler nyago, kar mano, gimiyo ji bedo gi “timbe mag ringruok.” (Gal. 5:19-23) Gimiyo ji bedo gi ng’ayi kod wich teko, to mano miyo gibedo “joma oherore giwegi.” (2 Tim. 3:2-4) Kidogo opogore ahinya gi kido mar muolo kod bolruok ma ijiwo jotich Nyasaye mondo obedgo. (2 Sa. 22:28) Moko kuom Jokristo ma osedhi e yunivasiti oserwako paro mobam mag pinyni kar bedo gi paro mag Nyasaye. We wane ranyisi moro achiel ma nyisowa gima nyaloga timore sama ng’ato odhi e yunivasiti.

15-16. Gima notimore ne nyaminwa moro puonji ang’o?

¹⁵ Nyaminwa moro mosebedo ka tiyo ne Nyasaye gi thuolone duto kuom higni mokalo 15 wacho niya: “Nikech an Janeno mosebatisi, nasegasomo nyading’eny weche ma lero kaka dhi somo e yunivasiti nyalo hinyo ng’ato, kendo nasegawinjo ka ji mang’eny wacho kamano. Kata kamano, ne ok akawo wachno mapek. Chunya ne wuonda ni an to ne ok anyal kethora.” Noromo gi pek mage? Owacho kama: “Gik ma ne asomoga e yunivasiti ne kawo thuolona mang’eny ahinya. Omiyo, nabedoga modich ma kata thuolo mar wuoyo gi Jehova e lamo ne aongego. Ne aolga ma kata lendo ne ji nayudo ka tekna, kendo iko chokruok e yo malong’o bende ne tama. Gima ber en ni nafwenyo ni bedo e yunivasiti ne miyo winjruokna gi Jehova kethore, omiyo, naweyo mana gikanyo.”

¹⁶ Dhi e yunivasiti nomiyo nyaminwano ochako bedo gi paro mane? Owacho niya: “Kiwacho adier, aluor kata wacho kaka yunivasiti noketha. Gik ma ne apuonjora kuno nomiyo abedo ng’at ma dondore ahinya, to moloyo namanyoga mana ketho matindo tindo kuom owete gi nyimine. Ne anenogi kaka joma ok onego otim makosa moro amora, kendo nabedo mabor kodgi. Nokawa kinde malach mondo agol kido marichogo. Gima notimorenano nopuonja ni tamruok luwo siem ma Wuonwa ma ni e polo chiwo kokalo kuom riwruok mar ogandane kelo mana hinyruok. Jehova ong’eya moloyo kaka ang’eyora. Ma di ne awinjie siem ma Jehova chiwo!”

17. (a) En wach mane monego wang’ad e chunywa? (b) En ang’o ma wabiro puonjore e sula ma luwo?

¹⁷ Ng’ad e chunyi ni ok ibi iyie mondo ‘riekni mag pinyni kod wuond manono’ mag Satan oketi e tuech. (1 Kor. 3:18; 2 Kor. 2:11) Kik iyie mondo Satan ochoch pachi ma iwe makori gi Jehova. Luw chike makare mag Jehova, kendo kik iwe Satan wuondi ma ichak chayo siem ma Jehova miyowa. To nade ka ifwenyo ni isechako bedo gi paro mag pinyni? Sula ma luwo mae biro leronwa kaka Wach Nyasaye nyalo konyowa muko paro kod timbe ma nyalo bedo ni osegurore motegno kuomwa.​—2 Kor. 10:4, 5.